ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠠᠷᠪᠠᠨ ᠨᠢᠭᠡ
ᠳ᠋ᠠᠸᠢᠳ᠋ ᠪᠠ ᠪᠠᠲ᠋ᠱᠧᠪᠠ
1 ᠵᠢᠯ ᠭᠠᠷᠤᠭᠠᠳ ᠬᠠᠭᠠᠳ ᠤᠨ ᠳᠠᠢᠨ ᠳᠤ ᠮᠣᠷᠳᠠᠬᠤ ᠴᠠᠭ ᠪᠣᠯᠣᠯᠠ᠃ ᠳ᠋ᠠᠸᠢᠳ᠋ ᠶᠣᠶᠠᠪ ᠢ ᠥᠪᠡᠷ ᠦᠨ ᠢᠶᠠᠨ ᠬᠠᠷᠢᠶᠠᠲᠤ ᠵᠠᠩᠵᠤᠨ ᠨᠠᠷ ᠪᠣᠯᠣᠨ ᠪᠦᠬᠦ ᠢᠰᠷᠧᠯ ᠤᠨ ᠴᠡᠷᠢᠭ ᠲᠠᠢ ᠬᠠᠮᠲᠤ ᠶᠠᠪᠤᠭᠤᠯᠤᠭᠰᠠᠨ ᠳᠤ᠂ ᠲᠡᠳᠡ ᠠᠮᠣᠨᠴᠤᠳ ᠢ ᠤᠰᠠᠳᠬᠠᠵᠤ᠂ ᠷᠠᠪᠠ ᠶᠢ ᠪᠦᠰᠡᠯᠡᠪᠡ᠃ ᠬᠠᠷᠢᠨ ᠳ᠋ᠠᠸᠢᠳ᠋ ᠶᠧᠷᠦ᠋ᠰᠠᠯᠧᠮ ᠳᠤ ᠦᠯᠡᠳᠡᠵᠡᠢ᠃
2 ᠣᠷᠣᠢ ᠪᠣᠯᠵᠤ ᠪᠠᠢᠪᠠ᠃ ᠳ᠋ᠠᠸᠢᠳ᠋ ᠣᠷᠣ ᠠᠴᠠ ᠪᠠᠨ ᠪᠣᠰᠴᠤ᠂ ᠬᠠᠭᠠᠨ ᠤ ᠣᠷᠳᠣᠨ ᠤ ᠳᠡᠭᠡᠪᠦᠷ ᠳᠡᠭᠡᠷᠡ ᠭᠠᠷᠴᠤ ᠠᠯᠬᠤᠯᠠᠵᠤ ᠪᠠᠢᠭᠠᠳ ᠪᠡᠶᠡ ᠪᠡᠨ ᠤᠬᠢᠶᠠᠵᠤ ᠪᠠᠢᠭᠰᠠᠨ ᠨᠢᠭᠡᠨ ᠡᠮᠡᠭᠲᠡᠢ ᠶᠢ ᠳᠡᠭᠡᠪᠦᠷ ᠳᠡᠭᠡᠷᠡ ᠡᠴᠡ ᠬᠠᠷᠠᠵᠠᠢ᠃ ᠲᠡᠷᠡ ᠡᠮᠡᠭᠲᠡᠢ ᠲᠤᠩ ᠭᠤᠸᠠ ᠦᠵᠡᠰᠬᠦᠯᠡᠩ ᠪᠠᠢᠪᠠ᠃ 3 ᠳ᠋ᠠᠸᠢᠳ᠋ ᠬᠥᠮᠦᠨ ᠶᠠᠪᠤᠭᠤᠯᠵᠤ᠂ ᠲᠡᠷᠡ ᠡᠮᠡᠭᠲᠡᠢ ᠶᠢᠨ ᠲᠤᠬᠠᠢ ᠯᠠᠪᠯᠠᠭᠤᠯᠤᠭᠰᠠᠨ ᠳᠤ᠂ ᠨᠥᠭᠥᠭᠡ ᠬᠥᠮᠦᠨ᠄ 《ᠲᠡᠷᠡ ᠪᠣᠯ ᠾᠢᠲ ᠬᠥᠮᠦᠨ ᠦᠦᠷᠢᠶᠠ ᠶᠢᠨ ᠡᠬᠡᠨᠡᠷ᠂ ᠡᠯᠢᠶᠠᠮ ᠤᠨ ᠥᠬᠢᠨ ᠪᠠᠲ᠋ᠱᠧᠪᠠ ᠪᠢᠰᠢ ᠤᠤ︖》 ᠭᠡᠪᠡ᠃ 4 ᠳ᠋ᠠᠸᠢᠳ᠋ ᠡᠯᠴᠢᠳ ᠶᠠᠪᠤᠭᠤᠯᠵᠤ᠂ ᠲᠡᠭᠦᠨ ᠢ ᠠᠪᠴᠢᠷᠠᠭᠤᠯᠪᠠ᠃ ᠡᠮᠡᠭᠲᠡᠢ ᠲᠡᠭᠦᠨ ᠳᠡᠭᠡᠷᠡ ᠢᠷᠡᠭᠰᠡᠨ ᠳᠦ᠂ ᠳ᠋ᠠᠸᠢᠳ᠋ ᠲᠡᠭᠦᠨ ᠲᠡᠢ ᠤᠨᠲᠠᠪᠠ᠃ ᠲᠡᠷᠡ ᠡᠮᠡᠭᠲᠡᠢ ᠰᠠᠷᠠ ᠶᠢᠨ ᠲᠡᠮᠳᠡᠭ ᠡᠴᠡ ᠪᠡᠨ ᠳᠥᠩᠭᠡᠵᠢ ᠴᠡᠪᠡᠷᠰᠢᠭᠰᠡᠨ ᠪᠠᠢᠵᠠᠢ᠃ ᠲᠡᠷᠡ ᠭᠡᠷ ᠲᠡᠭᠡᠨ ᠪᠤᠴᠠᠭᠰᠠᠨ ᠤ ᠳᠠᠷᠠᠭᠠ᠂ 5 ᠬᠥᠯ ᠬᠦᠨᠳᠦ ᠪᠣᠯᠣᠭᠰᠠᠨ ᠢᠶᠠᠨ ᠮᠡᠳᠡᠭᠡᠳ ᠳ᠋ᠠᠸᠢᠳ᠋ ᠤᠷᠤᠭᠤ ᠬᠥᠮᠦᠨ ᠶᠠᠪᠤᠭᠤᠯᠵᠤ᠄ 《ᠪᠢ ᠵᠢᠷᠮᠦᠰᠦᠨ ᠪᠣᠯᠣᠯᠠ》 ᠭᠡᠵᠦ ᠬᠡᠯᠡᠭᠦᠯᠪᠡ᠃
6 ᠳ᠋ᠠᠸᠢᠳ᠋ ᠶᠣᠶᠠᠪ ᠤᠷᠤᠭᠤ ᠬᠥᠮᠦᠨ ᠶᠠᠪᠤᠭᠤᠯᠵᠤ᠄ 《ᠾᠢᠲ ᠬᠥᠮᠦᠨ ᠦᠦᠷᠢᠶᠠ ᠶᠢ ᠨᠠᠰᠢ ᠢᠷᠡᠭᠦᠯ》 ᠭᠡᠬᠦ ᠳᠦ᠂ ᠶᠣᠶᠠᠪ ᠦᠦᠷᠢᠶᠠ ᠶᠢ ᠳ᠋ᠠᠸᠢᠳ᠋ ᠤᠷᠤᠭᠤ ᠶᠠᠪᠤᠭᠤᠯᠵᠠᠢ᠃ 7 ᠦᠦᠷᠢᠶᠠ ᠢᠷᠡᠬᠦ ᠳᠦ᠂ ᠳ᠋ᠠᠸᠢᠳ᠋ ᠲᠡᠭᠦᠨ ᠡᠴᠡ ᠶᠣᠶᠠᠪ ᠪᠣᠯᠣᠨ ᠴᠡᠷᠢᠭ ᠤᠨ ᠠᠮᠤᠷ ᠮᠡᠨᠳᠦ ᠪᠠ ᠲᠤᠯᠤᠯᠳᠤᠭᠠᠨ ᠤ ᠶᠠᠪᠤᠴᠠ ᠶᠢᠨ ᠲᠠᠯᠠ ᠪᠠᠷ ᠠᠰᠠᠭᠤᠭᠰᠠᠨ ᠤ ᠳᠠᠷᠠᠭᠠ᠂ 8 ᠦᠦᠷᠢᠶᠠ ᠳᠤ᠄ 《ᠭᠡᠷ ᠲᠡᠭᠡᠨ ᠬᠠᠷᠢᠵᠤ᠂ ᠬᠥᠯ ᠢᠶᠡᠨ ᠤᠬᠢᠶᠠᠭᠲᠤᠨ》 ᠭᠡᠪᠡ᠃ ᠦᠦᠷᠢᠶᠠ ᠬᠠᠭᠠᠨ ᠤ ᠣᠷᠳᠣᠨ ᠠᠴᠠ ᠶᠠᠪᠤᠭᠰᠠᠨ ᠳᠤ᠂ ᠬᠠᠭᠠᠨ ᠲᠡᠭᠦᠨ ᠦ ᠠᠷᠤ ᠠᠴᠠ ᠪᠡᠯᠡᠭ ᠢᠯᠡᠭᠡᠭᠰᠡᠨ ᠪᠠᠢᠪᠠ᠃ 9 ᠭᠡᠪᠡᠴᠦ ᠦᠦᠷᠢᠶᠠ ᠭᠡᠷ ᠲᠡᠭᠡᠨ ᠬᠠᠷᠢᠯ ᠦᠭᠡᠢ᠂ ᠬᠠᠭᠠᠨ ᠤ ᠣᠷᠳᠣᠨ ᠤ ᠡᠭᠦᠳᠡᠨ ᠳᠦ ᠬᠠᠭᠠᠨ ᠤ ᠬᠠᠮᠤᠭ ᠬᠠᠷᠠᠭᠤᠯ ᠲᠠᠢ ᠬᠠᠮᠲᠤ ᠤᠨᠲᠠᠵᠠᠢ᠃ 10 ᠬᠥᠮᠦᠰ ᠳ᠋ᠠᠸᠢᠳ᠋ ᠲᠤ᠄ 《ᠦᠦᠷᠢᠶᠠ ᠭᠡᠷ ᠲᠡᠭᠡᠨ ᠬᠠᠷᠢᠭᠠ ᠦᠭᠡᠢ》 ᠭᠡᠵᠦ ᠮᠡᠳᠡᠭᠳᠡᠬᠦ ᠳᠦ᠂ ᠲᠡᠷᠡ ᠦᠦᠷᠢᠶᠠ ᠳᠤ᠄ 《ᠴᠢ ᠬᠣᠯᠠ ᠶᠢᠨ ᠠᠶᠠᠨ ᠠᠴᠠ ᠢᠷᠡᠭᠰᠡᠨ ᠪᠢᠰᠢ ᠤᠤ︖ ᠶᠠᠭᠠᠬᠢᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠭᠰᠠᠨ ᠦᠭᠡᠢ ᠪᠤᠢ︖》 ᠭᠡᠪᠡ᠃ 11 ᠦᠦᠷᠢᠶᠠ ᠳ᠋ᠠᠸᠢᠳ᠋ ᠲᠤ᠄ 《ᠪᠤᠷᠬᠠᠨ ᠤ ᠠᠪᠳᠠᠷᠠ ᠴᠤ᠂ ᠢᠰᠷᠧᠯ ᠪᠣᠯᠣᠨ ᠶᠦᠳᠠ ᠶᠢᠨ ᠴᠡᠷᠢᠭ ᠴᠤ ᠮᠠᠢᠬᠠᠨ ᠳᠤ ᠬᠣᠨᠣᠨ᠂ ᠮᠢᠨᠦ ᠡᠵᠡᠨ ᠶᠣᠶᠠᠪ ᠴᠤ᠂ ᠡᠵᠡᠨ ᠦ ᠮᠢᠨᠢ ᠲᠦᠰᠢᠮᠡᠳ ᠴᠤ ᠵᠠᠳᠠᠭᠠᠢ ᠲᠠᠯᠠ ᠳᠤ ᠬᠡᠪᠲᠡᠵᠦ ᠪᠠᠢᠬᠤ ᠳᠤ᠂ ᠪᠢ ᠯᠠ ᠭᠡᠷ ᠲᠡᠭᠡᠨ ᠣᠴᠢᠭᠠᠳ ᠢᠳᠡᠵᠦ ᠤᠤᠭᠤᠨ᠂ ᠡᠬᠡᠨᠡᠷ ᠲᠡᠢ ᠪᠡᠨ ᠤᠨᠲᠠᠨᠠ ᠭᠡᠵᠢ ᠤᠤ︖ ᠲᠠ ᠪᠣᠯᠣᠨ ᠲᠠᠨ ᠤ ᠰᠦᠨᠡᠰᠦᠨ ᠦ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠪᠢ ᠲᠡᠢᠮᠦ ᠵᠦᠢᠯ ᠢ ᠣᠭᠲᠣᠬᠠᠨ ᠴᠤ ᠬᠢᠬᠦ ᠦᠭᠡᠢ》 ᠭᠡᠬᠦ ᠳᠦ᠂ 12 ᠳ᠋ᠠᠸᠢᠳ᠋ ᠦᠦᠷᠢᠶᠠ ᠳᠤ᠄ 《ᠥᠨᠥᠳᠥᠷ ᠪᠠᠰᠠ ᠡ᠊ᠨᠳᠡ ᠦᠯᠡᠳᠡᠭᠲᠦᠨ᠃ ᠮᠠᠷᠭᠠᠰᠢ ᠪᠢ ᠴᠢᠮᠠᠶᠢ ᠶᠠᠪᠤᠭᠤᠯᠤᠶᠠ》 ᠭᠡᠪᠡ᠃ ᠢᠩᠭᠢᠭᠡᠳ ᠦᠦᠷᠢᠶᠠ ᠲᠡᠷᠡ ᠡᠳᠦᠷ ᠨᠢ ᠶᠧᠷᠦ᠋ᠰᠠᠯᠧᠮ ᠳᠤ ᠦᠯᠡᠳᠡᠪᠡ᠃ ᠳᠠᠷᠠᠭᠠ ᠡᠳᠦᠷ ᠨᠢ 13 ᠳ᠋ᠠᠸᠢᠳ᠋ ᠪᠠᠰᠠ ᠲᠡᠭᠦᠨ ᠢ ᠤᠷᠢᠵᠤ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠢᠳᠡᠭᠦᠯᠵᠦ ᠤᠤᠭᠤᠯᠭᠠᠭᠰᠠᠭᠠᠷ᠂ ᠰᠣᠭᠲᠣᠭᠠᠭᠰᠠᠨ ᠪᠣᠯᠪᠠᠴᠤ ᠦᠳᠡᠰᠢ ᠨᠢ ᠲᠡᠷᠡ ᠲᠡᠨᠳᠡ ᠡᠴᠡ ᠭᠠᠷᠤᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠯ ᠦᠭᠡᠢ᠂ ᠡᠵᠡᠨ ᠦ ᠪᠠᠨ ᠬᠠᠷᠠᠭᠤᠯ ᠤᠳ ᠲᠠᠢ ᠬᠠᠮᠲᠤ ᠥᠪᠡᠷ ᠦᠨ ᠢᠶᠠᠨ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠤᠨᠲᠠᠭᠰᠠᠨ ᠪᠠᠢᠯᠠ᠃
ᠦᠦᠷᠢᠶᠠ ᠶᠢ ᠬᠥᠨᠥᠭᠡᠯᠭᠡᠪᠡ
14 ᠥᠷᠯᠥᠭᠡ ᠪᠣᠯᠬᠤ ᠳᠤ᠂ ᠳ᠋ᠠᠸᠢᠳ᠋ ᠶᠣᠶᠠᠪ ᠲᠤ ᠵᠠᠬᠢᠳᠠᠯ ᠪᠢᠴᠢᠵᠦ᠂ ᠦᠦᠷᠢᠶᠠ ᠶᠢᠨ ᠭᠠᠷ ᠢᠶᠠᠷ ᠢᠯᠡᠭᠡᠯᠡ᠃ 15 ᠲᠡᠷᠡ ᠵᠠᠬᠢᠳᠠᠯ ᠳᠡᠭᠡᠷᠡ᠄ 《ᠲᠠ ᠨᠠᠷ ᠦᠦᠷᠢᠶᠠ ᠶᠢ ᠬᠠᠮᠤᠭ ᠤᠨ ᠰᠢᠷᠦᠭᠦᠨ ᠲᠤᠯᠤᠯᠳᠤᠭᠠᠨ ᠤ ᠲᠡᠷᠢᠭᠦᠨ ᠡᠩᠨᠡᠭᠡᠨ ᠳᠦ ᠲᠠᠯᠪᠢᠭᠠᠳ ᠲᠡᠭᠦᠨ ᠢ ᠣᠷᠬᠢᠨ ᠤᠬᠤᠷᠢ᠃ ᠲᠡᠭᠡᠪᠡᠯ ᠲᠡᠷᠡ ᠴᠣᠬᠢᠭᠳᠠᠵᠤ ᠦᠬᠦᠬᠦ ᠪᠣᠯᠣᠨᠠ》 ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠯᠠ᠃ 16 ᠶᠣᠶᠠᠪ ᠬᠣᠲᠠ ᠶᠢ ᠪᠦᠰᠡᠯᠡᠵᠦ ᠪᠠᠢᠬᠤ ᠳᠠᠭᠠᠨ ᠬᠠᠮᠤᠭ ᠤᠨ ᠬᠦᠴᠦᠷᠬᠡᠭ ᠳᠠᠢᠰᠤᠨ ᠨᠤᠭᠤᠳ ᠤᠨ ᠪᠠᠢᠭᠠ ᠭᠠᠵᠠᠷ ᠢ ᠣᠯᠵᠤ ᠮᠡᠳᠡᠭᠡᠳ ᠦᠦᠷᠢᠶᠠ ᠶᠢ ᠲᠡᠨᠳᠡ ᠲᠣᠬᠢᠷᠠᠭᠤᠯᠪᠠ᠃ 17 ᠬᠣᠲᠠ ᠶᠢᠨ ᠬᠥᠮᠦᠰ ᠭᠠᠷᠴᠤ ᠢᠷᠡᠭᠡᠳ ᠶᠣᠶᠠᠪ ᠲᠠᠢ ᠲᠤᠯᠤᠯᠳᠤᠬᠤ ᠳᠤ᠂ ᠳ᠋ᠠᠸᠢᠳ᠋ ᠤᠨ ᠴᠡᠷᠢᠭ ᠤᠨ ᠵᠠᠷᠢᠮ ᠨᠢ ᠤᠨᠠᠵᠤ ᠾᠢᠲ ᠬᠥᠮᠦᠨ ᠦᠦᠷᠢᠶᠠ ᠴᠤ ᠡ᠊ᠨᠳᠡᠪᠡ᠃ 18 ᠶᠣᠶᠠᠪ ᠲᠤᠯᠤᠯᠳᠤᠭᠠᠨ ᠤ ᠪᠦᠬᠦ ᠦᠢᠯᠡ ᠶᠠᠪᠤᠳᠠᠯ ᠢ ᠳ᠋ᠠᠸᠢᠳ᠋ ᠲᠤ ᠮᠡᠳᠡᠭᠳᠡᠬᠦ ᠪᠡᠷ ᠡᠯᠴᠢ ᠶᠠᠪᠤᠭᠤᠯᠵᠤ 19 ᠵᠠᠬᠢᠨ᠄ 《ᠲᠤᠯᠤᠯᠳᠤᠭᠠᠨ ᠤ ᠪᠦᠬᠦ ᠶᠠᠪᠤᠳᠠᠯ ᠢ ᠬᠠᠭᠠᠨ ᠳᠤ ᠮᠡᠳᠡᠭᠳᠡᠵᠦ ᠳᠠᠭᠤᠰᠬᠤ ᠳᠤ᠂ 20 ᠬᠡᠷᠪᠡ ᠬᠠᠭᠠᠨ ᠠᠭᠤᠷᠯᠠᠵᠤ᠂ ᠴᠢᠮᠠ ᠳᠤ᠄ 〈ᠲᠠ ᠨᠠᠷ ᠲᠤᠯᠤᠯᠳᠤᠬᠤ ᠳᠠᠭᠠᠨ ᠶᠠᠭᠤᠨ ᠳᠤ ᠬᠣᠲᠠ ᠤᠷᠤᠭᠤ ᠲᠡᠢᠮᠦ ᠣᠢᠷᠠᠬᠠᠨ ᠣᠴᠢᠪᠠ︖ ᠬᠡᠷᠡᠮ ᠳᠡᠭᠡᠷᠡ ᠡᠴᠡ ᠲᠠ ᠨᠠᠷ ᠢ ᠬᠠᠷᠪᠤᠨᠠ ᠭᠡᠳᠡᠭ ᠢ ᠮᠡᠳᠡᠬᠦ ᠦᠭᠡᠢ ᠤᠤ︖ 21 ᠶᠧᠷᠦ᠋ᠪᠧᠱᠧᠲ ᠤᠨ ᠬᠦᠦ ᠠᠪᠢᠮᠧᠯᠧᠺ ᠢ ᠬᠡᠨ ᠴᠣᠬᠢᠵᠤ ᠠᠯᠠᠭᠰᠠᠨ ᠪᠤᠢ︖ ᠭᠠᠭᠴᠠᠬᠠᠨ ᠡᠮᠡᠭᠲᠡᠢ ᠬᠡᠷᠡᠮ ᠳᠡᠭᠡᠷᠡ ᠡᠴᠡ ᠲᠡᠭᠡᠷᠮᠡ ᠶᠢᠨ ᠪᠤᠯᠤ ᠴᠢᠯᠠᠭᠤ ᠤᠨᠠᠭᠠᠭᠠᠳ ᠲᠧᠪᠧᠽ ᠲᠤ ᠲᠡᠭᠦᠨ ᠢ ᠠᠯᠠᠭᠰᠠᠨ ᠪᠢᠰᠢ ᠤᠤ︖ ᠲᠠ ᠨᠠᠷ ᠶᠠᠭᠤ ᠭᠡᠵᠦ ᠬᠡᠷᠡᠮ ᠳᠦ ᠲᠡᠢᠮᠦ ᠣᠢᠷᠠᠬᠠᠨ ᠣᠴᠢᠪᠠ︖〉 ᠭᠡᠪᠡᠯ᠂ ᠴᠢ᠄ 〈ᠲᠠᠨ ᠤ ᠵᠠᠷᠤᠴᠠ ᠾᠢᠲ ᠬᠥᠮᠦᠨ ᠦᠦᠷᠢᠶᠠ ᠴᠤ ᠦᠬᠦᠪᠡ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃
22 ᠡᠯᠴᠢ ᠳ᠋ᠠᠸᠢᠳ᠋ ᠳᠡᠭᠡᠷᠡ ᠣᠴᠢᠵᠤ᠂ ᠶᠣᠶᠠᠪ ᠤᠨ ᠬᠡᠯᠡᠭᠦᠯᠦᠭᠰᠡᠨ ᠪᠦᠭᠦᠳᠡ ᠶᠢ ᠮᠡᠳᠡᠭᠦᠯᠪᠡ᠃ 23 ᠡᠯᠴᠢ ᠳ᠋ᠠᠸᠢᠳ᠋ ᠲᠤ᠄ 《ᠳᠠᠢᠰᠤᠨ ᠨᠤᠭᠤᠳ ᠪᠢᠳᠡᠨ ᠡᠴᠡ ᠳᠠᠪᠠᠭᠤ ᠬᠦᠴᠦ ᠪᠡᠷ ᠪᠠᠢᠯᠳᠤᠨ᠂ ᠬᠡᠭᠡᠷᠡ ᠲᠠᠯᠠ ᠳᠤ ᠭᠠᠷᠴᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠪᠢᠳᠡ ᠲᠡᠳᠡᠨ ᠢ ᠡᠭᠦᠳᠡᠨ ᠳᠦ ᠬᠦᠷᠲᠡᠯᠡ ᠰᠢᠬᠠᠪᠠ᠃ 24 ᠲᠡᠭᠡᠬᠦ ᠳᠦ ᠬᠠᠷᠪᠤᠭᠠᠴᠢᠳ ᠬᠡᠷᠡᠮ ᠳᠡᠭᠡᠷᠡ ᠡᠴᠡ ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠢ ᠬᠠᠷᠪᠤᠭᠰᠠᠨ ᠢᠶᠠᠷ ᠬᠠᠭᠠᠨ ᠤ ᠬᠡᠳᠦᠨ ᠵᠠᠷᠤᠴᠠ ᠦᠷᠡᠭᠳᠡᠵᠦ᠂ ᠲᠠᠨ ᠤ ᠵᠠᠷᠤᠴᠠ ᠾᠢᠲ ᠬᠥᠮᠦᠨ ᠦᠦᠷᠢᠶᠠ ᠴᠤ ᠡ᠊ᠨᠳᠡᠪᠡ》 ᠭᠡᠬᠦ ᠳᠦ᠂ 25 ᠳ᠋ᠠᠸᠢᠳ᠋ ᠡᠯᠴᠢ ᠳᠤ᠄ 《ᠴᠢ ᠶᠣᠶᠠᠪ ᠲᠤ ᠡᠢᠨ ᠬᠦ ᠳᠠᠮᠵᠢᠭᠤᠯ᠄ 〈ᠢᠯᠳᠦ ᠨᠢ ᠡᠨᠡ ᠲᠡᠷᠡ ᠭᠡᠵᠦ ᠢᠯᠭᠠᠯ ᠦᠭᠡᠢ ᠵᠠᠯᠭᠢᠳᠠᠭ ᠤᠴᠢᠷ ᠠᠴᠠ ᠡᠨᠡ ᠬᠡᠷᠡᠭ ᠲᠦ ᠰᠠᠨᠠᠭᠠ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ᠃ ᠬᠠᠷᠢᠨ ᠬᠦᠴᠦ ᠪᠡᠨ ᠨᠡᠮᠡᠨ ᠳᠣᠪᠲᠣᠯᠵᠤ ᠬᠣᠲᠠ ᠶᠢ ᠨᠤᠷᠠᠭᠠ〉 ᠬᠡᠮᠡᠨ ᠲᠡᠭᠦᠨ ᠢ ᠤᠷᠮᠠᠰᠢᠭᠤᠯ》 ᠭᠡᠪᠡ᠃
26 ᠦᠦᠷᠢᠶᠠ ᠶᠢᠨ ᠡᠬᠡᠨᠡᠷ ᠨᠥᠬᠥᠷ ᠦᠨ ᠢᠶᠠᠨ ᠡ᠊ᠨᠳᠡᠭᠰᠡᠨ ᠢ ᠰᠣᠨᠣᠰᠣᠭᠠᠳ ᠲᠡᠭᠦᠨ ᠦ ᠲᠥᠯᠥᠭᠡ ᠭᠠᠰᠢᠭᠤᠳᠠᠪᠠ᠃ 27 ᠭᠠᠰᠢᠭᠤᠳᠠᠯ ᠤᠨ ᠬᠤᠭᠤᠴᠠᠭᠠ ᠥᠩᠭᠡᠷᠡᠬᠦ ᠳᠦ᠂ ᠳ᠋ᠠᠸᠢᠳ᠋ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠲᠡᠷᠡ ᠡᠮᠡᠭᠲᠡᠢ ᠶᠢ ᠣᠷᠳᠣᠨ ᠳᠠᠭᠠᠨ ᠠᠪᠴᠢᠷᠠᠭᠤᠯᠤᠭᠰᠠᠨ ᠳᠤ᠂ ᠲᠡᠷᠡ ᠡᠮᠡᠭᠲᠡᠢ ᠲᠡᠭᠦᠨ ᠦ ᠡᠬᠡᠨᠡᠷ ᠪᠣᠯᠵᠤ᠂ ᠲᠡᠭᠦᠨ ᠳᠦ ᠬᠦᠦ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠪᠠᠢᠯᠠ᠃ ᠭᠡᠪᠡᠴᠦ ᠳ᠋ᠠᠸᠢᠳ᠋ ᠤᠨ ᠬᠢᠭᠰᠡᠨ ᠬᠡᠷᠡᠭ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠬᠣᠷᠣᠨ ᠮᠠᠭᠤ ᠪᠠᠢᠪᠠ᠃