ᠯᠦᠺ ᠬᠣᠷᠢᠨ ᠨᠢᠭᠡ
ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢᠨ ᠡᠷᠭᠦᠯ
1 ᠢᠰᠦ᠋ᠰ ᠨᠢᠳᠦ ᠡᠷᠭᠦᠨ ᠡᠷᠭᠦᠯ ᠦᠨ ᠬᠠᠢᠷᠴᠠᠭ ᠲᠤ ᠪᠠᠶᠠᠴᠤᠳ ᠤᠨ ᠬᠠᠨᠳᠢᠪ ᠡᠷᠭᠦᠵᠦ ᠪᠤᠢ ᠶᠢ ᠬᠠᠷᠠᠪᠠ᠃ 2 ᠮᠥᠨ ᠨᠢᠭᠡᠨ ᠶᠠᠳᠠᠭᠤ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠬᠣᠶᠠᠷ ᠯᠧᠪᠲ᠋ᠠ 28 ᠡᠷᠭᠦᠬᠦ ᠶᠢ ᠲᠡᠷᠡ ᠬᠠᠷᠠᠵᠠᠢ᠃ 3 ᠲᠡᠷᠡ᠄ 《ᠲᠠ ᠨᠠᠷ ᠲᠤ ᠦᠨᠡᠨ ᠢ ᠬᠡᠯᠡᠶᠡ᠂ ᠡᠨᠡ ᠶᠠᠳᠠᠭᠤ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠬᠡᠨ ᠡᠴᠡ ᠴᠤ ᠢᠯᠡᠭᠦᠦ ᠶᠢ ᠡᠷᠭᠦᠯᠡ᠃ 4 ᠤᠴᠢᠷ ᠨᠢ᠂ ᠪᠦᠬᠦ ᠬᠥᠮᠦᠨ ᠢᠯᠡᠭᠦᠴᠡ ᠡᠴᠡ ᠪᠡᠨ ᠡᠷᠭᠦᠭᠰᠡᠨ ᠪᠣᠯ᠂ ᠡᠨᠡ ᠡᠮᠡᠭᠲᠡᠢ ᠬᠣᠮᠰᠠᠬᠠᠨ ᠠᠴᠠ ᠪᠠᠨ᠂ ᠠᠮᠢ ᠵᠢᠭᠤᠳᠠᠭ ᠪᠦᠬᠦᠨ ᠢᠶᠡᠨ ᠡᠷᠭᠦᠯᠡ》 ᠭᠡᠪᠡ᠃
ᠬᠣᠵᠢᠮ ᠪᠣᠯᠬᠤ ᠶᠠᠪᠤᠳᠠᠯ
5 ᠭᠣᠶᠣ ᠴᠢᠯᠠᠭᠤ ᠪᠠ ᠡᠷᠭᠦᠯ ᠪᠠᠷᠢᠴᠠ ᠪᠠᠷ ᠴᠢᠮᠡᠭᠰᠡᠨ ᠠᠷᠢᠭᠤᠨ ᠣᠷᠳᠣᠨ ᠤ ᠲᠤᠬᠠᠢ ᠵᠠᠷᠢᠮ ᠨᠢ ᠶᠠᠷᠢᠯᠴᠠᠬᠤ ᠳᠤ᠂ ᠢᠰᠦ᠋ᠰ᠄ 6 《ᠲᠠ ᠨᠠᠷ ᠤᠨ ᠬᠠᠷᠠᠵᠤ ᠪᠠᠢᠭᠠ ᠡᠳᠡᠭᠡᠷ ᠦᠨ ᠲᠤᠬᠠᠢ ᠳᠤ ᠭᠡᠪᠡᠯ᠂ ᠨᠢᠭᠡ ᠴᠢᠯᠠᠭᠤ ᠨᠢ ᠨᠥᠭᠥᠭᠡ ᠳᠡᠭᠡᠷᠡ ᠪᠡᠨ ᠳᠠᠪᠬᠤᠷᠯᠠᠵᠤ ᠦᠯᠡᠳᠡᠬᠦ ᠦᠭᠡᠢ ᠪᠠᠷ ᠨᠤᠷᠠᠬᠤ ᠡᠳᠦᠷ ᠤᠳ ᠢᠷᠡᠨᠡ》 ᠭᠡᠰᠡᠨ ᠳᠦ᠂ 7 ᠲᠡᠳᠡ᠄ 《ᠪᠠᠭᠰᠢ ᠡ᠂ ᠲᠡᠳᠡᠭᠡᠷ ᠶᠠᠪᠤᠳᠠᠯ ᠬᠡᠵᠢᠶᠡ ᠪᠣᠯᠬᠤ ᠪᠤᠢ︖ ᠲᠡᠳᠡᠭᠡᠷ ᠶᠠᠪᠤᠳᠠᠯ ᠪᠣᠯᠬᠤ ᠭᠡᠵᠦ ᠪᠠᠢᠬᠤ ᠳᠤ ᠶᠠᠮᠠᠷ ᠲᠡᠮᠳᠡᠭ ᠬᠠᠷᠠᠭᠳᠠᠬᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠵᠠᠢ᠃ 8 ᠢᠰᠦ᠋ᠰ᠄ 《ᠲᠠ ᠨᠠᠷ ᠪᠠᠴᠢᠯᠠᠭᠳᠠᠬᠤ ᠠᠴᠠ ᠪᠣᠯᠭᠣᠮᠵᠢᠯᠠ᠃ ᠤᠴᠢᠷ ᠨᠢ᠂ ᠮᠢᠨᠦ ᠨᠡᠷᠡ ᠪᠡᠷ ᠣᠯᠠᠨ ᠬᠥᠮᠦᠨ ᠢᠷᠡᠵᠦ᠄ 〈ᠪᠢ ᠪᠣᠯ ᠲᠡᠷᠡ ᠪᠠᠢᠨᠠ〉᠂ 〈ᠴᠠᠭ ᠣᠢᠷᠠᠲᠤᠯᠠ〉 ᠭᠡᠬᠦ ᠪᠣᠯᠣᠨᠠ᠃ ᠲᠡᠳᠡᠨ ᠢ ᠪᠦᠦ ᠳᠠᠭᠠ᠃
9 ᠲᠠ ᠨᠠᠷ ᠲᠡᠢᠨ ᠪᠣᠯᠣᠨ ᠦᠢᠮᠡᠭᠡᠨ ᠦ ᠲᠤᠬᠠᠢ ᠰᠣᠨᠣᠰᠬᠤ ᠳᠠᠭᠠᠨ ᠪᠦᠦ ᠰᠦᠷᠳᠡ᠂ ᠶᠠᠭᠤ ᠭᠡᠪᠡᠯ᠂ ᠡᠳᠡᠭᠡᠷ ᠨᠢ ᠤᠷᠢᠳᠠᠪᠠᠷ ᠪᠣᠯᠬᠤ ᠶᠣᠰᠣᠲᠠᠢ ᠴᠤ ᠳᠠᠷᠤᠢ ᠳᠤᠨᠢ ᠲᠡᠭᠦᠰᠬᠡᠯ ᠦᠨ ᠴᠠᠭ ᠪᠣᠯᠬᠤ ᠪᠢᠰᠢ》 ᠭᠡᠵᠦ ᠬᠡᠯᠡᠭᠰᠡᠨ ᠢᠶᠡᠨ 10 ᠪᠠᠰᠠ᠄ 《ᠦᠨᠳᠦᠰᠦᠲᠡᠨ ᠦᠨᠳᠦᠰᠦᠲᠡᠨ ᠦ ᠪᠠᠨ ᠡᠰᠡᠷᠭᠦ᠂ ᠤᠯᠤᠰ ᠤᠯᠤᠰ ᠤᠨ ᠢᠶᠠᠨ ᠡᠰᠡᠷᠭᠦ ᠪᠣᠰᠬᠤ ᠪᠥᠭᠡᠳ 11 ᠬᠦᠴᠦᠲᠦ ᠭᠠᠵᠠᠷ ᠬᠥᠳᠡᠯᠦᠯᠲᠡ᠂ ᠥᠯᠥᠰᠬᠥᠯᠡᠩ ᠪᠠ ᠭᠠᠴᠢᠭ ᠡ᠊ᠨᠳᠡ ᠲᠡᠨᠳᠡ ᠦᠭᠡᠢ ᠲᠣᠬᠢᠶᠠᠯᠳᠤᠵᠤ ᠠᠶᠤᠮᠰᠢᠭ ᠪᠠ ᠦᠯᠡᠮᠵᠢ ᠰᠢᠨᠵᠢ ᠲᠡᠮᠳᠡᠭ ᠤᠳ ᠲᠩᠷᠢ ᠡᠴᠡ ᠢᠯᠡᠷᠡᠬᠦ ᠪᠣᠯᠣᠨᠠ᠃
12 ᠬᠠᠷᠢᠨ ᠡᠨᠡ ᠪᠦᠬᠦᠨ ᠡᠴᠡ ᠡᠮᠦᠨᠡ᠂ ᠬᠥᠮᠦᠰ ᠲᠠ ᠨᠠᠷ ᠲᠤ ᠭᠠᠷ ᠬᠥᠳᠡᠯᠵᠦ ᠬᠠᠪᠴᠢᠯᠭᠠ ᠦᠵᠡᠭᠦᠯᠦᠨᠡ᠃ ᠮᠢᠨᠦ ᠨᠡᠷᠡ ᠡᠴᠡ ᠪᠣᠯᠵᠤ ᠲᠠ ᠨᠠᠷ ᠢ ᠬᠤᠷᠠᠯ ᠤᠨ ᠲᠠᠩᠬᠢᠮ ᠪᠠ ᠱᠣᠷᠣᠩ ᠳᠤ ᠲᠤᠰᠢᠶᠠᠵᠤ ᠬᠠᠭᠠᠳ ᠨᠣᠶᠠᠳ ᠤᠨ ᠡᠮᠦᠨᠡ ᠠᠪᠠᠴᠢᠨᠠ᠃ 13 ᠭᠡᠬᠦ ᠳᠡᠭᠡᠨ ᠡᠳᠡᠭᠡᠷ ᠨᠢ ᠲᠠ ᠨᠠᠷ ᠤᠨ ᠭᠡᠷᠡᠴᠢᠯᠡᠬᠦ ᠵᠠᠪᠰᠢᠶᠠᠨ ᠪᠣᠯᠣᠨᠠ᠃ 14 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠥᠪᠡᠷ ᠢ ᠪᠠᠨ ᠥᠮᠥᠭᠯᠡᠶᠡ ᠭᠡᠵᠦ ᠤᠷᠢᠳᠴᠢᠯᠠᠨ ᠪᠣᠳᠣᠬᠤ ᠦᠭᠡᠢ ᠪᠠᠷ ᠰᠡᠳᠬᠢᠯ ᠰᠢᠭᠤᠳᠤᠭᠲᠤᠨ᠃ 15 ᠪᠦᠬᠦ ᠥᠷᠢᠰᠥᠯᠳᠦᠭᠴᠢ ᠶᠢᠨ ᠴᠢᠨᠢ ᠡᠰᠡᠷᠭᠦᠴᠡᠵᠦ᠂ ᠨᠢᠴᠤᠭᠠᠵᠤ ᠴᠢᠳᠠᠰᠢ ᠦᠭᠡᠢ ᠦᠭᠡ ᠪᠠ ᠮᠡᠷᠭᠡᠨ ᠤᠬᠠᠭᠠᠨ ᠢ ᠪᠢ ᠲᠠ ᠨᠠᠷ ᠲᠤ ᠥᠭᠭᠥᠶᠡ᠃ 16 ᠡᠴᠢᠭᠡ ᠡᠬᠡ᠂ ᠠᠬᠠ ᠳᠡᠭᠦᠦ᠂ ᠲᠥᠷᠥᠯ ᠰᠠᠳᠤᠨ᠂ ᠨᠠᠢᠵᠠ ᠨᠥᠬᠥᠳ ᠴᠢᠨᠢ ᠬᠦᠷᠲᠡᠯᠡ ᠲᠠ ᠨᠠᠷ ᠢ ᠪᠠᠷᠢᠭᠤᠯᠵᠤ᠂ ᠵᠠᠷᠢᠮ ᠢ ᠴᠢᠨᠢ ᠠᠯᠠᠭᠤᠯᠬᠤ ᠪᠥᠭᠡᠳ 17 ᠲᠠ ᠨᠠᠷ ᠮᠢᠨᠦ ᠨᠡᠷᠡ ᠡᠴᠡ ᠪᠣᠯᠵᠤ᠂ ᠬᠥᠮᠦᠨ ᠪᠦᠬᠦᠨ ᠳᠦ ᠵᠠᠨᠤᠭᠳᠠᠬᠤ ᠪᠣᠯᠪᠠᠴᠤ 18 ᠲᠣᠯᠣᠭᠠᠢ ᠳᠠᠬᠢ ᠰᠢᠷᠬᠡᠭ ᠦᠰᠦ ᠪᠡᠨ ᠴᠤ ᠠᠯᠳᠠᠬᠤ ᠦᠭᠡᠢ᠃ 19 ᠲᠠ ᠨᠠᠷ ᠲᠡᠪᠴᠢᠶᠡᠷᠢ ᠪᠠᠷ ᠢᠶᠠᠨ ᠠᠮᠢ ᠪᠠᠨ ᠣᠯ᠃
20 ᠶᠧᠷᠦ᠋ᠰᠠᠯᠧᠮ ᠤᠨ ᠴᠡᠷᠢᠭ ᠲᠤ ᠪᠦᠰᠡᠯᠡᠭᠳᠡᠬᠦ ᠶᠢ ᠦᠵᠡᠪᠡᠯ᠂ ᠲᠠ ᠨᠠᠷ ᠡᠨᠡ ᠬᠣᠲᠠ ᠡᠵᠡᠭᠦᠢᠷᠡᠬᠦ ᠳᠥᠭᠥᠯᠡ ᠭᠡᠵᠦ ᠮᠡᠳᠡᠭᠡᠷᠡᠢ᠃ 21 ᠲᠡᠭᠡᠬᠦ ᠳᠦ᠂ ᠶᠦᠳᠠᠢ ᠳᠤ ᠪᠠᠢᠭᠰᠠᠳ ᠨᠢ ᠠᠭᠤᠯᠠ ᠤᠷᠤᠭᠤ ᠳᠤᠲᠠᠭᠠᠨ ᠬᠣᠲᠠ ᠳᠤ ᠪᠠᠢᠭᠰᠠᠳ ᠨᠢ ᠲᠡᠨᠳᠡ ᠡᠴᠡ ᠪᠡᠨ ᠭᠠᠷᠤᠭ᠂ ᠬᠥᠳᠡᠭᠡ ᠪᠠᠢᠭᠰᠠᠳ ᠨᠢ ᠬᠣᠲᠠ ᠳᠤ ᠪᠦᠦ ᠤᠷᠤᠭ᠃ 22 ᠡᠨᠡ ᠪᠣᠯ ᠥᠰᠢᠶᠡ ᠠᠪᠤᠯᠲᠠ ᠶᠢᠨ ᠡᠳᠦᠷ ᠤᠳ ᠪᠥᠭᠡᠳ ᠪᠢᠴᠢᠭᠳᠡᠭᠰᠡᠨ ᠪᠦᠬᠦ ᠦᠭᠡ ᠪᠡᠶᠡᠯᠡᠭᠳᠡᠨᠡ᠃ 23 ᠲᠡᠷᠡ ᠡᠳᠦᠷ ᠤᠳ ᠢᠶᠠᠷ ᠵᠢᠷᠮᠦᠰᠦᠨ ᠪᠠ ᠬᠥᠬᠥᠭᠦᠯ ᠡᠮᠡᠭᠲᠡᠢᠴᠦᠳ ᠲᠦ ᠭᠠᠢ ᠪᠣᠯᠣᠨᠠ᠃ ᠶᠠᠭᠤ ᠭᠡᠪᠡᠯ᠂ ᠭᠠᠵᠠᠷ ᠳᠡᠭᠡᠷᠡ ᠶᠡᠬᠡ ᠭᠠᠮᠰᠢᠭ ᠲᠣᠬᠢᠶᠠᠯᠳᠤᠵᠤ᠂ ᠡᠨᠡ ᠠᠷᠠᠳ ᠲᠦᠮᠡᠨ ᠳᠦ ᠠᠭᠤᠷ ᠬᠢᠯᠢᠩ ᠪᠠᠭᠤᠬᠤ ᠪᠣᠯᠣᠨᠠ᠃ 24 ᠲᠡᠳᠡ ᠢᠯᠳᠦᠨ ᠦ ᠢᠷ ᠳᠡᠭᠡᠷᠡ ᠤᠨᠠᠵᠤ᠂ ᠬᠠᠮᠤᠭ ᠤᠯᠤᠰ ᠲᠤ ᠣᠯᠵᠠᠯᠠᠭᠳᠠᠵᠤ ᠶᠠᠪᠤᠨᠠ᠃ ᠬᠠᠷᠢᠴᠤᠳ ᠤᠨ ᠦᠶᠡ ᠨᠦᠭᠦᠳ ᠳᠠᠭᠤᠰᠬᠤ ᠪᠣᠯᠲᠠᠯᠠ ᠶᠧᠷᠦ᠋ᠰᠠᠯᠧᠮ ᠬᠠᠷᠢᠴᠤᠳ ᠲᠤ ᠭᠢᠰᠬᠢᠯᠡᠭᠳᠡᠨᠡ᠃
ᠾᠷᠢᠰᠲ᠋ᠣᠰ ᠤᠨ ᠳᠠᠬᠢᠨ ᠢᠷᠡᠬᠦ
25 ᠨᠠᠷᠠ᠂ ᠰᠠᠷᠠ᠂ ᠣᠳᠣᠳ ᠲᠤ ᠰᠢᠨᠵᠢ ᠲᠡᠮᠳᠡᠭ ᠤᠳ ᠢᠯᠡᠷᠡᠵᠦ᠂ ᠭᠠᠵᠠᠷ ᠳᠡᠭᠡᠷᠡᠬᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠳᠠᠯᠠᠢ ᠪᠣᠯᠣᠨ ᠳᠠᠪᠠᠯᠭᠠᠨ ᠤ ᠱᠤᠤᠭᠢᠶᠠᠨ ᠳᠤ ᠰᠠᠮᠠᠭᠠᠷᠳᠠᠨ ᠪᠠᠯᠠᠮᠠᠭᠳᠠᠬᠤ ᠪᠣᠯᠣᠨᠠ᠃ 26 ᠲᠩᠷᠢ ᠶᠢᠨ ᠡᠷᠬᠡᠰ ᠳᠣᠷᠭᠢᠬᠤ ᠲᠤᠯᠠ ᠳᠡᠯᠡᠬᠡᠢ ᠳᠦ ᠶᠠᠭᠤ ᠪᠣᠯᠬᠤ ᠶᠢ ᠪᠣᠳᠣᠭᠠᠳ ᠬᠥᠮᠦᠰ ᠠᠶᠤᠵᠤ ᠤᠬᠠᠭᠠ ᠠᠯᠳᠠᠨᠠ᠃ 27 ᠲᠡᠷᠡ ᠦᠶᠡ ᠳᠦ᠂ ᠬᠥᠮᠦᠨ ᠦ ᠬᠦᠦ ᠡᠭᠦᠯᠡ ᠲᠠᠢ ᠪᠠᠷ᠂ ᠬᠦᠴᠦ ᠪᠣᠯᠣᠨ ᠠᠤᠭᠠ ᠵᠢᠪᠬᠤᠯᠠᠩ ᠲᠠᠢ ᠪᠠᠷ ᠢᠷᠡᠬᠦ ᠶᠢ ᠬᠥᠮᠦᠰ ᠬᠠᠷᠠᠨᠠ᠃ 28 ᠡᠳᠡᠭᠡᠷ ᠶᠠᠪᠤᠳᠠᠯ ᠪᠣᠯᠵᠤ ᠡᠬᠢᠯᠡᠬᠦ ᠳᠦ᠂ ᠴᠢᠬᠡ ᠵᠣᠭᠰᠣᠨ ᠲᠣᠯᠣᠭᠠᠢ ᠪᠠᠨ ᠡᠷᠭᠦ︕ ᠤᠴᠢᠷ ᠨᠢ ᠠᠪᠤᠷᠠᠯ ᠲᠠ ᠨᠠᠷ ᠲᠤ ᠣᠢᠷᠠᠲᠤᠭᠰᠠᠨ》 ᠭᠡᠪᠡ᠃
29 ᠢᠰᠦ᠋ᠰ ᠪᠠᠰᠠ ᠦᠯᠢᠭᠡᠷᠯᠡᠯ ᠢᠶᠡᠷ᠄ 《ᠢᠨᠵᠢᠷ ᠤᠨ ᠮᠣᠳᠣ ᠪᠠ ᠠᠯᠢᠪᠠ ᠮᠣᠳᠣ ᠶᠢ ᠦᠵᠡ᠃ 30 ᠲᠡᠳᠡᠭᠡᠷ ᠦᠨ ᠰᠣᠶᠣᠭᠠᠯᠠᠬᠤ ᠶᠢ ᠦᠵᠡᠪᠡᠯ ᠲᠠ ᠨᠠᠷ ᠵᠤᠨ ᠣᠢᠷᠠᠲᠤᠴᠢᠬᠠᠭᠰᠠᠨ ᠢ ᠮᠡᠳᠡᠳᠡᠭ᠃ 31 ᠡᠭᠦᠨᠴᠢᠯᠡᠨ ᠲᠠ ᠨᠠᠷ ᠡᠳᠡᠭᠡᠷ ᠲᠣᠬᠢᠶᠠᠯᠳᠤᠯ ᠢ ᠬᠠᠷᠠᠬᠤ ᠳᠠᠭᠠᠨ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠣᠢᠷᠠᠬᠠᠨ ᠪᠠᠢᠭᠠ ᠶᠢ ᠮᠡᠳᠡᠭᠲᠦᠨ᠃ 32 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠡᠨᠡ ᠦᠶᠡ ᠰᠥᠨᠥᠬᠦ ᠡᠴᠡ ᠡᠮᠦᠨᠡ ᠡᠨᠡ ᠪᠦᠬᠦᠨ ᠪᠡᠶᠡᠯᠡᠭᠳᠡᠨᠡ᠃ 33 ᠲᠩᠷᠢ ᠭᠠᠵᠠᠷ ᠠᠯᠠᠭᠠ ᠪᠣᠯᠣᠨᠠ᠂ ᠭᠡᠪᠡᠴᠦ ᠮᠢᠨᠦ ᠦᠭᠡᠰ ᠯᠠᠪ ᠠᠯᠠᠭᠠ ᠪᠣᠯᠬᠤ ᠦᠭᠡᠢ᠃
34 ᠬᠠᠷᠢᠨ ᠲᠠ ᠨᠠᠷ ᠪᠣᠯᠭᠣᠮᠵᠢᠯᠠᠭᠲᠤᠨ︕ ᠲᠠᠩ᠋ᠬᠠᠢᠷᠠᠯ᠂ ᠰᠣᠭᠲᠣᠭᠤᠷᠠᠯ᠂ ᠠᠮᠢᠳᠤᠷᠠᠯ ᠤᠨ ᠵᠣᠪᠠᠨᠢᠯ ᠢᠶᠠᠷ ᠵᠢᠷᠦᠬᠡ ᠰᠡᠳᠬᠢᠯ ᠢᠶᠠᠨ ᠳᠠᠷᠤᠮᠲᠠᠯᠠᠭᠤᠯᠬᠤ ᠪᠣᠯᠣᠭᠤᠵᠠᠢ᠃ ᠲᠡᠷᠡ ᠬᠦ ᠡᠳᠦᠷ ᠭᠡᠨᠡᠳᠲᠡ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠤᠷᠠᠬᠠ ᠮᠡᠲᠦ ᠪᠠᠭᠤᠨᠠ᠃ 35 ᠤᠴᠢᠷ ᠨᠢ ᠲᠡᠷᠡ ᠡᠳᠦᠷ ᠨᠢ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠳᠡᠭᠡᠷᠡ ᠠᠮᠢᠳᠤᠷᠠᠭᠴᠢ ᠪᠦᠬᠦᠨ ᠳᠦ ᠲᠤᠯᠵᠤ ᠢᠷᠡᠬᠦ ᠪᠣᠯᠣᠨᠠ᠃ 36 ᠬᠠᠷᠢᠨ ᠲᠠ ᠨᠠᠷ ᠬᠣᠵᠢᠮ ᠪᠣᠯᠬᠤ ᠡᠨᠡ ᠪᠦᠬᠦᠨ ᠡᠴᠡ ᠵᠠᠢᠯᠠᠵᠤ᠂ ᠬᠥᠮᠦᠨ ᠦ ᠬᠦᠦ ᠶᠢᠨ ᠡᠮᠦᠨᠡ ᠵᠣᠭᠰᠣᠵᠤ ᠴᠢᠳᠠᠬᠤ ᠶᠢᠨ ᠲᠤᠯᠠᠳᠠ ᠪᠠᠢᠩ᠋ᠭᠤ ᠳᠠᠭᠠᠳᠬᠠᠵᠤ ᠰᠡᠷᠡᠮᠵᠢᠲᠡᠢ ᠪᠠᠢᠭᠲᠤᠨ》 ᠭᠡᠪᠡ᠃
37 ᠢᠰᠦ᠋ᠰ ᠡᠳᠦᠷ ᠲᠡᠭᠡᠨ ᠠᠷᠢᠭᠤᠨ ᠣᠷᠳᠣᠨ ᠳᠤ ᠰᠤᠷᠭᠠᠵᠤ᠂ ᠰᠥᠨᠢ ᠳᠡᠭᠡᠨ ᠲᠡᠨᠳᠡ ᠡᠴᠡ ᠭᠠᠷᠤᠭᠠᠳ ᠴᠢᠳᠦᠨ ᠭᠡᠭᠳᠡᠳᠡᠭ ᠠᠭᠤᠯᠠᠨ ᠳᠤ ᠬᠣᠨᠣᠳᠠᠭ ᠪᠠᠢᠯᠠ᠃ 38 ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠦ ᠰᠤᠷᠭᠠᠯ ᠢ ᠰᠣᠨᠣᠰᠬᠤ ᠪᠠᠷ ᠥᠷᠯᠥᠭᠡ ᠡᠷᠲᠡᠯᠡᠨ ᠠᠷᠢᠭᠤᠨ ᠣᠷᠳᠣᠨ ᠳᠤ ᠣᠴᠢᠳᠠᠭ ᠪᠠᠢᠵᠠᠢ᠃