ᠬᠣᠶᠠᠳᠤᠭᠠᠷ ᠰᠠᠮᠦ᠋ᠶᠧᠯ ᠠᠷᠪᠠᠨ ᠬᠣᠶᠠᠷ
ᠵᠢᠮᠡᠯᠡᠯ ᠪᠠ ᠭᠡᠮᠰᠢᠯ
1 ᠶᠣᠬᠣᠸᠠ ᠨᠠᠲ᠋ᠠᠨ ᠢ ᠳ᠋ᠠᠸᠢᠳ᠋ ᠤᠷᠤᠭᠤ ᠢᠯᠡᠭᠡᠪᠡ᠃ ᠲᠡᠷᠡ ᠳ᠋ᠠᠸᠢᠳ᠋ ᠳᠡᠭᠡᠷᠡ ᠢᠷᠡᠭᠡᠳ᠄ 《ᠨᠢᠭᠡᠨ ᠬᠣᠲᠠ ᠳᠤ ᠬᠣᠶᠠᠷ ᠬᠥᠮᠦᠨ ᠪᠠᠢᠵᠠᠢ᠃ ᠨᠢᠭᠡ ᠨᠢ ᠪᠠᠶᠠᠨ᠂ ᠨᠥᠭᠥᠭᠡ ᠨᠢ ᠶᠠᠳᠠᠭᠤ ᠪᠠᠢᠪᠠ᠃ 2 ᠪᠠᠶᠠᠨ ᠨᠢ ᠦᠯᠡᠮᠵᠢ ᠣᠯᠠᠨ ᠬᠣᠨᠢ ᠪᠣᠯᠣᠨ ᠦᠬᠡᠷ ᠦᠨ ᠰᠦᠷᠦᠭ ᠲᠡᠢ ᠪᠠᠢᠬᠤ ᠳᠤ᠂ 3 ᠶᠠᠳᠠᠭᠤ ᠨᠢ ᠬᠤᠳᠠᠯᠳᠤᠨ ᠠᠪᠴᠤ ᠲᠡᠵᠢᠭᠡᠭᠰᠡᠨ ᠭᠠᠭᠴᠠ ᠨᠢᠯᠬᠠ ᠥᠬᠢᠨ ᠬᠤᠷᠠᠭᠠᠨ ᠠᠴᠠ ᠥᠭᠡᠷᠡ ᠶᠠᠭᠤ ᠴᠤ ᠦᠭᠡᠢ ᠠᠵᠢ᠃ ᠬᠤᠷᠠᠭᠠ ᠡᠵᠡᠨ ᠪᠣᠯᠣᠨ ᠡᠵᠡᠨ ᠦ ᠪᠠᠨ ᠬᠡᠦᠬᠡᠳ ᠤᠳ ᠲᠠᠢ ᠨᠢ ᠬᠠᠮᠲᠤ ᠥᠰᠥᠨ ᠪᠣᠢᠵᠢᠵᠤ᠂ ᠪᠣᠣᠪᠣ ᠠᠴᠠ ᠨᠢ ᠢᠳᠡᠵᠦ᠂ ᠠᠶᠠᠭᠠᠨ ᠠᠴᠠ ᠨᠢ ᠤᠤᠭᠤᠵᠤ᠂ ᠡᠪᠦᠷ ᠲᠤᠨᠢ ᠤᠨᠲᠠᠵᠤ᠂ ᠲᠡᠷᠡ ᠬᠥᠮᠦᠨ ᠳᠦ ᠶᠠᠭ ᠯᠠ ᠥᠬᠢᠨ ᠨᠢ ᠠᠳᠠᠯᠢ ᠪᠠᠢᠪᠠ᠃
4 ᠨᠢᠭᠡᠨ ᠡᠳᠦᠷ ᠪᠠᠶᠠᠨ ᠤ ᠳᠤ ᠠᠶᠠᠨᠴᠢᠨ ᠢᠷᠡᠵᠡᠢ᠃ ᠬᠠᠷᠢᠨ ᠲᠡᠷᠡ ᠪᠠᠶᠠᠨ ᠢᠷᠡᠭᠰᠡᠨ ᠠᠶᠠᠨᠴᠢᠨ ᠳᠠᠭᠠᠨ ᠵᠣᠷᠢᠭᠤᠯᠤᠨ ᠬᠣᠨᠢ ᠪᠤᠶᠤ ᠦᠬᠡᠷ ᠦᠨ ᠰᠦᠷᠦᠭ ᠡᠴᠡ ᠪᠡᠨ ᠲᠥᠬᠥᠭᠡᠷᠬᠦ ᠳᠤᠷᠠ ᠦᠭᠡᠢ ᠪᠣᠯᠬᠣᠷ ᠶᠠᠳᠠᠭᠤ ᠬᠥᠮᠦᠨ ᠦ ᠥᠬᠢᠨ ᠬᠤᠷᠠᠭᠠ ᠶᠢ ᠪᠤᠯᠢᠶᠠᠵᠤ᠂ ᠢᠷᠡᠭᠰᠡᠨ ᠵᠣᠴᠢᠨ ᠳᠠᠭᠠᠨ ᠵᠣᠷᠢᠭᠤᠯᠤᠨ ᠲᠥᠬᠥᠭᠡᠷᠴᠡᠢ》 ᠭᠡᠪᠡ᠃
5 ᠳ᠋ᠠᠸᠢᠳ᠋ ᠲᠡᠷᠡ ᠪᠠᠶᠠᠨ ᠳᠤ ᠶᠡᠬᠡᠳᠡ ᠬᠢᠯᠢᠩᠨᠡᠵᠦ᠂ ᠨᠠᠲ᠋ᠠᠨ ᠳᠤ᠄ 《ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠡᠭᠦᠨ ᠢ ᠦᠢᠯᠡᠳᠦᠭᠰᠡᠨ ᠬᠥᠮᠦᠨ ᠵᠠᠪᠠᠯ ᠦᠬᠦᠬᠦ ᠶᠣᠰᠣᠲᠠᠢ᠃ 6 ᠲᠡᠷᠡ ᠡᠨᠡᠷᠢᠬᠦ ᠰᠡᠳᠬᠢᠯ ᠦᠭᠡᠢ ᠦᠢᠯᠡ ᠬᠢᠭᠰᠡᠨ ᠤᠴᠢᠷ ᠠᠴᠠ ᠨᠥᠭᠥᠭᠡ ᠥᠬᠢᠨ ᠬᠤᠷᠠᠭᠠᠨ ᠤ ᠲᠥᠯᠥᠭᠡ ᠳᠥᠷᠪᠡ ᠳᠠᠬᠢᠨ ᠲᠥᠯᠥᠬᠦ ᠶᠣᠰᠣᠲᠠᠢ》 ᠭᠡᠪᠡ᠃
7 ᠨᠠᠲ᠋ᠠᠨ ᠳ᠋ᠠᠸᠢᠳ᠋ ᠲᠤ᠄ 《ᠲᠡᠷᠡ ᠬᠥᠮᠦᠨ ᠨᠢ ᠲᠠ ᠪᠢᠯᠡ︕ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠢᠩᠭᠢᠵᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠴᠢᠮᠠᠶᠢ ᠢᠰᠷᠧᠯ ᠤᠨ ᠬᠠᠭᠠᠨ ᠪᠣᠯᠭᠠᠨ ᠲᠣᠰᠣᠯᠠᠭᠰᠠᠨ ᠨᠢ ᠪᠢ ᠪᠢᠯᠡ᠃ ᠪᠢ ᠴᠢᠮᠠᠶᠢ ᠰᠠᠦ᠋ᠯ ᠤᠨ ᠭᠠᠷ ᠠᠴᠠ ᠠᠪᠤᠷᠠᠵᠤ᠂ 8 ᠡᠵᠡᠨ ᠦ ᠴᠢᠨᠢ ᠭᠡᠷ ᠲᠡᠢ ᠬᠠᠮᠲᠤ ᠲᠡᠭᠦᠨ ᠦ ᠡᠬᠡᠨᠡᠷ ᠤᠳ ᠢ ᠬᠠᠯᠠᠮᠵᠢᠨ ᠳᠤ ᠴᠢᠨᠢ ᠥᠭᠭᠥᠭᠰᠡᠨ ᠪᠥᠭᠡᠳ ᠢᠰᠷᠧᠯ ᠪᠣᠯᠣᠨ ᠶᠦᠳᠠ ᠶᠢᠨ ᠭᠡᠷ ᠢ ᠴᠤ ᠴᠢᠮᠠ ᠳᠤ ᠳᠠᠭᠠᠭᠠᠯᠭᠠᠭᠰᠠᠨ ᠪᠢᠯᠡ᠃ ᠬᠡᠷᠪᠡ ᠡᠳᠡᠭᠡᠷ ᠨᠢ ᠪᠠᠭᠠᠳᠠᠭᠰᠠᠨ ᠪᠣᠯ ᠪᠢ ᠴᠢᠮᠠ ᠳᠤ ᠢᠯᠡᠭᠦᠦ ᠶᠢ ᠴᠤ ᠨᠡᠮᠡᠵᠦ ᠥᠭᠬᠦ ᠪᠠᠢᠭᠰᠠᠨ︕ 9 ᠴᠢ ᠶᠠᠭᠤᠨ ᠳᠤ ᠶᠣᠬᠣᠸᠠ ᠮᠢᠨᠦ ᠲᠤᠰᠢᠶᠠᠯ ᠢ ᠪᠠᠰᠤᠮᠵᠢᠯᠠᠨ ᠮᠢᠨᠦ ᠮᠡᠯᠮᠡᠢ ᠳᠦ ᠪᠤᠵᠠᠷ ᠮᠠᠭᠤ ᠶᠢ ᠦᠢᠯᠡᠳᠪᠡ︖ ᠴᠢ ᠾᠢᠲ ᠬᠥᠮᠦᠨ ᠦᠦᠷᠢᠶᠠ ᠶᠢ ᠢᠯᠳᠦ ᠪᠡᠷ ᠠᠯᠠᠭᠰᠠᠨ︕ ᠴᠢ ᠲᠡᠭᠦᠨ ᠢ ᠠᠮᠣᠨᠴᠤᠳ ᠤᠨ ᠢᠯᠳᠦ ᠪᠡᠷ ᠠᠯᠠᠭᠤᠯᠵᠤ᠂ ᠡᠬᠡᠨᠡᠷ ᠢ ᠨᠢ ᠥᠪᠡᠷ ᠦᠨ ᠢᠶᠠᠨ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠤᠭᠰᠠᠨ ᠪᠠᠢᠨᠠ᠃ 10 ᠴᠢ ᠨᠠᠮᠠᠶᠢ ᠪᠠᠰᠤᠮᠵᠢᠯᠠᠨ᠂ ᠾᠢᠲ ᠬᠥᠮᠦᠨ ᠦᠦᠷᠢᠶᠠ ᠶᠢᠨ ᠡᠬᠡᠨᠡᠷ ᠢ ᠥᠪᠡᠷ ᠦᠨ ᠢᠶᠠᠨ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠤᠭᠰᠠᠨ ᠤᠴᠢᠷ ᠠᠴᠠ ᠣᠳᠣ ᠠᠴᠠ ᠡᠬᠢᠯᠡᠨ ᠴᠢᠨᠦ ᠭᠡᠷ ᠡᠴᠡ ᠢᠯᠳᠦ ᠶᠡᠷᠦ ᠰᠠᠯᠬᠤ ᠦᠭᠡᠢ ᠪᠣᠯᠣᠨᠠ᠃ 11 ᠶᠣᠬᠣᠸᠠ ᠮᠥᠨ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠬᠠᠷᠠ᠂ ᠪᠢ ᠭᠡᠷ ᠦᠨ ᠴᠢᠨᠢ ᠳᠣᠲᠣᠷᠠ ᠠᠴᠠ ᠭᠠᠢ ᠵᠣᠪᠠᠯᠠᠩ ᠡᠭᠦᠰᠭᠡᠵᠦ᠂ ᠴᠢᠮᠠ ᠳᠡᠭᠡᠷᠡ ᠪᠠᠭᠤᠯᠭᠠᠨᠠ᠃ ᠪᠢ ᠴᠢᠨᠦ ᠨᠢᠳᠦᠨ ᠳᠡᠭᠡᠷᠡ ᠡᠬᠡᠨᠡᠷ ᠤᠳ ᠢ ᠴᠢᠨᠢ ᠥᠪᠡᠷ ᠡᠴᠡ ᠴᠢᠨᠢ ᠣᠢᠷᠠ ᠨᠢᠭᠡᠨ ᠳᠦ ᠠᠪᠴᠤ ᠥᠭᠬᠦ ᠪᠥᠭᠡᠳ ᠲᠡᠷᠡ ᠬᠥᠮᠦᠨ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠢᠶᠡᠷ ᠴᠢᠨᠦ ᠡᠬᠡᠨᠡᠷ ᠤᠳ ᠲᠠᠢ ᠤᠨᠲᠠᠬᠤ ᠪᠣᠯᠣᠨᠠ᠃ 12 ᠴᠢ ᠨᠢᠭᠤᠴᠠ ᠪᠠᠷ ᠦᠢᠯᠡᠳᠦᠭᠰᠡᠨ ᠪᠣᠯ᠂ ᠪᠢ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠬᠠᠮᠤᠭ ᠢᠰᠷᠧᠯ ᠤᠨ ᠡᠮᠦᠨᠡ ᠡᠭᠦᠨ ᠢ ᠦᠢᠯᠡᠳᠦᠨᠡ》 ᠭᠡᠵᠡᠢ᠃ 13 ᠳ᠋ᠠᠸᠢᠳ᠋ ᠨᠠᠲ᠋ᠠᠨ ᠳᠤ᠄ 《ᠪᠢ ᠶᠣᠬᠣᠸᠠ ᠳᠤ ᠨᠢᠭᠦᠯ ᠦᠢᠯᠡᠳᠦᠯᠡ》 ᠭᠡᠪᠡ᠃ ᠨᠠᠲ᠋ᠠᠨ ᠳ᠋ᠠᠸᠢᠳ᠋ ᠲᠤ᠄ 《ᠶᠣᠬᠣᠸᠠ ᠲᠠᠨ ᠤ ᠨᠢᠭᠦᠯ ᠢ ᠵᠠᠢᠯᠠᠭᠤᠯᠤᠭᠰᠠᠨ᠃ ᠲᠠ ᠦᠬᠦᠬᠦ ᠦᠭᠡᠢ᠂ 14 ᠬᠠᠷᠢᠨ ᠲᠠ ᠡᠨᠡ ᠬᠡᠷᠡᠭ ᠢᠶᠡᠷ ᠢᠶᠠᠨ ᠶᠣᠬᠣᠸᠠ ᠶᠢ ᠳᠠᠢᠰᠤᠨ ᠨᠤᠭᠤᠳ ᠢᠶᠠᠷ ᠨᠢ ᠶᠡᠬᠡᠪᠡᠷ ᠳᠣᠷᠣᠮᠵᠢᠯᠠᠭᠤᠯᠤᠭᠰᠠᠨ 8 ᠲᠤᠯᠠ ᠴᠢᠨᠦ ᠬᠦᠦ ᠯᠠᠪᠲᠠᠢ ᠦᠬᠦᠬᠦ ᠪᠣᠯᠣᠨᠠ》 ᠭᠡᠪᠡ᠃ 15 ᠨᠠᠲ᠋ᠠᠨ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠪᠠ᠃ ᠶᠣᠬᠣᠸᠠ ᠦᠦᠷᠢᠶᠠ ᠶᠢᠨ ᠡᠬᠡᠨᠡᠷ ᠦᠨ ᠳ᠋ᠠᠸᠢᠳ᠋ ᠲᠤ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠬᠦᠦ ᠶᠢ ᠴᠣᠬᠢᠭᠰᠠᠨ ᠳᠤ᠂ ᠲᠡᠷᠡ ᠬᠦᠦ ᠡᠪᠡᠳᠴᠢᠨ ᠳᠤ ᠨᠡᠷᠪᠡᠭᠳᠡᠪᠡ᠃ 16 ᠳ᠋ᠠᠸᠢᠳ᠋ ᠲᠡᠷᠡ ᠬᠦᠦ ᠶᠢᠨ ᠲᠥᠯᠥᠭᠡ ᠪᠤᠷᠬᠠᠨ ᠠᠴᠠ ᠭᠤᠶᠤᠨ᠂ ᠪᠠᠴᠠᠭ ᠪᠠᠷᠢᠵᠤ᠂ ᠳᠣᠲᠣᠭᠰᠢ ᠣᠷᠣᠭᠠᠳ ᠰᠥᠨᠢᠵᠢᠨ ᠭᠠᠵᠠᠷ ᠬᠡᠪᠲᠡᠵᠦ ᠪᠠᠢᠯᠠ᠃ 17 ᠲᠡᠭᠦᠨ ᠦ ᠭᠡᠷ ᠦᠨ ᠬᠢᠨ ᠤ ᠠᠬᠠᠮᠠᠳ ᠳᠡᠷᠭᠡᠳᠡ ᠨᠢ ᠵᠣᠭᠰᠣᠵᠤ᠂ ᠲᠡᠭᠦᠨ ᠢ ᠭᠠᠵᠠᠷ ᠠᠴᠠ ᠪᠣᠰᠬᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠪᠣᠰᠬᠤ ᠶᠢ ᠬᠦᠰᠡᠭᠰᠡᠨ ᠦᠭᠡᠢ᠂ ᠮᠥᠨ ᠲᠡᠳᠡᠨ ᠲᠡᠢ ᠬᠠᠮᠲᠤ ᠬᠣᠭᠣᠯᠠ ᠴᠤ ᠢᠳᠡᠬᠦ ᠦᠭᠡᠢ ᠪᠠᠢᠯᠠ᠃ 18 ᠬᠡᠦᠬᠡᠳ ᠨᠢ ᠳᠣᠯᠣᠳᠠᠬᠢ ᠡᠳᠦᠷ ᠲᠦ ᠨᠠᠰᠤ ᠪᠠᠷᠠᠵᠠᠢ᠃ ᠳ᠋ᠠᠸᠢᠳ᠋ ᠤᠨ ᠲᠦᠰᠢᠮᠡᠳ ᠬᠡᠦᠬᠡᠳ ᠦᠨ ᠬᠢᠨᠢ ᠦᠭᠡᠢ ᠪᠣᠯᠣᠭᠰᠠᠨ ᠢ ᠲᠡᠭᠦᠨ ᠳᠦ ᠬᠡᠯᠡᠬᠦ ᠡᠴᠡ ᠪᠡᠨ ᠠᠶᠤᠵᠤ᠄ 《ᠬᠠᠷᠠ᠂ ᠬᠦᠦ ᠨᠢ ᠠᠮᠢᠳᠤ ᠪᠠᠢᠬᠤ ᠳᠤ ᠬᠠᠭᠠᠨ ᠪᠢᠳᠡᠨ ᠦ ᠬᠢ ᠶᠢ ᠰᠣᠨᠣᠰᠣᠭᠰᠠᠨ ᠦᠭᠡᠢ ᠶᠤᠮ ᠴᠢᠨᠢ ᠬᠡᠦᠬᠡᠳ ᠦᠨ ᠦᠭᠡᠢ ᠪᠣᠯᠣᠭᠰᠠᠨ ᠢ ᠪᠢᠳᠡ ᠶᠠᠭᠠᠬᠢᠵᠤ ᠲᠡᠭᠦᠨ ᠳᠦ ᠬᠡᠯᠡᠬᠦ ᠪᠢᠯᠡ︖ ᠥᠪᠡᠷ ᠲᠡᠭᠡᠨ ᠶᠠᠮᠠᠷ ᠨᠢᠭᠡᠨ ᠮᠠᠭᠤ ᠶᠠᠭᠤᠮᠠ ᠬᠢᠵᠦ ᠮᠠᠭᠠᠳ ᠦᠭᠡᠢ》 ᠭᠡᠯᠴᠡᠵᠦ ᠪᠠᠢᠯᠠ᠃ 19 ᠳ᠋ᠠᠸᠢᠳ᠋ ᠲᠦᠰᠢᠮᠡᠳ ᠦᠨ ᠢᠶᠠᠨ ᠰᠢᠪᠡᠨᠡᠯᠳᠦᠬᠦ ᠶᠢ ᠬᠠᠷᠠᠭᠠᠳ ᠬᠡᠦᠬᠡᠳ ᠦᠨ ᠦᠭᠡᠢ ᠪᠣᠯᠣᠭᠰᠠᠨ ᠢ ᠣᠢᠯᠠᠭᠠᠵᠠᠢ᠃ ᠳ᠋ᠠᠸᠢᠳ᠋ ᠲᠦᠰᠢᠮᠡᠳ ᠡᠴᠡ ᠪᠡᠨ᠄ 《ᠬᠦᠦ ᠦᠭᠡᠢ ᠪᠣᠯᠣᠭᠰᠠᠨ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠳᠡ᠄ 《ᠦᠭᠡᠢ ᠪᠣᠯᠣᠭᠰᠠᠨ》 ᠭᠡᠵᠡᠢ᠃
20 ᠳ᠋ᠠᠸᠢᠳ᠋ ᠭᠠᠵᠠᠷ ᠠᠴᠠ ᠪᠣᠰᠣᠭᠠᠳ᠂ ᠪᠡᠶᠡ ᠪᠡᠨ ᠤᠬᠢᠶᠠᠵᠤ ᠲᠣᠰᠣᠯᠠᠨ᠂ ᠬᠤᠪᠴᠠᠰᠤ ᠪᠠᠨ ᠰᠣᠯᠢᠵᠤ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠣᠷᠣᠭᠠᠳ ᠬᠦᠨᠳᠦᠳᠬᠡᠨ ᠮᠥᠷᠭᠥᠭᠰᠡᠨ ᠦ ᠳᠠᠷᠠᠭᠠ᠂ ᠣᠷᠳᠣᠨ ᠳᠠᠭᠠᠨ ᠬᠠᠷᠢᠭᠠᠳ ᠬᠣᠭᠣᠯᠠ ᠪᠡᠯᠡᠳᠬᠡᠭᠦᠯᠵᠦ ᠢᠳᠡᠪᠡ᠃ 21 ᠲᠦᠰᠢᠮᠡᠳ ᠨᠢ᠄ 《ᠲᠠᠨ ᠤ ᠦᠢᠯᠡᠳᠦᠭᠰᠡᠨ ᠡᠨᠡ ᠬᠡᠷᠡᠭ ᠶᠠᠮᠠᠷ ᠤᠴᠢᠷ ᠲᠠᠢ ᠶᠤᠮ ᠪᠤᠢ︖ ᠬᠡᠦᠬᠡᠳ ᠠᠮᠢᠳᠤ ᠪᠠᠢᠬᠤ ᠳᠤ ᠲᠠ ᠪᠠᠴᠠᠭ ᠪᠠᠷᠢᠵᠤ᠂ ᠤᠬᠢᠯᠠᠵᠤ ᠪᠠᠢᠭᠰᠠᠨ᠂ ᠬᠠᠷᠢᠨ ᠬᠡᠦᠬᠡᠳ ᠦᠭᠡᠢ ᠪᠣᠯᠬᠤ ᠳᠤ ᠲᠠ ᠪᠣᠰᠴᠤ᠂ ᠬᠣᠭᠣᠯᠠ ᠢᠳᠡᠯᠡ》 ᠭᠡᠯᠴᠡᠬᠦ ᠳᠦ᠂ 22 ᠳ᠋ᠠᠸᠢᠳ᠋᠄ 《ᠬᠦᠦ ᠠᠮᠢᠳᠤ ᠪᠠᠢᠬᠤ ᠦᠶᠡ ᠳᠦ ᠪᠢ ᠪᠠᠴᠠᠭ ᠪᠠᠷᠢᠨ᠂ ᠤᠬᠢᠯᠠᠵᠤ ᠪᠠᠢᠭᠰᠠᠨ ᠨᠢ 〈ᠶᠣᠬᠣᠸᠠ ᠨᠠᠮᠠᠶᠢ ᠨᠢᠭᠦᠯᠡᠰᠴᠦ᠂ ᠬᠦᠦ ᠶᠢ ᠠᠮᠢᠳᠤᠷᠠᠭᠤᠯᠬᠤ ᠮᠠᠭᠠᠳ〉 ᠬᠡᠮᠡᠨ ᠪᠣᠳᠣᠭᠰᠠᠨ ᠤ ᠤᠴᠢᠷ ᠶᠤᠮ᠃ 23 ᠣᠳᠣ ᠬᠡᠦᠬᠡᠳ ᠦᠭᠡᠢ ᠪᠣᠯᠴᠢᠬᠠᠯᠠ᠃ ᠪᠢ ᠶᠠᠭᠤᠨ ᠳᠤ ᠪᠠᠴᠠᠭ ᠪᠠᠷᠢᠬᠤ ᠪᠢᠯᠡ︖ ᠪᠢ ᠲᠡᠭᠦᠨ ᠢ ᠡᠷᠭᠢᠭᠦᠯᠵᠦ ᠠᠪᠴᠢᠷᠠᠵᠤ ᠴᠢᠳᠠᠬᠤ ᠤᠤ︖ ᠪᠢ ᠲᠡᠭᠦᠨ ᠤᠷᠤᠭᠤ ᠣᠴᠢᠬᠤ ᠪᠣᠯᠪᠠᠴᠤ ᠲᠡᠷᠡ ᠨᠠᠳᠠ ᠳᠡᠭᠡᠷᠡ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ》 ᠭᠡᠪᠡ᠃
24 ᠳ᠋ᠠᠸᠢᠳ᠋ ᠡᠬᠡᠨᠡᠷ ᠪᠠᠲ᠋ᠱᠧᠪᠠ ᠪᠠᠨ ᠲᠠᠢᠳᠬᠤᠷᠠᠭᠤᠯᠵᠤ᠂ ᠲᠡᠭᠦᠨ ᠳᠡᠭᠡᠷᠡ ᠣᠷᠣᠵᠤ᠂ ᠲᠡᠭᠦᠨ ᠲᠡᠢ ᠤᠨᠲᠠᠪᠠ᠃ ᠲᠡᠷᠡ ᠡᠮᠡᠭᠲᠡᠢ ᠬᠦᠦ ᠲᠥᠷᠥᠭᠦᠯᠦᠭᠰᠡᠨ ᠳᠦ᠂ ᠳ᠋ᠠᠸᠢᠳ᠋ ᠲᠡᠭᠦᠨ ᠢ ᠰᠣᠯᠣᠮᠣᠨ ᠬᠡᠮᠡᠨ ᠨᠡᠷᠡᠯᠡᠪᠡ᠃ ᠶᠣᠬᠣᠸᠠ ᠲᠡᠭᠦᠨ ᠢ ᠬᠠᠢᠷᠠᠯᠠᠭᠰᠠᠨ ᠪᠥᠭᠡᠳ 25 ᠲᠡᠭᠦᠨ ᠢ ᠬᠠᠢᠷᠠᠯᠠᠭᠰᠠᠨ ᠳᠠᠭᠠᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠨᠠᠲ᠋ᠠᠨ ᠢᠶᠠᠷ ᠦᠭᠡ ᠢᠯᠡᠭᠡᠵᠦ᠂ ᠲᠡᠭᠦᠨ ᠳᠦ ᠶᠧᠳᠢᠳᠢᠶᠠ 9 ᠭᠡᠰᠡᠨ ᠨᠡᠷᠡ ᠥᠭᠭᠥᠭᠦᠯᠦᠭᠰᠡᠨ ᠪᠠᠢᠨᠠ᠃
ᠷᠠᠪᠠ ᠶᠢ ᠡᠵᠡᠯᠡᠪᠡ
26 ᠲᠡᠷᠡ ᠦᠶᠡ ᠳᠦ᠂ ᠶᠣᠶᠠᠪ ᠠᠮᠣᠨᠴᠤᠳ ᠤᠨ ᠬᠠᠭᠠᠨ ᠬᠣᠲᠠ ᠷᠠᠪᠠ ᠶᠢ ᠴᠣᠬᠢᠵᠤ᠂ ᠲᠡᠭᠦᠨ ᠢ ᠡᠵᠡᠯᠡᠨ ᠠᠪᠬᠤ ᠪᠣᠯᠪᠠ᠃ 27 ᠶᠣᠶᠠᠪ ᠳ᠋ᠠᠸᠢᠳ᠋ ᠲᠤ ᠡᠯᠴᠢᠳ ᠢᠯᠡᠭᠡᠨ᠄ 《ᠪᠢ ᠷᠠᠪᠠ ᠶᠢ ᠴᠣᠬᠢᠵᠤ᠂ ᠤᠰᠤᠨ ᠤ ᠨᠥᠭᠡᠴᠡ ᠶᠢ ᠨᠢ ᠡᠵᠡᠯᠡᠨ ᠠᠪᠤᠯᠠ᠃ 28 ᠲᠠ ᠣᠳᠣ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠢᠶᠠᠨ ᠴᠤᠭᠯᠠᠭᠤᠯᠤᠨ ᠢᠷᠡᠵᠦ᠂ ᠡᠨᠡ ᠬᠣᠲᠠ ᠶᠢᠨ ᠬᠠᠷᠠᠯᠳᠤᠭᠠ ᠬᠤᠸᠠᠷᠠᠩᠨᠠᠨ ᠲᠡᠭᠦᠨ ᠢ ᠡᠵᠡᠯᠡᠨ ᠠᠪᠤᠭᠠᠷᠠᠢ᠃ ᠡᠰᠡ ᠲᠡᠭᠡᠪᠡᠯ ᠪᠢ ᠡᠵᠡᠯᠡᠨ ᠠᠪᠴᠤ ᠡᠨᠡ ᠬᠣᠲᠠ ᠮᠢᠨᠦ ᠨᠡᠷᠡ ᠪᠡᠷ ᠨᠡᠷᠡᠯᠡᠭᠳᠡᠬᠦ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠭᠦᠯᠪᠡ᠃ 29 ᠳ᠋ᠠᠸᠢᠳ᠋ ᠪᠦᠬᠦ ᠴᠡᠷᠢᠭ ᠢᠶᠠᠨ ᠴᠤᠭᠯᠠᠭᠤᠯᠵᠤ᠂ ᠷᠠᠪᠠ ᠤᠷᠤᠭᠤ ᠣᠴᠢᠭᠠᠳ ᠲᠡᠷᠡ ᠬᠣᠲᠠ ᠶᠢ ᠳᠣᠪᠲᠣᠯᠵᠤ᠂ ᠡᠵᠡᠯᠡᠨ ᠠᠪᠤᠭᠰᠠᠨ ᠤ ᠳᠠᠷᠠᠭᠠ᠂ 30 ᠮᠢᠯᠺᠣᠮ 10 ᠤᠨ ᠲᠣᠯᠣᠭᠠᠢ ᠠᠴᠠ ᠲᠢᠲᠢᠮ ᠢ ᠨᠢ ᠠᠪᠴᠠᠢ᠃ ᠲᠡᠷᠡ ᠲᠢᠲᠢᠮ ᠨᠢ ᠨᠢᠭᠡ ᠲᠠᠯᠠᠨᠲ 11 ᠠᠯᠲᠠ ᠶᠢᠨ ᠬᠢᠷᠢ ᠬᠦᠨᠳᠦ ᠪᠥᠭᠡᠳ ᠲᠡᠭᠦᠨ ᠳᠦ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ ᠰᠢᠭᠢᠳᠬᠡᠭᠰᠡᠨ ᠪᠠᠢᠯᠠ᠃ ᠲᠡᠷᠡ ᠨᠢ ᠣᠳᠣ ᠳ᠋ᠠᠸᠢᠳ᠋ ᠤᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠢᠬᠤ ᠪᠣᠯᠪᠠ᠃ ᠳ᠋ᠠᠸᠢᠳ᠋ ᠲᠡᠷᠡ ᠬᠣᠲᠠ ᠠᠴᠠ ᠦᠯᠡᠮᠵᠢ ᠶᠡᠬᠡ ᠬᠡᠮᠵᠢᠶᠡᠨ ᠦ ᠣᠯᠵᠠ ᠣᠯᠵᠤ ᠠᠪᠠᠴᠢᠨ᠂ 31 ᠮᠥᠨ ᠬᠣᠲᠠ ᠳᠤ ᠪᠠᠢᠭᠠ ᠠᠷᠠᠳ ᠣᠯᠠᠨ ᠢ ᠭᠠᠷᠭᠠᠨ᠂ ᠬᠢᠷᠥᠭᠡ᠂ ᠢᠷ ᠲᠠᠢ ᠲᠡᠮᠦᠷ ᠪᠠᠭᠠᠵᠢ ᠪᠣᠯᠣᠨ ᠰᠦᠬᠡ ᠪᠡᠷ ᠬᠢᠬᠦ ᠠᠵᠢᠯ ᠳᠤ ᠲᠠᠯᠪᠢᠨ ᠲᠣᠭᠣᠰᠬᠠ ᠴᠣᠬᠢᠭᠤᠯᠪᠠ᠃ ᠳ᠋ᠠᠸᠢᠳ᠋ ᠠᠮᠣᠨᠴᠤᠳ ᠤᠨ ᠪᠦᠬᠦ ᠬᠣᠲᠠ ᠳᠤ ᠡᠨᠡ ᠮᠡᠲᠦ ᠪᠡᠷ ᠦᠢᠯᠡᠳᠪᠡ᠃ ᠲᠡᠭᠡᠭᠡᠳ ᠳ᠋ᠠᠸᠢᠳ᠋ ᠬᠠᠮᠤᠭ ᠴᠡᠷᠢᠭ ᠲᠠᠢ ᠪᠠᠨ ᠶᠧᠷᠦ᠋ᠰᠠᠯᠧᠮ ᠳᠤ ᠪᠤᠴᠠᠭᠰᠠᠨ ᠪᠠᠢᠨᠠ᠃