ᠯᠦᠺ ᠭᠤᠷᠪᠠ
ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠤ ᠲᠤᠩ᠋ᠬᠠᠭᠯᠠᠯ
1 ᠲᠢᠪᠧᠷᠢᠣ᠋ ᠺᠠᠶᠧᠰᠠᠷ ᠤᠨ ᠰᠠᠭᠤᠷᠢᠨ ᠳᠤ ᠰᠠᠭᠤᠭᠰᠠᠨ ᠤ ᠠᠷᠪᠠᠨ ᠲᠠᠪᠤᠳᠠᠬᠢ ᠵᠢᠯ ᠳᠤ᠂ ᠫᠣᠨᠲ᠋ᠢ ᠫᠢᠯᠠᠲ ᠶᠦᠳᠠᠢ ᠶᠢᠨ ᠵᠠᠬᠢᠷᠤᠭᠴᠢ᠂ ᠾᠧᠷᠣᠳ᠋ ᠭᠠᠯᠢᠯᠠᠶᠠ ᠶᠢᠨ ᠬᠠᠨ᠂ ᠾᠧᠷᠣᠳ᠋ ᠤᠨ ᠳᠡᠭᠦᠦ ᠹᠢᠯᠢᠫ ᠢᠲ᠋ᠦ᠋ᠷᠠᠶᠠ ᠪᠠ ᠲᠷᠠᠬᠣᠨᠢᠲ᠋ᠢ ᠶᠢᠨ ᠬᠠᠨ᠂ ᠯᠦᠰᠠᠨᠢᠶᠠ ᠠᠪᠢᠯᠧᠨᠧ ᠶᠢᠨ ᠬᠠᠨ᠂ 2 ᠾᠠᠨᠠᠰ ᠪᠣᠯᠣᠨ ᠺᠠᠶᠠᠹᠠ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠪᠠᠢᠬᠤ ᠳᠤ᠂ ᠪᠤᠷᠬᠠᠨ ᠤ ᠦᠭᠡ ᠽᠠᠺᠠᠷᠢᠶᠠ ᠶᠢᠨ ᠬᠦᠦ ᠶᠣᠬᠠᠨ ᠳᠤ ᠪᠠᠭᠤᠪᠠ᠃ ᠲᠡᠷᠡ ᠦᠶᠡ ᠳᠦ ᠶᠣᠬᠠᠨ ᠴᠥᠯ ᠳᠤ ᠪᠠᠢᠵᠠᠢ᠃ 3 ᠲᠡᠷᠡ ᠪᠡᠷ ᠶᠣᠷᠳᠠᠨ ᠭᠣᠣᠯ ᠤᠨ ᠬᠠᠪᠢ ᠶᠢᠨ ᠪᠦᠬᠦ ᠭᠠᠵᠠᠷ ᠢᠶᠠᠷ ᠶᠠᠪᠤᠵᠤ᠂ ᠭᠡᠮ ᠨᠢᠭᠦᠯ ᠢᠶᠡᠨ ᠠᠭᠤᠴᠢᠯᠠᠭᠤᠯᠬᠤ ᠭᠡᠮᠰᠢᠯ ᠤᠨ ᠤᠬᠢᠶᠠᠯ ᠢ ᠲᠤᠩ᠋ᠬᠠᠭᠯᠠᠵᠤ ᠪᠠᠢᠯᠠ᠃ 4 ᠡᠢᠨ ᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠶᠢᠨ ᠨᠣᠮ ᠳᠤ᠄ 《ᠴᠥᠯ ᠳᠤ ᠬᠠᠰᠬᠢᠷᠤᠭᠴᠢ ᠨᠢᠭᠡᠨ ᠦ ᠳᠠᠭᠤ᠄ 〈ᠡᠵᠡᠨ ᠦ ᠵᠠᠮ ᠢ ᠪᠡᠯᠡᠳᠬᠡᠵᠡᠭᠡ︕ ᠲᠡᠭᠦᠨ ᠦ ᠬᠠᠷᠭᠤᠢ ᠶᠢ ᠰᠢᠯᠤᠭᠤᠳᠬᠠᠭᠲᠤᠨ︕
5 ᠬᠥᠨᠳᠡᠢ ᠪᠣᠯᠭᠠᠨ ᠳᠦᠭᠦᠷᠴᠦ ᠠᠭᠤᠯᠠ ᠲᠣᠯᠣᠭᠠᠳ ᠪᠣᠯᠭᠠᠨ ᠨᠠᠮ ᠪᠣᠯᠣᠨᠠ ᠮᠤᠷᠤᠢ ᠨᠢ ᠰᠢᠯᠤᠭᠤᠨ ᠪᠠᠷᠲᠠᠭᠠ ᠲᠠᠢ ᠵᠠᠮ ᠨᠢ ᠲᠡᠭᠰᠢ ᠪᠣᠯᠣᠨ᠂
6 ᠬᠠᠮᠤᠭ ᠮᠢᠬᠠᠨ ᠪᠡᠶᠡᠲᠦ ᠬᠥᠮᠦᠨ ᠪᠤᠷᠬᠠᠨ ᠤ ᠠᠪᠤᠷᠠᠯ ᠢ ᠦᠵᠡᠨᠡ〉 ᠭᠡᠰᠡᠨ》
ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠢᠶᠡᠷ ᠪᠣᠯᠵᠠᠢ᠃
7 ᠶᠣᠬᠠᠨ ᠤᠬᠢᠶᠠᠯ ᠬᠦᠷᠲᠡᠬᠦ ᠪᠡᠷ ᠭᠠᠷᠴᠤ ᠢᠷᠡᠭᠰᠡᠨ ᠣᠯᠠᠨ ᠳᠤ᠄ 《ᠬᠣᠣᠷᠲᠤ ᠮᠣᠭᠠᠢ ᠶᠢᠨ ᠦᠷᠡ ᠲᠥᠯ ᠡ᠂ 〈ᠠᠢᠰᠤᠢ ᠬᠢᠯᠢᠩᠨᠡᠯ ᠡᠴᠡ ᠵᠠᠢᠯᠠ〉 ᠭᠡᠵᠦ ᠬᠡᠨ ᠲᠠ ᠨᠠᠷ ᠲᠤ ᠵᠢᠭᠠᠭᠰᠠᠨ ᠪᠤᠢ︖ 8 ᠭᠡᠮᠰᠢᠯ ᠳᠤ ᠨᠡᠢᠴᠡᠬᠦ ᠵᠢᠮᠢᠰ ᠢᠶᠠᠨ ᠰᠠᠭᠤᠯᠭᠠ᠂ 〈ᠠᠪᠷᠠᠬᠠᠮ ᠪᠣᠯ ᠪᠢᠳᠡᠨ ᠦ ᠡᠪᠦᠭᠡ〉 ᠬᠡᠮᠡᠨ ᠶᠠᠷᠢᠶᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠢᠲᠡᠭᠡᠢ ᠪᠣᠳᠣ᠃ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠪᠤᠷᠬᠠᠨ ᠡᠳᠡᠭᠡᠷ ᠴᠢᠯᠠᠭᠤᠨ ᠠᠴᠠ ᠴᠤ ᠠᠪᠷᠠᠬᠠᠮ ᠤᠨ ᠦᠷᠡ ᠤᠳᠤᠮ ᠢ ᠪᠤᠢ ᠪᠣᠯᠭᠠᠵᠤ ᠴᠢᠳᠠᠨᠠ᠃ 9 ᠮᠣᠳᠣᠳ ᠤᠨ ᠦᠨᠳᠦᠰᠦᠨ ᠳᠦ ᠰᠦᠬᠡ ᠬᠡᠳᠦᠢᠨᠡᠢ ᠲᠠᠯᠪᠢᠭᠳᠠᠵᠠᠢ᠂ ᠰᠠᠢᠨ ᠵᠢᠮᠢᠰ ᠰᠠᠭᠤᠳᠠᠭ ᠦᠭᠡᠢ ᠮᠣᠳᠣ ᠪᠦᠬᠦᠨ ᠴᠠᠪᠴᠢᠭᠳᠠᠵᠤ ᠭᠠᠯ ᠳᠤ ᠬᠠᠶᠠᠭᠳᠠᠨᠠ》 ᠭᠡᠪᠡ᠃
10 ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠲᠡᠭᠦᠨ ᠡᠴᠡ᠄ 《ᠲᠡᠭᠡᠪᠡᠯ ᠪᠢᠳᠡ ᠶᠠᠭᠤ ᠬᠢᠬᠦ ᠶᠣᠰᠣᠲᠠᠢ ᠶᠤᠮ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 11 ᠲᠡᠷᠡ᠄ 《ᠬᠣᠶᠠᠷ ᠬᠤᠪᠴᠠᠰᠤ ᠲᠠᠢ ᠨᠢ ᠬᠤᠪᠴᠠᠰᠤ ᠦᠭᠡᠢ ᠳᠡᠭᠡᠨ ᠥᠭ᠂ ᠬᠣᠭᠣᠯᠠ ᠲᠠᠢ ᠨᠢ ᠴᠤ ᠲᠡᠭᠡ》 ᠭᠡᠯᠡ᠃ 12 ᠭᠠᠢᠯᠢᠴᠢᠳ ᠪᠠᠰᠠ ᠤᠬᠢᠶᠠᠯ ᠬᠦᠷᠲᠡᠬᠦ ᠪᠡᠷ ᠢᠷᠡᠵᠦ᠂ ᠲᠡᠭᠦᠨ ᠡᠴᠡ᠄ 《ᠪᠠᠭᠰᠢ ᠡ᠂ ᠪᠢᠳᠡ ᠶᠠᠭᠤ ᠬᠢᠬᠦ ᠶᠣᠰᠣᠲᠠᠢ ᠪᠤᠢ︖》 ᠭᠡᠬᠦ ᠳᠦ᠂ 13 ᠶᠣᠬᠠᠨ᠄ 《ᠥᠪᠡᠷᠰᠡᠳ ᠲᠦ ᠴᠢᠨᠢ ᠲᠣᠭᠲᠠᠭᠠᠭᠳᠠᠭᠰᠠᠨ ᠠᠴᠠ ᠢᠯᠡᠭᠦᠦ ᠶᠢ ᠪᠦᠦ ᠠᠪ》 ᠭᠡᠪᠡ᠃ 14 ᠴᠡᠷᠢᠭ ᠤᠳ ᠪᠠᠰᠠ᠄ 《ᠪᠢᠳᠡ ᠴᠤ ᠶᠠᠭᠤ ᠬᠢᠬᠦ ᠶᠣᠰᠣᠲᠠᠢ ᠪᠤᠢ︖》 ᠭᠡᠰᠡᠨ ᠳᠦ᠂ ᠲᠡᠷᠡ᠄ 《ᠬᠥᠮᠦᠨ ᠢ ᠪᠦᠦ ᠰᠦᠷᠳᠡᠭᠦᠯ᠂ ᠬᠢᠯᠢᠰ ᠢᠶᠠᠷ ᠪᠦᠦ ᠭᠦᠳᠬᠡ᠂ ᠠᠪᠳᠠᠭ ᠴᠠᠯᠢᠩ ᠳᠠᠭᠠᠨ ᠬᠠᠨᠤᠮᠵᠢᠲᠠᠢ ᠪᠠᠢ》 ᠭᠡᠯᠡ᠃
15 ᠠᠷᠠᠳ ᠲᠦᠮᠡᠨ ᠾᠷᠢᠰᠲ᠋ᠣᠰ ᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠶᠣᠬᠠᠨ ᠾᠷᠢᠰᠲ᠋ᠣᠰ ᠮᠥᠨ ᠪᠣᠯᠬᠤ ᠡᠰᠡᠬᠦ ᠶᠢ ᠪᠦᠭᠦᠳᠡᠭᠡᠷ ᠰᠡᠳᠬᠢᠯ ᠳᠡᠭᠡᠨ ᠪᠣᠳᠣᠵᠤ ᠪᠠᠢᠯᠠ᠃ 16 ᠶᠣᠬᠠᠨ ᠪᠦᠭᠦᠳᠡ ᠳᠦ ᠬᠠᠷᠢᠭᠤᠯᠤᠨ᠄ 《ᠪᠢ ᠲᠠ ᠨᠠᠷ ᠲᠤ ᠤᠰᠤ ᠪᠠᠷ ᠤᠬᠢᠶᠠᠯ ᠬᠦᠷᠲᠡᠭᠡᠵᠦ ᠪᠠᠢᠨᠠ᠂ ᠬᠠᠷᠢᠨ ᠨᠠᠳᠠ ᠠᠴᠠ ᠬᠦᠴᠦᠷᠬᠡᠭ ᠨᠢᠭᠡᠨ ᠨᠢ ᠢᠷᠡᠨᠡ᠂ ᠨᠠᠳᠠ ᠳᠤ ᠲᠡᠭᠦᠨ ᠦ ᠱᠠᠬᠠᠢ ᠶᠢᠨ ᠤᠶᠠᠭᠠᠰᠤ ᠶᠢ ᠲᠠᠢᠯᠬᠤ ᠬᠢᠷᠢ ᠭᠡᠮ ᠴᠤ ᠪᠠᠢᠬᠤ ᠦᠭᠡᠢ᠂ ᠲᠡᠷᠡ ᠲᠠ ᠨᠠᠷ ᠲᠤ ᠠᠷᠢᠭᠤᠨ ᠰᠦᠨᠡᠰᠦ ᠪᠣᠯᠣᠨ ᠭᠠᠯ ᠢᠶᠠᠷ ᠤᠬᠢᠶᠠᠯ ᠬᠦᠷᠲᠡᠭᠡᠨᠡ᠃ 17 ᠲᠡᠷᠡ ᠭᠠᠷ ᠲᠠᠭᠠᠨ ᠳᠡᠪᠢᠭᠦᠷ ᠪᠠᠷᠢᠵᠤ ᠦᠲᠦᠷᠮᠡ ᠪᠡᠨ ᠴᠡᠪᠡᠷᠯᠡᠨ᠂ ᠪᠤᠭᠤᠳᠠᠢ ᠪᠠᠨ ᠬᠥᠮᠥᠷᠭᠡ ᠳᠦ ᠬᠤᠷᠢᠶᠠᠬᠤ ᠪᠥᠭᠡᠳ ᠬᠡᠪᠡᠭ ᠢ ᠨᠢ ᠤᠨᠲᠠᠷᠠᠰᠢ ᠦᠭᠡᠢ ᠭᠠᠯ ᠳᠤ ᠲᠦᠯᠡᠬᠦ ᠪᠣᠯᠣᠨᠠ》 ᠭᠡᠯᠡ᠃
18 ᠶᠣᠬᠠᠨ ᠡᠭᠦᠨ ᠡᠴᠡ ᠭᠠᠳᠠᠨᠠ ᠣᠯᠠᠨ ᠰᠤᠷᠭᠠᠯ ᠢᠶᠠᠷ ᠠᠷᠠᠳ ᠲᠦᠮᠡᠨ ᠢ ᠢᠳᠬᠠᠵᠤ᠂ ᠪᠠᠶᠠᠷ ᠤᠨ ᠮᠡᠳᠡᠭᠡ ᠤᠯᠠᠮᠵᠢᠯᠠᠵᠤ ᠪᠠᠢᠯᠠ᠃ 19 ᠬᠠᠷᠢᠨ ᠾᠧᠷᠣᠳ᠋ ᠬᠠᠨ ᠳᠡᠭᠦᠦ ᠶᠢᠨ ᠢᠶᠠᠨ ᠡᠬᠡᠨᠡᠷ ᠾᠧᠷᠣᠳᠢᠶᠠ ᠲᠠᠢ ᠪᠣᠯᠣᠭᠰᠠᠨ ᠶᠠᠪᠤᠳᠠᠯ ᠪᠠ ᠥᠪᠡᠷ ᠦᠨ ᠦᠢᠯᠡᠳᠦᠭᠰᠡᠨ ᠪᠤᠵᠠᠷ ᠬᠡᠷᠡᠭ ᠡᠴᠡ ᠪᠡᠨ ᠪᠣᠯᠵᠤ ᠶᠣᠬᠠᠨ ᠳᠤ ᠵᠢᠮᠡᠯᠡᠭᠳᠡᠨ 20 ᠡᠨᠡ ᠪᠦᠬᠦᠨ ᠦ ᠪᠠᠨ ᠳᠡᠭᠡᠷᠡ ᠲᠡᠭᠦᠨ ᠢ ᠭᠢᠨᠳᠠᠨ ᠳᠤ ᠬᠣᠷᠢᠭᠰᠠᠨ ᠢᠶᠠᠷ ᠢᠶᠠᠨ ᠪᠠᠰᠠ ᠨᠢᠭᠡ ᠬᠡᠷᠡᠭ ᠨᠡᠮᠡᠵᠡᠢ᠃
ᠢᠰᠦ᠋ᠰ ᠤᠬᠢᠶᠠᠯ ᠬᠦᠷᠲᠡᠭᠰᠡᠨ ᠨᠢ
21 ᠠᠷᠠᠳ ᠣᠯᠠᠨ ᠤᠬᠢᠶᠠᠯ ᠬᠦᠷᠲᠡᠵᠦ ᠪᠠᠢᠯᠠ᠃ ᠢᠰᠦ᠋ᠰ ᠪᠠᠰᠠ ᠤᠬᠢᠶᠠᠯ ᠬᠦᠷᠲᠡᠭᠡᠳ ᠳᠠᠭᠠᠳᠬᠠᠵᠤ ᠪᠠᠢᠲᠠᠯᠠ᠂ ᠲᠩᠷᠢ ᠨᠡᠭᠡᠭᠡᠭᠳᠡᠨ 22 ᠠᠷᠢᠭᠤᠨ ᠰᠦᠨᠡᠰᠦ ᠲᠠᠭᠲᠠᠭᠠᠨ ᠤ ᠬᠡᠯᠪᠡᠷᠢ ᠪᠠᠷ ᠢᠰᠦ᠋ᠰ ᠤᠨ ᠳᠡᠭᠡᠷᠡ ᠪᠠᠭᠤᠪᠠ᠃ ᠪᠠᠰᠠ ᠲᠩᠷᠢ ᠡᠴᠡ ᠳᠠᠭᠤ ᠭᠠᠷᠴᠤ᠄ 《ᠴᠢ ᠪᠣᠯ ᠮᠢᠨᠦ ᠬᠠᠢᠷᠠᠲᠠᠢ ᠬᠦᠦ᠂ ᠴᠢ ᠨᠠᠳᠠ ᠳᠤ ᠲᠠᠭᠠᠯᠠᠭᠳᠠᠳᠠᠭ》 ᠭᠡᠪᠡ᠃
ᠢᠰᠦ᠋ᠰ ᠤᠨ ᠭᠡᠷ ᠦᠨ ᠴᠠᠳᠢᠭ
23 ᠢᠰᠦ᠋ᠰ ᠠᠵᠢᠯ ᠦᠢᠯᠡᠰ ᠢᠶᠡᠨ ᠡᠬᠢᠯᠡᠬᠦ ᠳᠡᠭᠡᠨ ᠭᠤᠴᠢᠭᠠᠳ ᠨᠠᠰᠤᠲᠠᠢ ᠪᠠᠢᠯᠠ᠃ ᠬᠥᠮᠦᠰ ᠦᠨ ᠣᠢᠯᠠᠭᠠᠭᠰᠠᠨ ᠢᠶᠠᠷ᠂ ᠲᠡᠷᠡ ᠪᠣᠯ ᠶᠣᠰᠧᠹ ᠤᠨ ᠬᠦᠦ ᠪᠠᠢᠪᠠ᠃ ᠶᠣᠰᠧᠹ ᠨᠢ ᠧᠯᠢ ᠶᠢᠨ ᠬᠦᠦ᠂ 24 ᠧᠯᠢ ᠨᠢ ᠮᠠᠲ᠋ᠠᠲ ᠤᠨ ᠬᠦᠦ᠂ ᠮᠠᠲ᠋ᠠᠲ ᠨᠢ ᠯᠧᠸᠢ ᠶᠢᠨ ᠬᠦᠦ᠂ ᠯᠧᠸᠢ ᠨᠢ ᠮᠧᠯᠬᠢ ᠶᠢᠨ ᠬᠦᠦ᠂ ᠮᠧᠯᠬᠢ ᠨᠢ ᠶᠠᠨᠠᠢ ᠶᠢᠨ ᠬᠦᠦ᠂ ᠶᠠᠨᠠᠢ ᠨᠢ ᠶᠣᠰᠧᠹ ᠤᠨ ᠬᠦᠦ᠂ 25 ᠶᠣᠰᠧᠹ ᠨᠢ ᠮᠠᠲ᠋ᠠᠲ᠋ᠢᠶᠠ ᠶᠢᠨ ᠬᠦᠦ᠂ ᠮᠠᠲ᠋ᠠᠲ᠋ᠢᠶᠠ ᠨᠢ ᠠᠮᠣᠰ ᠤᠨ ᠬᠦᠦ᠂ ᠠᠮᠣᠰ ᠨᠢ ᠨᠠᠾᠦ᠋ᠮ ᠤᠨ ᠬᠦᠦ᠂ ᠨᠠᠾᠦ᠋ᠮ ᠨᠢ ᠧᠰᠯᠢ ᠶᠢᠨ ᠬᠦᠦ᠂ ᠧᠰᠯᠢ ᠨᠢ ᠨᠠᠭᠠᠢ ᠶᠢᠨ ᠬᠦᠦ᠂ 26 ᠨᠠᠭᠠᠢ ᠨᠢ ᠮᠠᠶᠠᠲ ᠤᠨ ᠬᠦᠦ᠂ ᠮᠠᠶᠠᠲ ᠨᠢ ᠮᠠᠲ᠋ᠠᠲ᠋ᠢᠶᠠ ᠶᠢᠨ ᠬᠦᠦ᠂ ᠮᠠᠲ᠋ᠠᠲ᠋ᠢᠶᠠ ᠨᠢ ᠰᠧᠮᠧᠶᠢᠨ ᠤ ᠬᠦᠦ᠂ ᠰᠧᠮᠧᠶᠢᠨ ᠨᠢ ᠶᠣᠰᠧᠹ ᠤᠨ ᠬᠦᠦ᠂ ᠶᠣᠰᠧᠹ ᠨᠢ ᠶᠦᠳᠠ ᠶᠢᠨ ᠬᠦᠦ᠂ 27 ᠶᠦᠳᠠ ᠨᠢ ᠶᠣᠸᠠᠨᠠᠨ ᠤ ᠬᠦᠦ᠂ ᠶᠣᠸᠠᠨᠠᠨ ᠨᠢ ᠷᠧᠰᠠ ᠶᠢᠨ ᠬᠦᠦ᠂ ᠷᠧᠰᠠ ᠨᠢ ᠽᠣᠷᠣᠪᠠᠪᠧᠯ ᠤᠨ ᠬᠦᠦ᠂ ᠽᠣᠷᠣᠪᠠᠪᠧᠯ ᠨᠢ ᠱᠠᠯᠲ᠋ᠢᠶᠧᠯ ᠤᠨ ᠬᠦᠦ᠂ ᠱᠠᠯᠲ᠋ᠢᠶᠧᠯ ᠨᠢ ᠨᠧᠷᠢ ᠶᠢᠨ ᠬᠦᠦ᠂ 28 ᠨᠧᠷᠢ ᠨᠢ ᠮᠧᠯᠬᠢ ᠶᠢᠨ ᠬᠦᠦ᠂ ᠮᠧᠯᠬᠢ ᠨᠢ ᠠᠳᠢ ᠶᠢᠨ ᠬᠦᠦ᠂ ᠠᠳᠢ ᠨᠢ ᠺᠣᠰᠠᠮ ᠤᠨ ᠬᠦᠦ᠂ ᠺᠣᠰᠠᠮ ᠨᠢ ᠧᠯᠮᠠᠳᠠᠮ ᠤᠨ ᠬᠦᠦ᠂ ᠧᠯᠮᠠᠳᠠᠮ ᠨᠢ ᠡᠷ ᠦᠨ ᠬᠦᠦ᠂ 29 ᠡᠷ ᠨᠢ ᠢᠰᠦ᠋ᠰ ᠤᠨ ᠬᠦᠦ᠂ ᠢᠰᠦ᠋ᠰ ᠨᠢ ᠧᠯᠢᠶᠧᠽᠧᠷ ᠤᠨ ᠬᠦᠦ᠂ ᠧᠯᠢᠶᠧᠽᠧᠷ ᠨᠢ ᠶᠣᠷᠢᠮ ᠤᠨ ᠬᠦᠦ᠂ ᠶᠣᠷᠢᠮ ᠨᠢ ᠮᠠᠲ᠋ᠠᠲ ᠤᠨ ᠬᠦᠦ᠂ ᠮᠠᠲ᠋ᠠᠲ ᠨᠢ ᠯᠧᠸᠢ ᠶᠢᠨ ᠬᠦᠦ᠂ 30 ᠯᠧᠸᠢ ᠨᠢ ᠰᠢᠮᠣᠨ ᠤ ᠬᠦᠦ᠂ ᠰᠢᠮᠣᠨ ᠨᠢ ᠶᠦᠳᠠ ᠶᠢᠨ ᠬᠦᠦ᠂ ᠶᠦᠳᠠ ᠨᠢ ᠶᠣᠰᠧᠹ ᠤᠨ ᠬᠦᠦ᠂ ᠶᠣᠰᠧᠹ ᠨᠢ ᠶᠣᠨᠠᠮ ᠤᠨ ᠬᠦᠦ᠂ ᠶᠣᠨᠠᠮ ᠨᠢ ᠧᠯᠢᠶᠠᠺᠢᠮ ᠤᠨ ᠬᠦᠦ᠂ 31 ᠧᠯᠢᠶᠠᠺᠢᠮ ᠨᠢ ᠮᠧᠯᠧᠶᠠ ᠶᠢᠨ ᠬᠦᠦ᠂ ᠮᠧᠯᠧᠶᠠ ᠨᠢ ᠮᠧᠨᠠ ᠶᠢᠨ ᠬᠦᠦ᠂ ᠮᠧᠨᠠ ᠨᠢ ᠮᠠᠲ᠋ᠠᠲ᠋ᠠ ᠶᠢᠨ ᠬᠦᠦ᠂ ᠮᠠᠲ᠋ᠠᠲ᠋ᠠ ᠨᠢ ᠨᠠᠲ᠋ᠠᠮ ᠤᠨ ᠬᠦᠦ᠂ ᠨᠠᠲ᠋ᠠᠮ ᠨᠢ ᠳ᠋ᠠᠸᠢᠳ᠋ ᠤᠨ ᠬᠦᠦ᠂ 32 ᠳ᠋ᠠᠸᠢᠳ᠋ ᠨᠢ ᠢᠱᠠᠢ ᠶᠢᠨ ᠬᠦᠦ᠂ ᠢᠱᠠᠢ ᠨᠢ ᠣᠪᠧᠳ᠋ ᠤᠨ ᠬᠦᠦ᠂ ᠣᠪᠧᠳ᠋ ᠨᠢ ᠪᠣᠶᠠᠽ ᠤᠨ ᠬᠦᠦ᠂ ᠪᠣᠶᠠᠽ ᠨᠢ ᠰᠠᠯᠮᠣᠨ ᠤ ᠬᠦᠦ᠂ ᠰᠠᠯᠮᠣᠨ ᠨᠢ ᠨᠠᠾᠱᠣᠨ ᠤ ᠬᠦᠦ᠂ 33 ᠨᠠᠾᠱᠣᠨ ᠨᠢ ᠠᠮᠢᠨᠠᠳᠠᠪ ᠤᠨ ᠬᠦᠦ᠂ ᠠᠮᠢᠨᠠᠳᠠᠪ ᠨᠢ ᠠᠳ᠋ᠮᠢᠨ ᠤ ᠬᠦᠦ᠂ ᠠᠳ᠋ᠮᠢᠨ ᠨᠢ ᠠᠷᠠᠮ ᠤᠨ ᠬᠦᠦ᠂ ᠠᠷᠠᠮ ᠨᠢ ᠾᠧᠽᠷᠣᠨ ᠤ ᠬᠦᠦ᠂ ᠾᠧᠽᠷᠣᠨ ᠨᠢ ᠫᠧᠷᠧᠽ ᠤᠨ ᠬᠦᠦ᠂ ᠫᠧᠷᠧᠽ ᠨᠢ ᠶᠦᠳᠠ ᠶᠢᠨ ᠬᠦᠦ᠂ 34 ᠶᠦᠳᠠ ᠨᠢ ᠶᠠᠺᠣᠪ ᠤᠨ ᠬᠦᠦ᠂ ᠶᠠᠺᠣᠪ ᠨᠢ ᠢᠰᠠᠺ ᠤᠨ ᠬᠦᠦ᠂ ᠢᠰᠠᠺ ᠨᠢ ᠠᠪᠷᠠᠬᠠᠮ ᠤᠨ ᠬᠦᠦ᠂ ᠠᠪᠷᠠᠬᠠᠮ ᠨᠢ ᠲᠧᠷᠠ ᠶᠢᠨ ᠬᠦᠦ᠂ ᠲᠧᠷᠠ ᠨᠢ ᠨᠠᠬᠣᠷ ᠤᠨ ᠬᠦᠦ᠂ 35 ᠨᠠᠬᠣᠷ ᠨᠢ ᠰᠠᠷᠦ᠋ᠭ ᠤᠨ ᠬᠦᠦ᠂ ᠰᠠᠷᠦ᠋ᠭ ᠨᠢ ᠷᠧᠣᠢ ᠶᠢᠨ ᠬᠦᠦ᠂ ᠷᠧᠣᠢ ᠨᠢ ᠫᠧᠯᠧᠭ ᠤᠨ ᠬᠦᠦ᠂ ᠫᠧᠯᠧᠭ ᠨᠢ ᠧᠪᠧᠷ ᠤᠨ ᠬᠦᠦ᠂ ᠧᠪᠧᠷ ᠨᠢ ᠱᠠᠯᠠ ᠶᠢᠨ ᠬᠦᠦ᠂ 36 ᠱᠠᠯᠠ ᠨᠢ ᠺᠠᠢᠨᠠᠨ ᠤ ᠬᠦᠦ᠂ ᠺᠠᠢᠨᠠᠨ ᠨᠢ ᠠᠷᠫᠠᠭᠰᠠᠳ᠋ ᠤᠨ ᠬᠦᠦ᠂ ᠠᠷᠫᠠᠭᠰᠠᠳ᠋ ᠨᠢ ᠱᠧᠮ ᠤᠨ ᠬᠦᠦ᠂ ᠱᠧᠮ ᠨᠢ ᠨᠣᠶᠠ ᠶᠢᠨ ᠬᠦᠦ᠂ ᠨᠣᠶᠠ ᠨᠢ ᠯᠠᠮᠧᠬᠠ ᠶᠢᠨ ᠬᠦᠦ᠂ 37 ᠯᠠᠮᠧᠬᠠ ᠨᠢ ᠮᠠᠲ᠋ᠦ᠋ᠰᠠᠯᠠ ᠶᠢᠨ ᠬᠦᠦ᠂ ᠮᠠᠲ᠋ᠦ᠋ᠰᠠᠯᠠ ᠨᠢ ᠧᠨᠣᠺ ᠤᠨ ᠬᠦᠦ᠂ ᠧᠨᠣᠺ ᠨᠢ ᠶᠠᠷᠧᠳ᠋ ᠤᠨ ᠬᠦᠦ᠂ ᠶᠠᠷᠧᠳ᠋ ᠨᠢ ᠮᠠᠬᠠᠯᠠᠯᠧᠯ ᠤᠨ ᠬᠦᠦ᠂ ᠮᠠᠬᠠᠯᠠᠯᠧᠯ ᠨᠢ ᠺᠠᠢᠨᠠᠨ ᠤ ᠬᠦᠦ᠂ 38 ᠺᠠᠢᠨᠠᠨ ᠨᠢ ᠧᠨᠣᠰ ᠤᠨ ᠬᠦᠦ᠂ ᠧᠨᠣᠰ ᠨᠢ ᠰᠧᠲ ᠤᠨ ᠬᠦᠦ᠂ ᠰᠧᠲ ᠨᠢ ᠠᠳᠠᠮ ᠤᠨ ᠬᠦᠦ᠂ ᠠᠳᠠᠮ ᠨᠢ ᠪᠤᠷᠬᠠᠨ ᠤ ᠬᠦᠦ ᠪᠣᠯᠣᠨᠠ᠃