ᠳ᠋ᠠᠨᠢᠶᠧᠯ ᠠᠷᠪᠠᠨ ᠬᠣᠶᠠᠷ
1 ᠲᠡᠷᠡ ᠦᠶᠡ ᠳᠦ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠢ ᠬᠠᠮᠠᠭᠠᠯᠠᠳᠠᠭ ᠶᠡᠬᠡ ᠵᠠᠩᠵᠤᠨ ᠮᠢᠺᠠᠶᠧᠯ ᠪᠣᠰᠬᠤ ᠪᠥᠭᠡᠳ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡᠭᠦᠰᠦᠭᠰᠡᠨ ᠡᠴᠡ ᠬᠣᠢᠰᠢ ᠲᠡᠷᠡ ᠦᠶᠡ ᠬᠦᠷᠲᠡᠯᠡ ᠬᠡᠵᠢᠶᠡ ᠴᠤ ᠪᠠᠢᠭᠠ ᠦᠭᠡᠢ ᠵᠣᠪᠠᠯᠠᠩ ᠤᠨ ᠴᠠᠭ ᠪᠣᠯᠣᠨᠠ᠃ ᠬᠠᠷᠢᠨ ᠲᠡᠷᠡ ᠦᠶᠡ ᠳᠦ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠪᠦᠭᠦᠳᠡ ᠠᠪᠤᠷᠠᠭᠳᠠᠬᠤ ᠪᠣᠯᠣᠨᠠ᠃ 2 ᠭᠠᠵᠠᠷ ᠤᠨ ᠰᠢᠷᠣᠢ ᠳᠣᠣᠷᠠ ᠨᠣᠢᠷᠰᠣᠭᠰᠠᠨ ᠦᠢ ᠣᠯᠠᠨ ᠨᠢ ᠰᠡᠷᠢᠵᠦ᠂ ᠵᠠᠷᠢᠮ ᠨᠢ ᠮᠥᠩᠬᠡ ᠠᠮᠢ ᠲᠠᠢ ᠪᠣᠯᠵᠤ᠂ ᠵᠠᠷᠢᠮ ᠨᠢ ᠢᠴᠢᠭᠦᠷᠢ ᠲᠠᠢ᠂ ᠮᠥᠩᠬᠡ ᠶᠢᠨ ᠭᠤᠲᠤᠮᠰᠢᠭ ᠲᠠᠢ ᠪᠣᠯᠣᠨᠠ᠃ 3 ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ ᠨᠢ ᠲᠩᠷᠢ ᠶᠢᠨ ᠭᠡᠭᠡ ᠮᠡᠲᠦ᠂ ᠣᠯᠠᠨ ᠢ ᠵᠥᠪ ᠵᠠᠮ ᠤᠷᠤᠭᠤ ᠬᠥᠲᠥᠯᠥᠭᠴᠢᠳ ᠨᠢ ᠣᠳᠣ ᠮᠡᠲᠦ ᠡᠭᠦᠷᠢᠳᠡ ᠮᠥᠩᠬᠡ ᠭᠡᠷᠡᠯᠲᠦᠬᠦ ᠪᠣᠯᠣᠨᠠ᠃ 4 ᠬᠠᠷᠢᠨ ᠳ᠋ᠠᠨᠢᠶᠧᠯ ᠴᠢ ᠡᠳᠡᠭᠡᠷ ᠦᠭᠡ ᠶᠢ ᠬᠤᠢᠯᠠᠵᠤ᠂ ᠡᠨᠡ ᠬᠤᠢᠯᠠᠮᠠᠯ ᠢ ᠪᠢᠲᠡᠭᠦᠮᠵᠢᠯᠡᠭᠡᠳ ᠲᠡᠭᠦᠰᠬᠡᠯ ᠦᠨ ᠴᠠᠭ ᠪᠣᠯᠲᠠᠯᠠ ᠬᠠᠳᠠᠭᠠᠯᠠᠭᠲᠤᠨ᠃ ᠣᠯᠠᠨ ᠬᠥᠮᠦᠨ ᠨᠠᠰᠢ ᠴᠠᠰᠢ ᠶᠠᠪᠤᠵᠠᠭᠠᠵᠤ ᠮᠡᠳᠡᠯᠭᠡ ᠨᠢ ᠨᠡᠮᠡᠭᠳᠡᠨᠡ》 ᠭᠡᠵᠦ ᠬᠡᠯᠡᠪᠡ᠃
5 ᠳ᠋ᠠᠨᠢᠶᠧᠯ ᠪᠢ ᠦᠵᠡᠬᠦ ᠳᠦ᠂ ᠥᠭᠡᠷᠡ ᠬᠣᠶᠠᠷ ᠬᠥᠮᠦᠨ ᠪᠠᠢᠭᠰᠠᠨ᠂ ᠨᠢᠭᠡ ᠨᠢ ᠭᠣᠣᠯ ᠤᠨ ᠨᠠᠭᠠᠳᠤ ᠬᠥᠪᠡᠭᠡᠨ ᠳᠦ᠂ ᠨᠥᠭᠥᠭᠡ ᠨᠢ ᠭᠣᠣᠯ ᠤᠨ ᠴᠠᠭᠠᠲᠤ ᠬᠥᠪᠡᠭᠡᠨ ᠳᠦ ᠵᠣᠭᠰᠣᠵᠤ ᠪᠠᠢᠪᠠ᠃ 6 ᠲᠡᠳᠡᠨ ᠦ ᠨᠢᠭᠡ ᠨᠢ ᠭᠣᠣᠯ ᠤᠨ ᠤᠰᠤᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠮᠠᠭᠠᠯᠢᠩ᠋ᠭᠤᠨ ᠬᠤᠪᠴᠠᠰᠤ ᠲᠠᠢ ᠨᠥᠭᠥᠭᠡ ᠬᠥᠮᠦᠨ ᠡᠴᠡ᠄ 《ᠡᠳᠡᠭᠡᠷ ᠭᠠᠢᠬᠠᠮᠰᠢᠭᠲᠤ ᠵᠦᠢᠯ ᠤᠨ ᠲᠡᠭᠦᠰᠬᠡᠯ ᠪᠣᠯᠲᠠᠯᠠ ᠬᠡᠳᠦᠢ ᠤᠳᠠᠬᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 7 ᠭᠣᠣᠯ ᠤᠨ ᠤᠰᠤᠨ ᠳᠡᠭᠡᠷᠡ ᠵᠣᠭᠰᠣᠭᠰᠠᠨ᠂ ᠮᠠᠭᠠᠯᠢᠩ᠋ᠭᠤᠨ ᠬᠤᠪᠴᠠᠰᠤ ᠲᠠᠢ ᠬᠥᠮᠦᠨ ᠪᠠᠷᠠᠭᠤᠨ ᠵᠡᠭᠦᠨ ᠭᠠᠷ ᠢᠶᠠᠨ ᠲᠩᠷᠢ ᠥᠭᠡᠳᠡ ᠰᠤᠩ᠋ᠭᠠᠭᠠᠳ ᠮᠥᠩᠬᠡᠳᠡ ᠠᠮᠢᠳᠤᠷᠠᠭᠴᠢ ᠪᠤᠷᠬᠠᠨ ᠤ ᠨᠡᠷᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠨ᠄ 《ᠨᠢᠭᠡ ᠴᠠᠭ ᠦᠶᠡ᠂ ᠬᠣᠶᠠᠷ ᠴᠠᠭ ᠦᠶᠡ᠂ ᠬᠠᠭᠠᠰ ᠴᠠᠭ ᠦᠶᠡ ᠥᠩᠭᠡᠷᠡᠵᠦ᠂ ᠠᠷᠢᠭᠤᠨ ᠠᠷᠠᠳ ᠲᠦᠮᠡᠨ ᠦ ᠬᠦᠴᠦ ᠤᠰᠠᠳᠬᠠᠭᠳᠠᠵᠤ ᠳᠠᠭᠤᠰᠬᠤ ᠳᠤ᠂ ᠡᠳᠡᠭᠡᠷ ᠪᠦᠬᠦᠨ ᠲᠡᠭᠦᠰᠦᠨᠡ》 ᠭᠡᠬᠦ ᠶᠢ ᠪᠢ ᠰᠣᠨᠣᠰᠣᠯᠠ᠃ 8 ᠬᠠᠷᠢᠨ ᠪᠢ ᠰᠣᠨᠣᠰᠣᠭᠰᠠᠨ ᠪᠣᠯᠪᠠᠴᠤ ᠣᠢᠯᠠᠭᠠᠭᠠ ᠦᠭᠡᠢ ᠲᠤᠯᠠ᠄ 《ᠡᠵᠡᠨ ᠮᠢᠨᠢ᠂ ᠡᠳᠡᠭᠡᠷ ᠦᠨ ᠬᠣᠢᠨᠠ ᠨᠢ ᠶᠠᠭᠤ ᠪᠣᠯᠬᠤ ᠪᠤᠢ︖》 ᠭᠡᠬᠦ ᠳᠦ᠂ 9 ᠲᠡᠷᠡ᠄ 《ᠳ᠋ᠠᠨᠢᠶᠧᠯ ᠡ᠂ ᠴᠢ ᠵᠠᠮ ᠢᠶᠠᠷ ᠢᠶᠠᠨ ᠶᠠᠪᠤ᠃ ᠡᠨᠡ ᠦᠭᠡᠰ ᠬᠤᠢᠯᠠᠭᠳᠠᠭᠰᠠᠨ᠂ ᠡᠴᠦᠰ ᠦᠨ ᠴᠠᠭ ᠪᠣᠯᠲᠠᠯᠠ ᠪᠢᠲᠡᠭᠦᠮᠵᠢ ᠲᠠᠢ ᠪᠠᠢᠬᠤ ᠪᠣᠯᠣᠨᠠ᠃ 10 ᠣᠯᠠᠨ ᠬᠥᠮᠦᠨ ᠴᠡᠪᠡᠷᠰᠢᠨ ᠥ ᠰᠡᠪ ᠦᠭᠡᠢ ᠪᠣᠯᠵᠤ ᠠᠷᠢᠭᠤᠰᠤᠨᠠ᠃ ᠭᠡᠪᠡᠴᠦ ᠪᠤᠷᠤᠭᠤᠲᠠᠳ ᠨᠢ ᠪᠤᠷᠤᠭᠤ ᠶᠢ ᠦᠢᠯᠡᠳᠦᠭᠰᠡᠭᠡᠷ ᠪᠠᠢᠬᠤ ᠪᠣᠯᠣᠨᠠ᠃ ᠪᠤᠷᠤᠭᠤᠲᠠᠳ ᠤᠨ ᠬᠡᠨ ᠨᠢ ᠴᠤ ᠤᠬᠠᠭᠠᠷᠠᠬᠤ ᠦᠭᠡᠢ᠂ ᠬᠠᠷᠢᠨ ᠮᠡᠷᠭᠡᠨ ᠨᠢ ᠤᠬᠠᠭᠠᠷᠠᠬᠤ ᠪᠣᠯᠣᠨᠠ᠃ 11 ᠪᠠᠢᠩ᠋ᠭᠤ ᠶᠢᠨ ᠲᠠᠬᠢᠯ ᠢ ᠵᠣᠭᠰᠣᠭᠠᠵᠤ᠂ ᠰᠦᠢᠷᠡᠯ ᠢ ᠠᠪᠴᠢᠷᠠᠬᠤ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠢ ᠪᠣᠰᠬᠠᠬᠤ ᠴᠠᠭ ᠠᠴᠠ ᠮᠢᠩ᠋ᠭᠠ ᠬᠣᠶᠠᠷ ᠵᠠᠭᠤ ᠶᠡᠷᠡᠨ ᠡᠳᠦᠷ ᠥᠩᠭᠡᠷᠡᠨᠡ᠃ 12 ᠬᠦᠯᠢᠶᠡᠭᠰᠡᠭᠡᠷ ᠪᠠᠢᠵᠤ ᠮᠢᠩ᠋ᠭᠠ ᠭᠤᠷᠪᠠᠨ ᠵᠠᠭᠤ ᠭᠤᠴᠢᠨ ᠲᠠᠪᠤᠨ ᠡᠳᠦᠷ ᠬᠦᠷᠬᠦ ᠬᠥᠮᠦᠨ ᠪᠤᠶᠠᠨ ᠲᠠᠢ ᠡ︕ 13 ᠬᠠᠷᠢᠨ ᠴᠢ ᠡᠴᠦᠰ ᠪᠣᠯᠲᠠᠯᠠ ᠵᠠᠮ ᠢᠶᠠᠷ ᠢᠶᠠᠨ ᠶᠠᠪᠤ᠃ ᠲᠡᠭᠡᠪᠡᠯ ᠴᠢ ᠠᠮᠠᠷᠠᠭᠠᠳ ᠴᠠᠭ ᠦᠶᠡ ᠶᠢᠨ ᠡᠴᠦᠰ ᠲᠦ ᠪᠣᠰᠴᠤ᠂ ᠬᠤᠪᠢ ᠪᠠᠨ ᠬᠦᠷᠲᠡᠬᠦ ᠪᠣᠯᠣᠨᠠ》 ᠭᠡᠪᠡ᠃