ᠨᠢᠭᠡᠳᠦᠭᠡᠷ ᠶᠣᠬᠠᠨ ᠬᠣᠶᠠᠷ
1 ᠬᠡᠦᠬᠡᠳ ᠤᠳ ᠮᠢᠨᠢ᠂ ᠲᠠ ᠨᠠᠷ ᠢ ᠨᠢᠭᠦᠯ ᠪᠦᠦ ᠦᠢᠯᠡᠳᠦᠭᠡᠰᠡᠢ ᠭᠡᠵᠦ ᠪᠢ ᠡᠳᠡᠭᠡᠷ ᠢ ᠲᠠ ᠨᠠᠷ ᠲᠤ ᠪᠢᠴᠢᠵᠦ ᠪᠠᠢᠨᠠ᠃ ᠬᠡᠨ ᠨᠢᠭᠡ ᠨᠢ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠴᠤ ᠡᠴᠢᠭᠡ ᠶᠢᠨ ᠡᠮᠦᠨᠡ ᠪᠢᠳᠡᠨ ᠢ ᠥᠮᠥᠭᠯᠡᠭᠴᠢ ᠪᠤᠢ᠃ ᠲᠡᠷᠡ ᠪᠣᠯ ᠵᠥᠪᠲᠦ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠪᠢᠯᠡ᠃ 2 ᠲᠡᠷᠡ ᠪᠢᠳᠡᠨ ᠦ ᠨᠢᠭᠦᠯ ᠦᠨ ᠲᠥᠯᠥᠭᠡ ᠡᠪᠯᠡᠷᠡᠭᠦᠯᠦᠯ ᠦᠨ ᠵᠣᠯᠢᠶᠠᠰᠤ ᠪᠣᠯᠣᠭᠰᠠᠨ᠂ ᠡᠨᠡ ᠨᠢ ᠵᠥᠪᠬᠡᠨ ᠪᠢᠳᠡᠨ ᠦ ᠯᠠ ᠲᠥᠯᠥᠭᠡ ᠪᠢᠰᠢ᠂ ᠪᠠᠰᠠ ᠪᠦᠬᠦ ᠶᠢᠷᠲᠢᠨᠴᠦ ᠶᠢᠨ ᠨᠢᠭᠦᠯ ᠦᠨ ᠲᠥᠯᠥᠭᠡ ᠶᠤᠮ᠃
ᠠᠬᠠ ᠳᠡᠭᠦᠦᠰ ᠢᠶᠡᠨ ᠬᠠᠢᠷᠠᠯᠠ
3 ᠬᠡᠷᠪᠡ ᠪᠢᠳᠡ ᠲᠡᠭᠦᠨ ᠦ ᠵᠠᠷᠯᠢᠭ ᠤᠳ ᠢ ᠰᠠᠬᠢᠪᠠᠯ᠂ ᠡᠭᠦᠨ ᠢᠶᠡᠷ ᠲᠡᠭᠦᠨ ᠢ ᠲᠠᠨᠢᠭᠰᠠᠨ ᠢᠶᠠᠨ ᠮᠡᠳᠡᠨᠡ᠃ 4 《ᠪᠢ ᠲᠡᠭᠦᠨ ᠢ ᠲᠠᠨᠢᠨᠠ》 ᠭᠡᠰᠡᠨ ᠴᠤ᠂ ᠵᠠᠷᠯᠢᠭ ᠤᠳ ᠢ ᠨᠢ ᠰᠠᠬᠢᠳᠠᠭ ᠦᠭᠡᠢ ᠬᠥᠮᠦᠨ ᠪᠣᠯ ᠬᠤᠳᠠᠯᠴᠢ ᠪᠥᠭᠡᠳ ᠥᠪᠡᠷ ᠦᠨ ᠬᠢᠨᠢ ᠳᠣᠲᠣᠷᠠ ᠦᠨᠡᠨ ᠠᠯᠠᠭᠠ᠃ 5 ᠬᠠᠷᠢᠨ ᠲᠡᠭᠦᠨ ᠦ ᠦᠭᠡ ᠶᠢ ᠰᠠᠬᠢᠳᠠᠭ ᠬᠡᠨ ᠦ ᠴᠤ ᠳᠣᠲᠣᠷᠠ ᠪᠤᠷᠬᠠᠨ ᠤ ᠬᠠᠢᠷᠠ 2 ᠦᠨᠡᠬᠡᠷ ᠲᠡᠭᠦᠯᠳᠡᠷᠵᠢᠭᠰᠡᠨ ᠶᠤᠮ᠃ ᠡᠭᠦᠨ ᠢᠶᠡᠷ ᠪᠢᠳᠡ ᠪᠤᠷᠬᠠᠨ ᠤ ᠳᠣᠲᠣᠷᠠ ᠪᠠᠢᠭᠠ ᠪᠠᠨ ᠮᠡᠳᠡᠨᠡ᠃ 6 ᠡᠵᠡᠨ ᠦ ᠳᠣᠲᠣᠷᠠ ᠪᠠᠢᠳᠠᠭ ᠭᠡᠳᠡᠭ ᠬᠥᠮᠦᠨ ᠨᠢ ᠲᠡᠭᠦᠨ ᠦ ᠶᠠᠪᠤᠭᠰᠠᠨ ᠢᠶᠠᠷ ᠶᠠᠪᠤᠬᠤ ᠶᠣᠰᠣᠲᠠᠢ᠃
7 ᠬᠠᠢᠷᠠᠲᠤ ᠨᠤᠭᠤᠳ ᠡ᠂ ᠪᠢ ᠲᠠ ᠨᠠᠷ ᠲᠤ ᠰᠢᠨᠡ ᠵᠠᠷᠯᠢᠭ ᠢ ᠪᠤᠰᠤ᠂ ᠬᠠᠷᠢᠨ ᠡᠬᠢᠨ ᠡᠴᠡ ᠪᠡᠨ ᠲᠠ ᠨᠠᠷ ᠲᠤ ᠪᠠᠢᠭᠰᠠᠨ ᠬᠠᠭᠤᠴᠢᠨ ᠵᠠᠷᠯᠢᠭ ᠢ ᠪᠢᠴᠢᠵᠦ ᠪᠠᠢᠨᠠ᠃ ᠡᠨᠡ ᠬᠦ ᠬᠠᠭᠤᠴᠢᠨ ᠵᠠᠷᠯᠢᠭ ᠪᠣᠯ ᠲᠠ ᠨᠠᠷ ᠤᠨ ᠤᠤᠯ ᠠᠴᠠ ᠪᠠᠨ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠦᠭᠡ ᠶᠤᠮ᠃ 8 ᠪᠢ ᠲᠠ ᠨᠠᠷ ᠲᠤ ᠳᠠᠬᠢᠭᠠᠳ ᠰᠢᠨᠡ ᠵᠠᠷᠯᠢᠭ ᠪᠢᠴᠢᠶᠡ᠃ ᠬᠠᠷᠠᠩ᠋ᠭᠤᠢ ᠨᠢᠭᠡᠨᠲᠡ ᠥᠩᠭᠡᠷᠡᠵᠦ᠂ ᠦᠨᠡᠨ ᠭᠡᠷᠡᠯ ᠭᠡᠶᠢᠭᠦᠯᠵᠦ ᠪᠠᠢᠭᠠ ᠤᠴᠢᠷ ᠠᠴᠠ ᠲᠡᠷᠡ ᠵᠠᠷᠯᠢᠭ ᠤᠨ ᠦᠨᠡᠨ ᠭᠡᠳᠡᠭ ᠨᠢ ᠡᠵᠡᠨ ᠪᠠ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠬᠠᠷᠠᠭᠳᠠᠨᠠ᠃ 9 ᠭᠡᠷᠡᠯ ᠦᠨ ᠳᠣᠲᠣᠷᠠ ᠪᠠᠢᠨᠠ ᠭᠡᠴᠢᠬᠡᠭᠡᠳ ᠠᠬᠠ ᠳᠡᠭᠦᠦ ᠪᠡᠨ ᠬᠣᠷᠣᠰᠣᠭᠴᠢ ᠨᠢ ᠮᠥᠨ ᠬᠠᠷᠠᠩ᠋ᠭᠤᠢ ᠳᠣᠲᠣᠷᠠ ᠪᠠᠢᠭᠰᠠᠭᠠᠷ ᠶᠤᠮ᠃ 10 ᠠᠬᠠ ᠳᠡᠭᠦᠦ ᠪᠡᠨ ᠬᠠᠢᠷᠠᠯᠠᠭᠴᠢ ᠨᠢ ᠭᠡᠷᠡᠯ ᠦᠨ ᠳᠣᠲᠣᠷᠠ ᠪᠠᠢᠭᠠ ᠪᠥᠭᠡᠳ ᠲᠡᠭᠦᠨ ᠳᠦ ᠪᠦᠳᠦᠷᠢᠯ ᠪᠠᠢᠬᠤ ᠦᠭᠡᠢ᠃ 11 ᠬᠠᠷᠢᠨ ᠠᠬᠠ ᠳᠡᠭᠦᠦ ᠪᠡᠨ ᠬᠣᠷᠣᠰᠣᠭᠴᠢ ᠨᠢ ᠬᠠᠷᠠᠩ᠋ᠭᠤᠢ ᠶᠢᠨ ᠳᠣᠲᠣᠷᠠ ᠪᠠᠢᠬᠤ ᠪᠥᠭᠡᠳ ᠬᠠᠷᠠᠩ᠋ᠭᠤᠢ ᠶᠢᠨ ᠳᠣᠲᠣᠷᠠ ᠠᠯᠬᠤᠵᠤ ᠬᠠᠮᠢᠭᠠ ᠣᠴᠢᠬᠤ ᠪᠠᠨ ᠦᠯᠦ ᠮᠡᠳᠡᠨᠡ᠂ ᠤᠴᠢᠷ ᠨᠢ ᠬᠠᠷᠠᠩ᠋ᠭᠤᠢ ᠨᠢᠳᠦ ᠶᠢ ᠨᠢ ᠰᠣᠬᠣᠯᠠᠭᠰᠠᠨ ᠠᠵᠢ᠃
12 ᠬᠡᠦᠬᠡᠳ ᠤᠳ ᠡ ᠡᠵᠡᠨ ᠦ ᠨᠡᠷᠡ ᠪᠡᠷ ᠨᠢᠭᠦᠯ ᠴᠢᠨᠢ ᠠᠭᠤᠴᠢᠯᠠᠭᠳᠠᠭᠰᠠᠨ ᠲᠤᠯᠠ ᠲᠠ ᠨᠠᠷ ᠲᠤ ᠪᠢᠴᠢᠵᠦ ᠪᠠᠢᠨᠠ᠃
13 ᠡᠴᠢᠭᠡ ᠨᠦᠭᠦᠳ ᠡ ᠡᠬᠢᠨ ᠡᠴᠡ ᠪᠡᠨ ᠪᠠᠢᠭᠴᠢ ᠨᠢᠭᠡᠨ ᠢ ᠲᠠ ᠨᠠᠷ ᠲᠠᠨᠢᠭᠰᠠᠨ ᠲᠤᠯᠠ ᠲᠠ ᠨᠠᠷ ᠲᠤ ᠪᠢᠴᠢᠵᠦ ᠪᠠᠢᠨᠠ ᠵᠠᠯᠠᠭᠤᠴᠤᠳ ᠡ ᠲᠠ ᠨᠠᠷ ᠮᠠᠭᠤ ᠨᠢᠭᠡᠨ ᠢ ᠢᠯᠠᠭᠰᠠᠨ ᠲᠤᠯᠠ ᠲᠠ ᠨᠠᠷ ᠲᠤ ᠪᠢᠴᠢᠵᠦ ᠪᠠᠢᠨᠠ᠃
14 ᠬᠡᠦᠬᠡᠳ ᠤᠳ ᠡ ᠲᠠ ᠨᠠᠷ ᠡᠴᠢᠭᠡ ᠪᠡᠨ ᠲᠠᠨᠢᠭᠰᠠᠨ ᠲᠤᠯᠠ ᠲᠠ ᠨᠠᠷ ᠲᠤ ᠪᠢᠴᠢᠵᠦ ᠪᠠᠢᠨᠠ ᠡᠴᠢᠭᠡ ᠨᠦᠭᠦᠳ ᠡ ᠡᠬᠢᠨ ᠡᠴᠡ ᠪᠡᠨ ᠪᠠᠢᠭᠴᠢ ᠶᠢ ᠲᠠ ᠨᠠᠷ ᠲᠠᠨᠢᠭᠰᠠᠨ ᠲᠤᠯᠠ ᠲᠠ ᠨᠠᠷ ᠲᠤ ᠪᠢᠴᠢᠵᠦ ᠪᠠᠢᠨᠠ ᠵᠠᠯᠠᠭᠤᠴᠤᠳ ᠡ ᠲᠠ ᠨᠠᠷ ᠬᠦᠴᠦ ᠲᠠᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠪᠤᠷᠬᠠᠨ ᠤ ᠦᠭᠡ ᠪᠠᠢᠳᠠᠭ ᠪᠥᠭᠡᠳ ᠲᠠ ᠨᠠᠷ ᠮᠠᠭᠤ ᠨᠢᠭᠡᠨ ᠢ ᠢᠯᠠᠭᠰᠠᠨ ᠲᠤᠯᠠ ᠲᠠ ᠨᠠᠷ ᠲᠤ ᠪᠢᠴᠢᠵᠦ ᠪᠠᠢᠨᠠ᠃
ᠶᠢᠷᠲᠢᠨᠴᠦ ᠶᠢ ᠪᠦᠦ ᠬᠠᠢᠷᠠᠯᠠ
15 ᠶᠢᠷᠲᠢᠨᠴᠦ ᠪᠤᠶᠤ ᠶᠢᠷᠲᠢᠨᠴᠦ ᠳᠦ ᠪᠠᠢᠭᠠ ᠵᠦᠢᠯᠡᠰ ᠢ ᠪᠦᠦ ᠬᠠᠢᠷᠠᠯᠠ᠃ ᠬᠡᠨ ᠬᠡᠷᠪᠡ ᠶᠢᠷᠲᠢᠨᠴᠦ ᠶᠢ ᠬᠠᠢᠷᠠᠯᠠᠪᠠᠯ ᠡᠴᠢᠭᠡ ᠶᠢᠨ ᠬᠠᠢᠷᠠ ᠲᠡᠭᠦᠨ ᠦ ᠳᠣᠲᠣᠷᠠ ᠠᠯᠠᠭᠠ᠃ 16 ᠤᠴᠢᠷ ᠨᠢ᠂ ᠶᠢᠷᠲᠢᠨᠴᠦ ᠳᠦ ᠪᠠᠢᠭᠠ ᠬᠠᠮᠤᠭ ᠶᠠᠭᠤᠮᠠ᠂ ᠲᠤᠬᠠᠢᠯᠠᠪᠠᠯ ᠮᠢᠬᠠᠨ ᠪᠡᠶᠡ ᠶᠢᠨ ᠰᠢᠨᠤᠯ᠂ ᠨᠢᠳᠦᠨ ᠦ ᠰᠢᠨᠤᠯ᠂ ᠡᠨᠡ ᠨᠠᠰᠤᠨ ᠤ ᠪᠠᠷᠳᠠᠮᠨᠠᠯ ᠨᠢ ᠡᠴᠢᠭᠡ ᠡᠴᠡ ᠪᠤᠰᠤ᠂ ᠬᠠᠷᠢᠨ ᠶᠢᠷᠲᠢᠨᠴᠦ ᠡᠴᠡ ᠢᠷᠡᠳᠡᠭ᠃ 17 ᠶᠢᠷᠲᠢᠨᠴᠦ ᠪᠠ ᠲᠡᠭᠦᠨ ᠦ ᠰᠢᠨᠤᠯ ᠥᠩᠭᠡᠷᠡᠨᠡ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠰᠠᠨᠠᠭᠠ ᠪᠠᠷ ᠦᠢᠯᠡᠳᠦᠭᠴᠢ ᠨᠢ ᠮᠥᠩᠬᠡᠷᠡᠨᠡ᠃
ᠪᠠᠴᠢᠯᠠᠭᠴᠢ ᠡᠴᠡ ᠢᠲᠡᠭᠡᠯ ᠢᠶᠡᠨ ᠬᠠᠮᠠᠭᠠᠯᠠ
18 ᠬᠡᠦᠬᠡᠳ ᠤᠳ ᠡ᠂ ᠡᠴᠦᠰ ᠦᠨ ᠴᠠᠭ ᠪᠣᠯᠣᠯᠠ᠃ ᠾᠷᠢᠰᠲ᠋ᠣᠰ ᠢ ᠡᠰᠡᠷᠭᠦᠴᠡᠭᠴᠢ ᠢᠷᠡᠵᠦ ᠪᠠᠢᠨᠠ ᠭᠡᠵᠦ ᠲᠠ ᠨᠠᠷ ᠤᠨ ᠰᠣᠨᠣᠰᠣᠭᠰᠠᠨᠴᠢᠯᠠᠨ᠂ ᠾᠷᠢᠰᠲ᠋ᠣᠰ ᠢ ᠡᠰᠡᠷᠭᠦᠴᠡᠭᠴᠢᠳ ᠡᠳᠦᠭᠡ ᠨᠢᠭᠡᠨᠲᠡ ᠣᠯᠠᠨ ᠢᠶᠠᠷ ᠪᠤᠢ ᠪᠣᠯᠣᠭᠰᠠᠨ᠃ ᠡᠭᠦᠨ ᠡᠴᠡ ᠪᠢᠳᠡ ᠡᠴᠦᠰ ᠦᠨ ᠴᠠᠭ ᠪᠣᠯᠣᠭᠰᠠᠨ ᠢ ᠮᠡᠳᠡᠨᠡ᠃ 19 ᠲᠡᠳᠡ ᠪᠢᠳᠡᠨ ᠡᠴᠡ ᠰᠠᠯᠵᠤ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠤᠤᠯ ᠨᠢ ᠪᠢᠳᠡᠨ ᠦ ᠬᠢ ᠪᠢᠰᠢ ᠪᠠᠢᠭᠰᠠᠨ᠃ ᠲᠡᠳᠡ ᠪᠢᠳᠡᠨ ᠦ ᠬᠢ ᠪᠠᠢᠭᠰᠠᠨ ᠪᠣᠯ ᠪᠢᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠪᠠᠢᠭᠰᠠᠨ᠃ ᠲᠡᠳᠡ ᠣᠳᠣᠭᠰᠠᠨ ᠢᠶᠠᠷ ᠢᠶᠠᠨ ᠪᠢᠳᠡᠨ ᠦ ᠬᠢ ᠪᠢᠰᠢ ᠭᠡᠳᠡᠭ ᠢᠶᠡᠨ ᠢᠯᠡᠷᠡᠭᠦᠯᠦᠭᠰᠡᠨ ᠶᠤᠮ᠃ 20 ᠲᠠ ᠨᠠᠷ ᠠᠷᠢᠭᠤᠨ ᠨᠢᠭᠡᠨ ᠢᠶᠡᠷ ᠲᠣᠰᠣᠯᠠᠭᠳᠠᠭᠰᠠᠨ ᠪᠥᠭᠡᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠮᠡᠳᠡᠯᠭᠡ ᠲᠠᠢ᠃ 21 ᠲᠠ ᠨᠠᠷ ᠲᠤ ᠪᠢᠴᠢᠭᠰᠡᠨ ᠮᠢᠨᠢ ᠦᠨᠡᠨ ᠢ ᠮᠡᠳᠡᠳᠡᠭ ᠦᠭᠡᠢ ᠡᠴᠡ ᠴᠢᠨᠢ ᠪᠣᠯᠣᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠲᠠ ᠨᠠᠷ ᠦᠨᠡᠨ ᠢ ᠮᠡᠳᠡᠳᠡᠭ ᠪᠥᠭᠡᠳ ᠦᠨᠡᠨ ᠡᠴᠡ ᠨᠢᠭᠡ ᠴᠤ ᠬᠤᠳᠠᠯ ᠭᠠᠷᠳᠠᠭ ᠦᠭᠡᠢ ᠶᠢ ᠮᠡᠳᠡᠳᠡᠭ ᠡᠴᠡ ᠴᠢᠨᠢ ᠪᠣᠯᠣᠭᠰᠠᠨ ᠶᠤᠮ᠃ 22 ᠬᠡᠨ ᠨᠢ ᠬᠤᠳᠠᠯᠴᠢ ᠪᠤᠢ︖ ᠢᠰᠦ᠋ᠰ ᠪᠣᠯ ᠾᠷᠢᠰᠲ᠋ᠣᠰ ᠭᠡᠳᠡᠭ ᠢ ᠦᠭᠡᠶᠢᠰᠬᠡᠭᠴᠢ ᠨᠢ ᠪᠢᠰᠢ ᠤᠤ︖ ᠡᠴᠢᠭᠡ ᠬᠦᠦ ᠬᠣᠶᠠᠷ ᠢ ᠦᠭᠡᠶᠢᠰᠬᠡᠭᠴᠢ ᠨᠢ ᠾᠷᠢᠰᠲ᠋ᠣᠰ ᠢ ᠡᠰᠡᠷᠭᠦᠴᠡᠭᠴᠢ ᠮᠥᠨ᠃ 23 ᠬᠦᠦ ᠶᠢ ᠦᠭᠡᠶᠢᠰᠬᠡᠭᠴᠢ ᠪᠣᠯᠭᠠᠨ ᠳᠤ ᠡᠴᠢᠭᠡ ᠪᠠᠢᠬᠤ ᠦᠭᠡᠢ᠂ ᠬᠦᠦ ᠶᠢ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠴᠢ ᠳᠦᠨᠢ ᠡᠴᠢᠭᠡ ᠪᠤᠢ᠃ 24 ᠲᠠ ᠨᠠᠷ ᠤᠤᠯ ᠠᠴᠠ ᠪᠠᠨ ᠰᠣᠨᠣᠰᠣᠭᠰᠠᠨ ᠢᠶᠠᠨ ᠳᠣᠲᠣᠷᠠ ᠪᠠᠨ ᠦᠷᠭᠦᠯᠵᠢ ᠪᠠᠢᠯᠭᠠᠭᠲᠤᠨ᠂ ᠤᠤᠯ ᠠᠴᠠ ᠪᠠᠨ ᠰᠣᠨᠣᠰᠣᠭᠰᠠᠨ ᠴᠢᠨᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠪᠠᠢᠪᠠᠯ ᠲᠠ ᠨᠠᠷ ᠮᠥᠨ ᠬᠦᠦ ᠪᠣᠯᠣᠨ ᠡᠴᠢᠭᠡ ᠶᠢᠨ ᠳᠣᠲᠣᠷᠠ ᠪᠠᠢᠬᠤ ᠪᠣᠯᠣᠨᠠ᠃ 25 ᠮᠥᠩᠬᠡ ᠠᠮᠢ᠂ ᠡᠭᠦᠨ ᠢ ᠡᠵᠡᠨ ᠪᠢᠳᠡᠨ ᠳᠦ ᠠᠮᠠᠯᠠᠭᠰᠠᠨ ᠶᠤᠮ᠃
26 ᠲᠠ ᠨᠠᠷ ᠢ ᠪᠠᠴᠢᠯᠠᠬᠤ ᠪᠠᠷ ᠣᠷᠣᠯᠳᠤᠭᠴᠢᠳ ᠤᠨ ᠲᠤᠬᠠᠢ ᠡᠳᠡᠭᠡᠷ ᠢ ᠲᠠ ᠨᠠᠷ ᠲᠤ ᠪᠢᠴᠢᠯᠡ᠃ 27 ᠲᠠ ᠨᠠᠷ ᠤᠨ ᠬᠤᠪᠢ ᠳᠤ ᠡᠵᠡᠨ ᠡᠴᠡ ᠬᠦᠷᠲᠡᠭᠰᠡᠨ ᠲᠣᠰᠣᠯᠠᠯᠭᠠ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠪᠠᠢᠭᠰᠠᠭᠠᠷ ᠪᠠᠢᠳᠠᠭ᠃ ᠲᠠ ᠨᠠᠷ ᠬᠡᠨ ᠢᠶᠡᠷ ᠴᠤ ᠵᠢᠭᠠᠯᠭᠠᠬᠤ ᠬᠡᠷᠡᠭ ᠦᠭᠡᠢ᠂ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠲᠣᠰᠣᠯᠠᠯᠭᠠ ᠲᠠ ᠨᠠᠷ ᠲᠤ ᠪᠦᠬᠦᠨ ᠢ ᠰᠤᠷᠭᠠᠳᠠᠭ ᠪᠥᠭᠡᠳ ᠲᠡᠷᠡ ᠬᠦ ᠰᠤᠷᠭᠠᠯ ᠨᠢ ᠬᠤᠳᠠᠯ ᠪᠢᠰᠢ ᠦᠨᠡᠨ ᠲᠤᠯᠠ ᠲᠠ ᠨᠠᠷ ᠰᠤᠷᠤᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠲᠡᠭᠦᠨ ᠦ ᠳᠣᠲᠣᠷᠠ ᠪᠠᠢᠭᠲᠤᠨ᠃
ᠪᠤᠷᠬᠠᠨ ᠤ ᠬᠡᠦᠬᠡᠳ ᠤᠳ
28 ᠬᠡᠦᠬᠡᠳ ᠤᠳ ᠡ᠂ ᠡᠳᠦᠭᠡ ᠲᠡᠭᠦᠨ ᠦ ᠳᠣᠲᠣᠷᠠ ᠪᠠᠢᠭᠲᠤᠨ᠃ ᠲᠡᠭᠡᠪᠡᠯ ᠡᠵᠡᠨ ᠢᠯᠡᠷᠡᠬᠦ ᠦᠶᠡ ᠳᠦ᠂ ᠪᠢᠳᠡ ᠵᠣᠷᠢᠭᠲᠠᠢ ᠪᠠᠢᠵᠤ᠂ ᠲᠡᠷᠡ ᠢᠷᠡᠬᠦ ᠳᠦ ᠪᠢᠳᠡ ᠲᠡᠭᠦᠨ ᠦ ᠡᠮᠦᠨᠡ ᠰᠢᠪᠰᠢᠭ ᠦᠭᠡᠢ ᠪᠣᠯᠣᠨᠠ᠃ 29 ᠬᠡᠷᠪᠡ ᠲᠠ ᠨᠠᠷ ᠲᠡᠭᠦᠨ ᠢ ᠵᠥᠪᠲᠦ ᠭᠡᠵᠦ ᠮᠡᠳᠡᠭᠰᠡᠨ ᠪᠣᠯ ᠵᠥᠪ ᠢ ᠦᠢᠯᠡᠳᠦᠭᠴᠢ ᠪᠣᠯᠭᠠᠨ ᠲᠡᠭᠦᠨ ᠡᠴᠡ ᠲᠥᠷᠥᠭᠰᠡᠨ ᠢ ᠮᠡᠳᠡᠨᠡ᠃