ᠬᠠᠭᠠᠢ ᠬᠣᠶᠠᠷ
ᠰᠢᠨᠡ ᠥᠷᠭᠥᠭᠡᠨ ᠦ ᠴᠣᠭ ᠵᠢᠪᠬᠤᠯᠠᠩ
1 ᠳᠣᠯᠣᠳᠤᠭᠠᠷ ᠰᠠᠷᠠ ᠶᠢᠨ ᠬᠣᠷᠢᠨ ᠨᠢᠭᠡᠨ ᠳᠦ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠬᠠᠭᠠᠢ ᠪᠠᠷ ᠳᠠᠮᠵᠢᠭᠤᠯᠤᠨ ᠢᠷᠡᠭᠰᠡᠨ ᠨᠢ᠄ 2 《ᠶᠦᠳᠠ ᠶᠢᠨ ᠵᠠᠬᠢᠷᠤᠭᠴᠢ᠂ ᠱᠠᠯᠲ᠋ᠢᠶᠧᠯ ᠤᠨ ᠬᠥᠪᠡᠭᠦᠨ ᠽᠣᠷᠣᠪᠠᠪᠧᠯ᠂ ᠲᠡᠷᠢᠭᠦᠨ ᠲᠠᠬᠢᠯᠴᠢ᠂ ᠶᠧᠬᠣᠽᠠᠳᠠᠺ ᠤᠨ ᠬᠥᠪᠡᠭᠦᠨ ᠶᠣᠱᠦ᠋ᠶᠠ ᠪᠣᠯᠣᠨ ᠦᠯᠡᠳᠡᠭᠰᠡᠨ ᠠᠷᠠᠳ ᠲᠦᠮᠡᠨ ᠳᠦ ᠢᠩᠭᠢᠵᠦ ᠶᠠᠷᠢ᠄ 3 〈ᠲᠠ ᠨᠠᠷ ᠤᠨ ᠳᠤᠮᠳᠠᠬᠢ ᠦᠯᠡᠳᠡᠭᠰᠡᠨ ᠬᠥᠮᠦᠰ ᠡᠴᠡ ᠡᠨᠡ ᠥᠷᠭᠥᠭᠡᠨ ᠦ ᠤᠷᠢᠳᠤ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠢ ᠦᠵᠡᠭᠰᠡᠨ ᠬᠥᠮᠦᠨ ᠪᠠᠢᠨᠠ ᠤᠤ︖ ᠣᠳᠣ ᠡᠨᠡ ᠥᠷᠭᠥᠭᠡ ᠲᠠ ᠨᠠᠷ ᠲᠤ ᠶᠠᠮᠠᠷᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠨᠠ︖ ᠲᠠ ᠨᠠᠷ ᠤᠨ ᠨᠢᠳᠦᠨ ᠳᠦ ᠶᠠᠭᠤ ᠴᠤ ᠪᠢᠰᠢ ᠮᠡᠲᠦ ᠪᠠᠢᠨᠠ ᠤᠤ︖ 4 ᠣᠳᠣ ᠽᠣᠷᠣᠪᠠᠪᠧᠯ ᠡ᠂ ᠲᠤᠤᠱᠲᠠᠢ ᠪᠠᠢ᠃〉 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 〈ᠲᠡᠷᠢᠭᠦᠨ ᠲᠠᠬᠢᠯᠴᠢ᠂ ᠶᠧᠬᠣᠽᠠᠳᠠᠺ ᠤᠨ ᠬᠥᠪᠡᠭᠦᠨ ᠶᠣᠱᠦ᠋ᠶᠠ ᠡ᠂ ᠲᠤᠤᠱᠲᠠᠢ ᠪᠠᠢ᠃ ᠡᠨᠡ ᠨᠤᠲᠤᠭ ᠤᠨ ᠪᠦᠭᠦᠳᠡ ᠲᠤᠤᠱᠲᠠᠢ ᠪᠠᠢ᠃〉 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 〈ᠲᠠ ᠨᠠᠷ ᠠᠵᠢᠯᠯᠠᠵᠠᠭᠠ᠂ ᠪᠢ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠨᠠ᠃〉 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ᠄ 5 〈ᠶᠧᠵᠢᠫᠲ ᠡᠴᠡ ᠭᠠᠷᠬᠤ ᠦᠶᠡ ᠳᠦ ᠴᠢᠨᠢ ᠲᠠ ᠨᠠᠷ ᠲᠠᠢ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠶᠢᠨ ᠢᠶᠠᠨ ᠳᠠᠭᠠᠤ ᠠᠢᠯᠠᠳᠴᠤ ᠪᠠᠢᠨᠠ᠂ ᠮᠢᠨᠦ ᠰᠦᠨᠡᠰᠦ ᠲᠠ ᠨᠠᠷ ᠤᠨ ᠳᠤᠮᠳᠠ ᠪᠠᠢᠭᠰᠠᠭᠠᠷ ᠪᠠᠢᠨᠠ᠂ ᠲᠠ ᠨᠠᠷ ᠪᠦᠦ ᠠᠶᠤ᠃〉 6 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠤᠳᠠᠯ ᠦᠭᠡᠢ ᠪᠢ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠲᠩᠷᠢ ᠪᠠ ᠭᠠᠵᠠᠷ᠂ ᠳᠠᠯᠠᠢ ᠪᠠ ᠬᠠᠭᠤᠷᠠᠢ ᠶᠢ ᠰᠡᠭᠰᠦᠷᠬᠦ ᠭᠡᠵᠦ ᠪᠠᠢᠨᠠ᠃ 7 ᠪᠢ ᠮᠥᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠢ ᠰᠡᠭᠰᠦᠷᠬᠦ ᠳᠦ᠂ ᠪᠦᠬᠦ ᠦᠨᠳᠦᠰᠦᠲᠡᠨ ᠦ ᠡᠷᠡᠮᠡᠯᠵᠡᠯ 1 ᠢᠷᠡᠨᠡ᠃ ᠪᠢ ᠡᠨᠡ ᠥᠷᠭᠥᠭᠡ ᠶᠢ ᠴᠣᠭ ᠵᠢᠪᠬᠤᠯᠠᠩ ᠢᠶᠠᠷ ᠳᠦᠭᠦᠷᠭᠡᠬᠦ ᠪᠣᠯᠣᠨᠠ᠂〉 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠤᠯᠠ᠃ 8 〈ᠮᠥᠩᠭᠥ ᠮᠢᠨᠦᠬᠢ᠂ ᠠᠯᠲᠠ ᠴᠤ ᠮᠢᠨᠦᠬᠢ᠂〉 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 9 〈ᠡᠨᠡ ᠥᠷᠭᠥᠭᠡᠨ ᠦ ᠬᠣᠵᠢᠮ ᠤᠨ ᠴᠣᠭ ᠵᠢᠪᠬᠤᠯᠠᠩ᠂ ᠤᠷᠢᠳᠤ ᠶᠢᠨ ᠬᠢ ᠡᠴᠡ ᠪᠡᠨ ᠠᠤᠭᠠ ᠪᠠᠢᠬᠤ ᠪᠣᠯᠣᠨᠠ᠂〉 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠤᠯᠠ᠃ 〈ᠡᠨᠡ ᠭᠠᠵᠠᠷ ᠲᠤ ᠪᠢ ᠠᠮᠤᠷ ᠠᠮᠤᠭᠤᠯᠠᠩ ᠢ ᠥᠭᠭᠥᠨᠡ᠂〉 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ》 ᠭᠡᠪᠡ᠃
ᠵᠢᠮᠡᠯᠡᠯ ᠪᠠ ᠤᠷᠮᠠᠰᠢᠭᠤᠯᠤᠯ
10 ᠳ᠋ᠠᠷᠢᠶᠦ᠋ ᠬᠠᠭᠠᠨ ᠤ ᠬᠣᠶᠠᠳᠠᠬᠢ ᠵᠢᠯ ᠤᠨ ᠶᠢᠰᠦᠳᠦᠭᠡᠷ ᠰᠠᠷᠠ ᠶᠢᠨ ᠬᠣᠷᠢᠨ ᠳᠥᠷᠪᠡᠨ ᠳᠦ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠬᠠᠭᠠᠢ ᠳᠤ ᠢᠷᠡᠵᠦ᠄ 11 《ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠴᠢ ᠲᠠᠬᠢᠯᠴᠢᠳ ᠠᠴᠠ ᠬᠠᠤᠯᠢ ᠶᠢ ᠠᠰᠠᠭᠤ〉 ᠭᠡᠰᠡᠨ ᠳᠦ᠂ ᠲᠡᠷᠡ᠄ 12 〈ᠬᠥᠮᠦᠨ ᠠᠷᠢᠭᠤᠨ ᠮᠢᠬᠠ ᠶᠢ ᠬᠤᠪᠴᠠᠰᠤᠨ ᠳᠠᠭᠠᠨ ᠬᠣᠷᠮᠣᠢᠯᠠᠵᠤ ᠠᠪᠠᠴᠢᠭᠰᠠᠨ ᠲᠣᠬᠢᠶᠠᠯᠳᠤᠯ ᠳᠤ᠂ ᠲᠡᠷᠡ ᠨᠢ ᠪᠣᠣᠪᠣ᠂ ᠱᠥᠯᠥ᠂ ᠳᠠᠷᠠᠰᠤ᠂ ᠲᠣᠰᠣ᠂ ᠡᠰᠡᠪᠡᠯ ᠥᠭᠡᠷᠡ ᠬᠣᠭᠣᠯᠠᠨ ᠳᠤ ᠬᠦᠷᠪᠡᠯ ᠬᠣᠭᠣᠯᠠ ᠨᠢ ᠠᠷᠢᠭᠤᠨ ᠪᠣᠯᠬᠤ ᠤᠤ︖〉 ᠭᠡᠬᠦ ᠳᠦ᠂ ᠲᠠᠬᠢᠯᠴᠢᠳ᠄ 〈ᠦᠭᠡᠢ〉 ᠭᠡᠵᠡᠭᠡᠪᠡ᠃ 13 ᠬᠠᠭᠠᠢ᠄ 〈ᠬᠡᠭᠦᠷ ᠲᠦ ᠬᠦᠷᠴᠦ ᠪᠤᠵᠠᠷᠲᠤᠭᠰᠠᠨ ᠬᠥᠮᠦᠨ ᠲᠡᠳᠡᠭᠡᠷ ᠦᠨ ᠠᠯᠢ ᠨᠢᠭᠡᠨ ᠳᠦᠨᠢ ᠬᠦᠷᠪᠡᠯ ᠬᠣᠭᠣᠯᠠ ᠪᠤᠵᠠᠷ ᠪᠣᠯᠬᠤ ᠤᠤ︖〉 ᠭᠡᠬᠦ ᠳᠦ᠂ ᠲᠠᠬᠢᠯᠴᠢᠳ᠄ 〈ᠪᠤᠵᠠᠷ ᠪᠣᠯᠣᠨᠠ〉 ᠭᠡᠵᠡᠭᠡᠯᠡ᠃ 14 ᠬᠠᠭᠠᠢ ᠬᠠᠷᠢᠭᠤ ᠳᠤᠨᠢ᠄ 〈ᠡᠨᠡ ᠠᠷᠠᠳ ᠲᠦᠮᠡᠨ᠂ ᠡᠨᠡ ᠦᠨᠳᠦᠰᠦᠲᠡᠨ ᠮᠢᠨᠦ ᠡᠮᠦᠨᠡ ᠶᠠᠭ ᠡᠢᠮᠦ ᠪᠠᠢᠨᠠ〉 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 〈ᠲᠡᠳᠡᠨ ᠦ ᠭᠠᠷ ᠤᠨ ᠠᠵᠢᠯ ᠪᠣᠯᠭᠠᠨ ᠨᠢ ᠴᠤ ᠲᠡᠢᠮᠦ᠂ ᠲᠡᠳᠡᠨ ᠦ ᠲᠡᠨᠳᠡ ᠡᠷᠭᠦᠭᠰᠡᠨ ᠪᠣᠯᠭᠠᠨ ᠨᠢ ᠴᠤ ᠪᠤᠵᠠᠷ ᠶᠤᠮ᠃ 15 ᠣᠳᠣ ᠲᠠ ᠨᠠᠷ ᠥᠨᠥᠳᠥᠷ ᠡᠴᠡ ᠡᠬᠢᠯᠡᠨ ᠪᠣᠯᠬᠤ ᠵᠦᠢᠯ ᠢ ᠠᠩ᠋ᠬᠠᠷᠤᠭᠲᠤᠨ᠃ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠨᠢᠭᠡ ᠴᠢᠯᠠᠭᠤ ᠨᠢ ᠨᠥᠭᠥᠭᠡ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠳᠠᠬᠤ ᠠᠴᠠ ᠡᠮᠦᠨᠡ᠂ 16 ᠬᠥᠮᠦᠨ ᠬᠣᠷᠢᠨ ᠪᠣᠭᠣᠵᠢ ᠲᠠᠷᠢᠶᠠ ᠠᠪᠬᠤ ᠪᠠᠷ ᠣᠴᠢᠪᠠᠯ᠂ ᠠᠷᠪᠠ ᠯᠠ ᠪᠠᠢᠵᠤ᠂ ᠦᠵᠦᠮ ᠦᠨ ᠳᠠᠷᠠᠰᠤᠨ ᠤ ᠲᠣᠷᠬᠠᠨ ᠠᠴᠠ ᠲᠠᠪᠢᠨ ᠰᠠᠭᠤᠯᠠᠭᠠ ᠠᠪᠬᠤ ᠪᠠᠷ ᠣᠴᠢᠪᠠᠯ᠂ ᠬᠣᠷᠢᠨ ᠰᠠᠭᠤᠯᠠᠭᠠ ᠯᠠ ᠪᠠᠢᠳᠠᠭ ᠪᠠᠢᠭᠰᠠᠨ᠃ 17 ᠲᠡᠢᠨ ᠬᠦ ᠪᠢ ᠭᠠᠷ ᠤᠨ ᠴᠢᠨᠢ ᠪᠦᠬᠦ ᠠᠵᠢᠯ ᠢ ᠰᠢᠪᠠᠵᠢ᠂ ᠬᠥᠭᠡᠴᠦ ᠪᠠ ᠮᠥᠨᠳᠥᠷ ᠢᠶᠡᠷ ᠴᠣᠬᠢᠭᠰᠠᠨ ᠪᠣᠯᠪᠠᠴᠤ ᠲᠠ ᠨᠠᠷ ᠨᠠᠳᠠ ᠤᠷᠤᠭᠤ ᠡᠷᠭᠢᠬᠦ ᠦᠭᠡᠢ ᠪᠠᠢᠭᠰᠠᠨ᠃〉 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 18 〈ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠰᠠᠭᠤᠷᠢ ᠶᠢ ᠲᠠᠯᠪᠢᠭᠰᠠᠨ ᠥᠨᠥᠳᠥᠷ᠂ ᠶᠢᠰᠦᠳᠦᠭᠡᠷ ᠰᠠᠷᠠ ᠶᠢᠨ ᠬᠣᠷᠢᠨ ᠳᠥᠷᠪᠡᠨ ᠦ ᠡᠳᠦᠷ ᠡᠴᠡ ᠡᠬᠢᠯᠡᠨ ᠶᠠᠭᠤ ᠪᠣᠯᠬᠤ ᠶᠢ ᠠᠩ᠋ᠬᠠᠷᠤᠭᠲᠤᠨ᠂ 19 ᠣᠳᠣ ᠬᠥᠮᠥᠷᠭᠡ ᠳᠦ ᠦᠷᠡ ᠠᠯᠠᠭᠠ ᠪᠢᠵᠡ︖ ᠦᠵᠦᠮ᠂ ᠢᠨᠵᠢᠷ ᠤᠨ ᠮᠣᠳᠣ᠂ ᠠᠨᠠᠷ᠂ ᠴᠢᠳᠦᠨ ᠮᠣᠳᠣ ᠵᠢᠮᠢᠰ ᠰᠠᠭᠤᠯᠭᠠᠭᠠ ᠦᠭᠡᠢ ᠪᠢᠵᠡ︖ ᠬᠠᠷᠢᠨ ᠥᠨᠥᠳᠥᠷ ᠡᠴᠡ ᠡᠬᠢᠯᠡᠨ ᠪᠢ ᠲᠠ ᠨᠠᠷ ᠢ ᠢᠷᠥᠭᠡᠨᠡ〉》 ᠭᠡᠪᠡ᠃
ᠽᠣᠷᠣᠪᠠᠪᠧᠯ ᠰᠣᠩ᠋ᠭᠣᠭᠳᠠᠪᠠ
20 ᠲᠡᠷᠡ ᠰᠠᠷᠠ ᠶᠢᠨ ᠬᠣᠷᠢᠨ ᠳᠥᠷᠪᠡᠨ ᠳᠦ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠬᠠᠭᠠᠢ ᠳᠤ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠢᠷᠡᠭᠰᠡᠨ ᠨᠢ᠄ 21 《ᠶᠦᠳᠠ ᠶᠢᠨ ᠵᠠᠬᠢᠷᠤᠭᠴᠢ ᠽᠣᠷᠣᠪᠠᠪᠧᠯ ᠳᠤ ᠶᠠᠷᠢ᠄ 〈ᠪᠢ ᠲᠩᠷᠢ ᠭᠠᠵᠠᠷ ᠢ ᠰᠡᠭᠰᠦᠷᠬᠦ ᠭᠡᠵᠦ ᠪᠠᠢᠨᠠ᠃ 22 ᠪᠢ ᠬᠠᠭᠠᠨᠴᠢᠯᠠᠯ ᠤᠳ ᠤᠨ ᠰᠡᠨᠲᠢ ᠨᠦᠭᠦᠳ ᠢ ᠬᠥᠮᠥᠷᠢᠵᠦ᠂ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠠᠭᠠᠨᠴᠢᠯᠠᠯ ᠤᠳ ᠤᠨ ᠬᠦᠴᠦ ᠶᠢ ᠰᠥᠨᠥᠭᠡᠨᠡ᠃ ᠪᠢ ᠲᠡᠷᠭᠡ ᠨᠦᠭᠦᠳ ᠢ ᠲᠡᠷᠭᠡᠴᠢᠳ ᠲᠠᠢ ᠨᠢ ᠬᠠᠮᠲᠤ ᠬᠥᠮᠥᠷᠢᠨᠡ᠂ ᠮᠣᠷᠢᠳ ᠪᠠ ᠮᠣᠷᠢᠲᠠᠨ ᠤᠨᠠᠨᠠ᠂ ᠬᠥᠮᠦᠨ ᠪᠣᠯᠭᠠᠨ ᠠᠬᠠ ᠳᠡᠭᠦᠦᠰ ᠦᠨ ᠢᠶᠠᠨ ᠢᠯᠳᠦᠨ ᠳᠦ ᠤᠨᠠᠨᠠ᠃〉 23 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠱᠠᠯᠲ᠋ᠢᠶᠧᠯ ᠤᠨ ᠬᠥᠪᠡᠭᠦᠨ ᠮᠢᠨᠦ ᠵᠠᠷᠤᠴᠠ ᠽᠣᠷᠣᠪᠠᠪᠧᠯ ᠡ᠂ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ ᠪᠢ ᠴᠢᠮᠠᠶᠢ ᠰᠢᠯᠢᠵᠦ ᠠᠪᠤᠭᠰᠠᠨ ᠲᠤᠯᠠ ᠲᠡᠷᠡ ᠡᠳᠦᠷ ᠪᠢ ᠴᠢᠮᠠ ᠶᠢ ᠲᠠᠮᠠᠭᠠᠲᠤ ᠪᠥᠭᠡᠵᠢ ᠪᠠᠨ ᠪᠣᠯᠭᠠᠨᠠ᠃〉 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃》