ᠯᠦᠺ ᠵᠢᠷᠭᠤᠭᠠ
ᠠᠮᠠᠷᠠᠯ ᠤᠨ ᠡᠳᠦᠷ ᠦᠨ ᠡᠵᠡᠨ
1 ᠨᠢᠭᠡᠨ ᠠᠮᠠᠷᠠᠯ ᠤᠨ ᠡᠳᠦᠷ᠂ ᠢᠰᠦ᠋ᠰ ᠲᠠᠷᠢᠶᠠᠨ ᠲᠠᠯᠠᠪᠠᠢ ᠪᠠᠷ ᠳᠠᠭᠠᠷᠢᠨ ᠥᠩᠭᠡᠷᠡᠬᠦ ᠳᠦ᠂ ᠱᠠᠪᠢ ᠨᠠᠷ ᠨᠢ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠰᠢᠪᠲᠤᠷᠤᠨ ᠠᠪᠴᠤ ᠭᠠᠷ ᠢᠶᠠᠷ ᠢᠶᠠᠨ ᠴᠠᠢᠯᠭᠠᠨ ᠢᠳᠡᠪᠡ᠃ 2 ᠹᠠᠷᠢᠰᠠᠢᠴᠤᠳ ᠤᠨ ᠵᠠᠷᠢᠮ ᠨᠢ᠄ 《ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠠᠮᠠᠷᠠᠯ ᠤᠨ ᠡᠳᠦᠷ ᠬᠢᠵᠦ ᠪᠣᠯᠬᠤ ᠦᠭᠡᠢ ᠵᠦᠢᠯ ᠢ ᠬᠢᠵᠦ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠳᠦ᠂ 3 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠲᠡᠢ ᠪᠠᠢᠭᠰᠠᠳ ᠥᠯᠥᠰᠬᠦ ᠳᠡᠭᠡᠨ ᠶᠠᠭᠤ ᠬᠢᠭᠰᠡᠨ ᠢ ᠲᠠ ᠨᠠᠷ ᠤᠩ᠋ᠰᠢᠭᠠ ᠦᠭᠡᠢ ᠤᠤ︖ 4 ᠲᠡᠷᠡ ᠪᠤᠷᠬᠠᠨ ᠤ ᠭᠡᠷ ᠲᠦ ᠣᠷᠣᠭᠠᠳ ᠲᠠᠬᠢᠯᠴᠢ ᠡᠴᠡ ᠥᠭᠡᠷᠡ ᠬᠡᠨ ᠦ ᠴᠤ ᠢᠳᠡᠵᠦ ᠪᠣᠯᠳᠠᠭ ᠦᠭᠡᠢ ᠲᠠᠪᠢᠭ ᠪᠣᠣᠪᠣ ᠠᠴᠠ ᠠᠪᠴᠤ ᠢᠳᠡᠭᠡᠳ ᠪᠠᠰᠠ ᠬᠠᠮᠲᠤ ᠪᠠᠢᠭᠰᠠᠳ ᠲᠠᠭᠠᠨ ᠥᠭᠭᠥᠭᠰᠡᠨ ᠰᠢᠦ ᠳᠠ》 ᠭᠡᠵᠦ ᠬᠠᠷᠢᠭᠤᠯᠤᠨ᠄ 5 《ᠬᠥᠮᠦᠨ ᠦ ᠬᠦᠦ ᠪᠣᠯ ᠠᠮᠠᠷᠠᠯ ᠤᠨ ᠡᠳᠦᠷ ᠦᠨ ᠡᠵᠡᠨ ᠶᠤᠮ》 ᠭᠡᠵᠡᠢ᠃
6 ᠪᠠᠰᠠ ᠨᠢᠭᠡᠨ ᠠᠮᠠᠷᠠᠯ ᠤᠨ ᠡᠳᠦᠷ ᠢᠰᠦ᠋ᠰ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠣᠷᠣᠭᠠᠳ ᠰᠤᠷᠭᠠᠪᠠ᠂ ᠲᠡᠨᠳᠡ ᠪᠠᠷᠠᠭᠤᠨ ᠭᠠᠷ ᠨᠢ ᠬᠠᠲᠠᠩᠭᠢᠷᠠᠭᠰᠠᠨ ᠨᠢᠭᠡ ᠬᠥᠮᠦᠨ ᠪᠠᠢᠵᠠᠢ᠃ 7 ᠪᠢᠴᠢᠭᠲᠡᠳ ᠪᠣᠯᠣᠨ ᠹᠠᠷᠢᠰᠠᠢᠴᠤᠳ ᠢᠰᠦ᠋ᠰ ᠢ ᠪᠤᠷᠤᠭᠤᠳᠬᠠᠬᠤ ᠰᠢᠯᠲᠠᠭ ᠣᠯᠬᠤ ᠭᠡᠵᠦ ᠠᠮᠠᠷᠠᠯ ᠤᠨ ᠡᠳᠦᠷ ᠢᠰᠦ᠋ᠰ ᠤᠨ ᠲᠡᠷᠡ ᠬᠥᠮᠦᠨ ᠢ ᠡᠳᠡᠭᠡᠭᠡᠬᠦ ᠡᠰᠡᠬᠦ ᠶᠢ ᠠᠵᠢᠭᠯᠠᠵᠤ ᠪᠠᠢᠯᠠ᠃ 8 ᠬᠠᠷᠢᠨ ᠢᠰᠦ᠋ᠰ ᠲᠡᠳᠡᠨ ᠦ ᠪᠣᠳᠣᠯ ᠢ ᠮᠡᠳᠡᠭᠡᠳ ᠬᠠᠲᠠᠩᠭᠢᠷ ᠭᠠᠷ ᠲᠠᠢ ᠬᠥᠮᠦᠨ ᠳᠦ᠄ 《ᠪᠣᠰ᠂ ᠣᠯᠠᠨ ᠤ ᠳᠤᠮᠳᠠ ᠢᠷᠡᠭᠡᠳ ᠵᠣᠭᠰᠣ》 ᠭᠡᠰᠡᠨ ᠳᠦ᠂ ᠲᠡᠷᠡ ᠬᠥᠮᠦᠨ ᠪᠣᠰᠴᠤ ᠵᠣᠭᠰᠣᠯᠠ᠃ 9 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠪᠢ ᠲᠠ ᠨᠠᠷ ᠠᠴᠠ ᠠᠰᠠᠭᠤᠶᠠ᠂ ᠠᠮᠠᠷᠠᠯ ᠤᠨ ᠡᠳᠦᠷ ᠰᠠᠢᠨ ᠢ ᠦᠢᠯᠡᠳᠬᠦ᠂ ᠡᠰᠡᠬᠦᠯᠡ ᠮᠠᠭᠤ ᠶᠢ ᠦᠢᠯᠡᠳᠬᠦ᠂ ᠠᠮᠢ ᠠᠪᠤᠷᠠᠬᠤ᠂ ᠡᠰᠡᠬᠦᠯᠡ ᠠᠮᠢ ᠬᠥᠨᠥᠭᠡᠬᠦ ᠶᠢᠨ ᠠᠯᠢ ᠨᠢ ᠵᠣᠬᠢᠰᠲᠠᠢ ᠪᠤᠢ︖》 ᠭᠡᠳ 10 ᠪᠦᠭᠦᠳᠡ ᠶᠢ ᠳᠤᠭᠤᠢᠯᠠᠨ ᠬᠠᠷᠠᠭᠰᠠᠨ ᠢᠶᠠᠨ ᠲᠡᠭᠦᠨ ᠳᠦ᠄ 《ᠭᠠᠷ ᠢᠶᠠᠨ ᠰᠤᠩ᠋ᠭᠠ》 ᠭᠡᠪᠡ᠃ ᠲᠡᠷᠡ ᠬᠥᠮᠦᠨ ᠭᠠᠷ ᠢᠶᠠᠨ ᠰᠤᠩ᠋ᠭᠠᠭᠰᠠᠨ ᠳᠤ᠂ ᠭᠠᠷ ᠨᠢ ᠢᠯᠠᠷᠢᠰᠢᠵᠠᠢ᠃ 11 ᠲᠡᠳᠡ ᠶᠡᠬᠡᠳᠡ ᠠᠭᠤᠷᠯᠠᠵᠤ᠂ ᠢᠰᠦ᠋ᠰ ᠢ ᠬᠡᠷᠬᠢᠬᠦ ᠲᠤᠬᠠᠢ ᠬᠣᠭᠣᠷᠣᠨᠳᠣ ᠪᠠᠨ ᠵᠥᠪᠯᠡᠯᠳᠦᠵᠦ ᠡᠬᠢᠯᠡᠪᠡ᠃
ᠢᠰᠦ᠋ᠰ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠪᠠᠨ ᠰᠣᠩ᠋ᠭᠣᠭᠰᠠᠨ ᠨᠢ
12 ᠲᠡᠷᠡ ᠦᠶᠡ ᠳᠦ᠂ ᠢᠰᠦ᠋ᠰ ᠳᠠᠭᠠᠳᠬᠠᠬᠤ ᠪᠠᠷ ᠠᠭᠤᠯᠠᠨ ᠳᠤ ᠭᠠᠷᠴᠤ ᠰᠥᠨᠢᠵᠢᠨ ᠪᠤᠷᠬᠠᠨ ᠳᠤ ᠳᠠᠭᠠᠳᠬᠠᠭᠰᠠᠭᠠᠷ ᠥᠩᠭᠡᠷᠡᠵᠡᠢ᠃ 13 ᠦᠷ ᠴᠠᠢᠬᠤ ᠳᠤ᠂ ᠲᠡᠷᠡ ᠱᠠᠪᠢ ᠨᠠᠷ ᠢᠶᠠᠨ ᠳᠠᠭᠤᠳᠠᠨ ᠲᠡᠳᠡᠨ ᠡᠴᠡ ᠠᠷᠪᠠᠨ ᠬᠣᠶᠠᠷ ᠢ ᠰᠣᠩ᠋ᠭᠣᠭᠠᠳ ᠰᠢᠳᠠᠷ ᠱᠠᠪᠢ ᠭᠡᠵᠦ ᠨᠡᠷᠡᠯᠡᠵᠡᠢ᠃ 14 ᠲᠤᠬᠠᠢᠯᠠᠪᠠᠯ ᠫᠧᠲ᠋ᠧᠷ ᠭᠡᠵᠦ ᠨᠡᠷᠡᠯᠡᠭᠳᠡᠭᠰᠡᠨ ᠰᠢᠮᠣᠨ᠂ ᠲᠡᠭᠦᠨ ᠦ ᠳᠡᠭᠦᠦ ᠠᠨᠳ᠋ᠷᠧ᠂ ᠶᠠᠺᠣᠪ᠂ ᠶᠣᠬᠠᠨ᠂ ᠹᠢᠯᠢᠫ᠂ ᠪᠠᠷᠲ᠋ᠣᠯᠣᠮᠠᠢ᠂ 15 ᠮᠠᠲ᠋ᠠᠢ᠂ ᠲᠣᠮᠠ᠂ ᠠᠯᠹᠠᠢ ᠶᠢᠨ ᠬᠦᠦ ᠶᠠᠺᠣᠪ᠂ ᠬᠡᠲᠦᠷᠡᠮᠡᠭᠡᠢ ᠭᠡᠭᠳᠡᠳᠡᠭ ᠰᠢᠮᠣᠨ᠂ 16 ᠶᠠᠺᠣᠪ ᠤᠨ ᠬᠦᠦ ᠶᠦᠳᠠ᠂ ᠤᠷᠪᠠᠭᠴᠢ ᠪᠣᠯᠣᠭᠰᠠᠨ ᠢᠰᠺᠠᠷᠢᠣᠲ ᠤᠨ ᠶᠦᠳᠠ ᠨᠠᠷ ᠪᠣᠯᠠᠢ᠃
17 ᠢᠰᠦ᠋ᠰ ᠲᠡᠳᠡᠨ ᠲᠡᠢ ᠬᠠᠮᠲᠤ ᠠᠭᠤᠯᠠᠨ ᠠᠴᠠ ᠪᠠᠭᠤᠵᠤ ᠲᠡᠭᠰᠢ ᠭᠠᠵᠠᠷ ᠬᠦᠷᠴᠦ ᠵᠣᠭᠰᠣᠪᠠ᠃ ᠲᠡᠨᠳᠡ ᠦᠯᠡᠮᠵᠢ ᠣᠯᠠᠨ ᠱᠠᠪᠢ ᠨᠠᠷ ᠲᠡᠳᠦᠢ ᠦᠭᠡᠢ᠂ ᠶᠦᠳᠠᠢ ᠶᠢᠨ ᠪᠦᠬᠦ ᠨᠤᠲᠤᠭ᠂ ᠶᠧᠷᠦ᠋ᠰᠠᠯᠧᠮ ᠪᠠ ᠲᠢᠷ᠂ ᠰᠢᠢᠳᠣᠨ ᠵᠡᠷᠭᠡ ᠳᠠᠯᠠᠢ ᠶᠢᠨ ᠬᠥᠪᠡᠭᠡ ᠶᠢᠨ ᠨᠤᠲᠤᠭ ᠠᠴᠠ ᠦᠢ ᠲᠦᠮᠡᠨ ᠬᠥᠮᠦᠨ ᠢᠷᠡᠭᠡᠳ 18 ᠢᠰᠦ᠋ᠰ ᠤᠨ ᠰᠤᠷᠭᠠᠯ ᠢ ᠰᠣᠨᠣᠰᠣᠨ᠂ ᠡᠪᠡᠳᠴᠢᠨ ᠢᠶᠠᠨ ᠴᠤ ᠵᠠᠰᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠴᠤᠭᠯᠠᠷᠠᠭᠰᠠᠨ ᠪᠠᠢᠵᠠᠢ᠃ ᠪᠤᠵᠠᠷ ᠴᠢᠳᠬᠥᠷ ᠲᠦ ᠲᠠᠷᠴᠢᠯᠠᠭᠠᠭᠳᠠᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠴᠤ ᠡᠳᠡᠭᠡᠷᠡᠵᠦ᠂ 19 ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠰᠦ᠋ᠰ ᠲᠤ ᠭᠠᠷ ᠢᠶᠠᠨ ᠬᠦᠷᠭᠡᠬᠦ ᠪᠡᠷ ᠴᠢᠷᠮᠠᠢᠵᠠᠭᠠᠨᠠ᠃ ᠤᠴᠢᠷ ᠨᠢ᠂ ᠲᠡᠭᠦᠨ ᠡᠴᠡ ᠬᠦᠴᠦ ᠤᠨᠳᠤᠷᠴᠤ ᠪᠦᠭᠦᠳᠡ ᠶᠢ ᠡᠳᠡᠭᠡᠭᠡᠵᠦ ᠪᠠᠢᠯᠠ᠃
ᠪᠤᠶᠠᠨ ᠪᠠ ᠭᠠᠢ
20 ᠢᠰᠦ᠋ᠰ ᠨᠢᠳᠦ ᠪᠡᠨ ᠡᠷᠭᠦᠨ ᠱᠠᠪᠢ ᠨᠠᠷ ᠤᠨ ᠢᠶᠠᠨ ᠵᠦᠭ᠄ 《ᠶᠠᠳᠠᠭᠤᠴᠤᠳ ᠡ᠂ ᠲᠠ ᠨᠠᠷ ᠪᠤᠶᠠᠨ ᠲᠠᠢ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠲᠠ ᠨᠠᠷ ᠤᠨ ᠬᠢ
21 ᠣᠳᠣ ᠥᠯᠥᠰᠬᠥᠯᠡᠩ ᠬᠥᠮᠦᠰ ᠡ᠂ ᠲᠠ ᠨᠠᠷ ᠪᠤᠶᠠᠨ ᠲᠠᠢ ᠲᠠ ᠨᠠᠷ ᠬᠠᠩ᠋ᠭᠠᠭᠳᠠᠨᠠ ᠣᠳᠣ ᠤᠬᠢᠯᠠᠵᠤ ᠪᠠᠢᠭᠠ ᠬᠥᠮᠦᠰ ᠡ᠂ ᠲᠠ ᠨᠠᠷ ᠪᠤᠶᠠᠨ ᠲᠠᠢ ᠲᠠ ᠨᠠᠷ ᠢᠨᠢᠶᠡᠨᠡ᠃
22 ᠬᠥᠮᠦᠰ ᠬᠥᠮᠦᠨ ᠦ ᠬᠦᠦ ᠶᠢᠨ ᠤᠯᠠᠮ ᠠᠴᠠ ᠲᠠ ᠨᠠᠷ ᠢ ᠵᠠᠨᠤᠵᠤ᠂ ᠭᠠᠭᠴᠠᠭᠠᠷᠳᠠᠭᠤᠯᠤᠨ᠂ ᠮᠠᠭᠤᠰᠢᠶᠠᠵᠤ᠂ ᠨᠡᠷᠡ ᠶᠢ ᠴᠢᠨᠢ ᠮᠠᠭᠤ ᠭᠡᠵᠦ ᠵᠢᠭᠰᠢᠪᠡᠯ ᠲᠠ ᠨᠠᠷ ᠪᠤᠶᠠᠨ ᠲᠠᠢ᠃ 23 ᠲᠡᠷᠡ ᠡᠳᠦᠷ ᠪᠠᠶᠠᠷᠯᠠᠨ ᠳᠡᠪᠬᠡᠴᠡᠵᠡᠭᠡ᠂ ᠠᠩ᠋ᠬᠠᠷᠤᠭᠲᠤᠨ᠂ ᠲᠩᠷᠢ ᠳᠠᠬᠢ ᠱᠠᠩᠨᠠᠯ ᠴᠢᠨᠢ ᠶᠡᠬᠡ ᠶᠤᠮ᠃ ᠲᠡᠳᠡᠨ ᠦ ᠳᠡᠭᠡᠳᠦᠰ ᠴᠤ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠤ ᠢᠩᠭᠢᠭᠰᠡᠨ ᠶᠤᠮ᠃
24 ᠭᠡᠪᠡᠴᠦ ᠪᠠᠶᠠᠴᠤᠳ ᠡ᠂ ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ ᠲᠠ ᠨᠠᠷ ᠲᠠᠢᠳᠬᠤᠷᠠᠯ ᠢ ᠬᠠᠨᠲᠠᠯᠠ ᠪᠠᠨ ᠠᠪᠴᠢᠬᠠᠭᠰᠠᠨ
25 ᠣᠳᠣ ᠴᠠᠳᠬᠤᠯᠠᠩ ᠬᠥᠮᠦᠰ ᠡ᠂ ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ ᠲᠠ ᠨᠠᠷ ᠥᠯᠥᠰᠬᠦ ᠪᠣᠯᠣᠨᠠ ᠣᠳᠣ ᠢᠨᠢᠶᠡᠵᠦ ᠪᠠᠢᠭᠠ ᠬᠥᠮᠦᠰ ᠡ᠂ ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ ᠲᠠ ᠨᠠᠷ ᠭᠠᠰᠢᠭᠤᠳᠠᠨ ᠤᠬᠢᠯᠠᠬᠤ ᠪᠣᠯᠣᠨᠠ᠃
26 ᠬᠥᠮᠦᠨ ᠪᠦᠬᠦᠨ ᠲᠠ ᠨᠠᠷ ᠢ ᠰᠠᠢᠨ ᠭᠡᠵᠦ ᠮᠠᠭᠲᠠᠪᠠᠯ ᠭᠠᠢ ᠪᠣᠯᠣᠨᠠ᠃ ᠲᠡᠳᠡᠨ ᠦ ᠳᠡᠭᠡᠳᠦᠰ ᠴᠤ ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠤ ᠢᠩᠭᠢᠭᠰᠡᠨ ᠶᠤᠮ᠃
27 ᠬᠠᠷᠢᠨ ᠰᠣᠨᠣᠰᠣᠭᠴᠢ ᠲᠠ ᠨᠠᠷ ᠲᠤ ᠪᠢ ᠬᠡᠯᠡᠶᠡ᠃ ᠳᠠᠢᠰᠤᠨ ᠨᠤᠭᠤᠳ ᠢᠶᠠᠨ ᠬᠠᠢᠷᠠᠯᠠ᠂ ᠥᠪᠡᠷ ᠢ ᠴᠢᠨᠢ ᠵᠠᠨᠤᠭᠴᠢᠳ ᠲᠤ ᠰᠠᠢᠨ ᠢ ᠦᠢᠯᠡᠳ︕ 28 ᠥᠪᠡᠷ ᠢ ᠴᠢᠨᠢ ᠬᠠᠷᠢᠶᠠᠳᠠᠭ ᠬᠥᠮᠦᠨ ᠢ ᠢᠷᠥᠭᠡ᠃ ᠥᠪᠡᠷ ᠢ ᠴᠢᠨᠢ ᠱᠣᠭᠣᠪᠳᠣᠷᠯᠠᠳᠠᠭ ᠬᠥᠮᠦᠨ ᠦ ᠲᠥᠯᠥᠭᠡ ᠳᠠᠭᠠᠳᠬᠠ᠃ 29 ᠬᠠᠴᠠᠷ ᠢ ᠴᠢᠨᠢ ᠠᠯᠠᠭᠠᠳᠠᠭᠰᠠᠨ ᠬᠥᠮᠦᠨ ᠳᠦ ᠨᠥᠭᠥᠭᠡ ᠬᠠᠴᠠᠷ ᠢᠶᠠᠨ ᠴᠤ ᠥᠭ᠃ ᠭᠠᠳᠠᠷ ᠬᠤᠪᠴᠠᠰᠤ ᠶᠢ ᠴᠢᠨᠢ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠬᠥᠮᠦᠨ ᠡᠴᠡ ᠳᠣᠲᠣᠷ ᠬᠤᠪᠴᠠᠰᠤ ᠪᠠᠨ ᠴᠤ ᠪᠦᠦ ᠬᠠᠷᠠᠮᠯᠠ᠃ 30 ᠴᠢᠮᠠ ᠠᠴᠠ ᠭᠤᠶᠤᠭᠰᠠᠨ ᠪᠣᠯᠭᠠᠨ ᠳᠤ ᠥᠭ᠂ ᠶᠠᠭᠤᠮᠠ ᠶᠢ ᠴᠢᠨᠢ ᠠᠪᠤᠭᠰᠠᠨ ᠬᠥᠮᠦᠨ ᠡᠴᠡ ᠪᠦᠦ ᠨᠡᠬᠡ᠃ 31 ᠲᠠ ᠨᠠᠷ ᠬᠥᠮᠦᠰ ᠢ ᠥᠪᠡᠷᠰᠡᠳ ᠲᠡᠭᠡᠨ ᠬᠡᠷᠬᠢᠨ ᠬᠠᠨᠳᠤᠭᠠᠰᠠᠢ ᠭᠡᠵᠦ ᠬᠦᠰᠡᠳᠡᠭ ᠪᠣᠯ᠂ ᠥᠪᠡᠷᠰᠡᠳ ᠢᠶᠡᠨ ᠴᠤ ᠲᠡᠳᠡᠨ ᠳᠦ ᠲᠡᠭᠡᠵᠦ ᠬᠠᠨᠳᠤ᠃
32 ᠥᠪᠡᠷᠰᠡᠳ ᠢ ᠴᠢᠨᠢ ᠬᠠᠢᠷᠠᠯᠠᠭᠰᠠᠳ ᠢ ᠯᠠ ᠬᠠᠢᠷᠠᠯᠠᠪᠠᠯ ᠲᠠ ᠨᠠᠷ ᠲᠤ ᠶᠠᠮᠠᠷ ᠢᠪᠡᠭᠡᠯ ᠪᠠᠢᠬᠤ ᠶᠤᠮ ᠪᠤᠢ︖ ᠨᠢᠭᠦᠯᠲᠡᠳ ᠴᠤ ᠥᠪᠡᠷᠰᠡᠳ ᠢ ᠨᠢ ᠬᠠᠢᠷᠠᠯᠠᠭᠰᠠᠳ ᠢ ᠬᠠᠢᠷᠠᠯᠠᠳᠠᠭ ᠰᠢᠦ ᠳᠠ᠃ 33 ᠥᠪᠡᠷ ᠲᠦ ᠴᠢᠨᠢ ᠰᠠᠢᠨ ᠢ ᠦᠢᠯᠡᠳᠳᠡᠭ ᠬᠥᠮᠦᠰ ᠲᠦ ᠰᠠᠢᠨ ᠢ ᠦᠢᠯᠡᠳᠪᠡᠯ ᠲᠠ ᠨᠠᠷ ᠲᠤ ᠶᠠᠮᠠᠷ ᠢᠪᠡᠭᠡᠯ ᠪᠠᠢᠬᠤ ᠪᠤᠢ︖ ᠨᠢᠭᠦᠯᠲᠡᠳ ᠴᠤ ᠲᠡᠭᠡᠳᠡᠭ ᠶᠤᠮ᠃ 34 ᠪᠤᠴᠠᠭᠠᠵᠤ ᠠᠪᠬᠤ ᠪᠣᠳᠣᠯ ᠲᠠᠢ ᠪᠠᠷ ᠵᠢᠭᠡᠯᠡᠭᠦᠯᠬᠦ ᠶᠤᠮ ᠪᠣᠯ᠂ ᠲᠠ ᠨᠠᠷ ᠲᠤ ᠶᠠᠮᠠᠷ ᠢᠪᠡᠭᠡᠯ ᠪᠠᠢᠬᠤ ᠪᠤᠢ︖ ᠨᠢᠭᠦᠯᠲᠡᠳ ᠴᠤ ᠪᠦᠬᠦᠨ ᠢ ᠪᠤᠴᠠᠭᠠᠵᠤ ᠠᠪᠬᠤ ᠭᠡᠵᠦ ᠨᠢᠭᠦᠯᠲᠡᠨ ᠳᠡᠭᠡᠨ ᠵᠢᠭᠡᠯᠡᠭᠦᠯᠳᠡᠭ᠃ 35 ᠬᠠᠷᠢᠨ ᠲᠠ ᠨᠠᠷ ᠳᠠᠢᠰᠤᠨ ᠢᠶᠠᠨ ᠬᠠᠢᠷᠠᠯᠠᠵᠤ ᠲᠡᠳᠡᠨ ᠳᠦ ᠰᠠᠢᠨ ᠢ ᠦᠢᠯᠡᠳᠦᠨ᠂ ᠶᠠᠭᠤ ᠴᠤ ᠬᠦᠰᠡᠬᠦ ᠦᠭᠡᠢ ᠪᠠᠷ ᠵᠢᠭᠡᠯᠡᠭᠦᠯ᠂ ᠲᠡᠭᠡᠪᠡᠯ ᠲᠠ ᠨᠠᠷ ᠶᠡᠬᠡ ᠪᠡᠷ ᠱᠠᠩᠨᠠᠭᠳᠠᠨ ᠳᠡᠭᠡᠳᠦ ᠶᠢᠨ ᠳᠡᠭᠡᠳᠦ ᠨᠢᠭᠡᠨ ᠦ ᠬᠡᠦᠬᠡᠳ ᠤᠳ ᠪᠣᠯᠣᠨᠠ᠃ ᠲᠡᠷᠡ ᠪᠡᠷ ᠠᠴᠢ ᠶᠢ ᠮᠡᠳᠡᠬᠦ ᠦᠭᠡᠢ ᠮᠠᠭᠤ ᠬᠥᠮᠦᠰ ᠲᠦ ᠴᠤ ᠰᠠᠢᠨ ᠪᠠᠢᠳᠠᠭ ᠶᠤᠮ᠃ 36 ᠲᠠ ᠨᠠᠷ ᠤᠨ ᠡᠴᠢᠭᠡ ᠥᠷᠥᠰᠢᠶᠡᠩᠭᠦᠢ ᠪᠠᠢᠳᠠᠭ ᠰᠢᠭ᠋ ᠲᠠ ᠨᠠᠷ ᠴᠤ ᠥᠷᠥᠰᠢᠶᠡᠩᠭᠦᠢ ᠪᠣᠯᠣᠭᠲᠤᠨ᠃
37 ᠪᠦᠦ ᠰᠢᠭᠦᠮᠵᠢᠯᠡ᠂ ᠲᠡᠭᠡᠪᠡᠯ ᠲᠠ ᠨᠠᠷ ᠰᠢᠭᠦᠮᠵᠢᠯᠡᠭᠳᠡᠬᠦ ᠦᠭᠡᠢ᠃ ᠪᠦᠦ ᠪᠤᠷᠤᠭᠤᠳᠬᠠ᠂ ᠲᠡᠭᠡᠪᠡᠯ ᠲᠠ ᠨᠠᠷ ᠪᠤᠷᠤᠭᠤᠳᠬᠠᠭᠳᠠᠬᠤ ᠦᠭᠡᠢ᠃ ᠠᠭᠤᠴᠢᠯᠠ᠂ ᠲᠡᠭᠡᠪᠡᠯ ᠲᠠ ᠨᠠᠷ ᠠᠭᠤᠴᠢᠯᠠᠭᠳᠠᠨᠠ᠃ 38 ᠥᠭᠭᠥᠭᠲᠦᠨ᠂ ᠲᠡᠭᠡᠪᠡᠯ ᠲᠠ ᠨᠠᠷ ᠲᠤ ᠴᠤ ᠥᠭᠭᠥᠭᠳᠡᠨᠡ᠂ ᠴᠢᠬᠢᠵᠦ ᠴᠢᠭ᠍ᠵᠢᠲᠡᠯᠡ ᠪᠢᠯᠬᠠᠭᠰᠠᠨ ᠶᠡᠬᠡ ᠬᠡᠮᠵᠢᠶᠡ ᠪᠡᠷ ᠡᠪᠦᠷ ᠲᠦ ᠴᠢᠨᠢ ᠥᠭᠭᠥᠭᠳᠡᠨᠡ᠃ ᠲᠠ ᠨᠠᠷ ᠬᠡᠮᠵᠢᠭᠰᠡᠨ ᠬᠡᠮᠵᠢᠭᠦᠷ ᠢᠶᠡᠷ ᠢᠶᠠᠨ ᠬᠡᠮᠵᠢᠭᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃
39 ᠢᠰᠦ᠋ᠰ ᠮᠥᠨ ᠦᠯᠢᠭᠡᠷᠯᠡᠯ ᠢᠶᠡᠷ᠄ 《ᠰᠣᠬᠣᠷ ᠨᠢ ᠰᠣᠬᠣᠷ ᠢᠶᠠᠨ ᠵᠠᠮᠴᠢᠯᠠᠵᠤ ᠴᠢᠳᠠᠨᠠ ᠤᠤ︖ ᠬᠣᠶᠠᠭᠤᠯᠠ ᠪᠠᠨ ᠨᠦᠬᠡᠨ ᠳᠦ ᠤᠨᠠᠴᠢᠬᠠᠬᠤ ᠪᠢᠰᠢ ᠤᠤ︖ 40 ᠱᠠᠪᠢ ᠨᠢ ᠪᠠᠭᠰᠢ ᠡᠴᠡ ᠪᠡᠨ ᠠᠭᠤᠤ ᠪᠠᠢᠳᠠᠭ ᠦᠭᠡᠢ᠃ ᠬᠠᠷᠢᠨ ᠲᠡᠭᠦᠰ ᠰᠤᠷᠤᠭᠰᠠᠨ ᠪᠦᠬᠦᠨ ᠪᠠᠭᠰᠢ ᠰᠢᠭ᠋ ᠢᠶᠠᠨ ᠪᠣᠯᠣᠨᠠ᠃ 41 ᠴᠢ ᠠᠬᠠ ᠳᠡᠭᠦᠦ ᠶᠢᠨ ᠢᠶᠠᠨ ᠨᠢᠳᠦᠨ ᠳᠠᠬᠢ ᠬᠣᠭ ᠢ ᠬᠠᠷᠠᠳᠠᠭ ᠠᠲᠠᠯᠠ ᠪᠠᠨ ᠥᠪᠡᠷ ᠦᠨ ᠢᠶᠠᠨ ᠨᠢᠳᠦᠨ ᠳᠠᠬᠢ ᠳ᠋ᠠᠮ ᠨᠢᠷᠤᠭᠤ ᠶᠢ ᠶᠠᠭᠠᠬᠢᠭᠠᠳ ᠠᠩᠵᠠᠭᠠᠷᠠᠳᠠᠭ ᠦᠭᠡᠢ ᠪᠤᠢ︖ 42 ᠴᠢ ᠥᠪᠡᠷ ᠦᠨ ᠢᠶᠠᠨ ᠨᠢᠳᠦᠨ ᠳᠠᠬᠢ ᠳ᠋ᠠᠮ ᠨᠢᠷᠤᠭᠤ ᠶᠢ ᠦᠵᠡᠬᠦ ᠦᠭᠡᠢ ᠪᠠᠢᠲᠠᠯᠠ ᠪᠠᠨ ᠠᠬᠠ ᠳᠡᠭᠦᠦ ᠳᠡᠭᠡᠨ᠄ 〈ᠠᠬᠠ ᠡ᠂ ᠨᠠᠳᠠ ᠪᠠᠷ ᠨᠢᠳᠦᠨ ᠦ ᠪᠠᠨ ᠬᠣᠭ ᠢ ᠠᠪᠤᠭᠤᠯᠴᠢᠬᠠ〉 ᠭᠡᠵᠦ ᠶᠠᠭᠠᠬᠢᠨ ᠬᠡᠯᠡᠵᠦ ᠴᠢᠳᠠᠨᠠ ᠪᠤᠢ︖ ᠬᠣᠶᠠᠷ ᠨᠢᠭᠤᠷᠲᠠᠨ ᠴᠢ ᠤᠷᠢᠳᠠᠪᠠᠷ ᠨᠢᠳᠦᠨ ᠳᠠᠬᠢ ᠳ᠋ᠠᠮ ᠨᠢᠷᠤᠭᠤ ᠪᠠᠨ ᠠᠪᠴᠢᠬᠠ᠂ ᠲᠡᠭᠡᠪᠡᠯ ᠠᠬᠠ ᠳᠡᠭᠦᠦ ᠶᠢᠨ ᠢᠶᠠᠨ ᠨᠢᠳᠦᠨ ᠡᠴᠡ ᠬᠣᠭ ᠢ ᠨᠢ ᠠᠪᠬᠤ ᠳᠤ ᠲᠣᠳᠣ ᠬᠠᠷᠠᠬᠤ ᠪᠣᠯᠣᠨᠠ᠃
43 ᠰᠠᠢᠨ ᠮᠣᠳᠣᠨ ᠳᠤ ᠮᠠᠭᠤ ᠵᠢᠮᠢᠰ ᠰᠠᠭᠤᠳᠠᠭ ᠦᠭᠡᠢ᠃ ᠮᠥᠨ ᠮᠠᠭᠤ ᠮᠣᠳᠣᠨ ᠳᠤ ᠰᠠᠢᠨ ᠵᠢᠮᠢᠰ ᠰᠠᠭᠤᠳᠠᠭ ᠦᠭᠡᠢ᠃ 44 ᠮᠣᠳᠣ ᠪᠣᠯᠭᠠᠨ ᠦᠷᠡ ᠵᠢᠮᠢᠰ ᠢᠶᠠᠷ ᠢᠶᠠᠨ ᠲᠠᠨᠢᠭᠳᠠᠳᠠᠭ᠃ ᠬᠥᠮᠦᠰ ᠥᠷᠭᠡᠰᠦᠲᠦ ᠪᠤᠲᠠ ᠠᠴᠠ ᠢᠨᠵᠢᠷ ᠤᠨ ᠵᠢᠮᠢᠰ᠂ ᠢᠮᠠᠭᠠᠨ ᠵᠠᠩ᠋ᠭᠤᠤ ᠠᠴᠠ ᠦᠵᠦᠮ ᠲᠡᠭᠦᠳᠡᠭ ᠦᠭᠡᠢ᠃ 45 ᠰᠠᠢᠨ ᠬᠥᠮᠦᠨ ᠰᠡᠳᠬᠢᠯ ᠳᠡᠭᠡᠨ ᠬᠠᠳᠠᠭᠠᠯᠠᠭᠰᠠᠨ ᠰᠠᠢᠨ ᠠᠴᠠ ᠪᠠᠨ ᠰᠠᠢᠨ ᠢ ᠭᠠᠷᠭᠠᠵᠤ᠂ ᠮᠠᠭᠤ ᠬᠥᠮᠦᠨ ᠰᠡᠳᠬᠢᠯ ᠳᠡᠭᠡᠨ ᠬᠠᠳᠠᠭᠠᠯᠠᠭᠰᠠᠨ ᠮᠠᠭᠤ ᠠᠴᠠ ᠪᠠᠨ ᠮᠠᠭᠤ ᠶᠢ ᠭᠠᠷᠭᠠᠳᠠᠭ᠃ ᠤᠴᠢᠷ ᠨᠢ᠂ ᠬᠥᠮᠦᠨ ᠰᠡᠳᠬᠢᠯ ᠳᠡᠭᠡᠨ ᠳᠦᠭᠦᠷᠡᠩ ᠪᠠᠢᠭᠠ ᠪᠠᠨ ᠠᠮᠠ ᠪᠠᠷ ᠢᠶᠠᠨ ᠶᠠᠷᠢᠳᠠᠭ ᠶᠤᠮ᠃
ᠬᠣᠶᠠᠷ ᠪᠠᠷᠢᠯᠭᠠᠴᠢᠨ᠂ ᠬᠣᠶᠠᠷ ᠰᠠᠭᠤᠷᠢ
46 ᠲᠠ ᠨᠠᠷ ᠨᠠᠮᠠᠶᠢ᠄ 〈ᠡᠵᠡᠨ ᠡ᠂ ᠡᠵᠡᠨ〉 ᠭᠡᠵᠦ ᠳᠠᠭᠤᠳᠠᠴᠢᠬᠠᠭᠠᠳ ᠶᠠᠭᠤᠨ ᠳᠤ ᠮᠢᠨᠦ ᠬᠡᠯᠡᠳᠡᠭ ᠢ ᠪᠡᠶᠡᠯᠡᠭᠦᠯᠳᠡᠭ ᠦᠭᠡᠢ ᠶᠤᠮ ᠪᠤᠢ︖ 47 ᠨᠠᠳᠠ ᠤᠷᠤᠭᠤ ᠢᠷᠡᠵᠦ᠂ ᠦᠭᠡ ᠶᠢ ᠮᠢᠨᠢ ᠰᠣᠨᠣᠰᠣᠭᠠᠳ ᠪᠡᠶᠡᠯᠡᠭᠦᠯᠦᠭᠴᠢ ᠪᠣᠯᠭᠠᠨ ᠬᠡᠨ ᠲᠡᠢ ᠠᠳᠠᠯᠢ ᠪᠣᠯᠬᠤ ᠶᠢ ᠪᠢ ᠲᠠ ᠨᠠᠷ ᠲᠤ ᠵᠢᠭᠠᠵᠤ ᠥᠭᠭᠥᠶᠡ᠃ 48 ᠲᠡᠷᠡ ᠨᠢ ᠪᠠᠢᠰᠢᠩ ᠪᠠᠷᠢᠬᠤ ᠳᠠᠭᠠᠨ ᠭᠠᠵᠠᠷ ᠢᠶᠠᠨ ᠭᠦᠨ ᠤᠬᠤᠵᠤ ᠬᠠᠳᠠᠨ ᠳᠡᠭᠡᠷᠡ ᠰᠠᠭᠤᠷᠢ ᠲᠠᠯᠪᠢᠭᠰᠠᠨ ᠬᠥᠮᠦᠨ ᠲᠡᠢ ᠠᠳᠠᠯᠢ᠃ ᠦᠶᠡᠷ ᠪᠠᠭᠤᠵᠤ ᠤᠷᠤᠰᠬᠠᠯ ᠪᠠᠢᠰᠢᠩ ᠢ ᠳᠠᠭᠠᠷᠢᠭᠰᠠᠨ ᠪᠣᠯᠪᠠᠴᠤ ᠰᠠᠢᠨ ᠪᠠᠷᠢᠭᠰᠠᠨ ᠲᠡᠷᠡ ᠪᠠᠢᠰᠢᠩ ᠢ ᠬᠥᠳᠡᠯᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ 49 ᠬᠠᠷᠢᠨ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠪᠡᠶᠡᠯᠡᠭᠦᠯᠳᠡᠭ ᠦᠭᠡᠢ ᠬᠥᠮᠦᠨ ᠪᠣᠯ ᠭᠠᠵᠠᠷ ᠳᠡᠭᠡᠷᠡ ᠰᠠᠭᠤᠷᠢ ᠦᠭᠡᠢ ᠪᠠᠢᠰᠢᠩ ᠪᠠᠷᠢᠭᠰᠠᠨ ᠬᠥᠮᠦᠨ ᠲᠡᠢ ᠠᠳᠠᠯᠢ᠃ ᠲᠡᠷᠡ ᠪᠠᠢᠰᠢᠩ ᠤᠷᠤᠰᠬᠠᠯ ᠳᠤ ᠳᠠᠭᠠᠷᠢᠭᠳᠠᠮᠠᠭᠴᠠ ᠨᠤᠷᠠᠵᠤ ᠶᠡᠬᠡ ᠬᠣᠬᠢᠷᠠᠯ ᠳᠤ ᠤᠴᠠᠷᠠᠨᠠ》 ᠭᠡᠪᠡ᠃