ᠯᠦᠺ ᠠᠷᠪᠠᠨ ᠲᠠᠪᠤ
ᠠᠯᠳᠠᠭᠳᠠᠭᠰᠠᠨ ᠭᠠᠭᠴᠠ ᠬᠣᠨᠢ
1 ᠭᠠᠢᠯᠢᠴᠢᠳ ᠪᠠ ᠨᠢᠭᠦᠯᠲᠡᠳ ᠴᠥᠮ ᠢᠶᠡᠷ ᠢᠶᠠᠨ ᠢᠰᠦ᠋ᠰ ᠤᠨ ᠶᠠᠷᠢᠬᠤ ᠶᠢ ᠰᠣᠨᠣᠰᠬᠤ ᠪᠠᠷ ᠳᠡᠷᠭᠡᠳᠡ ᠨᠢ ᠴᠤᠭᠯᠠᠷᠠᠵᠤ ᠪᠠᠢᠪᠠ᠃ 2 ᠹᠠᠷᠢᠰᠠᠢᠴᠤᠳ ᠪᠠ ᠪᠢᠴᠢᠭᠲᠡᠳ᠄ 《ᠡᠨᠡ ᠬᠥᠮᠦᠨ ᠨᠢᠭᠦᠯᠲᠡᠨ ᠢ ᠬᠦᠯᠢᠶᠡᠨ ᠠᠪᠴᠤ ᠬᠠᠮᠲᠤ ᠪᠠᠷ ᠬᠣᠭᠣᠯᠠᠯᠠᠵᠤ ᠪᠠᠢᠨᠠ》 ᠭᠡᠵᠦ ᠳᠦᠳᠦᠨᠡᠯᠴᠡᠪᠡ᠃
3 ᠢᠰᠦ᠋ᠰ ᠲᠡᠳᠡᠨ ᠳᠦ ᠦᠯᠢᠭᠡᠷᠯᠡᠯ ᠢᠶᠡᠷ᠄ 4 《ᠲᠠ ᠨᠠᠷ ᠤᠨ ᠬᠡᠨ ᠨᠢᠭᠡ ᠨᠢ ᠵᠠᠭᠤᠨ ᠬᠣᠨᠢ ᠲᠠᠢ ᠪᠠᠢᠭᠠᠳ ᠨᠢᠭᠡ ᠶᠢ ᠨᠢ ᠠᠯᠳᠠᠪᠠᠯ ᠶᠡᠷᠡ ᠶᠢᠰᠦᠨ ᠬᠣᠨᠢ ᠪᠠᠨ ᠪᠡᠯᠴᠢᠭᠡᠷ ᠲᠤᠨᠢ ᠦᠯᠡᠳᠡᠭᠡᠵᠦ ᠨᠥᠭᠥᠭᠡ ᠬᠣᠨᠢ ᠪᠠᠨ ᠣᠯᠲᠠᠯᠠ ᠪᠠᠨ ᠬᠥᠭᠡᠭᠡᠴᠡᠯᠳᠦᠬᠦ ᠪᠢᠰᠢ ᠤᠤ︖ 5 ᠣᠯᠴᠢᠬᠠᠪᠠᠯ ᠪᠠᠶᠠᠷ ᠲᠠᠢ ᠮᠥᠷᠥᠯᠡᠭᠡᠳ 6 ᠭᠡᠷ ᠲᠡᠭᠡᠨ ᠬᠠᠷᠢᠵᠤ᠂ ᠨᠠᠢᠵᠠ ᠨᠠᠷ ᠪᠣᠯᠣᠨ ᠬᠥᠷᠰᠢ ᠨᠦᠭᠦᠳ ᠢᠶᠡᠨ ᠴᠤᠭᠯᠠᠭᠤᠯᠤᠨ᠄ 〈ᠬᠠᠮᠲᠤ ᠪᠠᠶᠠᠷᠯᠠᠵᠠᠭᠠᠶᠠ︕ ᠪᠢ ᠠᠯᠳᠠᠭᠰᠠᠨ ᠬᠣᠨᠢ ᠪᠠᠨ ᠣᠯᠴᠢᠬᠠᠯᠠ〉 ᠭᠡᠬᠦ ᠪᠣᠯᠣᠨᠠ᠃ 7 ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ ᠡᠭᠦᠨ ᠲᠡᠢ ᠠᠳᠠᠯᠢ ᠪᠠᠷ ᠭᠡᠮᠰᠢᠬᠦ ᠬᠡᠷᠡᠭ ᠦᠭᠡᠢ ᠶᠡᠷᠡ ᠶᠢᠰᠦᠨ ᠵᠥᠪᠲᠦ ᠬᠥᠮᠦᠨ ᠢ ᠪᠣᠳᠣᠪᠠᠯ᠂ ᠭᠡᠮᠰᠢᠭ᠍ᠴᠢ ᠭᠠᠭᠴᠠ ᠨᠢᠭᠦᠯᠲᠡᠨ ᠦ ᠤᠴᠢᠷ ᠲᠤ ᠲᠩᠷᠢ ᠳᠡᠭᠡᠷᠡ ᠢᠯᠡᠭᠦᠦ ᠪᠠᠶᠠᠷ ᠪᠣᠯᠣᠨᠠ᠃
ᠠᠯᠳᠠᠭᠳᠠᠭᠰᠠᠨ ᠮᠥᠩᠭᠥᠨ ᠵᠣᠭᠣᠰ
8 ᠨᠢᠭᠡᠨ ᠡᠮᠡᠭᠲᠡᠢ ᠳᠦ ᠠᠷᠪᠠᠨ ᠮᠥᠩᠭᠥᠨ ᠵᠣᠭᠣᠰ 19 ᠪᠠᠢᠵᠠᠢ᠃ ᠬᠡᠷᠪᠡ ᠨᠢᠭᠡ ᠶᠢ ᠨᠢ ᠠᠯᠳᠠᠴᠢᠬᠠᠪᠠᠯ᠂ ᠳ᠋ᠧᠩ ᠢᠶᠠᠨ ᠠᠰᠠᠭᠠᠵᠤ ᠭᠡᠷ ᠢᠶᠡᠨ ᠱᠦᠭᠦᠷᠳᠡᠵᠦ᠂ ᠣᠯᠲᠠᠯᠠ ᠪᠠᠨ ᠨᠢᠮᠪᠠᠢ ᠡᠷᠢᠬᠦ ᠦᠭᠡᠢ ᠤᠤ︖ 9 ᠣᠯᠴᠢᠬᠠᠪᠠᠯ᠂ ᠨᠠᠢᠵᠠ ᠨᠠᠷ ᠪᠣᠯᠣᠨ ᠬᠥᠷᠰᠢ ᠨᠦᠭᠦᠳ ᠢᠶᠡᠨ ᠴᠤᠭᠯᠠᠭᠤᠯᠤᠭᠠᠳ᠄ 〈ᠬᠠᠮᠲᠤ ᠪᠠᠶᠠᠷᠯᠠᠵᠠᠭᠠᠶᠠ︕ ᠪᠢ ᠠᠯᠳᠠᠭᠰᠠᠨ ᠵᠣᠭᠣᠰ ᠢᠶᠠᠨ ᠣᠯᠴᠢᠬᠠᠯᠠ〉 ᠭᠡᠬᠦ ᠪᠣᠯᠣᠨᠠ᠃ 10 ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ ᠡᠭᠦᠨ ᠲᠡᠢ ᠠᠳᠠᠯᠢ ᠪᠠᠷ ᠨᠢᠭᠡ ᠨᠢᠭᠦᠯᠲᠡᠨ ᠭᠡᠮᠰᠢᠪᠡᠯ᠂ ᠪᠤᠷᠬᠠᠨ ᠤ ᠡᠯᠴᠢᠳ ᠤᠨ ᠡᠮᠦᠨᠡ ᠪᠠᠶᠠᠷ ᠪᠣᠯᠳᠠᠭ ᠶᠤᠮ》 ᠭᠡᠪᠡ᠃
ᠲᠠᠩ᠋ᠬᠠᠢ ᠬᠦᠦ ᠶᠢᠨ ᠦᠯᠢᠭᠡᠷᠯᠡᠯ
11 ᠢᠰᠦ᠋ᠰ ᠪᠠᠰᠠ᠄ 《ᠨᠢᠭᠡ ᠬᠥᠮᠦᠨ ᠬᠣᠶᠠᠷ ᠬᠦᠦ ᠲᠠᠢ ᠪᠠᠢᠵᠠᠢ᠃ 12 ᠪᠠᠭᠠ ᠬᠦᠦ ᠨᠢ ᠡᠴᠢᠭᠡ ᠳᠡᠭᠡᠨ᠄ 〈ᠠᠪᠤ ᠡ᠂ ᠥᠮᠴᠢ ᠡᠴᠡ ᠪᠡᠨ ᠮᠢᠨᠦ ᠬᠤᠪᠢ ᠶᠢ ᠥᠭᠭᠥᠭᠡᠴᠢ〉 ᠭᠡᠰᠡᠨ ᠳᠦ᠂ ᠡᠴᠢᠭᠡ ᠨᠢ ᠬᠥᠷᠥᠩᠭᠡ ᠪᠡᠨ ᠬᠤᠪᠢᠶᠠᠵᠤ ᠥᠭᠪᠡ᠃ 13 ᠬᠡᠳᠦᠨ ᠬᠣᠨᠣᠭ ᠤᠨ ᠳᠠᠷᠠᠭᠠ᠂ ᠪᠠᠭᠠ ᠬᠦᠦ ᠨᠢ ᠬᠠᠮᠤᠭ ᠶᠠᠭᠤᠮᠠ ᠪᠠᠨ ᠴᠤᠭᠯᠠᠭᠤᠯᠤᠨ ᠠᠯᠤᠰ ᠨᠤᠲᠤᠭ ᠤᠷᠤᠭᠤ ᠶᠠᠪᠤᠵᠠᠢ᠃ ᠲᠡᠷᠡ ᠲᠡᠨᠳᠡ ᠲᠠᠩ᠋ᠬᠠᠢ ᠠᠮᠢᠳᠤᠷᠠᠵᠤ ᠥᠮᠴᠢ ᠪᠠᠨ ᠦᠷᠡᠪᠡ᠃ 14 ᠲᠡᠢᠨ ᠬᠦ ᠪᠠᠢᠭᠰᠠᠨ ᠪᠦᠬᠦᠨ ᠢᠶᠡᠨ ᠪᠠᠷᠠᠲᠠᠯᠠ ᠲᠡᠷᠡ ᠨᠤᠲᠤᠭ ᠳᠠᠶᠠᠭᠠᠷ ᠶᠡᠬᠡ ᠥᠯᠥᠰᠬᠥᠯᠡᠩ ᠪᠣᠯᠵᠠᠢ᠃ ᠲᠡᠷᠡ ᠭᠠᠴᠢᠭᠳᠠᠭᠠᠳ 15 ᠲᠡᠷᠡ ᠨᠤᠲᠤᠭ ᠤᠨ ᠨᠢᠭᠡᠨ ᠢᠷᠭᠡᠨ ᠦ ᠳᠦ ᠬᠦᠷᠴᠦ ᠬᠥᠯᠥᠰᠥᠯᠡᠭᠳᠡᠪᠡ᠃ ᠴᠠᠭᠠᠲᠤᠬᠢ ᠨᠢ ᠲᠡᠭᠦᠨ ᠢ ᠲᠠᠷᠢᠶᠠᠨ ᠳᠡᠭᠡᠷᠡ ᠶᠠᠪᠤᠭᠤᠯᠵᠤ ᠭᠠᠬᠠᠢ ᠲᠡᠵᠢᠭᠡᠯᠭᠡᠵᠡᠢ᠃ 16 ᠲᠡᠷᠡ ᠭᠠᠬᠠᠢ ᠲᠡᠵᠢᠭᠡᠳᠡᠭ ᠪᠤᠷᠴᠠᠭ ᠢᠶᠠᠷ ᠴᠤ ᠭᠡᠰᠡᠨ ᠥᠯ ᠵᠠᠯᠭᠠᠬᠤ ᠶᠤᠮᠰᠠᠨ ᠭᠡᠵᠦ ᠬᠦᠰᠡᠭᠰᠡᠨ ᠪᠣᠯᠪᠠᠴᠤ ᠥᠭᠭᠥᠭᠰᠡᠨ ᠬᠥᠮᠦᠨ ᠠᠯᠠᠭᠠ ᠪᠠᠢᠯᠠ᠃ 17 ᠲᠡᠭᠡᠭᠡᠳ ᠲᠡᠷᠡ ᠤᠬᠠᠭᠠᠷᠠᠵᠤ᠂ ᠡᠴᠢᠭᠡ ᠶᠢᠨ ᠮᠢᠨᠢ ᠲᠡᠢᠮᠦ ᠣᠯᠠᠨ ᠬᠥᠯᠥᠰᠥᠨ ᠦ ᠬᠥᠮᠦᠨ ᠬᠦᠨᠡᠰᠦ ᠬᠣᠭᠣᠯᠠ ᠪᠠᠷ ᠡᠯᠪᠡᠭ ᠪᠠᠢᠬᠤ ᠳᠤ ᠪᠢ ᠬᠠᠷᠢᠨ ᠡ᠊ᠨᠳᠡ ᠥᠯᠪᠡᠷᠴᠦ ᠦᠬᠦᠬᠦ ᠨᠢ ᠡ᠃ 18 ᠣᠳᠣ ᠪᠢ ᠭᠠᠷᠴᠤ ᠡᠴᠢᠭᠡ ᠳᠡᠭᠡᠨ ᠣᠴᠢᠭᠠᠳ᠄ 〈ᠠᠪᠤ ᠡ᠂ ᠪᠢ ᠲᠩᠷᠢ ᠪᠠ ᠲᠠᠨ ᠤ ᠡᠮᠦᠨᠡ ᠨᠢᠭᠦᠯ ᠦᠢᠯᠡᠳᠴᠡᠢ᠃ 19 ᠪᠢ ᠠᠬᠢᠭᠠᠳ ᠲᠠᠨ ᠤ ᠬᠦᠦ ᠭᠡᠭᠳᠡᠵᠦ ᠵᠣᠬᠢᠬᠤ ᠦᠭᠡᠢ᠂ ᠲᠠ ᠨᠠᠮᠠᠶᠢ ᠬᠥᠯᠥᠰᠥᠨ ᠦ ᠬᠥᠮᠦᠨ ᠢᠶᠡᠨ ᠪᠣᠯᠭᠠᠭᠠᠴᠢ ᠭᠡᠵᠦ ᠬᠡᠯᠡᠶᠡ〉 ᠬᠡᠮᠡᠨ ᠪᠣᠳᠣᠭᠠᠳ 20 ᠲᠡᠷᠡ ᠭᠠᠷᠴᠤ᠂ ᠠᠪᠤ ᠤᠷᠤᠭᠤ ᠪᠠᠨ ᠶᠠᠪᠤᠵᠠᠢ᠃ ᠬᠠᠷᠢᠨ ᠡᠴᠢᠭᠡ ᠨᠢ ᠲᠡᠭᠦᠨ ᠦ ᠠᠢᠰᠤᠢ ᠶᠢ ᠬᠣᠯᠠ ᠠᠴᠠ ᠬᠠᠷᠠᠭᠠᠳ ᠥᠷᠥ ᠡᠪᠡᠳᠦᠨ ᠭᠦᠶᠦᠵᠦ ᠬᠦᠷᠦᠭᠡᠳ ᠬᠦᠵᠦᠭᠦᠦ ᠪᠡᠷ ᠨᠢ ᠲᠡᠪᠡᠷᠢᠵᠦ ᠦᠨᠦᠰᠪᠡ᠃ 21 ᠬᠦᠦ ᠨᠢ᠄ 〈ᠠᠪᠤ ᠡ᠂ ᠪᠢ ᠲᠩᠷᠢ ᠪᠠ ᠲᠠᠨ ᠤ ᠡᠮᠦᠨᠡ ᠨᠢᠭᠦᠯ ᠦᠢᠯᠡᠳᠴᠡᠢ᠃ ᠪᠢ ᠠᠬᠢᠭᠠᠳ ᠲᠠᠨ ᠤ ᠬᠦᠦ ᠭᠡᠭᠳᠡᠵᠦ ᠵᠣᠬᠢᠬᠤ ᠦᠭᠡᠢ ᠪᠢᠯᠡ〉 ᠭᠡᠰᠡᠨ ᠳᠦ᠂ 22 ᠡᠴᠢᠭᠡ ᠨᠢ ᠵᠠᠷᠤᠴᠠ ᠨᠠᠷ ᠲᠠᠭᠠᠨ᠄ 〈ᠬᠤᠷᠳᠤᠬᠠᠨ ᠬᠠᠮᠤᠭ ᠤᠨ ᠰᠠᠢᠨ ᠳᠡᠪᠡᠯ ᠠᠪᠴᠢᠷᠠᠵᠤ ᠲᠡᠭᠦᠨ ᠳᠦ ᠡᠮᠦᠰᠬᠡ᠃ ᠬᠤᠷᠤᠭᠤᠨ ᠳᠤᠨᠢ ᠪᠥᠭᠡᠵᠢ ᠵᠡᠭᠦᠯᠭᠡᠵᠦ᠂ ᠬᠥᠯ ᠳᠦᠨᠢ ᠱᠠᠬᠠᠢ ᠡᠮᠦᠰᠬᠡ᠃ 23 ᠪᠠᠰᠠ ᠲᠠᠷᠭᠤᠨ ᠲᠤᠭᠤᠯ ᠠᠪᠴᠢᠷᠠᠵᠤ ᠨᠢᠲᠤᠯ᠂ ᠬᠠᠮᠲᠤ ᠢᠳᠡᠵᠦ ᠨᠠᠢᠷᠯᠠᠶᠠ᠃ 24 ᠡᠨᠡ ᠬᠦᠦ ᠮᠠᠨᠢ ᠦᠬᠦᠭᠡᠳ ᠠᠮᠢᠯᠠᠵᠤ᠂ ᠠᠯᠳᠠᠭᠳᠠᠭᠠᠳ ᠣᠯᠳᠠᠵᠠᠢ〉 ᠭᠡᠪᠡ᠃ ᠲᠡᠳᠡ ᠨᠠᠢᠷᠯᠠᠵᠤ ᠡᠬᠢᠯᠡᠪᠡ᠃
25 ᠲᠡᠭᠡᠬᠦ ᠳᠦ᠂ ᠤᠤᠭᠠᠨ ᠬᠦᠦ ᠨᠢ ᠲᠠᠷᠢᠶᠠᠨ ᠳᠡᠭᠡᠷᠡ ᠪᠡᠨ ᠪᠠᠢᠵᠠᠢ᠃ ᠲᠡᠷᠡ ᠪᠤᠴᠠᠵᠤ ᠭᠡᠷ ᠲᠡᠭᠡᠨ ᠣᠢᠷᠠᠲᠤᠵᠤ ᠢᠷᠡᠬᠦ ᠳᠡᠭᠡᠨ᠂ ᠬᠥᠭᠵᠢᠮ ᠪᠥᠵᠢᠭ ᠦᠨ ᠴᠢᠮᠡᠭᠡ ᠶᠢ ᠰᠣᠨᠣᠰᠣᠭᠠᠳ᠂ 26 ᠵᠠᠷᠤᠴᠠ ᠨᠠᠷ ᠤᠨ ᠢᠶᠠᠨ ᠨᠢᠭᠡ ᠶᠢ ᠳᠠᠭᠤᠳᠠᠵᠤ ᠶᠠᠭᠤ ᠪᠣᠯᠵᠤ ᠪᠠᠢᠬᠤ ᠶᠢ ᠠᠰᠠᠭᠤᠵᠠᠢ᠃ 27 ᠵᠠᠷᠤᠴᠠ ᠨᠢ᠄ 〈ᠳᠡᠭᠦᠦ ᠴᠢᠨᠢ ᠬᠠᠷᠢᠵᠤ ᠢᠷᠡᠭᠰᠡᠨ᠂ ᠠᠪᠤ ᠴᠢᠨᠢ ᠡᠷᠡᠭᠦᠯ ᠮᠡᠨᠳᠦ ᠪᠡᠷ ᠢᠷᠡᠭᠰᠡᠨ ᠲᠡᠭᠦᠨ ᠢ ᠤᠭᠳᠤᠵᠤ ᠲᠠᠷᠭᠤᠨ ᠲᠤᠭᠤᠯ ᠨᠢᠳᠤᠯᠤᠭᠤᠯᠪᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠳᠦ᠂ 28 ᠠᠬᠠ ᠨᠢ ᠠᠭᠤᠷᠯᠠᠭᠠᠳ ᠭᠡᠷ ᠲᠡᠭᠡᠨ ᠣᠷᠣᠬᠤ ᠦᠭᠡᠢ ᠪᠠᠢᠯᠠ᠃ ᠠᠪᠤ ᠨᠢ ᠭᠠᠷᠴᠤ ᠢᠷᠡᠭᠡᠳ ᠲᠡᠭᠦᠨ ᠢ ᠠᠷᠭᠠᠳᠠᠭᠰᠠᠨ ᠳᠤ᠂ 29 ᠲᠡᠷᠡ᠄ 〈ᠬᠠᠷᠠ ᠳᠠ᠂ ᠪᠢ ᠡᠴᠢᠨᠡᠨ ᠵᠢᠯ ᠲᠠᠨ ᠳᠤ ᠵᠠᠷᠤᠭᠳᠠᠯᠠ᠂ ᠲᠠᠨ ᠤ ᠵᠠᠷᠯᠢᠭ ᠢ ᠪᠢ ᠶᠡᠷᠦ ᠵᠥᠷᠢᠴᠡᠭᠡ ᠦᠭᠡᠢ᠃ ᠭᠡᠪᠡᠴᠦ ᠲᠠ ᠨᠠᠳᠠ ᠳᠤ᠄ 〈ᠨᠥᠬᠥᠳ ᠲᠡᠢ ᠪᠡᠨ ᠨᠠᠢᠷᠯᠠ〉 ᠭᠡᠵᠦ ᠭᠠᠭᠴᠠ ᠢᠰᠢᠭᠡ ᠴᠤ ᠥᠭᠴᠦ ᠪᠠᠢᠭᠠ ᠦᠭᠡᠢ᠃ 30 ᠬᠠᠷᠢᠨ ᠬᠥᠷᠥᠩᠭᠡ ᠶᠢ ᠴᠢᠨᠢ ᠶᠠᠩ᠋ᠬᠠᠨ ᠨᠤᠭᠤᠳ ᠲᠠᠢ ᠨᠡᠢᠯᠡᠵᠦ ᠢᠳᠡᠴᠢᠭᠡᠭᠰᠡᠨ ᠡᠨᠡ ᠬᠦᠦ ᠪᠡᠨ ᠢᠷᠡᠬᠦ ᠳᠦ᠂ ᠲᠡᠭᠦᠨ ᠦ ᠲᠥᠯᠥᠭᠡ ᠲᠠᠷᠭᠤᠨ ᠲᠤᠭᠤᠯ ᠨᠢᠲᠤᠯᠵᠤ ᠥᠭᠭᠥᠭᠰᠡᠨ ᠶᠤᠮ ᠪᠠᠢᠨᠠ〉 ᠭᠡᠬᠦ ᠳᠦ᠂ 31 ᠡᠴᠢᠭᠡ ᠨᠢ᠄ 〈ᠮᠢᠨᠦ ᠬᠦᠦ᠂ ᠴᠢ ᠨᠠᠳᠠ ᠲᠠᠢ ᠦᠷᠭᠦᠯᠵᠢ ᠬᠠᠮᠲᠤ ᠪᠠᠢᠳᠠᠭ᠂ ᠮᠢᠨᠦ ᠶᠠᠭᠤᠮᠠ ᠪᠦᠬᠦᠨ ᠴᠢᠨᠦᠬᠢ ᠰᠢᠦ ᠳᠠ᠃ 32 ᠬᠠᠷᠢᠨ ᠡᠨᠡ ᠳᠡᠭᠦᠦ ᠴᠢᠨᠢ ᠦᠬᠦᠭᠡᠳ ᠠᠮᠢᠯᠠᠵᠤ᠂ ᠠᠯᠳᠠᠭᠳᠠᠭᠠᠳ ᠣᠯᠳᠠᠭᠰᠠᠨ ᠲᠤᠯᠠ ᠪᠢᠳᠡ ᠨᠠᠢᠷᠯᠠᠬᠤ ᠤᠴᠢᠷ ᠲᠠᠢ〉》 ᠭᠡᠵᠡᠢ᠃