ᠯᠦᠺ ᠨᠠᠢ᠌ᠮᠠ
ᠦᠢᠯᠡᠴᠢᠯᠡᠭᠴᠢ ᠡᠮᠡᠭᠲᠡᠢᠴᠦᠳ
1 ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠢᠰᠦ᠋ᠰ ᠬᠣᠲᠠ ᠲᠣᠰᠬᠣᠨ ᠨᠤᠭᠤᠳ ᠢᠶᠠᠷ ᠠᠶᠠᠯᠠᠵᠤ᠂ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠲᠤᠩ᠋ᠬᠠᠭᠯᠠᠨ ᠳᠡᠯᠭᠡᠷᠡᠭᠦᠯᠵᠦ ᠪᠠᠢᠪᠠ᠃ ᠡᠭᠦᠨ ᠳᠦ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠨᠢ᠂ 2 ᠮᠠᠭᠤ ᠴᠢᠳᠬᠥᠷ ᠤᠳ ᠪᠠ ᠡᠪᠡᠳᠴᠢᠨ ᠡᠴᠡ ᠰᠠᠯᠵᠤ ᠡᠳᠡᠭᠡᠷᠡᠭᠰᠡᠨ ᠬᠡᠳᠦᠨ ᠡᠮᠡᠭᠲᠡᠢ᠂ ᠲᠤᠬᠠᠢᠯᠠᠪᠠᠯ ᠥᠪᠡᠷ ᠲᠤᠨᠢ ᠣᠷᠣᠰᠢᠭᠰᠠᠨ ᠳᠣᠯᠣᠭᠠᠨ ᠴᠢᠳᠬᠥᠷ ᠡᠴᠡ ᠰᠠᠯᠤᠭᠰᠠᠨ ᠮᠠᠭᠳᠠᠯ ᠤᠨ ᠬᠢ ᠭᠡᠭᠳᠡᠳᠡᠭ ᠮᠠᠷᠢᠶᠠ᠂ 3 ᠾᠧᠷᠣᠳ᠋ ᠤᠨ ᠨᠢᠷᠪᠠ ᠾᠦᠽᠠ ᠶᠢᠨ ᠡᠬᠡᠨᠡᠷ ᠶᠣᠸᠠᠨᠨᠠ᠂ ᠰᠦᠰᠠᠨᠨᠠ ᠬᠢᠭᠡᠳ ᠪᠤᠰᠤᠳ ᠣᠯᠠᠨ ᠡᠮᠡᠭᠲᠡᠢ ᠬᠠᠮᠲᠤ ᠶᠠᠪᠤᠵᠠᠢ᠃ ᠡᠮᠡᠭᠲᠡᠢᠴᠦᠳ ᠪᠠᠢᠭᠠ ᠪᠠᠷ ᠢᠶᠠᠨ ᠢᠰᠦ᠋ᠰ ᠪᠣᠯᠣᠨ ᠱᠠᠪᠢ ᠨᠠᠷ ᠢ ᠳᠡᠮᠵᠢᠳᠡᠭ ᠪᠠᠢᠪᠠ᠃
ᠦᠷᠡ ᠰᠠᠴᠤᠭᠴᠢ ᠶᠢᠨ ᠦᠯᠢᠭᠡᠷᠯᠡᠯ
4 ᠦᠯᠡᠮᠵᠢ ᠣᠯᠠᠨ ᠬᠥᠮᠦᠨ ᠲᠣᠰᠬᠣᠨ ᠨᠤᠭᠤᠳ ᠠᠴᠠ ᠢᠰᠦ᠋ᠰ ᠤᠷᠤᠭᠤ ᠬᠤᠷᠠᠨ ᠴᠤᠭᠯᠠᠷᠠᠬᠤ ᠳᠤ᠂ ᠲᠡᠷᠡ ᠦᠯᠢᠭᠡᠷᠯᠡᠯ ᠢᠶᠡᠷ᠄ 5 《ᠲᠠᠷᠢᠶᠠᠴᠢᠨ ᠦᠷᠡ ᠰᠠᠴᠤᠬᠤ ᠪᠠᠷ ᠭᠠᠷᠴᠤ ᠦᠷᠡ ᠪᠡᠨ ᠰᠠᠴᠤᠬᠤ ᠳᠤ᠂ ᠵᠠᠷᠢᠮ ᠨᠢ ᠵᠠᠮ ᠢᠶᠠᠷ ᠤᠨᠠᠵᠤ ᠬᠥᠮᠦᠰ ᠦᠨ ᠬᠥᠯ ᠳᠤ ᠭᠢᠰᠬᠢᠭᠳᠡᠨ᠂ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠳ ᠲᠤ ᠢᠳᠡᠭᠳᠡᠵᠡᠢ᠃ 6 ᠵᠠᠷᠢᠮ ᠦᠷᠡ ᠨᠢ ᠬᠠᠳᠠᠨ ᠳᠡᠭᠡᠷᠡ ᠤᠨᠠᠵᠤ᠂ ᠰᠣᠶᠣᠭᠠᠯᠠᠭᠰᠠᠨ ᠪᠣᠯᠪᠠᠴᠤ ᠴᠢᠭᠢᠭ ᠦᠭᠡᠢ ᠲᠤᠯᠠ ᠬᠠᠲᠠᠴᠢᠬᠠᠪᠠ᠃ 7 ᠵᠠᠷᠢᠮ ᠨᠢ ᠥᠷᠭᠡᠰᠦᠲᠦ ᠪᠤᠲᠠ ᠶᠢᠨ ᠳᠤᠮᠳᠠ ᠤᠨᠠᠵᠤ᠂ ᠪᠤᠲᠠ ᠨᠢ ᠬᠠᠮᠲᠤ ᠤᠷᠭᠤᠨ ᠲᠡᠭᠦᠨ ᠢ ᠳᠠᠷᠤᠴᠢᠬᠠᠵᠠᠢ᠃ 8 ᠵᠠᠷᠢᠮ ᠨᠢ ᠰᠠᠢᠨ ᠬᠥᠷᠥᠰᠥᠨ ᠳᠤ ᠤᠨᠠᠵᠤ ᠤᠷᠭᠤᠭᠠᠳ ᠵᠠᠭᠤ ᠳᠠᠬᠢᠨ ᠢᠯᠡᠭᠦᠦ ᠦᠷᠡ ᠵᠢᠮᠢᠰ ᠭᠠᠷᠭᠠᠵᠠᠢ》 ᠭᠡᠵᠦ ᠬᠡᠯᠡᠭᠡᠳ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠰᠣᠨᠣᠰᠬᠤ ᠴᠢᠬᠢ ᠲᠠᠢ ᠨᠢ ᠰᠣᠨᠣᠰᠣᠭᠲᠤᠨ︕》 ᠭᠡᠪᠡ᠃
9 ᠱᠠᠪᠢ ᠨᠠᠷ ᠨᠢ ᠡᠨᠡ ᠦᠯᠢᠭᠡᠷᠯᠡᠯ ᠦᠨ ᠤᠳᠬᠠ ᠶᠢ ᠠᠰᠠᠭᠤᠬᠤ ᠳᠤ᠂ 10 ᠲᠡᠷᠡ᠄ 《ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠨᠢᠭᠤᠴᠠ ᠶᠢ ᠮᠡᠳᠡᠬᠦ ᠶᠢ ᠲᠠ ᠨᠠᠷ ᠲᠤ ᠵᠥᠪᠰᠢᠶᠡᠷᠡᠭᠰᠡᠨ ᠪᠣᠯᠪᠠᠴᠤ ᠬᠠᠷᠢᠨ ᠪᠤᠰᠤᠳ ᠲᠤᠨᠢ ᠦᠯᠢᠭᠡᠷᠯᠡᠯ ᠢ ᠯᠠ ᠥᠭᠭᠥᠭᠰᠡᠨ ᠶᠤᠮ᠂ ᠡᠢᠨ ᠬᠦ 〈ᠲᠡᠳᠡ ᠬᠠᠷᠠᠨ ᠬᠠᠷᠠᠪᠠᠴᠤ ᠦᠵᠡᠬᠦ ᠦᠭᠡᠢ᠂ ᠰᠣᠨᠣᠰᠣᠨ ᠰᠣᠨᠣᠰᠪᠠᠴᠤ ᠣᠢᠯᠠᠭᠠᠬᠤ ᠦᠭᠡᠢ᠃〉
11 ᠵᠠ᠂ ᠡᠨᠡ ᠦᠯᠢᠭᠡᠷᠯᠡᠯ ᠦᠨ ᠤᠳᠬᠠ ᠶᠢ ᠬᠡᠯᠡᠶᠡ᠄ 〈ᠦᠷᠡ ᠭᠡᠳᠡᠭ ᠨᠢ ᠪᠤᠷᠬᠠᠨ ᠤ ᠦᠭᠡ ᠶᠤᠮ᠂ 12 ᠵᠠᠮ ᠢᠶᠠᠷ ᠤᠨᠠᠭᠰᠠᠨ ᠨᠢ ᠦᠭᠡ ᠶᠢ ᠰᠣᠨᠣᠰᠣᠭᠰᠠᠨ ᠪᠣᠯᠪᠠᠴᠤ ᠰᠠᠲ᠋ᠠᠨ ᠢᠷᠡᠵᠦ ᠰᠡᠳᠬᠢᠯ ᠡᠴᠡ ᠨᠢ ᠲᠡᠷᠡ ᠦᠭᠡ ᠶᠢ ᠪᠤᠯᠢᠶᠠᠳᠠᠭ ᠲᠤᠯᠠ ᠦᠯᠦ ᠢᠲᠡᠭᠡᠵᠦ ᠠᠪᠤᠷᠠᠭᠳᠠᠬᠤ ᠦᠭᠡᠢ ᠬᠥᠮᠦᠰ ᠪᠢᠯᠡ᠃ 13 ᠬᠠᠳᠠᠨ ᠳᠡᠭᠡᠷᠡᠬᠢ ᠨᠢ᠂ ᠦᠭᠡ ᠶᠢ ᠰᠣᠨᠣᠰᠬᠤ ᠳᠠᠭᠠᠨ ᠪᠠᠶᠠᠷ ᠲᠠᠢ ᠬᠦᠯᠢᠶᠡᠵᠦ ᠠᠪᠳᠠᠭ ᠪᠣᠯᠪᠠᠴᠤ ᠦᠨᠳᠦᠰᠦ ᠦᠭᠡᠢ ᠲᠤᠯᠠ ᠲᠦᠷ ᠵᠠᠭᠤᠷᠠ ᠢᠲᠡᠭᠡᠭᠡᠳ ᠰᠣᠷᠢᠯᠲᠠ ᠶᠢᠨ ᠦᠶᠡ ᠳᠦ ᠵᠠᠢᠯᠠᠳᠠᠭ ᠬᠥᠮᠦᠰ ᠶᠤᠮ᠃ 14 ᠥᠷᠭᠡᠰᠦᠲᠦ ᠪᠤᠲᠠ ᠶᠢᠨ ᠳᠤᠮᠳᠠ ᠤᠨᠠᠭᠰᠠᠨ ᠨᠢ᠂ ᠦᠭᠡ ᠶᠢ ᠰᠣᠨᠣᠰᠣᠭᠰᠠᠨ ᠪᠣᠯᠪᠠᠴᠤ ᠴᠢᠨᠠᠭᠰᠢᠳᠠ ᠠᠮᠢᠳᠤᠷᠠᠯ ᠤᠨ ᠵᠣᠪᠠᠨᠢᠯ᠂ ᠡᠳ᠋ ᠪᠠᠶᠠᠯᠢᠭ᠂ ᠪᠠᠶᠠᠷ ᠴᠡᠩᠭᠡᠯ ᠳᠦ ᠳᠠᠷᠤᠭᠳᠠᠭᠠᠳ ᠪᠣᠯᠪᠠᠰᠤᠷᠠᠳᠠᠭ ᠦᠭᠡᠢ ᠬᠥᠮᠦᠰ᠂ 15 ᠰᠠᠢᠨ ᠬᠥᠷᠥᠰᠥᠨ ᠳᠠᠬᠢ ᠨᠢ᠂ ᠰᠠᠢᠨ ᠰᠠᠢᠬᠠᠨ ᠰᠡᠳᠬᠢᠯ ᠢᠶᠠᠷ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠬᠠᠳᠠᠭᠠᠯᠠᠵᠤ ᠲᠡᠪᠴᠢᠶᠡᠷᠢ ᠲᠠᠢ ᠪᠠᠷ ᠦᠷᠡ ᠵᠢᠮᠢᠰ ᠢᠶᠠᠨ ᠭᠠᠷᠭᠠᠳᠠᠭ ᠬᠥᠮᠦᠰ ᠶᠤᠮ᠃
ᠳ᠋ᠧᠩ ᠤᠨ ᠦᠯᠢᠭᠡᠷᠯᠡᠯ
16 ᠬᠡᠨ ᠴᠤ ᠭᠡᠰᠡᠨ ᠳ᠋ᠧᠩ ᠠᠰᠠᠭᠠᠭᠠᠳ ᠰᠠᠪᠠ ᠪᠠᠷ ᠬᠥᠮᠥᠷᠢᠬᠦ ᠦᠭᠡᠢ᠂ ᠪᠠᠰᠠ ᠣᠷᠣ ᠶᠢᠨ ᠳᠣᠣᠷᠠ ᠴᠤ ᠲᠠᠯᠪᠢᠬᠤ ᠦᠭᠡᠢ᠃ ᠬᠠᠷᠢᠨ ᠣᠷᠣᠵᠤ ᠢᠷᠡᠭᠰᠡᠳ ᠲᠦ ᠭᠡᠷᠡᠯ ᠦᠵᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠲᠠᠯᠪᠢᠳᠠᠭ᠃ 17 ᠢᠯᠡᠴᠢᠯᠡᠭᠳᠡᠰᠢ ᠦᠭᠡᠢ ᠨᠢᠭᠤᠴᠠ ᠭᠡᠵᠦ ᠦᠭᠡᠢ᠂ ᠲᠣᠳᠣᠷᠠᠰᠢ ᠦᠭᠡᠢ ᠳᠠᠯᠳᠠ ᠵᠦᠢᠯ ᠴᠤ ᠦᠭᠡᠢ᠃ 18 ᠡᠢᠮᠦ ᠡᠴᠡ ᠲᠠ ᠨᠠᠷ ᠬᠡᠷᠬᠢᠵᠦ ᠰᠣᠨᠣᠰᠬᠤ ᠪᠠᠨ ᠠᠩ᠋ᠬᠠᠷᠤᠭᠲᠤᠨ᠂ ᠬᠡᠨ ᠳᠦ ᠪᠠᠢᠪᠠᠯ ᠲᠡᠭᠦᠨ ᠳᠦ ᠥᠭᠭᠥᠭᠳᠡᠨᠡ᠃ ᠬᠡᠨ ᠳᠦ ᠪᠠᠢᠬᠤ ᠦᠭᠡᠢ ᠪᠣᠯ ᠲᠡᠭᠦᠨ ᠳᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠨᠢ ᠴᠤ ᠪᠤᠯᠢᠶᠠᠭᠳᠠᠨᠠ》 ᠭᠡᠵᠡᠢ᠃
19 ᠢᠰᠦ᠋ᠰ ᠤᠷᠤᠭᠤ ᠡᠵᠢ ᠪᠣᠯᠣᠨ ᠳᠡᠭᠦᠦ ᠨᠠᠷ ᠨᠢ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠬᠥᠮᠦᠨ ᠣᠯᠠᠨ ᠤ ᠬᠠᠷᠠᠭᠠ ᠪᠠᠷ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ 20 ᠨᠢᠭᠡ ᠬᠥᠮᠦᠨ ᠲᠡᠭᠦᠨ ᠳᠦ᠄ 《ᠡᠵᠢ᠂ ᠳᠡᠭᠦᠦ ᠨᠠᠷ ᠴᠢᠨᠢ ᠲᠠᠨ ᠲᠠᠢ ᠠᠭᠤᠯᠵᠠᠬᠤ ᠭᠡᠵᠦ ᠭᠠᠳᠠᠨᠠ ᠵᠣᠭᠰᠣᠵᠤ ᠪᠠᠢᠨᠠ》 ᠭᠡᠵᠦ ᠳᠤᠭᠤᠯᠭᠠᠭᠰᠠᠨ ᠳᠤ᠂ 21 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠮᠢᠨᠦ ᠡᠵᠢ᠂ ᠮᠢᠨᠦ ᠳᠡᠭᠦᠦ ᠨᠠᠷ ᠪᠣᠯ ᠪᠤᠷᠬᠠᠨ ᠤ ᠦᠭᠡ ᠶᠢ ᠰᠣᠨᠣᠰᠴᠤ ᠪᠡᠶᠡᠯᠡᠭᠦᠯᠳᠡᠭ ᠡᠳᠡᠭᠡᠷ ᠬᠥᠮᠦᠨ ᠪᠣᠯᠣᠨᠠ》 ᠭᠡᠵᠡᠢ᠃
ᠨᠠᠭᠤᠷ ᠢ ᠨᠠᠮᠳᠠᠭᠠᠭᠰᠠᠨ ᠨᠢ
22 ᠨᠢᠭᠡᠨ ᠡᠳᠦᠷ ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠣᠩ᠋ᠭᠣᠴᠠᠨ ᠳᠤ ᠰᠠᠭᠤᠭᠠᠳ᠄ 《ᠨᠠᠭᠤᠷ ᠤᠨ ᠨᠥᠭᠥᠭᠡ ᠲᠠᠯᠠ ᠳᠤ ᠣᠴᠢᠵᠠᠭᠠᠶᠠ》 ᠭᠡᠰᠡᠨ ᠳᠦ᠂ ᠲᠡᠳᠡ ᠭᠠᠷᠪᠠ᠃ 23 ᠰᠡᠯᠢᠵᠦ ᠶᠠᠪᠤᠬᠤ ᠵᠠᠭᠤᠷᠠ ᠢᠰᠦ᠋ᠰ ᠤᠨᠲᠠᠴᠢᠬᠠᠵᠠᠢ᠃ ᠲᠡᠭᠡᠲᠡᠯᠡ ᠨᠠᠭᠤᠷ ᠲᠤ ᠳᠣᠭᠰᠢᠨ ᠰᠠᠯᠬᠢ ᠰᠢᠭᠤᠷᠴᠤ᠂ ᠣᠩ᠋ᠭᠣᠴᠠᠨ ᠳᠤ ᠤᠰᠤ ᠳᠦᠭᠦᠷᠴᠦ ᠠᠶᠤᠯ ᠲᠠᠢ ᠪᠣᠯᠪᠠ᠃ 24 ᠱᠠᠪᠢ ᠨᠠᠷ ᠨᠢ ᠢᠷᠡᠵᠦ ᠲᠡᠭᠦᠨ ᠢ ᠰᠡᠷᠢᠭᠡᠨ᠄ 《ᠪᠠᠭᠰᠢ ᠡ᠂ ᠪᠠᠭᠰᠢ ᠡ᠂ ᠪᠢᠳᠡ ᠦᠬᠦᠯᠡ︕》 ᠭᠡᠪᠡ᠃ ᠲᠡᠷᠡ ᠪᠣᠰᠴᠤ ᠰᠠᠯᠬᠢ ᠳᠠᠪᠠᠯᠭᠠᠨ ᠢ ᠵᠢᠮᠡᠯᠡᠬᠦ ᠳᠦ᠂ ᠰᠠᠯᠬᠢ ᠵᠣᠭᠰᠣᠵᠤ ᠨᠠᠮ ᠭᠦᠮ ᠪᠣᠯᠪᠠ᠃ 25 ᠲᠡᠷᠡ ᠱᠠᠪᠢ ᠨᠠᠷ ᠠᠴᠠ ᠪᠠᠨ᠄ 《ᠢᠲᠡᠭᠡᠯ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠳᠡ ᠡᠮᠢᠶᠡᠵᠦ ᠭᠠᠢᠬᠠᠨ᠄ 《ᠡᠨᠡ ᠬᠡᠨ ᠪᠣᠯᠴᠢᠬᠠᠪᠠ︖ ᠰᠠᠯᠬᠢ ᠪᠣᠯᠣᠨ ᠤᠰᠤ ᠶᠢ ᠬᠦᠷᠲᠡᠯᠡ ᠵᠠᠷᠯᠢᠭᠳᠠᠵᠤ ᠦᠭᠡᠨ ᠳᠡᠭᠡᠨ ᠣᠷᠣᠭᠤᠯᠵᠤ ᠪᠠᠢᠳᠠᠭ》 ᠭᠡᠯᠴᠡᠵᠡᠢ᠃
ᠴᠢᠳᠬᠥᠷ ᠱᠦᠭᠯᠡᠭᠰᠡᠨ ᠬᠥᠮᠦᠨ
26 ᠲᠡᠳᠡ ᠭᠠᠯᠢᠯᠠᠶᠠ ᠨᠠᠭᠤᠷ ᠤᠨ ᠴᠠᠭᠠᠨᠠᠬᠢ ᠭᠧᠷᠠᠰᠴᠤᠳ ᠤᠨ ᠨᠤᠲᠤᠭ ᠲᠤ ᠬᠦᠷᠪᠡ᠃ 27 ᠢᠰᠦ᠋ᠰ ᠬᠥᠪᠡᠭᠡᠨ ᠳᠦ ᠭᠠᠷᠬᠤ ᠳᠤ᠂ ᠡᠨᠡ ᠲᠣᠰᠬᠣᠨ ᠤ ᠨᠢᠭᠡᠨ ᠬᠥᠮᠦᠨ ᠲᠡᠭᠦᠨ ᠲᠡᠢ ᠤᠴᠠᠷᠠᠪᠠ᠃ ᠡᠨᠡ ᠬᠥᠮᠦᠨ ᠳᠦ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠪᠠᠷ ᠬᠤᠪᠴᠠᠰᠤ ᠡᠮᠦᠰᠦᠭᠡ ᠦᠭᠡᠢ᠂ ᠭᠡᠷ ᠲᠦ ᠰᠠᠭᠤᠭᠠ ᠦᠭᠡᠢ᠂ ᠬᠠᠷᠢᠨ ᠪᠤᠯᠠᠰᠢᠨ ᠤ ᠭᠠᠵᠠᠷ ᠲᠤ ᠰᠠᠭᠤᠳᠠᠭ ᠪᠠᠢᠵᠠᠢ᠃ 28 ᠲᠡᠷᠡ ᠢᠰᠦ᠋ᠰ ᠢ ᠬᠠᠷᠠᠭᠠᠳ ᠬᠠᠰᠬᠢᠷᠤᠭᠰᠠᠨ ᠤ ᠳᠠᠷᠠᠭᠠ᠂ ᠡᠮᠦᠨᠡ ᠨᠢ ᠰᠥᠭᠥᠳᠥᠭᠡᠳ ᠶᠡᠬᠡ ᠳᠠᠭᠤᠨ ᠢᠶᠠᠷ᠄ 《ᠲᠠ ᠨᠠᠳᠠ ᠲᠠᠢ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠪᠤᠢ︖ ᠳᠡᠭᠡᠳᠦ ᠶᠢᠨ ᠳᠡᠭᠡᠳᠦ ᠪᠤᠷᠬᠠᠨ ᠤ ᠬᠦᠦ ᠢᠰᠦ᠋ᠰ ᠡ᠂ ᠨᠠᠮᠠᠶᠢ ᠪᠦᠦ ᠲᠠᠷᠴᠢᠯᠠᠭᠠ︕》 ᠭᠡᠪᠡ᠃ 29 ᠤᠤᠯ ᠨᠢ ᠢᠰᠦ᠋ᠰ ᠪᠤᠵᠠᠷ ᠴᠢᠳᠬᠥᠷ ᠢ ᠲᠡᠷᠡ ᠬᠥᠮᠦᠨ ᠡᠴᠡ ᠭᠠᠷ ᠭᠡᠵᠦ ᠵᠠᠷᠯᠢᠭᠳᠠᠭᠰᠠᠨ ᠪᠠᠢᠵᠠᠢ᠃ ᠴᠢᠳᠬᠥᠷ ᠨᠥᠭᠥᠭᠡ ᠬᠥᠮᠦᠨ ᠢ ᠣᠯᠠᠨ ᠤᠳᠠᠭᠠ ᠡᠵᠡᠮᠳᠡᠭᠰᠡᠨ ᠪᠣᠯᠬᠣᠷ ᠡᠨᠡ ᠬᠥᠮᠦᠨ ᠭᠠᠪᠠ ᠳᠥᠩᠭᠡ ᠲᠠᠢ ᠰᠠᠬᠢᠭᠳᠠᠵᠤ ᠪᠠᠢᠪᠠ᠃ ᠬᠠᠷᠢᠨ ᠲᠡᠷᠡ ᠬᠦᠯᠢᠶᠡᠰᠦ ᠶᠢ ᠲᠠᠰᠤᠳᠠᠵᠤ ᠬᠠᠶᠠᠭᠠᠳ ᠴᠢᠳᠬᠥᠷ ᠲᠦ ᠬᠥᠲᠥᠯᠥᠭᠳᠡᠨ ᠴᠥᠯ ᠤᠷᠤᠭᠤ ᠶᠠᠪᠤᠳᠠᠭ ᠪᠠᠢᠯᠠ᠃ 30 ᠢᠰᠦ᠋ᠰ᠄ 《ᠨᠡᠷᠡ ᠴᠢᠨᠢ ᠬᠡᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠷᠡ᠄ 《ᠯᠧᠭᠢᠶᠣᠨ》 11 ᠭᠡᠪᠡ᠃ ᠤᠴᠢᠷ ᠨᠢ ᠡᠨᠡ ᠬᠥᠮᠦᠨ ᠳᠦ ᠣᠯᠠᠨ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠪᠠᠢᠵᠠᠢ᠃ 31 ᠴᠢᠳᠬᠥᠷ ᠤᠳ ᠥᠪᠡᠷᠰᠡᠳ ᠢ ᠨᠢ ᠢᠷᠤᠭᠠᠷ ᠦᠭᠡᠢ ᠨᠦᠬᠡᠨ ᠳᠦ ᠣᠷᠣ ᠭᠡᠵᠦ ᠪᠦᠦ ᠵᠠᠷᠯᠢᠭᠳᠠᠭᠠᠴᠢ ᠬᠡᠮᠡᠨ ᠢᠰᠦ᠋ᠰ ᠡᠴᠡ ᠭᠤᠶᠤᠭᠰᠠᠭᠠᠷ ᠪᠠᠢᠯᠠ᠃
32 ᠶᠠᠭ ᠲᠡᠷᠡ ᠦᠶᠡ ᠳᠦ᠂ ᠠᠭᠤᠯᠠᠨ ᠳᠤ ᠰᠦᠷᠦᠭ ᠭᠠᠬᠠᠢ ᠢᠳᠡᠰᠢᠯᠡᠵᠦ ᠪᠠᠢᠵᠠᠢ᠃ ᠴᠢᠳᠬᠥᠷ ᠤᠳ ᠭᠠᠬᠠᠢ ᠶᠢᠨ ᠰᠦᠷᠦᠭ ᠲᠦ ᠣᠷᠣᠬᠤ ᠵᠥᠪᠰᠢᠶᠡᠷᠡᠯ ᠭᠤᠶᠤᠭᠰᠠᠨ ᠳᠤ᠂ ᠢᠰᠦ᠋ᠰ ᠵᠥᠪᠰᠢᠶᠡᠷᠡᠪᠡ᠃ 33 ᠴᠢᠳᠬᠥᠷ ᠤᠳ ᠲᠡᠷᠡ ᠬᠥᠮᠦᠨ ᠡᠴᠡ ᠭᠠᠷᠴᠤ ᠭᠠᠬᠠᠢ ᠤᠷᠤᠭᠤ ᠣᠷᠣᠵᠠᠢ᠃ ᠰᠦᠷᠦᠭ ᠭᠠᠬᠠᠢ ᠤᠷᠤᠭᠤᠳᠤᠨ ᠭᠦᠶᠦᠯᠳᠦᠭᠰᠡᠭᠡᠷ ᠨᠠᠭᠤᠷ ᠲᠤ ᠤᠨᠠᠨ ᠵᠢᠪᠴᠡᠢ᠃
34 ᠭᠠᠬᠠᠢᠴᠢᠳ ᠶᠠᠭᠤ ᠪᠣᠯᠣᠭᠰᠠᠨ ᠢ ᠬᠠᠷᠠᠭᠠᠳ ᠳᠤᠲᠠᠭᠠᠵᠤ᠂ ᠡᠭᠦᠨ ᠢ ᠭᠠᠴᠠᠭᠠ ᠲᠣᠰᠬᠣᠨ ᠢᠶᠠᠷ ᠳᠤᠭᠤᠯᠭᠠᠪᠠ᠃ 35 ᠬᠥᠮᠦᠰ ᠡᠨᠡ ᠶᠠᠪᠤᠳᠠᠯ ᠢ ᠦᠵᠡᠬᠦ ᠪᠡᠷ ᠢᠰᠦ᠋ᠰ ᠤᠷᠤᠭᠤ ᠢᠷᠡᠭᠡᠳ ᠴᠢᠳᠬᠥᠷ ᠡᠴᠡ ᠪᠡᠨ ᠰᠠᠯᠤᠭᠰᠠᠨ ᠥᠨᠥᠬᠢ ᠬᠥᠮᠦᠨ ᠦ ᠬᠤᠪᠴᠠᠰᠤ ᠲᠠᠢ᠂ ᠡᠷᠡᠭᠦᠯ ᠰᠠᠷᠠᠭᠤᠯ ᠪᠣᠯᠵᠤ ᠢᠰᠦ᠋ᠰ ᠤᠨ ᠬᠥᠯ ᠦᠨ ᠬᠠᠵᠠᠭᠤ ᠳᠤ ᠰᠠᠭᠤᠵᠤ ᠪᠠᠢᠭᠠ ᠶᠢ ᠣᠯᠵᠤ ᠦᠵᠡᠭᠡᠳ ᠠᠶᠤᠵᠠᠭᠠᠪᠠ᠃ 36 ᠡᠨᠡ ᠶᠠᠪᠤᠳᠠᠯ ᠢ ᠦᠵᠡᠭᠰᠡᠨ ᠬᠥᠮᠦᠰ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠬᠥᠮᠦᠨ ᠦ ᠶᠠᠭᠠᠬᠢᠵᠤ ᠠᠪᠤᠷᠠᠭᠳᠠᠭᠰᠠᠨ ᠢ ᠣᠯᠠᠨ ᠳᠤ ᠳᠤᠭᠤᠯᠭᠠᠪᠠ᠃ 37 ᠭᠧᠷᠠᠰᠴᠤᠳ ᠤᠨ ᠨᠤᠲᠤᠭ ᠤᠨ ᠣᠢᠷᠠ ᠣᠷᠴᠢᠮ ᠤᠨ ᠬᠢᠨ ᠪᠦᠭᠦᠳᠡᠭᠡᠷ ᠶᠡᠬᠡᠳᠡ ᠠᠶᠤᠵᠤ᠂ ᠲᠡᠨᠳᠡ ᠡᠴᠡ ᠵᠠᠢᠯᠠᠬᠤ ᠶᠢ ᠨᠢ ᠢᠰᠦ᠋ᠰ ᠡᠴᠡ ᠭᠤᠶᠤᠭᠰᠠᠨ ᠳᠤ᠂ ᠲᠡᠷᠡ ᠣᠩ᠋ᠭᠣᠴᠠᠨ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠪᠤᠴᠠᠬᠤ ᠪᠠᠷ ᠪᠣᠯᠪᠠ᠃ 38 ᠴᠢᠳᠬᠥᠷ ᠡᠴᠡ ᠰᠠᠯᠤᠭᠰᠠᠨ ᠲᠡᠷᠡ ᠬᠥᠮᠦᠨ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠪᠠᠢᠬᠤ ᠶᠢ ᠬᠦᠰᠡᠭᠰᠡᠨ ᠪᠣᠯᠪᠠᠴᠤ ᠢᠰᠦ᠋ᠰ᠄ 39 《ᠭᠡᠷ ᠲᠡᠭᠡᠨ ᠬᠠᠷᠢ᠂ ᠪᠤᠷᠬᠠᠨ ᠴᠢᠮᠠ ᠳᠤ ᠬᠡᠷᠬᠢᠨ ᠬᠠᠨᠳᠤᠭᠰᠠᠨ ᠢ ᠶᠠᠷᠢ》 ᠭᠡᠳ ᠲᠡᠭᠦᠨ ᠢ ᠶᠠᠪᠤᠭᠤᠯᠵᠠᠢ᠃ ᠡᠢᠨ ᠬᠦ ᠲᠡᠷᠡ ᠶᠠᠪᠤᠭᠠᠳ ᠢᠰᠦ᠋ᠰ ᠥᠪᠡᠷ ᠲᠤᠨᠢ ᠬᠡᠷᠬᠢᠨ ᠬᠠᠨᠳᠤᠭᠰᠠᠨ ᠢ ᠲᠣᠰᠬᠣᠨ ᠳᠠᠶᠠᠭᠠᠷ ᠲᠤ ᠲᠤᠩ᠋ᠬᠠᠭᠯᠠᠵᠤ ᠪᠠᠢᠯᠠ᠃
ᠭᠠᠢᠬᠠᠮᠰᠢᠭᠲᠤ ᠡᠳᠡᠭᠡᠷᠡᠭᠦᠯᠦᠯᠲᠡ
40 ᠢᠰᠦ᠋ᠰ ᠪᠤᠴᠠᠵᠤ ᠢᠷᠡᠬᠦ ᠳᠦ᠂ ᠣᠯᠠᠨ ᠬᠥᠮᠦᠨ ᠤᠭᠳᠤᠵᠤ ᠠᠪᠴᠠᠢ᠃ ᠲᠡᠳᠡ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ᠃ 41 ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠠᠬᠠᠯᠠᠭᠴᠢ ᠶᠠᠢᠷ ᠭᠡᠭᠴᠢ ᠬᠥᠮᠦᠨ ᠢᠷᠡᠭᠡᠳ ᠢᠰᠦ᠋ᠰ ᠤᠨ ᠬᠥᠯ ᠦᠨ ᠡᠮᠦᠨᠡ ᠰᠥᠭᠥᠳᠴᠦ ᠭᠡᠷ ᠲᠤᠨᠢ ᠣᠴᠢᠬᠤ ᠶᠢ ᠭᠤᠶᠤᠪᠠ᠃ 42 ᠤᠴᠢᠷ ᠨᠢ᠂ ᠠᠷᠪᠠᠨ ᠬᠣᠶᠠᠷ ᠣᠷᠴᠢᠮ ᠨᠠᠰᠤᠲᠠᠢ ᠭᠠᠭᠴᠠ ᠥᠬᠢᠨ ᠨᠢ ᠦᠬᠦᠬᠦ ᠶᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠪᠠᠢᠵᠠᠢ᠃ ᠢᠰᠦ᠋ᠰ ᠶᠠᠪᠤᠬᠤ ᠳᠤ᠂ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠲᠡᠭᠦᠨ ᠢ ᠬᠡᠢ ᠵᠠᠢ ᠦᠭᠡᠢ ᠰᠢᠬᠠᠵᠤ ᠪᠠᠢᠯᠠ᠃ 43 ᠲᠡᠳᠡᠨ ᠦ ᠳᠤᠮᠳᠠ ᠠᠷᠪᠠᠨ ᠬᠣᠶᠠᠷ ᠵᠢᠯ ᠤᠨ ᠲᠤᠷᠰᠢ ᠴᠢᠰᠤ ᠪᠠᠭᠤᠯᠭᠠᠬᠤ ᠡᠪᠡᠳᠴᠢᠨ ᠲᠡᠢ ᠪᠠᠢᠭᠰᠠᠨ ᠨᠢᠭᠡᠨ ᠪᠦᠰᠡᠭᠦᠢ ᠪᠠᠢᠵᠠᠢ᠃ ᠲᠡᠷᠡ ᠠᠯᠢ ᠪᠠᠢᠳᠠᠭ ᠢᠶᠠᠨ ᠵᠠᠷᠤᠴᠠᠭᠤᠯᠵᠤ ᠡᠮᠴᠢᠯᠡᠭᠦᠯᠥᠭᠰᠡᠨ ᠪᠣᠯᠪᠠᠴᠤ ᠬᠡᠨ ᠴᠤ ᠲᠡᠭᠦᠨ ᠢ ᠡᠳᠡᠭᠡᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ 44 ᠲᠡᠷᠡ ᠪᠦᠰᠡᠭᠦᠢ ᠢᠰᠦ᠋ᠰ ᠤᠨ ᠠᠷᠤ ᠳᠤ ᠣᠢᠷᠠᠲᠤᠵᠤ ᠬᠤᠪᠴᠠᠰᠤᠨ ᠤ ᠬᠢᠨᠢ ᠬᠣᠷᠮᠣᠢ ᠳᠤ ᠭᠠᠷ ᠢᠶᠠᠨ ᠬᠦᠷᠭᠡᠲᠡᠯᠡ ᠴᠢᠰᠤ ᠪᠠᠭᠤᠬᠤ ᠨᠢ ᠲᠡᠷᠡ ᠳᠠᠷᠤᠢ ᠵᠣᠭᠰᠣᠪᠠ᠃ 45 ᠢᠰᠦ᠋ᠰ᠄ 《ᠬᠡᠨ ᠨᠠᠳᠠ ᠳᠤ ᠭᠠᠷ ᠢᠶᠠᠨ ᠬᠦᠷᠭᠡᠪᠡ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠪᠦᠭᠦᠳᠡᠭᠡᠷ᠄ 《ᠪᠢ ᠪᠢᠰᠢ》 ᠭᠡᠵᠡᠭᠡᠪᠡ᠃ ᠫᠧᠲ᠋ᠧᠷ ᠲᠡᠭᠦᠨ ᠳᠦ᠄ 《ᠪᠠᠭᠰᠢ ᠡ᠂ ᠡᠨᠡ ᠣᠯᠠᠨ ᠬᠥᠮᠦᠨ ᠲᠠᠨ ᠢ ᠪᠦᠴᠢᠨ ᠰᠢᠬᠠᠵᠤ ᠪᠠᠢᠨᠠ ᠰᠢᠦ ᠳᠠ》 ᠭᠡᠬᠦ ᠳᠦ᠂ 46 ᠢᠰᠦ᠋ᠰ᠄ 《ᠬᠡᠨ ᠨᠢᠭᠡ ᠨᠢ ᠨᠠᠳᠠ ᠳᠤ ᠭᠠᠷ ᠢᠶᠠᠨ ᠬᠦᠷᠭᠡᠵᠡᠢ᠃ ᠨᠠᠳᠠ ᠠᠴᠠ ᠬᠦᠴᠦ ᠭᠠᠷᠤᠭᠰᠠᠨ ᠨᠢ ᠮᠡᠳᠡᠷᠡᠭᠳᠡᠯᠡ》 ᠭᠡᠪᠡ᠃ 47 ᠲᠡᠷᠡ ᠡᠮᠡᠭᠲᠡᠢ ᠨᠢᠭᠤᠵᠤ ᠪᠣᠯᠬᠤ ᠦᠭᠡᠢ ᠪᠡᠨ ᠮᠡᠳᠡᠭᠡᠳ ᠴᠡᠴᠡᠷᠡᠭᠰᠡᠭᠡᠷ ᠢᠷᠡᠵᠦ ᠢᠰᠦ᠋ᠰ ᠤᠨ ᠡᠮᠦᠨᠡ ᠰᠥᠭᠥᠳᠥᠨ᠂ ᠭᠠᠷ ᠢᠶᠠᠨ ᠬᠦᠷᠭᠡᠭᠰᠡᠨ ᠰᠢᠯᠲᠠᠭᠠᠨ ᠪᠠ ᠳᠠᠷᠤᠢᠬᠠᠨ ᠡᠳᠡᠭᠡᠷᠡᠭᠰᠡᠨ ᠢᠶᠡᠨ ᠬᠠᠮᠤᠭ ᠣᠯᠠᠨ ᠤ ᠡᠮᠦᠨᠡ ᠶᠠᠷᠢᠯᠠ᠃ 48 ᠢᠰᠦ᠋ᠰ ᠲᠡᠭᠦᠨ ᠳᠦ᠄ 《ᠥᠬᠢᠨ ᠮᠢᠨᠢ᠂ ᠢᠲᠡᠭᠡᠯ ᠴᠢᠨᠢ ᠴᠢᠮᠠᠶᠢ ᠠᠪᠤᠷᠠᠯᠠ᠃ ᠠᠮᠤᠷ ᠲᠠᠢᠪᠤᠩ ᠶᠠᠪᠤᠭᠠᠷᠠᠢ》 ᠭᠡᠵᠡᠢ᠃
49 ᠲᠡᠷᠡ ᠡᠢᠨ ᠬᠦ ᠶᠠᠷᠢᠵᠤ ᠪᠠᠢᠲᠠᠯᠠ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠠᠬᠠᠯᠠᠭᠴᠢ ᠶᠢᠨ ᠭᠡᠷ ᠡᠴᠡ ᠬᠥᠮᠦᠨ ᠢᠷᠡᠵᠦ᠄ 《ᠲᠠᠨ ᠤ ᠥᠬᠢᠨ ᠠᠮᠢ ᠲᠠᠯᠪᠢᠯᠠ᠃ ᠪᠠᠭᠰᠢ ᠳᠤ ᠪᠢᠲᠡᠭᠡᠢ ᠲᠦᠪᠡᠭ ᠪᠣᠯᠣᠭᠠᠷᠠᠢ》 ᠭᠡᠪᠡ᠃ 50 ᠢᠰᠦ᠋ᠰ ᠡᠭᠦᠨ ᠢ ᠰᠣᠨᠣᠰᠣᠭᠠᠳ᠂ ᠶᠠᠢᠷ ᠲᠤ᠄ 《ᠪᠦᠦ ᠠᠶᠤ᠂ ᠵᠥᠪᠬᠡᠨ ᠢᠲᠡᠭᠡ᠂ ᠲᠡᠭᠡᠪᠡᠯ ᠥᠬᠢᠨ ᠴᠢᠨᠢ ᠡᠳᠡᠭᠡᠨᠡ》 ᠭᠡᠯᠡ᠃ 51 ᠲᠡᠷᠡ ᠭᠡᠷ ᠲᠤᠨᠢ ᠬᠦᠷᠦᠭᠡᠳ ᠫᠧᠲ᠋ᠧᠷ᠂ ᠶᠣᠬᠠᠨ᠂ ᠶᠠᠺᠣᠪ ᠪᠣᠯᠣᠨ ᠥᠬᠢᠨ ᠤ ᠡᠴᠢᠭᠡ ᠡᠬᠡ ᠡᠴᠡ ᠥᠭᠡᠷᠡ ᠬᠡᠨ ᠦ ᠴᠤ ᠣᠷᠣᠬᠤ ᠶᠢ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃ 52 ᠬᠥᠮᠦᠰ ᠴᠥᠮ ᠢᠶᠡᠷ ᠢᠶᠠᠨ ᠥᠬᠢᠨ ᠤ ᠬᠣᠢᠨᠠ ᠠᠴᠠ ᠭᠠᠰᠢᠭᠤᠳᠠᠨ ᠤᠬᠢᠯᠠᠬᠤ ᠳᠤ᠂ ᠢᠰᠦ᠋ᠰ᠄ 《ᠪᠦᠦ ᠤᠬᠢᠯᠠ᠂ ᠲᠡᠷᠡ ᠦᠬᠦᠭᠡ ᠦᠭᠡᠢ᠂ ᠬᠠᠷᠢᠨ ᠤᠨᠲᠠᠵᠤ ᠪᠠᠢᠨᠠ》 ᠭᠡᠵᠡᠢ᠃ 53 ᠲᠡᠳᠡ ᠥᠬᠢᠨ ᠤ ᠦᠬᠦᠭᠰᠡᠨ ᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠢᠰᠦ᠋ᠰ ᠢ ᠡᠯᠡᠭᠯᠡᠪᠡ᠃ 54 ᠢᠰᠦ᠋ᠰ ᠥᠬᠢᠨ ᠤ ᠭᠠᠷ ᠠᠴᠠ ᠪᠠᠷᠢᠵᠤ᠄ 《ᠥᠬᠢᠨ ᠮᠢᠨᠢ᠂ ᠪᠣᠰ︕》 ᠭᠡᠵᠦ ᠳᠠᠭᠤᠳᠠᠭᠰᠠᠨ ᠳᠤ᠂ 55 ᠰᠦᠨᠡᠰᠦ ᠨᠢ ᠪᠤᠴᠠᠨ ᠢᠷᠡᠵᠦ ᠥᠬᠢᠨ ᠳᠣᠣᠷᠠ ᠪᠠᠨ ᠪᠣᠰᠪᠠ᠃ ᠢᠰᠦ᠋ᠰ ᠥᠬᠢᠨ ᠳᠤ ᠢᠳᠡᠬᠦ ᠶᠠᠭᠤᠮᠠ ᠥᠭᠬᠦ ᠶᠢ ᠵᠠᠬᠢᠪᠠ᠃ 56 ᠥᠬᠢᠨ ᠤ ᠡᠴᠢᠭᠡ ᠡᠬᠡ ᠪᠢᠰᠢᠷᠡᠪᠡ᠃ ᠡᠨᠡ ᠶᠠᠪᠤᠳᠠᠯ ᠤᠨ ᠲᠤᠬᠠᠢ ᠬᠡᠨ ᠳᠦ ᠴᠤ ᠶᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠢᠰᠦ᠋ᠰ ᠲᠡᠳᠡᠨ ᠳᠦ ᠵᠠᠬᠢᠯᠠ᠃