ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠠᠷᠪᠠᠨ ᠵᠢᠷᠭᠤᠭᠠ
ᠽᠢᠪᠠ ᠶᠢᠨ ᠲᠤᠰᠠᠯᠠᠮᠵᠢ
1 ᠳ᠋ᠠᠸᠢᠳ᠋ ᠣᠷᠣᠢ ᠶᠢ ᠥᠩᠭᠡᠷᠡᠵᠦ ᠵᠢᠭᠠᠬᠠᠨ ᠶᠠᠪᠤᠬᠤ ᠳᠤ᠂ ᠲᠡᠨᠳᠡ ᠮᠧᠹᠢᠪᠣᠱᠧᠲ ᠤᠨ ᠵᠠᠷᠤᠴᠠ ᠽᠢᠪᠠ ᠠᠭᠤᠯᠵᠠᠬᠤ ᠪᠠᠷ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠲᠡᠷᠡ ᠡᠮᠡᠭᠡᠯᠯᠡᠭᠰᠡᠨ ᠬᠣᠶᠠᠷ ᠡᠯᠵᠢᠭᠡᠨ ᠳᠡᠭᠡᠷᠡ ᠬᠣᠶᠠᠷ ᠵᠠᠭᠤᠨ ᠪᠣᠣᠪᠣ᠂ ᠵᠠᠭᠤᠨ ᠪᠠᠭᠴᠠ ᠬᠠᠲᠠᠭᠠᠭᠰᠠᠨ ᠦᠵᠦᠮ᠂ ᠵᠠᠭᠤᠨ ᠪᠣᠯᠪᠠᠰᠤᠷᠠᠭᠰᠠᠨ ᠵᠢᠮᠢᠰ᠂ ᠨᠢᠭᠡ ᠲᠤᠯᠤᠮ ᠦᠵᠦᠮ ᠦᠨ ᠳᠠᠷᠠᠰᠤ ᠠᠴᠢᠭᠰᠠᠨ ᠪᠠᠢᠯᠠ᠃ 2 ᠬᠠᠭᠠᠨ ᠽᠢᠪᠠ ᠠᠴᠠ᠄ 《ᠶᠠᠭᠤᠨ ᠳᠤ ᠡᠳᠡᠭᠡᠷ ᠢ ᠠᠪᠴᠢᠷᠠᠭᠰᠠᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠽᠢᠪᠠ᠄ 《ᠬᠠᠭᠠᠨ ᠤ ᠭᠡᠷ ᠦᠨ ᠬᠢᠨ ᠳᠤ ᠤᠨᠤᠭᠠ ᠪᠣᠯᠣᠭ ᠭᠡᠵᠦ ᠡᠯᠵᠢᠭᠡ ᠨᠦᠭᠦᠳ ᠢ᠂ ᠵᠠᠯᠠᠭᠤ ᠬᠥᠮᠦᠰ ᠲᠦ ᠬᠣᠭᠣᠯᠠ ᠪᠣᠯᠣᠭ ᠭᠡᠵᠦ ᠪᠣᠣᠪᠣ ᠪᠣᠯᠣᠨ ᠪᠣᠯᠪᠠᠰᠤᠷᠠᠭᠰᠠᠨ ᠵᠢᠮᠢᠰ ᠢ᠂ ᠴᠥᠯ ᠳᠤ ᠡᠴᠡᠭᠰᠡᠨ ᠬᠥᠮᠦᠰ ᠦᠨ ᠤᠮᠳᠠ ᠪᠣᠯᠣᠭ ᠭᠡᠵᠦ ᠦᠵᠦᠮ ᠦᠨ ᠳᠠᠷᠠᠰᠤ ᠶᠢ ᠠᠪᠴᠢᠷᠠᠭᠰᠠᠨ ᠶᠤᠮ》 ᠭᠡᠪᠡ᠃ 3 ᠬᠠᠭᠠᠨ᠄ 《ᠡᠵᠡᠨ ᠦ ᠴᠢᠨᠢ ᠬᠥᠪᠡᠭᠦᠨ ᠬᠠᠮᠢᠭᠠ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠳᠦ᠂ ᠽᠢᠪᠠ ᠬᠠᠭᠠᠨ ᠳᠤ᠄ 《ᠶᠧᠷᠦ᠋ᠰᠠᠯᠧᠮ ᠳᠤ ᠦᠯᠡᠳᠡᠭᠡᠳ ᠪᠠᠢᠨᠠ︕ ᠲᠡᠷᠡ᠄ 〈ᠢᠰᠷᠧᠯ ᠤᠨ ᠭᠡᠷ ᠶᠠᠭ ᠥᠨᠥᠳᠥᠷ ᠮᠢᠨᠦ ᠡᠴᠢᠭᠡ ᠶᠢᠨ ᠬᠠᠭᠠᠨᠴᠢᠯᠠᠯ ᠢ ᠨᠠᠳᠠ ᠳᠤ ᠡᠷᠭᠢᠭᠦᠯᠵᠦ ᠥᠭᠭᠥᠨᠡ〉 ᠭᠡᠵᠦ ᠪᠠᠢᠨᠠ》 ᠭᠡᠪᠡ᠃ 4 ᠬᠠᠭᠠᠨ ᠽᠢᠪᠠ ᠳᠤ᠄ 《ᠮᠧᠹᠢᠪᠣᠱᠧᠲ ᠤᠨ ᠬᠠᠮᠤᠭ ᠶᠠᠭᠤᠮᠠ ᠴᠢᠨᠦᠬᠢ》 ᠭᠡᠰᠡᠨ ᠳᠦ᠂ ᠽᠢᠪᠠ ᠮᠥᠷᠭᠥᠵᠦ᠄ 《ᠡᠵᠡᠨ ᠬᠠᠭᠠᠨᠲᠠᠨ ᠮᠢᠨᠢ᠂ ᠲᠠᠨ ᠤ ᠲᠠᠭᠠᠯᠠᠯ ᠢ ᠣᠯᠬᠤ ᠶᠢ ᠬᠦᠰᠡᠶᠡ》 ᠭᠡᠵᠡᠢ᠃
ᠱᠢᠮᠧᠶᠢ ᠶᠢᠨ ᠬᠠᠷᠢᠶᠠᠯ
5 ᠳ᠋ᠠᠸᠢᠳ᠋ ᠬᠠᠭᠠᠨ ᠪᠠᠾᠦᠷᠢᠮ ᠳᠤ ᠣᠢᠷᠠᠲᠤᠵᠤ ᠪᠠᠢᠬᠤ ᠳᠤ᠂ ᠲᠡᠨᠳᠡ ᠡᠴᠡ ᠰᠠᠦ᠋ᠯ ᠤᠨ ᠣᠪᠣᠭ ᠤᠨ ᠨᠢᠭᠡᠨ ᠤᠷᠤᠭ ᠤᠨ ᠬᠥᠮᠦᠨ᠂ ᠭᠧᠷᠠ ᠶᠢᠨ ᠬᠥᠪᠡᠭᠦᠨ ᠱᠢᠮᠧᠶᠢ ᠭᠠᠷᠴᠤ ᠢᠷᠡᠯᠡ᠃ ᠲᠡᠷᠡ ᠬᠠᠷᠢᠶᠠᠯ ᠲᠠᠯᠪᠢᠭᠰᠠᠭᠠᠷ ᠳᠥᠭᠥᠨ ᠢᠷᠡᠵᠦ᠂ 6 ᠳ᠋ᠠᠸᠢᠳ᠋ ᠪᠣᠯᠣᠨ ᠳ᠋ᠠᠸᠢᠳ᠋ ᠬᠠᠭᠠᠨ ᠤ ᠬᠠᠮᠤᠭ ᠲᠦᠰᠢᠮᠡᠯ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠵᠦ ᠪᠠᠢᠪᠠ᠃ ᠬᠠᠭᠠᠨ ᠤ ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠ ᠳᠤ ᠪᠦᠬᠦ ᠴᠡᠷᠢᠭ ᠪᠣᠯᠣᠨ ᠬᠦᠴᠦᠲᠦ ᠳᠠᠢᠴᠢᠨ ᠨᠢ ᠪᠠᠢᠯᠠ᠃ 7 ᠱᠢᠮᠧᠶᠢ ᠬᠠᠷᠢᠶᠠᠯ ᠲᠠᠯᠪᠢᠵᠤ᠄ 《ᠲᠣᠨᠢᠯ᠂ ᠲᠣᠨᠢᠯ᠃ ᠴᠢᠰᠤ ᠤᠷᠤᠰᠬᠠᠭᠴᠢ ᠣᠯᠢᠭ ᠦᠭᠡᠢ ᠨᠣᠪᠰᠢ ᠴᠢ︕》 ᠬᠡᠮᠡᠨ ᠬᠠᠷᠢᠶᠠᠪᠠ᠃ 8 《ᠶᠣᠬᠣᠸᠠ ᠰᠠᠦ᠋ᠯ ᠤᠨ ᠭᠡᠷ ᠦᠨ ᠤᠷᠤᠰᠤᠭᠰᠠᠨ ᠪᠦᠬᠦ ᠴᠢᠰᠤᠨ ᠤ ᠥᠰᠢᠶᠡ ᠶᠢ ᠲᠡᠭᠦᠨ ᠦ ᠣᠷᠣᠨ ᠳᠤ ᠬᠠᠭᠠᠨ ᠪᠣᠯᠣᠭᠰᠠᠨ ᠴᠢᠮᠠ ᠠᠴᠠ ᠠᠪᠤᠭᠰᠠᠨ ᠪᠠᠢᠨᠠ᠃ ᠶᠣᠬᠣᠸᠠ ᠡᠨᠡ ᠬᠠᠭᠠᠨᠴᠢᠯᠠᠯ ᠢ ᠴᠢᠨᠦ ᠬᠥᠪᠡᠭᠦᠨ ᠠᠪᠰᠠᠯᠣᠮ ᠤᠨ ᠭᠠᠷ ᠲᠤ ᠲᠤᠰᠢᠶᠠᠵᠠᠢ᠃ ᠬᠠᠷᠠ᠂ ᠴᠢ ᠴᠢᠰᠤ ᠤᠷᠤᠰᠬᠠᠭᠴᠢ ᠤᠴᠢᠷ ᠠᠴᠠ ᠲᠠᠷᠢᠭᠰᠠᠨ ᠭᠠᠢ ᠳᠠᠭᠠᠨ ᠣᠷᠢᠶᠠᠭᠳᠠᠵᠠᠢ》 ᠭᠡᠪᠡ᠃
9 ᠽᠧᠷᠣᠢᠶᠠ ᠶᠢᠨ ᠬᠥᠪᠡᠭᠦᠨ ᠠᠪᠢᠱᠠᠢ ᠬᠠᠭᠠᠨ ᠳᠤ᠄ 《ᠡᠨᠡ ᠦᠬᠦᠭᠰᠡᠨ ᠨᠣᠬᠠᠢ ᠶᠠᠭᠠᠬᠢᠬᠤᠯᠠᠷ ᠢᠶᠠᠨ ᠮᠢᠨᠦ ᠡᠵᠡᠨ ᠬᠠᠭᠠᠨ ᠢ ᠬᠠᠷᠢᠶᠠᠵᠤ ᠪᠠᠢᠨᠠ ᠪᠤᠢ︖ ᠲᠡᠰᠢ ᠣᠴᠢᠵᠤ᠂ ᠲᠡᠭᠦᠨ ᠦ ᠲᠣᠯᠣᠭᠠᠢ ᠶᠢ ᠴᠠᠪᠴᠢᠬᠤ ᠶᠢ ᠨᠠᠳᠠ ᠳᠤ ᠵᠥᠪᠰᠢᠶᠡᠷᠡᠭᠡᠴᠢ》 ᠭᠡᠰᠡᠨ ᠳᠦ᠂ 10 ᠬᠠᠭᠠᠨ᠄ 《ᠲᠠ ᠨᠠᠷ ᠲᠤ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠪᠤᠢ︖ ᠽᠧᠷᠣᠢᠶᠠ ᠶᠢᠨ ᠬᠥᠪᠡᠭᠦᠳ ᠡ᠂ ᠬᠡᠷᠪᠡ ᠶᠣᠬᠣᠸᠠ ᠲᠡᠭᠦᠨ ᠳᠦ᠄ 〈ᠳ᠋ᠠᠸᠢᠳ᠋ ᠢ ᠬᠠᠷᠢᠶᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠢᠶᠡᠷ ᠲᠡᠷᠡ ᠬᠠᠷᠢᠶᠠᠵᠤ ᠪᠠᠢᠭᠠ ᠪᠣᠯ᠂ ᠬᠡᠨ ᠲᠡᠭᠦᠨ ᠳᠦ᠄ 〈ᠶᠠᠭᠤᠨ ᠳᠤ ᠢᠩᠭᠢᠪᠡ︖〉 ᠭᠡᠵᠦ ᠬᠡᠯᠡᠬᠦ ᠶᠤᠮ ᠪᠤᠢ︖》 ᠭᠡᠳ 11 ᠠᠪᠢᠱᠠᠢ ᠪᠣᠯᠣᠨ ᠪᠦᠬᠦ ᠲᠦᠰᠢᠮᠡᠯ ᠳᠡᠭᠡᠨ᠄ 《ᠬᠠᠷᠠ᠂ ᠪᠡᠶᠡ ᠡᠴᠡ ᠮᠢᠨᠢ ᠭᠠᠷᠤᠭᠰᠠᠨ ᠬᠦᠦ ᠬᠦᠷᠲᠡᠯᠡ ᠮᠢᠨᠦ ᠠᠮᠢ ᠶᠢ ᠠᠪᠬᠤ ᠭᠡᠵᠦ ᠪᠠᠢᠬᠤ ᠳᠤ᠂ ᠣᠳᠣ ᠡᠨᠡ ᠪᠢᠨᠶᠠᠮᠢᠨ ᠬᠥᠮᠦᠨ ᠦ ᠬᠤᠪᠢ ᠳᠤ ᠪᠣᠯ ᠠᠷᠭᠠ ᠦᠭᠡᠢ ᠳᠠ᠃ ᠶᠣᠬᠣᠸᠠ ᠲᠡᠭᠦᠨ ᠳᠦ ᠠᠢᠯᠠᠳᠤᠭᠰᠠᠨ᠂ ᠲᠡᠭᠦᠨ ᠢ ᠣᠷᠬᠢ᠂ ᠲᠡᠷᠡ ᠬᠠᠷᠢᠶᠠᠵᠤ ᠯᠠ ᠪᠠᠢᠭ᠃ 12 ᠶᠣᠬᠣᠸᠠ ᠮᠢᠨᠦ ᠵᠣᠪᠠᠯᠠᠩ ᠢ ᠬᠠᠷᠠᠵᠤ᠂ ᠥᠨᠥᠳᠥᠷ ᠦᠨ ᠬᠠᠷᠢᠶᠠᠯ ᠤᠨ ᠣᠷᠣᠨ ᠳᠤ ᠰᠠᠢᠨ ᠢ ᠪᠤᠴᠠᠭᠠᠨ ᠥᠭᠴᠦ ᠮᠠᠭᠠᠳ》 ᠭᠡᠪᠡ᠃ 13 ᠳ᠋ᠠᠸᠢᠳ᠋ ᠪᠣᠯᠣᠨ ᠬᠠᠮᠲᠤᠷᠠᠭᠴᠢᠳ ᠨᠢ ᠴᠠᠭᠠᠰᠢᠯᠠᠨ ᠶᠠᠪᠤᠪᠠ᠃ ᠱᠢᠮᠧᠶᠢ ᠲᠡᠭᠦᠨ ᠲᠡᠢ ᠵᠡᠷᠭᠡᠴᠡᠨ ᠠᠭᠤᠯᠠ ᠶᠢᠨ ᠪᠡᠯ ᠢᠶᠡᠷ ᠶᠠᠪᠤᠭᠤᠲᠠ ᠪᠠᠨ ᠬᠠᠷᠢᠶᠠᠵᠤ᠂ ᠴᠢᠯᠠᠭᠤ ᠰᠢᠳᠡᠨ᠂ ᠰᠢᠷᠣᠢ ᠰᠠᠴᠤᠵᠤ ᠪᠠᠢᠪᠠ᠃ 14 ᠬᠠᠭᠠᠨ᠂ ᠮᠥᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠤᠢ ᠬᠥᠮᠦᠰ ᠵᠣᠷᠢᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠬᠦᠷᠬᠦ ᠳᠦ᠂ ᠪᠦᠭᠦᠳᠡ ᠶᠠᠳᠠᠷᠠᠭᠰᠠᠨ ᠪᠠᠢᠯᠠ᠃ ᠲᠡᠨᠳᠡ ᠳ᠋ᠠᠸᠢᠳ᠋ ᠠᠮᠤᠰᠬᠢᠪᠠ᠃
ᠠᠪᠰᠠᠯᠣᠮ ᠤᠨ ᠬᠣᠶᠠᠷ ᠵᠥᠪᠯᠡᠭᠴᠢ
15 ᠲᠡᠭᠡᠲᠡᠯᠡ ᠠᠪᠰᠠᠯᠣᠮ ᠢᠰᠷᠧᠯ ᠤᠨ ᠦᠢ ᠣᠯᠠᠨ ᠲᠠᠢ ᠬᠠᠮᠲᠤ ᠶᠧᠷᠦ᠋ᠰᠠᠯᠧᠮ ᠬᠣᠲᠠ ᠳᠤ ᠣᠷᠣᠵᠤ ᠢᠷᠡᠯᠡ᠃ ᠠᠾᠢᠲ᠋ᠣᠹᠧᠯ ᠴᠤ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠪᠠ᠃ 16 ᠳ᠋ᠠᠸᠢᠳ᠋ ᠤᠨ ᠠᠨᠳᠠ ᠠᠷᠺ ᠬᠥᠮᠦᠨ ᠾᠦᠱᠠᠢ ᠠᠪᠰᠠᠯᠣᠮ ᠳᠡᠭᠡᠷᠡ ᠣᠴᠢᠵᠤ᠄ 《ᠬᠠᠭᠠᠨᠲᠠᠨ ᠮᠠᠨᠳᠤᠲᠤᠭᠠᠢ︕ ᠬᠠᠭᠠᠨᠲᠠᠨ ᠮᠠᠨᠳᠤᠲᠤᠭᠠᠢ︕》 ᠭᠡᠰᠡᠨ ᠳᠦ᠂ 17 ᠠᠪᠰᠠᠯᠣᠮ ᠾᠦᠱᠠᠢ ᠳᠤ᠄ 《ᠠᠨᠳᠠ ᠳᠠᠭᠠᠨ ᠦᠨᠡᠨᠴᠢ ᠪᠠᠢᠭᠠ ᠴᠢᠨᠢ ᠡᠨᠡ ᠤᠤ︖ ᠶᠠᠭᠠᠬᠢᠭᠠᠳ ᠲᠠ ᠠᠨᠳᠠ ᠲᠠᠢ ᠪᠠᠨ ᠬᠠᠮᠲᠤ ᠶᠠᠪᠤᠭᠰᠠᠨ ᠦᠭᠡᠢ ᠪᠤᠢ︖》 ᠭᠡᠪᠡ᠃ 18 ᠾᠦᠱᠠᠢ ᠠᠪᠰᠠᠯᠣᠮ ᠳᠤ᠄ 《ᠦᠭᠡᠢ᠂ ᠶᠣᠬᠣᠸᠠ ᠪᠣᠯᠣᠨ ᠡᠨᠡ ᠠᠷᠠᠳ ᠲᠦᠮᠡᠨ᠂ ᠪᠦᠬᠦ ᠢᠰᠷᠧᠯᠴᠦᠳ ᠬᠡᠨ ᠢ ᠰᠣᠩ᠋ᠭᠣᠭᠰᠠᠨ ᠪᠠᠢᠪᠠᠯ ᠪᠢ ᠲᠡᠭᠦᠨ ᠦ ᠬᠢ ᠪᠣᠯᠵᠤ᠂ ᠮᠥᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ᠃ 19 ᠳᠠᠬᠢᠭᠠᠳ ᠬᠡᠯᠡᠪᠡᠯ ᠪᠢ ᠬᠡᠨ ᠳᠦ ᠦᠢᠯᠡᠴᠢᠯᠡᠬᠦ ᠶᠣᠰᠣᠲᠠᠢ ᠶᠤᠮ ᠪᠤᠢ︖ ᠬᠦᠦ ᠳᠦᠨᠢ ᠦᠢᠯᠡᠴᠢᠯᠡᠬᠦ ᠶᠣᠰᠣᠲᠠᠢ ᠪᠢᠰᠢ ᠭᠡᠵᠢ ᠤᠤ︖ ᠪᠢ ᠡᠴᠢᠭᠡ ᠳᠦ ᠲᠠᠨᠢ ᠦᠢᠯᠡᠴᠢᠯᠡᠭᠰᠡᠨ ᠲᠡᠢ ᠠᠳᠠᠯᠢ ᠮᠥᠨ ᠲᠠᠨ ᠳᠤ ᠦᠢᠯᠡᠴᠢᠯᠡᠨᠡ》 ᠭᠡᠪᠡ᠃
20 ᠠᠪᠰᠠᠯᠣᠮ ᠠᠾᠢᠲ᠋ᠣᠹᠧᠯ ᠳᠤ᠄ 《ᠪᠢᠳᠡᠨ ᠦ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠶᠢ ᠲᠠ ᠵᠥᠪᠯᠡᠭᠡᠴᠢ》 ᠭᠡᠬᠦ ᠳᠦ᠂ 21 ᠠᠾᠢᠲ᠋ᠣᠹᠧᠯ ᠠᠪᠰᠠᠯᠣᠮ ᠳᠤ᠄ 《ᠡᠴᠢᠭᠡ ᠶᠢᠨ ᠢᠶᠠᠨ ᠣᠷᠳᠣᠨ ᠢᠶᠠᠨ ᠰᠠᠬᠢᠭᠤᠯᠬᠤ ᠪᠠᠷ ᠦᠯᠡᠳᠡᠭᠡᠭᠰᠡᠨ ᠲᠠᠲᠠᠪᠤᠷᠢ ᠨᠤᠭᠤᠳ ᠤᠷᠤᠭᠤ ᠨᠢ ᠣᠷᠣᠭᠲᠤᠨ᠃ ᠡᠴᠢᠭᠡ ᠶᠢᠨ ᠢᠶᠠᠨ ᠵᠢᠪᠡᠭᠦᠦ ᠶᠢ ᠢᠩᠭᠢᠵᠦ ᠬᠦᠷᠭᠡᠭᠰᠡᠨ ᠢ ᠴᠢᠨᠢ ᠪᠦᠬᠦ ᠢᠰᠷᠧᠯ ᠰᠣᠨᠣᠰᠪᠠᠯ ᠲᠠᠨ ᠲᠠᠢ ᠬᠠᠮᠲᠤ ᠪᠠᠢᠭᠠ ᠪᠦᠬᠦ ᠬᠥᠮᠦᠨ ᠦ ᠭᠠᠷ ᠬᠦᠴᠦᠲᠡᠢ ᠪᠣᠯᠬᠤ ᠪᠣᠯᠣᠨᠠ》 ᠭᠡᠯᠡ᠃ 22 ᠢᠩᠭᠢᠭᠡᠳ ᠬᠥᠮᠦᠰ ᠠᠪᠰᠠᠯᠣᠮ ᠳᠤ ᠵᠣᠷᠢᠭᠤᠯᠵᠤ᠂ ᠳᠡᠭᠡᠪᠦᠷ ᠳᠡᠭᠡᠷᠡ ᠮᠠᠢᠬᠠᠨ ᠪᠠᠷᠢᠭᠰᠠᠨ ᠳᠤ᠂ ᠪᠦᠬᠦ ᠢᠰᠷᠧᠯ ᠤᠨ ᠨᠢᠳᠦᠨ ᠳᠡᠭᠡᠷᠡ ᠠᠪᠰᠠᠯᠣᠮ ᠡᠴᠢᠭᠡ ᠶᠢᠨ ᠢᠶᠠᠨ ᠲᠠᠲᠠᠪᠤᠷᠢ ᠨᠤᠭᠤᠳ ᠳᠡᠭᠡᠷᠡ ᠣᠷᠣᠪᠠ᠃ 23 ᠲᠡᠷᠡ ᠡᠳᠦᠷ ᠤᠳ ᠲᠤ ᠠᠾᠢᠲ᠋ᠣᠹᠧᠯ ᠤᠨ ᠵᠥᠪᠯᠡᠯᠭᠡ ᠪᠤᠷᠬᠠᠨ ᠠᠴᠠ ᠠᠰᠠᠭᠤᠵᠤ ᠣᠯᠣᠭᠰᠠᠨ ᠦᠭᠡ ᠮᠡᠲᠦ ᠪᠠᠢᠵᠤ᠂ ᠠᠾᠢᠲ᠋ᠣᠹᠧᠯ ᠤᠨ ᠵᠥᠪᠯᠡᠯᠭᠡ ᠪᠦᠷᠢ ᠶᠢ ᠳ᠋ᠠᠸᠢᠳ᠋ ᠴᠤ᠂ ᠠᠪᠰᠠᠯᠣᠮ ᠴᠤ ᠲᠡᠭᠡᠵᠦ ᠦᠵᠡᠵᠦ ᠪᠠᠢᠯᠠ᠃