ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠬᠣᠷᠢᠨ ᠨᠢᠭᠡ
ᠭᠢᠪᠧᠶᠣᠨᠴᠤᠳ ᠤᠨ ᠬᠠᠷᠠᠭᠤᠰᠤᠯ ᠢ ᠳᠡᠢᠯᠪᠡ
1 ᠳ᠋ᠠᠸᠢᠳ᠋ ᠤᠨ ᠦᠶᠡ ᠳᠦ ᠭᠤᠷᠪᠠᠨ ᠵᠢᠯ ᠳᠠᠷᠠᠭᠠᠯᠠᠨ ᠥᠯᠥᠰᠬᠥᠯᠡᠩ ᠪᠣᠯᠣᠭᠰᠠᠨ ᠪᠠᠢᠨᠠ᠃ ᠳ᠋ᠠᠸᠢᠳ᠋ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠬᠤ ᠳᠤ᠂ ᠶᠣᠬᠣᠸᠠ᠄ 《ᠭᠢᠪᠧᠶᠣᠨᠴᠤᠳ ᠢ ᠠᠯᠠᠵᠤ ᠴᠢᠰᠤ ᠤᠷᠤᠰᠬᠠᠭᠰᠠᠨ ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠭᠡᠷ ᠡᠴᠡ ᠪᠣᠯᠣᠭᠰᠠᠨ ᠶᠤᠮ》 ᠭᠡᠪᠡ᠃ 2 ᠬᠠᠭᠠᠨ ᠭᠢᠪᠧᠶᠣᠨᠴᠤᠳ ᠢ ᠳᠠᠭᠤᠳᠠᠨ ᠲᠡᠳᠡᠨ ᠲᠡᠢ ᠶᠠᠷᠢᠪᠠ᠃ ᠭᠢᠪᠧᠶᠣᠨᠴᠤᠳ ᠪᠣᠯ ᠢᠰᠷᠧᠯ ᠤᠨ ᠦᠷᠡ ᠤᠳᠤᠮ ᠪᠢᠰᠢ᠂ ᠬᠠᠷᠢᠨ ᠠᠮᠣᠷᠢᠴᠤᠳ ᠠᠴᠠ ᠦᠯᠡᠳᠡᠭᠰᠡᠨ ᠬᠥᠮᠦᠰ ᠪᠢᠯᠡ᠃ ᠢᠰᠷᠧᠯᠴᠦᠳ ᠲᠡᠳᠡᠨ ᠢ ᠬᠠᠮᠠᠭᠠᠯᠠᠬᠤ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠪᠣᠯᠪᠠᠴᠤ ᠰᠠᠦ᠋ᠯ ᠢᠰᠷᠧᠯᠴᠦᠳ᠂ ᠶᠦᠳᠠᠴᠤᠳ ᠤᠨ ᠲᠥᠯᠥᠭᠡ ᠯᠠ ᠭᠡᠬᠦ ᠬᠠᠯᠠᠭᠤᠨ ᠰᠡᠳᠬᠢᠯ ᠡᠴᠡ ᠪᠡᠨ ᠪᠣᠯᠵᠤ᠂ ᠲᠡᠳᠡᠨ ᠢ ᠤᠰᠠᠳᠬᠠᠬᠤ ᠪᠠᠷ ᠰᠠᠨᠠᠭᠠᠷᠬᠠᠵᠤ ᠪᠠᠢᠪᠠ᠃ 3 ᠳ᠋ᠠᠸᠢᠳ᠋ ᠭᠢᠪᠧᠶᠣᠨᠴᠤᠳ ᠠᠴᠠ᠄ 《ᠪᠢ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠶᠠᠭᠤ ᠬᠢᠵᠦ ᠥᠭᠬᠦ ᠪᠤᠢ︖ ᠪᠢ ᠶᠠᠭᠤ ᠪᠠᠷ ᠵᠣᠯᠢᠶᠠᠰᠤ ᠪᠣᠯᠭᠠᠪᠠᠯ ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠥᠪ ᠢ ᠢᠷᠥᠭᠡᠬᠦ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 4 ᠭᠢᠪᠧᠶᠣᠨᠴᠤᠳ ᠲᠡᠭᠦᠨ ᠳᠦ᠄ 《ᠰᠠᠦ᠋ᠯ ᠪᠠ ᠲᠡᠭᠦᠨ ᠦ ᠭᠡᠷ ᠡᠴᠡ ᠠᠯᠲᠠ ᠮᠥᠩᠭᠥ ᠱᠠᠭᠠᠷᠳᠠᠬᠤ ᠡᠷᠬᠡ ᠴᠤ᠂ ᠢᠰᠷᠧᠯ ᠤᠨ ᠬᠡᠨ ᠨᠢᠭᠡᠨ ᠢ ᠴᠠᠭᠠᠵᠠᠯᠠᠬᠤ ᠡᠷᠬᠡ ᠴᠤ ᠪᠢᠳᠡᠨ ᠳᠦ ᠪᠠᠢᠬᠤ ᠦᠭᠡᠢ》 ᠭᠡᠪᠡ᠃ ᠳ᠋ᠠᠸᠢᠳ᠋᠄ 《ᠲᠠ ᠨᠠᠷ ᠶᠠᠭᠤ ᠬᠡᠯᠡᠭᠰᠡᠨ ᠴᠤ ᠪᠢ ᠬᠢᠵᠦ ᠥᠭᠭᠥᠨᠡ》 ᠭᠡᠪᠡ᠃ 5 ᠲᠡᠳᠡ ᠬᠠᠭᠠᠨ ᠳᠤ᠄ 《ᠪᠢᠳᠡᠨ ᠢ ᠬᠢᠳᠤᠭᠰᠠᠨ ᠬᠥᠮᠦᠨ᠂ ᠪᠢᠳᠡᠨ ᠢ ᠢᠰᠷᠧᠯ ᠤᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠡᠴᠡ ᠦᠯᠡᠳᠡᠭᠡᠯ ᠦᠭᠡᠢ ᠤᠰᠠᠳᠬᠠᠬᠤ ᠪᠠᠷ ᠲᠥᠯᠥᠪᠯᠡᠭᠰᠡᠨ ᠬᠥᠮᠦᠨ ᠦ 6 ᠬᠥᠪᠡᠭᠦᠳ ᠡᠴᠡ ᠳᠣᠯᠣᠭᠠᠨ ᠬᠥᠮᠦᠨ ᠢ ᠪᠢᠳᠡᠨ ᠳᠦ ᠲᠤᠰᠢᠶᠠᠵᠤ ᠥᠭ᠃ ᠶᠣᠬᠣᠸᠠ ᠳᠤ ᠰᠣᠩ᠋ᠭᠣᠭᠳᠠᠭᠰᠠᠨ ᠰᠠᠦ᠋ᠯ ᠤᠨ ᠭᠢᠪᠧᠶᠠ ᠳᠤ᠂ ᠪᠢᠳᠡ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠲᠡᠳᠡᠨ ᠢ ᠳᠡᠭᠦᠵᠢᠯᠡᠶᠡ》 ᠭᠡᠬᠦ ᠳᠦ᠂ ᠬᠠᠭᠠᠨ᠄ 《ᠲᠤᠰᠢᠶᠠᠵᠤ ᠥᠭᠭᠥᠶᠡ》 ᠭᠡᠪᠡ᠃
7 ᠭᠡᠪᠡᠴᠦ ᠬᠠᠭᠠᠨ ᠰᠠᠦ᠋ᠯ ᠤᠨ ᠬᠦᠦ ᠶᠣᠨᠠᠲ᠋ᠠᠨ ᠤ ᠬᠥᠪᠡᠭᠦᠨ ᠮᠧᠹᠢᠪᠣᠱᠧᠲ ᠢ ᠦᠯᠡᠳᠡᠭᠡᠪᠡ᠃ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠲᠠᠯᠪᠢᠭᠰᠠᠨ ᠳ᠋ᠠᠸᠢᠳ᠋ ᠪᠣᠯᠣᠨ ᠶᠣᠨᠠᠲ᠋ᠠᠨ ᠤ ᠬᠣᠭᠣᠷᠣᠨᠳᠣᠬᠢ ᠲᠠᠩ᠋ᠭᠠᠷᠢᠭ ᠤᠨ ᠤᠴᠢᠷ ᠢᠶᠠᠷ ᠶᠤᠮ᠃ 8 ᠣᠷᠣᠨ ᠳᠤᠨᠢ ᠬᠠᠭᠠᠨ ᠠᠢᠶᠠ ᠶᠢᠨ ᠥᠬᠢᠨ ᠷᠢᠽᠫᠠ ᠶᠢᠨ ᠰᠠᠦ᠋ᠯ ᠳᠤ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠬᠣᠶᠠᠷ ᠬᠥᠪᠡᠭᠦᠨ ᠠᠷᠮᠣᠨᠢ ᠪᠠ ᠮᠧᠹᠢᠪᠣᠱᠧᠲ ᠢ᠂ ᠮᠥᠨ ᠰᠠᠦ᠋ᠯ ᠤᠨ ᠥᠬᠢᠨ ᠮᠧᠷᠠᠪ ᠤᠨ ᠮᠧᠬᠣᠯᠠᠲ ᠬᠥᠮᠦᠨ ᠪᠠᠷᠽᠢᠯᠠᠢ ᠶᠢᠨ ᠬᠥᠪᠡᠭᠦᠨ ᠠᠳ᠋ᠷᠢᠶᠧᠯ ᠳᠤ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠲᠠᠪᠤᠨ ᠬᠥᠪᠡᠭᠦᠨ ᠢ ᠠᠪᠴᠤ᠂ 9 ᠭᠢᠪᠧᠶᠣᠨᠴᠤᠳ ᠤᠨ ᠭᠠᠷ ᠲᠤ ᠲᠤᠰᠢᠶᠠᠪᠠ᠃ ᠭᠢᠪᠧᠶᠣᠨᠴᠤᠳ ᠲᠡᠳᠡᠨ ᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠭᠤᠯᠠᠨ ᠳᠡᠭᠡᠷᠡ ᠳᠡᠭᠦᠵᠢᠯᠡᠭᠰᠡᠨ ᠳᠦ᠂ ᠲᠡᠷᠡ ᠳᠣᠯᠣᠭᠠᠨ ᠬᠥᠮᠦᠨ ᠬᠠᠮᠲᠤ ᠳᠠᠭᠠᠨ ᠦᠬᠦᠪᠡ᠃ ᠲᠡᠳᠡ ᠤᠷᠭᠤᠴᠠ ᠬᠤᠷᠢᠶᠠᠬᠤ ᠦᠶᠡ ᠳᠦ᠂ ᠠᠷᠪᠠᠢ ᠬᠤᠷᠢᠶᠠᠬᠤ ᠡᠬᠢᠨ ᠤ ᠡᠳᠦᠷ ᠤᠳ ᠲᠤ ᠴᠠᠭᠠᠵᠠᠯᠠᠭᠤᠯᠵᠠᠢ᠃
10 ᠠᠢᠶᠠ ᠶᠢᠨ ᠥᠬᠢᠨ ᠷᠢᠽᠫᠠ ᠲᠠᠭᠠᠷ ᠠᠪᠴᠢᠷᠠᠵᠤ ᠬᠠᠳᠠᠨ ᠳᠡᠭᠡᠷᠡ ᠳᠡᠪᠢᠰᠦᠨ ᠰᠠᠭᠤᠭᠠᠳ᠂ ᠤᠷᠭᠤᠴᠠ ᠬᠤᠷᠢᠶᠠᠬᠤ ᠠᠴᠠ ᠡᠬᠢᠯᠡᠨ ᠲᠡᠳᠡᠨ ᠳᠡᠭᠡᠷᠡ ᠲᠩᠷᠢ ᠡᠴᠡ ᠪᠣᠷᠣᠭᠠᠨ ᠣᠷᠣᠬᠤ ᠬᠦᠷᠲᠡᠯᠡ᠂ ᠡᠳᠦᠷ ᠨᠢ ᠲᠩᠷᠢ ᠶᠢᠨ ᠰᠢᠪᠠᠭᠤ ᠶᠢ᠂ ᠰᠥᠨᠢ ᠨᠢ ᠬᠡᠭᠡᠷᠡ ᠶᠢᠨ ᠠᠷᠢᠶᠠᠲᠠᠨ ᠢ ᠥᠷᠭᠥᠭᠡᠨ ᠲᠡᠳᠡᠨ ᠦ ᠴᠣᠭᠴᠠᠰ ᠲᠤ ᠣᠢᠷᠠᠲᠤᠭᠤᠯᠤᠭᠰᠠᠨ ᠦᠭᠡᠢ᠃ 11 ᠰᠠᠦ᠋ᠯ ᠤᠨ ᠲᠠᠲᠠᠪᠤᠷᠢ ᠡᠮᠡ᠂ ᠠᠢᠶᠠ ᠶᠢᠨ ᠥᠬᠢᠨ ᠷᠢᠽᠫᠠ ᠶᠢᠨ ᠶᠠᠭᠤ ᠬᠢᠭᠰᠡᠨ ᠢ ᠬᠡᠨ ᠨᠢᠭᠡ ᠨᠢ ᠳ᠋ᠠᠸᠢᠳ᠋ ᠲᠤ ᠳᠤᠭᠤᠯᠭᠠᠭᠰᠠᠨ ᠳᠤ᠂ 12 ᠲᠡᠷᠡ ᠶᠠᠪᠧᠱ ᠭᠢᠯᠧᠶᠠᠳ᠋ ᠲᠤ ᠣᠴᠢᠵᠤ ᠲᠡᠨᠳᠡᠬᠢ ᠶᠢᠨ ᠨᠣᠶᠠᠳ ᠠᠴᠠ ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ ᠤ ᠶᠠᠰᠤ ᠶᠢ ᠠᠪᠤᠪᠠ᠃ ᠹᠢᠯᠢᠰᠲ᠋ᠴᠦᠳ ᠰᠠᠦ᠋ᠯ ᠢ ᠭᠢᠯᠪᠣᠶᠠ ᠳᠤ ᠠᠯᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ ᠲᠡᠭᠦᠨ ᠢ ᠪᠧᠲ ᠱᠠᠨ ᠤ ᠲᠠᠯᠠᠪᠠᠢ ᠳᠤ ᠶᠣᠨᠠᠲ᠋ᠠᠨ ᠲᠠᠢ ᠬᠠᠮᠲᠤ ᠳᠡᠭᠦᠵᠢᠯᠡᠵᠦ ᠲᠠᠯᠪᠢᠭᠰᠠᠨ ᠳᠤ᠂ ᠶᠠᠪᠧᠱ ᠭᠢᠯᠧᠶᠠᠳ᠋ᠴᠤᠳ ᠬᠤᠯᠠᠭᠠᠢᠯᠠᠨ ᠠᠪᠴᠢᠷᠠᠭᠰᠠᠨ ᠶᠤᠮ᠃ 13 ᠳ᠋ᠠᠸᠢᠳ᠋ ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ ᠤ ᠶᠠᠰᠤ ᠶᠢ ᠲᠡᠨᠳᠡ ᠡᠴᠡ ᠠᠪᠴᠢᠷᠠᠭᠰᠠᠨ ᠳᠤ᠂ ᠬᠥᠮᠦᠰ ᠳᠡᠭᠦᠵᠢᠯᠡᠭᠦᠯᠦᠨ ᠠᠯᠠᠭᠳᠠᠭᠰᠠᠨ ᠬᠥᠮᠦᠰ ᠦᠨ ᠶᠠᠰᠤ ᠶᠢ ᠴᠤ ᠴᠤᠭᠯᠠᠭᠤᠯᠪᠠ᠃ 14 ᠲᠡᠳᠡ ᠰᠠᠦ᠋ᠯ ᠪᠣᠯᠣᠨ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ ᠤ ᠬᠢᠨᠢ ᠶᠠᠰᠤ ᠶᠢ ᠪᠢᠨᠶᠠᠮᠢᠨ ᠤ ᠨᠤᠲᠤᠭ ᠤᠨ ᠽᠧᠯᠠ ᠳᠠᠬᠢ ᠰᠠᠦ᠋ᠯ ᠤᠨ ᠡᠴᠢᠭᠡ ᠺᠢᠱ ᠤᠨ ᠪᠤᠯᠠᠰᠢᠨ ᠳᠤ ᠣᠷᠣᠰᠢᠭᠤᠯᠤᠨ ᠬᠠᠭᠠᠨ ᠤ ᠵᠠᠬᠢᠭᠰᠠᠨ ᠪᠦᠬᠦᠨ ᠢ ᠭᠦᠢᠴᠡᠳᠬᠡᠪᠡ᠃ ᠲᠡᠭᠦᠨ ᠦ ᠳᠠᠷᠠᠭᠠ ᠪᠠᠷ ᠪᠤᠷᠬᠠᠨ ᠲᠡᠷᠡ ᠭᠠᠵᠠᠷ ᠤᠨ ᠲᠥᠯᠥᠭᠡᠬᠢ ᠭᠤᠶᠤᠯᠲᠠ ᠶᠢ ᠰᠣᠨᠣᠰᠣᠭᠰᠠᠨ ᠪᠠᠢᠯᠠ᠃
ᠹᠢᠯᠢᠰᠲ᠋ᠴᠦᠳ ᠲᠡᠢ ᠳᠠᠬᠢᠨ ᠳᠠᠢᠲᠤᠪᠠ
15 ᠹᠢᠯᠢᠰᠲ᠋ᠴᠦᠳ ᠳᠠᠬᠢᠨ ᠢᠰᠷᠧᠯ ᠤᠨ ᠡᠰᠡᠷᠭᠦ ᠳᠠᠢᠨ ᠥᠳᠥᠭᠡᠪᠡ᠃ ᠳ᠋ᠠᠸᠢᠳ᠋ ᠵᠠᠷᠤᠴᠠ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠶᠠᠪᠤᠵᠤ᠂ ᠹᠢᠯᠢᠰᠲ᠋ᠴᠦᠳ ᠲᠡᠢ ᠲᠤᠯᠤᠯᠳᠤᠵᠠᠢ᠃ ᠳ᠋ᠠᠸᠢᠳ᠋ ᠶᠠᠳᠠᠷᠠᠵᠤ ᠲᠤᠢᠯᠳᠠᠬᠤ ᠳᠤ᠂ 16 ᠠᠪᠤᠷᠭᠤ ᠪᠡᠶᠡᠲᠡᠨ ᠦ ᠤᠳᠤᠮ ᠪᠣᠯᠬᠤ ᠢᠰᠢᠪᠢ ᠪᠧᠨᠣᠪ ᠭᠡᠭᠴᠢ ᠬᠥᠮᠦᠨ ᠳ᠋ᠠᠸᠢᠳ᠋ ᠢ ᠠᠯᠠᠬᠤ ᠭᠡᠵᠦ ᠪᠠᠢᠯᠠ᠃ ᠲᠡᠭᠦᠨ ᠦ ᠵᠢᠳᠠ ᠭᠤᠷᠪᠠᠨ ᠵᠠᠭᠤᠨ ᠱᠧᠺᠧᠯ 15 ᠬᠦᠨᠳᠦ ᠬᠦᠷᠡᠯ ᠪᠥᠭᠡᠳ ᠲᠡᠷᠡ ᠰᠢᠨᠡᠬᠡᠨ ᠰᠡᠯᠡᠮᠡ ᠵᠡᠭᠦᠭᠰᠡᠨ ᠪᠠᠢᠪᠠ᠃ 17 ᠲᠡᠭᠡᠲᠡᠯᠡ ᠽᠧᠷᠣᠢᠶᠠ ᠶᠢᠨ ᠬᠥᠪᠡᠭᠦᠨ ᠠᠪᠢᠱᠠᠢ ᠳ᠋ᠠᠸᠢᠳ᠋ ᠲᠤ ᠲᠤᠰᠠᠯᠠᠬᠤ ᠪᠠᠷ ᠢᠷᠡᠭᠡᠳ ᠨᠥᠭᠥᠭᠡ ᠹᠢᠯᠢᠰᠲ ᠬᠥᠮᠦᠨ ᠢ ᠴᠣᠬᠢᠵᠤ ᠠᠯᠠᠪᠠ᠃ ᠲᠡᠷᠡ ᠦᠶᠡ ᠳᠦ ᠳ᠋ᠠᠸᠢᠳ᠋ ᠤᠨ ᠬᠠᠷᠢᠶᠠ ᠴᠡᠷᠢᠭ ᠤᠳ ᠲᠡᠭᠦᠨ ᠳᠦ᠄ 《ᠲᠠ ᠳᠠᠬᠢᠨ ᠪᠢᠳᠡᠨ ᠲᠡᠢ ᠬᠠᠮᠲᠤ ᠲᠤᠯᠤᠯᠳᠤᠭᠠᠨ ᠳᠤ ᠭᠠᠷᠬᠤ ᠬᠡᠷᠡᠭ ᠦᠭᠡᠢ᠂ ᠲᠡᠢᠨ ᠬᠦ ᠢᠰᠷᠧᠯ ᠤᠨ ᠭᠡᠷᠡᠯ ᠢ ᠪᠦᠦ ᠤᠨᠲᠠᠷᠠᠭᠠ》 ᠭᠡᠵᠦ ᠲᠠᠩ᠋ᠭᠠᠷᠢᠭᠯᠠᠪᠠ᠃
18 ᠡᠭᠦᠨ ᠦ ᠳᠠᠷᠠᠭᠠ᠂ ᠭᠣᠪ ᠲᠤ ᠹᠢᠯᠢᠰᠲ᠋ᠴᠦᠳ ᠲᠡᠢ ᠲᠤᠯᠤᠯᠳᠤᠬᠤ ᠪᠣᠯᠵᠠᠢ᠃ ᠲᠡᠭᠡᠬᠦ ᠳᠦ᠂ ᠺᠦᠱ ᠬᠥᠮᠦᠨ ᠰᠢᠪᠧᠺᠠᠢ ᠠᠪᠤᠷᠭᠤ ᠪᠡᠶᠡᠲᠡᠳ 16 ᠤᠨ ᠤᠳᠤᠮ ᠪᠣᠯᠬᠤ ᠰᠠᠹ ᠢ ᠠᠯᠠᠪᠠ᠃ 19 ᠭᠣᠪ ᠲᠤ ᠹᠢᠯᠢᠰᠲ᠋ᠴᠦᠳ ᠲᠡᠢ ᠳᠠᠬᠢᠨ ᠲᠤᠯᠤᠯᠳᠤᠬᠤ ᠳᠤ᠂ ᠪᠧᠲ᠋ᠯᠧᠾᠧᠮ ᠤᠨ ᠶᠠᠢᠷ ᠤᠨ ᠬᠥᠪᠡᠭᠦᠨ ᠡᠯᠬᠠᠨᠠᠨ ᠭᠢᠲ ᠬᠥᠮᠦᠨ ᠭᠣᠯᠢᠶᠠᠲ ᠤᠨ ᠳᠡᠭᠦᠦ ᠶᠢ ᠠᠯᠠᠪᠠ᠃ ᠲᠡᠭᠦᠨ ᠦ ᠵᠢᠳᠠᠨ ᠤ ᠡᠰᠢ ᠨᠢ ᠡᠭᠡᠷᠡᠦᠯ ᠦᠨ ᠲᠡᠩᠬᠡᠯᠢᠭ ᠮᠡᠲᠦ ᠠᠵᠢ᠃ 20 ᠪᠠᠰᠠ ᠭᠠᠲ ᠲᠤ ᠳᠠᠬᠢᠨ ᠲᠤᠯᠤᠯᠳᠤᠭᠠᠨ ᠪᠣᠯᠪᠠ᠃ ᠲᠡᠨᠳᠡ ᠭᠠᠷ ᠬᠥᠯ ᠦᠨ ᠬᠢᠨᠢ ᠬᠤᠷᠤᠭᠤ ᠨᠢ ᠵᠢᠷᠭᠤᠭᠠ᠂ ᠪᠦᠭᠦᠳᠡ ᠬᠣᠷᠢᠨ ᠳᠥᠷᠪᠡᠨ ᠬᠤᠷᠤᠭᠤ ᠲᠠᠢ ᠦᠯᠡᠮᠵᠢ ᠲᠣᠮᠣ ᠡᠷᠡ ᠪᠠᠢᠯᠠ᠃ ᠲᠡᠷᠡ ᠴᠤ ᠮᠥᠨ ᠠᠪᠤᠷᠭᠤ ᠪᠡᠶᠡᠲᠡᠨ ᠦ ᠤᠳᠤᠮ ᠠᠵᠢ᠃ 21 ᠲᠡᠷᠡ ᠢᠰᠷᠧᠯ ᠢ ᠳᠣᠷᠣᠮᠵᠢᠯᠠᠭᠰᠠᠨ ᠳᠤ᠂ ᠳ᠋ᠠᠸᠢᠳ᠋ ᠤᠨ ᠠᠬᠠ ᠱᠢᠮᠧᠶᠠ ᠶᠢᠨ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ ᠲᠡᠭᠦᠨ ᠢ ᠠᠯᠠᠪᠠ᠃ 22 ᠲᠡᠢᠨ ᠬᠦ ᠭᠠᠲ ᠲᠤ ᠪᠠᠢᠭᠰᠠᠨ ᠠᠪᠤᠷᠭᠤ ᠪᠡᠶᠡᠲᠡᠳ ᠦᠨ ᠤᠳᠤᠮ ᠪᠣᠯᠬᠤ ᠡᠨᠡ ᠳᠥᠷᠪᠡ ᠨᠢ ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠦ ᠬᠠᠷᠢᠶᠠ ᠬᠥᠮᠦᠰ ᠦᠨ ᠭᠠᠷ ᠲᠤ ᠰᠥᠨᠥᠭᠰᠡᠨ ᠪᠠᠢᠯᠠ᠃