ᠨᠧᠾᠧᠮᠢᠶᠠ ᠳᠥᠷᠪᠡ
ᠳᠠᠢᠰᠤᠨ ᠤ ᠡᠰᠡᠷᠭᠦᠴᠡᠯ
1 ᠪᠢᠳᠡ ᠬᠡᠷᠡᠮ ᠢ ᠰᠡᠷᠭᠦᠭᠡᠨ ᠪᠠᠷᠢᠵᠤ ᠪᠠᠢᠭᠠ ᠶᠢ ᠰᠠᠨᠪᠠᠯᠠᠲ ᠰᠣᠨᠣᠰᠣᠭᠠᠳ ᠶᠡᠬᠡᠳᠡ ᠠᠭᠤᠷᠯᠠᠨ ᠴᠢᠬᠤᠯᠳᠠᠵᠤ᠂ ᠶᠦᠳᠠᠢᠴᠤᠳ ᠢ ᠳᠣᠷᠣᠮᠵᠢᠯᠠᠨ 2 ᠬᠠᠮᠲᠤᠷᠠᠭᠴᠢᠳ ᠪᠣᠯᠣᠨ ᠰᠠᠮᠠᠷᠢᠶᠠ ᠶᠢᠨ ᠴᠡᠷᠢᠭ ᠤᠳ ᠤᠨ ᠡᠮᠦᠨᠡ᠄ 《ᠡᠳᠡᠭᠡᠷ ᠳᠣᠷᠣᠢ ᠶᠦᠳᠠᠢᠴᠤᠳ ᠤᠨ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶᠢ ᠬᠠᠷᠠᠭᠠᠴᠢ︕ ᠲᠡᠳᠡ ᠥᠪᠡᠷᠰᠡᠳ ᠢᠶᠡᠨ ᠪᠣᠰᠬᠠᠵᠤ ᠴᠢᠳᠠᠨᠠ ᠭᠡᠵᠢ ᠤᠤ︖ ᠲᠡᠳᠡ ᠲᠠᠬᠢᠯ ᠡᠷᠭᠦᠨᠡ ᠭᠡᠨᠡ ᠤᠤ︖ ᠨᠢᠭᠡ ᠡᠳᠦᠷ ᠦᠨ ᠳᠣᠲᠣᠷᠠ ᠳᠠᠭᠤᠰᠬᠠᠨᠠ ᠭᠡᠨᠡ ᠤᠤ︖ ᠰᠢᠲᠠᠭᠰᠠᠨ ᠴᠢᠯᠠᠭᠤ ᠨᠤᠭᠤᠳ ᠢᠶᠠᠨ ᠰᠢᠷᠣᠢ ᠶᠢᠨ ᠣᠪᠣᠭᠠᠨ ᠠᠴᠠ ᠭᠠᠷᠭᠠᠭᠠᠳ ᠠᠮᠢ ᠲᠠᠢ ᠪᠣᠯᠭᠠᠨᠠ ᠭᠡᠵᠢ ᠤᠤ︖》 ᠭᠡᠪᠡ᠃ 3 ᠬᠠᠵᠠᠭᠤ ᠳᠤᠨᠢ ᠪᠠᠢᠭᠰᠠᠨ ᠠᠮᠣᠨ ᠬᠥᠮᠦᠨ ᠲᠣᠪᠢᠶᠠ᠄ 《ᠲᠡᠳᠡ ᠴᠢᠯᠠᠭᠤᠨ ᠬᠡᠷᠡᠮ ᠪᠣᠰᠬᠠᠵᠤ ᠪᠠᠢᠭᠠ ᠴᠤ ᠲᠡᠭᠦᠨ ᠦ ᠬᠢᠨᠢ ᠳᠡᠭᠡᠭᠦᠷ ᠦᠨᠡᠭᠡ ᠬᠠᠷᠠᠢᠪᠠᠯ ᠨᠤᠷᠠᠬᠤ ᠪᠣᠯᠣᠨᠠ》 ᠭᠡᠯᠡ᠃ 4 ᠪᠢᠳᠡᠨ ᠦ ᠪᠤᠷᠬᠠᠨ ᠰᠣᠨᠣᠰᠣᠭᠠᠴᠢ᠂ ᠪᠢᠳᠡ ᠳᠣᠷᠣᠮᠵᠢᠯᠠᠭᠳᠠᠵᠤ ᠪᠠᠢᠨᠠ︕ ᠲᠡᠳᠡᠨ ᠦ ᠳᠣᠷᠣᠮᠵᠢᠯᠠᠯ ᠥᠪᠡᠷᠰᠡᠳ ᠦᠨ ᠬᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠤᠴᠠᠵᠤ᠂ ᠲᠡᠳᠡ ᠴᠥᠯᠡᠭᠳᠡᠭᠰᠡᠨ ᠭᠠᠵᠠᠷ ᠲᠠᠭᠠᠨ ᠣᠯᠵᠠ ᠪᠣᠯᠣᠭ᠃ 5 ᠲᠡᠳᠡᠨ ᠦ ᠭᠡᠮ ᠢ ᠪᠦᠦ ᠬᠠᠯᠬᠠᠯᠠᠭᠠᠴᠢ᠂ ᠲᠡᠳᠡᠨ ᠦ ᠨᠢᠭᠦᠯ ᠢ ᠪᠦᠦ ᠪᠠᠯᠠᠯᠤᠭᠠᠴᠢ᠃ ᠲᠡᠳᠡ ᠲᠠᠨ ᠢ ᠪᠠᠷᠢᠯᠭᠠᠴᠢᠳ ᠤᠨ ᠡᠮᠦᠨᠡ ᠠᠭᠤᠷᠰᠠᠭᠤᠯᠤᠭᠰᠠᠨ ᠶᠤᠮ᠃
6 ᠪᠢᠳᠡ ᠬᠡᠷᠡᠮ ᠢ ᠪᠠᠷᠢᠭᠰᠠᠭᠠᠷ ᠪᠠᠢᠯᠠ᠃ ᠠᠷᠠᠳ ᠲᠦᠮᠡᠨ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠬᠥᠳᠡᠯᠮᠦᠷᠢᠯᠡᠵᠦ᠂ ᠪᠦᠬᠦ ᠬᠡᠷᠡᠮ ᠢ ᠥᠨᠳᠥᠷ ᠦᠨ ᠬᠢᠨᠢ ᠬᠠᠭᠠᠰ ᠲᠤ ᠬᠦᠷᠭᠡᠵᠡᠢ᠃
7 ᠶᠧᠷᠦ᠋ᠰᠠᠯᠧᠮ ᠤᠨ ᠬᠡᠷᠡᠮ ᠦᠨ ᠵᠠᠰᠠᠪᠤᠷᠢ ᠤᠷᠤᠭᠰᠢᠲᠠᠢ ᠶᠠᠪᠤᠭᠳᠠᠵᠤ᠂ ᠰᠡᠲᠡᠷᠬᠡᠢ ᠨᠢ ᠪᠥᠭᠯᠡᠭᠳᠡᠵᠦ ᠪᠠᠢᠭᠠ ᠶᠢ ᠰᠠᠨᠪᠠᠯᠠᠲ᠂ ᠲᠣᠪᠢᠶᠠ᠂ ᠠᠷᠠᠪ ᠤᠳ᠂ ᠠᠮᠣᠨᠴᠤᠳ ᠪᠣᠯᠣᠨ ᠠᠱᠠᠳᠣᠳ᠋ᠴᠤᠳ ᠰᠣᠨᠣᠰᠣᠭᠠᠳ ᠶᠡᠬᠡᠳᠡ ᠠᠭᠤᠷᠯᠠᠪᠠ᠃ 8 ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠨᠡᠢᠯᠡᠨ ᠬᠤᠤᠪᠢᠯᠳᠤᠵᠤ᠄ 《ᠶᠧᠷᠦ᠋ᠰᠠᠯᠧᠮ ᠳᠤ ᠣᠴᠢᠵᠤ ᠪᠠᠢᠯᠳᠤᠭᠠᠨ ᠬᠢᠵᠦ ᠦᠢᠮᠡᠭᠦᠯᠵᠡᠭᠡᠶᠡ》 ᠭᠡᠯᠴᠡᠪᠡ᠃ 9 ᠪᠢᠳᠡ ᠪᠤᠷᠬᠠᠨ ᠳᠠᠭᠠᠨ ᠳᠠᠭᠠᠳᠬᠠᠭᠰᠠᠨ ᠪᠠ ᠲᠡᠳᠡᠨ ᠦ ᠤᠯᠠᠮ ᠢᠶᠠᠷ ᠬᠠᠷᠠᠭᠤᠯ ᠲᠠᠯᠪᠢᠵᠤ᠂ ᠡᠳᠦᠷ ᠰᠥᠨᠢ ᠦᠭᠡᠢ ᠬᠠᠷᠠᠭᠤᠯᠳᠠᠭᠤᠯᠪᠠ᠃
10 ᠶᠦᠳᠠᠢᠴᠤᠳ᠄ 《ᠬᠣᠭ ᠠᠰᠤᠷᠤ ᠶᠡᠬᠡ ᠪᠠᠢᠨᠠ᠂ ᠬᠥᠳᠡᠯᠮᠦᠷᠢᠯᠡᠭᠴᠢ ᠶᠢᠨ ᠬᠦᠴᠦ ᠰᠤᠯᠠᠳᠠᠵᠤ ᠪᠠᠢᠨᠠ᠂ ᠬᠡᠷᠡᠮ ᠢ ᠪᠣᠰᠬᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠢ》 ᠭᠡᠵᠦ ᠪᠠᠢᠭᠰᠠᠨ ᠪᠣᠯ᠂ 11 ᠪᠢᠳᠡᠨ ᠦ ᠳᠠᠢᠰᠤᠨ ᠨᠤᠭᠤᠳ᠄ 《ᠲᠡᠳᠡ ᠮᠡᠳᠡᠭᠡ ᠦᠭᠡᠢ᠂ ᠬᠠᠷᠠᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ ᠪᠢᠳᠡ ᠳᠤᠮᠳᠠ ᠨᠢ ᠣᠷᠣᠭᠠᠳ ᠲᠡᠳᠡᠨ ᠢ ᠠᠯᠠᠵᠤ᠂ ᠠᠵᠢᠯ ᠢ ᠨᠢ ᠵᠣᠭᠰᠣᠭᠠᠶᠠ》 ᠭᠡᠵᠦ ᠪᠠᠢᠪᠠ᠃ 12 ᠬᠠᠷᠢᠨ ᠲᠡᠳᠡᠨ ᠦ ᠣᠢᠷᠠᠯᠴᠠᠭᠠ ᠰᠠᠭᠤᠳᠠᠭ ᠶᠦᠳᠠᠢᠴᠤᠳ ᠢᠷᠡᠵᠡᠭᠡᠵᠦ᠂ ᠪᠢᠳᠡᠨ ᠢ ᠳᠣᠪᠲᠣᠯᠬᠤ ᠪᠠᠷ ᠬᠤᠤᠪᠢᠯᠳᠤᠵᠤ ᠪᠠᠢᠭᠠ ᠲᠡᠳᠡᠨ ᠦ ᠠᠷᠭᠠ ᠵᠠᠯᠢ ᠶᠢ ᠪᠢᠳᠡᠨ ᠳᠦ ᠠᠷᠪᠠᠭᠠᠳ ᠤᠳᠠᠭᠠ ᠬᠡᠯᠡᠭᠰᠡᠨ ᠲᠤᠯᠠ 13 ᠪᠢ ᠠᠷᠠᠳ ᠣᠯᠠᠨ ᠢ ᠰᠡᠯᠡᠮᠡ᠂ ᠵᠢᠳᠠ᠂ ᠨᠤᠮᠤ ᠰᠤᠮᠤ ᠪᠠᠷ ᠵᠡᠪᠰᠡᠭᠯᠡᠭᠦᠯᠦᠭᠡᠳ ᠠᠢᠮᠠᠭ ᠠᠢᠮᠠᠭ ᠢᠶᠠᠷ ᠨᠢ ᠬᠡᠷᠡᠮ ᠦᠨ ᠠᠷᠤ ᠲᠠᠯᠠ ᠶᠢᠨ ᠨᠠᠮ ᠵᠠᠳᠠᠭᠠᠢ ᠭᠠᠵᠠᠷ ᠢᠶᠠᠷ ᠪᠠᠢᠷᠢᠯᠠᠭᠤᠯᠪᠠ᠃ 14 ᠪᠢ ᠡᠨᠡ ᠪᠦᠬᠦᠨ ᠢ ᠠᠵᠢᠭᠯᠠᠭᠠᠳ ᠨᠣᠶᠠᠳ ᠲᠦᠰᠢᠮᠡᠳ ᠪᠣᠯᠣᠨ ᠪᠤᠰᠤᠳ ᠠᠷᠠᠳ ᠣᠯᠠᠨ ᠳᠤ᠄ 《ᠲᠡᠳᠡᠨ ᠡᠴᠡ ᠪᠦᠦ ᠠᠶᠤ᠃ ᠠᠤᠭᠠ᠂ ᠠᠶᠤᠮᠰᠢᠭᠲᠤ ᠡᠵᠡᠨ ᠢ ᠪᠣᠳᠣᠵᠤ᠂ ᠠᠬᠠ ᠳᠡᠭᠦᠦᠰ᠂ ᠬᠥᠪᠡᠭᠦᠳ ᠥᠬᠢᠳ᠂ ᠡᠬᠡᠨᠡᠷ ᠬᠢᠭᠡᠳ ᠠᠷᠤ ᠭᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠲᠤᠯᠤᠯᠳᠤᠭᠲᠤᠨ》 ᠭᠡᠵᠦ ᠬᠡᠯᠡᠪᠡ᠃
15 ᠥᠪᠡᠷᠰᠡᠳ ᠦᠨ ᠬᠢᠨᠢ ᠲᠥᠯᠥᠪᠯᠡᠭᠡ ᠵᠠᠳᠠᠷᠠᠵᠤ᠂ ᠪᠤᠷᠬᠠᠨ ᠲᠡᠭᠦᠨ ᠢ ᠨᠢ ᠨᠤᠷᠠᠭᠠᠭᠰᠠᠨ ᠢ ᠪᠢᠳᠡᠨ ᠦ ᠳᠠᠢᠰᠤᠨ ᠮᠡᠳᠡᠵᠡᠢ᠃ ᠪᠢᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠬᠡᠷᠡᠮ ᠤᠷᠤᠭᠤ᠂ ᠬᠥᠮᠦᠨ ᠪᠦᠷᠢ ᠠᠵᠢᠯ ᠤᠷᠤᠭᠤ ᠪᠠᠨ ᠪᠤᠴᠠᠪᠠ᠃ 16 ᠬᠠᠷᠢᠨ ᠲᠡᠷᠡ ᠡᠳᠦᠷ ᠡᠴᠡ ᠬᠣᠢᠰᠢ ᠮᠠᠨ ᠤ ᠬᠢᠨ ᠤ ᠬᠠᠭᠠᠰ ᠨᠢ ᠠᠵᠢᠯ ᠬᠢᠵᠦ᠂ ᠬᠠᠭᠠᠰ ᠨᠢ ᠵᠢᠳᠠ᠂ ᠪᠠᠮᠪᠠᠢ᠂ ᠨᠤᠮᠤ ᠪᠠᠷᠢᠨ ᠬᠤᠶᠠᠭᠯᠠᠵᠤ᠂ ᠬᠡᠷᠡᠮ ᠪᠠᠷᠢᠵᠤ ᠪᠠᠢᠭᠠ ᠶᠦᠳᠠ ᠶᠢᠨ ᠪᠦᠬᠦ ᠭᠡᠷ ᠦᠨ ᠬᠢᠨ ᠤ ᠠᠷᠤ ᠳᠤ ᠳᠠᠭᠠᠭᠠᠮᠠᠯ ᠨᠠᠷ ᠵᠣᠭᠰᠣᠵᠤ ᠪᠠᠢᠯᠠ᠃ 17 ᠠᠴᠢᠶᠠ ᠵᠥᠭᠡᠭᠡᠭᠴᠢᠳ ᠨᠢᠭᠡ ᠭᠠᠷ ᠢᠶᠠᠷ ᠢᠶᠠᠨ ᠠᠵᠢᠯ ᠢᠶᠠᠨ ᠬᠢᠵᠦ᠂ ᠨᠥᠭᠥᠭᠡ ᠭᠠᠷ ᠢᠶᠠᠷ ᠢᠶᠠᠨ ᠵᠡᠪᠰᠡᠭ ᠢᠶᠡᠨ ᠪᠠᠷᠢᠵᠤ᠂ 18 ᠪᠠᠷᠢᠯᠭᠠᠴᠢᠨ ᠪᠦᠷᠢ ᠠᠵᠢᠯ ᠬᠢᠬᠦ ᠳᠡᠭᠡᠨ ᠰᠡᠯᠡᠮᠡ ᠪᠡᠨ ᠲᠠᠰᠢᠶᠠᠨ ᠳᠠᠭᠠᠨ ᠵᠡᠭᠦᠵᠦ ᠶᠠᠪᠤᠳᠠᠭ ᠪᠠᠢᠯᠠ᠃ ᠪᠦᠷᠢᠶᠡᠴᠢᠨ ᠮᠢᠨᠦ ᠬᠠᠵᠠᠭᠤ ᠳᠤ ᠪᠠᠢᠪᠠ᠃ 19 ᠪᠢ ᠨᠣᠶᠠᠳ ᠲᠦᠰᠢᠮᠡᠳ ᠪᠣᠯᠣᠨ ᠪᠤᠰᠤᠳ ᠠᠷᠠᠳ ᠣᠯᠠᠨ ᠳᠤ᠄ 《ᠠᠵᠢᠯ ᠶᠡᠬᠡ᠂ ᠬᠦᠷᠢᠶᠡ ᠬᠡᠪᠴᠢᠶᠡ ᠥᠷᠭᠡᠨ ᠡᠴᠡ ᠪᠣᠯᠣᠭᠠᠳ ᠪᠢᠳᠡ ᠬᠡᠷᠡᠮ ᠳᠡᠭᠡᠷᠡ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠬᠣᠯᠠᠳᠠᠭᠰᠠᠨ ᠪᠠᠢᠨᠠ᠃ 20 ᠲᠠ ᠨᠠᠷ ᠬᠠᠮᠢᠭᠠ ᠪᠠᠢᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠪᠦᠷᠢᠶᠡᠨ ᠳᠠᠭᠤ ᠰᠣᠨᠣᠰᠪᠠᠯ ᠲᠡᠰᠢ ᠪᠠᠨ ᠪᠢᠳᠡᠨ ᠤᠷᠤᠭᠤ ᠴᠤᠭᠯᠠᠷᠠᠵᠠᠭᠠ᠃ ᠪᠢᠳᠡᠨ ᠦ ᠪᠤᠷᠬᠠᠨ ᠪᠢᠳᠡᠨ ᠦ ᠲᠥᠯᠥᠭᠡ ᠲᠤᠯᠤᠯᠳᠤᠨᠠ》 ᠭᠡᠪᠡ᠃
21 ᠢᠩᠭᠢᠭᠡᠳ ᠠᠵᠢᠯ ᠬᠢᠵᠦ ᠪᠠᠢᠬᠤ ᠳᠤ᠂ ᠪᠢᠳᠡᠨ ᠦ ᠬᠠᠭᠠᠰ ᠨᠢ ᠦᠷ ᠴᠠᠢᠬᠤ ᠠᠴᠠ ᠣᠳᠣ ᠭᠠᠷᠬᠤ ᠬᠦᠷᠲᠡᠯᠡ ᠵᠢᠳᠠ ᠪᠠᠷᠢᠳᠠᠭ ᠪᠠᠢᠪᠠ᠃ 22 ᠮᠥᠨ ᠲᠡᠷᠡ ᠦᠶᠡ ᠳᠦ ᠪᠢ ᠠᠷᠠᠳ ᠣᠯᠠᠨ ᠳᠤ᠄ 《ᠬᠥᠮᠦᠨ ᠪᠦᠷᠢ ᠲᠤᠰᠠᠯᠠᠭᠴᠢ ᠲᠠᠢ ᠪᠠᠨ ᠬᠠᠮᠲᠤ ᠶᠧᠷᠦ᠋ᠰᠠᠯᠧᠮ ᠤᠨ ᠳᠣᠲᠣᠷᠠ ᠬᠣᠨᠣᠭᠠᠷᠠᠢ᠃ ᠲᠡᠢᠨ ᠬᠦ ᠲᠡᠳᠡ ᠪᠢᠳᠡᠨ ᠳᠦ ᠰᠥᠨᠢ ᠳᠡᠭᠡᠨ ᠬᠠᠷᠠᠭᠤᠯ᠂ ᠡᠳᠦᠷ ᠲᠡᠭᠡᠨ ᠠᠵᠢᠯᠴᠢᠨ ᠪᠣᠯᠬᠤ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠪᠡ᠃ 23 ᠲᠡᠢᠮᠦ ᠡᠴᠡ ᠪᠢ ᠪᠣᠯᠣᠨ ᠮᠢᠨᠦ ᠠᠬᠠ ᠳᠡᠭᠦᠦ ᠨᠠᠷ᠂ ᠵᠠᠷᠤᠴᠠ ᠨᠠᠷ᠂ ᠨᠠᠮᠠᠶᠢ ᠳᠠᠭᠠᠵᠤ ᠪᠠᠢᠭᠠ ᠬᠠᠷᠠᠭᠤᠯ ᠤᠨ ᠬᠡᠨ ᠨᠢ ᠴᠤ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠳᠠᠭ ᠦᠭᠡᠢ᠂ ᠤᠰᠤᠨ ᠳᠤ ᠶᠠᠪᠤᠬᠤ ᠳᠠᠭᠠᠨ ᠴᠤ ᠵᠡᠪᠰᠡᠭ ᠢᠶᠡᠨ ᠠᠪᠴᠤ ᠶᠠᠪᠤᠳᠠᠭ ᠪᠠᠢᠪᠠ᠃