ᠳ᠋ᠠᠨᠢᠶᠧᠯ ᠨᠢᠭᠡ
ᠬᠠᠭᠠᠨ ᠤ ᠣᠷᠳᠣᠨ ᠳᠤ ᠳᠠᠰᠬᠠᠯᠵᠢᠪᠠ
1 ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠬᠣᠢᠶᠠᠺᠢᠮ ᠤᠨ ᠬᠠᠭᠠᠨᠴᠢᠯᠠᠯ ᠤᠨ ᠭᠤᠷᠪᠠᠳᠤᠭᠠᠷ ᠣᠨ ᠳᠤ᠂ ᠪᠠᠪᠢᠯᠣᠨ ᠤ ᠬᠠᠭᠠᠨ ᠨᠧᠪᠦ᠋ᠺᠠᠨᠧᠽᠠᠷ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ ᠢᠷᠡᠵᠦ᠂ ᠬᠣᠲᠠ ᠶᠢ ᠪᠦᠰᠡᠯᠡᠭᠰᠡᠨ ᠪᠠᠢᠨᠠ᠃ 2 ᠡᠵᠡᠨ ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠬᠣᠢᠶᠠᠺᠢᠮ ᠪᠣᠯᠣᠨ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠵᠠᠷᠢᠮ ᠬᠡᠷᠡᠭᠰᠡᠯ ᠢ ᠲᠡᠭᠦᠨ ᠦ ᠭᠠᠷ ᠲᠤ ᠲᠤᠰᠢᠶᠠᠪᠠ᠃ ᠲᠡᠷᠡ ᠲᠡᠳᠡᠭᠡᠷ ᠵᠦᠢᠯ ᠢ ᠱᠢᠨᠠᠷ ᠤᠨ ᠨᠤᠲᠤᠭ ᠳᠠᠬᠢ ᠥᠪᠡᠷ ᠦᠨ ᠢᠶᠠᠨ ᠪᠤᠷᠬᠠᠨ ᠤ ᠳᠤᠭᠠᠩ ᠲᠤ ᠠᠪᠠᠴᠢᠵᠤ᠂ ᠥᠪᠡᠷ ᠦᠨ ᠢᠶᠠᠨ ᠪᠤᠷᠬᠠᠨ ᠤ ᠬᠥᠮᠥᠷᠭᠡ ᠳᠦ ᠲᠠᠯᠪᠢᠵᠠᠢ᠃
3 ᠲᠡᠷᠡ ᠪᠠᠰᠠ ᠣᠷᠳᠣᠨ ᠤ ᠠᠬᠠᠯᠠᠭᠴᠢ ᠲᠦᠰᠢᠮᠡᠯ ᠠᠱᠫᠧᠨᠠᠽ ᠲᠤ ᠲᠤᠰᠢᠶᠠᠨ᠂ ᠢᠰᠷᠧᠯᠴᠦᠳ ᠦᠨ ᠬᠠᠭᠠᠨ ᠨᠣᠶᠠᠳ ᠤᠨ ᠦᠷᠡ ᠤᠳᠤᠮ ᠤᠨ ᠳᠤᠮᠳᠠ ᠠᠴᠠ 4 ᠥ ᠦᠭᠡᠢ᠂ ᠦᠵᠡᠰᠬᠦᠯᠡᠩ ᠲᠡᠭᠦᠰ᠂ ᠡᠷᠳᠡᠮ ᠤᠬᠠᠭᠠᠨ ᠤ ᠪᠦᠬᠦ ᠰᠠᠯᠪᠤᠷᠢ ᠳᠤ ᠭᠠᠷᠮᠠᠭᠠᠢ᠂ ᠮᠡᠳᠡᠯᠭᠡ ᠲᠠᠢ᠂ ᠣᠢ ᠰᠠᠢᠲᠠᠢ ᠪᠥᠭᠡᠳ ᠬᠠᠭᠠᠨ ᠤ ᠣᠷᠳᠣᠨ ᠳᠤ ᠦᠢᠯᠡᠴᠢᠯᠡᠬᠦ ᠴᠢᠳᠠᠪᠤᠷᠢ ᠲᠠᠢ ᠵᠠᠯᠠᠭᠤᠰ ᠢ ᠠᠪᠴᠢᠷᠠᠭᠤᠯᠵᠤ᠂ ᠲᠡᠳᠡᠨ ᠳᠦ ᠪᠠᠪᠢᠯᠣᠨᠴᠤᠳ ᠤᠨ ᠬᠡᠯᠡ ᠪᠠ ᠦᠰᠦᠭ ᠪᠢᠴᠢᠭ ᠢ ᠵᠢᠭᠠᠯᠭᠠᠪᠠ᠃ 5 ᠬᠠᠭᠠᠨ ᠡᠳᠦᠷ ᠪᠦᠷᠢ ᠲᠡᠳᠡᠨ ᠳᠦ ᠥᠪᠡᠷ ᠦᠨ ᠢᠶᠠᠨ ᠢᠳᠡᠳᠡᠭ ᠬᠣᠭᠣᠯᠠ᠂ ᠤᠤᠭᠤᠳᠠᠭ ᠳᠠᠷᠠᠰᠤᠨ ᠠᠴᠠ ᠲᠣᠭᠲᠠᠭᠰᠠᠨ ᠬᠤᠪᠢ ᠶᠢ ᠬᠦᠷᠲᠡᠭᠡᠵᠦ᠂ ᠲᠡᠳᠡᠨ ᠢ ᠭᠤᠷᠪᠠᠨ ᠵᠢᠯ ᠪᠣᠯᠪᠠᠰᠤᠷᠠᠭᠤᠯᠤᠭᠠᠳ ᠬᠤᠭᠤᠴᠠᠭᠠ ᠭᠦᠢᠴᠡᠬᠦ ᠳᠦ᠂ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠦᠢᠯᠡᠴᠢᠯᠡᠭᠦᠯᠬᠦ ᠭᠡᠵᠦ ᠪᠠᠢᠯᠠ᠃ 6 ᠲᠡᠷᠡ ᠵᠠᠯᠠᠭᠤᠰ ᠤᠨ ᠳᠤᠮᠳᠠ ᠶᠦᠳᠠ ᠬᠥᠮᠦᠨ ᠳ᠋ᠠᠨᠢᠶᠧᠯ᠂ ᠬᠠᠨᠠᠨᠢᠶᠠ᠂ ᠮᠢᠱᠠᠶᠧᠯ᠂ ᠠᠽᠠᠷᠢᠶᠠ ᠪᠠᠢᠪᠠ᠃ 7 ᠠᠬᠠᠯᠠᠭᠴᠢ ᠲᠦᠰᠢᠮᠡᠯ ᠲᠡᠳᠡᠨ ᠦ ᠨᠡᠷᠡ ᠶᠢ ᠬᠠᠯᠠᠵᠤ᠂ ᠳ᠋ᠠᠨᠢᠶᠧᠯ ᠢ ᠪᠧᠯᠲ᠋ᠧᠱᠠᠽᠠᠷ᠂ ᠬᠠᠨᠠᠨᠢᠶᠠ ᠶᠢ ᠱᠠᠳ᠋ᠷᠠᠺ᠂ ᠮᠢᠱᠠᠶᠧᠯ ᠢ ᠮᠧᠱᠠᠺ᠂ ᠠᠽᠠᠷᠢᠶᠠ ᠶᠢ ᠠᠪᠧᠳ᠋ ᠨᠧᠭᠣ᠋ ᠭᠡᠵᠦ ᠨᠡᠷᠡᠯᠡᠪᠡ᠃
8 ᠳ᠋ᠠᠨᠢᠶᠧᠯ ᠬᠠᠭᠠᠨ ᠤ ᠬᠣᠭᠣᠯᠠ ᠪᠠ ᠳᠠᠷᠠᠰᠤ ᠪᠠᠷ ᠥᠪᠡᠷ ᠢ ᠪᠠᠨ ᠪᠤᠵᠠᠷᠯᠠᠬᠤ ᠦᠭᠡᠢ ᠭᠡᠵᠦ ᠰᠡᠳᠬᠢᠯ ᠳᠡᠭᠡᠨ ᠰᠢᠭᠤᠳᠪᠠ᠃ ᠲᠡᠢᠨ ᠬᠦ ᠥᠪᠡᠷ ᠢ ᠪᠠᠨ ᠪᠤᠵᠠᠷᠯᠠᠬᠤ ᠦᠭᠡᠢ ᠪᠠᠢᠬᠤ ᠶᠢᠨ ᠲᠤᠯᠠᠳᠠ ᠲᠦᠰᠢᠮᠡᠯ ᠡᠴᠡ ᠨᠢ ᠵᠥᠪᠰᠢᠶᠡᠷᠡᠯ ᠭᠤᠶᠤᠬᠤ ᠳᠤ᠂ 9 ᠪᠤᠷᠬᠠᠨ ᠲᠡᠷᠡ ᠲᠦᠰᠢᠮᠡᠯ ᠦᠨ ᠡᠮᠦᠨᠡ ᠳ᠋ᠠᠨᠢᠶᠧᠯ ᠳᠤ ᠡᠨᠡᠷᠢᠯ᠂ ᠥᠷᠥᠪᠳᠥᠯ ᠦᠵᠡᠭᠦᠯᠵᠡᠢ᠃ 10 ᠬᠠᠷᠢᠨ ᠲᠡᠷᠡ ᠲᠦᠰᠢᠮᠡᠯ ᠳ᠋ᠠᠨᠢᠶᠧᠯ ᠳᠤ᠄ 《ᠪᠢ ᠡᠵᠡᠨ ᠬᠠᠭᠠᠨ ᠠᠴᠠ ᠪᠠᠨ ᠠᠶᠤᠵᠤ ᠪᠠᠢᠨᠠ᠃ ᠲᠡᠷᠡ ᠪᠡᠷ ᠲᠠ ᠨᠠᠷ ᠤᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠢ ᠲᠣᠭᠲᠠᠭᠠᠭᠰᠠᠨ᠂ ᠬᠡᠷᠪᠡ ᠲᠠ ᠨᠠᠷ ᠤᠨ ᠨᠢᠭᠤᠷ ᠴᠢᠷᠠᠢ ᠦᠶᠡ ᠲᠡᠩ ᠦᠨ ᠢᠶᠠᠨ ᠵᠠᠯᠠᠭᠤᠰ ᠤᠨ ᠴᠢᠷᠠᠢ ᠠᠴᠠ ᠴᠣᠩᠬᠢᠭᠠᠷ ᠪᠠᠢᠬᠤ ᠶᠢ ᠲᠡᠷᠡ ᠠᠩᠵᠠᠭᠠᠷᠠᠪᠠᠯ ᠶᠠᠭᠠᠬᠢᠬᠤ ᠪᠤᠢ︖ ᠲᠠ ᠨᠠᠷ ᠤᠨ ᠤᠯᠠᠮ ᠢᠶᠠᠷ ᠬᠠᠭᠠᠨ ᠮᠢᠨᠦ ᠲᠣᠯᠣᠭᠠᠢ ᠶᠢ ᠠᠪᠤᠨᠠ》 ᠭᠡᠯᠡ᠃ 11 ᠠᠬᠠᠯᠠᠭᠴᠢ ᠲᠦᠰᠢᠮᠡᠯ ᠪᠡᠷ ᠳ᠋ᠠᠨᠢᠶᠧᠯ᠂ ᠬᠠᠨᠠᠨᠢᠶᠠ᠂ ᠮᠢᠱᠠᠶᠧᠯ᠂ ᠠᠽᠠᠷᠢᠶᠠ ᠶᠢ ᠬᠠᠷᠠᠭᠠᠯᠵᠠᠭᠤᠯᠬᠤ ᠪᠠᠷ ᠨᠢᠭᠡ ᠬᠠᠷᠠᠭᠤᠯ ᠲᠣᠮᠢᠯᠠᠭᠰᠠᠨ ᠪᠠᠢᠯᠠ᠃ ᠳ᠋ᠠᠨᠢᠶᠧᠯ ᠲᠡᠭᠦᠨ ᠳᠦ᠄ 12 《ᠲᠠ ᠵᠠᠷᠤᠴᠠ ᠪᠢᠳᠡ ᠨᠠᠷ ᠢᠶᠠᠨ ᠠᠷᠪᠠᠨ ᠡᠳᠦᠷ ᠰᠣᠷᠢᠵᠤ᠂ ᠨᠣᠭᠣᠭᠠ ᠯᠠ ᠥᠭᠴᠦ ᠢᠳᠡᠭᠦᠯᠦᠨ᠂ ᠤᠰᠤ ᠯᠠ ᠤᠤᠭᠤᠯᠭᠠᠨᠠ ᠤᠤ︖ 13 ᠲᠡᠭᠡᠭᠡᠳ ᠪᠢᠳᠡᠨ ᠦ ᠴᠢᠷᠠᠢ ᠶᠢ ᠬᠠᠭᠠᠨ ᠤ ᠬᠣᠭᠣᠯᠠᠨ ᠠᠴᠠ ᠢᠳᠡᠳᠡᠭ ᠵᠠᠯᠠᠭᠤᠰ ᠤᠨ ᠴᠢᠷᠠᠢ ᠲᠠᠢ ᠬᠠᠷᠢᠴᠠᠭᠤᠯᠤᠨ ᠦᠵᠡᠵᠦ᠂ ᠬᠠᠷᠠᠭᠰᠠᠨ ᠤ ᠪᠠᠨ ᠳᠠᠭᠠᠤ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠦᠢᠯᠡᠳᠦᠭᠡᠴᠢ》 ᠭᠡᠰᠡᠨ ᠳᠦ᠂ 14 ᠲᠡᠷᠡ ᠵᠥᠪᠰᠢᠶᠡᠷᠡᠵᠦ᠂ ᠲᠡᠳᠡᠨ ᠢ ᠠᠷᠪᠠᠨ ᠡᠳᠦᠷ ᠰᠣᠷᠢᠪᠠ᠃ 15 ᠠᠷᠪᠠᠨ ᠡᠳᠦᠷ ᠪᠣᠯᠬᠤ ᠳᠤ᠂ ᠲᠡᠳᠡᠨ ᠦ ᠴᠢᠷᠠᠢ ᠬᠠᠭᠠᠨ ᠤ ᠬᠣᠭᠣᠯᠠᠨ ᠠᠴᠠ ᠢᠳᠡᠭᠰᠡᠨ ᠵᠠᠯᠠᠭᠤᠰ ᠤᠨ ᠠᠯᠢᠨ ᠤ ᠬᠢᠨᠢ ᠴᠢᠷᠠᠢ ᠠᠴᠠ ᠴᠤ ᠢᠯᠡᠭᠦᠦ ᠥᠩᠭᠡᠯᠢᠭ᠂ ᠮᠠᠷᠢᠶᠠᠯᠢᠭ ᠬᠠᠷᠠᠭᠳᠠᠪᠠ᠃ 16 ᠲᠡᠢᠮᠦ ᠡᠴᠡ ᠬᠠᠷᠠᠭᠤᠯ ᠲᠡᠳᠡᠨ ᠳᠦ ᠨᠣᠭᠳᠠᠭᠰᠠᠨ ᠬᠣᠭᠣᠯᠠ ᠳᠠᠷᠠᠰᠤ ᠶᠢ ᠨᠢ ᠥᠭᠭᠥᠯ ᠦᠭᠡᠢ᠂ ᠨᠣᠭᠣᠭᠠ ᠥᠭᠭᠥᠭᠰᠡᠭᠡᠷ ᠪᠠᠢᠯᠠ᠃ 17 ᠪᠤᠷᠬᠠᠨ ᠡᠨᠡ ᠳᠥᠷᠪᠡᠨ ᠵᠠᠯᠠᠭᠤ ᠳᠤ ᠪᠦᠬᠦ ᠲᠥᠷᠥᠯ ᠦᠨ ᠦᠰᠦᠭ ᠪᠢᠴᠢᠭ᠂ ᠡᠷᠳᠡᠮ ᠤᠬᠠᠭᠠᠨ ᠤ ᠪᠦᠬᠦ ᠰᠠᠯᠪᠤᠷᠢ ᠶᠢᠨ ᠮᠡᠳᠡᠯᠭᠡ ᠪᠠ ᠤᠬᠠᠭᠠᠮᠵᠢ ᠶᠢ ᠰᠣᠶᠣᠷᠬᠠᠪᠠ᠃ ᠳ᠋ᠠᠨᠢᠶᠧᠯ ᠨᠢ ᠪᠦᠬᠦ ᠲᠥᠷᠥᠯ ᠦᠨ ᠦᠵᠡᠭᠳᠡᠯ ᠪᠠ ᠵᠡᠭᠦᠳᠦ ᠶᠢ ᠣᠢᠯᠠᠭᠠᠬᠤ ᠴᠢᠳᠠᠪᠤᠷᠢ ᠲᠠᠢ ᠪᠠᠢᠯᠠ᠃
18 ᠬᠠᠭᠠᠨ ᠤ ᠲᠣᠭᠲᠠᠭᠠᠭᠰᠠᠨ ᠬᠤᠭᠤᠴᠠᠭᠠ ᠭᠦᠢᠴᠡᠬᠦ ᠳᠦ᠂ ᠠᠬᠠᠯᠠᠭᠴᠢ ᠲᠦᠰᠢᠮᠡᠯ ᠲᠡᠳᠡᠨ ᠢ ᠨᠧᠪᠦ᠋ᠺᠠᠨᠧᠽᠠᠷ ᠲᠤ ᠠᠪᠠᠴᠢᠪᠠ᠃ 19 ᠬᠠᠭᠠᠨ ᠲᠡᠳᠡᠨ ᠲᠡᠢ ᠶᠠᠷᠢᠯᠴᠠᠵᠤ ᠦᠵᠡᠬᠦ ᠳᠦ᠂ ᠲᠡᠳᠡ ᠪᠦᠭᠦᠳᠡ ᠶᠢᠨ ᠳᠤᠮᠳᠠ ᠠᠴᠠ ᠳ᠋ᠠᠨᠢᠶᠧᠯ᠂ ᠬᠠᠨᠠᠨᠢᠶᠠ᠂ ᠮᠢᠱᠠᠶᠧᠯ᠂ ᠠᠽᠠᠷᠢᠶᠠ ᠲᠠᠢ ᠡᠩ ᠵᠡᠷᠭᠡᠴᠡᠬᠦ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠳᠡ ᠬᠠᠭᠠᠨ ᠤ ᠡᠮᠦᠨᠡ ᠦᠢᠯᠡᠴᠢᠯᠡᠬᠦ ᠪᠣᠯᠣᠯᠠ᠃ 20 ᠬᠠᠭᠠᠨ ᠲᠡᠳᠡᠨ ᠢ ᠮᠡᠷᠭᠡᠨ ᠤᠬᠠᠭᠠᠨ ᠪᠠ ᠡᠷᠳᠡᠮ ᠮᠡᠳᠡᠯᠭᠡ ᠶᠢᠨ ᠪᠦᠬᠦ ᠰᠡᠳᠦᠪ ᠢᠶᠡᠷ ᠰᠢᠯᠭᠠᠭᠠᠳ᠂ ᠲᠡᠳᠡ ᠪᠣᠯ ᠬᠠᠭᠠᠨᠴᠢᠯᠠᠯ ᠤᠨ ᠬᠢᠨᠢ ᠠᠯᠢ ᠴᠤ ᠶᠢᠯᠸᠢᠴᠢᠨ᠂ ᠵᠢᠷᠤᠬᠠᠢᠴᠢ ᠡᠴᠡ ᠠᠷᠪᠠ ᠳᠠᠬᠢᠨ ᠢᠯᠡᠭᠦᠦ ᠪᠣᠯᠬᠤ ᠶᠢ ᠲᠡᠷᠡ ᠣᠯᠵᠤ ᠮᠡᠳᠡᠯᠡ᠃ 21 ᠢᠩᠭᠢᠭᠡᠳ ᠳ᠋ᠠᠨᠢᠶᠧᠯ ᠺᠦᠷᠣᠰ ᠬᠠᠭᠠᠨ ᠤ ᠨᠢᠭᠡᠳᠦᠭᠡᠷ ᠣᠨ ᠬᠦᠷᠲᠡᠯᠡ ᠲᠡᠨᠳᠡ ᠪᠠᠢᠵᠠᠢ᠃