ᠯᠦᠺ ᠶᠢᠰᠦ
ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠢᠯᠡᠭᠡᠯᠲᠡ ᠪᠡᠷ
1 ᠢᠰᠦ᠋ᠰ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠪᠠᠨ ᠳᠠᠭᠤᠳᠠᠨ ᠬᠠᠮᠤᠭ ᠴᠢᠳᠬᠥᠷ ᠢ ᠡᠷᠬᠡᠰᠢᠶᠡᠵᠦ᠂ ᠡᠪᠡᠳᠴᠢᠨ ᠢ ᠡᠳᠡᠭᠡᠭᠡᠬᠦ ᠬᠦᠴᠦ ᠪᠠ ᠡᠷᠬᠡ ᠮᠡᠳᠡᠯ ᠰᠣᠶᠣᠷᠬᠠᠪᠠ᠃ 2 ᠲᠡᠭᠡᠭᠡᠳ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠲᠤᠩ᠋ᠬᠠᠭᠯᠠᠨ ᠡᠪᠡᠳᠴᠢᠲᠡᠨ ᠢ ᠡᠳᠡᠭᠡᠭᠡ ᠭᠡᠵᠦ ᠲᠡᠳᠡᠨ ᠢ ᠢᠯᠡᠭᠡᠬᠦ ᠳᠡᠭᠡᠨ᠂ 3 ᠲᠡᠳᠡᠨ ᠳᠦ᠄ 《ᠵᠠᠮ ᠳᠠᠭᠠᠨ ᠶᠠᠭᠤ ᠴᠤ ᠪᠦᠦ ᠠᠪᠴᠤ ᠶᠠᠪᠤ᠃ ᠲᠠᠶᠠᠭ᠂ ᠪᠣᠭᠴᠣ᠂ ᠬᠦᠨᠡᠰᠦ᠂ ᠵᠣᠭᠣᠰ᠂ ᠢᠯᠡᠭᠦᠦ ᠬᠤᠪᠴᠠᠰᠤ ᠴᠤ ᠪᠦᠦ ᠠᠪ᠃ 4 ᠶᠠᠮᠠᠷ ᠠᠢᠯ ᠳᠤ ᠣᠷᠣᠪᠠᠯ ᠶᠠᠪᠤᠲᠠᠯᠠ ᠪᠠᠨ ᠲᠡᠨᠳᠡ ᠪᠡᠨ ᠪᠠᠢᠭᠠᠷᠠᠢ᠃ 5 ᠬᠠᠮᠢᠭᠠ ᠪᠠᠢᠭᠰᠠᠨ ᠴᠤ᠂ ᠬᠥᠮᠦᠰ ᠲᠠ ᠨᠠᠷ ᠢ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠪᠣᠯ᠂ ᠲᠡᠷᠡ ᠲᠣᠰᠬᠣᠨ ᠠᠴᠠ ᠶᠠᠪᠤᠬᠤ ᠳᠠᠭᠠᠨ ᠬᠥᠯ ᠦᠨ ᠢᠶᠠᠨ ᠲᠣᠭᠣᠰᠣ ᠪᠠᠨ ᠭᠥᠪᠢᠨ ᠲᠡᠳᠡᠨ ᠳᠦ ᠭᠡᠷᠡᠴᠢᠯᠡᠯ ᠪᠣᠯᠭᠠ》 ᠭᠡᠪᠡ᠃ 6 ᠱᠠᠪᠢ ᠨᠠᠷ ᠨᠢ ᠲᠡᠨᠳᠡ ᠡᠴᠡ ᠬᠥᠳᠡᠯᠵᠦ ᠲᠣᠰᠬᠣᠨ ᠨᠤᠭᠤᠳ ᠢᠶᠠᠷ ᠶᠠᠪᠤᠵᠤ ᠭᠠᠵᠠᠷ ᠪᠣᠯᠭᠠᠨ ᠳᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠳᠡᠯᠭᠡᠷᠡᠭᠦᠯᠦᠨ᠂ ᠡᠪᠡᠳᠴᠢᠲᠡᠨ ᠢ ᠡᠳᠡᠭᠡᠭᠡᠪᠡ᠃
7 ᠾᠧᠷᠣᠳ᠋ ᠬᠠᠨ ᠡᠨᠡ ᠬᠦ ᠪᠣᠯᠵᠤ ᠪᠠᠢᠭᠠ ᠪᠦᠭᠦᠳᠡ ᠶᠢ ᠰᠣᠨᠣᠰᠣᠭᠠᠳ ᠮᠡᠩᠳᠡᠨ ᠰᠠᠨᠳᠤᠷᠪᠠ᠃ ᠤᠴᠢᠷ ᠨᠢ᠂ ᠵᠠᠷᠢᠮ ᠬᠥᠮᠦᠰ᠄ 《ᠶᠣᠬᠠᠨ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠵᠠᠢ》 ᠭᠡᠵᠦ᠂ 8 ᠵᠠᠷᠢᠮ ᠨᠢ᠄ 《ᠧᠯᠢᠶᠠ ᠢᠯᠡᠷᠡᠭᠰᠡᠨ》 ᠭᠡᠵᠦ᠂ ᠪᠠᠰᠠ ᠵᠠᠷᠢᠮ ᠨᠢ᠄ 《ᠡᠷᠲᠡᠨ ᠦ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠨᠢᠭᠡ ᠨᠢ ᠠᠮᠢᠯᠠᠭᠰᠠᠨ》 ᠭᠡᠵᠡᠭᠡᠵᠦ ᠪᠠᠢᠵᠠᠢ᠃ 9 ᠾᠧᠷᠣᠳ᠋᠄ 《ᠪᠢ ᠶᠣᠬᠠᠨ ᠤ ᠲᠣᠯᠣᠭᠠᠢ ᠶᠢ ᠠᠪᠤᠭᠰᠠᠨ ᠪᠠᠢᠲᠠᠯᠠ ᠮᠢᠨᠦ ᠰᠣᠨᠣᠰᠴᠤ ᠪᠠᠢᠭᠠ ᠡᠳᠡᠭᠡᠷ ᠶᠠᠪᠤᠳᠠᠯ ᠤᠨ ᠡᠵᠡᠨ ᠨᠢ ᠬᠡᠨ ᠶᠤᠮ ᠪᠤᠢ︖》 ᠭᠡᠳ ᠢᠰᠦ᠋ᠰ ᠢ ᠦᠵᠡᠶᠡ ᠭᠡᠵᠦ ᠪᠠᠢᠯᠠ᠃
10 ᠰᠢᠳᠠᠷ ᠱᠠᠪᠢ ᠨᠠᠷ ᠡᠷᠭᠢᠵᠦ ᠢᠷᠡᠭᠡᠳ ᠬᠢᠭᠰᠡᠨ ᠪᠦᠬᠦᠨ ᠢᠶᠡᠨ ᠢᠰᠦ᠋ᠰ ᠲᠤ ᠳᠤᠭᠤᠯᠭᠠᠪᠠ᠃ ᠢᠰᠦ᠋ᠰ ᠲᠡᠳᠡᠨ ᠢ ᠠᠰ ᠲᠤᠨᠢ ᠳᠠᠭᠠᠭᠤᠯᠵᠤ ᠪᠧᠲ᠋ᠰᠠᠢᠳᠠ ᠬᠡᠮᠡᠬᠦ ᠲᠣᠰᠬᠣᠨ ᠤᠷᠤᠭᠤ ᠣᠳᠴᠠᠢ᠃ 11 ᠲᠡᠭᠡᠬᠦ ᠳᠦ ᠣᠯᠠᠨ ᠬᠥᠮᠦᠨ ᠮᠡᠳᠡᠭᠡᠳ ᠳᠠᠭᠠᠵᠤ ᠢᠷᠡᠭᠰᠡᠨ ᠳᠦ᠂ ᠢᠰᠦ᠋ᠰ ᠲᠡᠳᠡᠨ ᠢ ᠤᠭᠲᠤᠨ ᠠᠪᠴᠤ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠲᠤᠬᠠᠢ ᠶᠠᠷᠢᠵᠤ᠂ ᠡᠳᠡᠭᠡᠭᠡᠬᠦ ᠬᠡᠷᠡᠭ ᠲᠡᠢ ᠬᠥᠮᠦᠰ ᠢ ᠢᠯᠠᠷᠢᠰᠢᠭᠤᠯᠪᠠ᠃
ᠢᠰᠦ᠋ᠰ ᠲᠠᠪᠤᠨ ᠮᠢᠩ᠋ᠭᠠᠨ ᠬᠥᠮᠦᠨ ᠢ ᠬᠣᠭᠣᠯᠠᠯᠠᠭᠤᠯᠤᠭᠰᠠᠨ ᠨᠢ
12 ᠨᠠᠷᠠ ᠬᠡᠯᠪᠡᠢᠬᠦ ᠳᠦ᠂ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠨᠢ ᠲᠡᠭᠦᠨ ᠦ ᠳᠡᠷᠭᠡᠳᠡ ᠣᠴᠢᠵᠤ᠄ 《ᠣᠯᠠᠨ ᠬᠥᠮᠦᠨ ᠢ ᠲᠠᠷᠬᠠᠭᠠᠭᠠᠴᠢ᠂ ᠲᠡᠳᠡ ᠣᠢᠷᠠ ᠬᠠᠪᠢ ᠶᠢᠨ ᠲᠣᠰᠬᠣᠨ ᠰᠠᠭᠤᠷᠢᠨ ᠢᠶᠠᠷ ᠶᠠᠪᠤᠵᠤ᠂ ᠬᠣᠨᠣᠬᠤ ᠭᠠᠵᠠᠷ ᠪᠠ ᠢᠳᠡᠬᠦ ᠶᠠᠭᠤᠮᠠ ᠣᠯᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠂ ᠡ᠊ᠨᠳᠡ ᠴᠢᠨᠢ ᠵᠡᠯᠢᠭᠦᠳ ᠭᠠᠵᠠᠷ ᠪᠠᠢᠨᠠ ᠰᠢᠦ》 ᠭᠡᠪᠡ᠃ 13 ᠢᠰᠦ᠋ᠰ᠄ 《ᠲᠠ ᠨᠠᠷ ᠲᠡᠳᠡᠨ ᠳᠦ ᠢᠳᠡᠬᠦ ᠶᠠᠭᠤᠮᠠ ᠥᠭ》 ᠭᠡᠪᠡᠯ᠂ ᠱᠠᠪᠢ ᠨᠠᠷ ᠨᠢ᠄ 《ᠪᠢᠳᠡᠨ ᠳᠦ ᠵᠥᠪᠬᠡᠨ ᠲᠠᠪᠤᠨ ᠪᠣᠣᠪᠣ᠂ ᠬᠣᠶᠠᠷ ᠵᠢᠭᠠᠰᠤ ᠯᠠ ᠪᠠᠢᠨᠠ᠂ ᠪᠢᠳᠡ ᠶᠠᠪᠤᠵᠤ ᠡᠳᠡᠭᠡᠷ ᠬᠥᠮᠦᠨ ᠦ ᠢᠳᠡᠬᠦ ᠶᠠᠭᠤᠮᠠ ᠶᠢ ᠬᠤᠳᠠᠯᠳᠤᠵᠤ ᠠᠪᠬᠤ ᠠᠴᠠ ᠳᠠ》 ᠭᠡᠯᠡ᠃ 14 ᠲᠡᠨᠳᠡ ᠡᠷᠡᠴᠦᠳ ᠭᠡᠬᠦ ᠳᠦ ᠯᠠ ᠲᠠᠪᠤᠨ ᠮᠢᠩ᠋ᠭᠠᠭᠠᠳ ᠪᠠᠢᠵᠠᠢ᠃ ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠭᠠᠨ᠄ 《ᠲᠡᠳᠡ ᠨᠠᠷ ᠢ ᠲᠠᠪᠢ ᠲᠠᠪᠢ ᠣᠷᠴᠢᠮ ᠢᠶᠠᠷ ᠲᠠᠰᠤᠯᠤᠨ ᠰᠠᠭᠤᠯᠭᠠ》 ᠭᠡᠵᠦ ᠬᠡᠯᠡᠬᠦ ᠳᠦ᠂ 15 ᠱᠠᠪᠢ ᠨᠠᠷ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢ ᠰᠠᠭᠤᠯᠭᠠᠪᠠ᠃ 16 ᠢᠰᠦ᠋ᠰ ᠲᠠᠪᠤᠨ ᠪᠣᠣᠪᠣ᠂ ᠬᠣᠶᠠᠷ ᠵᠢᠭᠠᠰᠤ ᠶᠢ ᠠᠪᠴᠤ ᠲᠩᠷᠢ ᠥᠭᠡᠳᠡ ᠬᠠᠷᠠᠨ ᠢᠷᠥᠭᠡᠭᠡᠳ᠂ ᠲᠡᠳᠡᠭᠡᠷ ᠢ ᠬᠤᠪᠢᠶᠠᠵᠤ ᠱᠠᠪᠢ ᠨᠠᠷ ᠲᠠᠭᠠᠨ ᠥᠭᠭᠥᠨ ᠣᠯᠠᠨ ᠤ ᠡᠮᠦᠨᠡ ᠲᠠᠯᠪᠢᠭᠤᠯᠪᠠ᠃ 17 ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠳᠡᠵᠦ ᠴᠠᠳᠤᠯᠠ᠃ ᠱᠠᠪᠢ ᠨᠠᠷ ᠦᠯᠡᠳᠡᠪᠦᠷᠢ ᠶᠢ ᠴᠤᠭᠯᠠᠭᠤᠯᠬᠤ ᠳᠤ᠂ ᠠᠷᠪᠠᠨ ᠬᠣᠶᠠᠷ ᠰᠠᠭᠰᠤ ᠳᠦᠭᠦᠷᠴᠡᠢ᠃
ᠫᠧᠲ᠋ᠧᠷ ᠢᠰᠦ᠋ᠰ ᠢ ᠠᠪᠤᠷᠠᠭᠴᠢ ᠭᠡᠵᠦ ᠢᠯᠡᠷᠬᠡᠶᠢᠯᠡᠭᠰᠡᠨ ᠨᠢ
18 ᠨᠢᠭᠡᠨ ᠡᠳᠦᠷ ᠢᠰᠦ᠋ᠰ ᠭᠠᠭᠴᠠᠭᠠᠷ ᠢᠶᠠᠨ ᠳᠠᠭᠠᠳᠬᠠᠵᠤ ᠪᠠᠢᠭᠰᠠᠨ ᠢᠶᠠᠨ ᠴᠤᠭ ᠪᠠᠢᠭᠰᠠᠨ ᠱᠠᠪᠢ ᠨᠠᠷ ᠠᠴᠠ ᠪᠠᠨ᠄ 《ᠣᠯᠠᠨ ᠬᠥᠮᠦᠨ ᠨᠠᠮᠠᠶᠢ ᠬᠡᠨ ᠭᠡᠵᠦ ᠶᠠᠷᠢᠵᠤ ᠪᠠᠢᠨᠠ︖》 ᠬᠡᠮᠡᠨ ᠠᠰᠠᠭᠤᠬᠤ ᠳᠤ᠂ 19 ᠲᠡᠳᠡ᠄ 《ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠭᠡᠳᠡᠭ᠃ ᠵᠠᠷᠢᠮ ᠨᠢ ᠧᠯᠢᠶᠠ ᠭᠡᠳᠡᠭ᠂ ᠪᠠᠰᠠ ᠵᠠᠷᠢᠮ ᠨᠢ ᠡᠷᠲᠡᠨ ᠦ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠨᠢᠭᠡ ᠨᠢ ᠠᠮᠢᠯᠠᠭᠰᠠᠨ ᠭᠡᠵᠡᠭᠡᠵᠦ ᠪᠠᠢᠨᠠ》 ᠭᠡᠪᠡ᠃ 20 ᠢᠰᠦ᠋ᠰ᠄ 《ᠬᠠᠷᠢᠨ ᠲᠠ ᠨᠠᠷ ᠨᠠᠮᠠᠶᠢ ᠬᠡᠨ ᠭᠡᠵᠦ ᠶᠠᠷᠢᠳᠠᠭ ᠪᠤᠢ︖》 ᠭᠡᠬᠦ ᠳᠦ᠂ ᠫᠧᠲ᠋ᠧᠷ ᠬᠠᠷᠢᠭᠤ ᠳᠤᠨᠢ᠄ 《ᠪᠤᠷᠬᠠᠨ ᠤ ᠾᠷᠢᠰᠲ᠋ᠣᠰ》 ᠭᠡᠯᠡ᠃
21 ᠢᠰᠦ᠋ᠰ᠄ 《ᠡᠭᠦᠨ ᠢ ᠬᠡᠨ ᠳᠦ ᠴᠤ ᠪᠦᠦ ᠬᠡᠯᠡ》 ᠭᠡᠵᠦ ᠲᠡᠳᠡᠨ ᠳᠦ ᠴᠢᠩᠭ᠍ᠠ ᠵᠠᠬᠢᠵᠠᠢ᠃ 22 ᠲᠡᠷᠡ ᠪᠠᠰᠠ᠄ 《ᠬᠥᠮᠦᠨ ᠦ ᠬᠦᠦ ᠯᠠᠪᠲᠠᠢ ᠣᠯᠠᠨ ᠵᠣᠪᠠᠯᠠᠩ ᠠᠮᠰᠠᠵᠤ ᠠᠬᠠᠯᠠᠭᠴᠢᠳ᠂ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠠ ᠪᠢᠴᠢᠭᠲᠡᠳ ᠲᠦ ᠭᠠᠳᠠᠭᠤᠷᠴᠢᠯᠠᠭᠳᠠᠨ ᠠᠯᠠᠭᠳᠠᠭᠠᠳ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠲᠡᠭᠡᠨ ᠠᠮᠢᠯᠠᠬᠤ ᠶᠣᠰᠣᠲᠠᠢ》 ᠭᠡᠪᠡ᠃
23 ᠢᠰᠦ᠋ᠰ ᠲᠡᠳᠡ ᠪᠦᠬᠦᠨ ᠳᠦ᠄ 《ᠬᠡᠨ ᠨᠠᠮᠠᠶᠢ ᠳᠠᠭᠠᠶᠠ ᠭᠡᠪᠡᠯ᠂ ᠥᠪᠡᠷ ᠢ ᠪᠠᠨ ᠣᠭᠣᠷᠴᠤ ᠡᠳᠦᠷ ᠪᠦᠷᠢ ᠵᠠᠭᠠᠯᠮᠠᠢ ᠪᠠᠨ ᠡᠭᠦᠷᠴᠦ ᠨᠠᠮᠠᠶᠢ ᠳᠠᠭᠠ᠃ 24 ᠤᠴᠢᠷ ᠨᠢ᠂ ᠠᠮᠢ ᠪᠠᠨ ᠠᠪᠤᠷᠠᠶᠠ ᠭᠡᠭᠴᠢ ᠨᠢ ᠠᠮᠢ ᠪᠠᠨ ᠠᠯᠳᠠᠨᠠ᠃ ᠮᠢᠨᠦ ᠲᠥᠯᠥᠭᠡ ᠠᠮᠢ ᠪᠠᠨ ᠠᠯᠳᠠᠭᠴᠢ ᠨᠢ ᠠᠮᠢ ᠪᠠᠨ ᠠᠪᠤᠷᠠᠨᠠ᠃ 25 ᠬᠥᠮᠦᠨ ᠪᠦᠬᠦ ᠳᠡᠯᠡᠬᠡᠢ ᠶᠢ ᠣᠯᠵᠤ ᠠᠪᠤᠭᠰᠠᠨ ᠴᠤ ᠥᠪᠡᠷ ᠢ ᠪᠠᠨ ᠠᠯᠳᠠᠵᠤ᠂ ᠬᠣᠬᠢᠷᠠᠭᠤᠯᠪᠠᠯ ᠶᠠᠭᠤᠨ ᠤ ᠠᠰᠢᠭ ᠪᠠᠢᠬᠤ ᠪᠢᠯᠡ︖ 26 ᠬᠡᠨ ᠨᠢ ᠨᠠᠳᠠ ᠠᠴᠠ ᠪᠠ ᠮᠢᠨᠦ ᠦᠭᠡ ᠡᠴᠡ ᠢᠴᠢᠪᠡᠯ᠂ ᠬᠥᠮᠦᠨ ᠦ ᠬᠦᠦ ᠥᠪᠡᠷ ᠦᠨ ᠢᠶᠠᠨ ᠵᠢᠪᠬᠤᠯᠠᠩ᠂ ᠮᠥᠨ ᠡᠴᠢᠭᠡ ᠶᠢᠨ ᠢᠶᠠᠨ ᠪᠠ ᠲᠩᠷᠢ ᠶᠢᠨ ᠠᠷᠢᠭᠤᠨ ᠡᠯᠴᠢᠳ ᠤᠨ ᠵᠢᠪᠬᠤᠯᠠᠩ ᠢᠶᠠᠷ ᠢᠷᠡᠬᠦ ᠳᠡᠭᠡᠨ ᠲᠡᠭᠦᠨ ᠡᠴᠡ ᠢᠴᠢᠬᠦ ᠪᠣᠯᠣᠨᠠ᠃ 27 ᠪᠢ ᠲᠠ ᠨᠠᠷ ᠲᠤ ᠦᠨᠡᠨ ᠢ ᠶᠠᠷᠢᠶᠠ᠂ ᠡ᠊ᠨᠳᠡ ᠵᠣᠭᠰᠣᠵᠤ ᠪᠤᠢ ᠬᠥᠮᠦᠰ ᠦᠨ ᠵᠠᠷᠢᠮ ᠨᠢ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠦᠵᠡᠬᠦ ᠡᠴᠡ ᠨᠠᠰᠢ ᠦᠬᠦᠯ ᠢ ᠦᠯᠦ ᠠᠮᠰᠠᠨᠠ》 ᠭᠡᠪᠡ᠃
ᠢᠰᠦ᠋ᠰ ᠤᠨ ᠲᠥᠷᠬᠥ ᠬᠤᠪᠢᠷᠠᠭᠰᠠᠨ ᠨᠢ
28 ᠢᠩᠭᠢᠵᠦ ᠬᠡᠯᠡᠭᠰᠡᠨ ᠦ ᠳᠠᠷᠠᠭᠠ᠂ ᠪᠠᠷᠤᠭ ᠨᠠᠢ᠌ᠮᠠ ᠬᠣᠨᠣᠭᠠᠳ ᠢᠰᠦ᠋ᠰ ᠫᠧᠲ᠋ᠧᠷ᠂ ᠶᠣᠬᠠᠨ᠂ ᠶᠠᠺᠣᠪ ᠢ ᠳᠠᠭᠠᠭᠤᠯᠤᠨ ᠳᠠᠭᠠᠳᠬᠠᠬᠤ ᠪᠠᠷ ᠠᠭᠤᠯᠠᠨ ᠳᠡᠭᠡᠷᠡ ᠭᠠᠷᠤᠯᠠ᠃ 29 ᠲᠡᠷᠡ ᠳᠠᠭᠠᠳᠬᠠᠵᠤ ᠪᠠᠢᠬᠤ ᠳᠤ ᠨᠢᠭᠤᠷ ᠤᠨ ᠬᠢᠨᠢ ᠲᠥᠷᠬᠥ ᠥᠭᠡᠷᠡᠴᠢᠯᠡᠭᠳᠡᠵᠦ᠂ ᠬᠤᠪᠴᠠᠰᠤ ᠨᠢ ᠴᠠᠪ ᠴᠠᠭᠠᠨ ᠪᠣᠯᠵᠤ ᠨᠢᠳᠦ ᠭᠢᠯᠪᠠᠭᠤᠯᠤᠨ ᠭᠡᠷᠡᠯᠲᠦᠵᠦ ᠪᠠᠢᠯᠠ᠃ 30 ᠠᠩ᠋ᠬᠠᠷᠤᠭᠲᠤᠨ᠂ ᠬᠣᠶᠠᠷ ᠬᠥᠮᠦᠨ ᠢᠰᠦ᠋ᠰ ᠲᠠᠢ ᠶᠠᠷᠢᠯᠴᠠᠨᠠ᠃ ᠲᠡᠳᠡ ᠪᠣᠯ ᠮᠣᠰᠧ ᠪᠠ ᠧᠯᠢᠶᠠ ᠠᠵᠢ᠃ 31 ᠲᠡᠳᠡ ᠠᠯᠳᠠᠷ ᠰᠤᠤ ᠲᠠᠢ ᠢᠯᠡᠷᠡᠵᠦ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠢᠰᠦ᠋ᠰ ᠤᠨ ᠤᠳᠠᠯ ᠦᠭᠡᠢ ᠪᠡᠶᠡᠯᠡᠭᠦᠯᠬᠦ ᠦᠬᠦᠯ ᠦᠨ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠪᠠᠢᠵᠠᠢ᠃ 32 ᠫᠧᠲ᠋ᠧᠷ ᠪᠣᠯᠣᠨ ᠬᠠᠮᠲᠤ ᠪᠠᠢᠭᠰᠠᠳ ᠨᠢ ᠨᠣᠢᠷ ᠲᠠᠭᠠᠨ ᠳᠡᠢᠯᠳᠡᠵᠦ ᠪᠠᠢᠭᠰᠠᠨ ᠢᠶᠠᠨ ᠰᠡᠷᠢᠵᠡᠭᠡᠵᠦ᠂ ᠢᠰᠦ᠋ᠰ ᠤᠨ ᠠᠯᠳᠠᠷ ᠰᠤᠤ ᠬᠢᠭᠡᠳ ᠲᠡᠭᠦᠨ ᠲᠡᠢ ᠵᠣᠭᠰᠣᠵᠤ ᠪᠤᠢ ᠬᠣᠶᠠᠷ ᠬᠥᠮᠦᠨ ᠢ ᠦᠵᠡᠯᠡ᠃ 33 ᠲᠡᠷᠡ ᠬᠣᠶᠠᠷ ᠢᠰᠦ᠋ᠰ ᠡᠴᠡ ᠰᠠᠯᠵᠤ ᠶᠠᠪᠤᠬᠤ ᠳᠤ᠂ ᠫᠧᠲ᠋ᠧᠷ ᠢᠰᠦ᠋ᠰ ᠲᠤ᠄ 《ᠪᠠᠭᠰᠢ ᠡ᠂ ᠪᠢᠳᠡᠨ ᠦ ᠡ᠊ᠨᠳᠡ ᠪᠠᠢᠬᠤ ᠨᠢ ᠰᠠᠢᠨ᠂ ᠪᠢᠳᠡ ᠭᠤᠷᠪᠠᠨ ᠮᠠᠢᠬᠠᠨ ᠪᠣᠰᠬᠠᠵᠤ᠂ ᠨᠢᠭᠡ ᠶᠢ ᠨᠢ ᠲᠠᠨ ᠳᠤ᠂ ᠨᠢᠭᠡ ᠶᠢ ᠨᠢ ᠮᠣᠰᠧ ᠳᠤ᠂ ᠨᠢᠭᠡ ᠶᠢ ᠨᠢ ᠧᠯᠢᠶᠠ ᠳᠤ ᠥᠭᠭᠥᠶᠡ》 ᠭᠡᠪᠡ᠃ ᠲᠡᠷᠡ ᠶᠠᠭᠤ ᠶᠠᠷᠢᠵᠤ ᠪᠠᠢᠭᠠ ᠪᠠᠨ ᠥᠪᠡᠷ ᠢᠶᠡᠨ ᠴᠤ ᠮᠡᠳᠡᠭᠰᠡᠨ ᠦᠭᠡᠢ᠃ 34 ᠢᠩᠭᠢᠵᠦ ᠶᠠᠷᠢᠵᠤ ᠪᠠᠢᠲᠠᠯᠠ ᠡᠭᠦᠯᠡ ᠭᠠᠷᠴᠤ ᠲᠡᠳᠡᠨ ᠢ ᠪᠦᠷᠬᠦᠵᠦ ᠡᠬᠢᠯᠡᠪᠡ᠃ ᠲᠡᠳᠡ ᠡᠭᠦᠯᠡᠨ ᠳᠦ ᠣᠷᠣᠬᠤ ᠳᠠᠭᠠᠨ ᠠᠢᠳᠠᠰ ᠲᠤ ᠠᠪᠲᠠᠪᠠ᠃ 35 ᠡᠭᠦᠯᠡᠨ ᠡᠴᠡ ᠳᠠᠭᠤ ᠭᠠᠷᠴᠤ᠄ 《ᠡᠨᠡ ᠪᠣᠯ ᠮᠢᠨᠦ ᠬᠦᠦ᠂ ᠮᠢᠨᠦ ᠰᠣᠩ᠋ᠭᠣᠭᠰᠠᠨ ᠨᠢᠭᠡᠨ ᠮᠥᠨ᠃ ᠲᠠ ᠨᠠᠷ ᠲᠡᠭᠦᠨ ᠦ ᠬᠢ ᠶᠢ ᠰᠣᠨᠣᠰᠣᠭᠲᠤᠨ》 ᠭᠡᠪᠡ᠃ 36 ᠲᠡᠷᠡ ᠳᠠᠭᠤ ᠭᠠᠷᠤᠭᠰᠠᠨ ᠤ ᠳᠠᠷᠠᠭᠠ᠂ ᠢᠰᠦ᠋ᠰ ᠭᠠᠭᠴᠠᠭᠠᠷ ᠢᠶᠠᠨ ᠬᠠᠷᠠᠭᠳᠠᠪᠠ᠃ ᠲᠡᠳᠡ ᠬᠠᠷᠠᠭᠰᠠᠨ ᠢᠶᠠᠨ ᠲᠡᠳᠡᠭᠡᠷ ᠡᠳᠦᠷ ᠲᠦ ᠬᠡᠨ ᠳᠦ ᠴᠤ ᠶᠠᠷᠢᠯ ᠦᠭᠡᠢ ᠪᠠᠢᠭᠰᠠᠨ ᠪᠢᠯᠡ᠃
37 ᠳᠠᠷᠠᠭᠠ ᠡᠳᠦᠷ ᠨᠢ ᠲᠡᠳᠡ ᠠᠭᠤᠯᠠᠨ ᠠᠴᠠ ᠪᠠᠭᠤᠬᠤ ᠳᠤ᠂ ᠦᠯᠡᠮᠵᠢ ᠣᠯᠠᠨ ᠬᠥᠮᠦᠨ ᠢᠰᠦ᠋ᠰ ᠢ ᠤᠭᠲᠤᠪᠠ᠃ 38 ᠣᠯᠠᠨ ᠤ ᠳᠤᠮᠳᠠ ᠠᠴᠠ ᠨᠢᠭᠡᠨ ᠡᠷᠡ ᠬᠠᠰᠬᠢᠷᠴᠤ᠄ 《ᠪᠠᠭᠰᠢ ᠡ᠂ ᠪᠢ ᠲᠠᠨ ᠠᠴᠠ ᠭᠤᠶᠤᠶᠠ᠃ ᠬᠦᠦ ᠶᠢ ᠮᠢᠨᠢ ᠦᠵᠡᠭᠡᠳ ᠥᠭᠭᠥᠨᠡ ᠤᠤ︖ ᠲᠡᠷᠡ ᠮᠢᠨᠦ ᠭᠠᠭᠴᠠ ᠬᠦᠦ ᠪᠢᠯᠡ᠃ 39 ᠴᠢᠳᠬᠥᠷ ᠬᠦᠦ ᠶᠢ ᠮᠢᠨᠢ ᠡᠵᠡᠮᠳᠡᠬᠦ ᠳᠦ᠂ ᠲᠡᠷᠡ ᠭᠡᠨᠡᠳᠲᠡ ᠣᠷᠢᠯᠠᠳᠠᠭ᠃ ᠴᠢᠳᠬᠥᠷ ᠲᠡᠭᠦᠨ ᠢ ᠲᠠᠲᠠᠪᠠᠯᠵᠠᠭᠤᠯᠤᠨ ᠠᠮᠠᠨ ᠠᠴᠠ ᠨᠢ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠵᠤ᠂ ᠶᠡᠷᠦ ᠰᠠᠯᠬᠤ ᠦᠭᠡᠢ ᠪᠠᠷ ᠲᠡᠭᠦᠨ ᠢ ᠲᠠᠷᠴᠢᠯᠠᠭᠠᠵᠤ ᠪᠠᠢᠳᠠᠭ᠃ 40 ᠪᠢ ᠲᠠᠨ ᠤ ᠱᠠᠪᠢ ᠨᠠᠷ ᠠᠴᠠ 〈ᠴᠢᠳᠬᠥᠷ ᠢ ᠵᠠᠢᠯᠠᠭᠤᠯᠤᠭᠠᠴᠢ〉 ᠭᠡᠵᠦ ᠭᠤᠶᠤᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠴᠢᠳᠠᠭᠰᠠᠨ ᠦᠭᠡᠢ》 ᠭᠡᠬᠦ ᠳᠦ᠂ 41 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠢᠲᠡᠭᠡᠯ ᠦᠭᠡᠢ ᠭᠠᠵᠢᠭᠰᠠᠨ ᠦᠶᠡ ᠶᠢᠨ ᠬᠢᠨ ᠡ᠂ ᠪᠢ ᠲᠠ ᠨᠠᠷ ᠲᠠᠢ ᠬᠡᠳᠦᠢ ᠤᠳᠠᠭᠠᠨ ᠬᠠᠮᠲᠤ ᠪᠠᠢᠵᠤ᠂ ᠲᠠ ᠨᠠᠷ ᠢ ᠲᠡᠰᠪᠦᠷᠢᠯᠡᠬᠦ ᠪᠢᠯᠡ︖ ᠬᠦᠦ ᠪᠡᠨ ᠡ᠊ᠨᠳᠡ ᠠᠪᠴᠢᠷᠠ》 ᠭᠡᠪᠡ᠃ 42 ᠬᠦᠦ ᠢᠷᠡᠬᠦ ᠳᠦᠨᠢ ᠴᠢᠳᠬᠥᠷ ᠲᠡᠭᠦᠨ ᠢ ᠭᠠᠵᠠᠷ ᠲᠤ ᠤᠨᠠᠭᠠᠵᠤ ᠲᠠᠲᠠᠪᠠᠯᠵᠠᠭᠤᠯᠵᠠᠢ᠃ ᠢᠰᠦ᠋ᠰ ᠪᠤᠵᠠᠷ ᠴᠢᠳᠬᠥᠷ ᠢ ᠵᠢᠮᠡᠯᠡᠭᠡᠳ ᠬᠦᠦ ᠶᠢ ᠡᠳᠡᠭᠡᠭᠡᠵᠦ᠂ ᠡᠴᠢᠭᠡ ᠳᠦᠨᠢ ᠪᠤᠴᠠᠭᠠᠨ ᠥᠭᠭᠥᠯᠡ᠃ 43 ᠪᠤᠷᠬᠠᠨ ᠤ ᠠᠭᠤᠤ ᠶᠢ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢᠶᠡᠨ ᠬᠠᠴᠢᠷᠬᠠᠵᠤ ᠪᠠᠢᠯᠠ᠃
44 《ᠲᠠ ᠨᠠᠷ ᠡᠨᠡ ᠦᠭᠡ ᠶᠢ ᠴᠢᠬᠢᠨ ᠳᠡᠭᠡᠨ ᠰᠢᠩ᠋ᠭᠡᠭᠡ᠃ ᠬᠥᠮᠦᠨ ᠦ ᠬᠦᠦ ᠬᠥᠮᠦᠰ ᠦᠨ ᠭᠠᠷ ᠲᠤ ᠲᠤᠰᠢᠶᠠᠭᠳᠠᠬᠤ ᠪᠣᠯᠣᠨᠠ》 ᠭᠡᠪᠡ᠃ 45 ᠲᠡᠳᠡ ᠡᠨᠡ ᠦᠭᠡ ᠶᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ ᠤᠳᠬᠠ ᠨᠢ ᠳᠠᠯᠳᠠᠯᠠᠭᠳᠠᠭᠰᠠᠨ ᠲᠤᠯᠠ ᠤᠬᠠᠭᠠᠷᠠᠭᠰᠠᠨ ᠦᠭᠡᠢ ᠠᠵᠢ᠃ ᠲᠡᠳᠡ ᠡᠨᠡ ᠦᠭᠡ ᠶᠢᠨ ᠲᠤᠬᠠᠢ ᠠᠰᠠᠭᠤᠬᠤ ᠠᠴᠠ ᠪᠠᠨ ᠴᠤ ᠠᠶᠤᠵᠤ ᠪᠠᠢᠯᠠ᠃
ᠬᠡᠨ ᠨᠢ ᠠᠭᠤᠤ ᠪᠣᠯᠬᠤ ᠪᠤᠢ
46 ᠱᠠᠪᠢ ᠨᠠᠷ ᠤᠨ ᠳᠤᠮᠳᠠ ᠬᠡᠨ ᠨᠢ ᠬᠠᠮᠤᠭ ᠤᠨ ᠠᠭᠤᠤ ᠪᠣᠯᠬᠤ ᠲᠤᠬᠠᠢ ᠮᠠᠷᠭᠤᠭᠠᠨ ᠭᠠᠷᠴᠠᠢ᠃ 47 ᠢᠰᠦ᠋ᠰ ᠲᠡᠳᠡᠨ ᠦ ᠰᠡᠳᠬᠢᠯ ᠤᠨ ᠳᠣᠲᠣᠷᠠᠬᠢ ᠮᠠᠷᠭᠤᠭᠠᠨ ᠢ ᠠᠩᠵᠠᠭᠠᠷᠠᠵᠤ ᠨᠢᠭᠡ ᠬᠡᠦᠬᠡᠳ ᠢ ᠠᠪᠴᠢᠷᠠᠨ ᠳᠡᠷᠭᠡᠳᠡ ᠪᠡᠨ ᠵᠣᠭᠰᠣᠭᠠᠭᠠᠳ ᠲᠡᠳᠡᠨ ᠳᠦ᠄ 48 《ᠬᠡᠨ ᠡᠨᠡ ᠬᠡᠦᠬᠡᠳ ᠢ ᠮᠢᠨᠦ ᠨᠡᠷᠡ ᠪᠡᠷ ᠬᠦᠯᠢᠶᠡᠨ ᠠᠪᠤᠪᠠᠯ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠬᠤ ᠶᠤᠮ᠂ ᠬᠡᠨ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠤᠪᠠᠯ᠂ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠲᠡᠭᠦᠨ ᠢ ᠬᠦᠯᠢᠶᠡᠨ ᠠᠪᠬᠤ ᠶᠤᠮ᠃ ᠲᠠ ᠨᠠᠷ ᠤᠨ ᠳᠤᠮᠳᠠᠬᠢ ᠬᠠᠮᠤᠭ ᠤᠨ ᠥᠴᠦᠬᠡᠨ ᠨᠢ ᠬᠠᠮᠤᠭ ᠤᠨ ᠶᠡᠬᠡ ᠪᠣᠯᠠᠢ》 ᠭᠡᠪᠡ᠃
49 ᠶᠣᠬᠠᠨ᠄ 《ᠪᠠᠭᠰᠢ ᠡ᠂ ᠲᠠᠨ ᠤ ᠨᠡᠷᠡ ᠪᠡᠷ ᠴᠢᠳᠬᠥᠷ ᠬᠥᠭᠡᠭᠡᠵᠦ ᠪᠠᠢᠭᠠ ᠨᠢᠭᠡ ᠬᠥᠮᠦᠨ ᠢ ᠪᠢᠳᠡ ᠬᠠᠷᠠᠯᠠ᠃ ᠬᠠᠷᠢᠨ ᠲᠡᠷᠡ ᠪᠢᠳᠡᠨ ᠲᠡᠢ ᠬᠠᠮᠲᠤ ᠲᠠᠨ ᠢ ᠳᠠᠭᠠᠳᠠᠭ ᠬᠥᠮᠦᠨ ᠪᠢᠰᠢ ᠪᠣᠯᠬᠣᠷ ᠪᠢᠳᠡ ᠬᠣᠷᠢᠭᠯᠠᠭᠰᠠᠨ》 ᠭᠡᠵᠦ ᠬᠡᠯᠡᠬᠦ ᠳᠦ᠂ 50 ᠢᠰᠦ᠋ᠰ᠄ 《ᠪᠦᠦ ᠬᠣᠷᠢᠭᠯᠠ᠃ ᠲᠠ ᠨᠠᠷ ᠢ ᠡᠰᠡᠷᠭᠦᠴᠡᠳᠡᠭ ᠦᠭᠡᠢ ᠬᠥᠮᠦᠨ ᠲᠠ ᠨᠠᠷ ᠤᠨ ᠲᠠᠯᠠ ᠳᠤ ᠪᠠᠢᠳᠠᠭ》 ᠭᠡᠪᠡ᠃
51 ᠳᠡᠭᠡᠭᠰᠢ ᠠᠪᠠᠴᠢᠭᠳᠠᠬᠤ ᠦᠶᠡ ᠣᠢᠷᠠᠲᠤᠭᠰᠠᠨ ᠳᠤ᠂ ᠢᠰᠦ᠋ᠰ ᠶᠧᠷᠦ᠋ᠰᠠᠯᠧᠮ ᠳᠤ ᠣᠴᠢᠬᠤ ᠪᠠᠷ ᠰᠡᠳᠬᠢᠯ ᠰᠢᠭᠤᠳᠤᠭᠠᠳ᠂ 52 ᠥᠪᠡᠷ ᠡᠴᠡ ᠪᠡᠨ ᠤᠷᠢᠲᠠᠵᠤ ᠡᠯᠴᠢᠳ ᠢᠶᠠᠨ ᠢᠯᠡᠭᠡᠪᠡ᠃ ᠲᠡᠳᠡ ᠶᠠᠪᠤᠵᠤ ᠰᠠᠮᠠᠷᠢᠶᠠᠴᠤᠳ ᠤᠨ ᠲᠣᠰᠬᠣᠨ ᠳᠤ ᠣᠷᠣᠭᠠᠳ ᠢᠰᠦ᠋ᠰ ᠤᠨ ᠲᠥᠯᠥᠭᠡ ᠪᠡᠯᠡᠳᠬᠡᠯ ᠬᠢᠬᠦ ᠭᠡᠰᠡᠨ ᠳᠦ᠂ 53 ᠲᠡᠨᠳᠡᠬᠢ ᠶᠢᠨ ᠬᠢᠨ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ᠂ ᠢᠰᠦ᠋ᠰ ᠶᠧᠷᠦ᠋ᠰᠠᠯᠧᠮ ᠢ ᠴᠢᠭᠯᠡᠵᠦ ᠪᠠᠢᠪᠠ᠃ 54 ᠱᠠᠪᠢ ᠶᠠᠺᠣᠪ᠂ ᠶᠣᠬᠠᠨ ᠡᠭᠦᠨ ᠢ ᠬᠠᠷᠠᠭᠠᠳ᠄ 《ᠡᠵᠡᠨ ᠡ᠂ ᠲᠩᠷᠢ ᠡᠴᠡ ᠭᠠᠯ ᠪᠠᠭᠤᠵᠤ ᠲᠡᠳᠡᠨ ᠢ ᠰᠥᠨᠥᠭᠡ ᠭᠡᠵᠦ ᠵᠠᠷᠯᠢᠭᠳᠠᠵᠤ ᠪᠣᠯᠬᠤ ᠤᠤ︖》 ᠭᠡᠰᠡᠨ ᠳᠦ᠂ 55 ᠢᠰᠦ᠋ᠰ ᠡᠷᠭᠢᠵᠦ ᠬᠠᠷᠠᠭᠠᠳ ᠲᠡᠳᠡᠨ ᠢ ᠵᠢᠮᠡᠯᠡᠪᠡ᠃ 56 ᠲᠡᠳᠡ ᠥᠭᠡᠷᠡ ᠲᠣᠰᠬᠣᠨ ᠤᠷᠤᠭᠤ ᠶᠠᠪᠤᠵᠠᠭᠠᠯᠠ᠃
ᠱᠠᠪᠢ ᠪᠣᠯᠬᠤ ᠬᠢᠷᠢ ᠭᠡᠮ
57 ᠲᠡᠳᠡ ᠵᠠᠮ ᠶᠠᠪᠤᠵᠤ ᠪᠠᠢᠬᠤ ᠳᠤ᠂ ᠨᠢᠭᠡ ᠨᠢ ᠢᠰᠦ᠋ᠰ ᠲᠤ᠄ 《ᠲᠠ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠴᠤ ᠪᠢ ᠲᠠᠨ ᠢ ᠳᠠᠭᠠᠶᠠ》 ᠭᠡᠬᠦ ᠳᠦ᠂ 58 ᠲᠡᠷᠡ᠄ 《ᠦᠨᠡᠭᠡᠨ ᠳᠦ ᠨᠦᠬᠡ ᠲᠠᠢ᠂ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠨ ᠳᠤ ᠡᠭᠦᠷ ᠲᠡᠢ᠂ ᠬᠠᠷᠢᠨ ᠬᠥᠮᠦᠨ ᠦ ᠬᠦᠦ ᠳᠦ ᠳᠡᠷᠡᠯᠡᠬᠦ ᠭᠠᠵᠠᠷ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠬᠡᠯᠡᠪᠡ᠃ 59 ᠢᠰᠦ᠋ᠰ ᠥᠭᠡᠷᠡ ᠨᠢᠭᠡᠨ ᠳᠦᠨᠢ᠄ 《ᠨᠠᠮᠠᠶᠢ ᠳᠠᠭᠠ》 ᠭᠡᠬᠦ ᠳᠦ᠂ ᠲᠡᠷᠡ ᠬᠥᠮᠦᠨ᠄ 《ᠡᠵᠡᠨ ᠡ᠂ ᠤᠷᠢᠳᠠᠪᠠᠷ ᠠᠪᠤ ᠪᠠᠨ ᠣᠷᠣᠰᠢᠭᠤᠯᠬᠤ ᠪᠠᠷ ᠶᠠᠪᠤᠬᠤ ᠶᠢ ᠮᠢᠨᠢ ᠵᠥᠪᠰᠢᠶᠡᠷᠡᠭᠡᠴᠢ 12 》 ᠭᠡᠰᠡᠨ ᠳᠦ᠂ 60 ᠢᠰᠦ᠋ᠰ᠄ 《ᠦᠬᠦᠭᠰᠡᠳ ᠢ ᠦᠬᠦᠭᠰᠡᠳ ᠨᠢ ᠣᠷᠣᠰᠢᠭᠤᠯᠤᠭ᠃ ᠬᠠᠷᠢᠨ ᠴᠢ ᠶᠠᠪᠤ︕ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠳᠡᠯᠭᠡᠷᠡᠭᠦᠯᠦᠭᠲᠦᠨ》 ᠭᠡᠪᠡ᠃ 61 ᠪᠠᠰᠠ ᠥᠭᠡᠷᠡ ᠬᠥᠮᠦᠨ᠄ 《ᠪᠢ ᠲᠠᠨ ᠢ ᠳᠠᠭᠠᠨᠠ᠂ ᠡᠵᠡᠨ ᠡ᠂ ᠬᠠᠷᠢᠨ ᠶᠠᠭᠤᠨ ᠤ ᠡᠮᠦᠨᠡ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠮᠠᠨ ᠤ ᠬᠢᠨ ᠲᠠᠢ ᠪᠠᠨ ᠰᠠᠯᠬᠤ ᠶᠣᠰᠣ ᠭᠦᠢᠴᠡᠳᠬᠡᠬᠦ ᠶᠢ ᠮᠢᠨᠢ ᠵᠥᠪᠰᠢᠶᠡᠷᠡᠭᠡᠴᠢ》 ᠭᠡᠬᠦ ᠳᠦ᠂ 62 ᠢᠰᠦ᠋ᠰ᠄ 《ᠠᠨᠵᠢᠰᠤ ᠪᠠᠨ ᠪᠠᠷᠢᠵᠤ ᠠᠷᠤᠨᠰᠢ ᠪᠠᠨ ᠬᠠᠷᠠᠳᠠᠭ ᠬᠥᠮᠦᠨ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠲᠡᠩᠴᠡᠬᠦ ᠦᠭᠡᠢ》 ᠭᠡᠵᠡᠢ᠃