ᠯᠦᠺ ᠠᠷᠪᠠᠨ ᠵᠢᠷᠭᠤᠭᠠ
ᠵᠥᠪ ᠪᠤᠰᠤ ᠨᠢᠷᠪᠠ
1 ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠭᠠᠨ᠄ 《ᠨᠢᠭᠡᠨ ᠪᠠᠶᠠᠨ ᠨᠢᠷᠪᠠ ᠲᠠᠢ ᠪᠠᠢᠵᠠᠢ᠃ ᠨᠢᠷᠪᠠ ᠨᠢ ᠡᠳ᠋ ᠬᠥᠷᠥᠩᠭᠡ ᠶᠢ ᠨᠢ ᠪᠦᠷᠢᠯᠭᠡᠵᠦ ᠪᠠᠢᠨᠠ ᠭᠡᠵᠦ ᠳᠤᠭᠤᠯᠳᠠᠭᠰᠠᠨ ᠳᠤ᠂ 2 ᠲᠡᠷᠡ ᠲᠡᠭᠦᠨ ᠢ ᠳᠠᠭᠤᠳᠠᠵᠤ᠄ 〈ᠴᠢᠨᠦ ᠲᠤᠬᠠᠢ ᠨᠠᠳᠠ ᠳᠤ ᠰᠣᠨᠣᠰᠳᠠᠳᠠᠭ ᠡᠨᠡ ᠶᠠᠭᠤ ᠪᠤᠢ︖ ᠴᠢ ᠠᠵᠢᠯ ᠤᠨ ᠳᠠᠩᠰᠠ ᠪᠠᠨ ᠲᠤᠰᠢᠶᠠ᠃ ᠴᠢᠮᠠ ᠪᠠᠷ ᠨᠢᠷᠪᠠ ᠪᠣᠯᠭᠠᠬᠤ ᠪᠠᠨ ᠪᠣᠯᠢᠶᠠ〉 ᠭᠡᠰᠡᠨ ᠳᠦ᠂ 3 ᠨᠢᠷᠪᠠ ᠳᠣᠲᠣᠷᠠ ᠪᠠᠨ᠄ 〈ᠡᠵᠡᠨ ᠨᠢᠷᠪᠠ ᠶᠢᠨ ᠠᠵᠢᠯ ᠢ ᠮᠢᠨᠢ ᠪᠣᠯᠢᠭᠤᠯᠬᠤ ᠨᠢ᠂ ᠪᠢ ᠶᠠᠭᠤ ᠬᠢᠬᠦ ᠪᠢᠯᠡ︖ ᠭᠠᠵᠠᠷ ᠬᠠᠭᠠᠯᠤᠶᠠ ᠭᠡᠬᠦ ᠳᠦ ᠬᠦᠴᠦ ᠳᠤᠲᠠᠬᠤ ᠨᠢ᠂ ᠭᠤᠢᠷᠠᠨᠴᠢᠯᠠᠶᠠ ᠭᠡᠬᠦ ᠳᠦ ᠨᠢᠭᠤᠷ ᠪᠠᠷᠠᠬᠤ ᠨᠢ ᠡ᠃ 4 ᠪᠢ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠯᠡ︕ ᠢᠩᠭᠢᠪᠡᠯ ᠨᠢᠷᠪᠠ ᠶᠢᠨ ᠠᠵᠢᠯ ᠠᠴᠠ ᠪᠠᠨ ᠬᠠᠯᠠᠭᠳᠠᠬᠤ ᠳᠤ ᠮᠢᠨᠢ ᠬᠥᠮᠦᠰ ᠨᠠᠮᠠᠶᠢ ᠭᠡᠷ ᠲᠡᠭᠡᠨ ᠬᠦᠯᠢᠶᠡᠨ ᠠᠪᠬᠤ ᠪᠣᠯᠣᠨᠠ〉 ᠬᠡᠮᠡᠨ ᠪᠣᠳᠣᠭᠠᠳ 5 ᠡᠵᠡᠨ ᠳᠦᠨᠢ ᠥᠷᠢ ᠲᠠᠢ ᠪᠠᠢᠭᠰᠠᠨ ᠬᠥᠮᠦᠰ ᠢ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠳᠠᠭᠤᠳᠠᠵᠠᠢ᠃ ᠨᠢᠷᠪᠠ ᠡᠬᠢᠨ ᠤ ᠬᠥᠮᠦᠨ ᠡᠴᠡ᠄ 〈ᠲᠠ ᠮᠢᠨᠦ ᠡᠵᠡᠨ ᠳᠦ ᠬᠡᠳᠦᠢ ᠥᠷᠢ ᠲᠠᠢ ᠪᠤᠢ︖〉 ᠭᠡᠰᠡᠨ ᠳᠦ᠂ 6 ᠲᠡᠷᠡ᠄ 〈ᠲᠠᠪᠢᠨ ᠵᠢᠩ ᠲᠣᠰᠣ〉 ᠭᠡᠪᠡ᠃ ᠨᠢᠷᠪᠠ᠄ 〈ᠪᠠᠷᠢᠮᠲᠠ ᠪᠢᠴᠢᠭ ᠢᠶᠠᠨ ᠠᠪᠴᠤ᠂ ᠬᠤᠷᠳᠤᠨ ᠰᠠᠭᠤᠭᠠᠳ ᠬᠣᠷᠢᠨ ᠲᠠᠪᠤ ᠭᠡᠵᠦ ᠪᠢᠴᠢ〉 ᠭᠡᠵᠡᠢ᠃ 7 ᠳᠠᠷᠠᠭᠠ ᠶᠢᠨ ᠬᠥᠮᠦᠨ ᠡᠴᠡ᠄ 〈ᠬᠡᠳᠦᠢ ᠥᠷᠢ ᠲᠠᠢ ᠪᠤᠢ︖〉 ᠭᠡᠬᠦ ᠳᠦ᠂ ᠲᠡᠷᠡ᠄ 〈ᠵᠠᠭᠤᠨ ᠤᠭᠤᠲᠠ ᠪᠤᠭᠤᠳᠠᠢ〉 ᠭᠡᠪᠡ᠃ ᠨᠢᠷᠪᠠ᠄ 〈ᠪᠠᠷᠢᠮᠲᠠ ᠪᠢᠴᠢᠭ ᠢᠶᠠᠨ ᠠᠪᠤᠭᠠᠳ ᠨᠠᠶᠠ ᠭᠡᠵᠦ ᠪᠢᠴᠢ〉 ᠭᠡᠵᠦ ᠬᠡᠯᠡᠪᠡ᠃ 8 ᠡᠨᠡ ᠵᠥᠪ ᠪᠤᠰᠤ ᠨᠢᠷᠪᠠ ᠶᠢᠨ ᠢᠶᠠᠨ ᠤᠬᠠᠭᠠᠨᠯᠢᠭ ᠢᠶᠠᠷ ᠦᠢᠯᠡᠳᠦᠭᠰᠡᠨ ᠢ ᠡᠵᠡᠨ ᠨᠢ ᠮᠠᠭᠲᠠᠪᠠ᠃ ᠤᠴᠢᠷ ᠨᠢ᠂ ᠡᠨᠡ ᠳᠡᠯᠡᠬᠡᠢ ᠶᠢᠨ ᠬᠥᠮᠦᠰ ᠢᠵᠢᠯ ᠲᠥᠷᠥᠯᠲᠡᠨ ᠲᠡᠢ ᠪᠡᠨ ᠬᠠᠷᠢᠯᠴᠠᠬᠤ ᠳᠠᠭᠠᠨ ᠭᠡᠷᠡᠯ ᠦᠨ ᠬᠡᠦᠬᠡᠳ ᠤᠳ ᠠᠴᠠ ᠢᠯᠡᠭᠦᠦ ᠤᠬᠠᠭᠠᠨᠯᠢᠭ ᠠᠵᠢ᠃ 9 ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ ᠵᠥᠪ ᠪᠤᠰᠤ ᠡᠳ᠋ ᠮᠥᠩᠭᠥ ᠪᠡᠷ ᠨᠠᠢᠵᠠ ᠨᠥᠬᠥᠳ ᠢᠶᠡᠨ ᠣᠯ᠂ ᠡᠳ᠋ ᠮᠥᠩᠭᠥ ᠤᠰᠠᠳᠬᠤ ᠳᠤ᠂ ᠲᠡᠳᠡ ᠲᠠ ᠨᠠᠷ ᠢ ᠮᠥᠩᠬᠡ ᠶᠢᠨ ᠣᠷᠣᠨ ᠳᠤ ᠬᠦᠯᠢᠶᠡᠨ ᠠᠪᠤᠨᠠ᠃ 10 ᠬᠠᠮᠤᠭ ᠤᠨ ᠪᠠᠭᠠ ᠶᠠᠭᠤᠮᠠᠨ ᠳᠤ ᠢᠲᠡᠭᠡᠮᠵᠢᠲᠡᠢ ᠪᠠᠢᠳᠠᠭ ᠬᠥᠮᠦᠨ ᠶᠡᠬᠡ ᠶᠠᠭᠤᠮᠠᠨ ᠳᠤ ᠴᠤ ᠢᠲᠡᠭᠡᠮᠵᠢᠲᠡᠢ᠂ ᠬᠠᠮᠤᠭ ᠤᠨ ᠪᠠᠭᠠ ᠶᠠᠭᠤᠮᠠᠨ ᠳᠤ ᠵᠥᠪ ᠪᠤᠰᠤ ᠨᠢ ᠶᠡᠬᠡ ᠶᠠᠭᠤᠮᠠᠨ ᠳᠤ ᠴᠤ ᠵᠥᠪ ᠪᠤᠰᠤ ᠪᠠᠢᠳᠠᠭ᠃ 11 ᠲᠠ ᠨᠠᠷ ᠬᠡᠷᠪᠡ ᠵᠥᠪ ᠪᠤᠰᠤ ᠡᠳ᠋ ᠮᠥᠩᠭᠥᠨ ᠳᠤ ᠢᠲᠡᠭᠡᠮᠵᠢ ᠦᠭᠡᠢ ᠪᠣᠯ᠂ ᠬᠡᠨ ᠲᠠ ᠨᠠᠷ ᠲᠤ ᠵᠢᠩᠬᠢᠨᠢ ᠪᠠᠨ ᠳᠠᠭᠠᠭᠠᠯᠭᠠᠬᠤ ᠪᠢᠯᠡ︖ 12 ᠲᠠ ᠨᠠᠷ ᠬᠡᠷᠪᠡ ᠪᠤᠰᠤᠳ ᠤᠨ ᠶᠠᠭᠤᠮᠠᠨ ᠳᠤ ᠢᠲᠡᠭᠡᠮᠵᠢ ᠦᠭᠡᠢ ᠪᠣᠯ᠂ ᠬᠡᠨ ᠲᠠ ᠨᠠᠷ ᠲᠤ ᠥᠪᠡᠷᠰᠡᠳ ᠦᠨ ᠴᠢᠨᠢ ᠶᠠᠭᠤᠮᠠ ᠶᠢ ᠥᠭᠬᠦ ᠪᠢᠯᠡ︖ 13 ᠨᠢᠭᠡ ᠵᠠᠷᠤᠴᠠ ᠬᠣᠶᠠᠷ ᠡᠵᠡᠨ ᠳᠦ ᠵᠠᠷᠤᠭᠳᠠᠵᠤ ᠦᠯᠦ ᠴᠢᠳᠠᠨᠠ᠃ ᠤᠴᠢᠷ ᠨᠢ᠂ ᠲᠡᠷᠡ ᠪᠡᠷ ᠨᠢᠭᠡ ᠶᠢ ᠨᠢ ᠦᠵᠡᠨ ᠶᠠᠳᠠᠵᠤ ᠨᠥᠭᠥᠭᠡ ᠶᠢ ᠨᠢ ᠬᠠᠢᠷᠠᠯᠠᠬᠤ᠂ ᠡᠰᠡᠬᠦᠯᠡ ᠨᠢᠭᠡ ᠶᠢ ᠨᠢ ᠬᠦᠨᠳᠦᠯᠡᠵᠦ ᠨᠥᠭᠥᠭᠡ ᠶᠢ ᠨᠢ ᠬᠥᠩᠭᠡᠪᠴᠢᠯᠡᠬᠦ ᠪᠣᠯᠣᠨᠠ᠃ ᠲᠠ ᠨᠠᠷ ᠪᠤᠷᠬᠠᠨ ᠪᠠ ᠡᠳ᠋ ᠮᠥᠩᠭᠥ ᠳᠤ ᠵᠡᠷᠭᠡᠪᠡᠷ ᠵᠠᠷᠤᠭᠳᠠᠵᠤ ᠦᠯᠦ ᠴᠢᠳᠠᠨᠠ》 ᠭᠡᠪᠡ᠃
14 ᠹᠠᠷᠢᠰᠠᠢᠴᠤᠳ ᠵᠣᠭᠣᠰᠣᠨ ᠳᠤ ᠳᠤᠷᠠᠲᠠᠢ ᠪᠠᠢᠳᠠᠭ ᠪᠣᠯᠬᠣᠷ ᠡᠨᠡ ᠪᠦᠬᠦᠨ ᠢ ᠰᠣᠨᠣᠰᠣᠭᠠᠳ ᠢᠰᠦ᠋ᠰ ᠢ ᠡᠯᠡᠭᠯᠡᠵᠦ ᠪᠠᠢᠯᠠ᠃ 15 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠪᠣᠯ ᠬᠥᠮᠦᠰ ᠦᠨ ᠡᠮᠦᠨᠡ ᠪᠡᠶᠡ ᠪᠡᠨ ᠵᠥᠪ ᠭᠡᠭᠴᠢᠳ ᠶᠤᠮ᠂ ᠭᠡᠪᠡᠴᠦ ᠪᠤᠷᠬᠠᠨ ᠲᠠ ᠨᠠᠷ ᠤᠨ ᠰᠡᠳᠬᠢᠯ ᠢ ᠮᠡᠳᠡᠨᠡ᠃ ᠬᠥᠮᠦᠰ ᠦᠨ ᠡᠷᠬᠢᠮᠯᠡᠳᠡᠭ ᠵᠦᠢᠯ ᠨᠢ ᠪᠤᠷᠬᠠᠨ ᠤ ᠡᠮᠦᠨᠡ ᠵᠢᠭᠰᠢᠭᠦᠷᠢ ᠪᠣᠯᠳᠠᠭ᠃
16 ᠬᠠᠤᠯᠢ ᠪᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠨᠢ ᠶᠣᠬᠠᠨ ᠤ ᠴᠠᠭ ᠬᠦᠷᠲᠡᠯᠡ ᠪᠠᠢᠭᠰᠠᠨ᠃ ᠲᠡᠷᠡ ᠦᠶᠡ ᠡᠴᠡ ᠡᠬᠢᠯᠡᠭᠡᠳ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡ ᠳᠡᠯᠭᠡᠷᠡᠵᠦ᠂ ᠬᠥᠮᠦᠨ ᠪᠦᠬᠦᠨ ᠲᠡᠰᠢ ᠪᠠᠨ ᠣᠷᠣᠬᠤ ᠪᠠᠷ ᠲᠡᠮᠡᠴᠡᠵᠦ ᠪᠠᠢᠨᠠ᠃ 17 ᠬᠠᠤᠯᠢ ᠶᠢᠨ ᠭᠠᠭᠴᠠ ᠵᠢᠷᠤᠭᠠᠰᠤ ᠪᠠᠯᠠᠷᠠᠬᠤ ᠠᠴᠠ ᠲᠩᠷᠢ ᠭᠠᠵᠠᠷ ᠵᠠᠮᠬᠠᠷᠠᠬᠤ ᠨᠢ ᠬᠢᠯᠪᠠᠷ ᠪᠢᠯᠡ᠃
18 ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠤᠭᠠᠳ ᠥᠭᠡᠷᠡ ᠡᠮᠡᠭᠲᠡᠢ ᠲᠡᠢ ᠭᠡᠷᠯᠡᠭᠴᠢ ᠪᠣᠯᠭᠠᠨ ᠵᠠᠪᠬᠠᠢᠷᠠᠭᠴᠢ ᠪᠥᠭᠡᠳ ᠰᠠᠯᠤᠭᠰᠠᠨ ᠡᠬᠡᠨᠡᠷ ᠲᠡᠢ ᠭᠡᠷᠯᠡᠭᠴᠢ ᠨᠢ ᠴᠤ ᠵᠠᠪᠬᠠᠢᠷᠠᠭᠰᠠᠨ ᠪᠣᠯᠠᠢ᠃
ᠪᠠᠶᠠᠨ ᠬᠥᠮᠦᠨ ᠬᠢᠭᠡᠳ ᠶᠠᠳᠠᠭᠤ ᠯᠠᠽᠠᠷᠠ
19 ᠨᠢᠭᠡᠨ ᠪᠠᠶᠠᠨ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠳᠠᠩᠳᠠ ᠨᠢᠯ ᠶᠠᠭᠠᠨ ᠥᠩᠭᠡ ᠶᠢᠨ ᠳᠡᠪᠡᠯ ᠪᠠ ᠨᠠᠷᠢᠨ ᠥᠷᠮᠥᠭ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠡᠳᠦᠷ ᠪᠦᠷᠢ ᠲᠠᠩᠰᠤᠭᠯᠠᠨ ᠴᠡᠩᠭᠡᠳᠡᠭ ᠪᠠᠢᠬᠤ ᠳᠤ᠂ 20 ᠡᠭᠦᠳᠡᠨ ᠳᠦᠨᠢ ᠶᠠᠷᠠ ᠰᠢᠷᠬᠠᠨ ᠳᠤ ᠪᠠᠷᠢᠭᠳᠠᠭᠰᠠᠨ ᠯᠠᠽᠠᠷᠠ ᠭᠡᠳᠡᠭ ᠶᠠᠳᠠᠭᠤ ᠬᠥᠮᠦᠨ ᠬᠡᠪᠲᠡᠭᠡᠳ 21 ᠡᠨᠡ ᠪᠠᠶᠠᠨ ᠤ ᠰᠢᠷᠡᠭᠡᠨ ᠡᠴᠡ ᠤᠨᠠᠭᠰᠠᠨ ᠵᠦᠢᠯ ᠢᠶᠠᠷ ᠥᠯ ᠵᠠᠯᠭᠠᠬᠤ ᠶᠢ ᠬᠦᠰᠡᠳᠡᠭ ᠪᠠᠢᠵᠠᠢ᠃ ᠪᠠᠰᠠ ᠨᠣᠬᠠᠳ ᠲᠡᠭᠦᠨ ᠳᠡᠭᠡᠷᠡ ᠢᠷᠡᠵᠦ ᠶᠠᠷᠠ ᠰᠢᠷᠬᠠ ᠶᠢ ᠨᠢ ᠳᠣᠯᠢᠶᠠᠳᠠᠭ ᠪᠠᠢᠵᠠᠢ᠃ 22 ᠲᠡᠷᠡ ᠶᠠᠳᠠᠭᠤ ᠬᠥᠮᠦᠨ ᠨᠠᠰᠤ ᠪᠠᠷᠠᠭᠰᠠᠨ ᠳᠤ᠂ ᠲᠩᠷᠢ ᠡᠯᠴᠢᠳ ᠲᠡᠭᠦᠨ ᠢ ᠠᠪᠷᠠᠬᠠᠮ ᠤᠨ ᠡᠪᠦᠷ ᠲᠦ ᠬᠦᠷᠭᠡᠵᠡᠢ᠃ ᠪᠠᠶᠠᠨ ᠴᠤ ᠨᠠᠰᠤ ᠪᠠᠷᠠᠵᠤ ᠪᠤᠯᠠᠰᠢᠯᠠᠭᠳᠠᠵᠠᠢ᠃ 23 ᠲᠡᠷᠡ ᠪᠡᠷ ᠲᠠᠮᠤ ᠶᠢᠨ ᠣᠷᠣᠨ ᠳᠤ ᠲᠠᠷᠴᠢᠯᠠᠵᠤ ᠪᠠᠢᠬᠤ ᠳᠠᠭᠠᠨ᠂ ᠨᠢᠳᠦ ᠡᠷᠭᠦᠨ ᠬᠣᠯᠠ ᠠᠴᠠ ᠠᠪᠷᠠᠬᠠᠮ ᠪᠠ ᠡᠪᠦᠷ ᠲᠤᠨᠢ ᠪᠠᠢᠭᠠ ᠯᠠᠽᠠᠷᠠ ᠶᠢ ᠬᠠᠷᠠᠭᠠᠳ 24 ᠳᠠᠭᠤᠳᠠᠵᠤ᠄ 〈ᠡᠪᠦᠭᠡ ᠠᠪᠷᠠᠬᠠᠮ ᠡ᠂ ᠨᠠᠮᠠᠶᠢ ᠡᠨᠡᠷᠢᠭᠡᠴᠢ ᠳᠠ᠂ ᠯᠠᠽᠠᠷᠠ ᠶᠢ ᠨᠠᠰᠢ ᠶᠠᠪᠤᠭᠤᠯᠵᠤ ᠬᠤᠷᠤᠭᠤᠨ ᠤ ᠬᠢᠨᠢ ᠦᠵᠦᠭᠦᠷ ᠢ ᠤᠰᠤᠨ ᠳᠤ ᠲᠥᠷᠥᠭᠦᠯᠵᠦ᠂ ᠬᠡᠯᠡ ᠶᠢ ᠮᠢᠨᠢ ᠰᠡᠷᠢᠭᠦᠴᠡᠭᠦᠯᠵᠦ ᠥᠭᠭᠥᠭᠡᠴᠢ᠃ ᠪᠢ ᠡᠨᠡ ᠳᠥᠯᠥ ᠳᠣᠲᠣᠷᠠ ᠵᠣᠪᠠᠵᠤ ᠪᠠᠢᠨᠠ〉 ᠭᠡᠰᠡᠨ ᠳᠦ᠂ 25 ᠠᠪᠷᠠᠬᠠᠮ᠄ 〈ᠬᠦᠦ ᠮᠢᠨᠢ ᠰᠠᠨᠠᠭᠲᠤᠨ᠂ ᠴᠢ ᠠᠮᠢᠳᠤ ᠪᠠᠢᠬᠤ ᠳᠠᠭᠠᠨ ᠰᠠᠢᠨ ᠢ ᠬᠦᠷᠲᠡᠵᠦ᠂ ᠯᠠᠽᠠᠷᠠ ᠮᠠᠭᠤ ᠶᠢ ᠬᠦᠷᠲᠡᠭᠰᠡᠨ ᠪᠢᠯᠡ᠃ ᠣᠳᠣ ᠲᠡᠷᠡ ᠡ᠊ᠨᠳᠡ ᠲᠠᠢᠪᠤᠰᠢᠷᠠᠵᠤ᠂ ᠴᠢ ᠵᠣᠪᠠᠵᠤ ᠪᠠᠢᠨᠠ᠃ 26 ᠡᠭᠦᠨ ᠢᠶᠡᠷ ᠦᠯᠦ ᠪᠠᠷᠠᠮ ᠪᠢᠳᠡ ᠨᠠᠷ ᠪᠠ ᠲᠠ ᠨᠠᠷ ᠤᠨ ᠬᠣᠭᠣᠷᠣᠨᠳᠣ ᠶᠡᠬᠡ ᠵᠢᠯᠠᠭᠠ ᠲᠣᠭᠲᠠᠭᠰᠠᠨ ᠲᠤᠯᠠ ᠡ᠊ᠨᠳᠡ ᠡᠴᠡ ᠲᠠᠨ ᠤ ᠲᠡᠨᠳᠡ ᠬᠦᠷᠬᠦ ᠭᠡᠰᠡᠨ ᠴᠤ ᠬᠦᠷᠬᠦ ᠪᠣᠯᠣᠮᠵᠢ ᠦᠭᠡᠢ᠂ ᠲᠡᠨᠳᠡ ᠡᠴᠡ ᠪᠢᠳᠡᠨ ᠦ ᠤᠷᠤᠭᠤ ᠢᠷᠡᠬᠦ ᠪᠣᠯᠣᠮᠵᠢ ᠴᠤ ᠦᠭᠡᠢ〉 ᠭᠡᠵᠡᠢ᠃ 27 ᠪᠠᠶᠠᠨ᠄ 〈ᠡᠪᠦᠭᠡ ᠮᠢᠨᠢ᠂ ᠪᠢ ᠲᠠᠨ ᠠᠴᠠ ᠭᠤᠶᠤᠶᠠ᠃ ᠯᠠᠽᠠᠷᠠ ᠶᠢ ᠮᠢᠨᠦ ᠠᠪᠤ ᠶᠢᠨ ᠭᠡᠷ ᠲᠦ ᠶᠠᠪᠤᠭᠤᠯᠤᠭᠠᠴᠢ᠂ 28 ᠨᠠᠳᠠ ᠳᠤ ᠲᠠᠪᠤᠨ ᠳᠡᠭᠦᠦ ᠪᠤᠢ᠃ ᠯᠠᠽᠠᠷᠠ ᠪᠠᠷ ᠭᠡᠷᠡᠴᠢᠯᠡᠭᠦᠯ᠂ ᠲᠡᠭᠡᠪᠡᠯ ᠲᠡᠳᠡ ᠡᠨᠡ ᠬᠦ ᠵᠣᠪᠠᠯᠠᠩ ᠤᠨ ᠣᠷᠣᠨ ᠳᠤ ᠢᠷᠡᠬᠦ ᠦᠭᠡᠢ ᠪᠣᠯᠣᠨᠠ〉 ᠭᠡᠬᠦ ᠳᠦ᠂ 29 ᠠᠪᠷᠠᠬᠠᠮ᠄ 〈ᠲᠡᠳᠡᠨ ᠳᠦ ᠮᠣᠰᠧ ᠪᠣᠯᠣᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠪᠤᠢ᠃ ᠳᠡᠭᠦᠦ ᠨᠠᠷ ᠴᠢᠨᠢ ᠲᠡᠳᠡᠨ ᠦ ᠬᠢ ᠶᠢ ᠰᠣᠨᠣᠰᠪᠠᠯ ᠪᠣᠯᠣᠨᠠ〉 ᠭᠡᠵᠡᠢ᠃ 30 ᠲᠡᠷᠡ᠄ 〈ᠦᠭᠡᠢ᠂ ᠡᠪᠦᠭᠡ ᠠᠪᠷᠠᠬᠠᠮ ᠡ᠂ ᠬᠡᠷᠪᠡ ᠦᠬᠦᠭᠰᠡᠳ ᠡᠴᠡ ᠨᠢᠭᠡ ᠨᠢ ᠲᠡᠳᠡᠨ ᠤᠷᠤᠭᠤ ᠶᠠᠪᠤᠪᠠᠯ ᠲᠡᠳᠡ ᠭᠡᠮᠰᠢᠬᠦ ᠪᠣᠯᠣᠨᠠ〉 ᠭᠡᠰᠡᠨ ᠪᠣᠯᠪᠠᠴᠤ 31 ᠠᠪᠷᠠᠬᠠᠮ᠄ 〈ᠮᠣᠰᠧ ᠪᠣᠯᠣᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠬᠢ ᠶᠢ ᠰᠣᠨᠣᠰᠬᠤ ᠦᠭᠡᠢ ᠶᠤᠮ ᠪᠣᠯ᠂ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠬᠡᠨ ᠨᠢᠭᠡ ᠨᠢ ᠠᠮᠢᠯᠠᠭᠰᠠᠨ ᠴᠤ ᠲᠡᠳᠡ ᠢᠳᠬᠠᠭᠳᠠᠬᠤ ᠦᠭᠡᠢ ᠶᠤᠮ〉》 ᠭᠡᠵᠡᠢ᠃