ᠯᠦᠺ ᠠᠷᠪᠠᠨ ᠭᠤᠷᠪᠠ
ᠭᠡᠮᠰᠢᠬᠦ ᠦᠭᠡᠢ ᠶᠤᠮ ᠪᠣᠯ
1 ᠶᠠᠭ ᠲᠡᠷᠡ ᠦᠶᠡ ᠳᠦ᠂ ᠬᠡᠳᠦᠨ ᠬᠥᠮᠦᠨ ᠢᠷᠡᠭᠡᠳ ᠫᠢᠯᠠᠲ ᠭᠠᠯᠢᠯᠠᠴᠤᠳ ᠤᠨ ᠴᠢᠰᠤ ᠶᠢ ᠲᠡᠳᠡᠨ ᠦ ᠲᠠᠬᠢᠯ ᠲᠠᠢ ᠬᠣᠯᠢᠭᠰᠠᠨ ᠲᠤᠬᠠᠢ ᠢᠰᠦ᠋ᠰ ᠲᠤ ᠳᠤᠭᠤᠯᠭᠠᠭᠰᠠᠨ ᠳᠤ᠂ 2 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠡᠨᠡ ᠭᠠᠯᠢᠯᠠᠴᠤᠳ ᠪᠤᠰᠤᠳ ᠪᠦᠬᠦ ᠭᠠᠯᠢᠯᠠᠴᠤᠳ ᠠᠴᠠ ᠢᠯᠡᠭᠦᠦ ᠨᠢᠭᠦᠯ ᠲᠡᠢ ᠪᠣᠯᠬᠣᠷ ᠢᠩᠭᠢᠵᠦ ᠵᠣᠪᠠᠭᠰᠠᠨ ᠭᠡᠵᠦ ᠲᠠ ᠨᠠᠷ ᠪᠣᠳᠣᠵᠤ ᠪᠠᠢᠨᠠ ᠤᠤ︖ 3 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠲᠡᠢᠮᠦ ᠪᠢᠰᠢ᠃ ᠲᠠ ᠨᠠᠷ ᠭᠡᠮᠰᠢᠬᠦ ᠦᠭᠡᠢ ᠪᠣᠯ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠠᠰᠠ ᠲᠡᠭᠡᠵᠦ ᠰᠥᠨᠥᠬᠦ ᠪᠣᠯᠣᠨᠠ᠃ 4 ᠰᠢᠯᠣᠶᠠᠮ ᠤᠨ ᠴᠠᠮᠬᠠᠭ ᠨᠤᠷᠠᠬᠤ ᠳᠤ ᠦᠬᠦᠭᠰᠡᠨ ᠠᠷᠪᠠᠨ ᠨᠠᠢ᠌ᠮᠠᠨ ᠬᠥᠮᠦᠨ ᠨᠢ ᠪᠤᠰᠤᠳ ᠪᠦᠬᠦ ᠶᠧᠷᠦ᠋ᠰᠠᠯᠧᠮᠴᠤᠳ ᠠᠴᠠ ᠢᠯᠡᠭᠦᠦ ᠭᠡᠮ ᠲᠡᠢ ᠪᠠᠢᠭᠰᠠᠨ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ︖ 5 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠲᠡᠢᠮᠦ ᠪᠢᠰᠢ᠃ ᠲᠠ ᠨᠠᠷ ᠭᠡᠮᠰᠢᠬᠦ ᠦᠭᠡᠢ ᠪᠣᠯ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠠᠰᠠ ᠲᠡᠭᠡᠵᠦ ᠰᠥᠨᠥᠬᠦ ᠪᠣᠯᠣᠨᠠ》 ᠭᠡᠪᠡ᠃
6 ᠲᠡᠭᠡᠭᠡᠳ ᠢᠰᠦ᠋ᠰ ᠦᠯᠢᠭᠡᠷᠯᠡᠯ ᠢᠶᠡᠷ᠄ 《ᠨᠢᠭᠡᠨ ᠬᠥᠮᠦᠨ ᠳᠦ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠳᠡᠭᠡᠨ ᠰᠠᠭᠤᠯᠭᠠᠭᠰᠠᠨ ᠢᠨᠵᠢᠷ ᠤᠨ ᠮᠣᠳᠣ ᠲᠠᠢ ᠪᠠᠢᠵᠠᠢ᠃ ᠲᠡᠷᠡ ᠵᠢᠮᠢᠰ ᠣᠯᠣᠶᠠ ᠭᠡᠵᠦ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠣᠯᠣᠭᠰᠠᠨ ᠦᠭᠡᠢ᠃ 7 ᠲᠡᠷᠡ ᠬᠥᠮᠦᠨ ᠦᠵᠦᠮᠴᠢᠨ ᠳᠡᠭᠡᠨ᠄ 〈ᠦᠵᠡ ᠳᠠ᠂ ᠪᠢ ᠡᠨᠡ ᠮᠣᠳᠣᠨ ᠠᠴᠠ ᠵᠢᠮᠢᠰ ᠣᠯᠣᠶᠠ ᠭᠡᠵᠦ ᠭᠤᠷᠪᠠᠨ ᠵᠢᠯ ᠳᠠᠷᠠᠭᠠᠯᠠᠨ ᠡᠷᠢᠭᠰᠡᠨ ᠪᠣᠯᠪᠠᠴᠤ ᠣᠯᠣᠭᠰᠠᠨ ᠦᠭᠡᠢ᠃ ᠡᠭᠦᠨ ᠢ ᠴᠠᠪᠴᠢᠵᠤ ᠬᠠᠶᠠ᠂ ᠭᠠᠵᠠᠷ ᠡᠵᠡᠯᠡᠭᠦᠯᠦᠭᠡᠳ ᠶᠠᠭᠤ ᠬᠢᠬᠦ ᠪᠤᠢ︖〉 ᠭᠡᠬᠦ ᠳᠦ᠂ 8 ᠦᠵᠦᠮᠴᠢᠨ᠄ 〈ᠡᠵᠡᠨ ᠡ᠂ ᠥᠨᠥ ᠵᠢᠯ ᠪᠠᠰᠠ ᠪᠠᠢᠯᠭᠠᠵᠤ ᠦᠵᠡᠶᠡ᠃ ᠪᠢ ᠬᠥᠷᠥᠰᠥ ᠶᠢ ᠨᠢ ᠵᠥᠭᠡᠯᠡᠷᠡᠭᠦᠯᠵᠦ ᠪᠠᠢᠭᠠᠳ ᠪᠣᠯᠳᠣᠭᠤᠷ ᠣᠷᠣᠭᠤᠯᠤᠶᠠ᠂ 9 ᠢᠷᠡᠬᠦ ᠵᠢᠯ ᠵᠢᠮᠢᠰ ᠰᠠᠭᠤᠪᠠᠯ ᠰᠠᠢᠨ᠂ ᠦᠭᠡᠢ ᠪᠣᠯ ᠴᠠᠪᠴᠢᠵᠤ ᠬᠠᠶᠠ〉 ᠭᠡᠪᠡ》 ᠭᠡᠵᠡᠢ᠃
ᠠᠮᠠᠷᠠᠯ ᠤᠨ ᠡᠳᠦᠷ ᠬᠦᠯᠢᠶᠡᠰᠦᠨ ᠡᠴᠡ ᠴᠢᠯᠥᠭᠡᠯᠡᠭᠰᠡᠨ ᠨᠢ
10 ᠠᠮᠠᠷᠠᠯ ᠤᠨ ᠡᠳᠦᠷ ᠢᠰᠦ᠋ᠰ ᠨᠢᠭᠡᠨ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠰᠤᠷᠭᠠᠵᠤ ᠪᠠᠢᠯᠠ᠃ 11 ᠠᠩ᠋ᠬᠠᠷᠤᠭᠲᠤᠨ᠂ ᠲᠡᠨᠳᠡ ᠠᠷᠪᠠᠨ ᠨᠠᠢ᠌ᠮᠠᠨ ᠵᠢᠯ ᠤᠨ ᠲᠤᠷᠰᠢ ᠡᠪᠡᠳᠴᠢᠨ ᠤ ᠴᠢᠳᠬᠥᠷ ᠲᠦ ᠡᠵᠡᠯᠡᠭᠳᠡᠵᠦ᠂ ᠨᠢᠷᠤᠭᠤ ᠨᠢ ᠪᠥᠭᠲᠥᠢᠭᠡᠳ ᠶᠡᠷᠦ ᠴᠢᠬᠡ ᠵᠣᠭᠰᠣᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠭᠰᠠᠨ ᠨᠢᠭᠡᠨ ᠡᠮᠡᠭᠲᠡᠢ ᠪᠠᠢᠵᠠᠢ᠃ 12 ᠢᠰᠦ᠋ᠰ ᠲᠡᠭᠦᠨ ᠢ ᠦᠵᠡᠭᠡᠳ ᠳᠠᠭᠤᠳᠠᠨ ᠣᠢᠷᠠᠲᠤᠭᠤᠯᠵᠤ᠄ 《ᠪᠦᠰᠡᠭᠦᠢ᠂ ᠲᠠ ᠡᠪᠡᠳᠴᠢᠨ ᠡᠴᠡ ᠪᠡᠨ ᠲᠠᠯᠪᠢᠭᠲᠠᠯᠠ》 ᠭᠡᠳ 13 ᠮᠤᠲᠤᠷ ᠢᠶᠠᠨ ᠲᠡᠭᠦᠨ ᠳᠡᠭᠡᠷᠡ ᠲᠠᠯᠪᠢᠮᠠᠭᠴᠠ ᠨᠢᠷᠤᠭᠤ ᠨᠢ ᠠᠰᠬᠠᠨ ᠪᠣᠯᠵᠤ ᠲᠡᠷᠡ ᠪᠡᠷ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠤᠯᠠ᠃ 14 ᠬᠠᠷᠢᠨ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠠᠬᠠᠯᠠᠭᠴᠢ ᠠᠮᠠᠷᠠᠯ ᠤᠨ ᠡᠳᠦᠷ ᠢᠶᠡᠷ ᠢᠰᠦ᠋ᠰ ᠤᠨ ᠡᠪᠡᠳᠴᠢᠨ ᠡᠳᠡᠭᠡᠭᠡᠭᠰᠡᠨ ᠳᠦ ᠠᠭᠤᠷᠯᠠᠨ᠂ ᠣᠯᠠᠨ ᠳᠤ᠄ 《ᠠᠵᠢᠯᠯᠠᠬᠤ ᠶᠣᠰᠣᠲᠠᠢ ᠵᠢᠷᠭᠤᠭᠠᠨ ᠡᠳᠦᠷ ᠪᠤᠢ᠃ ᠲᠠ ᠨᠠᠷ ᠡᠳᠡᠭᠡᠭᠡᠯᠭᠡᠶᠡ ᠭᠡᠪᠡᠯ ᠲᠡᠷᠡ ᠦᠶᠡ ᠳᠦ ᠢᠷᠡᠵᠡᠭᠡ᠃ ᠠᠮᠠᠷᠠᠯ ᠤᠨ ᠡᠳᠦᠷ ᠪᠢᠲᠡᠭᠡᠢ ᠢᠩᠭᠢ》 ᠭᠡᠰᠡᠨ ᠳᠦ᠂ 15 ᠡᠵᠡᠨ ᠬᠠᠷᠢᠭᠤ ᠳᠤᠨᠢ᠄ 《ᠬᠣᠶᠠᠷ ᠨᠢᠭᠤᠷᠲᠤ ᠬᠥᠮᠦᠰ ᠡ᠂ ᠲᠠ ᠪᠦᠬᠦᠨ ᠠᠮᠠᠷᠠᠯ ᠤᠨ ᠡᠳᠦᠷ ᠦᠬᠡᠷ᠂ ᠡᠯᠵᠢᠭᠡ ᠪᠡᠨ ᠤᠶᠠᠭᠠᠨ ᠠᠴᠠ ᠨᠢ ᠲᠠᠯᠪᠢᠭᠠᠳ ᠬᠠᠰᠢᠶᠠᠨ ᠠᠴᠠ ᠨᠢ ᠭᠠᠷᠭᠠᠵᠤ ᠤᠰᠤᠯᠠᠳᠠᠭ ᠪᠢᠰᠢ ᠤᠤ︖ 16 ᠬᠠᠷᠢᠨ ᠠᠪᠷᠠᠬᠠᠮ ᠤᠨ ᠥᠬᠢᠨ ᠪᠠᠢᠵᠤ ᠰᠠᠲ᠋ᠠᠨ ᠳᠤ ᠠᠷᠪᠠᠨ ᠨᠠᠢ᠌ᠮᠠᠨ ᠵᠢᠯ ᠤᠨ ᠲᠤᠷᠰᠢ ᠬᠦᠯᠢᠭᠳᠡᠵᠦ ᠪᠠᠢᠭᠰᠠᠨ ᠡᠨᠡ ᠪᠦᠰᠡᠭᠦᠢ ᠶᠢ ᠠᠮᠠᠷᠠᠯ ᠤᠨ ᠡᠳᠦᠷ ᠬᠦᠯᠢᠶᠡᠰᠦᠨ ᠡᠴᠡ ᠨᠢ ᠲᠠᠯᠪᠢᠬᠤ ᠨᠢ ᠵᠦᠢᠲᠡᠢ ᠪᠢᠰᠢ ᠭᠡᠵᠢ ᠤᠤ︖》 ᠭᠡᠯᠡ᠃ 17 ᠢᠰᠦ᠋ᠰ ᠢᠩᠭᠢᠵᠦ ᠬᠡᠯᠡᠭᠰᠡᠨ ᠳᠦ᠂ ᠡᠰᠡᠷᠭᠦᠴᠡᠭᠴᠢᠳ ᠨᠢ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠴᠢᠩᠭᠦᠷᠡᠵᠦ᠂ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠦ ᠦᠢᠯᠡᠳᠦᠭᠰᠡᠨ ᠪᠦᠬᠦ ᠠᠯᠳᠠᠷ ᠰᠤᠤ ᠲᠠᠢ ᠵᠦᠢᠯ ᠳᠤ ᠪᠠᠶᠠᠷᠯᠠᠪᠠ᠃
ᠭᠠᠢᠮᠤ ᠶᠢᠨ ᠦᠷᠡ ᠪᠠ ᠢᠰᠭᠡᠭᠦᠷ
18 ᠢᠰᠦ᠋ᠰ᠄ 《ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠶᠠᠭᠤ ᠲᠠᠢ ᠠᠳᠠᠯᠢ ᠪᠤᠢ︖ ᠪᠢ ᠲᠡᠭᠦᠨ ᠢ ᠶᠠᠭᠤ ᠲᠠᠢ ᠦᠯᠢᠭᠡᠷᠯᠡᠬᠦ ᠪᠤᠢ︖ 19 ᠲᠡᠷᠡ ᠨᠢ ᠭᠠᠢᠮᠤ ᠶᠢᠨ ᠦᠷᠡ ᠲᠠᠢ ᠠᠳᠠᠯᠢ᠂ ᠬᠥᠮᠦᠨ ᠲᠡᠭᠦᠨ ᠢ ᠠᠪᠴᠤ ᠴᠡᠴᠡᠷᠯᠢᠭ ᠲᠡᠭᠡᠨ ᠲᠠᠷᠢᠭᠰᠠᠨ ᠳᠤ᠂ ᠲᠡᠷᠡ ᠤᠷᠭᠤᠭᠠᠳ ᠮᠣᠳᠣ ᠪᠣᠯᠣᠭᠰᠠᠨ ᠪᠥᠭᠡᠳ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠳ ᠰᠠᠯᠠᠭᠠᠨ ᠳᠤᠨᠢ ᠡᠭᠦᠷᠯᠡᠭᠰᠡᠨ ᠶᠤᠮ》 ᠭᠡᠪᠡ᠃
20 ᠢᠰᠦ᠋ᠰ ᠪᠠᠰᠠ᠄ 《ᠪᠢ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠶᠠᠭᠤ ᠲᠠᠢ ᠦᠯᠢᠭᠡᠷᠯᠡᠬᠦ ᠪᠤᠢ︖ 21 ᠲᠡᠷᠡ ᠨᠢ ᠢᠰᠭᠡᠭᠦᠷ ᠲᠡᠢ ᠠᠳᠠᠯᠢ᠂ ᠪᠦᠰᠡᠭᠦᠢ ᠲᠡᠭᠦᠨ ᠢ ᠠᠪᠴᠤ ᠭᠤᠷᠪᠠᠨ ᠰᠠᠭᠤᠯᠠᠭᠠ 17 ᠭᠤᠯᠢᠷ ᠲᠤ ᠬᠣᠯᠢᠭᠰᠠᠨ ᠳᠤ ᠴᠥᠮ ᠢᠶᠡᠷ ᠢᠶᠠᠨ ᠢᠰᠴᠡᠢ》 ᠭᠡᠪᠡ᠃
ᠲᠣᠰᠬᠣᠨ ᠨᠤᠭᠤᠳ ᠢᠶᠠᠷ ᠶᠠᠪᠤᠵᠤ ᠵᠢᠭᠠᠭᠰᠠᠨ ᠨᠢ
22 ᠢᠰᠦ᠋ᠰ ᠬᠣᠲᠠ ᠲᠣᠰᠬᠣᠨ ᠨᠤᠭᠤᠳ ᠢᠶᠠᠷ ᠶᠠᠪᠤᠵᠤ ᠰᠤᠷᠭᠠᠯ ᠵᠢᠭᠠᠭᠰᠠᠭᠠᠷ ᠶᠧᠷᠦ᠋ᠰᠠᠯᠧᠮ ᠢ ᠵᠦᠭᠯᠡᠨ ᠠᠶᠠᠯᠠᠪᠠ᠃ 23 ᠨᠢᠭᠡᠨ ᠬᠥᠮᠦᠨ ᠲᠡᠭᠦᠨ ᠡᠴᠡ᠄ 《ᠡᠵᠡᠨ ᠡ᠂ ᠠᠪᠤᠷᠠᠭᠳᠠᠬᠤ ᠬᠥᠮᠦᠨ ᠲᠤᠩ ᠴᠥᠭᠡᠨ ᠤᠤ︖》 ᠭᠡᠰᠡᠨ ᠳᠦ᠂ 24 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠨᠠᠷᠢᠬᠠᠨ ᠡᠭᠦᠳᠡ ᠪᠡᠷ ᠣᠷᠣᠬᠤ ᠪᠠᠷ ᠴᠢᠷᠮᠠᠢ᠃ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠣᠯᠠᠨ ᠬᠥᠮᠦᠨ ᠣᠷᠣᠬᠤ ᠪᠠᠷ ᠬᠢᠴᠢᠶᠡᠪᠡᠴᠦ ᠦᠯᠦ ᠴᠢᠳᠠᠬᠤ ᠪᠣᠯᠣᠨᠠ᠃ 25 ᠭᠡᠷ ᠦᠨ ᠡᠵᠡᠨ ᠪᠣᠰᠴᠤ ᠡᠭᠦᠳᠡ ᠪᠡᠨ ᠬᠠᠭᠠᠴᠢᠬᠠᠪᠠᠯ᠂ ᠲᠠ ᠨᠠᠷ ᠭᠠᠳᠠᠨᠠ ᠨᠢ ᠵᠣᠭᠰᠣᠵᠤ ᠡᠭᠦᠳᠡ ᠶᠢ ᠨᠢ ᠳᠣᠭᠰᠢᠨ᠄ 〈ᠡᠵᠡᠨ ᠡ᠂ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠵᠦ ᠥᠭᠭᠥᠭᠡᠴᠢ︕〉 ᠭᠡᠬᠦ ᠳᠦ᠂ ᠲᠡᠷᠡ᠄ 〈ᠪᠢ ᠲᠠ ᠨᠠᠷ ᠤᠨ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠢ ᠮᠡᠳᠡᠬᠦ ᠦᠭᠡᠢ〉 ᠭᠡᠵᠦ ᠬᠠᠷᠢᠭᠤᠯᠤᠨᠠ᠃ 26 ᠲᠡᠷᠡ ᠦᠶᠡ ᠳᠦ᠂ ᠲᠠ ᠨᠠᠷ᠄ 〈ᠪᠢᠳᠡ ᠲᠠᠨ ᠲᠠᠢ ᠬᠠᠮᠲᠤ ᠢᠳᠡᠵᠦ ᠤᠤᠭᠤᠵᠤ ᠪᠠᠢᠭᠰᠠᠨ᠂ ᠲᠠ ᠮᠠᠨ ᠤ ᠭᠤᠳᠤᠮᠵᠢᠨ ᠳᠤ ᠰᠤᠷᠭᠠᠵᠤ ᠪᠠᠢᠭᠰᠠᠨ〉 ᠭᠡᠬᠦ ᠳᠦ᠂ 27 ᠲᠡᠷᠡ᠄ 〈ᠪᠢ ᠲᠠ ᠨᠠᠷ ᠤᠨ ᠬᠠᠮᠢᠭᠠ ᠶᠢᠨ ᠬᠢ ᠶᠢ ᠮᠡᠳᠡᠬᠦ ᠦᠭᠡᠢ᠂ ᠵᠥᠪ ᠪᠤᠰᠤ ᠶᠢ ᠦᠢᠯᠡᠳᠳᠡᠭ ᠲᠠ ᠨᠠᠷ ᠪᠦᠭᠦᠳᠡᠭᠡᠷ ᠢᠶᠡᠨ ᠨᠠᠳᠠ ᠠᠴᠠ ᠵᠠᠢᠯᠠ〉 ᠭᠡᠵᠦ ᠬᠡᠯᠡᠨᠡ᠃ 28 ᠠᠪᠷᠠᠬᠠᠮ᠂ ᠢᠰᠠᠺ᠂ ᠶᠠᠺᠣᠪ ᠪᠣᠯᠣᠨ ᠪᠦᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠣᠲᠣᠷᠠ ᠪᠠᠢᠬᠤ ᠳᠤ᠂ ᠲᠠ ᠨᠠᠷ ᠭᠠᠳᠠᠭᠰᠢ ᠬᠥᠭᠡᠭᠡᠭᠳᠡᠭᠰᠡᠨ ᠢᠶᠡᠨ ᠦᠵᠡᠭᠡᠳ ᠲᠡᠨᠳᠡ ᠤᠬᠢᠯᠠᠯᠳᠤᠵᠤ ᠰᠢᠳᠦ ᠪᠡᠨ ᠬᠠᠪᠢᠷᠬᠤ ᠪᠣᠯᠣᠨᠠ᠃ 29 ᠳᠣᠷᠣᠨᠠ ᠥᠷᠥᠨᠡ ᠪᠠ ᠡᠮᠦᠨᠡ ᠤᠮᠠᠷᠠ ᠠᠴᠠ ᠣᠯᠠᠨ ᠬᠥᠮᠦᠨ ᠢᠷᠡᠵᠦ᠂ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠳᠣᠲᠣᠷᠠ ᠨᠠᠢᠷ ᠤᠨ ᠰᠢᠷᠡᠭᠡᠨ ᠳᠦ ᠰᠠᠭᠤᠬᠤ ᠪᠣᠯᠣᠨᠠ᠃ 30 ᠠᠩ᠋ᠬᠠᠷᠤᠭᠲᠤᠨ᠂ ᠰᠡᠭᠦᠯ ᠳᠦ ᠪᠠᠢᠭᠠ ᠵᠠᠷᠢᠮ ᠨᠢ ᠲᠦᠷᠦᠭᠦᠨ ᠳᠦ ᠣᠷᠣᠵᠤ᠂ ᠲᠦᠷᠦᠭᠦᠨ ᠳᠦ ᠪᠠᠢᠭᠠ ᠵᠠᠷᠢᠮ ᠨᠢ ᠰᠡᠭᠦᠯ ᠳᠦ ᠣᠷᠣᠨᠠ》 ᠭᠡᠪᠡ᠃
31 ᠲᠡᠷᠡ ᠴᠠᠭ ᠲᠤ ᠬᠡᠳᠦᠨ ᠹᠠᠷᠢᠰᠠᠢ ᠬᠥᠮᠦᠨ ᠳᠥᠭᠥᠨ ᠢᠷᠡᠵᠦ᠂ ᠢᠰᠦ᠋ᠰ ᠲᠤ᠄ 《ᠡ᠊ᠨᠳᠡ ᠡᠴᠡ ᠶᠠᠪᠤ᠂ ᠾᠧᠷᠣᠳ᠋ ᠲᠠᠨ ᠢ ᠠᠯᠠᠬᠤ ᠭᠡᠵᠦ ᠪᠠᠢᠨᠠ》 ᠭᠡᠬᠦ ᠳᠦ᠂ 32 ᠲᠡᠷᠡ᠄ 《ᠲᠡᠷᠡ ᠦᠨᠡᠭᠡᠨ ᠳᠦ ᠣᠴᠢᠵᠤ᠄ 〈ᠠᠩ᠋ᠬᠠᠷᠤᠭᠲᠤᠨ᠂ ᠥᠨᠥᠳᠥᠷ ᠮᠠᠷᠭᠠᠰᠢ ᠪᠢ ᠴᠢᠳᠬᠥᠷ ᠬᠥᠭᠡᠭᠡᠵᠦ ᠡᠪᠡᠳᠴᠢᠲᠡᠨ ᠢ ᠡᠳᠡᠭᠡᠭᠡᠨᠡ᠂ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠪᠢ ᠠᠵᠢᠯ ᠢᠶᠠᠨ ᠳᠠᠭᠤᠰᠬᠠᠨᠠ〉 ᠭᠡᠵᠦ ᠬᠡᠯᠡ᠂ 33 ᠶᠡᠷᠦ ᠨᠢ ᠥᠨᠥᠳᠥᠷ᠂ ᠮᠠᠷᠭᠠᠰᠢ᠂ ᠨᠥᠭᠥᠭᠡᠳᠦᠷ ᠪᠢ ᠵᠠᠪᠠᠯ ᠵᠠᠮᠨᠠᠬᠤ ᠶᠣᠰᠣᠲᠠᠢ᠂ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠧᠷᠦ᠋ᠰᠠᠯᠧᠮ ᠡᠴᠡ ᠥᠭᠡᠷᠡ ᠭᠠᠵᠠᠷ ᠲᠤ ᠦᠬᠦᠵᠦ ᠪᠣᠯᠳᠠᠭ ᠦᠭᠡᠢ᠃ 34 ᠶᠧᠷᠦ᠋ᠰᠠᠯᠧᠮ ᠡ᠂ ᠶᠧᠷᠦ᠋ᠰᠠᠯᠧᠮ ᠡ᠂ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠠᠯᠠᠵᠤ ᠥᠪᠡᠷ ᠲᠦ ᠴᠢᠨᠢ ᠢᠯᠡᠭᠡᠭᠳᠡᠭᠰᠡᠨ ᠬᠥᠮᠦᠰ ᠢ ᠴᠢᠯᠠᠭᠤ ᠪᠠᠷ ᠴᠣᠬᠢᠳᠠᠭ ᠴᠢ᠂ ᠲᠠᠬᠢᠶᠠ ᠴᠤᠷᠪᠠᠭᠠ ᠨᠤᠭᠤᠳ ᠢᠶᠠᠨ ᠳᠠᠯᠠᠪᠴᠢᠨ ᠳᠣᠣᠷᠠ ᠪᠠᠨ ᠪᠥᠭᠡᠮᠨᠡᠷᠡᠭᠦᠯᠳᠡᠭ᠌ ᠰᠢᠭ᠂ ᠪᠢ ᠬᠡᠴᠢᠨᠡᠨ ᠤᠳᠠᠭᠠ ᠬᠡᠦᠬᠡᠳ ᠤᠳ ᠢ ᠴᠢᠨᠢ ᠪᠥᠭᠡᠮᠨᠡᠷᠡᠭᠦᠯᠬᠦ ᠭᠡᠯᠡ᠂ ᠬᠠᠷᠢᠨ ᠲᠠ ᠨᠠᠷ ᠬᠦᠰᠡᠭᠰᠡᠨ ᠦᠭᠡᠢ᠃ 35 ᠠᠩ᠋ᠬᠠᠷᠤᠭᠲᠤᠨ᠂ ᠲᠠ ᠨᠠᠷ ᠤᠨ ᠭᠡᠷ ᠡᠵᠡᠭᠦᠢ ᠬᠠᠶᠠᠭᠳᠠᠨᠠ᠃ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ ᠲᠠ ᠨᠠᠷ᠄ 〈ᠡᠵᠡᠨ ᠦ ᠨᠡᠷᠡ ᠪᠡᠷ ᠢᠷᠡᠭᠴᠢ ᠨᠢ ᠢᠷᠥᠭᠡᠯ ᠲᠡᠢ ᠡ〉 ᠭᠡᠵᠦ ᠬᠡᠯᠡᠬᠦ ᠡᠴᠡ ᠨᠠᠰᠢ ᠨᠠᠮᠠᠶᠢ ᠶᠡᠷᠦ ᠣᠯᠵᠤ ᠦᠵᠡᠬᠦ ᠦᠭᠡᠢ》 ᠭᠡᠪᠡ᠃