ᠨᠢᠭᠡᠳᠦᠭᠡᠷ ᠶᠣᠬᠠᠨ ᠲᠠᠪᠤ
ᠶᠢᠷᠲᠢᠨᠴᠦ ᠶᠢ ᠢᠯᠠᠭᠴᠢ ᠨᠢ ᠢᠲᠡᠭᠡᠯ
1 ᠢᠰᠦ᠋ᠰ ᠪᠣᠯ ᠾᠷᠢᠰᠲ᠋ᠣᠰ ᠮᠥᠨ ᠭᠡᠵᠦ ᠢᠲᠡᠭᠡᠭᠴᠢ ᠪᠦᠬᠦᠨ ᠪᠤᠷᠬᠠᠨ ᠠᠴᠠ ᠲᠥᠷᠥᠭᠰᠡᠨ᠃ ᠥᠪᠡᠷ ᠢ ᠨᠢ ᠲᠥᠷᠥᠭᠦᠯᠦᠭᠰᠡᠨ ᠨᠢᠭᠡᠨ ᠢ ᠬᠠᠢᠷᠠᠯᠠᠭᠴᠢ ᠪᠣᠯᠭᠠᠨ ᠲᠡᠭᠦᠨ ᠡᠴᠡ ᠲᠥᠷᠥᠭᠰᠡᠳ ᠢ ᠴᠤ ᠬᠠᠢᠷᠠᠯᠠᠨᠠ᠃ 2 ᠪᠢᠳᠡ ᠪᠤᠷᠬᠠᠨ ᠢ ᠬᠠᠢᠷᠠᠯᠠᠵᠤ᠂ ᠲᠡᠭᠦᠨ ᠦ ᠵᠠᠷᠯᠢᠭ ᠤᠳ ᠢ ᠰᠠᠬᠢᠭᠰᠠᠨ ᠢᠶᠠᠷ ᠢᠶᠠᠨ ᠪᠤᠷᠬᠠᠨ ᠤ ᠬᠡᠦᠬᠡᠳ ᠤᠳ ᠢ ᠬᠠᠢᠷᠠᠯᠠᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠨᠡ᠃ 3 ᠪᠤᠷᠬᠠᠨ ᠢ ᠬᠠᠢᠷᠠᠯᠠᠬᠤ ᠭᠡᠳᠡᠭ ᠨᠢ ᠲᠡᠭᠦᠨ ᠦ ᠵᠠᠷᠯᠢᠭ ᠢ ᠰᠠᠬᠢᠬᠤ ᠶᠢ ᠬᠡᠯᠡᠨᠡ᠃ ᠲᠡᠭᠦᠨ ᠦ ᠵᠠᠷᠯᠢᠭ ᠤᠳ ᠳᠠᠷᠤᠭᠠᠰᠤ ᠪᠢᠰᠢ᠂ 4 ᠤᠴᠢᠷ ᠨᠢ᠂ ᠪᠤᠷᠬᠠᠨ ᠠᠴᠠ ᠲᠥᠷᠥᠭᠰᠡᠨ ᠪᠦᠬᠦᠨ ᠶᠢᠷᠲᠢᠨᠴᠦ ᠶᠢ ᠢᠯᠠᠳᠠᠭ᠃ ᠶᠢᠷᠲᠢᠨᠴᠦ ᠶᠢ ᠢᠯᠠᠭᠰᠠᠨ ᠢᠯᠠᠯᠲᠠ ᠪᠣᠯ ᠪᠢᠳᠡᠨ ᠦ ᠢᠲᠡᠭᠡᠯ ᠶᠤᠮ᠃ 5 ᠢᠰᠦ᠋ᠰ ᠪᠣᠯ ᠪᠤᠷᠬᠠᠨ ᠤ ᠬᠦᠦ ᠭᠡᠵᠦ ᠢᠲᠡᠭᠡᠭᠴᠢ ᠡᠴᠡ ᠥᠭᠡᠷᠡ ᠶᠢᠷᠲᠢᠨᠴᠦ ᠶᠢ ᠢᠯᠠᠭᠴᠢ ᠨᠢ ᠬᠡᠨ ᠪᠤᠢ︖
ᠠᠪᠤᠷᠠᠯ ᠤᠨ ᠪᠠᠲᠤᠯᠠᠭᠠ
6 ᠤᠰᠤ ᠪᠠ ᠴᠢᠰᠤ ᠪᠠᠷ ᠢᠷᠡᠭᠰᠡᠨ ᠨᠢᠭᠡᠨ ᠨᠢ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠶᠤᠮ᠃ ᠲᠡᠷᠡ ᠵᠥᠪᠬᠡᠨ ᠤᠰᠤ ᠪᠠᠷ ᠪᠢᠰᠢ᠂ ᠤᠰᠤ ᠪᠠ ᠴᠢᠰᠤ ᠪᠠᠷ ᠢᠷᠡᠭᠰᠡᠨ᠃ ᠭᠡᠷᠡᠴᠢᠯᠡᠭᠴᠢ ᠨᠢ ᠠᠷᠢᠭᠤᠨ ᠰᠦᠨᠡᠰᠦ ᠪᠢᠯᠡ᠂ ᠠᠷᠢᠭᠤᠨ ᠰᠦᠨᠡᠰᠦ ᠪᠣᠯ ᠦᠨᠡᠨ᠃ 7 ᠭᠡᠷᠡᠴᠢᠯᠡᠭᠴᠢ ᠨᠢ ᠭᠤᠷᠪᠠ ᠪᠤᠢ᠃ 8 ᠲᠡᠳᠡᠭᠡᠷ ᠨᠢ ᠠᠷᠢᠭᠤᠨ ᠰᠦᠨᠡᠰᠦ᠂ ᠤᠰᠤ ᠪᠣᠯᠣᠨ ᠴᠢᠰᠤ ᠶᠤᠮ᠃ ᠡᠨᠡ ᠭᠤᠷᠪᠠ ᠨᠢ ᠨᠢᠭᠡ ᠪᠢᠯᠡ᠃ 9 ᠪᠢᠳᠡ ᠬᠥᠮᠦᠨ ᠦ ᠭᠡᠷᠡᠴᠢᠯᠡᠯ ᠢ ᠬᠦᠯᠢᠶᠡᠨ ᠠᠪᠳᠠᠭ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠭᠡᠷᠡᠴᠢᠯᠡᠯ ᠨᠢ ᠲᠡᠭᠦᠨ ᠡᠴᠡ ᠠᠭᠤᠤ ᠶᠤᠮ᠃ ᠤᠴᠢᠷ ᠨᠢ᠂ ᠡᠨᠡ ᠪᠣᠯ ᠥᠪᠡᠷ ᠦᠨ ᠢᠶᠠᠨ ᠬᠦᠦ ᠶᠢᠨ ᠲᠤᠬᠠᠢ ᠭᠡᠷᠡᠴᠢᠯᠡᠭᠰᠡᠨ ᠪᠤᠷᠬᠠᠨ ᠤ ᠭᠡᠷᠡᠴᠢᠯᠡᠯ ᠶᠤᠮ᠃ 10 ᠪᠤᠷᠬᠠᠨ ᠤ ᠬᠦᠦ ᠶᠢ ᠢᠲᠡᠭᠡᠭᠴᠢ ᠶᠢᠨ ᠰᠡᠳᠬᠢᠯ ᠳᠤ ᠲᠡᠷᠡ ᠬᠦ ᠭᠡᠷᠡᠴᠢᠯᠡᠯ ᠪᠤᠢ᠃ ᠪᠤᠷᠬᠠᠨ ᠢ ᠦᠯᠦ ᠢᠲᠡᠭᠡᠭᠴᠢᠳ ᠨᠢ ᠬᠦᠦ ᠶᠢᠨ ᠢᠶᠠᠨ ᠲᠤᠬᠠᠢ ᠭᠡᠷᠡᠴᠢᠯᠡᠭᠰᠡᠨ ᠭᠡᠷᠡᠴᠢᠯᠡᠯ ᠢ ᠦᠯᠦ ᠢᠲᠡᠭᠡᠭᠰᠡᠨ ᠢᠶᠡᠷ ᠢᠶᠠᠨ ᠪᠤᠷᠬᠠᠨ ᠢ ᠬᠤᠳᠠᠯᠴᠢ ᠪᠣᠯᠭᠠᠭᠰᠠᠨ᠃ 11 ᠭᠡᠷᠡᠴᠢᠯᠡᠯ ᠨᠢ ᠡᠨᠡ ᠪᠠᠢᠨᠠ᠄ ᠪᠤᠷᠬᠠᠨ ᠪᠢᠳᠡᠨ ᠳᠦ ᠮᠥᠩᠬᠡ ᠠᠮᠢ ᠶᠢ ᠰᠣᠶᠣᠷᠬᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠠᠮᠢ ᠨᠢ ᠲᠡᠭᠦᠨ ᠦ ᠬᠦᠦ ᠳᠦ ᠪᠠᠢᠨᠠ᠃ 12 ᠪᠤᠷᠬᠠᠨ ᠤ ᠬᠦᠦ ᠪᠠᠢᠳᠠᠭ ᠬᠥᠮᠦᠨ ᠳᠦ ᠠᠮᠢ ᠪᠤᠢ᠂ ᠪᠤᠷᠬᠠᠨ ᠤ ᠬᠦᠦ ᠪᠠᠢᠬᠤ ᠦᠭᠡᠢ ᠬᠥᠮᠦᠨ ᠳᠦ ᠠᠮᠢ ᠪᠠᠢᠬᠤ ᠦᠭᠡᠢ᠃
ᠢᠲᠡᠭᠡᠨ ᠭᠤᠶᠤᠬᠤ ᠪᠠ ᠵᠠᠭᠤᠴᠢᠯᠠᠨ ᠭᠤᠶᠤᠬᠤ
13 ᠪᠤᠷᠬᠠᠨ ᠤ ᠬᠦᠦ ᠶᠢᠨ ᠨᠡᠷᠡ ᠶᠢ ᠢᠲᠡᠭᠡᠳᠡᠭ ᠲᠠ ᠨᠠᠷ ᠲᠤ ᠮᠥᠩᠬᠡ ᠠᠮᠢ ᠲᠠᠢ ᠭᠡᠳᠡᠭ ᠢ ᠮᠡᠳᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠪᠢ ᠡᠳᠡᠭᠡᠷ ᠢ ᠪᠢᠴᠢᠯᠡ᠃
14 ᠪᠤᠷᠬᠠᠨ ᠤ ᠡᠮᠦᠨᠡ ᠪᠢᠳᠡᠨ ᠳᠦ ᠡᠢᠮᠦ ᠵᠣᠷᠢᠭ ᠪᠤᠢ᠄ ᠪᠢᠳᠡ ᠪᠤᠷᠬᠠᠨ ᠤ ᠰᠠᠨᠠᠭᠠ ᠪᠠᠷ ᠶᠠᠭᠤ ᠭᠤᠶᠤᠭᠰᠠᠨ ᠴᠤ ᠲᠡᠷᠡ ᠰᠣᠨᠣᠰᠣᠨᠠ᠃ 15 ᠪᠢᠳᠡ ᠶᠠᠭᠤ ᠭᠤᠶᠤᠭᠰᠠᠨ ᠴᠤ ᠲᠡᠷᠡ ᠰᠣᠨᠣᠰᠣᠨᠠ ᠭᠡᠳᠡᠭ ᠢ ᠮᠡᠳᠡᠪᠡᠯ ᠲᠡᠭᠦᠨ ᠡᠴᠡ ᠭᠤᠶᠤᠭᠰᠠᠨ ᠵᠦᠢᠯᠡᠰ ᠢᠶᠡᠨ ᠬᠦᠷᠲᠡᠳᠡᠭ ᠢᠶᠡᠨ ᠴᠤ ᠮᠡᠳᠡᠨᠡ᠃ 16 ᠦᠬᠦᠯ ᠳᠦ ᠬᠦᠷᠬᠦ ᠦᠭᠡᠢ ᠨᠢᠭᠦᠯ ᠦᠢᠯᠡᠳᠴᠦ ᠪᠠᠢᠭᠠ ᠠᠬᠠ ᠳᠡᠭᠦᠦ ᠪᠡᠨ ᠣᠯᠵᠤ ᠦᠵᠡᠪᠡᠯ ᠳᠠᠭᠠᠳᠬᠠᠨ ᠭᠤᠶᠤᠭᠠᠷᠠᠢ᠃ ᠲᠡᠭᠡᠪᠡᠯ ᠦᠬᠦᠯ ᠳᠦ ᠬᠦᠷᠬᠦ ᠦᠭᠡᠢ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠲᠡᠷᠡ ᠬᠥᠮᠦᠨ ᠳᠦ ᠪᠤᠷᠬᠠᠨ ᠠᠮᠢ ᠥᠭᠭᠥᠨᠡ᠃ ᠦᠬᠦᠯ ᠳᠦ ᠬᠦᠷᠬᠦ ᠨᠢᠭᠦᠯ ᠭᠡᠵᠦ ᠪᠤᠢ᠂ ᠡᠭᠦᠨ ᠦ ᠲᠥᠯᠥᠭᠡ ᠳᠠᠭᠠᠳᠬᠠ ᠭᠡᠵᠦ ᠪᠢ ᠬᠡᠯᠡᠬᠦ ᠦᠭᠡᠢ᠃ 17 ᠵᠥᠪ ᠪᠤᠰᠤ ᠶᠠᠪᠤᠳᠠᠯ ᠪᠣᠯᠭᠠᠨ ᠨᠢᠭᠦᠯ ᠮᠥᠨ᠂ ᠭᠡᠪᠡᠴᠦ ᠦᠬᠦᠯ ᠳᠦ ᠬᠦᠷᠬᠦ ᠦᠭᠡᠢ ᠨᠢᠭᠦᠯ ᠴᠤ ᠪᠤᠢ᠃
ᠪᠤᠷᠬᠠᠨ ᠤ ᠬᠠᠮᠠᠭᠠᠯᠠᠯᠲᠠ
18 ᠪᠤᠷᠬᠠᠨ ᠠᠴᠠ ᠲᠥᠷᠥᠭᠰᠡᠨ ᠬᠡᠨ ᠨᠢ ᠴᠤ ᠨᠢᠭᠦᠯ ᠦᠢᠯᠡᠳᠦᠭᠡᠳ ᠪᠠᠢᠳᠠᠭ ᠦᠭᠡᠢ ᠶᠢ ᠪᠢᠳᠡ ᠮᠡᠳᠡᠨᠡ᠃ ᠲᠡᠭᠦᠨ ᠢ ᠪᠤᠷᠬᠠᠨ ᠠᠴᠠ ᠲᠥᠷᠥᠭᠰᠡᠨ ᠨᠢᠭᠡᠨ ᠨᠢ ᠬᠠᠮᠠᠭᠠᠯᠠᠳᠠᠭ ᠤᠴᠢᠷ ᠠᠴᠠ ᠮᠠᠭᠤ ᠨᠢᠭᠡᠨ ᠨᠢ ᠲᠡᠭᠦᠨ ᠳᠦ ᠬᠠᠯᠳᠠᠵᠤ ᠴᠢᠳᠠᠬᠤ ᠦᠭᠡᠢ᠃ 19 ᠪᠢᠳᠡ ᠪᠣᠯ ᠪᠤᠷᠬᠠᠨ ᠤ ᠬᠢ᠂ ᠪᠦᠬᠦ ᠶᠢᠷᠲᠢᠨᠴᠦ ᠪᠣᠯ ᠮᠠᠭᠤ ᠨᠢᠭᠡᠨ ᠦ ᠮᠡᠳᠡᠯ ᠳᠦ ᠪᠠᠢᠭᠠ ᠶᠢ ᠪᠢᠳᠡ ᠮᠡᠳᠡᠨᠡ᠃ 20 ᠪᠤᠷᠬᠠᠨ ᠤ ᠬᠦᠦ ᠢᠷᠡᠭᠡᠳ ᠪᠢᠳᠡᠨ ᠳᠦ ᠥᠪᠡᠷ ᠦᠨ ᠢᠶᠠᠨ ᠦᠨᠡᠨ ᠭᠡᠳᠡᠭ ᠢ ᠮᠡᠳᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠣᠢ ᠤᠬᠠᠭᠠᠨ ᠰᠣᠶᠣᠷᠬᠠᠭᠰᠠᠨ ᠢ ᠪᠢᠳᠡ ᠮᠡᠳᠡᠨᠡ᠃ ᠪᠢᠳᠡ ᠲᠡᠷᠡ ᠬᠦ ᠦᠨᠡᠨ᠂ ᠲᠤᠬᠠᠢᠯᠠᠪᠠᠯ ᠲᠡᠭᠦᠨ ᠦ ᠬᠦᠦ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠪᠠᠢᠳᠠᠭ᠃ ᠲᠡᠷᠡ ᠪᠣᠯ ᠦᠨᠡᠨ ᠪᠤᠷᠬᠠᠨ᠂ ᠪᠠᠰᠠ ᠮᠥᠩᠬᠡ ᠠᠮᠢ ᠪᠢᠯᠡ᠃
21 ᠬᠡᠦᠬᠡᠳ ᠤᠳ ᠡ᠂ ᠰᠢᠲᠦᠭᠡᠨ ᠨᠦᠭᠦᠳ ᠡᠴᠡ ᠬᠣᠯᠠ ᠪᠠᠢ᠃