ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠬᠣᠷᠢ
ᠱᠧᠪᠠ ᠶᠢᠨ ᠤᠷᠪᠠᠯᠭᠠᠨ
1 ᠲᠡᠷᠡ ᠴᠠᠭ ᠲᠤ ᠪᠢᠨᠶᠠᠮᠢᠨ ᠬᠥᠮᠦᠨ ᠪᠢᠺᠷᠢ ᠶᠢᠨ ᠬᠥᠪᠡᠭᠦᠨ ᠱᠧᠪᠠ ᠭᠡᠭᠴᠢ ᠨᠢᠭᠡᠨ ᠬᠡᠷᠡᠭ ᠥᠲᠥᠭᠡᠭᠴᠢ ᠲᠡᠨᠳᠡ ᠪᠠᠢᠵᠠᠢ᠃ ᠲᠡᠷᠡ ᠪᠦᠷᠢᠶᠡ ᠦᠯᠢᠶᠡᠨ᠄ 《ᠳ᠋ᠠᠸᠢᠳ᠋ ᠠᠴᠠ ᠣᠯᠬᠤ ᠬᠤᠪᠢ ᠭᠡᠵᠦ ᠪᠢᠳᠡᠨ ᠳᠦ ᠪᠠᠢᠬᠤ ᠦᠭᠡᠢ᠂ ᠢᠱᠠᠢ ᠶᠢᠨ ᠬᠥᠪᠡᠭᠦᠨ ᠡᠴᠡ ᠠᠪᠬᠤ ᠥᠪ ᠪᠢᠳᠡᠨ ᠳᠦ ᠪᠠᠢᠬᠤ ᠦᠭᠡᠢ᠂ ᠢᠰᠷᠧᠯ ᠡ᠂ ᠬᠥᠮᠦᠨ ᠪᠦᠷᠢ ᠥᠪᠡᠷ ᠥᠪᠡᠷ ᠦᠨ ᠢᠶᠠᠨ ᠭᠡᠷ ᠤᠷᠤᠭᠤ ᠪᠤᠴᠠᠵᠠᠭᠠ》 ᠭᠡᠬᠦ ᠳᠦ᠂ 2 ᠢᠰᠷᠧᠯᠴᠦᠳ ᠪᠦᠭᠦᠳᠡᠭᠡᠷ ᠳ᠋ᠠᠸᠢᠳ᠋ ᠢ ᠳᠠᠭᠠᠬᠤ ᠪᠠᠨ ᠪᠣᠯᠢᠵᠤ᠂ ᠪᠢᠺᠷᠢ ᠶᠢᠨ ᠬᠥᠪᠡᠭᠦᠨ ᠱᠧᠪᠠ ᠶᠢ ᠳᠠᠭᠠᠪᠠ᠃ ᠭᠡᠪᠡᠴᠦ ᠶᠦᠳᠠᠴᠤᠳ ᠶᠣᠷᠳᠠᠨ ᠠᠴᠠ ᠶᠧᠷᠦ᠋ᠰᠠᠯᠧᠮ ᠬᠦᠷᠲᠡᠯᠡ ᠬᠠᠭᠠᠨ ᠢᠶᠠᠨ ᠲᠤᠤᠱᠲᠠᠢ ᠳᠠᠭᠠᠪᠠ᠃
3 ᠳ᠋ᠠᠸᠢᠳ᠋ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠣᠷᠳᠣᠨ ᠳᠠᠭᠠᠨ ᠪᠤᠴᠠᠵᠤ ᠢᠷᠡᠪᠡ᠃ ᠬᠠᠭᠠᠨ ᠣᠷᠳᠣᠨ ᠢᠶᠠᠨ ᠰᠠᠬᠢᠭᠤᠯᠬᠤ ᠪᠠᠷ ᠦᠯᠡᠳᠡᠭᠡᠭᠰᠡᠨ ᠠᠷᠪᠠᠨ ᠲᠠᠲᠠᠪᠤᠷᠢ ᠪᠠᠨ ᠬᠠᠷᠠᠭᠤᠯ ᠲᠠᠢ ᠪᠠᠢᠰᠢᠩ ᠳᠤ ᠪᠠᠢᠯᠭᠠᠵᠤ ᠲᠡᠳᠬᠦᠳᠡᠭ ᠪᠣᠯᠪᠠᠴᠤ ᠥᠪᠡᠷ ᠢᠶᠡᠨ ᠲᠡᠳᠡᠨ ᠳᠡᠭᠡᠷᠡ ᠣᠷᠣᠳᠠᠭ ᠦᠭᠡᠢ ᠪᠠᠢᠯᠠ᠃ ᠡᠢᠨ ᠬᠦ ᠲᠡᠳᠡ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠮᠡᠲᠦ ᠠᠮᠢᠳᠤᠷᠠᠵᠤ᠂ ᠨᠠᠰᠤ ᠪᠠᠷᠠᠲᠠᠯᠠ ᠪᠠᠨ ᠬᠠᠭᠠᠭᠳᠠᠮᠠᠯ ᠪᠠᠢᠪᠠ᠃
4 ᠬᠠᠭᠠᠨ ᠠᠮᠠᠰᠠ ᠳᠤ᠄ 《ᠭᠤᠷᠪᠠᠨ ᠬᠣᠨᠣᠭ ᠤᠨ ᠳᠣᠲᠣᠷᠠ ᠶᠦᠳᠠ ᠶᠢᠨ ᠴᠡᠷᠢᠭ ᠤᠳ ᠢ ᠨᠠᠳᠠ ᠤᠷᠤᠭᠤ ᠳᠠᠭᠤᠳᠠᠨ ᠴᠤᠭᠯᠠᠭᠤᠯᠵᠤ᠂ ᠴᠢ ᠥᠪᠡᠷ ᠢᠶᠡᠨ ᠴᠤ ᠡ᠊ᠨᠳᠡ ᠬᠦᠷᠦᠭᠡᠳ ᠢᠷᠡ》 ᠭᠡᠬᠦ ᠳᠦ᠂ 5 ᠠᠮᠠᠰᠠ ᠶᠦᠳᠠ ᠶᠢᠨ ᠴᠡᠷᠢᠭ ᠤᠳ ᠢ ᠳᠠᠭᠤᠳᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠬᠠᠭᠠᠨ ᠤ ᠲᠣᠭᠲᠠᠭᠠᠭᠰᠠᠨ ᠬᠤᠭᠤᠴᠠᠭᠠᠨ ᠠᠴᠠ ᠬᠡᠲᠦᠷᠡᠭᠦᠯᠵᠦ ᠤᠳᠠᠭᠠᠰᠢᠷᠠᠭᠤᠯᠪᠠ᠃ 6 ᠡᠢᠮᠦ ᠡᠴᠡ ᠳ᠋ᠠᠸᠢᠳ᠋ ᠠᠪᠢᠱᠠᠢ ᠳᠤ᠄ 《ᠣᠳᠣ ᠪᠢᠳᠡᠨ ᠳᠦ ᠪᠢᠺᠷᠢ ᠶᠢᠨ ᠬᠥᠪᠡᠭᠦᠨ ᠱᠧᠪᠠ ᠠᠪᠰᠠᠯᠣᠮ ᠠᠴᠠ ᠢᠯᠡᠭᠦᠦ ᠭᠠᠢ ᠪᠣᠯᠵᠤ ᠪᠠᠢᠨᠠ᠃ ᠴᠢ ᠮᠢᠨᠦ ᠴᠡᠷᠢᠭ ᠢ ᠳᠠᠭᠠᠭᠤᠯᠵᠤ᠂ ᠲᠡᠭᠦᠨ ᠢ ᠬᠥᠭᠡᠭᠡ᠃ ᠡᠰᠡ ᠲᠡᠭᠡᠪᠡᠯ ᠲᠡᠷᠡ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠨᠤᠭᠤᠳ ᠢ ᠣᠯᠵᠤ᠂ ᠪᠢᠳᠡᠨ ᠦ ᠬᠠᠷᠠᠭᠠᠨ ᠠᠴᠠ ᠵᠢᠭᠤᠲᠠᠴᠢᠬᠠᠬᠤ ᠪᠤᠢ》 ᠭᠡᠰᠡᠨ ᠳᠦ᠂ 7 ᠶᠣᠶᠠᠪ ᠤᠨ ᠬᠠᠷᠢᠶᠠ ᠬᠥᠮᠦᠰ᠂ ᠺᠧᠷᠧᠲ᠋ᠴᠦᠳ᠂ ᠫᠧᠯᠧᠲ᠋ᠴᠦᠳ ᠦᠨ ᠳᠠᠢᠴᠢᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠠᠪᠢᠱᠠᠢ ᠶᠢ ᠳᠠᠭᠠᠵᠤ᠂ ᠶᠧᠷᠦ᠋ᠰᠠᠯᠧᠮ ᠡᠴᠡ ᠬᠥᠳᠡᠯᠦᠨ ᠪᠢᠺᠷᠢ ᠶᠢᠨ ᠬᠥᠪᠡᠭᠦᠨ ᠱᠧᠪᠠ ᠶᠢ ᠬᠥᠭᠡᠭᠡᠪᠡ᠃ 8 ᠲᠡᠳᠡ ᠭᠢᠪᠧᠶᠣᠨ ᠳᠠᠬᠢ ᠨᠢᠭᠡᠨ ᠪᠤᠯᠤ ᠴᠢᠯᠠᠭᠤᠨ ᠤ ᠳᠡᠷᠭᠡᠳᠡ ᠬᠦᠷᠦᠭᠰᠡᠨ ᠦᠶᠡ ᠳᠦ᠂ ᠠᠮᠠᠰᠠ ᠲᠡᠳᠡᠨ ᠤᠷᠤᠭᠤ ᠢᠷᠡᠪᠡ᠃ ᠶᠣᠶᠠᠪ ᠴᠡᠷᠢᠭ ᠤᠨ ᠬᠤᠪᠴᠠᠰᠤ ᠲᠠᠢ ᠪᠠᠢᠯᠠ᠃ ᠲᠡᠷᠡ ᠲᠠᠰᠢᠶᠠᠨ ᠳᠠᠭᠠᠨ ᠬᠤᠢ ᠲᠠᠢ ᠢᠯᠳᠦ ᠵᠡᠭᠦᠭᠰᠡᠨ ᠪᠥᠭᠡᠳ ᠤᠷᠤᠭᠰᠢ ᠪᠠᠨ ᠠᠯᠬᠤᠬᠤ ᠳᠠᠭᠠᠨ ᠲᠡᠭᠦᠨ ᠢᠶᠡᠨ ᠤᠨᠠᠭᠠᠵᠠᠢ᠃ 9 ᠶᠣᠶᠠᠪ ᠠᠮᠠᠰᠠ ᠳᠤ᠄ 《ᠳᠡᠭᠦᠦ ᠮᠢᠨᠢ᠂ ᠠᠮᠤᠷ ᠪᠠᠢᠨᠠ ᠤᠤ︖》 ᠭᠡᠵᠦ ᠬᠡᠯᠡᠭᠡᠳ᠂ ᠲᠡᠭᠦᠨ ᠢ ᠦᠨᠦᠰᠬᠦ ᠪᠡᠷ ᠪᠠᠷᠠᠭᠤᠨ ᠭᠠᠷ ᠢᠶᠠᠷ ᠢᠶᠠᠨ ᠰᠠᠬᠠᠯ ᠢ ᠨᠢ ᠠᠳᠬᠤᠬᠤ ᠳᠤ᠂ 10 ᠠᠮᠠᠰᠠ ᠶᠣᠶᠠᠪ ᠤᠨ ᠭᠠᠷ ᠲᠤ ᠪᠠᠢᠭᠠ ᠢᠯᠳᠦ ᠶᠢ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ᠃ ᠶᠣᠶᠠᠪ ᠲᠡᠭᠦᠨ ᠦ ᠬᠡᠪᠡᠯᠢ ᠤᠷᠤᠭᠤ ᠳᠦᠷᠦᠭᠰᠡᠨ ᠳᠦ᠂ ᠭᠡᠳᠡᠰᠦ ᠳᠣᠲᠣᠷ ᠨᠢ ᠭᠠᠵᠠᠷ ᠲᠤ ᠭᠣᠭᠣᠵᠢᠵᠤ᠂ ᠳᠠᠬᠢᠨ ᠳᠦᠷᠦᠭᠡ ᠦᠭᠡᠢ ᠪᠠᠢᠬᠤ ᠳᠤ ᠲᠡᠷᠡ ᠦᠬᠦᠪᠡ᠃
11 ᠶᠣᠶᠠᠪ ᠢ ᠳᠠᠭᠠᠳᠠᠭ ᠵᠠᠯᠠᠭᠤᠰ ᠤᠨ ᠨᠢᠭᠡ ᠨᠢ ᠠᠮᠠᠰᠠ ᠶᠢᠨ ᠳᠡᠷᠭᠡᠳᠡ ᠵᠣᠭᠰᠣᠭᠠᠳ᠄ 《ᠶᠣᠶᠠᠪ ᠢ ᠬᠦᠷᠢᠶᠡᠯᠡᠳᠡᠭ᠂ ᠳ᠋ᠠᠸᠢᠳ᠋ ᠤᠨ ᠲᠠᠯᠠ ᠳᠤ ᠪᠠᠢᠭᠠ ᠬᠥᠮᠦᠨ ᠪᠣᠯᠭᠠᠨ ᠶᠣᠶᠠᠪ ᠢ ᠳᠠᠭᠠᠭᠲᠤᠨ》 ᠭᠡᠪᠡ᠃ 12 ᠬᠠᠷᠢᠨ ᠵᠠᠮ ᠤᠨ ᠭᠣᠣᠯ ᠳᠤ ᠴᠢᠰᠤᠨ ᠳᠠᠭᠠᠨ ᠬᠤᠳᠬᠤᠯᠳᠤᠨ ᠬᠡᠪᠲᠡᠵᠦ ᠪᠤᠢ ᠠᠮᠠᠰᠠ ᠶᠢᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠬᠥᠮᠦᠨ ᠪᠣᠯᠭᠠᠨ ᠵᠣᠭᠰᠣᠵᠤ ᠪᠠᠢᠪᠠ᠃ ᠲᠡᠷᠡ ᠵᠠᠯᠠᠭᠤ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠬᠥᠮᠦᠨ ᠪᠣᠯᠭᠠᠨ ᠤ ᠵᠣᠭᠰᠣᠵᠤ ᠪᠠᠢᠬᠤ ᠶᠢ ᠬᠠᠷᠠᠭᠠᠳ ᠠᠮᠠᠰᠠ ᠶᠢ ᠵᠠᠮ ᠤᠨ ᠭᠣᠣᠯ ᠠᠴᠠ ᠲᠠᠯᠠᠪᠠᠢ ᠤᠷᠤᠭᠤ ᠠᠪᠠᠴᠢᠵᠤ ᠲᠡᠭᠦᠨ ᠢ ᠬᠤᠪᠴᠠᠰᠤ ᠪᠠᠷ ᠪᠦᠲᠡᠭᠡᠪᠡ᠃ 13 ᠠᠮᠠᠰᠠ ᠶᠢ ᠵᠠᠮ ᠠᠴᠠ ᠬᠣᠯᠠᠳᠠᠭᠤᠯᠤᠮᠠᠭᠴᠠ᠂ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢᠶᠡᠨ ᠶᠣᠶᠠᠪ ᠢ ᠳᠠᠭᠠᠨ ᠪᠢᠺᠷᠢ ᠶᠢᠨ ᠬᠥᠪᠡᠭᠦᠨ ᠱᠧᠪᠠ ᠶᠢ ᠬᠥᠭᠡᠭᠡᠬᠦ ᠪᠡᠷ ᠶᠠᠪᠤᠪᠠ᠃
14 ᠱᠧᠪᠠ ᠢᠰᠷᠧᠯ ᠤᠨ ᠪᠦᠬᠦ ᠣᠪᠣᠭ ᠠᠢᠮᠠᠭ ᠤᠳ ᠢᠶᠠᠷ ᠳᠠᠮᠵᠢᠨ ᠪᠧᠲ ᠮᠠᠺᠠ ᠶᠢᠨ ᠠᠪᠧᠯ ᠳᠤ ᠬᠦᠷᠬᠦ ᠳᠦ᠂ ᠪᠧᠷᠢᠴᠤᠳ ᠴᠤᠭᠯᠠᠷᠠᠵᠤ ᠲᠡᠭᠦᠨ ᠢ ᠳᠠᠭᠠᠯᠠ᠃ 15 ᠶᠣᠶᠠᠪ ᠤᠨ ᠴᠡᠷᠢᠭ ᠤᠳ ᠢᠷᠡᠵᠦ ᠱᠧᠪᠠ ᠶᠢ ᠪᠧᠲ ᠮᠠᠺᠠ ᠶᠢᠨ ᠠᠪᠧᠯ ᠳᠤ ᠪᠦᠰᠡᠯᠡᠨ ᠠᠪᠤᠭᠰᠠᠨ ᠪᠠᠢᠨᠠ᠃ ᠲᠡᠳᠡ ᠬᠣᠲᠠ ᠶᠢᠨ ᠬᠡᠷᠡᠮ ᠦᠨ ᠬᠠᠷᠠᠯᠳᠤᠭᠠ ᠳᠠᠯᠠᠩ ᠪᠣᠰᠬᠠᠪᠠ᠃ ᠶᠣᠶᠠᠪ ᠲᠠᠢ ᠬᠠᠮᠲᠤ ᠪᠤᠢ ᠴᠡᠷᠢᠭ ᠤᠳ ᠪᠦᠭᠦᠳᠡᠭᠡᠷ ᠬᠡᠷᠡᠮ ᠢ ᠡᠪᠳᠡᠯᠡᠨ ᠨᠤᠷᠠᠭᠠᠵᠤ ᠪᠠᠢᠬᠤ ᠳᠤ᠂ 16 ᠲᠡᠷᠡ ᠬᠣᠲᠠ ᠠᠴᠠ ᠨᠢᠭᠡᠨ ᠤᠬᠠᠭᠠᠯᠢᠭ ᠡᠮᠡᠭᠲᠡᠢ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠰᠣᠨᠣᠰᠣᠭᠠᠴᠢ᠂ ᠰᠣᠨᠣᠰᠣᠭᠠᠴᠢ᠂ ᠲᠠ ᠨᠠᠷ ᠶᠣᠶᠠᠪ ᠲᠤ᠄ 〈ᠡ᠊ᠨᠳᠡ ᠢᠷᠡᠭᠡᠷᠡᠢ〉 ᠭᠡᠵᠦ ᠬᠡᠯᠡᠭᠡᠴᠢ᠂ ᠪᠢ ᠲᠡᠭᠦᠨ ᠲᠡᠢ ᠶᠠᠷᠢᠬᠤ ᠶᠠᠭᠤᠮᠠ ᠪᠤᠢ》 ᠭᠡᠪᠡ᠃ 17 ᠶᠣᠶᠠᠪ ᠲᠡᠭᠦᠨ ᠤᠷᠤᠭᠤ ᠣᠢᠷᠠᠲᠤᠬᠤ ᠳᠤ᠂ ᠲᠡᠷᠡ ᠡᠮᠡᠭᠲᠡᠢ᠄ 《ᠲᠠ ᠶᠣᠶᠠᠪ ᠮᠥᠨ ᠤᠤ︖》 ᠭᠡᠵᠦ ᠠᠰᠠᠭᠤᠪᠠ᠃ ᠲᠡᠷᠡ᠄ 《ᠪᠢ ᠪᠠᠢᠨᠠ》 ᠭᠡᠬᠦ ᠳᠦ᠂ ᠡᠮᠡᠭᠲᠡᠢ᠄ 《ᠰᠢᠪᠡᠭᠴᠢᠨ ᠮᠢᠨᠦ ᠦᠭᠡ ᠶᠢ ᠰᠣᠨᠣᠰᠣᠭᠠᠴᠢ》 ᠭᠡᠬᠦ ᠳᠦᠨᠢ᠂ 《ᠰᠣᠨᠣᠰᠴᠤ ᠪᠠᠢᠨᠠ》 ᠭᠡᠪᠡ᠃ 18 ᠲᠡᠷᠡ ᠡᠮᠡᠭᠲᠡᠢ ᠡᠢᠨ ᠬᠦ ᠶᠠᠷᠢᠪᠠ᠄ 《ᠤᠷᠢᠳᠤ ᠶᠢᠨ ᠬᠥᠮᠦᠰ᠄ 〈ᠠᠰᠠᠭᠤᠶᠠ ᠭᠡᠪᠡᠯ ᠠᠪᠧᠯ ᠳᠤ ᠬᠦᠷᠴᠦ ᠠᠰᠠᠭᠤ〉 ᠭᠡᠳ ᠰᠢᠢᠳᠳᠡᠭ ᠪᠠᠢᠪᠠ᠃ 19 ᠮᠠᠨ ᠤ ᠬᠢᠨ ᠢᠰᠷᠧᠯ ᠳᠤ ᠠᠮᠤᠷ ᠠᠮᠤᠭᠤᠯᠠᠩ᠂ ᠦᠨᠡᠨᠴᠢ ᠰᠢᠳᠤᠷᠭᠤ ᠠᠮᠢᠳᠤᠷᠠᠵᠤ ᠪᠠᠢᠬᠤ ᠳᠤ᠂ ᠲᠠ ᠢᠰᠷᠧᠯ ᠤᠨ ᠡᠬᠡ ᠪᠣᠯᠬᠤ ᠡᠨᠡ ᠬᠣᠲᠠ ᠶᠢ ᠤᠰᠠᠳᠬᠠᠬᠤ ᠭᠡᠵᠦ ᠪᠠᠢᠨᠠ᠃ ᠲᠠ ᠶᠠᠭᠤᠨ ᠤ ᠤᠴᠢᠷ ᠠᠴᠠ ᠶᠣᠬᠣᠸᠠ ᠶᠢᠨ ᠥᠪ ᠢ ᠵᠠᠯᠭᠢᠬᠤ ᠨᠢ ᠪᠤᠢ︖》 ᠭᠡᠪᠡ᠃ 20 ᠶᠣᠶᠠᠪ ᠬᠠᠷᠢᠭᠤ ᠳᠤᠨᠢ᠄ 《ᠶᠠᠭᠠᠬᠢᠯᠠ ᠭᠡᠵᠢ︖ ᠵᠠᠯᠭᠢᠬᠤ ᠤᠰᠠᠳᠬᠠᠬᠤ ᠨᠢ ᠨᠠᠳᠠ ᠠᠴᠠ ᠬᠣᠯᠠ ᠪᠠᠢᠭ︕ 21 ᠣᠭᠲᠣ ᠲᠡᠢᠮᠦ ᠪᠢᠰᠢ᠂ ᠬᠠᠷᠢᠨ ᠡᠹᠷᠠᠢᠮ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠤᠨ ᠪᠢᠺᠷᠢ ᠶᠢᠨ ᠬᠥᠪᠡᠭᠦᠨ ᠱᠧᠪᠠ ᠳ᠋ᠠᠸᠢᠳ᠋ ᠬᠠᠭᠠᠨ ᠤ ᠡᠰᠡᠷᠭᠦ ᠭᠠᠷ ᠢᠶᠠᠨ ᠳᠠᠯᠠᠢᠭᠰᠠᠨ ᠶᠤᠮ᠃ ᠭᠠᠭᠴᠠ ᠬᠦ ᠲᠡᠷᠡ ᠬᠥᠮᠦᠨ ᠢ ᠲᠤᠰᠢᠶᠠᠵᠤ ᠥᠭᠪᠡᠯ᠂ ᠪᠢ ᠡᠨᠡ ᠬᠣᠲᠠ ᠠᠴᠠ ᠬᠣᠯᠠᠳᠠᠨᠠ》 ᠭᠡᠬᠦ ᠳᠦ᠂ ᠲᠡᠷᠡ ᠡᠮᠡᠭᠲᠡᠢ ᠶᠣᠶᠠᠪ ᠲᠤ᠄ 《ᠵᠠ᠂ ᠲᠡᠭᠦᠨ ᠦ ᠲᠣᠯᠣᠭᠠᠢ ᠶᠢ ᠬᠡᠷᠡᠮ ᠳᠡᠭᠡᠷᠡ ᠡᠴᠡ ᠲᠠᠨ ᠤᠷᠤᠭᠤ ᠰᠢᠳᠡᠵᠦ ᠥᠭᠭᠥᠶᠡ》 ᠭᠡᠯᠡ᠃ 22 ᠲᠡᠷᠡ ᠡᠮᠡᠭᠲᠡᠢ ᠪᠤᠴᠠᠵᠤ ᠪᠦᠬᠦ ᠬᠣᠲᠠ ᠶᠢᠨ ᠬᠢᠨ ᠲᠠᠢ ᠤᠬᠠᠭᠠᠯᠢᠭ ᠢᠶᠠᠷ ᠶᠠᠷᠢᠭᠰᠠᠨ ᠳᠤ᠂ ᠲᠡᠳᠡ ᠪᠢᠺᠷᠢ ᠶᠢᠨ ᠬᠥᠪᠡᠭᠦᠨ ᠱᠧᠪᠠ ᠶᠢᠨ ᠲᠣᠯᠣᠭᠠᠢ ᠶᠢ ᠣᠭᠲᠣᠯᠵᠤ᠂ ᠶᠣᠶᠠᠪ ᠤᠷᠤᠭᠤ ᠰᠢᠳᠡᠪᠡ᠃ ᠶᠣᠶᠠᠪ ᠪᠦᠷᠢᠶᠡ ᠦᠯᠢᠶᠡᠬᠦ ᠳᠦ᠂ ᠲᠡᠭᠦᠨ ᠦ ᠬᠠᠷᠢᠶᠠ ᠬᠥᠮᠦᠰ ᠬᠣᠲᠠ ᠠᠴᠠ ᠲᠠᠷᠬᠠᠨ ᠶᠠᠪᠤᠵᠤ᠂ ᠥᠪᠡᠷ ᠥᠪᠡᠷ ᠦᠨ ᠢᠶᠠᠨ ᠭᠡᠷ ᠤᠷᠤᠭᠤ ᠪᠤᠴᠠᠵᠠᠭᠠᠪᠠ᠃ ᠶᠣᠶᠠᠪ ᠴᠤ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠬᠠᠭᠠᠨ ᠤᠷᠤᠭᠤ ᠪᠤᠴᠠᠭᠰᠠᠨ ᠪᠠᠢᠨᠠ᠃
ᠳ᠋ᠠᠸᠢᠳ᠋ ᠤᠨ ᠲᠦᠰᠢᠮᠡᠳ
23 ᠢᠰᠷᠧᠯ ᠤᠨ ᠪᠦᠬᠦ ᠴᠡᠷᠢᠭ ᠤᠨ ᠵᠠᠩᠵᠤᠨ ᠨᠢ ᠶᠣᠶᠠᠪ᠂ ᠺᠧᠷᠧᠲ᠋ᠴᠦᠳ ᠪᠣᠯᠣᠨ ᠫᠧᠯᠧᠲ᠋ᠴᠦᠳ ᠦᠨ ᠤᠳᠤᠷᠢᠳᠤᠭᠴᠢ ᠨᠢ ᠶᠧᠬᠣᠷᠠᠢᠳᠠ ᠶᠢᠨ ᠬᠥᠪᠡᠭᠦᠨ ᠪᠧᠨᠠᠢᠶᠠ᠂ 24 ᠠᠯᠪᠠᠳᠠᠯᠭᠠ ᠶᠢᠨ ᠠᠵᠢᠯ ᠬᠢᠨᠠᠭᠴᠢ ᠨᠢ ᠠᠳᠣᠷᠠᠮ᠂ ᠰᠤᠳᠤᠷᠴᠢ ᠨᠢ ᠠᠾᠢᠯᠦ᠋ᠳ᠋ ᠤᠨ ᠬᠥᠪᠡᠭᠦᠨ ᠶᠧᠬᠣᠱᠠᠹᠠᠲ᠂ 25 ᠪᠢᠴᠢᠭᠡᠴᠢ ᠨᠢ ᠱᠧᠸᠠ᠂ ᠲᠠᠬᠢᠯᠴᠢ ᠨᠢ ᠽᠠᠳᠣᠺ᠂ ᠠᠪᠢᠶᠠᠲ᠋ᠠᠷ ᠨᠠᠷ᠂ 26 ᠳ᠋ᠠᠸᠢᠳ᠋ ᠤᠨ ᠲᠠᠬᠢᠯᠴᠢ ᠨᠢ ᠶᠠᠢᠷ ᠬᠥᠮᠦᠨ ᠢᠷᠠ ᠪᠠᠢᠪᠠ᠃