ᠯᠦᠺ ᠨᠢᠭᠡ
1 ᠪᠢᠳᠡᠨ ᠦ ᠳᠤᠮᠳᠠ ᠪᠡᠶᠡᠯᠡᠭᠰᠡᠨ ᠦᠢᠯᠡ ᠶᠠᠪᠤᠳᠠᠯ ᠤᠨ ᠲᠤᠬᠠᠢ 2 ᠠᠩ᠋ᠬᠠᠨ ᠠᠴᠠ ᠪᠠᠨ ᠦᠭᠡ ᠶᠢ ᠨᠢᠳᠦ ᠪᠡᠷ ᠢᠶᠠᠨ ᠬᠠᠷᠠᠭᠰᠠᠨ᠂ ᠵᠠᠷᠤᠴᠠ ᠨᠢ ᠪᠣᠯᠣᠭᠰᠠᠨ ᠬᠥᠮᠦᠰ ᠦᠨ ᠪᠢᠳᠡᠨ ᠳᠦ ᠤᠯᠠᠮᠵᠢᠯᠠᠭᠰᠠᠨ ᠶᠣᠰᠣᠭᠠᠷ ᠲᠡᠦᠬᠡ ᠶᠢ ᠡᠮᠬᠢᠳᠬᠡᠬᠦ ᠳᠦ ᠣᠷᠣᠯᠴᠠᠭᠰᠠᠨ ᠬᠥᠮᠦᠨ ᠣᠯᠠᠨ ᠪᠤᠢ᠃ 3 ᠪᠢ ᠴᠤ ᠡᠨᠡ ᠪᠦᠬᠦᠨ ᠢ ᠡᠬᠢᠨ ᠡᠴᠡ ᠨᠢ ᠨᠢᠭᠲᠠᠯᠠᠨ ᠰᠤᠳᠤᠯᠤᠭᠰᠠᠨ ᠲᠤᠯᠠ ᠡᠷᠬᠢᠮ ᠬᠦᠨᠳᠦᠲᠦ ᠲᠧᠣᠹᠢᠯ ᠲᠠᠨ ᠳᠤ ᠳᠡᠰ ᠳᠠᠷᠠᠭᠠᠯᠠᠨ ᠪᠢᠴᠢᠶᠡ ᠭᠡᠵᠦ ᠪᠣᠳᠣᠪᠠ᠃ 4 ᠰᠤᠷᠭᠠᠭᠳᠠᠭᠰᠠᠨ ᠵᠦᠢᠯᠡᠰ ᠦᠨ ᠭᠠᠷᠴᠠᠭᠠ ᠦᠭᠡᠢ ᠦᠨᠡᠨ ᠭᠡᠳᠡᠭ ᠢ ᠡᠭᠦᠨ ᠢᠶᠡᠷ ᠲᠠ ᠮᠡᠳᠡᠬᠦ ᠪᠣᠯᠣᠨᠠ᠃
ᠶᠣᠬᠠᠨ ᠮᠡᠨᠳᠦᠯᠡᠬᠦ ᠮᠡᠳᠡᠭᠡ
5 ᠶᠦᠳᠠᠢ ᠶᠢᠨ ᠬᠠᠭᠠᠨ ᠾᠧᠷᠣᠳ᠋ ᠤᠨ ᠦᠶᠡ ᠳᠦ᠂ ᠠᠪᠢᠶᠠ ᠶᠢᠨ ᠪᠦᠯᠦᠭ ᠲᠦ ᠽᠠᠺᠠᠷᠢᠶᠠ ᠭᠡᠳᠡᠭ ᠨᠢᠭᠡᠨ ᠲᠠᠬᠢᠯᠴᠢ ᠪᠠᠢᠵᠠᠢ᠃ ᠡᠬᠡᠨᠡᠷ ᠨᠢ ᠠᠷᠣᠨ ᠤ ᠦᠷᠡ ᠤᠳᠤᠮ ᠪᠥᠭᠡᠳ ᠧᠯᠢᠰᠠᠪᠧᠲ ᠭᠡᠳᠡᠭ᠃ 6 ᠲᠡᠳᠡ ᠬᠣᠶᠠᠭᠤᠯᠠ ᠪᠠᠨ ᠡᠵᠡᠨ ᠦ ᠠᠯᠢᠪᠠ ᠵᠠᠷᠯᠢᠭ ᠪᠠ ᠳᠦᠷᠢᠮ ᠢ ᠥ ᠰᠡᠪ ᠦᠭᠡᠢ ᠳᠠᠭᠠᠵᠤ ᠪᠤᠷᠬᠠᠨ ᠤ ᠡᠮᠦᠨᠡ ᠵᠥᠪ ᠪᠠᠢᠵᠠᠢ᠃ 7 ᠧᠯᠢᠰᠠᠪᠧᠲ ᠬᠡᠭᠦᠰᠡᠷ ᠲᠤᠯᠠ ᠲᠡᠳᠡ ᠦᠷᠡ ᠬᠡᠦᠬᠡᠳ ᠦᠭᠡᠢ᠂ ᠬᠣᠶᠠᠭᠤᠯᠠ ᠪᠠᠨ ᠨᠠᠰᠤ ᠠᠬᠢᠵᠠᠢ᠃
8 ᠨᠢᠭᠡᠨ ᠡᠳᠦᠷ ᠽᠠᠺᠠᠷᠢᠶᠠ ᠡᠭᠡᠯᠵᠢ ᠶᠢᠨ ᠢᠶᠠᠨ ᠶᠣᠰᠣᠭᠠᠷ ᠪᠤᠷᠬᠠᠨ ᠤ ᠡᠮᠦᠨᠡ ᠲᠠᠬᠢᠯᠴᠢ ᠶᠢᠨ ᠠᠯᠪᠠ ᠭᠦᠢᠴᠡᠳᠬᠡᠬᠦ ᠪᠣᠯᠵᠠᠢ᠃ 9 ᠲᠠᠬᠢᠯᠴᠢ ᠶᠢᠨ ᠵᠠᠩᠰᠢᠯ ᠢᠶᠠᠷ ᠰᠢᠪᠠᠭᠠ ᠰᠤᠭᠤᠯᠤᠭᠰᠠᠨ ᠳᠤ᠂ ᠲᠡᠷᠡ ᠪᠡᠷ ᠡᠵᠡᠨ ᠦ ᠥᠷᠭᠥᠭᠡᠨ ᠳᠦ ᠣᠷᠣᠵᠤ ᠬᠦᠵᠢ ᠰᠢᠲᠠᠭᠠᠬᠤ ᠪᠠᠷ ᠰᠣᠩ᠋ᠭᠣᠭᠳᠠᠪᠠ᠃ 10 ᠬᠦᠵᠢ ᠰᠢᠲᠠᠭᠠᠵᠤ ᠪᠠᠢᠬᠤ ᠴᠠᠭ ᠲᠤ ᠣᠯᠠᠨ ᠠᠷᠠᠳ ᠭᠠᠳᠠᠨᠠ ᠳᠠᠭᠠᠳᠬᠠᠵᠤ ᠪᠠᠢᠯᠠ᠃ 11 ᠲᠡᠭᠡᠲᠡᠯᠡ ᠡᠵᠡᠨ ᠦ ᠡᠯᠴᠢ ᠬᠦᠵᠢ ᠶᠢᠨ ᠰᠢᠷᠡᠭᠡᠨ ᠦ ᠪᠠᠷᠠᠭᠤᠨ ᠲᠠᠯᠠ ᠳᠤ ᠵᠣᠭᠰᠣᠵᠤ ᠪᠠᠢᠭᠠ ᠨᠢ ᠽᠠᠺᠠᠷᠢᠶᠠ ᠳᠤ ᠦᠵᠡᠭᠳᠡᠪᠡ᠃ 12 ᠽᠠᠺᠠᠷᠢᠶᠠ ᠲᠡᠭᠦᠨ ᠢ ᠬᠠᠷᠠᠭᠠᠳ ᠪᠠᠯᠢᠳᠠᠵᠤ᠂ ᠠᠢᠳᠠᠰ ᠢᠶᠠᠷ ᠳᠦᠭᠦᠷᠴᠡᠢ᠃ 13 ᠲᠩᠷᠢ ᠡᠯᠴᠢ ᠲᠡᠭᠦᠨ ᠳᠦ᠄ 《ᠪᠦᠦ ᠠᠶᠤ᠂ ᠽᠠᠺᠠᠷᠢᠶᠠ ᠡ᠂ ᠳᠠᠭᠠᠳᠬᠠᠨ ᠭᠤᠶᠤᠭᠰᠠᠨ ᠢ ᠴᠢᠨᠢ ᠡᠵᠡᠨ ᠰᠣᠨᠣᠰᠣᠭᠰᠠᠨ ᠪᠥᠭᠡᠳ ᠡᠬᠡᠨᠡᠷ ᠧᠯᠢᠰᠠᠪᠧᠲ ᠴᠢᠨᠢ ᠴᠢᠮᠠ ᠳᠤ ᠬᠦᠦ ᠲᠥᠷᠥᠭᠦᠯᠦᠨᠡ᠃ ᠴᠢ ᠲᠡᠭᠦᠨ ᠢ ᠶᠣᠬᠠᠨ ᠭᠡᠵᠦ ᠨᠡᠷᠡᠯᠡ᠃ 14 ᠴᠢ ᠪᠠᠶᠠᠷ ᠵᠢᠷᠭᠠᠯ ᠲᠠᠢ ᠪᠣᠯᠵᠤ᠂ ᠣᠯᠠᠨ ᠬᠥᠮᠦᠨ ᠴᠤ ᠲᠡᠭᠦᠨ ᠦ ᠲᠥᠷᠥᠭᠰᠡᠨ ᠳᠦ ᠪᠠᠶᠠᠷᠯᠠᠨᠠ᠃ 15 ᠤᠴᠢᠷ ᠨᠢ᠂ ᠲᠡᠷᠡ ᠡᠵᠡᠨ ᠦ ᠡᠮᠦᠨᠡ ᠠᠭᠤᠤ ᠪᠣᠯᠣᠨᠠ᠃ ᠲᠡᠷᠡ ᠳᠠᠷᠠᠰᠤ ᠴᠤ᠂ ᠠᠷᠢᠬᠢ ᠴᠤ ᠶᠡᠷᠦ ᠤᠤᠭᠤᠬᠤ ᠦᠭᠡᠢ᠃ ᠡᠬᠡ ᠶᠢᠨ ᠢᠶᠠᠨ ᠬᠡᠪᠡᠯᠢ ᠳᠤ ᠪᠠᠢᠬᠤ ᠠᠴᠠ ᠪᠠᠨ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠴᠦ᠂ 16 ᠣᠯᠠᠨ ᠢᠰᠷᠧᠯᠴᠦᠳ ᠢ ᠪᠤᠷᠬᠠᠨ ᠡᠵᠡᠨ ᠤᠷᠤᠭᠤ ᠨᠢ ᠡᠷᠭᠢᠭᠦᠯᠬᠦ ᠪᠣᠯᠣᠨᠠ᠃ 17 ᠲᠡᠷᠡ ᠪᠠᠰᠠ ᠧᠯᠢᠶᠠ ᠶᠢᠨ ᠰᠦᠨᠡᠰᠦ ᠪᠠ ᠬᠦᠴᠦ ᠪᠡᠷ ᠡᠵᠡᠨ ᠦ ᠡᠮᠦᠨᠡ ᠶᠠᠪᠤᠵᠤ ᠡᠴᠢᠭᠡ ᠶᠢᠨ ᠰᠡᠳᠬᠢᠯ ᠢ ᠬᠡᠦᠬᠡᠳ ᠤᠳ ᠤᠷᠤᠭᠤ᠂ ᠰᠥᠷᠭᠡᠦ ᠬᠥᠮᠦᠰ ᠢ ᠵᠥᠪᠲᠦ ᠬᠥᠮᠦᠰ ᠦᠨ ᠮᠡᠷᠭᠡᠨ ᠤᠬᠠᠭᠠᠨ ᠤᠷᠤᠭᠤ ᠬᠠᠨᠳᠤᠭᠤᠯᠵᠤ᠂ ᠪᠡᠯᠡᠳᠬᠡᠯ ᠲᠡᠢ ᠠᠷᠠᠳ ᠲᠦᠮᠡᠨ ᠢ ᠡᠵᠡᠨ ᠦ ᠲᠥᠯᠥᠭᠡ ᠪᠡᠯᠡᠨ ᠪᠣᠯᠭᠠᠨᠠ》 ᠭᠡᠪᠡ᠃ 18 ᠽᠠᠺᠠᠷᠢᠶᠠ ᠲᠩᠷᠢ ᠡᠯᠴᠢ ᠳᠤ᠄ 《ᠪᠢ ᠡᠭᠦᠨ ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠢᠯᠡ︖ ᠪᠢ ᠥᠲᠡᠯᠵᠦ᠂ ᠡᠬᠡᠨᠡᠷ ᠮᠢᠨᠢ ᠴᠤ ᠨᠠᠰᠤ ᠠᠬᠢᠭᠰᠠᠨ ᠰᠢᠦ ᠳᠠ》 ᠭᠡᠬᠦ ᠳᠦ᠂ 19 ᠲᠩᠷᠢ ᠡᠯᠴᠢ ᠬᠠᠷᠢᠭᠤ ᠳᠤᠨᠢ᠄ 《ᠪᠢ ᠪᠣᠯ ᠪᠤᠷᠬᠠᠨ ᠤ ᠡᠮᠦᠨᠡ ᠵᠣᠭᠰᠣᠭᠴᠢ ᠭᠠᠪᠷᠢᠶᠧᠯ ᠮᠥᠨ᠃ ᠴᠢᠮᠠ ᠳᠤ ᠡᠳᠡᠭᠡᠷ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠳᠠᠮᠵᠢᠭᠤᠯᠬᠤ ᠪᠠᠷ ᠢᠯᠡᠭᠡᠭᠳᠡᠭᠰᠡᠨ ᠶᠤᠮ᠃ 20 ᠠᠩ᠋ᠬᠠᠷᠤᠭᠲᠤᠨ᠂ ᠡᠳᠡᠭᠡᠷ ᠶᠠᠪᠤᠳᠠᠯ ᠪᠡᠶᠡᠯᠡᠭᠳᠡᠲᠡᠯᠡ ᠴᠢ ᠬᠡᠯᠡ ᠦᠭᠡᠢ ᠪᠣᠯᠵᠤ ᠶᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠨᠠ᠃ ᠤᠴᠢᠷ ᠨᠢ᠂ ᠴᠢ ᠮᠢᠨᠦ ᠦᠭᠡᠨ ᠳᠦ ᠢᠲᠡᠭᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠴᠠᠭ ᠨᠢ ᠪᠣᠯᠪᠠᠯ ᠮᠢᠨᠦ ᠦᠭᠡ ᠪᠡᠶᠡᠯᠡᠭᠳᠡᠨᠡ》 ᠭᠡᠪᠡ᠃
21 ᠽᠠᠺᠠᠷᠢᠶᠠ ᠶᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠠᠷᠠᠳ ᠤᠳ ᠥᠷᠭᠥᠭᠡᠨ ᠳᠣᠲᠣᠷᠠ ᠤᠳᠠᠭᠰᠠᠨ ᠳᠤᠨᠢ ᠭᠠᠢᠬᠠᠵᠠᠭᠠᠵᠤ ᠪᠠᠢᠯᠠ᠃ 22 ᠲᠡᠷᠡ ᠭᠠᠷᠴᠤ ᠢᠷᠡᠭᠡᠳ ᠦᠭᠡ ᠶᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠯᠬᠣᠷ ᠬᠥᠮᠦᠰ ᠲᠡᠭᠦᠨ ᠢ ᠥᠷᠭᠥᠭᠡᠨ ᠳᠣᠲᠣᠷᠠ ᠦᠵᠡᠭᠳᠡᠯ ᠦᠵᠡᠭᠰᠡᠨ ᠶᠤᠮ ᠪᠠᠢᠨᠠ ᠭᠡᠵᠦ ᠣᠢᠯᠠᠭᠠᠪᠠ᠃ ᠽᠠᠺᠠᠷᠢᠶᠠ ᠳᠣᠬᠢᠵᠤ ᠵᠢᠭᠠᠨ᠂ ᠬᠡᠯᠡ ᠦᠭᠡᠢ ᠪᠠᠢᠭᠰᠠᠭᠠᠷ 23 ᠦᠢᠯᠡᠴᠢᠯᠡᠯ ᠦᠨ ᠬᠤᠭᠤᠴᠠᠭᠠ ᠪᠠᠨ ᠳᠠᠭᠤᠰᠬᠠᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠪᠠ᠃
24 ᠲᠡᠷᠡ ᠦᠶᠡ ᠡᠴᠡ ᠬᠣᠢᠰᠢ᠂ ᠡᠬᠡᠨᠡᠷ ᠧᠯᠢᠰᠠᠪᠧᠲ ᠨᠢ ᠵᠢᠷᠮᠦᠰᠦᠯᠡᠵᠦ ᠲᠠᠪᠤᠨ ᠰᠠᠷᠠ ᠶᠢᠨ ᠲᠤᠷᠰᠢ ᠬᠥᠮᠦᠨ ᠦ ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠠᠢᠵᠠᠢ᠃ 25 ᠲᠡᠷᠡ᠄ 《ᠡᠵᠡᠨ ᠨᠠᠮᠠᠶᠢ ᠲᠠᠭᠠᠯᠠᠨ ᠬᠠᠷᠠᠵᠤ ᠮᠢᠨᠦ ᠲᠥᠯᠥᠭᠡ ᠡᠨᠡ ᠦᠶᠡ ᠳᠦ ᠡᠢᠨ ᠬᠦ ᠦᠢᠯᠡᠳᠦᠭᠡᠳ ᠢᠴᠢᠭᠦᠷᠢ ᠶᠢ ᠮᠢᠨᠢ ᠬᠥᠮᠦᠰ ᠦᠨ ᠳᠤᠮᠳᠠ ᠠᠴᠠ ᠠᠷᠢᠯᠭᠠᠵᠠᠢ》 ᠭᠡᠪᠡ᠃
ᠢᠰᠦ᠋ᠰ ᠮᠡᠨᠳᠦᠯᠡᠬᠦ ᠮᠡᠳᠡᠭᠡ
26 ᠵᠢᠷᠭᠤᠳᠤᠭᠠᠷ ᠰᠠᠷᠠ ᠳᠤ᠂ ᠪᠤᠷᠬᠠᠨ ᠡᠯᠴᠢ ᠭᠠᠪᠷᠢᠶᠧᠯ ᠢᠶᠠᠨ ᠭᠠᠯᠢᠯᠠᠶᠠ ᠶᠢᠨ ᠨᠠᠽᠠᠷᠧᠲ ᠭᠡᠳᠡᠭ ᠲᠣᠰᠬᠣᠨ ᠳᠠᠬᠢ 27 ᠳ᠋ᠠᠸᠢᠳ᠋ ᠤᠨ ᠤᠳᠤᠮ ᠤᠨ ᠶᠣᠰᠧᠹ ᠭᠡᠳᠡᠭ ᠡᠷᠡ ᠲᠠᠢ ᠰᠦᠢ ᠲᠠᠯᠪᠢᠭᠰᠠᠨ ᠨᠢᠭᠡᠨ ᠣᠩ᠋ᠭᠣᠨ ᠥᠬᠢᠨ ᠤᠷᠤᠭᠤ ᠢᠯᠡᠭᠡᠵᠡᠢ᠃ ᠲᠡᠭᠦᠨ ᠦ ᠨᠡᠷᠡ ᠶᠢ ᠮᠠᠷᠢᠶᠠ ᠭᠡᠳᠡᠭ ᠪᠠᠢᠯᠠ᠃ 28 ᠲᠩᠷᠢ ᠡᠯᠴᠢ ᠲᠡᠭᠦᠨ ᠤᠷᠤᠭᠤ ᠢᠷᠡᠭᠡᠳ᠄ 《ᠠᠮᠤᠷ ᠪᠠᠢᠨᠠ ᠤᠤ︖ ᠢᠪᠡᠭᠡᠭᠳᠡᠭᠴᠢ ᠡ᠂ ᠡᠵᠡᠨ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠨᠠ》 ᠭᠡᠪᠡ᠃ 29 ᠮᠠᠷᠢᠶᠠ ᠡᠨᠡ ᠦᠭᠡᠨ ᠳᠦ ᠶᠡᠬᠡᠳᠡ ᠪᠠᠯᠢᠳᠠᠵᠤ᠂ ᠡᠨᠡ ᠮᠡᠨᠳᠦᠴᠢᠯᠡᠭᠡ ᠶᠢᠨ ᠤᠴᠢᠷ ᠢ ᠲᠤᠩ᠋ᠭᠠᠵᠤ ᠪᠠᠢᠲᠠᠯᠠ 30 ᠲᠩᠷᠢ ᠡᠯᠴᠢ ᠲᠡᠭᠦᠨ ᠳᠦ᠄ 《ᠪᠦᠦ ᠠᠶᠤ᠂ ᠮᠠᠷᠢᠶᠠ ᠡ᠂ ᠴᠢ ᠪᠤᠷᠬᠠᠨ ᠤ ᠲᠠᠭᠠᠯᠠᠯ ᠢ ᠣᠯᠵᠠᠢ᠃ 31 ᠠᠩ᠋ᠬᠠᠷᠤᠭᠲᠤᠨ᠂ ᠴᠢ ᠵᠢᠷᠮᠦᠰᠦᠯᠡᠵᠦ ᠬᠦᠦ ᠲᠥᠷᠥᠭᠦᠯᠦᠨᠡ᠃ ᠲᠡᠭᠦᠨ ᠢ ᠢᠰᠦ᠋ᠰ ᠭᠡᠵᠦ ᠨᠡᠷᠡᠯᠡ᠃ 32 ᠲᠡᠷᠡ ᠠᠭᠤᠤ ᠪᠣᠯᠬᠤ ᠪᠥᠭᠡᠳ ᠳᠡᠭᠡᠳᠦ ᠶᠢᠨ ᠳᠡᠭᠡᠳᠦ ᠨᠢᠭᠡᠨ ᠦ ᠬᠦᠦ ᠭᠡᠵᠦ ᠳᠠᠭᠤᠳᠠᠭᠳᠠᠨᠠ᠃ ᠡᠵᠡᠨ ᠪᠤᠷᠬᠠᠨ ᠲᠡᠭᠦᠨ ᠳᠦ ᠡᠪᠦᠭᠡ ᠳᠡᠭᠡᠳᠦᠰ ᠳ᠋ᠠᠸᠢᠳ᠋ ᠤᠨ ᠬᠢᠨᠢ ᠰᠡᠨᠲᠢ ᠶᠢ ᠰᠣᠶᠣᠷᠬᠠᠬᠤ ᠪᠣᠯᠣᠨᠠ᠃ 33 ᠲᠡᠷᠡ ᠶᠠᠺᠣᠪ ᠤᠨ ᠭᠡᠷ ᠢ ᠡᠭᠦᠷᠢᠳᠡ ᠬᠠᠭᠠᠨᠴᠢᠯᠠᠬᠤ ᠪᠥᠭᠡᠳ ᠲᠡᠭᠦᠨ ᠦ ᠬᠠᠭᠠᠨᠴᠢᠯᠠᠯ ᠲᠡᠭᠦᠰᠬᠡᠯ ᠦᠭᠡᠢ》 ᠭᠡᠰᠡᠨ ᠳᠦ᠂ 34 ᠮᠠᠷᠢᠶᠠ ᠲᠩᠷᠢ ᠡᠯᠴᠢ ᠳᠤ᠄ 《ᠪᠢ ᠣᠩ᠋ᠭᠣᠨ ᠪᠠᠢᠲᠠᠯᠠ ᠡᠢᠮᠦ ᠶᠠᠪᠤᠳᠠᠯ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠢᠯᠡ︖》 ᠭᠡᠯᠡ᠃ 35 ᠲᠩᠷᠢ ᠡᠯᠴᠢ᠄ 《ᠠᠷᠢᠭᠤᠨ ᠰᠦᠨᠡᠰᠦ ᠴᠢᠮᠠ ᠳᠡᠭᠡᠷᠡ ᠪᠠᠭᠤᠵᠤ᠂ 〈ᠳᠡᠭᠡᠳᠦ ᠶᠢᠨ ᠳᠡᠭᠡᠳᠦ〉 ᠶᠢᠨ ᠬᠦᠴᠦ ᠴᠢᠮᠠᠶᠢ ᠪᠦᠷᠬᠦᠨᠡ᠃ ᠲᠡᠢᠮᠦ ᠡᠴᠡ ᠮᠡᠨᠳᠦᠯᠡᠬᠦ ᠠᠷᠢᠭᠤᠨ ᠨᠢᠭᠡᠨ ᠨᠢ ᠪᠤᠷᠬᠠᠨ ᠤ ᠬᠦᠦ ᠭᠡᠵᠦ ᠳᠠᠭᠤᠳᠠᠭᠳᠠᠬᠤ ᠪᠣᠯᠣᠨᠠ᠃ 36 ᠴᠢᠨᠦ ᠰᠠᠳᠤᠨ ᠧᠯᠢᠰᠠᠪᠧᠲ ᠴᠤ ᠬᠡᠭᠦᠰᠡᠷ ᠭᠡᠭᠳᠡᠵᠦ ᠪᠠᠢᠭᠰᠠᠨ ᠢᠶᠠᠨ ᠥᠲᠡᠯᠦᠭᠡ ᠨᠠᠰᠤᠨ ᠳᠠᠭᠠᠨ ᠬᠦᠦ ᠵᠢᠷᠮᠦᠰᠦᠯᠡᠵᠦ᠂ ᠣᠳᠣ ᠵᠢᠷᠭᠤᠭᠠᠨ ᠰᠠᠷᠠ ᠲᠠᠢ ᠪᠣᠯᠣᠭᠰᠠᠨ᠃ 37 ᠪᠤᠷᠬᠠᠨ ᠳᠤ ᠪᠣᠯᠣᠰᠢ ᠦᠭᠡᠢ ᠵᠦᠢᠯ ᠭᠡᠵᠦ ᠪᠠᠢᠳᠠᠭ ᠦᠭᠡᠢ》 ᠭᠡᠵᠦ ᠬᠡᠯᠡᠪᠡ᠃ 38 ᠮᠠᠷᠢᠶᠠ᠄ 《ᠪᠢ ᠪᠣᠯ ᠡᠵᠡᠨ ᠦ ᠰᠢᠪᠡᠭᠴᠢᠨ᠂ ᠲᠠᠨ ᠤ ᠥᠭᠦᠯᠡᠭᠰᠡᠨ ᠢᠶᠡᠷ ᠪᠣᠯᠬᠤ ᠪᠣᠯᠲᠤᠭᠠᠢ》 ᠭᠡᠬᠦ ᠳᠦ᠂ ᠲᠩᠷᠢ ᠡᠯᠴᠢ ᠰᠠᠯᠵᠤ ᠣᠳᠪᠠ᠃
ᠮᠠᠷᠢᠶᠠ ᠧᠯᠢᠰᠠᠪᠧᠲ ᠤᠨ ᠳᠤ ᠣᠴᠢᠭᠰᠠᠨ ᠨᠢ
39 ᠲᠡᠷᠡ ᠦᠶᠡ ᠳᠦ᠂ ᠮᠠᠷᠢᠶᠠ ᠭᠠᠷᠤᠭᠠᠳ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠤᠨ ᠶᠦᠳᠠ 1 ᠲᠣᠰᠬᠣᠨ ᠤᠷᠤᠭᠤ ᠶᠠᠭᠠᠷᠠᠯᠲᠠᠢᠬᠠᠨ ᠶᠠᠪᠤᠵᠤ 40 ᠽᠠᠺᠠᠷᠢᠶᠠ ᠶᠢᠨ ᠳᠤ ᠣᠷᠣᠵᠤ ᠧᠯᠢᠰᠠᠪᠧᠲ ᠲᠠᠢ ᠮᠡᠨᠳᠦᠴᠢᠯᠡᠪᠡ᠃ 41 ᠧᠯᠢᠰᠠᠪᠧᠲ ᠮᠠᠷᠢᠶᠠ ᠶᠢᠨ ᠮᠡᠨᠳᠦᠴᠢᠯᠡᠯ ᠢ ᠰᠣᠨᠣᠰᠲᠠᠯᠠ ᠬᠡᠪᠡᠯᠢ ᠳᠠᠬᠢ ᠬᠡᠦᠬᠡᠳ ᠨᠢ ᠣᠭᠵᠣᠮ ᠬᠥᠳᠡᠯᠪᠡ᠃ ᠧᠯᠢᠰᠠᠪᠧᠲ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠴᠦ 42 ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠡᠮᠡᠭᠲᠡᠢᠴᠦᠳ ᠦᠨ ᠳᠤᠮᠳᠠ ᠴᠢ ᠪᠤᠶᠠᠨ ᠲᠠᠢ᠂ ᠬᠡᠪᠡᠯᠢ ᠳᠠᠬᠢ ᠦᠷᠡ ᠴᠢᠨᠢ ᠴᠤ ᠪᠤᠶᠠᠨ ᠲᠠᠢ᠂ 43 ᠡᠵᠡᠨ ᠦ ᠮᠢᠨᠢ ᠡᠬᠡ ᠨᠠᠳᠠ ᠳᠡᠭᠡᠷᠡ ᠢᠷᠡᠵᠦ ᠶᠠᠭᠠᠬᠢᠨ ᠪᠣᠯᠬᠤ ᠪᠢᠯᠡ︖ 44 ᠮᠡᠨᠳᠦ ᠶᠢᠨ ᠳᠠᠭᠤ ᠴᠢᠨᠢ ᠮᠢᠨᠦ ᠴᠢᠬᠢᠨᠡ ᠬᠦᠷᠦᠮᠡᠭᠴᠡ ᠬᠡᠪᠡᠯᠢ ᠳᠠᠬᠢ ᠬᠡᠦᠬᠡᠳ ᠮᠢᠨᠢ ᠪᠠᠶᠠᠰᠤᠨ ᠲᠡᠭᠡᠪᠡ᠃ 45 ᠢᠲᠡᠭᠡᠭᠰᠡᠨ ᠡᠮᠡᠭᠲᠡᠢ ᠨᠢ ᠪᠤᠶᠠᠨ ᠲᠠᠢ᠂ ᠤᠴᠢᠷ ᠨᠢ᠂ ᠡᠵᠡᠨ ᠦ ᠲᠡᠭᠦᠨ ᠳᠦ ᠬᠡᠯᠡᠭᠰᠡᠨ ᠦᠭᠡ ᠪᠡᠶᠡᠯᠡᠭᠳᠡᠨᠡ》 ᠭᠡᠪᠡ᠃
ᠮᠠᠷᠢᠶᠠ ᠶᠢᠨ ᠮᠠᠭᠲᠠᠭᠠᠯ
46 ᠮᠠᠷᠢᠶᠠ᠄ 《ᠰᠡᠳᠬᠢᠯ ᠮᠢᠨᠢ ᠡᠵᠡᠨ ᠢ ᠳᠡᠭᠡᠳᠦᠯᠡᠨᠡ᠃
47 ᠰᠦᠨᠡᠰᠦ ᠮᠢᠨᠢ ᠠᠪᠤᠷᠠᠭᠴᠢ ᠪᠤᠷᠬᠠᠨᠠ ᠪᠠᠶᠠᠰᠤᠨᠠ᠃
48 ᠲᠡᠷᠡ ᠪᠡᠷ ᠰᠢᠪᠡᠭᠴᠢᠨ ᠤ ᠪᠠᠨ ᠳᠣᠣᠷᠠᠳᠤ ᠪᠠᠢᠳᠠᠯ ᠢ ᠲᠣᠯᠢᠯᠠᠵᠤ ᠲᠡᠢᠨ ᠬᠦ ᠡᠳᠦᠭᠡ ᠡᠴᠡ ᠬᠠᠮᠤᠭ ᠦᠶᠡ ᠶᠢᠨ ᠬᠢᠨ ᠨᠠᠮᠠᠶᠢ ᠪᠤᠶᠠᠨ ᠲᠠᠢ ᠭᠡᠬᠦ ᠪᠣᠯᠣᠨᠠ᠃
49 ᠠᠭᠤᠤ ᠦᠢᠯᠡᠰ ᠢ ᠬᠦᠴᠦᠲᠡᠨ ᠮᠢᠨᠢ ᠨᠠᠳᠠ ᠳᠤ ᠪᠦᠲᠦᠭᠡᠭᠰᠡᠨ ᠪᠢᠯᠡ ᠠᠯᠳᠠᠷ ᠨᠡᠷᠡ ᠨᠢ ᠡᠢᠮᠦ ᠡᠴᠡ ᠠᠷᠢᠭᠤᠨ ᠬᠡᠮᠡᠬᠦ ᠪᠦᠯᠦᠭᠡ᠃
50 ᠦᠶᠡ ᠶᠢᠨ ᠦᠶᠡ ᠳᠦ ᠡᠨᠡᠷᠢᠯ ᠨᠢ ᠥᠪᠡᠷ ᠡᠴᠡ ᠨᠢ ᠡᠮᠢᠶᠡᠭᠰᠡᠳ ᠲᠦ ᠲᠠᠷᠬᠠᠨᠠ᠃
51 ᠥᠪᠡᠷ ᠦᠨ ᠢᠶᠠᠨ ᠮᠤᠲᠤᠷ ᠢᠶᠠᠷ ᠬᠦᠴᠦ ᠪᠡᠨ ᠲᠡᠷᠡ ᠦᠵᠡᠭᠦᠯᠦᠭᠡᠳ ᠥᠷᠥ ᠵᠢᠷᠦᠬᠡᠨ ᠳᠡᠭᠡᠨ ᠣᠮᠣᠷᠬᠠᠭᠴᠢᠳ ᠢ ᠦᠯᠳᠡᠵᠦ ᠲᠠᠷᠬᠠᠭᠠᠨᠠ
52 ᠨᠣᠶᠠᠷᠬᠠᠭᠰᠠᠳ ᠢ ᠲᠡᠷᠡ ᠰᠠᠭᠤᠷᠢᠨ ᠠᠴᠠ ᠨᠢ ᠪᠠᠭᠤᠯᠭᠠᠵᠤ ᠨᠣᠮᠣᠢ ᠳᠣᠣᠷᠠᠳᠤᠰ ᠢ ᠡᠷᠭᠦᠮᠵᠢᠯᠡᠪᠡ᠃
53 ᠥᠯᠥᠨ ᠪᠠᠢᠭᠰᠠᠳ ᠢ ᠰᠠᠢᠨ ᠵᠦᠢᠯ ᠢᠶᠠᠷ ᠴᠠᠳᠬᠠᠵᠤ᠂ ᠣᠯᠠᠨ ᠪᠠᠶᠠᠴᠤᠤᠯ ᠢ ᠬᠠᠷᠢᠨ ᠬᠣᠭᠣᠰᠣᠨ ᠪᠤᠴᠠᠭᠠᠪᠠ᠃
54 ᠥᠪᠡᠷ ᠦᠨ ᠵᠠᠷᠤᠴᠠ ᠢᠰᠷᠧᠯ ᠢ ᠲᠡᠷᠡ ᠥᠷᠥᠰᠢᠶᠡᠯ ᠡᠨᠡᠷᠢᠯ ᠢᠶᠠᠷ ᠢᠶᠠᠨ ᠲᠡᠳᠬᠦᠪᠡ
55 ᠡᠪᠦᠭᠡᠳ ᠲᠦ ᠮᠢᠨᠢ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠠᠪᠷᠠᠬᠠᠮ ᠪᠣᠯᠣᠨ ᠦᠷᠡ ᠤᠳᠤᠮ ᠢ ᠨᠢ ᠴᠤ ᠡᠭᠦᠷᠢᠳᠡ ᠡᠨᠡᠷᠢᠬᠦ ᠪᠡᠨ ᠡᠰᠡ ᠮᠠᠷᠲᠠᠪᠠ》 ᠭᠡᠵᠡᠢ᠃
ᠶᠣᠬᠠᠨ ᠲᠥᠷᠥᠭᠰᠡᠨ ᠨᠢ
56 ᠮᠠᠷᠢᠶᠠ ᠧᠯᠢᠰᠠᠪᠧᠲ ᠲᠠᠢ ᠭᠤᠷᠪᠠᠨ ᠰᠠᠷᠠ ᠬᠢᠷᠢᠲᠡᠢ ᠬᠠᠮᠲᠤ ᠪᠠᠢᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠪᠠ᠃
57 ᠧᠯᠢᠰᠠᠪᠧᠲ ᠤᠨ ᠨᠢᠷᠠᠢᠯᠠᠬᠤ ᠴᠠᠭ ᠪᠣᠯᠵᠤ ᠬᠦᠦ ᠲᠥᠷᠥᠵᠡᠢ᠃ 58 ᠡᠵᠡᠨ ᠲᠡᠭᠦᠨ ᠳᠦ ᠠᠭᠤᠤ ᠥᠷᠥᠰᠢᠶᠡᠯ ᠢᠶᠡᠨ ᠦᠵᠡᠭᠦᠯᠦᠭᠰᠡᠨ ᠢ ᠬᠥᠷᠰᠢ ᠨᠦᠭᠦᠳ ᠪᠠ ᠲᠥᠷᠥᠯ ᠰᠠᠳᠤᠨ ᠨᠢ ᠳᠤᠭᠤᠯᠤᠭᠠᠳ ᠧᠯᠢᠰᠠᠪᠧᠲ ᠤᠨ ᠬᠠᠮᠲᠤ ᠪᠠᠶᠠᠷᠯᠠᠵᠠᠭᠠᠪᠠ᠃
59 ᠨᠠᠢ᠌ᠮᠠᠳᠠᠬᠢ ᠡᠳᠦᠷ ᠨᠢ ᠪᠣᠯᠣᠭᠰᠠᠨ ᠳᠤ᠂ ᠲᠡᠳᠡ ᠬᠡᠦᠬᠡᠳ ᠦᠨ ᠬᠥᠪᠴᠢᠷᠬᠡᠢ ᠶᠢ ᠬᠥᠨᠳᠡᠬᠦ ᠪᠡᠷ ᠢᠷᠡᠭᠡᠳ ᠲᠡᠭᠦᠨ ᠢ ᠡᠴᠢᠭᠡ ᠶᠢᠨ ᠬᠢᠨᠢ ᠨᠡᠷᠡ ᠪᠡᠷ ᠽᠠᠺᠠᠷᠢᠶᠠ ᠬᠡᠮᠡᠨ ᠨᠡᠷᠡᠯᠡᠬᠦ ᠭᠡᠵᠦ ᠪᠠᠢᠲᠠᠯᠠ 60 ᠡᠬᠡ ᠨᠢ᠄ 《ᠦᠭᠡᠢ᠂ ᠶᠣᠬᠠᠨ ᠭᠡᠵᠦ ᠨᠡᠷᠡᠯᠡᠬᠦ ᠶᠣᠰᠣᠲᠠᠢ》 ᠭᠡᠪᠡ᠃ 61 ᠲᠡᠳᠡ᠄ 《ᠲᠥᠷᠥᠯ ᠰᠠᠳᠤᠨ ᠤ ᠴᠢᠨᠢ ᠳᠣᠲᠣᠷᠠ ᠡᠢᠮᠦ ᠨᠡᠷᠡ ᠲᠠᠢ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠰᠢᠦ ᠳᠠ》 ᠭᠡᠳ ᠡᠴᠢᠭᠡ ᠡᠴᠡ ᠨᠢ 62 ᠶᠠᠮᠠᠷ ᠨᠡᠷᠡ ᠥᠭᠬᠦ ᠶᠢ ᠨᠢ ᠳᠣᠬᠢᠶᠠ ᠪᠠᠷ ᠠᠰᠠᠭᠤᠵᠠᠢ᠃ 63 ᠽᠠᠺᠠᠷᠢᠶᠠ ᠰᠠᠮᠪᠠᠷᠠ ᠠᠪᠴᠢᠷᠠᠭᠤᠯᠤᠭᠠᠳ᠄ 《ᠲᠡᠭᠦᠨ ᠦ ᠨᠡᠷᠡ ᠪᠣᠯ ᠶᠣᠬᠠᠨ》 ᠭᠡᠵᠦ ᠪᠢᠴᠢᠭᠰᠡᠨ ᠳᠦ ᠪᠦᠭᠦᠳᠡᠭᠡᠷ ᠭᠠᠢᠬᠠᠵᠠᠭᠠᠪᠠ᠃ 64 ᠲᠡᠭᠡᠲᠡᠯᠡ ᠲᠡᠭᠦᠨ ᠦ ᠠᠮᠠ ᠨᠡᠭᠡᠭᠡᠭᠳᠡᠨ ᠬᠡᠯᠡ ᠨᠢ ᠲᠠᠯᠪᠢᠭᠳᠠᠵᠤ᠂ ᠪᠤᠷᠬᠠᠨ ᠢ ᠮᠠᠭᠲᠠᠨ ᠶᠠᠷᠢᠵᠤ ᠡᠬᠢᠯᠡᠪᠡ᠃ 65 ᠬᠥᠷᠰᠢ ᠰᠠᠭᠠᠬᠠᠯᠲᠠ ᠨᠢ ᠴᠥᠮ ᠢᠶᠡᠷ ᠢᠶᠠᠨ ᠠᠶᠤᠭᠰᠠᠨ ᠪᠥᠭᠡᠳ ᠶᠦᠳᠠᠢ ᠶᠢᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠳᠠᠶᠠᠭᠠᠷ ᠬᠥᠮᠦᠰ ᠡᠨᠡ ᠪᠦᠬᠦᠨ ᠦ ᠲᠤᠬᠠᠢ ᠶᠠᠷᠢᠬᠤ ᠪᠣᠯᠵᠠᠢ᠃ 66 ᠰᠣᠨᠣᠰᠣᠭᠰᠠᠨ ᠪᠦᠬᠦᠨ ᠡᠭᠦᠨ ᠢ ᠰᠠᠨᠠᠭᠠᠨ ᠳᠠᠭᠠᠨ ᠠᠪᠴᠤ᠄ 《ᠡᠨᠡ ᠬᠡᠦᠬᠡᠳ ᠬᠣᠵᠢᠮ ᠶᠠᠭᠤ ᠪᠣᠯᠬᠤ ᠪᠣᠯ︖》 ᠭᠡᠵᠡᠭᠡᠵᠦ ᠪᠠᠢᠯᠠ᠃ ᠤᠤᠯ ᠨᠢ ᠡᠵᠡᠨ ᠦ ᠮᠤᠲᠤᠷ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠵᠠᠢ᠃
ᠽᠠᠺᠠᠷᠢᠶᠠ ᠡᠰᠢ ᠦᠵᠡᠭᠦᠯᠦᠭᠰᠡᠨ ᠨᠢ
67 ᠡᠴᠢᠭᠡ ᠽᠠᠺᠠᠷᠢᠶᠠ ᠨᠢ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠴᠦ ᠡᠰᠢ ᠦᠵᠡᠭᠦᠯᠦᠨ᠄
68 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠡᠵᠡᠨ ᠮᠠᠭᠲᠠᠭᠳᠠᠬᠤ ᠪᠣᠯᠲᠤᠭᠠᠢ︕ ᠲᠡᠷᠡ ᠵᠠᠯᠠᠷᠠᠨ ᠢᠷᠡᠭᠡᠳ ᠠᠷᠠᠳ ᠲᠦᠮᠡᠨ ᠢᠶᠡᠨ ᠵᠣᠯᠢᠶᠠᠰᠤᠯᠠᠵᠤ ᠠᠪᠤᠭᠰᠠᠨ᠃
69 ᠲᠡᠷᠡ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠭᠡᠷ ᠲᠦ ᠪᠢᠳᠡᠨ ᠦ ᠲᠥᠯᠥᠭᠡ ᠠᠪᠤᠷᠠᠯ ᠤᠨ ᠡᠪᠡᠷ ᠢᠶᠡᠨ 2 ᠪᠣᠰᠬᠠᠵᠤ
70 ᠥᠨᠢ ᠡᠷᠲᠡᠨ ᠡᠴᠡ ᠠᠷᠢᠭᠤᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠢᠶᠠᠨ ᠠᠮᠠ ᠪᠠᠷ ᠠᠢᠯᠠᠳᠤᠭᠰᠠᠨ ᠢᠶᠠᠨ ᠢᠩᠭᠢᠵᠦ ᠪᠡᠶᠡᠯᠡᠭᠦᠯᠪᠡ᠃
71 ᠡᠢᠨ ᠬᠦ ᠡᠵᠡᠨ ᠳᠠᠢᠰᠤᠨ ᠨᠤᠭᠤᠳ ᠪᠠ ᠵᠠᠨᠤᠭᠰᠠᠳ ᠤᠨ ᠮᠠᠨᠢ ᠰᠠᠪᠠᠷ ᠠᠴᠠ ᠪᠢᠳᠡᠨ ᠢ ᠠᠪᠤᠷᠠᠵᠤ
72 ᠡᠴᠢᠭᠡ ᠡᠪᠦᠭᠡᠳ ᠲᠦ ᠮᠢᠨᠢ ᠠᠮᠠᠯᠠᠭᠰᠠᠨ ᠥᠷᠥᠰᠢᠶᠡᠯ ᠢᠶᠡᠨ ᠦᠵᠡᠭᠦᠯᠵᠡᠢ ᠲᠡᠷᠡ ᠪᠡᠷ ᠥᠪᠡᠷ ᠦᠨ ᠠᠷᠢᠭᠤᠨ ᠭᠡᠷᠡ
73 ᠳᠡᠭᠡᠳᠦᠰ ᠠᠪᠷᠠᠬᠠᠮ ᠳᠤ ᠮᠢᠨᠢ ᠥᠭᠭᠥᠭᠰᠡᠨ ᠲᠠᠩ᠋ᠭᠠᠷᠢᠭ ᠢᠶᠠᠨ ᠮᠠᠷᠲᠠᠭᠰᠠᠨ ᠦᠭᠡᠢ᠃
74 ᠡᠢᠨ ᠬᠦ ᠪᠢᠳᠡ ᠳᠠᠢᠰᠤᠨ ᠤ ᠭᠠᠷ ᠠᠴᠠ ᠭᠡᠲᠦᠯᠭᠡᠭᠳᠡᠵᠦ᠂ ᠠᠢᠳᠠᠰ ᠦᠭᠡᠢ ᠪᠣᠯᠣᠭᠠᠳ
75 ᠲᠡᠭᠦᠨ ᠦ ᠡᠮᠦᠨᠡ ᠠᠷᠢᠭᠤᠨ ᠬᠢᠭᠡᠳ ᠰᠢᠳᠤᠷᠭᠤ ᠪᠠᠷ ᠨᠠᠰᠤᠨ ᠲᠤᠷᠰᠢᠳᠠ ᠦᠢᠯᠡᠴᠢᠯᠡᠨᠡ᠃
76 ᠢᠩᠭᠢᠭᠡᠳ ᠬᠦᠦ ᠮᠢᠨᠢ ᠴᠢ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠬᠠᠮᠤᠭ ᠤᠨ ᠳᠡᠭᠡᠳᠦ ᠭᠡᠵᠦ ᠳᠠᠭᠤᠳᠠᠭᠳᠠᠨᠠ ᠡᠵᠡᠨ ᠦ ᠡᠮᠦᠨᠡ ᠶᠠᠪᠤᠵᠤ᠂ ᠵᠠᠮ ᠢ ᠨᠢ ᠪᠡᠯᠡᠳᠬᠡᠬᠦ ᠶᠢᠨ ᠤᠴᠢᠷ ᠡᠨᠡ ᠪᠢᠯᠡ᠃
77 ᠠᠷᠠᠳ ᠲᠦᠮᠡᠨ ᠳᠦᠨᠢ ᠭᠡᠮ ᠨᠢᠭᠦᠯ ᠢᠶᠡᠨ ᠠᠭᠤᠴᠢᠯᠠᠭᠤᠯᠤᠨ ᠠᠪᠤᠷᠠᠭᠳᠠᠬᠤ ᠶᠢ ᠮᠡᠳᠡᠭᠦᠯᠦᠨᠡ᠃
78 ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠡᠨᠡᠷᠢᠩᠭᠦᠢ ᠥᠷᠥᠰᠢᠶᠡᠯ ᠢᠶᠡᠷ ᠮᠠᠨᠳᠤᠬᠤ ᠨᠠᠷᠠ ᠲᠩᠷᠢ ᠡᠴᠡ ᠪᠢᠳᠡᠨ ᠦ ᠳᠡᠭᠡᠷᠡ ᠵᠠᠯᠠᠷᠠᠨ ᠢᠷᠡᠵᠦ
79 ᠦᠬᠦᠯ ᠦᠨ ᠰᠡᠭᠦᠳᠡᠷ ᠪᠠ ᠬᠠᠷᠠᠩ᠋ᠭᠤᠢ ᠳᠤ ᠰᠠᠭᠤᠭᠰᠠᠳ ᠢ ᠭᠡᠷᠡᠯᠲᠦᠭᠦᠯᠵᠦ ᠥᠪᠡᠷᠰᠡᠳ ᠦᠨ ᠮᠠᠨᠢ ᠬᠥᠯ ᠢ ᠡᠩᠬᠡ ᠲᠠᠢᠪᠤᠩ ᠤᠨ ᠵᠠᠮ ᠤᠷᠤᠭᠤ ᠴᠢᠭᠯᠡᠭᠦᠯᠦᠨᠡ》 ᠭᠡᠪᠡ᠃
80 ᠲᠡᠷᠡ ᠬᠡᠦᠬᠡᠳ ᠥᠰᠥᠭᠰᠡᠭᠡᠷ᠂ ᠤᠬᠠᠭᠠᠨ ᠰᠠᠨᠠᠭᠠ ᠪᠠᠷ ᠬᠦᠴᠦᠷᠬᠡᠭ ᠪᠣᠯᠵᠠᠢ᠃ ᠲᠡᠷᠡ ᠢᠰᠷᠧᠯᠴᠦᠳ ᠲᠦ ᠢᠯᠡᠷᠡᠬᠦ ᠡᠳᠦᠷ ᠢᠶᠡᠨ ᠬᠦᠷᠲᠡᠯᠡ ᠴᠥᠯ ᠳᠤ ᠰᠠᠭᠤᠪᠠ᠃