ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠵᠢᠷᠭᠤᠭᠠ
ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠶᠧᠷᠦ᠋ᠰᠠᠯᠧᠮ ᠳᠤ ᠠᠪᠴᠢᠷᠠᠪᠠ
1 ᠳ᠋ᠠᠸᠢᠳ᠋ ᠢᠰᠷᠧᠯ ᠤᠨ ᠭᠤᠷᠪᠠᠨ ᠲᠦᠮᠡᠨ ᠰᠢᠯᠢᠳᠡᠭ ᠴᠡᠷᠢᠭ ᠢ ᠪᠦᠭᠦᠳᠡ ᠶᠢ ᠳᠠᠬᠢᠨ ᠴᠤᠭᠯᠠᠭᠤᠯᠪᠠ᠃ 2 ᠳ᠋ᠠᠸᠢᠳ᠋ ᠪᠦᠬᠦ ᠴᠡᠷᠢᠭ ᠲᠠᠢ ᠪᠠᠨ ᠬᠠᠮᠲᠤ ᠬᠥᠳᠡᠯᠦᠨ ᠪᠠᠯ ᠶᠦᠳᠠ ᠤᠷᠤᠭᠤ ᠣᠴᠢᠵᠤ᠂ ᠺᠧᠷᠣᠪ ᠤᠳ ᠤᠨ ᠳᠡᠭᠡᠷᠡ ᠵᠠᠯᠠᠷᠠᠵᠤ ᠪᠤᠢ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠨᠡᠷᠡ ᠪᠡᠷ᠂ ᠲᠡᠷᠡ ᠨᠡᠷᠡ ᠪᠡᠷ ᠳᠠᠭᠤᠳᠠᠭᠳᠠᠳᠠᠭ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠲᠡᠨᠳᠡ ᠡᠴᠡ ᠠᠪᠴᠢᠷᠠᠬᠤ ᠪᠠᠷ ᠪᠣᠯᠪᠠ᠃ 3 ᠲᠡᠳᠡ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠰᠢᠨᠡ ᠲᠡᠷᠭᠡᠨ ᠳᠡᠭᠡᠷᠡ ᠲᠠᠯᠪᠢᠵᠤ᠂ ᠳᠣᠪᠣ ᠳᠡᠭᠡᠷᠡᠬᠢ ᠠᠪᠢᠨᠠᠳᠠᠪ ᠤᠨ ᠭᠡᠷ ᠡᠴᠡ ᠠᠪᠴᠤ ᠶᠠᠪᠤᠬᠤ ᠳᠤ᠂ ᠠᠪᠢᠨᠠᠳᠠᠪ ᠤᠨ ᠬᠣᠶᠠᠷ ᠬᠥᠪᠡᠭᠦᠨ ᠦᠽᠠ᠂ ᠠᠾᠢᠣ᠋ ᠲᠡᠷᠡ ᠰᠢᠨᠡ ᠲᠡᠷᠭᠡ ᠶᠢ ᠬᠥᠲᠥᠯᠦᠯᠡ᠃ 4 ᠲᠡᠳᠡ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠲᠠᠯᠪᠢᠭᠰᠠᠨ ᠲᠡᠷᠭᠡ ᠶᠢ ᠳᠣᠪᠣ ᠳᠡᠭᠡᠷᠡᠬᠢ ᠠᠪᠢᠨᠠᠳᠠᠪ ᠤᠨ ᠭᠡᠷ ᠡᠴᠡ ᠠᠪᠴᠤ ᠶᠠᠪᠤᠬᠤ ᠳᠤ᠂ ᠠᠾᠢᠣ᠋ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠠᠯᠬᠤᠵᠤ᠂ 5 ᠳ᠋ᠠᠸᠢᠳ᠋ ᠪᠣᠯᠣᠨ ᠢᠰᠷᠧᠯ ᠤᠨ ᠪᠦᠬᠦ ᠭᠡᠷ ᠳᠠᠭᠤᠤ ᠳᠠᠭᠤᠯᠠᠨ᠂ ᠶᠠᠲᠤᠭᠠ᠂ ᠬᠤᠭᠤᠷ᠂ ᠬᠡᠩᠭᠡᠷᠭᠡ᠂ ᠲᠣᠪᠰᠢᠭᠤᠷ᠂ ᠴᠠᠩ ᠳᠤᠤᠭᠠᠷᠭᠠᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠪᠦᠬᠦ ᠴᠢᠳᠠᠯ ᠢᠶᠠᠷ ᠢᠶᠠᠨ ᠬᠥᠭᠵᠢᠯᠳᠦᠵᠦ ᠪᠠᠢᠪᠠ᠃
6 ᠬᠠᠷᠢᠨ ᠲᠡᠳᠡ ᠨᠠᠺᠣᠨ ᠤ ᠦᠲᠦᠷᠮᠡ ᠳᠦ ᠢᠷᠡᠲᠡᠯᠡ᠂ ᠦᠬᠡᠷ ᠤᠳ ᠪᠦᠳᠦᠷᠢᠭᠰᠡᠨ ᠲᠤᠯᠠ ᠦᠽᠠ ᠪᠤᠷᠬᠠᠨ ᠤ ᠠᠪᠳᠠᠷᠠ ᠳᠤ ᠬᠦᠷᠴᠦ᠂ ᠪᠠᠷᠢᠭᠠᠳ ᠠᠪᠤᠪᠠ᠃ 7 ᠲᠡᠭᠡᠲᠡᠯᠡ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠦᠽᠠ ᠶᠢᠨ ᠡᠰᠡᠷᠭᠦ ᠰᠢᠲᠠᠵᠤ᠂ ᠠᠯᠳᠠᠭᠠ ᠶᠢᠨ ᠬᠢᠨᠢ ᠤᠯᠠᠮ ᠢᠶᠠᠷ ᠲᠡᠭᠦᠨ ᠢ ᠲᠡᠷᠡ ᠭᠠᠵᠠᠷ ᠲᠤᠨᠢ ᠴᠣᠬᠢᠭᠰᠠᠨ ᠳᠤ᠂ ᠲᠡᠷᠡ ᠲᠡᠨᠳᠡ᠂ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢᠨ ᠳᠡᠷᠭᠡᠳᠡ ᠦᠬᠦᠪᠡ᠃ 8 ᠶᠣᠬᠣᠸᠠ ᠦᠽᠠ ᠤᠷᠤᠭᠤ ᠲᠡᠢᠨ ᠬᠦ ᠳᠠᠭᠠᠷᠢᠨ ᠳᠣᠪᠲᠣᠯᠣᠭᠰᠠᠨ ᠳᠤ᠂ ᠳ᠋ᠠᠸᠢᠳ᠋ ᠠᠭᠤᠷᠯᠠᠪᠠ᠃ ᠡᠢᠮᠦ ᠡᠴᠡ ᠲᠡᠷᠡ ᠭᠠᠵᠠᠷ ᠥᠨᠥᠳᠥᠷ ᠪᠣᠯᠲᠠᠯᠠ ᠫᠧᠷᠧᠽ ᠦᠽᠠ 4 ᠭᠡᠵᠦ ᠨᠡᠷᠡᠯᠡᠭᠳᠡᠭᠰᠡᠭᠡᠷ ᠪᠠᠢᠨᠠ᠃ 9 ᠲᠡᠷᠡ ᠡᠳᠦᠷ ᠳ᠋ᠠᠸᠢᠳ᠋ ᠶᠣᠬᠣᠸᠠ ᠠᠴᠠ ᠠᠶᠤᠨ᠄ 《ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠨᠠᠰᠢ ᠣᠷᠣᠭᠤᠯᠵᠤ ᠪᠣᠯᠣᠨᠠ ᠭᠡᠵᠢ ᠤᠤ︖》 ᠭᠡᠵᠡᠢ᠃ 10 ᠲᠡᠭᠡᠭᠡᠳ ᠳ᠋ᠠᠸᠢᠳ᠋ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠤᠷᠤᠭᠤ ᠪᠠᠨ ᠨᠡᠭᠦᠯᠭᠡᠬᠦ ᠰᠠᠨᠠᠭᠠ ᠦᠭᠡᠢ ᠪᠣᠯᠵᠤ᠂ ᠲᠡᠭᠦᠨ ᠢ ᠭᠢᠲ ᠬᠥᠮᠦᠨ ᠣᠪᠧᠳ᠋ ᠡᠳᠣᠮ ᠤᠨ ᠭᠡᠷ ᠲᠦ ᠰᠢᠯᠵᠢᠭᠦᠯᠪᠡ᠃ 11 ᠢᠩᠭᠢᠭᠡᠳ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠭᠢᠲ ᠬᠥᠮᠦᠨ ᠣᠪᠧᠳ᠋ ᠡᠳᠣᠮ ᠤᠨ ᠭᠡᠷ ᠲᠦ ᠭᠤᠷᠪᠠᠨ ᠰᠠᠷᠠ ᠲᠠᠯᠪᠢᠭᠰᠠᠨ ᠪᠠᠢᠨᠠ᠃ ᠶᠣᠬᠣᠸᠠ ᠣᠪᠧᠳ᠋ ᠡᠳᠣᠮ ᠪᠣᠯᠣᠨ ᠪᠦᠬᠦ ᠭᠡᠷ ᠦᠨ ᠬᠢᠨ ᠢ ᠨᠢ ᠢᠪᠡᠭᠡᠪᠡ᠃
12 ᠳ᠋ᠠᠸᠢᠳ᠋ ᠬᠠᠭᠠᠨ ᠳᠤ 《ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢᠨ ᠤᠯᠠᠮ ᠢᠶᠠᠷ ᠶᠣᠬᠣᠸᠠ ᠣᠪᠧᠳ᠋ ᠡᠳᠣᠮ ᠤᠨ ᠭᠡᠷ ᠪᠣᠯᠣᠨ ᠲᠡᠭᠦᠨ ᠢ ᠪᠦᠬᠦ ᠲᠠᠯᠠ ᠪᠠᠷ ᠢᠪᠡᠭᠡᠭᠰᠡᠨ》 ᠭᠡᠰᠡᠨ ᠮᠡᠳᠡᠭᠡ ᠬᠦᠷᠦᠭᠰᠡᠨ ᠳᠦ᠂ ᠳ᠋ᠠᠸᠢᠳ᠋ ᠪᠠᠶᠠᠷ ᠲᠠᠢ ᠪᠠᠷ ᠲᠡᠰᠢ ᠣᠴᠢᠵᠤ᠂ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠣᠪᠧᠳ᠋ ᠡᠳᠣᠮ ᠤᠨ ᠭᠡᠷ ᠡᠴᠡ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠥᠭᠡᠳᠡ ᠠᠪᠴᠢᠷᠠᠪᠠ᠃ 13 ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠴᠢᠳ ᠵᠢᠷᠭᠤᠭᠠᠨ ᠠᠯᠬᠤᠮ ᠶᠠᠪᠤᠬᠤ ᠳᠤ᠂ ᠳ᠋ᠠᠸᠢᠳ᠋ ᠦᠬᠡᠷ ᠪᠣᠯᠣᠨ ᠲᠠᠷᠭᠤᠨ ᠬᠣᠨᠢ ᠪᠠᠷ ᠲᠠᠬᠢᠯ ᠡᠷᠭᠦᠪᠡ᠃ 14 ᠳ᠋ᠠᠸᠢᠳ᠋ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠪᠠᠢᠳᠠᠭ ᠴᠢᠳᠠᠯ ᠢᠶᠠᠷ ᠢᠶᠠᠨ ᠪᠥᠵᠢᠭᠯᠡᠪᠡ᠃ ᠳ᠋ᠠᠸᠢᠳ᠋ ᠮᠠᠭᠠᠯᠢᠩ᠋ᠭᠤᠨ ᠡᠹᠣᠳ ᠡᠮᠦᠰᠦᠭᠰᠡᠨ ᠪᠠᠢᠯᠠ᠃ 15 ᠡᠢᠨ ᠬᠦ ᠳ᠋ᠠᠸᠢᠳ᠋ ᠪᠣᠯᠣᠨ ᠢᠰᠷᠧᠯ ᠤᠨ ᠬᠠᠮᠤᠭ ᠭᠡᠷ ᠤᠤᠬᠠᠢᠯᠠᠨ᠂ ᠡᠪᠡᠷ ᠪᠦᠷᠢᠶᠡ ᠬᠦᠩᠭᠢᠨᠡᠭᠦᠯᠦᠭᠰᠡᠭᠡᠷ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠠᠪᠴᠢᠷᠠᠵᠤ ᠪᠠᠢᠯᠠ᠃
16 ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠳᠤ ᠣᠷᠣᠵᠤ ᠢᠷᠡᠬᠦ ᠦᠶᠡ ᠳᠦ᠂ ᠰᠠᠦ᠋ᠯ ᠤᠨ ᠥᠬᠢᠨ ᠮᠢᠺᠠᠯ ᠴᠣᠩ᠋ᠬᠣ ᠪᠠᠷ ᠥᠩᠭᠡᠶᠢᠨ ᠬᠠᠷᠠᠵᠤ ᠪᠠᠢᠪᠠ᠃ ᠲᠡᠷᠡ ᠳ᠋ᠠᠸᠢᠳ᠋ ᠬᠠᠭᠠᠨ ᠤ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠡᠷᠭᠢᠯᠳᠦᠨ ᠦᠰᠦᠷᠴᠦ ᠪᠥᠵᠢᠭᠯᠡᠵᠦ ᠪᠤᠢ ᠶᠢ ᠬᠠᠷᠠᠭᠠᠳ ᠳᠣᠲᠣᠷᠠ ᠪᠠᠨ ᠲᠡᠭᠦᠨ ᠢ ᠪᠠᠰᠤᠮᠵᠢᠯᠠᠪᠠ᠃
17 ᠲᠡᠳᠡ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠠᠪᠴᠢᠷᠠᠭᠠᠳ᠂ ᠠᠪᠳᠠᠷᠠ ᠳᠤ ᠵᠣᠷᠢᠭᠤᠯᠤᠨ ᠳ᠋ᠠᠸᠢᠳ᠋ ᠤᠨ ᠪᠣᠰᠬᠠᠭᠰᠠᠨ ᠴᠠᠴᠠᠷ ᠤᠨ ᠭᠣᠣᠯ ᠳᠤ᠂ ᠪᠠᠢᠷᠢᠨ ᠳᠤᠨᠢ ᠵᠠᠯᠠᠭᠰᠠᠨ ᠳᠤ᠂ ᠳ᠋ᠠᠸᠢᠳ᠋ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠣᠨ ᠡᠪ ᠦᠨ ᠲᠠᠬᠢᠯ ᠢ ᠡᠷᠭᠦᠭᠰᠡᠨ ᠪᠠᠢᠨᠠ᠃ 18 ᠳ᠋ᠠᠸᠢᠳ᠋ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠣᠨ ᠡᠪ ᠦᠨ ᠲᠠᠬᠢᠯ ᠢ ᠡᠷᠭᠦᠵᠦ ᠳᠠᠭᠤᠰᠤᠭᠠᠳ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠨᠡᠷᠡ ᠪᠡᠷ ᠠᠷᠠᠳ ᠣᠯᠠᠨ ᠢ ᠢᠷᠥᠭᠡᠵᠦ 19 ᠬᠠᠮᠤᠭ ᠠᠷᠠᠳ ᠣᠯᠠᠨ᠂ ᠴᠤᠭᠯᠠᠷᠠᠭᠰᠠᠨ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠰᠷᠧᠯ ᠤᠨ ᠬᠥᠮᠦᠨ ᠪᠣᠯᠭᠠᠨ ᠳᠤ ᠨᠢᠭᠡ ᠳᠤᠭᠤᠢ ᠪᠣᠣᠪᠣ᠂ ᠬᠡᠰᠡᠭ ᠮᠢᠬᠠ᠂ ᠨᠢᠭᠡ ᠪᠥᠭᠡᠮ ᠬᠠᠲᠠᠭᠠᠭᠰᠠᠨ ᠦᠵᠦᠮ ᠲᠦᠭᠡᠭᠡᠭᠰᠡᠨ ᠳᠦ᠂ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠭᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠠᠢ᠃
20 ᠳ᠋ᠠᠸᠢᠳ᠋ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠢᠶᠠᠨ ᠢᠷᠥᠭᠡᠬᠦ ᠪᠡᠷ ᠪᠤᠴᠠᠵᠤ ᠢᠷᠡᠬᠦ ᠳᠦ᠂ ᠰᠠᠦ᠋ᠯ ᠤᠨ ᠥᠬᠢᠨ ᠮᠢᠺᠠᠯ ᠳ᠋ᠠᠸᠢᠳ᠋ ᠢ ᠤᠭᠲᠤᠬᠤ ᠪᠠᠷ ᠭᠠᠷᠴᠤ ᠢᠷᠡᠭᠡᠳ᠄ 《ᠢᠰᠷᠧᠯ ᠤᠨ ᠬᠠᠭᠠᠨ ᠥᠨᠥᠳᠥᠷ ᠶᠠᠮᠠᠷ ᠶᠡᠬᠡ ᠣᠨᠴᠠᠭᠠᠢᠷᠠᠪᠠ︖ ᠪᠦᠳᠦᠭᠦᠯᠢᠭ ᠬᠥᠮᠦᠨ ᠱᠠᠯᠳᠠᠯᠠᠵᠤ ᠨᠢᠴᠦᠭᠦᠯᠡᠳᠡᠭ ᠦᠨ ᠠᠳᠠᠯᠢ ᠥᠨᠥᠳᠥᠷ ᠲᠠ ᠲᠦᠰᠢᠮᠡᠳ ᠦᠨ ᠢᠶᠠᠨ ᠰᠢᠪᠡᠭᠴᠢᠳ ᠤᠨ ᠨᠢᠳᠦᠨ ᠳᠡᠭᠡᠷᠡ ᠨᠢᠴᠦᠭᠦᠯᠡᠯᠡ》 ᠭᠡᠪᠡ᠃ 21 ᠳ᠋ᠠᠸᠢᠳ᠋ ᠮᠢᠺᠠᠯ ᠳᠤ᠄ 《ᠪᠢ ᠶᠣᠬᠣᠸᠠ ᠶᠢᠨ ᠯᠠ ᠡᠮᠦᠨᠡ ᠪᠥᠵᠢᠭᠯᠡᠭᠰᠡᠨ︕ ᠶᠣᠬᠣᠸᠠ ᠴᠢᠨᠦ ᠡᠴᠢᠭᠡ ᠪᠣᠯᠣᠨ ᠲᠡᠭᠦᠨ ᠦ ᠬᠠᠮᠤᠭ ᠭᠡᠷ ᠦᠨ ᠬᠢᠨ ᠤ ᠣᠷᠣᠨ ᠳᠤ ᠨᠠᠮᠠᠶᠢ ᠰᠣᠩ᠋ᠭᠣᠵᠤ᠂ ᠨᠠᠮᠠᠶᠢ ᠶᠣᠬᠣᠸᠠ ᠶᠢᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠵᠠᠬᠢᠷᠤᠭᠴᠢ ᠪᠠᠷ ᠲᠣᠮᠢᠯᠠᠭᠰᠠᠨ ᠤᠴᠢᠷ ᠠᠴᠠ ᠪᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠪᠠᠶᠠᠷ ᠲᠠᠢ ᠪᠠᠢᠬᠤ ᠪᠣᠯᠣᠨᠠ᠃ 22 ᠪᠢ ᠡᠭᠦᠨ ᠡᠴᠡ ᠴᠤ ᠢᠯᠡᠭᠦᠦ ᠳᠣᠣᠷᠠᠳᠤ ᠪᠣᠯᠵᠤ᠂ ᠴᠢᠨᠦ 5 ᠨᠢᠳᠦᠨ ᠳᠦ ᠪᠠᠰᠤᠮᠵᠢᠯᠠᠭᠳᠠᠭᠰᠠᠨ ᠴᠤ᠂ ᠴᠢᠨᠦ ᠬᠡᠯᠡᠭᠰᠡᠨ ᠲᠡᠳᠡᠭᠡᠷ ᠰᠢᠪᠡᠭᠴᠢᠨ ᠳᠤ ᠬᠦᠨᠳᠦᠯᠡᠭᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃ 23 ᠰᠠᠦ᠋ᠯ ᠤᠨ ᠥᠬᠢᠨ ᠮᠢᠺᠠᠯ ᠨᠠᠰᠤᠨ ᠡᠴᠦᠰ ᠪᠣᠯᠲᠠᠯᠠ ᠪᠠᠨ ᠦᠷᠡ ᠬᠡᠦᠬᠡᠳ ᠦᠭᠡᠢ ᠪᠠᠢᠪᠠ᠃