ᠳ᠋ᠠᠨᠢᠶᠧᠯ ᠶᠢᠰᠦ
ᠳ᠋ᠠᠨᠢᠶᠧᠯ ᠤᠨ ᠳᠠᠭᠠᠳᠬᠠᠯ
1 ᠮᠧᠳᠧᠴᠤᠳ ᠤᠨ ᠦᠷᠡ ᠤᠳᠤᠮ ᠠᠬᠠᠰᠦ᠋ᠶᠧᠷᠦ᠋ ᠶᠢᠨ ᠬᠦᠦ ᠳ᠋ᠠᠷᠢᠶᠦ᠋ ᠶᠢᠨ ᠪᠠᠪᠢᠯᠣᠨᠴᠤᠳ ᠤᠨ ᠬᠠᠭᠠᠨ ᠪᠣᠯᠣᠭᠰᠠᠨ ᠤ ᠠᠩ᠋ᠬᠠᠳᠤᠭᠠᠷ ᠣᠨ ᠳᠤ᠂ 2 ᠲᠡᠭᠦᠨ ᠦ ᠬᠠᠭᠠᠨᠴᠢᠯᠠᠯ ᠤᠨ ᠠᠩ᠋ᠬᠠᠳᠤᠭᠠᠷ ᠣᠨ ᠳᠤ᠂ ᠳ᠋ᠠᠨᠢᠶᠧᠯ ᠪᠢ ᠶᠣᠬᠣᠸᠠ ᠠᠴᠠ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠧᠷᠧᠮᠢᠶᠠ ᠳᠤ ᠶᠠᠷᠢᠭᠰᠠᠨ ᠦᠭᠡ ᠶᠢᠨ ᠳᠠᠭᠠᠤ ᠶᠧᠷᠦ᠋ᠰᠠᠯᠧᠮ ᠤᠨ ᠰᠦᠢᠷᠡᠯ ᠦᠨ ᠬᠤᠭᠤᠴᠠᠭᠠ ᠭᠦᠢᠴᠡᠬᠦ ᠳᠦ᠂ ᠳᠠᠯᠠᠨ ᠵᠢᠯ ᠪᠣᠯᠬᠤ ᠶᠢ ᠨᠣᠮ ᠳᠡᠭᠡᠷᠡ ᠡᠴᠡ ᠣᠢᠯᠠᠭᠠᠯᠠ᠃
3 ᠲᠡᠢᠮᠦ ᠡᠴᠡ ᠪᠢ ᠨᠢᠭᠤᠷ ᠢᠶᠠᠨ ᠡᠵᠡᠨ ᠪᠤᠷᠬᠠᠨ ᠤᠷᠤᠭᠤ ᠬᠠᠨᠳᠤᠭᠤᠯᠪᠠ᠃ ᠢᠩᠭᠢᠭᠡᠳ ᠪᠢ ᠪᠠᠴᠠᠭ ᠪᠠᠷᠢᠨ ᠲᠠᠭᠠᠷ ᠡᠮᠦᠰᠴᠦ᠂ ᠪᠡᠶᠡ ᠳᠡᠭᠡᠷᠡ ᠪᠡᠨ ᠦᠨᠡᠰᠦ ᠰᠠᠴᠤᠨ᠂ ᠳᠠᠭᠠᠳᠬᠠᠨ ᠭᠤᠶᠤᠵᠤ᠂ ᠲᠡᠭᠦᠨ ᠢ ᠬᠢᠴᠢᠶᠡᠩᠭᠦᠢᠯᠡᠨ ᠬᠠᠢᠪᠠ᠃ 4 ᠪᠢ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠳᠠᠭᠠᠳᠬᠠᠨ᠂ ᠨᠢᠭᠦᠯ ᠢᠶᠡᠨ ᠤᠯᠠᠢᠵᠤ᠄ 《ᠥ᠂ ᠡᠵᠡᠨ᠂ ᠠᠤᠭᠠ ᠡᠮᠢᠶᠡᠭᠦᠰᠢᠲᠡᠢ ᠪᠤᠷᠬᠠᠨ ᠮᠢᠨᠢ᠂ ᠲᠠ ᠥᠪᠡᠷ ᠢ ᠲᠠᠨᠢ ᠬᠠᠢᠷᠠᠯᠠᠵᠤ᠂ ᠲᠤᠰᠢᠶᠠᠯ ᠤᠳ ᠢ ᠲᠠᠨᠢ ᠰᠠᠬᠢᠭᠴᠢᠳ ᠲᠤ ᠭᠡᠷᠡ ᠪᠠ ᠬᠠᠢᠷᠠ ᠡᠨᠡᠷᠢᠯ ᠢᠶᠠᠨ ᠰᠠᠬᠢᠳᠠᠭ᠃ 5 ᠪᠢᠳᠡ ᠨᠢᠭᠦᠯ ᠦᠢᠯᠡᠳᠴᠦ ᠪᠤᠷᠤᠭᠤᠳᠠᠭᠰᠠᠨ᠂ ᠬᠣᠷᠣᠨ ᠮᠠᠭᠤ ᠶᠢ ᠦᠢᠯᠡᠳᠦᠨ ᠲᠡᠷᠰᠯᠡᠵᠦ᠂ ᠲᠠᠨ ᠤ ᠲᠤᠰᠢᠶᠠᠯ ᠪᠣᠯᠣᠨ ᠲᠣᠭᠲᠠᠭᠠᠯ ᠤᠳ ᠠᠴᠠ ᠬᠣᠯᠠᠳᠠᠭᠰᠠᠨ ᠪᠢᠯᠡ᠃ 6 ᠲᠠᠨ ᠤ ᠵᠠᠷᠤᠴᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠠᠨ ᠤ ᠨᠡᠷᠡ ᠪᠡᠷ ᠪᠢᠳᠡᠨ ᠦ ᠬᠠᠭᠠᠳ ᠨᠣᠶᠠᠳ᠂ ᠡᠴᠢᠭᠡ ᠡᠪᠦᠭᠡᠳ ᠬᠢᠭᠡᠳ ᠨᠤᠲᠤᠭ ᠤᠨ ᠪᠦᠬᠦ ᠠᠷᠠᠳ ᠣᠯᠠᠨ ᠳᠤ ᠶᠠᠷᠢᠭᠰᠠᠨ ᠪᠣᠯᠪᠠᠴᠤ ᠪᠢᠳᠡ ᠰᠣᠨᠣᠰᠣᠭᠠ ᠦᠭᠡᠢ᠃
7 ᠡᠵᠡᠨ ᠮᠢᠨᠢ᠂ ᠵᠥᠪ ᠨᠢ ᠲᠠᠨ ᠳᠤ ᠪᠠᠢᠬᠤ ᠳᠤ᠂ ᠬᠠᠷᠢᠨ ᠪᠢᠳᠡ ᠥᠨᠥᠳᠥᠷ ᠨᠢᠭᠤᠷ ᠦᠭᠡᠢ ᠪᠣᠯᠵᠠᠢ᠃ ᠶᠦᠳᠠᠴᠤᠳ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠲᠠᠨ ᠠᠴᠠ ᠤᠷᠪᠠᠵᠤ᠂ ᠲᠠᠨ ᠳᠤ ᠬᠥᠭᠡᠭᠡᠭᠳᠡᠨ ᠣᠢᠷᠠ ᠬᠣᠯᠠ ᠶᠢᠨ ᠠᠯᠢᠪᠠ ᠭᠠᠵᠠᠷ ᠤᠷᠤᠭᠤ ᠶᠠᠪᠤᠭᠰᠠᠨ ᠪᠦᠬᠦ ᠢᠰᠷᠧᠯ ᠢᠴᠢᠭᠦᠷᠢ ᠳᠤ ᠣᠷᠣᠭᠰᠠᠨ ᠪᠠᠢᠨᠠ᠃ 8 ᠶᠣᠬᠣᠸᠠ᠂ ᠪᠢᠳᠡ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠪᠣᠯᠬᠣᠷ ᠮᠠᠨ ᠤ ᠬᠠᠭᠠᠳ ᠨᠣᠶᠠᠳ᠂ ᠡᠴᠢᠭᠡ ᠡᠪᠦᠭᠡᠳ ᠢᠴᠢᠭᠦᠷᠢ ᠳᠤ ᠣᠷᠣᠵᠠᠢ᠃ 9 ᠥᠷᠥᠰᠢᠶᠡᠯ ᠪᠠ ᠠᠭᠤᠴᠢᠯᠠᠯ ᠨᠢ ᠪᠢᠳᠡᠨ ᠦ ᠡᠵᠡᠨ ᠪᠤᠷᠬᠠᠨ ᠳᠤ ᠪᠤᠢ᠂ ᠬᠠᠷᠢᠨ ᠪᠢᠳᠡ ᠲᠠᠨ ᠠᠴᠠ ᠲᠡᠷᠰᠯᠡᠭᠰᠡᠨ᠃ 10 ᠪᠢᠳᠡ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ᠂ ᠲᠡᠭᠦᠨ ᠦ ᠵᠠᠷᠤᠴᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢᠶᠠᠷ ᠢᠶᠠᠨ ᠳᠠᠮᠵᠢᠭᠤᠯᠤᠭᠰᠠᠨ ᠰᠤᠷᠭᠠᠯ ᠢ ᠵᠢᠷᠤᠮᠯᠠᠭᠰᠠᠨ ᠦᠭᠡᠢ᠃
11 ᠪᠦᠬᠦ ᠢᠰᠷᠧᠯ ᠲᠠᠨ ᠳᠤ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ᠂ ᠲᠠᠨ ᠤ ᠰᠤᠷᠭᠠᠯ ᠠᠴᠠ ᠵᠥᠷᠢᠴᠡᠨ ᠭᠠᠵᠢᠭᠰᠠᠨ᠂ ᠪᠤᠷᠬᠠᠨ ᠤ ᠵᠠᠷᠤᠴᠠ ᠮᠣᠰᠧ ᠶᠢᠨ ᠬᠠᠤᠯᠢ ᠳᠤ ᠪᠢᠴᠢᠭᠳᠡᠭᠰᠡᠨ ᠲᠠᠩ᠋ᠭᠠᠷᠢᠭ ᠲᠠᠢ ᠬᠠᠷᠢᠶᠠᠯ ᠪᠢᠳᠡᠨ ᠦ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠨᠢ ᠪᠢᠳᠡ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠤᠴᠢᠷ ᠠᠴᠠ ᠶᠤᠮ᠃ 12 ᠲᠠ ᠶᠡᠬᠡ ᠭᠠᠮᠰᠢᠭ ᠪᠠᠭᠤᠯᠭᠠᠵᠤ᠂ ᠪᠢᠳᠡᠨ ᠳᠦ ᠪᠣᠯᠣᠨ ᠪᠢᠳᠡᠨ ᠦ ᠵᠠᠬᠢᠷᠤᠭᠴᠢᠳ ᠲᠤ ᠠᠢᠯᠠᠳᠤᠭᠰᠠᠨ ᠦᠭᠡ ᠪᠡᠨ ᠪᠡᠶᠡᠯᠡᠭᠦᠯᠵᠡᠢ᠃ ᠦᠨᠡᠬᠡᠷ ᠶᠧᠷᠦ᠋ᠰᠠᠯᠧᠮ ᠳᠤ ᠪᠣᠯᠣᠭᠰᠠᠨ ᠰᠢᠭ᠋ ᠶᠠᠪᠤᠳᠠᠯ ᠲᠩᠷᠢ ᠶᠢᠨ ᠳᠣᠣᠷᠠ ᠬᠠᠮᠢᠭᠠ ᠴᠤ ᠪᠣᠯᠵᠤ ᠪᠠᠢᠭᠠ ᠦᠭᠡᠢ᠃ 13 ᠮᠣᠰᠧ ᠶᠢᠨ ᠬᠠᠤᠯᠢ ᠳᠤ ᠪᠢᠴᠢᠭᠳᠡᠭᠰᠡᠨ ᠶᠣᠰᠣᠭᠠᠷ ᠡᠨᠡ ᠪᠦᠬᠦ ᠭᠠᠮᠰᠢᠭ ᠪᠢᠳᠡᠨ ᠦ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠪᠣᠯᠪᠠᠴᠤ ᠪᠢᠳᠡ ᠭᠡᠮ ᠪᠤᠷᠤᠭᠤ ᠠᠴᠠ ᠪᠠᠨ ᠡᠷᠭᠢᠬᠦ ᠪᠤᠶᠤ ᠲᠠᠨ ᠤ ᠦᠨᠡᠨ ᠡᠴᠡ ᠤᠬᠠᠭᠠᠷᠠᠯ ᠢ ᠣᠯᠬᠤ ᠪᠠᠷ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠥᠷᠥᠰᠢᠶᠡᠯ ᠢ ᠭᠤᠶᠤᠭᠠ ᠦᠭᠡᠢ᠃ 14 ᠶᠣᠬᠣᠸᠠ ᠭᠠᠮᠰᠢᠭ ᠢ ᠬᠠᠳᠠᠭᠠᠯᠠᠵᠤ ᠪᠠᠢᠭᠰᠠᠨ ᠢᠶᠠᠨ ᠪᠢᠳᠡᠨ ᠦ ᠳᠡᠭᠡᠷᠡ ᠪᠠᠭᠤᠯᠭᠠᠭᠰᠠᠨ᠃ ᠪᠢᠳᠡ ᠲᠡᠭᠦᠨ ᠦ ᠳᠠᠭᠤ ᠳᠤ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠪᠠᠢᠭᠰᠠᠨ ᠪᠣᠯ᠂ ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠬᠢᠭᠰᠡᠨ ᠪᠦᠬᠦ ᠦᠢᠯᠡ ᠳᠡᠭᠡᠨ ᠵᠥᠪ ᠰᠢᠳᠤᠷᠭᠤ ᠪᠠᠢᠵᠠᠢ᠃
15 ᠬᠦᠴᠦᠷᠬᠡᠭ ᠮᠤᠲᠤᠷ ᠢᠶᠠᠷ ᠢᠶᠠᠨ ᠥᠪᠡᠷ ᠦᠨ ᠢᠶᠠᠨ ᠠᠷᠠᠳ ᠲᠦᠮᠡᠨ ᠢ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠨ᠂ ᠥᠪᠡᠷ ᠢ ᠪᠠᠨ ᠥᠨᠥᠳᠥᠷ ᠦᠨ ᠬᠢ ᠰᠢᠭ ᠨᠡᠷᠡ ᠠᠯᠳᠠᠷ ᠲᠠᠢ ᠪᠣᠯᠭᠠᠭᠰᠠᠨ ᠪᠢᠳᠡᠨ ᠦ ᠡᠵᠡᠨ ᠪᠤᠷᠬᠠᠨ ᠡ᠂ ᠪᠢᠳᠡ ᠨᠢᠭᠦᠯ ᠦᠢᠯᠡᠳᠴᠦ᠂ ᠭᠡᠮ ᠪᠤᠷᠤᠭᠤ ᠲᠠᠢ ᠪᠣᠯᠵᠠᠢ᠃ 16 ᠡᠵᠡᠨ ᠮᠢᠨᠢ᠂ ᠪᠦᠬᠦ ᠵᠥᠪ ᠦᠢᠯᠡ ᠶᠢᠨ ᠢᠶᠠᠨ ᠳᠠᠭᠠᠤ ᠥᠪᠡᠷ ᠦᠨ ᠢᠶᠠᠨ ᠬᠣᠲᠠ ᠶᠧᠷᠦ᠋ᠰᠠᠯᠧᠮ᠂ ᠥᠪᠡᠷ ᠦᠨ ᠢᠶᠠᠨ ᠠᠷᠢᠭᠤᠨ ᠠᠭᠤᠯᠠᠨ ᠠᠴᠠ ᠠᠭᠤᠷ ᠬᠢᠯᠢᠩ ᠢᠶᠠᠨ ᠪᠤᠴᠠᠭᠠᠵᠤ ᠠᠪᠤᠨᠠ ᠤᠤ︖ ᠥᠪᠡᠷᠰᠡᠳ ᠦᠨ ᠮᠢᠨᠢ ᠨᠢᠭᠦᠯ ᠪᠣᠯᠣᠨ ᠡᠴᠢᠭᠡ ᠡᠪᠦᠭᠡᠳ ᠦᠨ ᠮᠢᠨᠢ ᠭᠡᠮ ᠪᠤᠷᠤᠭᠤ ᠠᠴᠠ ᠪᠣᠯᠵᠤ᠂ ᠶᠧᠷᠦ᠋ᠰᠠᠯᠧᠮ ᠪᠠ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠪᠠᠨ ᠪᠦᠭᠦᠳᠡ ᠳᠦ ᠳᠣᠭᠣᠭᠢ ᠪᠣᠯᠣᠭᠰᠠᠨ ᠶᠤᠮ᠃ 17 ᠪᠢᠳᠡᠨ ᠦ ᠪᠤᠷᠬᠠᠨ᠂ ᠣᠳᠣ ᠵᠠᠷᠤᠴᠠ ᠶᠢᠨ ᠢᠶᠠᠨ ᠳᠠᠭᠠᠳᠬᠠᠯ ᠪᠠ ᠭᠤᠶᠤᠯᠲᠠ ᠶᠢ ᠰᠣᠨᠣᠰᠣᠭᠠᠴᠢ᠂ ᠡᠵᠡᠨ ᠮᠢᠨᠢ᠂ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠡᠵᠡᠭᠦᠢᠷᠡᠭᠰᠡᠨ ᠠᠷᠢᠭᠤᠨ ᠭᠠᠵᠠᠷ ᠲᠠᠭᠠᠨ ᠨᠢᠭᠤᠷ ᠤᠨ ᠢᠶᠠᠨ ᠭᠡᠷᠡᠯ ᠢ ᠲᠤᠰᠬᠠᠭᠠᠴᠢ᠃ 18 ᠪᠤᠷᠬᠠᠨ ᠮᠢᠨᠢ ᠡ᠂ ᠴᠢᠬᠢ ᠪᠠᠨ ᠡᠷᠭᠢᠭᠦᠯᠦᠨ ᠰᠣᠨᠣᠰᠣᠨᠠ ᠤᠤ︕ ᠮᠡᠯᠮᠡᠢ ᠪᠡᠨ ᠨᠡᠭᠡᠭᠡᠵᠦ᠂ ᠥᠪᠡᠷ ᠦᠨ ᠲᠠᠨᠢ ᠨᠡᠷᠡ ᠪᠡᠷ ᠨᠡᠷᠡᠯᠡᠭᠳᠡᠳᠡᠭ ᠬᠣᠲᠠ ᠶᠢᠨ ᠬᠣᠭᠣᠰᠣᠷᠠᠭᠰᠠᠨ ᠪᠠᠢᠳᠠᠯ ᠢ ᠬᠠᠷᠠᠭᠠᠴᠢ᠃ ᠪᠢᠳᠡ ᠵᠥᠪ ᠰᠢᠳᠤᠷᠭᠤ ᠤᠴᠢᠷ ᠠᠴᠠ ᠪᠤᠰᠤ᠂ ᠬᠠᠷᠢᠨ ᠲᠠᠨ ᠤ ᠡᠨᠡᠷᠢᠯ ᠠᠭᠤᠤ ᠪᠣᠯᠬᠣᠷ ᠲᠠᠨ ᠤ ᠡᠮᠦᠨᠡ ᠭᠤᠶᠤᠯᠲᠠ ᠪᠠᠨ ᠡᠷᠭᠦᠵᠦ ᠪᠠᠢᠨᠠ᠃ 19 ᠡᠵᠡᠨ᠂ ᠴᠢᠩᠨᠠᠭᠠᠴᠢ︕ ᠡᠵᠡᠨ᠂ ᠥᠷᠥᠰᠢᠶᠡᠭᠡᠴᠢ︕ ᠡᠵᠡᠨ᠂ ᠰᠣᠨᠣᠰᠣᠭᠠᠳ ᠦᠢᠯᠡᠳᠦᠭᠡᠴᠢ︕ ᠪᠤᠷᠬᠠᠨ ᠮᠢᠨᠢ ᠡ᠂ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠪᠦᠦ ᠬᠣᠢᠰᠢᠯᠠᠭᠤᠯᠤᠭᠠᠴᠢ᠃ ᠲᠠᠨ ᠤ ᠬᠣᠲᠠ ᠪᠣᠯᠣᠨ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠲᠠᠨ ᠤ ᠨᠡᠷᠡ ᠪᠡᠷ ᠨᠡᠷᠡᠯᠡᠭᠳᠡᠳᠡᠭ ᠶᠤᠮ》 ᠭᠡᠪᠡ᠃
ᠳᠠᠯᠠᠨ 《ᠳᠣᠯᠣᠭᠠᠨ》 ᠦᠶᠡ
20 ᠪᠢ ᠶᠠᠷᠢᠵᠤ᠂ ᠳᠠᠭᠠᠳᠬᠠᠭᠰᠠᠭᠠᠷ᠂ ᠥᠪᠡᠷ ᠦᠨ ᠢᠶᠠᠨ ᠪᠣᠯᠣᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠢᠶᠠᠨ ᠨᠢᠭᠦᠯ ᠢ ᠤᠯᠠᠢᠨ᠂ ᠪᠤᠷᠬᠠᠨ ᠤ ᠠᠷᠢᠭᠤᠨ ᠠᠭᠤᠯᠠ ᠶᠢᠨ ᠲᠥᠯᠥᠭᠡ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠡᠮᠦᠨᠡ ᠭᠤᠶᠤᠯᠲᠠ ᠪᠠᠨ ᠡᠷᠭᠦᠵᠦ ᠪᠠᠢᠬᠤ ᠳᠤ᠂ 21 ᠲᠡᠢᠨ ᠬᠦ ᠳᠠᠭᠠᠳᠬᠠᠵᠤ ᠶᠠᠷᠢᠵᠤ ᠯᠠ ᠪᠠᠢᠬᠤ ᠳᠤ᠂ ᠤᠷᠢᠳᠤ ᠶᠢᠨ ᠦᠵᠡᠭᠳᠡᠯ ᠳᠣᠲᠣᠷᠠ ᠦᠵᠡᠭᠰᠡᠨ ᠬᠥᠮᠦᠨ ᠭᠠᠪᠷᠢᠶᠧᠯ ᠣᠷᠣᠢ ᠶᠢᠨ ᠲᠠᠬᠢᠯ ᠡᠷᠭᠦᠬᠦ ᠦᠶᠡ ᠳᠦ ᠨᠠᠳᠠ ᠤᠷᠤᠭᠤ ᠶᠠᠭᠠᠷᠠᠨ ᠨᠢᠰᠴᠦ ᠢᠷᠡᠯᠡ᠃ 22 ᠲᠡᠷᠡ ᠨᠠᠳᠠ ᠳᠤ ᠣᠢᠯᠠᠭᠠᠭᠤᠯᠬᠤ ᠪᠠᠷ ᠨᠠᠳᠠ ᠲᠠᠢ ᠶᠠᠷᠢᠨ᠄ 《ᠳ᠋ᠠᠨᠢᠶᠧᠯ ᠡ᠂ ᠣᠳᠣ ᠪᠢ ᠴᠢᠮᠠ ᠳᠤ ᠮᠡᠷᠭᠡᠨ ᠤᠬᠠᠭᠠᠨ ᠪᠠ ᠤᠬᠠᠭᠠᠮᠵᠢ ᠶᠢ ᠣᠯᠭᠣᠬᠤ ᠪᠠᠷ ᠢᠷᠡᠯᠡ᠃ 23 ᠭᠤᠶᠤᠵᠤ ᠡᠬᠢᠯᠡᠩᠭᠦᠲᠡ ᠳᠦ ᠴᠢᠨᠢ ᠦᠭᠡ ᠭᠠᠷᠪᠠ᠂ ᠪᠢ ᠲᠡᠭᠦᠨ ᠢ ᠴᠢᠮᠠ ᠳᠤ ᠳᠠᠮᠵᠢᠭᠤᠯᠬᠤ ᠪᠠᠷ ᠢᠷᠡᠭᠰᠡᠨ᠃ ᠴᠢ ᠪᠣᠯ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ ᠬᠥᠮᠦᠨ᠂ ᠡᠢᠮᠦ ᠡᠴᠡ ᠴᠢ ᠡᠨᠡ ᠦᠭᠡ ᠶᠢ ᠲᠤᠩ᠋ᠭᠠᠵᠤ᠂ ᠦᠵᠡᠭᠳᠡᠯ ᠢ ᠣᠢᠯᠠᠭᠠ᠃
24 ᠪᠤᠷᠬᠠᠨ ᠬᠢᠯᠢᠨᠴᠡ ᠶᠢ ᠳᠠᠭᠤᠰᠬᠠᠬᠤ᠂ ᠨᠢᠭᠦᠯ ᠢ ᠲᠡᠭᠦᠰᠬᠡᠬᠦ᠂ ᠭᠡᠮ ᠪᠤᠷᠤᠭᠤ ᠶᠢ ᠬᠡᠯᠲᠦᠷᠢᠭᠦᠯᠬᠦ᠂ ᠮᠥᠩᠬᠡ ᠶᠢᠨ ᠵᠥᠪᠲᠦ ᠪᠠᠢᠳᠠᠯ ᠢ ᠠᠪᠴᠢᠷᠠᠬᠤ᠂ ᠦᠵᠡᠭᠳᠡᠯ ᠪᠠ ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢ ᠪᠢᠲᠡᠭᠦᠮᠵᠢᠯᠡᠬᠦ᠂ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠨᠢᠭᠡᠨ ᠢ ᠲᠣᠰᠣᠯᠠᠬᠤ ᠶᠢᠨ ᠲᠤᠯᠠᠳᠠ ᠴᠢᠨᠦ ᠠᠷᠠᠳ ᠲᠦᠮᠡᠨ᠂ ᠴᠢᠨᠦ ᠠᠷᠢᠭᠤᠨ ᠬᠣᠲᠠ ᠶᠢᠨ ᠳᠡᠭᠡᠷᠡ ᠳᠠᠯᠠᠨ 〈ᠳᠣᠯᠣᠭᠠᠨ ᠦᠶᠡ〉 ᠶᠢ ᠲᠣᠭᠲᠠᠭᠠᠭᠰᠠᠨ ᠲᠤᠯᠠ 25 ᠶᠧᠷᠦ᠋ᠰᠠᠯᠧᠮ ᠢ ᠰᠡᠷᠭᠦᠭᠡᠵᠦ ᠪᠣᠰᠬᠠᠬᠤ ᠵᠠᠷᠯᠢᠭ ᠭᠠᠷᠭᠠᠬᠤ ᠴᠠᠭ ᠠᠴᠠ ᠡᠬᠢᠯᠡᠨ ᠵᠠᠬᠢᠷᠤᠭᠴᠢ ᠮᠧᠰᠢᠶᠠ 5 ᠢᠷᠡᠬᠦ ᠬᠦᠷᠲᠡᠯᠡ ᠳᠣᠯᠣᠭᠠᠨ ᠳᠣᠯᠣᠭᠠᠨ ᠦᠶᠡ ᠪᠣᠯᠣᠨ ᠵᠢᠷᠠᠨ ᠬᠣᠶᠠᠷ ᠳᠣᠯᠣᠭᠠᠨ ᠦᠶᠡ ᠥᠩᠭᠡᠷᠡᠨᠡ ᠭᠡᠳᠡᠭ ᠢ ᠴᠢ ᠮᠡᠳᠡᠵᠦ ᠦᠢᠯᠠᠭᠠ᠃ ᠵᠣᠪᠠᠯᠠᠩ ᠤᠨ ᠴᠠᠭ ᠲᠤ ᠴᠤ ᠭᠡᠰᠡᠨ ᠶᠧᠷᠦ᠋ᠰᠠᠯᠧᠮ ᠲᠠᠯᠠᠪᠠᠢ ᠰᠤᠪᠠᠭ ᠲᠠᠢ ᠪᠠᠨ ᠳᠠᠬᠢᠨ ᠪᠣᠰᠬᠠᠭᠳᠠᠨᠠ᠃ 26 ᠬᠠᠷᠢᠨ ᠵᠢᠷᠠᠨ ᠬᠣᠶᠠᠷ ᠳᠣᠯᠣᠭᠠᠨ ᠦᠶᠡ ᠶᠢᠨ ᠳᠠᠷᠠᠭᠠ ᠮᠧᠰᠢᠶᠠ ᠲᠠᠰᠤᠯᠤᠭᠳᠠᠨᠠ᠂ ᠲᠡᠭᠦᠨ ᠳᠦ ᠦᠭᠡᠢ 6 ᠃ ᠬᠣᠵᠢᠮ ᠢᠷᠡᠬᠦ ᠵᠠᠬᠢᠷᠤᠭᠴᠢ ᠶᠢᠨ ᠠᠷᠠᠳ ᠲᠦᠮᠡᠨ ᠬᠣᠲᠠ ᠶᠢ ᠠᠷᠢᠭᠤᠨ ᠭᠠᠵᠠᠷ ᠲᠠᠢ ᠬᠠᠮᠲᠤ ᠤᠰᠠᠳᠬᠠᠨᠠ᠃ ᠲᠡᠭᠦᠨ ᠦ ᠲᠡᠭᠦᠰᠬᠡᠯ ᠦᠶᠡᠷ ᠮᠡᠲᠦ ᠢᠷᠡᠨᠡ᠂ ᠳᠠᠢᠨ ᠡᠴᠦᠰ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠨᠡ᠂ ᠬᠣᠭᠣᠰᠣᠷᠠᠯ ᠲᠣᠭᠲᠠᠭᠠᠭᠳᠠᠭᠰᠠᠨ ᠪᠠᠢᠨᠠ᠃ 27 ᠲᠡᠷᠡ ᠪᠡᠷ ᠣᠯᠠᠨ ᠲᠠᠢ ᠨᠢᠭᠡ ᠳᠣᠯᠣᠭᠠᠨ ᠦᠶᠡ ᠶᠢᠨ ᠪᠠᠲᠤ ᠭᠡᠷᠡ ᠶᠢ ᠪᠠᠢᠭᠤᠯᠵᠤ᠂ ᠨᠢᠭᠡ ᠳᠣᠯᠣᠭᠠᠨ ᠦᠶᠡ ᠶᠢᠨ ᠳᠤᠮᠳᠠ ᠲᠠᠬᠢᠯ ᠪᠣᠯᠣᠨ ᠡᠷᠭᠦᠯ ᠢ ᠬᠣᠷᠢᠭᠯᠠᠨᠠ᠃ ᠰᠦᠢᠷᠡᠯ ᠢ ᠠᠪᠴᠢᠷᠠᠬᠤ ᠵᠢᠭᠰᠢᠭᠦᠷᠢᠲᠦ ᠵᠦᠢᠯᠡᠰ ᠵᠢᠭᠦᠷ ᠦᠨ ᠳᠡᠭᠡᠷᠡ ᠪᠠᠢᠭᠰᠠᠭᠠᠷ᠂ ᠲᠣᠪᠯᠠᠭᠳᠠᠭᠰᠠᠨ ᠲᠡᠭᠦᠰᠬᠡᠯ ᠰᠦᠢᠷᠡᠭᠦᠯᠦᠭᠴᠢ ᠶᠢᠨ ᠳᠡᠭᠡᠷᠡ ᠴᠢᠳᠬᠤᠭᠳᠠᠬᠤ ᠬᠦᠷᠲᠡᠯᠡ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃