ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠭᠤᠷᠪᠠ
ᠳᠣᠲᠣᠭᠣᠳᠤ ᠶᠢᠨ ᠳᠠᠢᠨ
1 ᠰᠠᠦ᠋ᠯ ᠤᠨ ᠭᠡᠷ ᠪᠣᠯᠣᠨ ᠳ᠋ᠠᠸᠢᠳ᠋ ᠤᠨ ᠭᠡᠷ ᠦᠨ ᠬᠣᠭᠣᠷᠣᠨᠳᠣᠬᠢ ᠳᠠᠢᠨ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠢᠬᠤ ᠳᠤ᠂ ᠳ᠋ᠠᠸᠢᠳ᠋ ᠬᠦᠴᠦᠷᠬᠡᠭᠵᠢᠨ ᠰᠠᠦ᠋ᠯ ᠤᠨ ᠭᠡᠷ ᠳᠣᠷᠣᠢᠲᠠᠵᠤ ᠪᠠᠢᠯᠠ᠃
2 ᠾᠧᠪᠷᠣᠨ ᠳᠤ ᠳ᠋ᠠᠸᠢᠳ᠋ ᠤᠨ ᠲᠥᠷᠥᠭᠦᠯᠦᠭᠰᠡᠨ ᠬᠥᠪᠡᠭᠦᠳ ᠭᠡᠪᠡᠯ᠂ ᠤᠤᠭᠠᠨ ᠨᠢ ᠶᠧᠽᠷᠧᠯ ᠡᠮᠡᠭᠲᠡᠢ ᠠᠾᠢᠨᠣᠶᠠᠮ ᠠᠴᠠ ᠲᠥᠷᠥᠭᠰᠡᠨ ᠠᠮᠨᠣᠨ᠂ 3 ᠬᠣᠶᠠᠳᠠᠬᠢ ᠨᠢ ᠺᠠᠷᠮᠧᠯ ᠬᠥᠮᠦᠨ ᠨᠠᠪᠠᠯ ᠤᠨ ᠪᠡᠯᠪᠡᠰᠦᠨ ᠡᠬᠡᠨᠡᠷ ᠪᠠᠢᠭᠰᠠᠨ ᠠᠪᠢᠭᠠᠢᠯ ᠠᠴᠠ ᠲᠥᠷᠥᠭᠰᠡᠨ ᠺᠢᠯᠧᠶᠠᠪ᠂ ᠭᠤᠷᠪᠠᠳᠠᠬᠢ ᠨᠢ ᠭᠧᠱᠦ᠋ᠷ ᠤᠨ ᠬᠠᠭᠠᠨ ᠲᠠᠯᠮᠠᠢ ᠶᠢᠨ ᠥᠬᠢᠨ ᠮᠠᠺᠠ ᠠᠴᠠ ᠲᠥᠷᠥᠭᠰᠡᠨ ᠠᠪᠰᠠᠯᠣᠮ᠂ 4 ᠳᠥᠷᠪᠡᠳᠡᠬᠢ ᠨᠢ ᠬᠠᠬᠢᠲ ᠠᠴᠠ ᠲᠥᠷᠥᠭᠰᠡᠨ ᠠᠳᠣᠨᠢᠶᠠ᠂ ᠲᠠᠪᠤᠳᠠᠬᠢ ᠨᠢ ᠠᠪᠢᠲ᠋ᠠᠯ ᠠᠴᠠ ᠲᠥᠷᠥᠭᠰᠡᠨ ᠱᠧᠹᠠᠲ᠋ᠢᠶᠠ᠂ 5 ᠵᠢᠷᠭᠤᠳᠠᠬᠢ ᠨᠢ ᠳ᠋ᠠᠸᠢᠳ᠋ ᠤᠨ ᠡᠬᠡᠨᠡᠷ ᠡᠭᠯᠠ ᠠᠴᠠ ᠲᠥᠷᠥᠭᠰᠡᠨ ᠢᠲ᠋ᠷᠧᠶᠠᠮ ᠶᠤᠮ᠃ ᠳ᠋ᠠᠸᠢᠳ᠋ ᠤᠨ ᠡᠳᠡᠭᠡᠷ ᠬᠥᠪᠡᠭᠦᠳ ᠾᠧᠪᠷᠣᠨ ᠳᠤ ᠲᠥᠷᠥᠭᠰᠡᠨ ᠪᠢᠯᠡ᠃ 6 ᠰᠠᠦ᠋ᠯ ᠤᠨ ᠭᠡᠷ ᠪᠣᠯᠣᠨ ᠳ᠋ᠠᠸᠢᠳ᠋ ᠤᠨ ᠭᠡᠷ ᠦᠨ ᠬᠣᠭᠣᠷᠣᠨᠳᠣ ᠳᠠᠢᠨ ᠪᠣᠯᠵᠤ ᠪᠠᠢᠬᠤ ᠳᠤ᠂ ᠠᠪᠨᠧᠷ ᠰᠠᠦ᠋ᠯ ᠤᠨ ᠭᠡᠷ ᠲᠦ ᠬᠦᠴᠦ ᠪᠡᠨ ᠥᠷᠭᠡᠳᠬᠡᠵᠦ ᠪᠠᠢᠪᠠ᠃ 7 ᠰᠠᠦ᠋ᠯ ᠳᠤ ᠠᠶᠠ ᠶᠢᠨ ᠥᠬᠢᠨ ᠪᠣᠯᠬᠤ ᠷᠢᠽᠫᠠ ᠭᠡᠳᠡᠭ ᠲᠠᠲᠠᠪᠤᠷᠢ ᠡᠮᠡ ᠪᠠᠢᠵᠠᠢ᠃ ᠨᠢᠭᠡᠨ ᠡᠳᠦᠷ ᠢᠱ ᠪᠣᠱᠧᠲ ᠠᠪᠨᠧᠷ ᠲᠤ᠄ 《ᠲᠠ ᠶᠠᠭᠠᠬᠢᠭᠠᠳ ᠡᠴᠢᠭᠡ ᠶᠢᠨ ᠮᠢᠨᠢ ᠲᠠᠲᠠᠪᠤᠷᠢ ᠡᠮᠡ ᠲᠠᠢ ᠤᠨᠲᠠᠪᠠ︖》 ᠭᠡᠬᠦ ᠳᠦ᠂ 8 ᠠᠪᠨᠧᠷ ᠢᠱ ᠪᠣᠱᠧᠲ ᠤᠨ ᠦᠭᠡᠨ ᠳᠦ ᠶᠡᠬᠡᠳᠡ ᠠᠭᠤᠷᠯᠠᠵᠤ᠄ 《ᠨᠠᠮᠠᠶᠢ ᠶᠦᠳᠠ ᠶᠢᠨ ᠨᠣᠬᠠᠢ ᠶᠢᠨ ᠲᠣᠯᠣᠭᠠᠢ ᠭᠡᠵᠦ ᠪᠣᠳᠣᠪᠠ ᠤᠤ︖ ᠥᠨᠥᠳᠥᠷ ᠬᠦᠷᠲᠡᠯᠡ ᠪᠢ ᠲᠠᠨ ᠤ ᠡᠴᠢᠭᠡ ᠰᠠᠦ᠋ᠯ ᠤᠨ ᠭᠡᠷ᠂ ᠲᠡᠭᠦᠨ ᠦ ᠠᠬᠠ ᠳᠡᠭᠦᠦᠰ ᠪᠠ ᠨᠥᠬᠥᠳ ᠲᠦ ᠬᠠᠢᠷᠠᠲᠠᠢ ᠪᠠᠢᠭᠰᠠᠭᠠᠷ ᠴᠢᠮᠠ ᠶᠢ ᠳ᠋ᠠᠸᠢᠳ᠋ ᠤᠨ ᠭᠠᠷ ᠲᠤ ᠲᠤᠰᠢᠶᠠᠭᠠ ᠦᠭᠡᠢ ᠠᠲᠠᠯᠠ᠂ ᠣᠳᠣ ᠴᠢ ᠲᠡᠷᠡ ᠡᠮᠡ ᠶᠢᠨ ᠤᠴᠢᠷ ᠢᠶᠠᠷ ᠨᠠᠮᠠᠶᠢ ᠦᠭᠡᠯᠡᠨᠡ ᠤᠤ︖ 9 ᠶᠣᠬᠣᠸᠠ ᠶᠢᠨ ᠳ᠋ᠠᠸᠢᠳ᠋ ᠲᠤ ᠠᠮᠠᠯᠠᠭᠰᠠᠨ ᠢ ᠪᠢ ᠳ᠋ᠠᠸᠢᠳ᠋ ᠤᠨ ᠲᠥᠯᠥᠭᠡ ᠪᠡᠶᠡᠯᠡᠭᠦᠯᠵᠦ ᠥᠭᠭᠥᠶᠡ᠃ ᠬᠡᠷᠪᠡ ᠲᠡᠭᠡᠬᠦ ᠦᠭᠡᠢ ᠪᠣᠯ ᠶᠣᠬᠣᠸᠠ ᠠᠪᠨᠧᠷ ᠨᠠᠮᠠᠶᠢ ᠬᠠᠲᠠᠭᠤ ᠰᠢᠳᠬᠡᠬᠦ ᠪᠣᠯᠲᠤᠭᠠᠢ᠃ 10 ᠤᠤᠯ ᠨᠢ ᠶᠣᠬᠣᠸᠠ ᠡᠨᠡ ᠬᠠᠭᠠᠨᠴᠢᠯᠠᠯ ᠢ ᠰᠠᠦ᠋ᠯ ᠤᠨ ᠭᠡᠷ ᠡᠴᠡ ᠰᠢᠯᠵᠢᠭᠦᠯᠵᠦ᠂ ᠳ᠋ᠠᠸᠢᠳ᠋ ᠤᠨ ᠬᠠᠭᠠᠨ ᠰᠢᠷᠡᠭᠡ ᠶᠢ ᠳ᠋ᠠᠨ ᠠᠴᠠ ᠪᠧᠷᠣᠲ ᠱᠧᠪᠠ ᠬᠦᠷᠲᠡᠯᠡ᠂ ᠢᠰᠷᠧᠯ ᠪᠣᠯᠣᠨ ᠶᠦᠳᠠ ᠶᠢᠨ ᠳᠡᠭᠡᠷᠡ ᠪᠠᠲᠤᠵᠢᠭᠤᠯᠬᠤ ᠭᠡᠰᠡᠨ ᠶᠤᠮ》 ᠭᠡᠪᠡ᠃ 11 ᠢᠱ ᠪᠣᠱᠧᠲ ᠠᠪᠨᠧᠷ ᠡᠴᠡ ᠠᠶᠤᠵᠤ᠂ ᠳᠠᠬᠢᠭᠠᠳ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃
12 ᠠᠪᠨᠧᠷ ᠳ᠋ᠠᠸᠢᠳ᠋ ᠤᠷᠤᠭᠤ ᠡᠯᠴᠢᠳ ᠢᠶᠠᠨ ᠢᠯᠡᠭᠡᠵᠦ᠄ 《ᠡᠨᠡ ᠭᠠᠵᠠᠷ ᠬᠡᠨ ᠦ ᠬᠢ ᠪᠤᠢ︖ ᠲᠠ ᠨᠠᠳᠠ ᠲᠠᠢ ᠭᠡᠷᠡ ᠪᠠᠢᠭᠤᠯᠤᠨᠠ ᠤᠤ︖ ᠪᠦᠬᠦ ᠢᠰᠷᠧᠯ ᠢ ᠲᠠᠨ ᠤᠷᠤᠭᠤ ᠡᠷᠭᠢᠭᠦᠯᠬᠦ ᠳᠦ᠂ ᠮᠢᠨᠦ ᠭᠠᠷ ᠲᠠᠨ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠭᠦᠯᠪᠡ᠃ 13 ᠳ᠋ᠠᠸᠢᠳ᠋᠄ 《ᠰᠠᠢᠨ︕ ᠪᠢ ᠲᠠᠨ ᠲᠠᠢ ᠭᠡᠷᠡ ᠪᠠᠢᠭᠤᠯᠤᠶᠠ᠃ ᠨᠢᠭᠡ ᠯᠠ ᠵᠦᠢᠯ ᠢ ᠪᠢ ᠲᠠᠨ ᠠᠴᠠ ᠱᠠᠭᠠᠷᠳᠠᠵᠤ ᠪᠠᠢᠨᠠ᠃ ᠲᠠ ᠨᠠᠳᠠ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠬᠦ ᠳᠡᠭᠡᠨ ᠰᠠᠦ᠋ᠯ ᠤᠨ ᠥᠬᠢᠨ ᠮᠢᠺᠠᠯ ᠢ ᠳᠠᠭᠠᠭᠤᠯᠤᠭᠠᠳ ᠢᠷᠡ᠃ ᠲᠡᠭᠡᠬᠦ ᠡᠴᠡ ᠨᠠᠰᠢ ᠲᠠ ᠮᠢᠨᠦ ᠨᠢᠭᠤᠷ ᠢ ᠬᠠᠷᠠᠬᠤ ᠬᠡᠷᠡᠭ ᠦᠭᠡᠢ》 ᠭᠡᠪᠡ᠃ 14 ᠲᠡᠭᠡᠭᠡᠳ ᠳ᠋ᠠᠸᠢᠳ᠋ ᠰᠠᠦ᠋ᠯ ᠤᠨ ᠬᠦᠦ ᠢᠱ ᠪᠣᠱᠧᠲ ᠤᠷᠤᠭᠤ ᠡᠯᠴᠢᠳ ᠢᠯᠡᠭᠡᠨ᠄ 《ᠮᠢᠨᠦ ᠡᠬᠡᠨᠡᠷ ᠮᠢᠺᠠᠯ ᠢ ᠨᠠᠳᠠ ᠳᠤ ᠪᠤᠴᠠᠭᠠᠨᠠ ᠤᠤ︖ ᠪᠢ ᠲᠡᠭᠦᠨ ᠲᠡᠢ ᠰᠦᠢ ᠲᠠᠯᠪᠢᠬᠤ ᠭᠡᠵᠦ ᠵᠠᠭᠤᠨ ᠹᠢᠯᠢᠰᠲ ᠬᠥᠮᠦᠨ ᠦ ᠬᠥᠪᠴᠢᠷᠬᠡᠢ ᠶᠢᠨ ᠠᠷᠠᠰᠤ ᠶᠢ ᠥᠭᠭᠥᠭᠰᠡᠨ ᠪᠢᠯᠡ》 ᠭᠡᠵᠦ ᠬᠡᠯᠡᠭᠦᠯᠪᠡ᠃ 15 ᠢᠱ ᠪᠣᠱᠧᠲ ᠬᠥᠮᠦᠨ ᠢᠯᠡᠭᠡᠵᠦ᠂ ᠲᠡᠷᠡ ᠡᠮᠡᠭᠲᠡᠢ ᠶᠢ ᠲᠡᠭᠦᠨ ᠦ ᠨᠥᠬᠥᠷ ᠯᠠᠢᠱ ᠤᠨ ᠬᠥᠪᠡᠭᠦᠨ ᠫᠠᠯᠲ᠋ᠢᠶᠧᠯ ᠡᠴᠡ ᠰᠠᠯᠭᠠᠨ ᠠᠪᠴᠢᠷᠠᠭᠤᠯᠪᠠ᠃ 16 ᠬᠠᠷᠢᠨ ᠨᠥᠬᠥᠷ ᠨᠢ ᠲᠡᠷᠡ ᠡᠮᠡᠭᠲᠡᠢ ᠶᠢᠨ ᠠᠷᠤ ᠠᠴᠠ ᠤᠬᠢᠯᠠᠭᠰᠠᠭᠠᠷ ᠪᠠᠾᠦᠷᠢᠮ ᠬᠦᠷᠲᠡᠯᠡ ᠲᠡᠭᠦᠨ ᠲᠡᠢ ᠬᠠᠮᠲᠤ ᠶᠠᠪᠤᠪᠠ᠃ ᠠᠪᠨᠧᠷ ᠲᠡᠭᠦᠨ ᠳᠦ᠄ 《ᠪᠤᠴᠠ᠂ ᠶᠠᠪᠤᠭᠲᠤᠨ》 ᠭᠡᠰᠡᠨ ᠳᠦ᠂ ᠲᠡᠷᠡ ᠪᠤᠴᠠᠵᠠᠢ᠃
ᠠᠪᠨᠧᠷ ᠬᠣᠣᠷᠯᠠᠭᠳᠠᠪᠠ
17 ᠤᠤᠯ ᠨᠢ ᠠᠪᠨᠧᠷ ᠢᠰᠷᠧᠯ ᠤᠨ ᠠᠬᠠᠮᠠᠳ ᠲᠠᠢ ᠵᠥᠪᠯᠡᠯᠳᠦᠨ᠄ 《ᠲᠠ ᠨᠠᠷ ᠳ᠋ᠠᠸᠢᠳ᠋ ᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠬᠠᠭᠠᠨ ᠪᠣᠯᠭᠠᠬᠤ ᠭᠡᠵᠦ ᠡᠷᠲᠡᠨ ᠡᠴᠡ ᠬᠦᠰᠡᠵᠦ ᠪᠠᠢᠭᠰᠠᠨ᠃ 18 ᠣᠳᠣ ᠬᠦᠰᠡᠭᠰᠡᠨ ᠢᠶᠡᠨ ᠪᠡᠶᠡᠯᠡᠭᠦᠯ᠃ ᠶᠣᠬᠣᠸᠠ ᠳ᠋ᠠᠸᠢᠳ᠋ ᠤᠨ ᠲᠠᠯᠠ ᠪᠠᠷ ᠠᠢᠯᠠᠳᠬᠤ ᠳᠠᠭᠠᠨ᠄ 〈ᠪᠢ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠤᠨ ᠭᠠᠷ ᠢᠶᠠᠷ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠢᠶᠠᠨ ᠹᠢᠯᠢᠰᠲ᠋ᠴᠦᠳ ᠦᠨ ᠭᠠᠷ ᠠᠴᠠ᠂ ᠮᠥᠨ ᠬᠠᠮᠤᠭ ᠳᠠᠢᠰᠤᠨ ᠤ ᠬᠢᠨᠢ ᠭᠠᠷ ᠠᠴᠠ ᠠᠪᠤᠷᠠᠨᠠ〉 ᠭᠡᠰᠡᠨ ᠪᠢᠰᠢ ᠤᠤ︖》 ᠭᠡᠵᠦ ᠬᠡᠯᠡᠭᠰᠡᠨ ᠠᠵᠢ᠃ 19 ᠠᠪᠨᠧᠷ ᠪᠠᠰᠠ ᠪᠢᠨᠶᠠᠮᠢᠨᠴᠤᠳ ᠲᠤ ᠡᠢᠨ ᠬᠦ ᠮᠡᠳᠡᠭᠦᠯᠦᠭᠰᠡᠨ ᠦ ᠳᠠᠷᠠᠭᠠ᠂ ᠢᠰᠷᠧᠯ ᠪᠣᠯᠣᠨ ᠪᠢᠨᠶᠠᠮᠢᠨ ᠤ ᠪᠦᠬᠦ ᠭᠡᠷ ᠦᠨ ᠬᠢᠨ ᠤ ᠬᠦᠰᠡᠵᠦ ᠪᠠᠢᠭᠠ ᠪᠦᠬᠦᠨ ᠢ ᠳ᠋ᠠᠸᠢᠳ᠋ ᠲᠤ ᠮᠡᠳᠡᠭᠦᠯᠬᠦ ᠪᠡᠷ ᠾᠧᠪᠷᠣᠨ ᠳᠤ ᠣᠴᠢᠪᠠ᠃
20 ᠠᠪᠨᠧᠷ ᠬᠣᠷᠢᠨ ᠬᠥᠮᠦᠨ ᠢᠶᠡᠨ ᠳᠠᠭᠠᠭᠤᠯᠤᠨ ᠾᠧᠪᠷᠣᠨ ᠳᠤ ᠪᠠᠢᠭᠠ ᠳ᠋ᠠᠸᠢᠳ᠋ ᠤᠷᠤᠭᠤ ᠢᠷᠡᠬᠦ ᠳᠦ᠂ ᠳ᠋ᠠᠸᠢᠳ᠋ ᠠᠪᠨᠧᠷ ᠪᠣᠯᠣᠨ ᠲᠡᠭᠦᠨ ᠦ ᠬᠠᠮᠲᠤ ᠪᠤᠢ ᠬᠥᠮᠦᠰ ᠲᠦ ᠵᠣᠷᠢᠭᠤᠯᠤᠨ ᠨᠠᠢᠷ ᠬᠢᠪᠡ᠃ 21 ᠠᠪᠨᠧᠷ ᠳ᠋ᠠᠸᠢᠳ᠋ ᠲᠤ᠄ 《ᠪᠢ ᠣᠳᠣ ᠶᠠᠪᠤᠵᠤ᠂ ᠪᠦᠬᠦ ᠢᠰᠷᠧᠯ ᠢ ᠡᠵᠡᠨ ᠬᠠᠭᠠᠨ ᠤ ᠪᠠᠨ ᠡᠮᠦᠨᠡ ᠴᠤᠭᠯᠠᠭᠤᠯᠤᠶᠠ᠃ ᠢᠩᠭᠢᠭᠡᠳ ᠲᠡᠳᠡ ᠲᠠᠨ ᠲᠠᠢ ᠭᠡᠷᠡ ᠪᠠᠢᠭᠤᠯᠪᠠᠯ᠂ ᠲᠠ ᠬᠦᠰᠡᠭᠰᠡᠨ ᠪᠦᠬᠦᠨ ᠢᠶᠡᠨ ᠵᠠᠬᠢᠷᠬᠤ ᠪᠣᠯᠣᠨᠠ》 ᠭᠡᠪᠡ᠃ ᠳ᠋ᠠᠸᠢᠳ᠋ ᠠᠪᠨᠧᠷ ᠢ ᠦᠳᠡᠬᠦ ᠳᠦ᠂ ᠲᠡᠷᠡ ᠠᠮᠤᠷ ᠲᠠᠢᠪᠤᠩ ᠶᠠᠪᠤᠭᠰᠠᠨ ᠪᠠᠢᠯᠠ᠃
22 ᠶᠠᠭ ᠲᠡᠷᠡ ᠴᠠᠭ ᠲᠤ᠂ ᠳ᠋ᠠᠸᠢᠳ᠋ ᠤᠨ ᠵᠠᠷᠤᠴᠠ ᠨᠠᠷ ᠪᠣᠯᠣᠨ ᠶᠣᠶᠠᠪ ᠠᠶᠠᠨ ᠳᠠᠢᠨ ᠠᠴᠠ ᠶᠡᠬᠡ ᠣᠯᠵᠠ ᠲᠠᠢ ᠪᠤᠴᠠᠵᠤ ᠢᠷᠡᠯᠡ︕ ᠭᠡᠪᠡᠴᠦ ᠠᠪᠨᠧᠷ ᠾᠧᠪᠷᠣᠨ ᠳᠤ ᠪᠠᠢᠭᠠ ᠳ᠋ᠠᠸᠢᠳ᠋ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠨ ᠦᠭᠡᠢ᠂ ᠳ᠋ᠠᠸᠢᠳ᠋ ᠬᠡᠳᠦᠢᠨᠡᠢ ᠲᠡᠭᠦᠨ ᠢ ᠶᠠᠪᠤᠭᠤᠯᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠠᠮᠤᠷ ᠲᠠᠢᠪᠤᠩ ᠶᠠᠪᠤᠭᠰᠠᠨ ᠪᠠᠢᠵᠠᠢ᠃ 23 ᠶᠣᠶᠠᠪ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠪᠦᠬᠦ ᠴᠡᠷᠢᠭ ᠪᠤᠴᠠᠵᠤ ᠢᠷᠡᠬᠦ ᠳᠦ᠂ ᠬᠥᠮᠦᠰ ᠲᠡᠭᠦᠨ ᠳᠦ᠄ 《ᠨᠧᠷ ᠤᠨ ᠬᠦᠦ ᠠᠪᠨᠧᠷ ᠬᠠᠭᠠᠨ ᠳᠤ ᠪᠠᠷᠠᠭᠠᠯᠬᠠᠭᠰᠠᠨ ᠰᠢᠦ᠂ ᠬᠠᠭᠠᠨ ᠲᠡᠭᠦᠨ ᠢ ᠠᠮᠤᠷ ᠲᠠᠢᠪᠤᠩ ᠦᠳᠡᠵᠦ ᠶᠠᠪᠤᠭᠤᠯᠤᠭᠰᠠᠨ》 ᠭᠡᠵᠦ ᠬᠡᠯᠡᠪᠡ᠃ 24 ᠲᠡᠭᠡᠬᠦ ᠳᠦ ᠶᠣᠶᠠᠪ ᠬᠠᠭᠠᠨ ᠳᠤ ᠪᠠᠷᠠᠭᠠᠯᠬᠠᠨ᠄ 《ᠲᠠ ᠶᠠᠭᠤ ᠬᠢᠴᠢᠬᠡᠬᠦ ᠨᠢ ᠡᠨᠡ ᠪᠤᠢ︖ ᠬᠠᠷᠠ᠂ ᠠᠪᠨᠧᠷ ᠲᠠᠨ ᠳᠡᠭᠡᠷᠡ ᠢᠷᠡᠭᠰᠡᠨ ᠠᠲᠠᠯᠠ᠂ ᠲᠠ ᠶᠠᠭᠠᠬᠢᠭᠠᠳ ᠲᠡᠭᠦᠨ ᠢ ᠢᠩᠭᠢᠭᠡᠳ ᠶᠠᠪᠤᠭᠤᠯᠴᠢᠬᠠᠪᠠ︖ ᠲᠡᠷᠡ ᠠᠮᠤᠷ ᠲᠠᠢᠪᠤᠩ ᠶᠠᠪᠤᠭᠰᠠᠨ ᠪᠠᠢᠨᠠ᠃ 25 ᠨᠧᠷ ᠤᠨ ᠬᠦᠦ ᠠᠪᠨᠧᠷ ᠢ ᠲᠠ ᠮᠡᠳᠡᠨᠡ ᠰᠢᠦ ᠳᠠ᠃ ᠲᠡᠷᠡ ᠲᠠᠨ ᠢ ᠬᠠᠭᠤᠷᠬᠤ ᠪᠠᠷ ᠢᠷᠡᠭᠰᠡᠨ᠂ ᠲᠠᠨ ᠤ ᠣᠷᠣᠵᠤ ᠭᠠᠷᠬᠤ ᠶᠢ ᠲᠠᠩᠨᠠᠵᠤ᠂ ᠲᠠᠨ ᠤ ᠬᠢᠵᠦ ᠪᠠᠢᠭᠠ ᠪᠦᠬᠦᠨ ᠢ ᠮᠡᠳᠡᠵᠦ ᠠᠪᠬᠤ ᠪᠠᠷ ᠢᠷᠡᠭᠰᠡᠨ ᠪᠤᠢ》 ᠭᠡᠪᠡ᠃
26 ᠶᠣᠶᠠᠪ ᠳ᠋ᠠᠸᠢᠳ᠋ ᠠᠴᠠ ᠠᠶᠠᠷᠯᠠᠵᠤ᠂ ᠠᠪᠨᠧᠷ ᠤᠨ ᠠᠷᠤ ᠠᠴᠠ ᠡᠯᠴᠢᠳ ᠢᠯᠡᠭᠡᠨ᠂ ᠲᠡᠭᠦᠨ ᠢ ᠰᠢᠷᠠ ᠶᠢᠨ ᠬᠤᠳᠳᠤᠭ ᠤᠨ ᠲᠡᠨᠳᠡ ᠡᠴᠡ ᠪᠤᠴᠠᠭᠠᠵᠤ ᠠᠪᠴᠢᠷᠠᠭᠤᠯᠪᠠ᠃ ᠭᠡᠪᠡᠴᠦ ᠳ᠋ᠠᠸᠢᠳ᠋ ᠡᠭᠦᠨ ᠢ ᠮᠡᠳᠡᠭᠰᠡᠨ ᠦᠭᠡᠢ᠃ 27 ᠲᠡᠢᠨ ᠬᠦ ᠠᠪᠨᠧᠷ ᠾᠧᠪᠷᠣᠨ ᠳᠤ ᠪᠤᠴᠠᠵᠤ ᠢᠷᠡᠯᠡ᠃ ᠶᠣᠶᠠᠪ ᠲᠡᠭᠦᠨ ᠲᠡᠢ ᠬᠤᠪᠢᠴᠢᠯᠠᠨ ᠶᠠᠷᠢᠬᠤ ᠳᠦᠷᠢ ᠦᠵᠡᠭᠦᠯᠦᠨ ᠴᠤᠯᠴᠠᠩ ᠳᠤ ᠠᠪᠠᠴᠢᠭᠠᠳ ᠬᠡᠪᠡᠯᠢ ᠤᠷᠤᠭᠤ ᠨᠢ ᠲᠥᠷᠥᠭᠰᠡᠨ ᠳᠦ᠂ ᠲᠡᠷᠡ ᠪᠡᠷ ᠳᠡᠭᠦᠦ ᠠᠰᠠᠾᠧᠯ ᠤᠨ ᠬᠢᠨᠢ ᠴᠢᠰᠤ ᠶᠢ ᠤᠷᠤᠰᠬᠠᠭᠰᠠᠨ ᠤ ᠤᠯᠠᠮ ᠢᠶᠠᠷ ᠦᠬᠦᠪᠡ᠃ 28 ᠳ᠋ᠠᠸᠢᠳ᠋ ᠡᠨᠡ ᠲᠤᠬᠠᠢ ᠰᠣᠨᠣᠰᠣᠭᠠᠳ᠄ 《ᠨᠧᠷ ᠤᠨ ᠬᠦᠦ ᠠᠪᠨᠧᠷ ᠤᠨ ᠴᠢᠰᠤᠨ ᠤ ᠲᠤᠬᠠᠢ ᠳᠤ᠂ ᠪᠢ ᠪᠣᠯᠣᠨ ᠮᠢᠨᠦ ᠬᠠᠭᠠᠨᠴᠢᠯᠠᠯ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠡᠭᠦᠷᠢᠳᠡ ᠭᠡᠮ ᠦᠭᠡᠢ᠃ 29 ᠲᠡᠭᠦᠨ ᠦ ᠴᠢᠰᠤ ᠨᠢ ᠶᠣᠶᠠᠪ ᠤᠨ ᠲᠣᠯᠣᠭᠠᠢ ᠳᠡᠭᠡᠷᠡ᠂ ᠡᠴᠢᠭᠡ ᠶᠢᠨ ᠬᠢᠨᠢ ᠪᠦᠬᠦ ᠭᠡᠷ ᠦᠨ ᠳᠡᠭᠡᠷᠡ ᠪᠠᠭᠤᠭ᠃ ᠮᠥᠨ ᠶᠣᠶᠠᠪ ᠤᠨ ᠭᠡᠷ ᠡᠴᠡ ᠱᠦᠭᠦᠷᠡᠳᠡᠰᠦ ᠲᠠᠢ ᠬᠥᠮᠦᠨ᠂ ᠤᠶᠠᠮᠠᠨ ᠡᠪᠡᠳᠴᠢᠲᠡᠨ᠂ ᠲᠠᠶᠠᠭ ᠲᠤᠯᠤᠭᠴᠢ᠂ ᠢᠯᠳᠦᠨ ᠳᠦ ᠴᠣᠬᠢᠭᠳᠠᠭᠴᠢ ᠪᠣᠯᠣᠨ ᠬᠦᠨᠡᠰᠦ ᠳᠤᠲᠠᠭᠴᠢ ᠲᠠᠰᠤᠷᠠᠬᠤ ᠦᠭᠡᠢ ᠪᠠᠢᠭ》 ᠭᠡᠪᠡ᠃ 30 ᠲᠡᠢᠨ ᠬᠦ ᠶᠣᠶᠠᠪ ᠪᠣᠯᠣᠨ ᠲᠡᠭᠦᠨ ᠦ ᠳᠡᠭᠦᠦ ᠠᠪᠢᠱᠠᠢ ᠨᠠᠷ ᠠᠪᠨᠧᠷ ᠢ ᠬᠥᠨᠥᠭᠡᠪᠡ᠃ ᠤᠴᠢᠷ ᠨᠢ ᠠᠪᠨᠧᠷ ᠲᠡᠳᠡᠨ ᠦ ᠳᠡᠭᠦᠦ ᠠᠰᠠᠾᠧᠯ ᠢ ᠭᠢᠪᠧᠶᠣᠨ ᠤ ᠲᠤᠯᠤᠯᠳᠤᠭᠠᠨ ᠳᠤ ᠠᠯᠠᠭᠰᠠᠨ ᠶᠤᠮ᠃
31 ᠳ᠋ᠠᠸᠢᠳ᠋ ᠶᠣᠶᠠᠪ ᠪᠣᠯᠣᠨ ᠥᠪᠡᠷ ᠲᠡᠢ ᠨᠢ ᠬᠠᠮᠲᠤ ᠪᠠᠢᠭᠠ ᠣᠯᠠᠨ ᠪᠦᠭᠦᠳᠡ ᠳᠦ᠄ 《ᠲᠠ ᠨᠠᠷ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠤ᠂ ᠲᠠᠭᠠᠷ ᠡᠮᠦᠰᠴᠦ᠂ ᠠᠪᠨᠧᠷ ᠤᠨ ᠡᠮᠦᠨᠡ ᠭᠠᠰᠢᠭᠤᠳᠠᠭᠲᠤᠨ》 ᠭᠡᠳ ᠥᠪᠡᠷ ᠢᠶᠡᠨ ᠠᠪᠰᠠᠨ ᠤ ᠠᠷᠤ ᠠᠴᠠ ᠠᠯᠬᠤᠵᠤ ᠪᠠᠢᠯᠠ᠃ 32 ᠢᠩᠭᠢᠭᠡᠳ ᠲᠡᠳᠡ ᠠᠪᠨᠧᠷ ᠢ ᠾᠧᠪᠷᠣᠨ ᠳᠤ ᠨᠤᠲᠤᠭᠯᠠᠭᠤᠯᠪᠠ᠃ ᠬᠠᠭᠠᠨ ᠠᠪᠨᠧᠷ ᠤᠨ ᠪᠤᠯᠠᠰᠢᠨ ᠳᠡᠭᠡᠷᠡ ᠴᠢᠩᠭ᠍ᠠ ᠪᠠᠷ ᠤᠬᠢᠯᠠᠬᠤ ᠳᠤ᠂ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠴᠤ ᠪᠦᠭᠦᠳᠡᠭᠡᠷ ᠤᠬᠢᠯᠠᠯᠳᠤᠪᠠ᠃ 33 ᠬᠠᠭᠠᠨ ᠠᠪᠨᠧᠷ ᠲᠤ ᠵᠣᠷᠢᠭᠤᠯᠤᠨ ᠭᠠᠰᠢᠭᠤᠳᠠᠯ ᠤᠨ ᠳᠠᠭᠤᠤ ᠳᠠᠭᠤᠯᠠᠵᠤ᠄ 《ᠠᠪᠨᠧᠷ ᠮᠤᠩ᠋ᠬᠠᠭ ᠤᠨ ᠦᠬᠦᠬᠦ ᠠᠳᠠᠯᠢ ᠦᠬᠦᠬᠦ ᠶᠣᠰᠣᠲᠠᠢ ᠪᠠᠢᠪᠠ ᠤᠤ︖
34 ᠲᠠᠨ ᠤ ᠭᠠᠷ ᠬᠦᠯᠢᠭᠳᠡᠭᠡ ᠦᠭᠡᠢ ᠲᠠᠨ ᠤ ᠬᠥᠯ ᠴᠤ ᠳᠥᠩᠭᠡᠯᠡᠭᠳᠡᠭᠡ ᠦᠭᠡᠢ ᠪᠠᠢᠲᠠᠯᠠ ᠮᠠᠭᠤ ᠬᠡᠷᠡᠭᠲᠡᠨ ᠦ ᠬᠦᠴᠦᠨ ᠳᠦ ᠤᠨᠠᠬᠤ ᠰᠢᠭ᠋ ᠲᠠ ᠤᠨᠠᠪᠠ》
ᠭᠡᠬᠦ ᠳᠦ᠂ ᠴᠤᠭᠯᠠᠷᠠᠭᠰᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠦ ᠲᠥᠯᠥᠭᠡ ᠳᠠᠬᠢᠨ ᠤᠬᠢᠯᠠᠯᠳᠤᠪᠠ᠃ 35 ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠡᠳᠦᠷ ᠢᠶᠡᠷ ᠢᠷᠡᠵᠦ ᠳ᠋ᠠᠸᠢᠳ᠋ ᠲᠤ ᠬᠣᠭᠣᠯᠠ ᠢᠳᠡᠬᠦ ᠶᠢ ᠢᠳᠬᠠᠭᠰᠠᠨ ᠪᠣᠯᠪᠠᠴᠤ ᠳ᠋ᠠᠸᠢᠳ᠋᠄ 《ᠨᠠᠷᠠ ᠵᠢᠷᠭᠠᠬᠤ ᠠᠴᠠ ᠡᠮᠦᠨᠡ ᠪᠣᠣᠪᠣ᠂ ᠡᠰᠡᠪᠡᠯ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶᠢ ᠠᠮᠰᠠᠪᠠᠯ᠂ ᠪᠤᠷᠬᠠᠨ ᠨᠠᠮᠠᠶᠢ ᠬᠠᠲᠠᠭᠤ ᠰᠢᠳᠬᠡᠬᠦ ᠪᠣᠯᠲᠤᠭᠠᠢ》 ᠭᠡᠵᠦ ᠲᠠᠩ᠋ᠭᠠᠷᠢᠭᠯᠠᠵᠠᠢ᠃ 36 ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠡᠭᠦᠨ ᠢ ᠠᠩᠵᠠᠭᠠᠷᠠᠭᠰᠠᠨ ᠪᠠ ᠡᠨᠡ ᠨᠢ ᠲᠡᠳᠡᠨ ᠦ ᠨᠢᠳᠦᠨ ᠳᠦ ᠲᠠᠭᠠᠯᠠᠭᠳᠠᠪᠠ᠃ ᠦᠨᠡᠨ ᠳᠡᠭᠡᠨ ᠬᠠᠭᠠᠨ ᠤ ᠬᠢᠭᠰᠡᠨ ᠪᠣᠯᠭᠠᠨ ᠲᠡᠳᠡᠨ ᠦ ᠨᠢᠳᠦᠨ ᠳᠦ ᠲᠠᠭᠠᠯᠠᠭᠳᠠᠭᠰᠠᠨ ᠪᠠᠢᠯᠠ᠃ 37 ᠢᠩᠭᠢᠭᠡᠳ ᠨᠧᠷ ᠤᠨ ᠬᠦᠦ ᠠᠪᠨᠧᠷ ᠢ ᠠᠯᠠᠭᠰᠠᠨ ᠬᠡᠷᠡᠭ ᠲᠦ ᠬᠠᠭᠠᠨ ᠣᠷᠣᠯᠴᠠᠭᠰᠠᠨ ᠦᠭᠡᠢ ᠭᠡᠳᠡᠭ ᠢ ᠲᠡᠷᠡ ᠡᠳᠦᠷ ᠪᠦᠬᠦ ᠠᠷᠠᠳ ᠪᠣᠯᠣᠨ ᠪᠦᠬᠦ ᠢᠰᠷᠧᠯ ᠮᠡᠳᠡᠵᠡᠢ᠃ 38 ᠬᠠᠭᠠᠨ ᠲᠦᠰᠢᠮᠡᠳ ᠲᠡᠭᠡᠨ᠄ 《ᠥᠨᠥᠳᠥᠷ ᠢᠰᠷᠧᠯ ᠤᠨ ᠠᠭᠤᠤ ᠨᠣᠶᠠᠨ ᠥᠩᠭᠡᠷᠡᠭᠰᠡᠨ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ ᠤᠤ︖ 39 ᠪᠢ ᠲᠣᠰᠣᠯᠠᠭᠳᠠᠭᠰᠠᠨ ᠬᠠᠭᠠᠨ ᠪᠠᠢᠲᠠᠯᠠ ᠪᠠᠨ ᠥᠨᠥᠳᠥᠷ ᠬᠦᠴᠦ ᠦᠭᠡᠢ ᠪᠠᠢᠨᠠ᠃ ᠽᠧᠷᠣᠢᠶᠠ ᠶᠢᠨ ᠡᠳᠡᠭᠡᠷ ᠬᠥᠪᠡᠭᠦᠨ ᠨᠠᠳᠠ ᠳᠤ ᠳᠡᠩᠳᠡᠭᠦᠦ ᠬᠠᠲᠠᠭᠤ ᠪᠠᠢᠨᠠ᠃ ᠬᠠᠷᠢᠨ ᠶᠣᠬᠣᠸᠠ ᠮᠠᠭᠤ ᠶᠢ ᠦᠢᠯᠡᠳᠦᠭᠰᠡᠨ ᠬᠥᠮᠦᠨ ᠳᠦ ᠮᠠᠭᠤ ᠶᠢ ᠦᠢᠯᠡᠳᠦᠭᠰᠡᠨ ᠦ ᠬᠢᠨᠢ ᠶᠣᠰᠣᠭᠠᠷ ᠬᠠᠷᠢᠭᠤᠯᠬᠤ ᠪᠣᠯᠣᠨᠠ》 ᠭᠡᠪᠡ᠃