ᠯᠦᠺ ᠳᠥᠷᠪᠡ
ᠢᠰᠦ᠋ᠰ ᠲᠡᠩᠰᠡᠭᠳᠡᠭᠰᠡᠨ ᠨᠢ
1 ᠢᠰᠦ᠋ᠰ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠴᠦ᠂ ᠶᠣᠷᠳᠠᠨ ᠭᠣᠣᠯ ᠠᠴᠠ ᠪᠤᠴᠠᠵᠤ ᠴᠥᠯ ᠳᠤ ᠠᠷᠢᠭᠤᠨ ᠰᠦᠨᠡᠰᠦᠨ ᠳᠦ ᠬᠥᠲᠥᠯᠥᠭᠳᠡᠨ 2 ᠳᠥᠴᠢᠨ ᠬᠣᠨᠣᠭ ᠰᠠᠲ᠋ᠠᠨ ᠳᠤ ᠲᠡᠩᠰᠡᠭᠳᠡᠵᠡᠢ᠃ ᠲᠡᠷᠡ ᠦᠶᠡ ᠳᠦ ᠶᠠᠭᠤ ᠴᠤ ᠢᠳᠡᠭᠰᠡᠨ ᠦᠭᠡᠢ ᠲᠤᠯᠠ ᠴᠠᠭ ᠨᠢ ᠭᠦᠢᠴᠡᠬᠦ ᠳᠦ ᠲᠡᠷᠡ ᠥᠯᠥᠰᠥᠭᠰᠡᠨ ᠪᠠᠢᠯᠠ᠃ 3 ᠰᠠᠲ᠋ᠠᠨ ᠲᠡᠭᠦᠨ ᠳᠦ᠄ 《ᠴᠢ ᠪᠤᠷᠬᠠᠨ ᠤ ᠬᠦᠦ ᠮᠥᠨ ᠪᠣᠯ ᠡᠨᠡ ᠴᠢᠯᠠᠭᠤᠨ ᠳᠤ 〈ᠪᠣᠣᠪᠣ ᠪᠣᠯ〉 ᠭᠡᠵᠦ ᠬᠡᠯᠡ ᠳᠠ》 ᠭᠡᠬᠦ ᠳᠦ᠂ 4 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《〈ᠬᠥᠮᠦᠨ ᠵᠥᠪᠬᠡᠨ ᠪᠣᠣᠪᠣ ᠪᠠᠷ ᠠᠮᠢᠳᠤᠷᠠᠬᠤ ᠪᠢᠰᠢ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ》 ᠭᠡᠯᠡ᠃
5 ᠰᠠᠲ᠋ᠠᠨ ᠪᠠᠰᠠ ᠢᠰᠦ᠋ᠰ ᠢ ᠥᠨᠳᠥᠷ ᠭᠠᠵᠠᠷ ᠲᠤ ᠠᠪᠠᠴᠢᠵᠤ᠂ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠳᠡᠯᠡᠬᠡᠢ ᠶᠢᠨ ᠬᠠᠮᠤᠭ ᠤᠯᠤᠰ ᠢ ᠦᠵᠡᠭᠦᠯᠦᠭᠡᠳ᠄ 6 《ᠡᠨᠡ ᠪᠦᠬᠦ ᠡᠷᠬᠡ ᠮᠡᠳᠡᠯ᠂ ᠲᠡᠳᠡᠨ ᠦ ᠰᠦᠷ ᠵᠢᠪᠬᠤᠯᠠᠩ ᠢ ᠪᠢ ᠴᠢᠮᠠ ᠳᠤ ᠥᠭᠭᠥᠶᠡ᠃ ᠡᠨᠡ ᠨᠢ ᠨᠠᠳᠠ ᠳᠤ ᠥᠭᠭᠥᠭᠳᠡᠭᠰᠡᠨ ᠲᠤᠯᠠ ᠪᠢ ᠳᠤᠷᠠᠲᠠᠢ ᠬᠥᠮᠦᠨ ᠳᠡᠭᠡᠨ ᠥᠭᠭᠥᠨᠡ᠃ 7 ᠴᠢ ᠨᠠᠳᠠ ᠳᠤ ᠮᠥᠷᠭᠥᠪᠡᠯ ᠡᠨᠡ ᠪᠦᠭᠦᠳᠡ ᠴᠢᠨᠦᠬᠢ ᠪᠣᠯᠣᠨᠠ》 ᠭᠡᠬᠦ ᠳᠦ᠂ 8 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《〈ᠴᠢ ᠡᠵᠡᠨ ᠪᠤᠷᠬᠠᠨ ᠳᠠᠭᠠᠨ ᠮᠥᠷᠭᠥᠵᠦ᠂ ᠲᠡᠭᠦᠨ ᠳᠡᠭᠡᠨ ᠯᠠ ᠦᠢᠯᠡᠴᠢᠯᠡ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ》 ᠭᠡᠪᠡ᠃
9 ᠰᠠᠲ᠋ᠠᠨ ᠲᠡᠭᠦᠨ ᠢ ᠶᠧᠷᠦ᠋ᠰᠠᠯᠧᠮ ᠳᠤ ᠠᠪᠠᠴᠢᠵᠤ᠂ ᠠᠷᠢᠭᠤᠨ ᠣᠷᠳᠣᠨ ᠤ ᠣᠷᠣᠢ ᠳᠡᠭᠡᠷᠡ ᠵᠣᠭᠰᠣᠭᠠᠭᠠᠳ ᠲᠡᠭᠦᠨ ᠳᠦ᠄ 《ᠴᠢ ᠪᠤᠷᠬᠠᠨ ᠤ ᠬᠦᠦ ᠮᠥᠨ ᠪᠣᠯ ᠡ᠊ᠨᠳᠡ ᠡᠴᠡ ᠳᠣᠭᠣᠭᠰᠢ ᠪᠠᠨ ᠦᠰᠦᠷ︕ 10 〈ᠤᠴᠢᠷ ᠨᠢ᠂ ᠲᠡᠷᠡ ᠲᠩᠷᠢ ᠡᠯᠴᠢᠳ ᠲᠡᠭᠡᠨ ᠴᠢᠨᠦ ᠲᠤᠬᠠᠢ ᠵᠠᠬᠢᠨ ᠴᠢᠮᠠᠶᠢ ᠬᠠᠮᠠᠭᠠᠯᠠᠨᠠ᠂〉 11 ᠪᠠᠰᠠ 〈ᠴᠢᠨᠦ ᠬᠥᠯ ᠴᠢᠯᠠᠭᠤᠨ ᠳᠤ ᠤᠨᠤᠭᠤᠵᠠᠢ ᠭᠡᠵᠦ ᠲᠡᠳᠡ ᠴᠢᠮᠠᠶᠢ ᠭᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠦᠨᠡ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ ᠰᠢᠦ ᠳᠠ》 ᠭᠡᠰᠡᠨ ᠳᠦ᠂ 12 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《〈ᠴᠢ ᠡᠵᠡᠨ ᠪᠤᠷᠬᠠᠨ ᠢᠶᠠᠨ ᠪᠦᠦ ᠲᠡᠩᠰᠡ〉 ᠭᠡᠵᠦ ᠪᠠᠰᠠ ᠬᠡᠯᠡᠭᠰᠡᠨ ᠪᠠᠢᠳᠠᠭ》 ᠭᠡᠯᠡ᠃ 13 ᠰᠠᠲ᠋ᠠᠨ ᠪᠦᠬᠦ ᠲᠡᠩᠰᠡᠯᠲᠡ ᠪᠡᠨ ᠳᠠᠭᠤᠰᠬᠠᠭᠠᠳ ᠲᠦᠷ ᠴᠠᠭ ᠲᠡᠭᠦᠨ ᠡᠴᠡ ᠵᠠᠢᠯᠠᠪᠠ᠃
ᠢᠰᠦ᠋ᠰ ᠣᠯᠠᠨ ᠤ ᠲᠥᠯᠥᠭᠡ ᠠᠵᠢᠯᠯᠠᠵᠤ ᠡᠬᠢᠯᠡᠭᠰᠡᠨ ᠨᠢ
14 ᠢᠰᠦ᠋ᠰ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠬᠦᠴᠦ ᠶᠢ ᠠᠪᠴᠤ ᠭᠠᠯᠢᠯᠠᠶᠠ ᠳᠤ ᠪᠤᠴᠠᠭᠰᠠᠨ ᠳᠤ᠂ ᠲᠡᠭᠦᠨ ᠦ ᠲᠤᠬᠠᠢ ᠮᠡᠳᠡᠭᠡ ᠬᠠᠪᠢ ᠣᠢᠷᠠ ᠶᠢᠨ ᠪᠦᠬᠦ ᠨᠤᠲᠤᠭ ᠢᠶᠠᠷ ᠲᠠᠷᠬᠠᠪᠠ᠃ 15 ᠲᠡᠷᠡ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠳ ᠢᠶᠠᠷ ᠰᠤᠷᠭᠠᠯ ᠵᠢᠭᠠᠬᠤ ᠳᠤ᠂ ᠪᠦᠬᠦ ᠬᠥᠮᠦᠨ ᠲᠡᠭᠦᠨ ᠢ ᠮᠠᠭᠲᠠᠵᠤ ᠪᠠᠢᠯᠠ᠃
16 ᠢᠰᠦ᠋ᠰ ᠥᠪᠡᠷ ᠦᠨ ᠥᠰᠥᠭᠰᠡᠨ ᠨᠤᠲᠤᠭ ᠨᠠᠽᠠᠷᠧᠲ ᠲᠠᠭᠠᠨ ᠣᠴᠢᠵᠠᠢ᠃ ᠠᠮᠠᠷᠠᠯ ᠤᠨ ᠡᠳᠦᠷ ᠵᠤᠷᠰᠢᠯ ᠶᠣᠰᠣᠭᠠᠷ ᠢᠶᠠᠨ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠣᠷᠣᠭᠠᠳ ᠠᠷᠢᠭᠤᠨ ᠨᠣᠮ ᠤᠩ᠋ᠰᠢᠬᠤ ᠪᠠᠷ ᠪᠣᠰᠣᠯᠠ᠃ 17 ᠲᠡᠷᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠶᠢᠨ ᠨᠣᠮ ᠢ ᠬᠥᠮᠦᠨ ᠡᠴᠡ ᠠᠪᠴᠤ ᠳᠡᠯᠭᠡᠭᠡᠳ ᠨᠢᠭᠡ ᠬᠡᠰᠡᠭ ᠢ ᠣᠯᠬᠤ ᠳᠤ᠄
18 《ᠡᠵᠡᠨ ᠦ ᠰᠦᠨᠡᠰᠦ ᠨᠠᠳᠠ ᠳᠡᠭᠡᠷᠡ ᠪᠠᠢᠨᠠ ᠶᠠᠳᠠᠭᠤᠴᠤᠳ ᠲᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠬᠦᠷᠭᠡᠭᠦᠯᠬᠦ ᠪᠡᠷ ᠲᠡᠷᠡ ᠨᠠᠮᠠᠶᠢ ᠲᠣᠰᠣᠯᠠᠭᠰᠠᠨ ᠶᠤᠮ ᠣᠯᠵᠠᠯᠠᠭᠳᠠᠭᠰᠠᠳ ᠲᠤ ᠡᠷᠬᠡ ᠴᠢᠯᠥᠭᠡ ᠲᠠᠢ ᠪᠣᠯᠬᠤ ᠶᠢ ᠰᠣᠬᠣᠷᠴᠤᠳ ᠲᠤ ᠬᠠᠷᠠᠭᠠ ᠲᠠᠢ ᠪᠣᠯᠬᠤ ᠶᠢ ᠲᠤᠩ᠋ᠬᠠᠭᠯᠠᠭᠤᠯᠵᠤ ᠳᠠᠷᠤᠯᠠᠭᠳᠠᠭᠰᠠᠳ ᠢ ᠴᠢᠯᠥᠭᠡᠯᠡᠭᠦᠯᠦᠨ
19 ᠡᠵᠡᠨ ᠦ ᠢᠪᠡᠭᠡᠯ ᠦᠨ ᠵᠢᠯ ᠢ ᠲᠤᠩ᠋ᠬᠠᠭᠯᠠᠭᠤᠯᠬᠤ ᠪᠠᠷ ᠨᠠᠮᠠᠶᠢ ᠢᠯᠡᠭᠡᠵᠡᠢ》
ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠵᠠᠢ᠃ 20 ᠢᠰᠦ᠋ᠰ ᠨᠣᠮ ᠢ ᠬᠤᠢᠯᠠᠵᠤ᠂ ᠦᠢᠯᠡᠴᠢᠯᠡᠭᠴᠢ ᠳᠤ ᠪᠤᠴᠠᠭᠠᠨ ᠥᠭᠭᠥᠭᠡᠳ ᠰᠠᠭᠤᠬᠤ ᠳᠤ᠂ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠠᠬᠢ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠤᠷᠤᠭᠤ ᠰᠢᠷᠲᠡᠵᠦ ᠪᠠᠢᠯᠠ᠃ 21 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠤᠨ ᠰᠣᠨᠣᠰᠣᠭᠰᠠᠨ ᠡᠨᠡ ᠡᠰᠢᠯᠡᠯ ᠥᠨᠥᠳᠥᠷ ᠪᠡᠶᠡᠯᠡᠭᠲᠡᠯᠡ》 ᠭᠡᠪᠡ᠃ 22 ᠪᠦᠭᠦᠳᠡᠭᠡᠷ ᠲᠡᠭᠦᠨ ᠢ ᠮᠠᠭᠲᠠᠵᠤ ᠠᠮᠠᠨ ᠠᠴᠠ ᠨᠢ ᠭᠠᠷᠬᠤ ᠡᠨᠡᠷᠢᠩᠭᠦᠢ ᠦᠭᠡᠰ ᠢ ᠭᠠᠢᠬᠠᠨ᠄ 《ᠡᠨᠡ ᠴᠢᠨᠢ ᠶᠣᠰᠧᠹ ᠤᠨ ᠬᠦᠦ ᠪᠢᠰᠢ ᠤᠤ︖》 ᠭᠡᠵᠡᠭᠡᠵᠦ ᠪᠠᠢᠯᠠ᠃ 23 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《〈ᠡᠮᠴᠢ ᠡ᠂ ᠥᠪᠡᠷ ᠢ ᠪᠠᠨ ᠡᠳᠡᠭᠡᠭᠡ〉 ᠭᠡᠰᠡᠨ ᠵᠦᠢᠷ ᠦᠭᠡ ᠪᠡᠷ ᠲᠠ ᠨᠠᠷ ᠡᠰᠢ ᠲᠠᠲᠠᠵᠤ᠂ ᠺᠠᠹᠠᠷᠨᠠᠦ᠋ᠮ ᠳᠤ ᠦᠢᠯᠡᠳᠦᠭᠰᠡᠨ ᠭᠡᠵᠦ ᠪᠢᠳᠡᠨ ᠦ ᠰᠣᠨᠣᠰᠣᠭᠰᠠᠨ ᠪᠦᠬᠦᠨ ᠢ ᠲᠥᠷᠥᠭᠰᠡᠨ ᠨᠤᠲᠤᠭ ᠡ᠊ᠨᠳᠡ ᠪᠡᠨ ᠴᠤ ᠦᠢᠯᠡᠳᠦᠭᠡᠴᠢ ᠭᠡᠵᠦ ᠨᠠᠳᠠ ᠳᠤ ᠯᠠᠪᠲᠠᠢ ᠬᠡᠯᠡᠬᠦ ᠶᠤᠮ》 ᠭᠡᠳ 24 《ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠡᠰᠢ ᠦᠵᠡᠭᠦᠯᠦᠭᠴᠢ ᠲᠥᠷᠥᠭᠰᠡᠨ ᠨᠤᠲᠤᠭ ᠲᠠᠭᠠᠨ ᠬᠦᠨᠳᠦᠯᠡᠭᠳᠡᠬᠦ ᠦᠭᠡᠢ᠃ 25 ᠪᠢ ᠲᠠ ᠨᠠᠷ ᠲᠤ ᠦᠨᠡᠨ ᠢ ᠬᠡᠯᠡᠶᠡ᠃ ᠧᠯᠢᠶᠠ ᠶᠢᠨ ᠦᠶᠡ ᠳᠦ ᠭᠤᠷᠪᠠᠨ ᠵᠢᠯ ᠵᠢᠷᠭᠤᠭᠠᠨ ᠰᠠᠷᠠ ᠶᠢᠨ ᠲᠤᠷᠰᠢ ᠲᠩᠷᠢ ᠬᠠᠭᠠᠭᠳᠠᠵᠤ ᠭᠠᠵᠠᠷ ᠳᠠᠶᠠᠭᠠᠷ ᠶᠡᠬᠡ ᠥᠯᠥᠰᠬᠥᠯᠡᠩ ᠭᠠᠴᠢᠭ ᠪᠣᠯᠬᠤ ᠳᠤ᠂ ᠢᠰᠷᠧᠯ ᠳᠤ ᠣᠯᠠᠨ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ 26 ᠧᠯᠢᠶᠠ ᠲᠡᠳᠡᠨ ᠦ ᠠᠯᠢᠨ ᠤ ᠳᠤᠨᠢ ᠴᠤ ᠪᠢᠰᠢ᠂ ᠬᠠᠷᠢᠨ ᠰᠢᠢᠳᠣᠨ ᠨᠤᠲᠤᠭ ᠤᠨ ᠽᠠᠷᠧᠹᠠᠲ ᠤᠨ ᠨᠢᠭᠡᠨ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢᠨ ᠳᠤ ᠢᠯᠡᠭᠡᠭᠳᠡᠭᠰᠡᠨ ᠪᠢᠯᠡ᠃ 27 ᠪᠠᠰᠠ ᠡᠰᠢ ᠦᠵᠡᠭᠦᠯᠦᠭᠴᠢ ᠧᠯᠢᠱᠠ ᠶᠢᠨ ᠦᠶᠡ ᠳᠦ ᠢᠰᠷᠧᠯ ᠳᠤ ᠣᠯᠠᠨ ᠤᠶᠠᠮᠠᠨ 5 ᠡᠪᠡᠳᠴᠢᠲᠡᠨ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠰᠢᠷᠢᠶᠠ ᠬᠥᠮᠦᠨ ᠨᠠᠭᠠᠮᠠᠨ ᠠᠴᠠ ᠥᠭᠡᠷᠡ ᠬᠡᠨ ᠴᠤ ᠴᠡᠪᠡᠷᠰᠢᠭᠳᠡᠭᠰᠡᠨ ᠦᠭᠡᠢ ᠶᠤᠮ》 ᠭᠡᠵᠦ ᠶᠠᠷᠢᠪᠠ᠃ 28 ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠪᠠᠢᠭᠰᠠᠨ ᠪᠦᠭᠦᠳᠡ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠶᠡᠬᠡᠳᠡ ᠬᠢᠯᠢᠩᠨᠡᠵᠡᠢ᠃ 29 ᠲᠡᠳᠡ ᠪᠣᠰᠴᠤ ᠢᠰᠦ᠋ᠰ ᠢ ᠲᠣᠰᠬᠣᠨ ᠠᠴᠠ ᠪᠠᠨ ᠬᠥᠭᠡᠭᠡᠨ ᠭᠠᠷᠭᠠᠵᠤ᠂ ᠠᠭᠤᠯᠠ ᠶᠢᠨ ᠣᠷᠣᠢ ᠳᠤ ᠠᠪᠠᠴᠢᠪᠠ᠃ ᠲᠡᠳᠡᠨ ᠦ ᠲᠣᠰᠬᠣᠨ ᠠᠭᠤᠯᠠᠨ ᠳᠡᠭᠡᠷᠡ ᠪᠠᠢᠭᠤᠯᠤᠭᠳᠠᠭᠰᠠᠨ ᠠᠵᠢ᠃ ᠲᠡᠳᠡ ᠲᠡᠭᠦᠨ ᠢ ᠠᠭᠤᠯᠠ ᠶᠢᠨ ᠣᠷᠣᠢ ᠠᠴᠠ ᠲᠦᠯᠬᠢᠨ ᠤᠨᠠᠭᠠᠬᠤ ᠭᠡᠵᠦ ᠪᠠᠢᠲᠠᠯᠠ 30 ᠢᠰᠦ᠋ᠰ ᠲᠡᠳᠡᠨ ᠦ ᠳᠤᠮᠳᠠᠭᠤᠷ ᠥᠩᠭᠡᠷᠡᠨ ᠴᠠᠰᠢ ᠣᠳᠣᠯᠠ᠃
31 ᠢᠰᠦ᠋ᠰ ᠭᠠᠯᠢᠯᠠᠶᠠ ᠶᠢᠨ ᠺᠠᠹᠠᠷᠨᠠᠦ᠋ᠮ ᠲᠣᠰᠬᠣᠨ ᠳᠤ ᠣᠴᠢᠭᠠᠳ ᠠᠮᠠᠷᠠᠯ ᠤᠨ ᠡᠳᠦᠷ ᠰᠤᠷᠭᠠᠵᠤ ᠪᠠᠢᠬᠤ ᠳᠤ᠂ 32 ᠬᠥᠮᠦᠰ ᠲᠡᠭᠦᠨ ᠦ ᠰᠤᠷᠭᠠᠯ ᠢ ᠱᠠᠭᠰᠢᠵᠤ ᠪᠠᠢᠯᠠ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠲᠡᠭᠦᠨ ᠦ ᠦᠭᠡ ᠡᠷᠬᠡ ᠮᠡᠳᠡᠯ ᠲᠡᠢ ᠪᠠᠢᠭᠰᠠᠨ ᠶᠤᠮ᠃ 33 ᠪᠤᠵᠠᠷ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠨᠢᠭᠡᠨ ᠬᠥᠮᠦᠨ ᠲᠡᠷᠡ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠪᠠᠢᠵᠠᠢ᠃ ᠲᠡᠷᠡ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠴᠤ᠄ 34 《ᠲᠠ ᠪᠢᠳᠡᠨ ᠲᠡᠢ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠶᠤᠮ ᠪᠤᠢ︖ ᠨᠠᠽᠠᠷᠧᠲ ᠤᠨ ᠢᠰᠦ᠋ᠰ ᠡ︕ ᠲᠠ ᠪᠢᠳᠡᠨ ᠢ ᠰᠥᠨᠥᠭᠡᠬᠦ ᠪᠡᠷ ᠢᠷᠡᠭᠰᠡᠨ ᠤᠤ︖ ᠪᠢ ᠲᠠᠨ ᠤ ᠬᠡᠨ ᠪᠣᠯᠬᠤ ᠶᠢ ᠮᠡᠳᠡᠨᠡ᠂ ᠪᠤᠷᠬᠠᠨ ᠤ ᠠᠷᠢᠭᠤᠨ ᠨᠢᠭᠡᠨ ᠮᠥᠨ》 ᠭᠡᠬᠦ ᠳᠦ᠂ 35 ᠢᠰᠦ᠋ᠰ ᠴᠢᠳᠬᠥᠷ ᠢ ᠵᠢᠮᠡᠯᠡᠵᠦ᠄ 《ᠳᠠᠭᠤ ᠦᠭᠡᠢ ᠪᠠᠢ᠂ ᠲᠡᠭᠦᠨ ᠡᠴᠡ ᠭᠠᠷ︕》 ᠭᠡᠰᠡᠨ ᠳᠦ᠂ ᠴᠢᠳᠬᠥᠷ ᠲᠡᠭᠦᠨ ᠢ ᠣᠯᠠᠨ ᠤ ᠳᠤᠮᠳᠠ ᠤᠨᠠᠭᠠᠭᠠᠳ ᠰᠢᠷᠬᠠᠲᠤᠭᠤᠯᠤᠯ ᠦᠭᠡᠢ ᠪᠠᠷ ᠭᠠᠷᠴᠤ ᠣᠳᠪᠠ᠃ 36 ᠬᠥᠮᠦᠨ ᠪᠦᠬᠦᠨ ᠭᠠᠢᠬᠠᠵᠤ ᠪᠡᠶᠡ ᠪᠡᠶᠡ ᠳᠡᠭᠡᠨ᠄ 《ᠡᠨᠡ ᠴᠢᠨᠢ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠪᠤᠢ︖ ᠲᠡᠷᠡ ᠡᠷᠬᠡ ᠮᠡᠳᠡᠯ ᠪᠣᠯᠣᠨ ᠬᠦᠴᠦ ᠪᠡᠷ ᠢᠶᠠᠨ ᠪᠤᠵᠠᠷ ᠴᠢᠳᠬᠥᠷ ᠢ ᠵᠠᠷᠯᠢᠭᠳᠠᠬᠤ ᠳᠤ᠂ ᠲᠡᠳᠡ ᠭᠠᠷᠴᠠᠭᠠᠪᠠ》 ᠭᠡᠵᠦ ᠶᠠᠷᠢᠵᠤ ᠪᠠᠢᠯᠠ᠃ 37 ᠢᠰᠦ᠋ᠰ ᠤᠨ ᠲᠤᠬᠠᠢ ᠴᠤᠤ ᠴᠢᠮᠡᠭᠡ ᠣᠢᠷᠠ ᠬᠠᠪᠢ ᠶᠢᠨ ᠭᠠᠵᠠᠷ ᠢᠶᠠᠷ ᠲᠠᠷᠬᠠᠵᠠᠢ᠃
ᠣᠯᠠᠨ ᠢ ᠡᠳᠡᠭᠡᠭᠡᠭᠰᠡᠨ ᠨᠢ
38 ᠢᠰᠦ᠋ᠰ ᠬᠤᠷᠠᠯ ᠤᠨ ᠲᠠᠩᠬᠢᠮ ᠠᠴᠠ ᠭᠠᠷᠤᠭᠠᠳ ᠰᠢᠮᠣᠨ ᠤ ᠭᠡᠷ ᠲᠦ ᠣᠷᠣᠬᠤ ᠳᠤ᠂ ᠬᠠᠳᠠᠮ ᠡᠬᠡ ᠨᠢ ᠬᠦᠨᠳᠦ ᠬᠠᠯᠠᠭᠤᠨ ᠬᠢᠵᠢᠭ ᠢᠶᠠᠷ ᠵᠣᠪᠠᠵᠤ ᠪᠠᠢᠯᠠ᠃ ᠬᠥᠮᠦᠰ ᠲᠡᠭᠦᠨ ᠦ ᠲᠥᠯᠥᠭᠡ ᠢᠰᠦ᠋ᠰ ᠡᠴᠡ ᠭᠤᠶᠤᠪᠠ᠃ 39 ᠢᠰᠦ᠋ᠰ ᠲᠡᠭᠦᠨ ᠦ ᠳᠡᠷᠭᠡᠳᠡ ᠵᠣᠭᠰᠣᠨ ᠬᠠᠯᠠᠭᠤᠨ ᠢ ᠵᠢᠮᠡᠯᠡᠬᠦ ᠳᠦ᠂ ᠬᠠᠯᠠᠭᠤᠨ ᠨᠢ ᠠᠷᠢᠯᠵᠤ ᠲᠡᠷᠡ ᠡᠮᠡᠭᠲᠡᠢ ᠳᠠᠷᠤᠢᠬᠠᠨ ᠪᠣᠰᠣᠭᠠᠳ ᠲᠡᠳᠡᠨ ᠢ ᠵᠣᠴᠢᠯᠠᠵᠤ ᠡᠬᠢᠯᠡᠪᠡ᠃
40 ᠨᠠᠷᠠ ᠵᠢᠷᠭᠠᠬᠤ ᠳᠤ᠂ ᠠᠢᠯ ᠪᠣᠯᠭᠠᠨ ᠶᠠᠩᠵᠤ ᠶᠢᠨ ᠡᠪᠡᠳᠴᠢᠲᠡᠨ ᠢᠶᠡᠨ ᠠᠪᠴᠢᠷᠠᠭᠰᠠᠨ ᠳᠤ᠂ ᠢᠰᠦ᠋ᠰ ᠡᠪᠡᠳᠴᠢᠲᠡᠨ ᠪᠣᠯᠭᠠᠨ ᠤ ᠳᠡᠭᠡᠷᠡ ᠮᠤᠲᠤᠷ ᠢᠶᠠᠨ ᠲᠠᠯᠪᠢᠨ ᠡᠳᠡᠭᠡᠭᠡᠵᠦ ᠪᠠᠢᠯᠠ᠃ 41 ᠴᠢᠳᠬᠥᠷ ᠤᠳ ᠴᠤ᠄ 《ᠲᠠ ᠪᠣᠯ ᠪᠤᠷᠬᠠᠨ ᠤ ᠬᠦᠦ ᠮᠥᠨ》 ᠭᠡᠵᠦ ᠬᠠᠰᠬᠢᠷᠤᠨ ᠬᠥᠮᠦᠰ ᠦᠨ ᠪᠡᠶᠡ ᠡᠴᠡ ᠭᠠᠷᠴᠤ ᠪᠠᠢᠯᠠ᠃ ᠢᠰᠦ᠋ᠰ ᠴᠢᠳᠬᠥᠷ ᠤᠳ ᠢ ᠵᠢᠮᠡᠯᠡᠵᠦ᠂ ᠳᠤᠤᠭᠠᠷᠬᠤ ᠶᠢ ᠨᠢ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠂ ᠴᠢᠳᠬᠥᠷ ᠤᠳ ᠲᠡᠭᠦᠨ ᠢ ᠾᠷᠢᠰᠲ᠋ᠣᠰ ᠮᠥᠨ ᠭᠡᠵᠦ ᠮᠡᠳᠡᠭᠰᠡᠨ ᠪᠠᠢᠵᠠᠢ᠃
42 ᠦᠷ ᠴᠠᠢᠬᠤ ᠳᠤ᠂ ᠢᠰᠦ᠋ᠰ ᠲᠡᠨᠳᠡ ᠡᠴᠡ ᠭᠠᠷᠴᠤ ᠡᠵᠡᠭᠦᠢ ᠭᠠᠵᠠᠷ ᠲᠤ ᠣᠴᠢᠪᠡ᠃ ᠠᠷᠠᠳ ᠣᠯᠠᠨ ᠲᠡᠭᠦᠨ ᠢ ᠡᠷᠢᠵᠦ ᠣᠯᠣᠭᠠᠳ ᠶᠠᠪᠤᠭᠤᠯᠬᠤ ᠦᠭᠡᠢ ᠭᠡᠵᠦ ᠪᠠᠢᠯᠠ᠃ 43 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠪᠢ ᠥᠭᠡᠷᠡ ᠲᠣᠰᠬᠣᠨ ᠳᠤ ᠴᠤ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠲᠤᠩ᠋ᠬᠠᠭᠯᠠᠬᠤ ᠬᠡᠷᠡᠭᠲᠡᠢ᠃ ᠪᠢ ᠡᠭᠦᠨ ᠦ ᠲᠥᠯᠥᠭᠡ ᠢᠯᠡᠭᠡᠭᠳᠡᠭᠰᠡᠨ ᠶᠤᠮ》 ᠭᠡᠵᠦ ᠬᠡᠯᠡᠭᠡᠳ 44 ᠶᠦᠳᠠᠢ ᠶᠢᠨ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠳ ᠢᠶᠠᠷ ᠶᠠᠪᠤᠵᠤ ᠰᠤᠷᠭᠠᠯ ᠳᠡᠯᠭᠡᠷᠡᠭᠦᠯᠦᠭᠰᠡᠭᠡᠷ ᠪᠠᠢᠯᠠ᠃