ᠯᠦᠺ ᠲᠠᠪᠤ
ᠠᠩ᠋ᠬᠠᠨ ᠤ ᠱᠠᠪᠢ ᠨᠠᠷ
1 ᠨᠢᠭᠡᠨ ᠡᠳᠦᠷ ᠢᠰᠦ᠋ᠰ ᠭᠧᠨᠧᠰᠠᠷᠧᠲ ᠨᠠᠭᠤᠷ 6 ᠤᠨ ᠬᠥᠪᠡᠭᠡᠨ ᠳᠦ ᠵᠣᠭᠰᠣᠵᠤ ᠪᠠᠢᠪᠠ᠃ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠡᠴᠡ ᠪᠤᠷᠬᠠᠨ ᠤ ᠦᠭᠡ ᠶᠢ ᠰᠣᠨᠣᠰᠴᠤ ᠲᠡᠭᠦᠨ ᠦ ᠵᠦᠭ ᠰᠢᠬᠠᠯᠴᠠᠵᠤ ᠪᠠᠢᠬᠤ ᠳᠤ᠂ 2 ᠲᠡᠷᠡ ᠪᠡᠷ ᠨᠠᠭᠤᠷ ᠤᠨ ᠬᠥᠪᠡᠭᠡᠨ ᠳᠠᠬᠢ ᠬᠣᠶᠠᠷ ᠵᠠᠪᠢ ᠶᠢ ᠣᠯᠵᠤ ᠦᠵᠡᠵᠡᠢ᠃ ᠵᠢᠭᠠᠰᠤᠴᠢᠳ ᠨᠢ ᠵᠠᠪᠢ ᠡᠴᠡ ᠪᠡᠨ ᠪᠠᠭᠤᠭᠠᠳ ᠲᠣᠣᠷ ᠢᠶᠠᠨ ᠤᠬᠢᠶᠠᠵᠤ ᠪᠠᠢᠯᠠ᠃ 3 ᠨᠢᠭᠡ ᠵᠠᠪᠢ ᠨᠢ ᠰᠢᠮᠣᠨ ᠤ ᠬᠢ ᠪᠠᠢᠵᠠᠢ᠃ ᠢᠰᠦ᠋ᠰ ᠲᠡᠭᠦᠨ ᠦ ᠵᠠᠪᠢ ᠳᠡᠭᠡᠷᠡ ᠭᠠᠷᠤᠭᠠᠳ ᠡᠷᠭᠢ ᠡᠴᠡ ᠵᠢᠭᠠᠬᠠᠨ ᠬᠣᠯᠠᠳᠠᠭᠤᠯᠬᠤ ᠶᠢ ᠭᠤᠶᠤᠭᠰᠠᠨ ᠢᠶᠠᠨ ᠰᠠᠭᠤᠵᠤ᠂ ᠵᠠᠪᠢ ᠳᠡᠭᠡᠷᠡ ᠡᠴᠡ ᠣᠯᠠᠨ ᠬᠥᠮᠦᠨ ᠳᠦ ᠵᠢᠭᠠᠵᠤ ᠡᠬᠢᠯᠡᠯᠡ᠃ 4 ᠢᠰᠦ᠋ᠰ ᠠᠢᠯᠠᠳᠴᠤ ᠳᠠᠭᠤᠰᠤᠭᠠᠳ᠂ ᠰᠢᠮᠣᠨ ᠳᠤ᠄ 《ᠭᠦᠨ ᠤᠷᠤᠭᠤ ᠶᠠᠪᠤᠵᠤ ᠲᠣᠣᠷ ᠢᠶᠠᠨ ᠬᠠᠶᠠ᠂ ᠵᠢᠭᠠᠰᠤ ᠪᠠᠷᠢ》 ᠭᠡᠬᠦ ᠳᠦ 5 ᠰᠢᠮᠣᠨ᠄ 《ᠪᠠᠭᠰᠢ ᠡ᠂ ᠪᠢᠳᠡ ᠰᠥᠨᠢᠵᠢᠨ ᠵᠦᠳᠡᠷᠡᠭᠡᠳ ᠶᠠᠭᠤ ᠴᠤ ᠣᠯᠣᠭᠰᠠᠨ ᠦᠭᠡᠢ᠂ ᠭᠡᠪᠡᠴᠦ ᠲᠠᠨ ᠤ ᠦᠭᠡ ᠪᠡᠷ ᠲᠣᠣᠷ ᠢᠶᠠᠨ ᠬᠠᠶᠠᠵᠤ ᠦᠵᠡᠶᠡ ᠯᠠ ᠳᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 6 ᠢᠩᠭᠢᠭᠡᠳ ᠲᠡᠳᠡ ᠮᠠᠰᠢ ᠣᠯᠠᠨ ᠵᠢᠭᠠᠰᠤ ᠪᠠᠷᠢᠭᠰᠠᠨ ᠳᠤ᠂ ᠲᠣᠣᠷ ᠨᠢ ᠤᠷᠠᠭᠳᠠᠵᠤ ᠡᠬᠢᠯᠡᠪᠡ᠃ 7 ᠲᠡᠭᠡᠭᠡᠳ ᠨᠥᠭᠥᠭᠡ ᠵᠠᠪᠢ ᠳᠡᠭᠡᠷᠡᠬᠢ ᠨᠥᠬᠥᠳ ᠢᠶᠡᠷ ᠢᠶᠠᠨ ᠲᠤᠰᠠᠯᠠᠭᠤᠯᠬᠤ ᠭᠡᠵᠦ ᠳᠠᠯᠠᠯᠬᠤ ᠳᠤ᠂ ᠲᠡᠳᠡ ᠢᠷᠡᠭᠡᠳ ᠬᠣᠶᠠᠷ ᠵᠠᠪᠢ ᠶᠢ ᠳᠦᠭᠦᠷᠭᠡᠪᠡ᠃ ᠵᠠᠪᠢ ᠨᠢ ᠵᠢᠪᠪᠦᠮᠡᠷ ᠪᠣᠯᠣᠯᠠ᠃ 8 ᠰᠢᠮᠣᠨ ᠫᠧᠲ᠋ᠧᠷ ᠡᠭᠦᠨ ᠢ ᠬᠠᠷᠠᠭᠠᠳ᠂ ᠢᠰᠦ᠋ᠰ ᠤᠨ ᠡᠪᠦᠳᠦᠭ ᠳᠣᠣᠷᠠ ᠡᠯᠢᠭᠡᠳᠡᠨ ᠤᠨᠠᠵᠤ᠄ 《ᠡᠵᠡᠨ ᠡ᠂ ᠪᠢ ᠨᠢᠭᠦᠯ ᠲᠡᠢ ᠬᠥᠮᠦᠨ ᠪᠠᠢᠨᠠ᠂ ᠨᠠᠳᠠ ᠠᠴᠠ ᠬᠣᠯᠠᠳᠠᠭᠠᠴᠢ》 ᠭᠡᠯᠡ᠃ 9 ᠤᠴᠢᠷ ᠨᠢ ᠫᠧᠲ᠋ᠧᠷ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠰᠠᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠡᠢᠨ ᠬᠦ ᠵᠢᠭᠠᠰᠤ ᠪᠠᠷᠢᠭᠰᠠᠨ ᠳᠠᠭᠠᠨ ᠠᠶᠤᠨ ᠰᠣᠴᠢᠵᠠᠢ᠃ 10 ᠰᠢᠮᠣᠨ ᠲᠠᠢ ᠬᠣᠷᠰᠢᠭᠴᠢ ᠽᠧᠪᠧᠳᠠᠢ ᠶᠢᠨ ᠬᠣᠶᠠᠷ ᠬᠦᠦ ᠶᠠᠺᠣᠪ᠂ ᠶᠣᠬᠠᠨ ᠨᠠᠷ ᠴᠤ ᠭᠠᠢᠬᠠᠵᠤ ᠪᠠᠢᠯᠠ᠃ ᠢᠰᠦ᠋ᠰ ᠰᠢᠮᠣᠨ ᠳᠤ᠄ 《ᠪᠦᠦ ᠠᠶᠤ︕ ᠡᠭᠦᠨ ᠡᠴᠡ ᠬᠣᠢᠰᠢ ᠴᠢ ᠬᠥᠮᠦᠨ ᠤᠯᠳᠠᠭ ᠪᠣᠯᠣᠨᠠ》 ᠭᠡᠪᠡ᠃ 11 ᠲᠡᠳᠡ ᠵᠠᠪᠢ ᠪᠠᠨ ᠬᠥᠪᠡᠭᠡᠨ ᠳᠦ ᠬᠦᠷᠭᠡᠭᠡᠳ᠂ ᠪᠦᠬᠦᠨ ᠢᠶᠡᠨ ᠣᠷᠬᠢᠵᠤ ᠢᠰᠦ᠋ᠰ ᠢ ᠳᠠᠭᠠᠯᠠ᠃
ᠤᠶᠠᠮᠠᠨ ᠡᠪᠡᠳᠴᠢᠲᠡᠨ ᠪᠠ ᠰᠠ ᠡᠪᠡᠳᠴᠢᠲᠡᠨ
12 ᠢᠰᠦ᠋ᠰ ᠨᠢᠭᠡᠨ ᠲᠣᠰᠬᠣᠨ ᠳᠤ ᠪᠠᠢᠬᠤ ᠳᠤ᠂ ᠥᠪᠴᠢ ᠪᠡᠶᠡ ᠤᠶᠠᠮᠠᠨ 7 ᠡᠪᠡᠳᠴᠢᠨ ᠲᠡᠢ ᠨᠢᠭᠡ ᠬᠥᠮᠦᠨ ᠲᠡᠭᠦᠨ ᠢ ᠦᠵᠡᠭᠡᠳ ᠭᠠᠵᠠᠷ ᠲᠤ ᠨᠢᠭᠤᠷ ᠢᠶᠠᠨ ᠨᠠᠭᠠᠵᠤ᠄ 《ᠡᠵᠡᠨ ᠡ᠂ ᠲᠠ ᠬᠦᠰᠡᠳᠡᠭ ᠯᠠ ᠶᠤᠮ ᠪᠣᠯ ᠨᠠᠮᠠᠶᠢ ᠴᠡᠪᠡᠷᠰᠢᠭᠦᠯᠵᠦ ᠴᠢᠳᠠᠨᠠ》 ᠭᠡᠵᠦ ᠭᠤᠶᠤᠯᠠ᠃ 13 ᠢᠰᠦ᠋ᠰ ᠮᠤᠲᠤᠷ ᠢᠶᠠᠨ ᠰᠤᠩ᠋ᠭᠠᠨ ᠲᠡᠭᠦᠨ ᠳᠦ ᠬᠦᠷᠭᠡᠵᠦ᠄ 《ᠪᠢ ᠬᠦᠰᠡᠵᠦ ᠪᠠᠢᠨᠠ᠂ ᠴᠡᠪᠡᠷᠰᠢ》 ᠭᠡᠬᠦ ᠳᠦ᠂ ᠥᠨᠥᠬᠢ ᠬᠥᠮᠦᠨ ᠦ ᠤᠶᠠᠮᠠᠨ ᠡᠪᠡᠳᠴᠢᠨ ᠲᠡᠷᠡ ᠳᠠᠷᠤᠢ ᠠᠷᠢᠯᠤᠯᠠ᠃ 14 ᠢᠰᠦ᠋ᠰ ᠲᠡᠭᠦᠨ ᠳᠦ ᠵᠠᠬᠢᠵᠤ᠄ 《ᠡᠭᠦᠨ ᠢ ᠬᠡᠨ ᠳᠦ ᠴᠤ ᠪᠢᠲᠡᠭᠡᠢ ᠶᠠᠷᠢᠭᠠᠷᠠᠢ᠃ ᠬᠠᠷᠢᠨ ᠲᠠᠬᠢᠯᠴᠢ ᠳᠤ ᠣᠴᠢᠭᠠᠳ ᠪᠡᠶᠡ ᠪᠡᠨ ᠦᠵᠡᠭᠦᠯᠵᠦ᠂ ᠴᠡᠪᠡᠷᠰᠢᠭᠰᠡᠨ ᠬᠥᠮᠦᠨ ᠦ ᠲᠤᠬᠠᠢ ᠮᠣᠰᠧ ᠶᠢᠨ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠡᠷᠭᠦᠯ ᠡᠷᠭᠦ᠂ ᠡᠢᠨ ᠬᠦ ᠴᠡᠪᠡᠷᠰᠢᠭᠰᠡᠨ ᠢᠶᠡᠨ ᠭᠡᠷᠡᠴᠢᠯᠡ》 ᠭᠡᠪᠡ᠃ 15 ᠢᠰᠦ᠋ᠰ ᠤᠨ ᠲᠤᠬᠠᠢ ᠶᠠᠷᠢᠶᠠ ᠤᠯᠠᠮ ᠢᠶᠠᠷ ᠲᠠᠷᠬᠠᠵᠤ᠂ ᠮᠠᠰᠢ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠦ ᠬᠢ ᠶᠢ ᠰᠣᠨᠣᠰᠬᠤ ᠪᠠ ᠡᠪᠡᠳᠴᠢᠨ ᠢᠶᠠᠨ ᠵᠠᠰᠠᠭᠤᠯᠬᠤ ᠭᠡᠵᠦ ᠴᠤᠭᠯᠠᠷᠠᠵᠤ ᠪᠠᠢᠯᠠ᠃ 16 ᠬᠠᠷᠢᠨ ᠢᠰᠦ᠋ᠰ ᠡᠵᠡᠭᠦᠢ ᠭᠠᠵᠠᠷ ᠢᠶᠠᠷ ᠵᠠᠢᠯᠠᠵᠤ ᠳᠠᠭᠠᠳᠬᠠᠳᠠᠭ ᠪᠠᠢᠪᠠ᠃
17 ᠨᠢᠭᠡᠨ ᠡᠳᠦᠷ ᠢᠰᠦ᠋ᠰ ᠰᠤᠷᠭᠠᠯ ᠵᠢᠭᠠᠵᠤ ᠪᠠᠢᠬᠤ ᠳᠤ᠂ ᠹᠠᠷᠢᠰᠠᠢᠴᠤᠳ ᠪᠣᠯᠣᠨ ᠬᠠᠤᠯᠢ ᠶᠢᠨ ᠪᠠᠭᠰᠢ ᠨᠠᠷ ᠴᠤ ᠲᠡᠨᠳᠡ ᠰᠠᠭᠤᠵᠤ ᠪᠠᠢᠵᠠᠢ᠃ ᠲᠡᠳᠡ ᠭᠠᠯᠢᠯᠠᠶᠠ᠂ ᠶᠦᠳᠠᠢ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠲᠣᠰᠬᠣᠨ ᠪᠦᠷᠢ ᠡᠴᠡ ᠢᠷᠡᠭᠰᠡᠨ ᠠᠵᠢ᠃ ᠡᠪᠡᠳᠴᠢᠨ ᠡᠳᠡᠭᠡᠭᠡᠬᠦ ᠡᠵᠡᠨ ᠦ ᠬᠦᠴᠦ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠪᠠᠢᠯᠠ᠃ 18 ᠲᠡᠭᠡᠲᠡᠯᠡ ᠬᠡᠳᠦᠨ ᠡᠷᠡ ᠨᠢᠭᠡᠨ ᠰᠠ ᠡᠪᠡᠳᠴᠢᠲᠡᠨ ᠢ ᠳᠡᠪᠢᠰᠬᠡᠷ ᠲᠡᠢ ᠨᠢ ᠠᠪᠴᠢᠷᠠᠪᠠ᠃ ᠲᠡᠳᠡ ᠡᠪᠡᠳᠴᠢᠲᠡᠨ ᠢ ᠢᠰᠦ᠋ᠰ ᠤᠨ ᠡᠮᠦᠨᠡ ᠲᠠᠯᠪᠢᠬᠤ ᠪᠠᠷ ᠳᠣᠲᠣᠭᠰᠢ ᠣᠷᠣᠭᠤᠯᠬᠤ ᠭᠡᠰᠡᠨ ᠪᠣᠯᠪᠠᠴᠤ 19 ᠬᠥᠮᠦᠨ ᠣᠯᠠᠨ᠂ ᠣᠷᠣᠬᠤ ᠪᠣᠯᠣᠮᠵᠢ ᠦᠭᠡᠢ ᠪᠣᠯᠬᠣᠷ ᠳᠡᠭᠡᠪᠦᠷ ᠳᠡᠭᠡᠷᠡ ᠭᠠᠷᠴᠤ᠂ ᠳᠡᠭᠡᠪᠦᠷ ᠦᠨ ᠨᠦᠬᠡ ᠪᠡᠷ ᠳᠡᠪᠢᠰᠬᠡᠷ ᠲᠡᠢ ᠨᠢ ᠣᠯᠠᠨ ᠤ ᠳᠤᠮᠳᠠ ᠢᠰᠦ᠋ᠰ ᠤᠨ ᠡᠮᠦᠨᠡ ᠪᠠᠭᠤᠯᠭᠠᠪᠠ᠃ 20 ᠢᠰᠦ᠋ᠰ ᠲᠡᠳᠡᠨ ᠦ ᠢᠲᠡᠭᠡᠯ ᠢ ᠬᠠᠷᠠᠭᠠᠳ᠄ 《ᠠᠨᠳᠠ ᠮᠢᠨᠢ᠂ ᠭᠡᠮ ᠨᠢᠭᠦᠯ ᠴᠢᠨᠢ ᠠᠭᠤᠴᠢᠯᠠᠭᠲᠠᠯᠠ》 ᠭᠡᠬᠦ ᠳᠦ᠂ 21 ᠬᠠᠤᠯᠢ ᠶᠢᠨ ᠪᠠᠭᠰᠢ ᠨᠠᠷ ᠪᠣᠯᠣᠨ ᠹᠠᠷᠢᠰᠠᠢᠴᠤᠳ᠄ 《ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠨ ᠶᠠᠷᠢᠵᠤ ᠪᠠᠢᠭᠠ ᠡᠨᠡ ᠬᠥᠮᠦᠨ ᠴᠢᠨᠢ ᠬᠡᠨ ᠪᠤᠢ︖ ᠭᠠᠭᠴᠠ ᠬᠦ ᠪᠤᠷᠬᠠᠨ ᠠᠴᠠ ᠥᠭᠡᠷᠡ ᠬᠡᠨ ᠭᠡᠮ ᠨᠢᠭᠦᠯ ᠢ ᠠᠭᠤᠴᠢᠯᠠᠵᠤ ᠴᠢᠳᠠᠬᠤ ᠪᠢᠯᠡ︖》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠠᠭᠠᠵᠠᠢ᠃ 22 ᠢᠰᠦ᠋ᠰ ᠲᠡᠳᠡᠨ ᠦ ᠪᠣᠳᠣᠯ ᠢ ᠮᠡᠳᠡᠭᠡᠳ᠄ 《ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠳᠣᠲᠣᠷᠠ ᠪᠠᠨ ᠲᠡᠭᠡᠵᠦ ᠪᠣᠳᠣᠵᠤ ᠪᠠᠢᠭᠠ ᠪᠤᠢ︖ 23 〈ᠭᠡᠮ ᠨᠢᠭᠦᠯ ᠴᠢᠨᠢ ᠠᠭᠤᠴᠢᠯᠠᠭᠲᠠᠯᠠ〉 ᠭᠡᠬᠦ᠂ ᠡᠰᠡᠬᠦᠯᠡ 〈ᠪᠣᠰᠣᠭᠠᠳ ᠠᠯᠬᠤ〉 ᠭᠡᠬᠦ ᠶᠢᠨ ᠠᠯᠢ ᠨᠢ ᠠᠮᠠᠷᠬᠠᠨ ᠪᠤᠢ︖ 24 ᠬᠠᠷᠢᠨ ᠬᠥᠮᠦᠨ ᠦ ᠬᠦᠦ ᠭᠠᠵᠠᠷ ᠳᠡᠭᠡᠷᠡ ᠭᠡᠮ ᠨᠢᠭᠦᠯ ᠢ ᠠᠭᠤᠴᠢᠯᠠᠬᠤ ᠡᠷᠬᠡ ᠮᠡᠳᠡᠯ ᠲᠡᠢ ᠶᠢ ᠲᠠ ᠨᠠᠷ ᠲᠤ ᠮᠡᠳᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ᠁》 ᠭᠡᠳ᠂ ᠰᠠ ᠡᠪᠡᠳᠴᠢᠲᠡᠨ ᠳᠦ᠄ 《ᠴᠢᠮᠠ ᠳᠤ ᠬᠡᠯᠡᠶᠡ᠂ ᠪᠣᠰ︕ ᠳᠡᠪᠢᠰᠬᠡᠷ ᠢᠶᠡᠨ ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢ》 ᠭᠡᠪᠡ᠃ 25 ᠥᠨᠥᠬᠢ ᠬᠥᠮᠦᠨ ᠲᠡᠷᠡ ᠳᠠᠷᠤᠢ ᠣᠯᠠᠨ ᠤ ᠡᠮᠦᠨᠡ ᠪᠣᠰᠴᠤ᠂ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠳᠡᠪᠢᠰᠬᠡᠷ ᠢᠶᠡᠨ ᠠᠪᠤᠭᠠᠳ ᠪᠤᠷᠬᠠᠨ ᠢ ᠮᠠᠭᠲᠠᠭᠰᠠᠭᠠᠷ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠯᠠ᠃ 26 ᠬᠥᠮᠦᠨ ᠪᠦᠬᠦᠨ ᠮᠡᠯᠡᠷᠡᠨ ᠭᠠᠢᠬᠠᠵᠤ᠂ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠤᠭᠰᠠᠨ ᠪᠥᠭᠡᠳ ᠶᠡᠬᠡᠳᠡ ᠠᠶᠤᠵᠤ᠄ 《ᠪᠢᠳᠡ ᠥᠨᠥᠳᠥᠷ ᠭᠠᠢᠬᠠᠯᠲᠠᠢ ᠵᠦᠢᠯᠡᠰ ᠢ ᠬᠠᠷᠠᠯᠠ》 ᠭᠡᠵᠡᠭᠡᠪᠡ᠃
ᠯᠧᠸᠢ (ᠮᠠᠲ᠋ᠠᠢ) ᠶᠢ ᠳᠠᠭᠤᠳᠠᠭᠰᠠᠨ ᠨᠢ
27 ᠳᠠᠷᠠᠭᠠ ᠨᠢ ᠢᠰᠦ᠋ᠰ ᠲᠡᠨᠳᠡ ᠡᠴᠡ ᠭᠠᠷᠴᠤ᠂ ᠯᠧᠸᠢ ᠭᠡᠬᠦ ᠭᠠᠢᠯᠢᠴᠢᠨ ᠤ ᠭᠠᠢᠯᠢ ᠶᠢᠨ ᠭᠠᠵᠠᠷ ᠲᠤ ᠰᠠᠭᠤᠭᠠ ᠶᠢ ᠬᠠᠷᠠᠭᠠᠳ᠄ 《ᠨᠠᠮᠠᠶᠢ ᠳᠠᠭᠠ》 ᠭᠡᠬᠦ ᠳᠦ᠂ 28 ᠲᠡᠷᠡ ᠪᠦᠬᠦᠨ ᠢᠶᠡᠨ ᠣᠷᠬᠢᠵᠤ ᠲᠡᠭᠦᠨ ᠢ ᠳᠠᠭᠠᠯᠠ᠃
29 ᠯᠧᠸᠢ ᠢᠰᠦ᠋ᠰ ᠲᠤ ᠵᠣᠷᠢᠭᠤᠯᠤᠨ ᠭᠡᠷ ᠲᠡᠭᠡᠨ ᠶᠡᠬᠡ ᠳᠠᠢᠯᠠᠯᠭᠠ ᠬᠢᠬᠦ ᠳᠦ᠂ ᠣᠯᠠᠨ ᠭᠠᠢᠯᠢᠴᠢᠨ ᠪᠣᠯᠣᠨ ᠥᠭᠡᠷᠡ ᠮᠠᠰᠢ ᠣᠯᠠᠨ ᠬᠥᠮᠦᠨ ᠲᠡᠳᠡᠨ ᠲᠡᠢ ᠬᠠᠮᠲᠤ ᠬᠣᠭᠣᠯᠠᠯᠠᠵᠤ ᠪᠠᠢᠯᠠ᠃ 30 ᠹᠠᠷᠢᠰᠠᠢᠴᠤᠳ ᠪᠣᠯᠣᠨ ᠲᠡᠳᠡᠨ ᠦ ᠬᠠᠤᠯᠢ ᠶᠢᠨ ᠪᠠᠭᠰᠢ ᠨᠠᠷ ᠢᠰᠦ᠋ᠰ ᠤᠨ ᠱᠠᠪᠢ ᠨᠠᠷ ᠲᠤ ᠳᠤᠷᠠ ᠦᠭᠡᠶᠢᠴᠡᠨ᠄ 《ᠲᠠ ᠨᠠᠷ ᠴᠢᠨᠢ ᠶᠠᠭᠠᠬᠢᠭᠠᠳ ᠭᠠᠢᠯᠢᠴᠢᠳ ᠪᠣᠯᠣᠨ 〈ᠨᠢᠭᠦᠯᠲᠡᠳ〉 ᠲᠠᠢ ᠬᠠᠮᠲᠤ ᠢᠳᠡᠵᠦ ᠤᠤᠭᠤᠳᠠᠭ ᠶᠤᠮ ᠪᠤᠢ︖》 ᠭᠡᠵᠦ ᠬᠡᠯᠡᠬᠦ ᠳᠦ᠂ 31 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠡᠷᠡᠭᠦᠯ ᠬᠥᠮᠦᠨ ᠳᠦ ᠡᠮᠴᠢ ᠬᠡᠷᠡᠭ ᠦᠭᠡᠢ᠂ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠳᠦ ᠬᠡᠷᠡᠭ ᠲᠡᠢ᠃ 32 ᠪᠢ ᠵᠥᠪᠲᠡᠨ ᠢ ᠪᠢᠰᠢ᠂ ᠬᠠᠷᠢᠨ 〈ᠨᠢᠭᠦᠯᠲᠡᠳ〉 ᠢ ᠳᠠᠭᠤᠳᠠᠵᠤ ᠭᠡᠮᠰᠢᠭᠦᠯᠬᠦ ᠪᠡᠷ ᠢᠷᠡᠭᠰᠡᠨ ᠶᠤᠮ》 ᠭᠡᠪᠡ᠃
33 ᠲᠡᠳᠡ ᠢᠰᠦ᠋ᠰ ᠲᠤ᠄ 《ᠶᠣᠬᠠᠨ ᠤ ᠱᠠᠪᠢ ᠨᠠᠷ ᠣᠯᠠᠨᠲᠠ ᠪᠠᠴᠠᠭ ᠪᠠᠷᠢᠵᠤ ᠳᠠᠭᠠᠳᠬᠠᠳᠠᠭ᠂ ᠹᠠᠷᠢᠰᠠᠢᠴᠤᠳ ᠤᠨ ᠱᠠᠪᠢ ᠨᠠᠷ ᠴᠤ ᠮᠥᠨ ᠠᠳᠠᠯᠢ ᠪᠠᠢᠲᠠᠯᠠ ᠲᠠᠨ ᠤ ᠱᠠᠪᠢ ᠨᠠᠷ ᠢᠳᠡᠵᠦ ᠤᠤᠭᠤᠵᠤ ᠯᠠ ᠪᠠᠢᠳᠠᠭ》 ᠭᠡᠵᠦ ᠬᠡᠯᠡᠬᠦ ᠳᠦ᠂ 34 ᠢᠰᠦ᠋ᠰ᠄ 《ᠬᠤᠷᠢᠮ ᠤᠨ ᠵᠣᠴᠢᠳ ᠰᠢᠨᠡ ᠬᠦᠷᠭᠡᠨ ᠲᠡᠢ ᠪᠡᠨ ᠬᠠᠮᠲᠤ ᠪᠠᠢᠬᠤ ᠵᠠᠭᠤᠷᠠ ᠲᠡᠳᠡᠨ ᠢ ᠪᠠᠴᠠᠭ ᠪᠠᠷᠢᠭᠤᠯᠵᠤ ᠪᠣᠯᠣᠨᠠ ᠤᠤ︖ 35 ᠬᠠᠷᠢᠨ ᠰᠢᠨᠡ ᠬᠦᠷᠭᠡᠨ ᠲᠡᠳᠡᠨ ᠡᠴᠡ ᠠᠪᠠᠴᠢᠭᠳᠠᠬᠤ ᠡᠳᠦᠷ ᠤᠳ ᠢᠷᠡᠨᠡ᠃ ᠲᠡᠷᠡ ᠦᠶᠡ ᠳᠦ ᠲᠡᠳᠡ ᠪᠠᠴᠠᠭ ᠪᠠᠷᠢᠬᠤ ᠪᠣᠯᠣᠨᠠ》 ᠭᠡᠪᠡ᠃ 36 ᠲᠡᠭᠡᠭᠡᠳ ᠲᠡᠷᠡ ᠪᠠᠰᠠ ᠦᠯᠢᠭᠡᠷᠯᠡᠯ ᠢᠶᠡᠷ᠄ 《ᠰᠢᠨᠡ ᠬᠤᠪᠴᠠᠰᠤᠨ ᠠᠴᠠ ᠤᠷᠠᠵᠤ ᠠᠪᠤᠭᠠᠳ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠪᠠᠨ ᠨᠥᠬᠥᠬᠦ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠂ ᠲᠡᠭᠡᠪᠡᠯ ᠰᠢᠨᠡ ᠬᠤᠪᠴᠠᠰᠤ ᠪᠠᠨ ᠤᠷᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠰᠢᠨᠡ ᠨᠥᠬᠥᠭᠡᠰᠦ ᠨᠢ ᠴᠤ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠲᠠᠢ ᠵᠣᠬᠢᠷᠠᠬᠤ ᠦᠭᠡᠢ ᠶᠤᠮ᠃ 37 ᠮᠥᠨ ᠬᠡᠨ ᠴᠤ ᠰᠢᠨᠡ ᠦᠵᠦᠮ ᠦᠨ ᠳᠠᠷᠠᠰᠤ ᠶᠢ ᠬᠠᠭᠤᠴᠢᠨ ᠲᠤᠯᠤᠮ ᠳᠤ ᠬᠢᠳᠡᠭ ᠦᠭᠡᠢ᠃ ᠲᠡᠭᠡᠪᠡᠯ ᠰᠢᠨᠡ ᠳᠠᠷᠠᠰᠤ ᠲᠤᠯᠤᠮ ᠢ ᠬᠠᠭᠠ ᠲᠠᠯᠪᠢᠵᠤ᠂ ᠳᠠᠷᠠᠰᠤ ᠨᠢ ᠠᠰᠬᠠᠭᠳᠠᠬᠤ ᠪᠥᠭᠡᠳ ᠲᠤᠯᠤᠮ ᠴᠤ ᠤᠷᠠᠭᠳᠠᠬᠤ ᠪᠣᠯᠣᠨᠠ᠃ 38 ᠰᠢᠨᠡ ᠦᠵᠦᠮ ᠦᠨ ᠳᠠᠷᠠᠰᠤ ᠶᠢ ᠰᠢᠨᠡ ᠲᠤᠯᠤᠮ ᠳᠤ ᠯᠠ ᠬᠢᠬᠦ ᠶᠣᠰᠣᠲᠠᠢ᠃ 39 ᠬᠠᠭᠤᠴᠢᠨ ᠦᠵᠦᠮ ᠦᠨ ᠳᠠᠷᠠᠰᠤ ᠤᠤᠭᠤᠭᠰᠠᠨ ᠬᠥᠮᠦᠨ ᠪᠣᠯᠭᠠᠨ ᠰᠢᠨᠡ ᠳᠠᠷᠠᠰᠤ ᠬᠦᠰᠡᠳᠡᠭ ᠦᠭᠡᠢ᠂ ᠬᠠᠷᠢᠨ 〈ᠬᠠᠭᠤᠴᠢᠨ ᠨᠢ ᠰᠠᠢᠨ〉 ᠭᠡᠵᠦ ᠬᠡᠯᠡᠨᠡ》 ᠭᠡᠪᠡ᠃