ᠯᠦᠺ ᠬᠣᠷᠢᠨ ᠭᠤᠷᠪᠠ
ᠢᠰᠦ᠋ᠰ ᠫᠢᠯᠠᠲ ᠲᠤ ᠪᠠᠢᠴᠠᠭᠠᠭᠳᠠᠭᠰᠠᠨ ᠨᠢ
1 ᠣᠯᠠᠨ ᠬᠥᠮᠦᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠣᠰᠴᠤ᠂ ᠢᠰᠦ᠋ᠰ ᠢ ᠫᠢᠯᠠᠲ ᠤᠨ ᠡᠮᠦᠨᠡ ᠠᠪᠠᠴᠢᠨ᠄ 2 《ᠡᠨᠡ ᠬᠥᠮᠦᠨ ᠮᠠᠨ ᠤ ᠦᠨᠳᠦᠰᠦᠲᠡᠨ ᠢ ᠲᠥᠭᠡᠷᠢᠭᠦᠯᠵᠦ᠂ ᠺᠠᠶᠧᠰᠠᠷ ᠲᠤ ᠲᠠᠲᠠᠪᠤᠷᠢ ᠥᠭᠬᠦ ᠶᠢ ᠬᠣᠷᠢᠭᠯᠠᠨ ᠥᠪᠡᠷ ᠢ ᠪᠠᠨ ᠬᠠᠭᠠᠨ ᠾᠷᠢᠰᠲ᠋ᠣᠰ ᠭᠡᠵᠦ ᠬᠡᠯᠡᠳᠡᠭ ᠢ ᠪᠢᠳᠡ ᠬᠠᠷᠠᠭᠰᠠᠨ》 ᠭᠡᠵᠦ ᠵᠠᠭᠠᠯᠳᠤᠵᠤ ᠡᠬᠢᠯᠡᠪᠡ᠃ 3 ᠫᠢᠯᠠᠲ ᠢᠰᠦ᠋ᠰ ᠡᠴᠡ᠄ 《ᠴᠢ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠮᠥᠨ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠢᠰᠦ᠋ᠰ᠄ 《ᠴᠢ ᠥᠪᠡᠷ ᠢᠶᠡᠨ ᠬᠡᠯᠡᠵᠦ ᠪᠠᠢᠨᠠ》 ᠭᠡᠪᠡ᠃ 4 ᠫᠢᠯᠠᠲ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠠ ᠣᠯᠠᠨ ᠬᠥᠮᠦᠨ ᠳᠦ᠄ 《ᠪᠢ ᠡᠨᠡ ᠬᠥᠮᠦᠨ ᠡᠴᠡ ᠶᠠᠮᠠᠷ ᠴᠤ ᠭᠡᠮ ᠪᠤᠷᠤᠭᠤ ᠣᠯᠣᠭᠰᠠᠨ ᠦᠭᠡᠢ》 ᠭᠡᠵᠦ ᠬᠡᠯᠡᠪᠡ᠃ 5 ᠭᠡᠲᠡᠯᠡ ᠲᠡᠳᠡ ᠳᠣᠭᠰᠢᠷᠠᠵᠤ᠄ 《ᠭᠠᠯᠢᠯᠠᠶᠠ ᠠᠴᠠ ᠡ᠊ᠨᠳᠡ ᠬᠦᠷᠲᠡᠯᠡᠬᠢ ᠶᠦᠳᠠᠢ ᠨᠤᠲᠤᠭ ᠳᠠᠶᠠᠭᠠᠷ ᠲᠡᠷᠡ ᠰᠤᠷᠭᠠᠯ ᠢᠶᠠᠨ ᠵᠢᠭᠠᠵᠤ᠂ ᠠᠷᠠᠳ ᠲᠦᠮᠡᠨ ᠢ ᠥᠳᠥᠭᠡᠳᠡᠭ》 ᠭᠡᠵᠡᠭᠡᠵᠡᠢ᠃
ᠢᠰᠦ᠋ᠰ ᠾᠧᠷᠣᠳ᠋ ᠲᠤ ᠪᠠᠢᠴᠠᠭᠠᠭᠳᠠᠭᠰᠠᠨ ᠨᠢ
6 ᠫᠢᠯᠠᠲ ᠡᠭᠦᠨ ᠢ ᠰᠣᠨᠣᠰᠣᠭᠠᠳ᠄ 《ᠡᠨᠡ ᠴᠢᠨᠢ ᠭᠠᠯᠢᠯᠠᠶᠠ ᠶᠢᠨ ᠬᠥᠮᠦᠨ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠢᠶᠠᠨ᠂ 7 ᠾᠧᠷᠣᠳ᠋ ᠤᠨ ᠬᠠᠷᠢᠶᠠ ᠨᠤᠲᠤᠭ ᠤᠨ ᠬᠢ ᠪᠣᠯᠬᠤ ᠶᠢ ᠮᠡᠳᠡᠭᠡᠳ ᠾᠧᠷᠣᠳ᠋ ᠲᠤ ᠬᠦᠷᠭᠡᠯᠭᠡᠪᠡ᠃ ᠲᠡᠷᠡ ᠦᠶᠡ ᠳᠦ ᠾᠧᠷᠣᠳ᠋ ᠴᠤ ᠶᠧᠷᠦ᠋ᠰᠠᠯᠧᠮ ᠳᠤ ᠪᠠᠢᠵᠠᠢ᠃ 8 ᠾᠧᠷᠣᠳ᠋ ᠢᠰᠦ᠋ᠰ ᠢ ᠦᠵᠡᠭᠡᠳ ᠶᠡᠬᠡᠳᠡ ᠪᠠᠶᠠᠷᠯᠠᠪᠠ᠃ ᠤᠴᠢᠷ ᠨᠢ᠂ ᠲᠡᠷᠡ ᠲᠡᠭᠦᠨ ᠦ ᠲᠤᠬᠠᠢ ᠰᠣᠨᠣᠰᠣᠭᠰᠠᠨ ᠲᠤᠯᠠ ᠠᠭᠤᠯᠵᠠᠬᠤ ᠶᠢ ᠤᠳᠠᠲᠠᠯᠠ ᠬᠦᠰᠡᠵᠦ᠂ ᠲᠡᠭᠦᠨ ᠦ ᠦᠢᠯᠡᠳᠬᠦ ᠰᠢᠳᠢ ᠲᠡᠮᠳᠡᠭ ᠢ ᠬᠠᠷᠠᠬᠤ ᠶᠢ ᠬᠦᠰᠡᠵᠦ ᠪᠠᠢᠵᠠᠢ᠃ 9 ᠲᠡᠭᠡᠭᠡᠳ ᠣᠯᠠᠨ ᠶᠠᠭᠤᠮᠠ ᠠᠰᠠᠭᠤᠭᠰᠠᠨ ᠪᠣᠯᠪᠠᠴᠤ ᠢᠰᠦ᠋ᠰ ᠶᠠᠭᠤ ᠴᠤ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ᠃ 10 ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠠ ᠪᠢᠴᠢᠭᠲᠡᠳ ᠪᠣᠰᠴᠤ ᠲᠡᠭᠦᠨ ᠢ ᠬᠠᠲᠠᠭᠤ ᠰᠢᠷᠦᠭᠦᠨ ᠢᠶᠡᠷ ᠵᠠᠭᠠᠯᠳᠤᠭᠰᠠᠨ ᠪᠠᠢᠯᠠ᠃ 11 ᠾᠧᠷᠣᠳ᠋ ᠴᠡᠷᠢᠭ ᠤᠳ ᠲᠠᠢ ᠪᠠᠨ ᠬᠠᠮᠲᠤ ᠢᠰᠦ᠋ᠰ ᠢ ᠪᠠᠰᠤᠮᠵᠢᠯᠠᠨ ᠳᠣᠷᠣᠮᠵᠢᠯᠠᠵᠤ ᠬᠡᠭᠡᠨᠴᠢᠷ ᠬᠤᠪᠴᠠᠰᠤ ᠡᠮᠦᠰᠬᠡᠭᠡᠳ ᠫᠢᠯᠠᠲ ᠤᠷᠤᠭᠤ ᠪᠤᠴᠠᠭᠠᠪᠠ᠃ 12 ᠾᠧᠷᠣᠳ᠋ ᠪᠣᠯᠣᠨ ᠫᠢᠯᠠᠲ ᠤᠷᠢᠳᠤ ᠨᠢ ᠳᠠᠢᠰᠤᠩᠨᠠᠯᠴᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠡᠳᠦᠷ ᠨᠠᠢᠵᠠ ᠪᠣᠯᠣᠯᠴᠠᠯᠠ᠃
ᠫᠢᠯᠠᠲ ᠢᠰᠦ᠋ᠰ ᠢ ᠰᠤᠯᠠᠯᠠᠬᠤ ᠭᠡᠪᠡ
13 ᠫᠢᠯᠠᠲ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ᠂ ᠨᠣᠶᠠᠳ ᠪᠠ ᠠᠷᠠᠳ ᠣᠯᠠᠨ ᠢ ᠴᠤᠭᠯᠠᠭᠤᠯᠤᠭᠠᠳ᠄ 14 《ᠡᠨᠡ ᠬᠥᠮᠦᠨ ᠠᠷᠠᠳ ᠣᠯᠠᠨ ᠢ ᠲᠡᠷᠰᠯᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠲᠠ ᠨᠠᠷ ᠲᠡᠭᠦᠨ ᠢ ᠠᠪᠴᠢᠷᠠᠭᠰᠠᠨ ᠪᠢᠯᠡ᠃ ᠠᠩ᠋ᠬᠠᠷᠤᠭᠲᠤᠨ︕ ᠪᠢ ᠲᠠ ᠨᠠᠷ ᠤᠨ ᠡᠮᠦᠨᠡ ᠪᠠᠢᠴᠠᠭᠠᠭᠰᠠᠨ ᠪᠣᠯᠪᠠᠴᠤ ᠵᠠᠭᠠᠯᠳᠤᠳᠠᠭ ᠢᠶᠠᠷ ᠴᠢᠨᠢ ᠲᠡᠭᠦᠨ ᠡᠴᠡ ᠶᠠᠮᠠᠷ ᠴᠤ ᠶᠠᠯᠠ ᠭᠡᠮ ᠣᠯᠣᠭᠰᠠᠨ ᠦᠭᠡᠢ᠃ 15 ᠾᠧᠷᠣᠳ᠋ ᠴᠤ ᠣᠯᠣᠭᠠ ᠦᠭᠡᠢ ᠲᠤᠯᠠ ᠲᠡᠭᠦᠨ ᠢ ᠪᠢᠳᠡᠨ ᠤᠷᠤᠭᠤ ᠪᠤᠴᠠᠭᠠᠭᠰᠠᠨ ᠶᠤᠮ᠃ ᠠᠩ᠋ᠬᠠᠷᠤᠭᠲᠤᠨ︕ ᠲᠡᠷᠡ ᠦᠬᠦᠬᠦ ᠶᠣᠰᠣᠲᠠᠢ ᠶᠠᠪᠤᠳᠠᠯ ᠢ ᠶᠡᠷᠦ ᠦᠢᠯᠡᠳᠦᠭᠰᠡᠨ ᠦᠭᠡᠢ ᠶᠤᠮ ᠪᠠᠢᠨᠠ᠃ 16 ᠪᠢ ᠲᠡᠭᠦᠨ ᠢ ᠲᠠᠰᠢᠭᠤᠷᠳᠠᠭᠤᠯᠤᠭᠠᠳ ᠰᠤᠯᠠᠯᠠᠶᠠ》 ᠭᠡᠰᠡᠨ ᠳᠦ᠂ 17 29
18 ᠲᠡᠳᠡ ᠵᠡᠷᠭᠡᠪᠡᠷ᠄ 《ᠲᠡᠭᠦᠨ ᠢ ᠠᠯᠠ᠂ ᠪᠠᠷᠠᠪ ᠢ ᠪᠢᠳᠡᠨ ᠳᠦ ᠰᠤᠯᠠᠯᠠᠵᠤ ᠥᠭ︕》 ᠭᠡᠵᠦ ᠬᠠᠰᠬᠢᠷᠤᠯᠠ᠃ 19 ᠪᠠᠷᠠᠪ ᠬᠣᠲᠠ ᠳᠤ ᠪᠣᠯᠣᠭᠰᠠᠨ ᠰᠠᠮᠠᠭᠤᠷᠠᠯ ᠪᠠ ᠠᠮᠢᠨ ᠬᠡᠷᠡᠭ ᠢᠶᠡᠷ ᠱᠣᠷᠣᠩ ᠳᠤ ᠬᠣᠷᠢᠭᠳᠠᠭᠰᠠᠨ ᠶᠤᠮ᠃ 20 ᠫᠢᠯᠠᠲ ᠢᠰᠦ᠋ᠰ ᠢ ᠰᠤᠯᠠᠯᠠᠬᠤ ᠶᠢ ᠬᠦᠰᠡᠵᠦ᠂ ᠳᠠᠬᠢᠭᠠᠳ ᠲᠡᠳᠡᠨ ᠢ ᠤᠷᠢᠶᠠᠯᠠᠬᠤ ᠳᠤ᠂ 21 ᠲᠡᠳᠡ᠄ 《ᠲᠡᠭᠦᠨ ᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ︕ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ︕》 ᠭᠡᠵᠦ ᠪᠠᠷᠬᠢᠷᠠᠯᠴᠠᠪᠠ᠃ 22 ᠫᠢᠯᠠᠲ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠲᠡᠳᠡᠨ ᠳᠦ᠄ 《ᠶᠠᠭᠤᠨ ᠳᠤ ᠪᠤᠢ︖ ᠲᠡᠷᠡ ᠶᠠᠮᠠᠷ ᠮᠠᠭᠤ ᠶᠢ ᠦᠢᠯᠡᠳᠦᠭᠰᠡᠨ ᠪᠤᠢ︖ ᠦᠬᠦᠬᠦ ᠶᠣᠰᠣᠲᠠᠢ ᠶᠠᠯᠠ ᠭᠡᠮ ᠢ ᠪᠢ ᠲᠡᠭᠦᠨ ᠡᠴᠡ ᠶᠡᠷᠦ ᠣᠯᠣᠭᠠ ᠦᠭᠡᠢ᠃ ᠪᠢ ᠲᠡᠭᠦᠨ ᠢ ᠲᠠᠰᠢᠭᠤᠷᠳᠠᠭᠤᠯᠤᠭᠠᠳ ᠰᠤᠯᠠᠯᠠᠶᠠ》 ᠭᠡᠪᠡ᠃ 23 ᠬᠠᠷᠢᠨ ᠲᠡᠳᠡ ᠢᠰᠦ᠋ᠰ ᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠤᠯᠬᠤ ᠭᠡᠵᠦ ᠴᠢᠩᠭ᠍ᠠ ᠳᠠᠭᠤᠨ ᠢᠶᠠᠷ ᠫᠢᠯᠠᠲ ᠢ ᠱᠠᠭᠠᠷᠳᠠᠨ ᠰᠢᠬᠠᠭᠰᠠᠨ ᠪᠥᠭᠡᠳ ᠲᠡᠳᠡᠨ ᠦ ᠳᠠᠭᠤ ᠲᠠᠢᠯᠪᠠ᠃ 24 ᠫᠢᠯᠠᠲ ᠲᠡᠳᠡᠨ ᠦ ᠱᠠᠭᠠᠷᠳᠠᠯᠭᠠ ᠶᠢ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠰᠢᠢᠳᠦᠭᠡᠳ 25 ᠰᠠᠮᠠᠭᠤᠷᠠᠯ ᠪᠠ ᠠᠮᠢᠨ ᠬᠡᠷᠡᠭ ᠢᠶᠡᠷ ᠱᠣᠷᠣᠩ ᠳᠤ ᠬᠣᠷᠢᠭᠳᠠᠭᠰᠠᠨ ᠨᠥᠭᠥᠭᠡ ᠬᠥᠮᠦᠨ ᠢ ᠱᠠᠭᠠᠷᠳᠠᠯᠭᠠ ᠶᠣᠰᠣᠭᠠᠷ ᠨᠢ ᠰᠤᠯᠠᠯᠠᠨ᠂ ᠢᠰᠦ᠋ᠰ ᠢ ᠲᠡᠳᠡᠨ ᠦ ᠮᠡᠳᠡᠯ ᠳᠦ ᠲᠤᠰᠢᠶᠠᠪᠠ᠃
ᠰᠢᠮᠣᠨ ᠢᠰᠦ᠋ᠰ ᠤᠨ ᠵᠠᠭᠠᠯᠮᠠᠢ ᠶᠢ ᠡᠭᠦᠷᠦᠭᠰᠡᠨ ᠨᠢ
26 ᠲᠡᠳᠡ ᠢᠰᠦ᠋ᠰ ᠢ ᠠᠪᠠᠴᠢᠬᠤ ᠵᠠᠮ ᠳᠠᠭᠠᠨ ᠬᠥᠳᠡᠭᠡ ᠡᠴᠡ ᠢᠷᠡᠵᠦ ᠪᠠᠢᠭᠠ ᠺᠦᠷᠧᠨᠠᠢ ᠶᠢᠨ ᠰᠢᠮᠣᠨ ᠭᠡᠳᠡᠭ ᠬᠥᠮᠦᠨ ᠢ ᠪᠠᠷᠢᠭᠠᠳ ᠵᠠᠭᠠᠯᠮᠠᠢ ᠶᠢ ᠨᠢ ᠡᠭᠦᠷᠦᠭᠦᠯᠵᠦ᠂ ᠢᠰᠦ᠋ᠰ ᠤᠨ ᠬᠣᠢᠨᠠ ᠠᠴᠠ ᠳᠠᠭᠠᠭᠤᠯᠪᠠ᠃ 27 ᠲᠡᠭᠦᠨ ᠢ ᠦᠢ ᠣᠯᠠᠨ ᠬᠥᠮᠦᠨ ᠳᠠᠭᠠᠵᠤ ᠶᠠᠪᠤᠬᠤ ᠳᠤ᠂ ᠡᠮᠡᠭᠲᠡᠢᠴᠦᠳ ᠴᠡᠭᠡᠵᠢ ᠪᠠᠨ ᠳᠡᠯᠡᠳᠦᠭᠰᠡᠭᠡᠷ ᠲᠡᠭᠦᠨ ᠦ ᠲᠥᠯᠥᠭᠡ ᠤᠬᠢᠯᠠᠯᠳᠤᠵᠤ ᠪᠠᠢᠯᠠ᠃ 28 ᠢᠰᠦ᠋ᠰ ᠲᠡᠳᠡᠨ ᠤᠷᠤᠭᠤ ᠡᠷᠭᠢᠨ᠄ 《ᠶᠧᠷᠦ᠋ᠰᠠᠯᠧᠮ ᠤᠨ ᠥᠬᠢᠳ ᠡ᠂ ᠮᠢᠨᠦ ᠲᠥᠯᠥᠭᠡ ᠪᠦᠦ ᠤᠬᠢᠯᠠ᠂ ᠥᠪᠡᠷ ᠦᠨ ᠪᠡᠶᠡ ᠪᠠ ᠬᠡᠦᠬᠡᠳ ᠦᠨ ᠢᠶᠠᠨ ᠲᠥᠯᠥᠭᠡ ᠤᠬᠢᠯᠠ᠃ 29 ᠠᠩ᠋ᠬᠠᠷᠤᠭᠲᠤᠨ᠂ 〈ᠬᠡᠭᠦᠰᠡᠷ ᠡᠬᠡᠨᠡᠷ᠂ ᠵᠢᠷᠮᠦᠰᠦᠯᠡᠭᠡ ᠦᠭᠡᠢ ᠬᠡᠪᠡᠯᠢ ᠪᠠ ᠬᠡᠦᠬᠡᠳ ᠬᠥᠬᠥᠭᠦᠯᠦᠭᠡ ᠦᠭᠡᠢ ᠬᠥᠬᠥ ᠪᠤᠶᠠᠨ ᠲᠠᠢ︕〉 ᠭᠡᠵᠦ ᠬᠡᠯᠡᠬᠦ ᠡᠳᠦᠷ ᠤᠳ ᠢᠷᠡᠨᠡ᠃ 30 ᠲᠡᠷᠡ ᠦᠶᠡ ᠳᠦ ᠲᠡᠳᠡ ᠠᠭᠤᠯᠠᠰ ᠲᠤ᠄ 〈ᠪᠢᠳᠡᠨ ᠦ ᠳᠡᠭᠡᠷᠡ ᠨᠤᠷᠠᠭᠠᠴᠢ︕〉 ᠭᠡᠵᠦ᠂ ᠲᠣᠯᠣᠭᠠᠳ ᠲᠤ᠄ 〈ᠪᠢᠳᠡᠨ ᠢ ᠪᠦᠲᠡᠭᠡᠭᠡᠴᠢ︕〉 ᠭᠡᠯᠴᠡᠬᠦ ᠪᠣᠯᠣᠨᠠ᠃ 31 ᠲᠡᠳᠡ ᠨᠣᠭᠣᠭᠠᠨ ᠮᠣᠳᠣᠨ ᠳᠤ ᠡᠳᠡᠭᠡᠷ ᠢ ᠦᠢᠯᠡᠳᠳᠡᠭ ᠪᠣᠯ᠂ ᠬᠤᠪᠠᠬᠠᠢ ᠮᠣᠳᠣᠨ ᠳᠤ ᠶᠠᠭᠤ ᠪᠣᠯᠬᠤ ᠪᠤᠢ︖》 ᠭᠡᠪᠡ᠃
ᠢᠰᠦ᠋ᠰ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠨᠢ
32 ᠬᠣᠶᠠᠷ ᠬᠡᠷᠡᠭᠲᠡᠨ ᠢ ᠴᠤ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠴᠠᠭᠠᠵᠠᠯᠠᠬᠤ ᠪᠠᠷ ᠠᠪᠴᠤ ᠶᠠᠪᠤᠵᠠᠢ᠃ 33 ᠲᠡᠳᠡ ᠭᠠᠪᠠᠯᠠ ᠭᠡᠳᠡᠭ ᠭᠠᠵᠠᠷ ᠲᠤ ᠬᠦᠷᠦᠭᠡᠳ ᠢᠰᠦ᠋ᠰ ᠢ ᠵᠠᠭᠠᠯᠮᠠᠢ ᠳᠡᠭᠡᠷᠡ ᠴᠣᠪᠳᠣᠯᠠᠨ᠂ ᠬᠣᠶᠠᠷ ᠬᠡᠷᠡᠭᠲᠡᠨ ᠦ ᠨᠢᠭᠡ ᠶᠢ ᠨᠢ ᠪᠠᠷᠠᠭᠤᠨ ᠲᠠᠯᠠ ᠳᠤᠨᠢ᠂ ᠨᠥᠭᠥᠭᠡ ᠶᠢ ᠨᠢ ᠵᠡᠭᠦᠨ ᠲᠠᠯᠠ ᠳᠤᠨᠢ ᠴᠣᠪᠳᠣᠯᠠᠵᠠᠢ᠃ 34 〔ᠢᠰᠦ᠋ᠰ᠄ 《ᠠᠪᠤ ᠡ᠂ ᠲᠡᠳᠡᠨ ᠢ ᠠᠭᠤᠴᠢᠯᠠᠭᠠᠴᠢ︕ ᠲᠡᠳᠡ ᠶᠠᠭᠤ ᠬᠢᠵᠦ ᠪᠠᠢᠭᠠ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠪᠠᠢᠬᠤ ᠳᠤ᠂〕 ᠲᠡᠳᠡ ᠰᠢᠪᠠᠭᠠᠳᠠᠵᠤ᠂ ᠢᠰᠦ᠋ᠰ ᠤᠨ ᠬᠤᠪᠴᠠᠰᠤ ᠬᠤᠨᠠᠷ ᠢ ᠬᠤᠪᠢᠶᠠᠯᠴᠠᠪᠠ᠃ 35 ᠠᠷᠠᠳ ᠣᠯᠠᠨ ᠵᠣᠭᠰᠣᠭᠠᠳ ᠬᠠᠷᠠᠵᠤ ᠪᠠᠢᠬᠤ ᠳᠤ᠂ ᠨᠣᠶᠠᠳ ᠲᠡᠭᠦᠨ ᠢ ᠡᠯᠡᠭᠯᠡᠵᠦ᠄ 《ᠲᠡᠷᠡ ᠪᠤᠰᠤᠳ ᠢ ᠠᠪᠤᠷᠠᠭᠰᠠᠨ᠂ ᠬᠡᠷᠪᠡ ᠪᠤᠷᠬᠠᠨ ᠤ ᠰᠣᠩ᠋ᠭᠣᠭᠰᠠᠨ ᠾᠷᠢᠰᠲ᠋ᠣᠰ ᠮᠥᠨ ᠶᠤᠮ ᠪᠣᠯ ᠥᠪᠡᠷ ᠢ ᠪᠠᠨ ᠠᠪᠤᠷᠠᠭ︕》 ᠭᠡᠵᠡᠭᠡᠵᠦ ᠪᠠᠢᠪᠠ᠃ 36 ᠴᠡᠷᠢᠭ ᠤᠳ ᠴᠤ ᠲᠡᠭᠦᠨ ᠢ ᠳᠣᠭᠣᠭᠢᠯᠠᠵᠤ᠂ ᠳᠡᠷᠭᠡᠳᠡ ᠨᠢ ᠢᠷᠡᠭᠡᠳ ᠢᠰᠭᠦᠯᠡᠩ ᠳᠠᠷᠠᠰᠤ ᠤᠤᠭᠤᠯᠭᠠᠬᠤ ᠪᠠᠷ ᠥᠭᠴᠦ᠄ 37 《ᠴᠢ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠮᠥᠨ ᠶᠤᠮ ᠪᠣᠯ ᠥᠪᠡᠷ ᠢ ᠪᠠᠨ ᠠᠪᠤᠷᠠᠵᠤ ᠦᠵᠡ︕》 ᠭᠡᠪᠡ᠃ 38 ᠢᠰᠦ᠋ᠰ ᠤᠨ ᠳᠡᠭᠡᠳᠦ ᠲᠠᠯᠠ ᠳᠤ᠄ 《ᠡᠨᠡ ᠪᠣᠯ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ》 ᠭᠡᠬᠦ ᠪᠢᠴᠢᠭᠡᠰᠦ ᠲᠠᠢ ᠫᠠᠢᠰᠠ ᠪᠠᠢᠯᠠ᠃
39 ᠬᠠᠮᠲᠤ ᠬᠠᠳᠠᠭᠳᠠᠭᠰᠠᠨ ᠬᠡᠷᠡᠭᠲᠡᠨ ᠦ ᠨᠢᠭᠡ ᠨᠢ᠄ 《ᠴᠢ ᠴᠢᠨᠢ ᠾᠷᠢᠰᠲ᠋ᠣᠰ ᠪᠢᠰᠢ ᠤᠤ︖ ᠥᠪᠡᠷ ᠢ ᠪᠠᠨ ᠪᠠ ᠪᠢᠳᠡᠨ ᠢ ᠠᠪᠤᠷᠠ ᠳᠠ︕》 ᠭᠡᠵᠦ ᠲᠠᠪᠠᠯᠠᠬᠤ ᠳᠤ᠂ 40 ᠬᠠᠷᠢᠨ ᠨᠥᠭᠥᠭᠡ ᠨᠢ ᠲᠡᠭᠦᠨ ᠢ ᠵᠢᠮᠡᠯᠡᠵᠦ᠄ 《ᠠᠳᠠᠯᠢᠬᠠᠨ ᠡᠷᠡᠭᠦᠦ ᠠᠮᠰᠠᠵᠤ ᠪᠠᠢᠲᠠᠯᠠ ᠪᠠᠨ ᠴᠢ ᠪᠤᠷᠬᠠᠨ ᠠᠴᠠ ᠠᠶᠤᠬᠤ ᠦᠭᠡᠢ ᠪᠠᠢᠨᠠ ᠤᠤ︖ 41 ᠪᠢᠳᠡ ᠬᠣᠶᠠᠷ ᠦᠢᠯᠡᠳᠦᠭᠰᠡᠨ ᠬᠡᠷᠡᠭ ᠦᠨ ᠢᠶᠠᠨ ᠶᠣᠰᠣᠭᠠᠷ ᠵᠣᠬᠢᠰᠲᠠᠢ ᠡᠷᠡᠭᠦᠦ ᠪᠡᠨ ᠡᠳ᠋ᠯᠡᠬᠦ ᠶᠣᠰᠣᠲᠠᠢ᠃ ᠬᠠᠷᠢᠨ ᠡᠨᠡ ᠬᠥᠮᠦᠨ ᠶᠠᠮᠠᠷ ᠴᠤ ᠪᠤᠷᠤᠭᠤ ᠬᠢᠭᠰᠡᠨ ᠦᠭᠡᠢ》 ᠭᠡᠪᠡ᠃ 42 ᠲᠡᠷᠡ᠄ 《ᠢᠰᠦ᠋ᠰ ᠡ᠂ ᠲᠠ ᠬᠠᠭᠠᠨᠴᠢᠯᠠᠯ ᠳᠠᠭᠠᠨ ᠣᠷᠣᠬᠤ ᠳᠠᠭᠠᠨ ᠨᠠᠮᠠᠶᠢ ᠰᠠᠨᠠᠭᠠᠷᠠᠢ︕》 ᠭᠡᠬᠦ ᠳᠦ᠂ 43 ᠢᠰᠦ᠋ᠰ᠄ 《ᠴᠢᠮᠠ ᠳᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠥᠨᠥᠳᠥᠷ ᠴᠢ ᠨᠠᠳᠠ ᠲᠠᠢ ᠬᠠᠮᠲᠤ ᠳ᠋ᠧᠪᠠᠵᠠᠨ ᠳᠤ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃
44 ᠦᠳᠡ ᠪᠣᠯᠬᠤ ᠳᠤ ᠪᠦᠬᠦ ᠭᠠᠵᠠᠷ ᠬᠠᠷᠠᠩ᠋ᠭᠤᠢᠯᠠᠵᠤ ᠭᠤᠷᠪᠠᠨ ᠴᠠᠭ ᠬᠦᠷᠲᠡᠯᠡ ᠬᠠᠷᠠᠩ᠋ᠭᠤᠢ ᠳᠤ ᠬᠤᠴᠢᠭᠳᠠᠵᠠᠢ᠃ 45 ᠨᠠᠷᠠ ᠭᠡᠷᠡᠯ ᠦᠭᠡᠢ ᠪᠣᠯᠵᠤ᠂ ᠥᠷᠭᠥᠭᠡᠨ ᠦ ᠬᠥᠰᠢᠭᠡ ᠬᠣᠶᠠᠷ ᠬᠡᠰᠡᠭ ᠪᠣᠯᠣᠨ ᠴᠤᠭᠤᠷᠠᠪᠠ᠃ 46 ᠢᠰᠦ᠋ᠰ ᠴᠢᠩᠭ᠍ᠠ ᠳᠠᠭᠤᠨ ᠢᠶᠠᠷ᠄ 《ᠠᠪᠤ ᠡ᠂ ᠲᠠᠨ ᠤ ᠮᠤᠲᠤᠷ ᠲᠤ ᠪᠢ ᠰᠦᠨᠡᠰᠦ ᠪᠡᠨ ᠳᠠᠭᠠᠭᠠᠯᠭᠠᠶᠠ》 ᠭᠡᠵᠦ ᠬᠡᠯᠡᠭᠡᠳ ᠠᠮᠢᠰᠬᠤᠯ ᠬᠤᠷᠢᠶᠠᠪᠠ᠃ 47 ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠶᠠᠭᠤ ᠪᠣᠯᠣᠭᠰᠠᠨ ᠢ ᠦᠵᠡᠭᠡᠳ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠤᠨ᠄ 《ᠡᠨᠡ ᠴᠢᠨᠢ ᠨᠡᠭᠡᠷᠡᠨ ᠵᠥᠪᠲᠡᠨ ᠪᠠᠢᠵᠠᠢ》 ᠭᠡᠪᠡ᠃ 48 ᠶᠠᠭᠤ ᠪᠣᠯᠬᠤ ᠶᠢ ᠦᠵᠡᠬᠦ ᠪᠡᠷ ᠴᠤᠭᠯᠠᠷᠠᠭᠰᠠᠨ ᠠᠷᠠᠳ ᠣᠯᠠᠨ ᠪᠣᠯᠣᠭᠰᠠᠨ ᠪᠦᠬᠦ ᠶᠠᠪᠤᠳᠠᠯ ᠢ ᠦᠵᠡᠭᠡᠳ ᠴᠡᠭᠡᠵᠢ ᠪᠠᠨ ᠳᠡᠯᠡᠳᠦᠭᠰᠡᠭᠡᠷ ᠬᠠᠷᠢᠯᠠ᠃ 49 ᠪᠠᠰᠠ ᠢᠰᠦ᠋ᠰ ᠤᠨ ᠪᠦᠬᠦ ᠲᠠᠨᠢᠯ ᠬᠥᠮᠦᠨ ᠪᠠ ᠭᠠᠯᠢᠯᠠᠶᠠ ᠠᠴᠠ ᠳᠠᠭᠠᠵᠤ ᠢᠷᠡᠭᠰᠡᠨ ᠡᠮᠡᠭᠲᠡᠢᠴᠦᠳ ᠴᠤ ᠬᠣᠯᠠ ᠵᠣᠭᠰᠣᠭᠠᠳ ᠡᠳᠡᠭᠡᠷ ᠢ ᠬᠠᠷᠠᠵᠤ ᠪᠠᠢᠯᠠ᠃
ᠢᠰᠦ᠋ᠰ ᠪᠤᠯᠠᠰᠢᠯᠠᠭᠳᠠᠭᠰᠠᠨ ᠨᠢ
50 ᠰᠢᠭᠦᠬᠦ ᠵᠥᠪᠯᠡᠯ ᠦᠨ ᠭᠡᠰᠢᠭᠦᠳ ᠦᠨ ᠳᠤᠮᠳᠠ ᠶᠣᠰᠧᠹ ᠭᠡᠳᠡᠭ ᠵᠥᠪᠲᠦ ᠰᠠᠢᠨ ᠬᠥᠮᠦᠨ ᠪᠠᠢᠵᠠᠢ᠃ 51 ᠲᠡᠷᠡ ᠲᠡᠳᠡᠨ ᠦ ᠰᠢᠢᠳᠪᠦᠷᠢ ᠪᠠ ᠦᠢᠯᠡ ᠶᠠᠪᠤᠳᠠᠯ ᠳᠤ ᠰᠠᠨᠠᠯ ᠨᠡᠢᠯᠡᠭᠡ ᠦᠭᠡᠢ᠃ ᠲᠡᠷᠡ ᠪᠣᠯ ᠠᠷᠢᠮᠠᠲ᠋ᠠ ᠭᠡᠳᠡᠭ ᠶᠦᠳᠠᠢᠴᠤᠳ ᠤᠨ ᠲᠣᠰᠬᠣᠨ ᠤ ᠬᠥᠮᠦᠨ ᠪᠥᠭᠡᠳ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃ 52 ᠶᠣᠰᠧᠹ ᠫᠢᠯᠠᠲ ᠳᠡᠭᠡᠷᠡ ᠣᠴᠢᠵᠤ᠂ ᠢᠰᠦ᠋ᠰ ᠤᠨ ᠴᠣᠭᠴᠠ ᠶᠢ ᠭᠤᠶᠤᠪᠠ᠃ 53 ᠲᠡᠭᠡᠭᠡᠳ ᠲᠡᠭᠦᠨ ᠢ ᠪᠠᠭᠤᠯᠭᠠᠵᠤ ᠥᠷᠮᠥᠭ ᠢᠶᠡᠷ ᠪᠣᠭᠣᠭᠠᠳ ᠬᠥᠮᠦᠨ ᠣᠷᠣᠰᠢᠭᠤᠯᠤᠭᠠ ᠦᠭᠡᠢ᠂ ᠬᠠᠳᠠ ᠤᠬᠤᠵᠤ ᠪᠡᠯᠡᠳᠬᠡᠭᠰᠡᠨ ᠪᠤᠯᠠᠰᠢᠨ ᠳᠤ ᠲᠠᠯᠪᠢᠵᠠᠢ᠃ 54 ᠪᠡᠯᠡᠳᠬᠡᠯ ᠦᠨ ᠡᠳᠦᠷ ᠥᠩᠭᠡᠷᠡᠵᠦ ᠠᠮᠠᠷᠠᠯ ᠤᠨ ᠡᠳᠦᠷ ᠪᠣᠯᠬᠤ ᠭᠡᠵᠦ ᠪᠠᠢᠯᠠ᠃ 55 ᠭᠠᠯᠢᠯᠠᠶᠠ ᠠᠴᠠ ᠢᠰᠦ᠋ᠰ ᠲᠠᠢ ᠴᠤᠭ ᠢᠷᠡᠭᠰᠡᠨ ᠡᠮᠡᠭᠲᠡᠢᠴᠦᠳ ᠶᠣᠰᠧᠹ ᠢ ᠳᠠᠭᠠᠵᠤ ᠪᠤᠯᠠᠰᠢ ᠶᠢ ᠦᠵᠡᠬᠦ ᠶᠢᠨ ᠬᠠᠮᠲᠤ ᠢᠰᠦ᠋ᠰ ᠤᠨ ᠴᠣᠭᠴᠠ ᠶᠢ ᠶᠠᠭᠠᠬᠢᠵᠤ ᠲᠠᠯᠪᠢᠬᠤ ᠶᠢ ᠬᠠᠷᠠᠵᠠᠢ᠃ 56 ᠲᠡᠭᠡᠭᠡᠳ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠦᠨᠦᠷᠲᠡᠨ ᠪᠠ ᠲᠣᠰᠣ ᠪᠡᠯᠡᠳᠬᠡᠵᠡᠢ᠃ ᠠᠮᠠᠷᠠᠯ ᠤᠨ ᠡᠳᠦᠷ ᠲᠡᠳᠡ ᠵᠠᠷᠯᠢᠭ ᠶᠣᠰᠣᠭᠠᠷ ᠠᠮᠠᠷᠠᠪᠠ᠃