ᠳ᠋ᠠᠨᠢᠶᠧᠯ ᠲᠠᠪᠤ
ᠬᠠᠨᠠᠨ ᠳᠡᠭᠡᠷᠡᠬᠢ ᠪᠢᠴᠢᠭ
1 ᠪᠧᠯᠱᠠᠽᠠᠷ ᠬᠠᠭᠠᠨ ᠮᠢᠩ᠋ᠭᠠᠨ ᠨᠣᠶᠠᠨ ᠳᠠᠭᠠᠨ ᠵᠣᠷᠢᠭᠤᠯᠤᠨ ᠶᠡᠬᠡ ᠨᠠᠢᠷ ᠬᠢᠵᠦ᠂ ᠲᠡᠷᠡ ᠮᠢᠩ᠋ᠭᠠ ᠲᠠᠢ ᠪᠠᠨ ᠬᠠᠮᠲᠤ ᠳᠠᠷᠠᠰᠤ ᠤᠤᠭᠤᠵᠤ ᠪᠠᠢᠪᠠ᠃ 2 ᠪᠧᠯᠱᠠᠽᠠᠷ ᠳᠠᠷᠠᠰᠤᠨ ᠳᠤ ᠬᠠᠯᠠᠭᠠᠳ᠂ ᠡᠴᠢᠭᠡ ᠨᠧᠪᠦ᠋ᠺᠠᠨᠧᠽᠠᠷ ᠤᠨ ᠢᠶᠠᠨ ᠶᠧᠷᠦ᠋ᠰᠠᠯᠧᠮ ᠤᠨ ᠣᠷᠳᠣᠨ ᠠᠴᠠ ᠲᠣᠨᠣᠭᠰᠠᠨ ᠠᠯᠲᠠ ᠮᠥᠩᠭᠥᠨ ᠬᠤᠨᠳᠠᠭᠠ ᠶᠢ ᠠᠪᠴᠢᠷᠠᠭᠤᠯᠬᠤ ᠪᠠᠷ ᠲᠤᠰᠢᠶᠠᠪᠠ᠃ ᠬᠠᠭᠠᠨ ᠪᠡᠷ ᠨᠣᠶᠠᠳ᠂ ᠬᠠᠲᠤᠳ ᠪᠣᠯᠣᠨ ᠲᠠᠲᠠᠪᠤᠷᠢ ᠡᠮᠡᠰ ᠢᠶᠡᠨ ᠲᠡᠳᠡᠭᠡᠷ ᠬᠤᠨᠳᠠᠭᠠ ᠪᠠᠷ ᠤᠤᠭᠤᠯᠭᠠᠬᠤ ᠭᠡᠰᠡᠨ ᠠᠵᠢ᠃ 3 ᠲᠡᠳᠡ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠡᠴᠡ ᠲᠣᠨᠣᠭᠰᠠᠨ ᠠᠯᠲᠠᠨ ᠬᠤᠨᠳᠠᠭᠠ ᠶᠢ ᠠᠪᠴᠢᠷᠠᠭᠰᠠᠨ ᠳᠤ᠂ ᠬᠠᠭᠠᠨ ᠪᠣᠯᠣᠨ ᠲᠡᠭᠦᠨ ᠦ ᠨᠣᠶᠠᠳ᠂ ᠬᠠᠲᠤᠳ ᠪᠣᠯᠣᠨ ᠲᠠᠲᠠᠪᠤᠷᠢ ᠡᠮᠡᠰ ᠲᠡᠳᠡᠭᠡᠷ ᠬᠤᠨᠳᠠᠭᠠ ᠪᠠᠷ ᠤᠤᠭᠤᠵᠠᠭᠠᠵᠠᠢ᠃ 4 ᠲᠡᠳᠡ ᠳᠠᠷᠠᠰᠤ ᠤᠤᠭᠤᠭᠠᠳ ᠠᠯᠲᠠ᠂ ᠮᠥᠩᠭᠥ᠂ ᠬᠦᠷᠡᠯ᠂ ᠲᠡᠮᠦᠷ᠂ ᠮᠣᠳᠣ᠂ ᠴᠢᠯᠠᠭᠤᠨ ᠪᠤᠷᠬᠠᠳ ᠢ ᠮᠠᠭᠲᠠᠵᠠᠭᠠᠪᠠ᠃
5 ᠶᠠᠭ ᠲᠡᠷᠡ ᠴᠠᠭ ᠲᠤ ᠬᠥᠮᠦᠨ ᠦ ᠭᠠᠷ ᠤᠨ ᠬᠤᠷᠤᠭᠤ ᠨᠤᠭᠤᠳ ᠦᠵᠡᠭᠳᠡᠵᠦ᠂ ᠳ᠋ᠧᠩ ᠤᠨ ᠬᠠᠵᠠᠭᠤ ᠲᠠᠯᠠ ᠳᠤ᠂ ᠬᠠᠭᠠᠨ ᠤ ᠣᠷᠳᠣᠨ ᠤ ᠰᠢᠪᠠᠭᠠᠰᠤᠨ ᠬᠠᠨᠠᠨ ᠳᠡᠭᠡᠷᠡ ᠶᠠᠭᠤᠮᠠ ᠪᠢᠴᠢᠵᠦ ᠡᠬᠢᠯᠡᠪᠡ᠃ ᠬᠠᠭᠠᠨ ᠪᠢᠴᠢᠵᠦ ᠪᠠᠢᠭᠠ ᠭᠠᠷ 3 ᠢ ᠬᠠᠷᠠᠵᠤ ᠪᠠᠢᠯᠠ᠃ 6 ᠲᠡᠭᠡᠭᠡᠳ ᠬᠠᠭᠠᠨ ᠤ ᠴᠢᠷᠠᠢ ᠴᠣᠩᠬᠢᠢᠵᠤ᠂ ᠵᠢᠷᠦᠬᠡ ᠨᠢ ᠲᠦᠭᠰᠢᠨ᠂ ᠦᠶᠡ ᠮᠥᠴᠡ ᠨᠢ ᠰᠤᠯᠠᠷᠠᠵᠤ᠂ ᠡᠪᠦᠳᠦᠭ ᠨᠢ ᠴᠡᠴᠡᠷᠡᠵᠦ ᠪᠠᠢᠯᠠ᠃ 7 ᠬᠠᠭᠠᠨ ᠴᠢᠩᠭ᠍ᠠ ᠪᠠᠷ ᠬᠠᠰᠬᠢᠷᠤᠨ ᠵᠢᠷᠤᠬᠠᠢᠴᠢᠳ᠂ ᠮᠡᠷᠭᠡᠳ᠂ ᠲᠥᠯᠭᠡᠴᠢᠳ ᠢ ᠢᠷᠡᠭᠦᠯᠵᠦ᠂ ᠪᠠᠪᠢᠯᠣᠨ ᠤ ᠮᠡᠷᠭᠡᠨ ᠬᠥᠮᠦᠰ ᠲᠡᠭᠡᠨ᠄ 《ᠬᠡᠨ ᠡᠨᠡ ᠪᠢᠴᠢᠭᠡᠰᠦ ᠶᠢ ᠤᠩ᠋ᠰᠢᠵᠤ᠂ ᠤᠳᠬᠠ ᠶᠢ ᠨᠢ ᠲᠠᠢᠯᠪᠤᠷᠢᠯᠠᠵᠤ ᠴᠢᠳᠠᠪᠠᠯ᠂ ᠲᠡᠭᠦᠨ ᠳᠦ ᠨᠢᠯ ᠶᠠᠭᠠᠨ ᠳᠡᠪᠡᠯ ᠡᠮᠦᠰᠬᠡᠵᠦ᠂ ᠬᠦᠵᠦᠭᠦᠨ ᠳᠦᠨᠢ ᠠᠯᠲᠠᠨ ᠰᠣᠨᠳᠣᠷ ᠵᠡᠭᠦᠯᠭᠡᠨ᠂ ᠲᠡᠭᠦᠨ ᠢ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠭᠤᠷᠪᠠᠳᠠᠬᠢ ᠵᠠᠬᠢᠷᠤᠭᠴᠢ ᠪᠣᠯᠭᠠᠨᠠ》 ᠭᠡᠪᠡ᠃ 8 ᠲᠡᠷᠡ ᠦᠶᠡ ᠳᠦ ᠬᠠᠭᠠᠨ ᠤ ᠪᠦᠬᠦ ᠮᠡᠷᠭᠡᠳ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠲᠡᠳᠡ ᠪᠢᠴᠢᠭᠡᠰᠦ ᠶᠢ ᠤᠩ᠋ᠰᠢᠵᠤ᠂ ᠤᠳᠬᠠ ᠶᠢ ᠨᠢ ᠬᠠᠭᠠᠨ ᠳᠤ ᠲᠠᠢᠯᠪᠤᠷᠢᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ 9 ᠲᠡᠢᠮᠦ ᠡᠴᠡ ᠪᠧᠯᠱᠠᠽᠠᠷ ᠬᠠᠭᠠᠨ ᠤᠯᠠᠮ ᠲᠦᠭᠰᠢᠵᠦ᠂ ᠴᠢᠷᠠᠢ ᠨᠢ ᠴᠣᠩᠬᠢᠢᠨ᠂ ᠨᠣᠶᠠᠳ ᠨᠢ ᠴᠤ ᠲᠡᠪᠡᠳᠡᠯᠡ᠃
10 ᠬᠠᠭᠠᠨ ᠪᠣᠯᠣᠨ ᠨᠣᠶᠠᠳ ᠤᠨ ᠶᠠᠷᠢᠶᠠ ᠶᠢ ᠡᠬᠡ ᠬᠠᠲᠤᠨ ᠳᠤᠭᠤᠯᠤᠭᠠᠳ ᠨᠠᠢᠷ ᠤᠨ ᠲᠠᠩᠬᠢᠮ ᠳᠤ ᠣᠷᠣᠵᠤ ᠢᠷᠡᠯᠡ᠃ ᠡᠬᠡ ᠬᠠᠲᠤᠨ᠄ 《ᠬᠠᠭᠠᠨᠲᠠᠨ ᠮᠥᠩᠬᠡ ᠨᠠᠰᠤᠯᠠᠲᠤᠭᠠᠢ︕ ᠵᠢᠷᠦᠬᠡ ᠲᠦᠭᠰᠢᠵᠦ᠂ ᠴᠢᠷᠠᠢ ᠴᠣᠩᠬᠢᠢᠬᠤ ᠬᠡᠷᠡᠭ ᠦᠭᠡᠢ᠃ 11 ᠲᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠠᠷᠢᠭᠤᠨ ᠪᠤᠷᠬᠠᠨ ᠤ ᠰᠦᠨᠡᠰᠦ ᠲᠠᠢ ᠨᠢᠭᠡᠨ ᠬᠥᠮᠦᠨ ᠪᠤᠢ᠃ ᠡᠴᠢᠭᠡ ᠶᠢᠨ ᠲᠠᠨᠢ ᠡᠳᠦᠷ ᠤᠳ ᠲᠤ ᠲᠡᠷᠡ ᠬᠥᠮᠦᠨ ᠰᠠᠷᠠᠭᠤᠯ ᠤᠬᠠᠭᠠᠨ᠂ ᠣᠶᠤᠨ ᠪᠢᠯᠢᠭ ᠲᠠᠢ᠂ ᠪᠤᠷᠬᠠᠳ ᠤᠨ ᠬᠢ ᠮᠡᠲᠦ ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ ᠪᠠᠨ ᠬᠠᠷᠠᠭᠤᠯᠤᠭᠰᠠᠨ ᠤᠴᠢᠷ ᠲᠠᠨ ᠤ ᠡᠴᠢᠭᠡ ᠨᠧᠪᠦ᠋ᠺᠠᠨᠧᠽᠠᠷ ᠬᠠᠭᠠᠨ ᠲᠡᠭᠦᠨ ᠢ ᠵᠢᠷᠤᠬᠠᠢᠴᠢᠳ᠂ ᠶᠢᠯᠸᠢᠴᠢᠳ᠂ ᠮᠡᠷᠭᠡᠳ ᠪᠠ ᠲᠥᠯᠭᠡᠴᠢᠳ ᠤᠨ ᠠᠬᠠᠯᠠᠭᠴᠢ ᠪᠠᠷ ᠲᠣᠮᠢᠯᠠᠭᠰᠠᠨ ᠶᠤᠮ᠃ 12 ᠡᠨᠡ ᠳ᠋ᠠᠨᠢᠶᠧᠯ ᠣᠨᠴᠠᠭᠠᠢ ᠰᠦᠨᠡᠰᠦ ᠲᠠᠢ᠂ ᠮᠡᠳᠡᠯᠭᠡ ᠤᠬᠠᠭᠠᠨ ᠲᠠᠢ ᠪᠥᠭᠡᠳ ᠵᠡᠭᠦᠳᠦ ᠲᠠᠢᠯᠵᠤ᠂ ᠪᠢᠲᠡᠭᠦᠯᠢᠭ ᠵᠦᠢᠯᠡᠰ ᠦᠨ ᠤᠴᠢᠷ ᠢ ᠲᠠᠢᠯᠪᠤᠷᠢᠯᠠᠵᠤ᠂ ᠬᠡᠴᠡᠭᠦᠦ ᠠᠰᠠᠭᠤᠳᠠᠯ ᠢ ᠰᠢᠢᠳᠪᠦᠷᠢᠯᠡᠬᠦ ᠴᠢᠳᠠᠪᠤᠷᠢ ᠲᠠᠢ ᠶᠤᠮ᠃ ᠡᠴᠢᠭᠡ ᠬᠠᠭᠠᠨ ᠲᠠᠨᠢ ᠲᠡᠭᠦᠨ ᠢ ᠪᠧᠯᠲ᠋ᠧᠱᠠᠽᠠᠷ ᠭᠡᠵᠦ ᠳᠠᠭᠤᠳᠠᠳᠠᠭ ᠪᠠᠢᠭᠰᠠᠨ᠃ ᠣᠳᠣ ᠡᠨᠡ ᠳ᠋ᠠᠨᠢᠶᠧᠯ ᠢ ᠳᠠᠭᠤᠳᠠᠭᠲᠤᠨ᠂ ᠲᠡᠷᠡ ᠪᠡᠷ ᠲᠠᠢᠯᠤᠯ ᠢ ᠬᠡᠯᠡᠵᠦ ᠥᠭᠭᠥᠨᠡ》 ᠭᠡᠪᠡ᠃
13 ᠢᠩᠭᠢᠭᠡᠳ ᠲᠡᠳᠡ ᠳ᠋ᠠᠨᠢᠶᠧᠯ ᠢ ᠬᠠᠭᠠᠨ ᠤ ᠡᠮᠦᠨᠡ ᠠᠪᠴᠢᠷᠠᠪᠠ᠃ ᠬᠠᠭᠠᠨ ᠳ᠋ᠠᠨᠢᠶᠧᠯ ᠳᠤ᠄ 《ᠬᠠᠭᠠᠨ ᠡᠴᠢᠭᠡ ᠶᠢᠨ ᠮᠢᠨᠢ ᠶᠦᠳᠠ ᠠᠴᠠ ᠠᠪᠴᠢᠷᠠᠭᠰᠠᠨ ᠣᠯᠵᠠᠯᠠᠭᠳᠠᠭᠰᠠᠳ ᠤᠨ ᠨᠢᠭᠡ ᠳ᠋ᠠᠨᠢᠶᠧᠯ ᠴᠢ ᠮᠥᠨ ᠤᠤ︖ 14 ᠴᠢᠮᠠ ᠳᠤ ᠪᠤᠷᠬᠠᠨ ᠤ ᠰᠦᠨᠡᠰᠦ ᠪᠠᠢᠭᠠ ᠤᠴᠢᠷ ᠠᠴᠠ ᠰᠠᠷᠠᠭᠤᠯ ᠤᠬᠠᠭᠠᠨ᠂ ᠣᠶᠤᠨ ᠪᠢᠯᠢᠭ᠂ ᠣᠨᠴᠠᠭᠠᠢ ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ ᠭᠡᠳᠡᠭ ᠢ ᠴᠢᠨᠢ ᠪᠢ ᠰᠣᠨᠣᠰᠣᠯᠠ᠃ 15 ᠡᠳᠦᠭᠡ ᠪᠢ ᠣᠯᠠᠨ ᠮᠡᠷᠭᠡᠨ ᠬᠥᠮᠦᠨ ᠪᠠ ᠵᠢᠷᠤᠬᠠᠢᠴᠢ ᠶᠢ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠢᠷᠡᠭᠦᠯᠵᠦ᠂ 〈ᠡᠨᠡ ᠪᠢᠴᠢᠭᠡᠰᠦ ᠶᠢ ᠤᠩ᠋ᠰᠢᠵᠤ᠂ ᠤᠳᠬᠠ ᠶᠢ ᠨᠢ ᠮᠡᠳᠡᠭᠦᠯ〉 ᠭᠡᠰᠡᠨ ᠪᠣᠯᠪᠠᠴᠤ ᠲᠡᠳᠡ ᠲᠠᠢᠯᠵᠤ ᠴᠢᠳᠠᠭᠠ ᠦᠭᠡᠢ᠃ 16 ᠬᠠᠷᠢᠨ ᠴᠢ ᠲᠠᠢᠯᠤᠯ ᠢ ᠥᠭᠴᠦ᠂ ᠬᠡᠴᠡᠭᠦᠦ ᠠᠰᠠᠭᠤᠳᠠᠯ ᠢ ᠰᠢᠢᠳᠪᠦᠷᠢᠯᠡᠵᠦ ᠴᠢᠳᠠᠳᠠᠭ ᠭᠡᠵᠦ ᠪᠢ ᠰᠣᠨᠣᠰᠣᠯᠠ᠃ ᠬᠡᠷᠪᠡ ᠴᠢ ᠡᠨᠡ ᠪᠢᠴᠢᠭᠡᠰᠦ ᠶᠢ ᠤᠩ᠋ᠰᠢᠵᠤ᠂ ᠤᠳᠬᠠ ᠶᠢ ᠨᠢ ᠮᠡᠳᠡᠭᠦᠯᠵᠦ ᠴᠢᠳᠠᠪᠠᠯ᠂ ᠪᠢ ᠴᠢᠮᠠ ᠳᠤ ᠨᠢᠯ ᠶᠠᠭᠠᠨ ᠳᠡᠪᠡᠯ ᠡᠮᠦᠰᠬᠡᠵᠦ᠂ ᠬᠦᠵᠦᠭᠦᠨ ᠳᠦ ᠴᠢᠨᠢ ᠠᠯᠲᠠᠨ ᠰᠣᠨᠳᠣᠷ ᠵᠡᠭᠦᠯᠭᠡᠵᠦ᠂ ᠴᠢᠮᠠᠶᠢ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠭᠤᠷᠪᠠᠳᠠᠬᠢ ᠵᠠᠬᠢᠷᠤᠭᠴᠢ ᠪᠣᠯᠭᠠᠨᠠ》 ᠭᠡᠪᠡ᠃
17 ᠳ᠋ᠠᠨᠢᠶᠧᠯ ᠬᠠᠭᠠᠨ ᠳᠤ ᠬᠠᠷᠢᠭᠤᠯᠤᠨ᠄ 《ᠪᠡᠯᠡᠭ ᠢᠶᠡᠨ ᠥᠪᠡᠷ ᠲᠡᠭᠡᠨ ᠦᠯᠡᠳᠡᠭᠡᠵᠦ᠂ ᠱᠠᠩᠨᠠᠯ ᠢᠶᠠᠨ ᠥᠭᠡᠷᠡ ᠨᠢᠭᠡᠨ ᠳᠦ ᠥᠭᠭᠥᠭᠡᠴᠢ᠃ ᠬᠠᠷᠢᠨ ᠪᠢ ᠬᠠᠭᠠᠨ ᠤ ᠲᠥᠯᠥᠭᠡ ᠡᠨᠡ ᠪᠢᠴᠢᠭᠡᠰᠦ ᠶᠢ ᠤᠩ᠋ᠰᠢᠵᠤ᠂ ᠤᠳᠬᠠ ᠶᠢ ᠨᠢ ᠮᠡᠳᠡᠭᠦᠯᠦᠶᠡ᠃ 18 ᠬᠠᠭᠠᠨᠲᠠᠨ ᠮᠢᠨᠢ︕ ᠬᠠᠮᠤᠭ ᠤᠨ ᠳᠡᠭᠡᠳᠦ ᠪᠤᠷᠬᠠᠨ ᠲᠠᠨ ᠤ ᠡᠴᠢᠭᠡ ᠨᠧᠪᠦ᠋ᠺᠠᠨᠧᠽᠠᠷ ᠲᠤ ᠬᠠᠭᠠᠨᠴᠢᠯᠠᠯ ᠬᠢᠭᠡᠳ ᠠᠭᠤᠤ ᠰᠦᠷ᠂ ᠢᠷᠠᠭᠤ ᠠᠯᠳᠠᠷ ᠢ ᠰᠣᠶᠣᠷᠬᠠᠭᠰᠠᠨ ᠪᠢᠯᠡ᠃ 19 ᠪᠤᠷᠬᠠᠨ ᠤ ᠲᠡᠭᠦᠨ ᠳᠦ ᠰᠣᠶᠣᠷᠬᠠᠭᠰᠠᠨ ᠠᠭᠤᠤ ᠰᠦᠷ ᠡᠴᠡ ᠪᠣᠯᠵᠤ ᠪᠦᠬᠦ ᠤᠯᠤᠰ᠂ ᠦᠨᠳᠦᠰᠦᠲᠡᠨ ᠪᠠ ᠬᠡᠯᠡᠲᠡᠨ ᠲᠡᠭᠦᠨ ᠦ ᠡᠮᠦᠨᠡ ᠡᠮᠢᠶᠡᠨ ᠴᠡᠴᠡᠷᠡᠭᠰᠡᠨ ᠪᠢᠯᠡ᠃ ᠲᠡᠷᠡ ᠪᠡᠷ ᠬᠦᠰᠡᠭᠰᠡᠨ ᠢᠶᠡᠨ ᠬᠥᠨᠥᠭᠡᠵᠦ᠂ ᠬᠦᠰᠡᠭᠰᠡᠨ ᠢᠶᠡᠨ ᠠᠮᠢᠳᠤ ᠦᠯᠡᠳᠡᠭᠡᠳᠡᠭ᠂ ᠬᠦᠰᠡᠭᠰᠡᠨ ᠢᠶᠡᠨ ᠡᠷᠭᠦᠮᠵᠢᠯᠡᠵᠦ᠂ ᠬᠦᠰᠡᠭᠰᠡᠨ ᠢᠶᠡᠨ ᠤᠭᠴᠠᠷᠠᠭᠤᠯᠳᠠᠭ ᠪᠠᠢᠪᠠ᠃ 20 ᠬᠠᠷᠢᠨ ᠲᠡᠭᠦᠨ ᠦ ᠵᠠᠩ ᠪᠠᠷᠳᠠᠮ᠂ ᠰᠡᠳᠬᠢᠯ ᠬᠠᠲᠠᠭᠤ ᠪᠣᠯᠬᠤ ᠳᠤ᠂ ᠲᠡᠷᠡ ᠬᠠᠭᠠᠨ ᠰᠢᠷᠡᠭᠡᠨ ᠡᠴᠡ ᠪᠡᠨ ᠪᠠᠭᠤᠯᠭᠠᠭᠳᠠᠵᠤ᠂ ᠢᠷᠠᠭᠤ ᠠᠯᠳᠠᠷ ᠢᠶᠠᠨ ᠪᠤᠯᠢᠶᠠᠭᠳᠠᠭᠰᠠᠨ ᠪᠢᠯᠡ᠃ 21 ᠲᠡᠷᠡ ᠪᠡᠷ ᠬᠥᠮᠦᠰ ᠦᠨ ᠳᠤᠮᠳᠠ ᠠᠴᠠ ᠬᠥᠭᠡᠭᠡᠭᠳᠡᠵᠦ᠂ ᠣᠶᠤᠨ ᠰᠠᠨᠠᠭᠠ ᠨᠢ ᠠᠷᠢᠶᠠᠲᠠᠨ ᠤ ᠬᠢ ᠰᠢᠭ᠋ ᠪᠣᠯᠪᠠ᠃ ᠬᠠᠮᠤᠭ ᠤᠨ ᠳᠡᠭᠡᠳᠦ ᠪᠤᠷᠬᠠᠨ ᠬᠥᠮᠦᠨ ᠦ ᠬᠠᠭᠠᠨᠴᠢᠯᠠᠯ ᠢ ᠵᠠᠬᠢᠷᠳᠠᠭ ᠢ᠂ ᠬᠦᠰᠡᠭᠰᠡᠨ ᠬᠥᠮᠦᠨ ᠢᠶᠡᠨ ᠡᠷᠭᠦᠮᠵᠢᠯᠡᠨ ᠲᠡᠭᠦᠨ ᠢ ᠵᠠᠬᠢᠷᠤᠭᠤᠯᠳᠠᠭ ᠢ ᠤᠬᠠᠭᠠᠷᠠᠲᠠᠯᠠ ᠪᠠᠨ ᠲᠡᠷᠡ ᠵᠡᠷᠯᠢᠭ ᠡᠯᠵᠢᠭᠡ ᠲᠠᠢ ᠠᠮᠢᠳᠤᠷᠠᠨ᠂ ᠦᠬᠡᠷ ᠰᠢᠭ ᠡᠪᠡᠰᠦ ᠢᠳᠡᠵᠦ᠂ ᠪᠡᠶᠡ ᠨᠢ ᠲᠩᠷᠢ ᠶᠢᠨ ᠰᠢᠭᠦᠳᠡᠷᠢ ᠳᠤ ᠨᠣᠷᠴᠤ ᠪᠠᠢᠯᠠ᠃ 22 ᠲᠡᠭᠦᠨ ᠦ ᠬᠦᠦ ᠪᠧᠯᠱᠠᠽᠠᠷ ᠡ᠂ ᠲᠠ ᠡᠨᠡ ᠪᠦᠭᠦᠳᠡ ᠶᠢ ᠮᠡᠳᠡᠭᠰᠡᠨ ᠠᠲᠠᠯᠠ ᠪᠠᠨ ᠵᠢᠷᠦᠬᠡ ᠪᠡᠨ ᠳᠠᠷᠤᠤ ᠪᠣᠯᠭᠠᠭᠰᠠᠨ ᠦᠭᠡᠢ᠃ 23 ᠬᠠᠷᠢᠨ ᠲᠩᠷᠢ ᠶᠢᠨ ᠡᠵᠡᠨ ᠦ ᠡᠮᠦᠨᠡ ᠥᠪᠡᠷ ᠢ ᠪᠠᠨ ᠡᠷᠭᠦᠮᠵᠢᠯᠡᠨ᠂ ᠲᠡᠭᠦᠨ ᠦ ᠥᠷᠭᠥᠭᠡᠨ ᠦ ᠬᠤᠨᠳᠠᠭᠠ ᠶᠢ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠠᠪᠴᠢᠷᠠᠭᠤᠯᠵᠤ᠂ ᠲᠡᠳᠡᠭᠡᠷ ᠬᠤᠨᠳᠠᠭᠠ ᠪᠠᠷ ᠲᠠ ᠨᠣᠶᠠᠳ᠂ ᠬᠠᠲᠤᠳ ᠪᠣᠯᠣᠨ ᠲᠠᠲᠠᠪᠤᠷᠢ ᠡᠮᠡᠰ ᠲᠡᠢ ᠪᠡᠨ ᠬᠠᠮᠲᠤ ᠳᠠᠷᠠᠰᠤ ᠤᠤᠭᠤᠵᠤ ᠪᠠᠢᠭᠰᠠᠨ᠃ ᠲᠠᠨ ᠤ ᠠᠮᠢ ᠪᠣᠯᠣᠨ ᠪᠦᠬᠦ ᠵᠠᠮ ᠢ ᠮᠤᠲᠤᠷ ᠲᠠᠭᠠᠨ ᠠᠳᠬᠤᠳᠠᠭ ᠪᠤᠷᠬᠠᠨ ᠢ ᠲᠠ ᠠᠯᠳᠠᠷᠰᠢᠭᠤᠯᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠬᠠᠷᠠᠳᠠᠭ ᠦᠭᠡᠢ᠂ ᠰᠣᠨᠣᠰᠳᠠᠭ ᠦᠭᠡᠢ᠂ ᠮᠡᠳᠡᠳᠡᠭ ᠦᠭᠡᠢ ᠠᠯᠲᠠ᠂ ᠮᠥᠩᠭᠥ᠂ ᠬᠦᠷᠡᠯ᠂ ᠲᠡᠮᠦᠷ᠂ ᠮᠣᠳᠣ᠂ ᠴᠢᠯᠠᠭᠤᠨ ᠪᠤᠷᠬᠠᠳ ᠢ ᠮᠠᠭᠲᠠᠭᠰᠠᠨ ᠪᠢᠯᠡ᠃
24 ᠡᠢᠮᠦ ᠡᠴᠡ ᠪᠤᠷᠬᠠᠨ ᠨᠥᠭᠥᠭᠡ ᠭᠠᠷ ᠢ ᠢᠯᠡᠭᠡᠵᠦ᠂ ᠡᠨᠡ ᠪᠢᠴᠢᠭᠡᠰᠦ ᠶᠢ ᠪᠢᠴᠢᠭᠦᠯᠦᠭᠰᠡᠨ ᠶᠤᠮ᠃ 25 ᠪᠢᠴᠢᠭᠳᠡᠭᠰᠡᠨ ᠵᠦᠢᠯ ᠨᠢ ᠡᠢᠮᠦ ᠪᠠᠢᠨᠠ᠄ 〈ᠮᠧᠨᠧ᠂ ᠮᠧᠨᠧ᠂ ᠲᠧᠺᠧᠯ᠂ ᠫᠠᠷᠰᠢᠨ〉᠃ 26 ᠲᠡᠳᠡᠭᠡᠷ ᠦᠨ ᠤᠳᠬᠠ ᠨᠢ ᠭᠡᠪᠡᠯ᠄ 〈ᠮᠧᠨᠧ〉 ᠭᠡᠳᠡᠭ ᠨᠢ ᠪᠤᠷᠬᠠᠨ ᠲᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠡᠳᠦᠷ ᠤᠳ ᠢ ᠲᠣᠭᠠᠯᠠᠵᠤ᠂ ᠲᠡᠭᠦᠨ ᠢ ᠳᠠᠭᠤᠰᠬᠠᠭᠰᠠᠨ᠂ 27 〈ᠲᠧᠺᠧᠯ〉 ᠭᠡᠳᠡᠭ ᠨᠢ ᠬᠠᠭᠠᠨ ᠲᠠᠨ ᠢ ᠵᠢᠩᠯᠡᠭᠦᠷ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠳᠤ᠂ ᠲᠠ ᠬᠡᠮᠵᠢᠶᠡᠨ ᠳᠦ ᠬᠦᠷᠦᠭᠰᠡᠨ ᠦᠭᠡᠢ᠂ 28 〈ᠫᠧᠷᠰ〉 ᠭᠡᠳᠡᠭ ᠨᠢ ᠲᠠᠨ ᠤ ᠬᠠᠭᠠᠨᠴᠢᠯᠠᠯ ᠬᠤᠪᠢᠶᠠᠭᠳᠠᠵᠤ᠂ ᠮᠧᠳᠧ ᠪᠠ ᠫᠧᠷᠰᠴᠤᠳ ᠤᠨ ᠭᠠᠷ ᠲᠤ ᠣᠷᠣᠭᠰᠠᠨ ᠭᠡᠰᠡᠨ ᠤᠳᠬᠠ ᠲᠠᠢ》 ᠭᠡᠪᠡ᠃
29 ᠪᠧᠯᠱᠠᠽᠠᠷ ᠳ᠋ᠠᠨᠢᠶᠧᠯ ᠳᠤ ᠨᠢᠯ ᠶᠠᠭᠠᠨ ᠳᠡᠪᠡᠯ ᠡᠮᠦᠰᠬᠡᠵᠦ᠂ ᠬᠦᠵᠦᠭᠦᠨ ᠳᠦᠨᠢ ᠠᠯᠲᠠᠨ ᠰᠣᠨᠳᠣᠷ ᠵᠡᠭᠦᠯᠭᠡᠬᠦ ᠶᠢ ᠲᠤᠰᠢᠶᠠᠵᠤ᠂ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠲᠡᠭᠦᠨ ᠢ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠭᠤᠷᠪᠠᠳᠠᠬᠢ ᠵᠠᠬᠢᠷᠤᠭᠴᠢ ᠪᠣᠯᠭᠠᠪᠠ᠃ 30 ᠶᠠᠭ ᠲᠡᠷᠡ ᠰᠥᠨᠢ ᠨᠢ ᠪᠠᠪᠢᠯᠣᠨ ᠤ ᠬᠠᠭᠠᠨ ᠪᠧᠯᠱᠠᠽᠠᠷ ᠠᠯᠠᠭᠳᠠᠵᠤ᠂ 31 ᠮᠧᠳᠧ ᠬᠥᠮᠦᠨ ᠳ᠋ᠠᠷᠢᠶᠦ᠋ ᠪᠠᠷᠤᠭ ᠵᠢᠷᠠᠨ ᠬᠣᠶᠠᠷ ᠨᠠᠰᠤᠨ ᠳᠠᠭᠠᠨ ᠲᠡᠷᠡ ᠬᠠᠭᠠᠨᠴᠢᠯᠠᠯ ᠢ ᠠᠪᠤᠭᠰᠠᠨ ᠪᠠᠢᠨᠠ᠃