ᠶᠣᠪ ᠭᠤᠴᠢᠨ ᠨᠢᠭᠡ
1 ᠪᠢ ᠨᠢᠳᠦ ᠲᠠᠢ ᠪᠠᠨ ᠭᠡᠷᠡ ᠪᠠᠢᠭᠤᠯᠤᠭᠰᠠᠨ᠂ ᠪᠦᠰᠡᠭᠦᠢ ᠬᠥᠮᠦᠨ ᠢ ᠪᠢ ᠬᠡᠷᠬᠢᠨ ᠰᠢᠷᠲᠡᠵᠦ ᠪᠣᠯᠣᠨᠠ ᠪᠤᠢ︖
2 ᠳᠡᠭᠡᠷᠡ ᠪᠤᠢ ᠪᠤᠷᠬᠠᠨ ᠤ ᠬᠦᠷᠲᠡᠭᠡᠬᠦ ᠬᠤᠪᠢ ᠲᠡᠭᠦᠰ ᠬᠦᠴᠦᠲᠡᠨ ᠦ ᠣᠯᠭᠣᠬᠤ ᠥᠪ ᠶᠠᠭᠤ ᠭᠡᠪᠡᠯ᠂
3 ᠪᠤᠷᠤᠭᠤᠲᠠᠨ ᠳᠤ ᠭᠠᠢ ᠮᠠᠭᠤ ᠶᠢ ᠦᠢᠯᠡᠳᠦᠭᠴᠢᠳ ᠲᠤ ᠭᠠᠮᠰᠢᠭ ᠪᠤᠰᠤ ᠤᠤ︖
4 ᠵᠠᠮ ᠮᠥᠷ ᠢ ᠮᠢᠨᠢ ᠲᠡᠷᠡ ᠠᠵᠢᠭᠯᠠᠵᠤ ᠠᠯᠬᠤᠮ ᠪᠦᠷᠢ ᠶᠢ ᠮᠢᠨᠢ ᠲᠡᠷᠡ ᠲᠣᠭᠠᠯᠠᠵᠤ ᠪᠠᠢᠭᠠ ᠪᠢᠰᠢ ᠤᠤ︖
5 ᠬᠡᠷᠪᠡ ᠠᠯᠬᠤᠮ ᠮᠢᠨᠢ ᠬᠠᠭᠤᠷᠮᠠᠭ᠂ ᠬᠥᠯ ᠮᠢᠨᠢ ᠮᠡᠬᠡᠯᠡᠯ ᠳᠦ ᠰᠢᠭᠤᠷᠬᠠᠢ ᠪᠠᠢᠭᠰᠠᠨ ᠪᠣᠯ᠂
6 (ᠪᠢ ᠰᠢᠳᠤᠷᠭᠤ ᠲᠡᠩᠨᠡᠭᠦᠷ ᠢᠶᠡᠷ ᠬᠡᠮᠵᠢᠭᠳᠡᠵᠦ ᠪᠤᠷᠬᠠᠨ ᠪᠤᠷᠤᠭᠤ ᠦᠭᠡᠢ ᠶᠢ ᠮᠢᠨᠢ ᠮᠡᠳᠡᠭᠰᠡᠨ ᠴᠤ ᠪᠣᠯᠣᠭᠠᠰᠠᠢ᠃)
7 ᠠᠯᠬᠤᠮ ᠮᠢᠨᠢ ᠲᠡᠭᠦᠨ ᠦ ᠵᠠᠮ ᠠᠴᠠ ᠡᠷᠭᠢᠨ ᠵᠢᠷᠦᠬᠡ ᠮᠢᠨᠢ ᠨᠢᠳᠦ ᠪᠡᠨ ᠳᠠᠭᠠᠵᠤ ᠠᠯᠠᠭᠠ ᠮᠢᠨᠢ ᠠᠯᠢ ᠨᠢᠭᠡ ᠲᠣᠯᠪᠣ ᠶᠢ ᠨᠠᠭᠠᠯᠳᠤᠭᠤᠯᠤᠭᠰᠠᠨ ᠪᠣᠯ᠂
8 ᠲᠠᠷᠢᠭᠰᠠᠨ ᠢ ᠮᠢᠨᠢ ᠥᠭᠡᠷᠡ ᠬᠥᠮᠦᠨ ᠢᠳᠡᠭ ᠦᠷᠡ ᠲᠠᠷᠢᠶᠠ ᠮᠢᠨᠢ ᠦᠨᠳᠦᠰᠦ ᠪᠡᠷ ᠢᠶᠠᠨ ᠰᠤᠭᠤᠷᠠᠭ᠃
9 ᠵᠢᠷᠦᠬᠡ ᠮᠢᠨᠢ ᠥᠭᠡᠷᠡ ᠡᠮᠡᠭᠲᠡᠢ ᠤᠷᠤᠭᠤ ᠲᠠᠲᠠᠭᠳᠠᠵᠤ ᠬᠥᠷᠰᠢ ᠶᠢᠨ ᠢᠶᠠᠨ ᠡᠭᠦᠳᠡᠨ ᠳᠦ ᠪᠢ ᠭᠡᠲᠡᠭᠰᠡᠨ ᠪᠣᠯ᠂
10 ᠮᠢᠨᠦ ᠡᠬᠡᠨᠡᠷ ᠥᠭᠡᠷᠡ ᠡᠷᠡ ᠶᠢᠨ ᠲᠥᠯᠥᠭᠡ ᠲᠠᠷᠢᠶᠠ ᠴᠠᠢᠷᠠᠭᠤᠯᠤᠭ ᠥᠭᠡᠷᠡ ᠡᠷᠡᠴᠦᠳ ᠲᠡᠭᠦᠨ ᠦ ᠳᠡᠭᠡᠷᠡ ᠡᠴᠡ ᠲᠣᠩ᠋ᠭᠣᠢᠭ᠂
11 ᠲᠡᠷᠡ ᠨᠢ ᠰᠢᠪᠰᠢᠭᠲᠦ ᠬᠡᠷᠡᠭ ᠰᠢᠳᠬᠡᠭᠳᠡᠪᠡᠯ ᠵᠣᠬᠢᠬᠤ ᠭᠡᠮ ᠪᠤᠶᠤ
12 ᠰᠥᠨᠥᠲᠡᠯᠡ ᠰᠢᠲᠠᠭᠠᠳᠠᠭ ᠭᠠᠯ ᠪᠥᠭᠡᠳ ᠦᠷᠡ ᠲᠠᠷᠢᠶᠠ ᠶᠢ ᠮᠢᠨᠢ ᠦᠨᠳᠦᠰᠦ ᠪᠡᠷ ᠨᠢ ᠤᠰᠠᠳᠬᠠᠬᠤ ᠪᠣᠯᠣᠨᠠ᠃
13 ᠵᠠᠷᠤᠴᠠ ᠰᠢᠪᠡᠭᠴᠢᠳ ᠮᠢᠨᠢ ᠨᠠᠳᠠ ᠳᠤ ᠭᠣᠮᠣᠳᠠᠯ ᠭᠠᠷᠭᠠᠬᠤ ᠳᠤ ᠵᠥᠪ ᠪᠤᠰᠤ ᠪᠠᠷ ᠪᠢ ᠬᠠᠷᠢᠭᠤᠯᠤᠭᠰᠠᠨ ᠪᠣᠯ᠂
14 ᠪᠤᠷᠬᠠᠨ ᠪᠣᠰᠬᠤ ᠳᠤ ᠪᠢ ᠶᠠᠭᠠᠬᠢᠬᠤ ᠪᠢᠯᠡ︖ ᠨᠠᠮᠠᠶᠢ ᠪᠠᠢᠴᠠᠭᠠᠬᠤ ᠳᠤ ᠪᠢ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠬᠤ ᠪᠢᠯᠡ︖
15 ᠨᠠᠮᠠᠶᠢ ᠬᠡᠪᠡᠯᠢ ᠳᠣᠲᠣᠷᠠ ᠪᠦᠲᠦᠭᠡᠭᠰᠡᠨ ᠲᠡᠷᠡ ᠲᠡᠳᠡᠨ ᠢ ᠴᠤ ᠪᠦᠲᠦᠭᠡᠭᠰᠡᠨ ᠪᠢᠰᠢ ᠤᠤ︖ ᠠᠳᠠᠯᠢ ᠨᠢᠭᠡᠨ ᠨᠢ ᠪᠢᠳᠡᠨ ᠢ ᠰᠠᠪᠠ ᠶᠢᠨ ᠳᠣᠲᠣᠷᠠ ᠲᠣᠭᠲᠠᠭᠠᠭᠰᠠᠨ ᠪᠢᠰᠢ ᠤᠤ︖
16 ᠪᠢ ᠦᠭᠡᠭᠦᠦ ᠬᠥᠮᠦᠰ ᠦᠨ ᠬᠦᠰᠡᠯᠲᠡ ᠶᠢ ᠦᠯᠦ ᠵᠥᠪᠰᠢᠶᠡᠷᠡᠵᠦ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢᠨ ᠨᠢᠳᠦ ᠶᠢ ᠪᠥᠯᠴᠢᠢᠯᠭᠡᠭᠰᠡᠨ ᠪᠣᠯ᠂
17 ᠥᠨᠥᠴᠢᠨ ᠨᠢᠭᠡᠨ ᠳᠦ ᠢᠳᠡᠭᠦᠯᠦᠯ ᠦᠭᠡᠢ ᠬᠣᠭᠣᠯᠠ ᠪᠠᠨ ᠭᠠᠭᠴᠠᠭᠠᠷ ᠢᠳᠡᠭᠰᠡᠨ ᠪᠣᠯ᠂
18 (ᠬᠠᠷᠢᠨ ᠪᠢ ᠪᠠᠭᠠ ᠠᠴᠠ ᠪᠠᠨ ᠯᠠ ᠥᠨᠥᠴᠢᠨ ᠬᠡᠦᠬᠡᠳ ᠢ ᠥᠪᠡᠷ ᠦᠨ ᠬᠢᠨᠢ ᠡᠴᠢᠭᠡ ᠨᠢ ᠰᠢᠭ ᠥᠰᠭᠡᠵᠦ ᠪᠠᠢᠭᠰᠠᠨ᠂ ᠲᠥᠷᠥᠭᠰᠡᠨ ᠴᠠᠭ ᠠᠴᠠ ᠪᠠᠨ ᠬᠣᠢᠰᠢ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢ ᠲᠡᠳᠬᠦᠵᠦ ᠪᠠᠢᠭᠰᠠᠨ᠂)
19 ᠪᠢ ᠬᠤᠪᠴᠠᠰᠤ ᠦᠭᠡᠢ᠂ ᠬᠤᠴᠢᠯᠭᠠ ᠦᠭᠡᠢ ᠳᠣᠣᠷᠠᠳᠠᠵᠤ ᠪᠤᠢ ᠶᠠᠳᠠᠭᠤ ᠶᠢ ᠬᠠᠷᠠᠭᠠᠳ
20 ᠬᠣᠨᠢᠨ ᠤ ᠪᠠᠨ ᠤᠩ᠋ᠭᠠᠰᠤ ᠪᠠᠷ ᠳᠤᠯᠠᠭᠠᠴᠠᠭᠤᠯᠤᠭᠠ ᠦᠭᠡᠢ ᠪᠠᠢᠵᠤ ᠲᠡᠷᠡ ᠬᠥᠮᠦᠰ ᠨᠠᠮᠠᠶᠢ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠢᠷᠥᠭᠡᠭᠡ ᠦᠭᠡᠢ ᠪᠣᠯ᠂
21 ᠰᠢᠭᠦᠯᠲᠡ ᠳᠡᠭᠡᠷᠡ ᠨᠠᠮᠠᠶᠢ ᠳᠡᠮᠵᠢᠭᠴᠢ ᠪᠠᠢᠬᠤ ᠶᠢ ᠬᠠᠷᠠᠭᠠᠳ ᠥᠨᠥᠴᠢᠨ ᠤ ᠡᠰᠡᠷᠭᠦ ᠭᠠᠷ ᠢᠶᠠᠨ ᠳᠠᠯᠠᠢᠭᠰᠠᠨ ᠪᠣᠯ᠂
22 ᠭᠠᠷ ᠮᠢᠨᠢ ᠮᠥᠷᠥ ᠡᠴᠡ ᠪᠡᠨ ᠮᠤᠯᠲᠤᠷᠠᠭ ᠰᠤᠭᠤᠨ ᠠᠴᠠ ᠪᠠᠨ ᠰᠠᠯᠤᠭ᠂
23 ᠪᠢ ᠪᠤᠷᠬᠠᠨ ᠠᠴᠠ ᠢᠷᠡᠬᠦ ᠭᠠᠮᠰᠢᠭ ᠠᠴᠠ ᠠᠶᠤᠳᠠᠭ ᠲᠡᠭᠦᠨ ᠦ ᠰᠦᠷ ᠬᠦᠴᠦ ᠡᠴᠡ ᠡᠮᠢᠶᠡᠳᠡᠭ ᠲᠤᠯᠠ ᠲᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ᠃
24 ᠪᠢ ᠠᠯᠲᠠᠨ ᠳᠤ ᠢᠲᠡᠭᠡᠯ ᠢᠶᠡᠨ ᠲᠠᠯᠪᠢᠵᠤ ᠰᠢᠵᠢᠷ ᠠᠯᠲᠠᠨ ᠳᠤ 《ᠮᠢᠨᠦ ᠨᠠᠢᠳᠠᠪᠤᠷᠢ》 ᠭᠡᠵᠦ ᠬᠡᠯᠡᠭᠰᠡᠨ ᠪᠣᠯ᠂
25 ᠪᠢ ᠡᠯᠪᠡᠭ ᠪᠠᠶᠠᠯᠢᠭ ᠲᠠᠭᠠᠨ ᠭᠠᠷ ᠢᠶᠠᠷ ᠢᠶᠠᠨ ᠬᠤᠷᠢᠶᠠᠭᠰᠠᠨ ᠦᠯᠡᠮᠵᠢ ᠬᠥᠷᠥᠩᠭᠡᠨ ᠳᠡᠭᠡᠨ ᠪᠠᠶᠠᠷᠯᠠᠭᠰᠠᠨ ᠪᠣᠯ᠂
26 ᠨᠠᠷᠠᠨ ᠤ ᠰᠠᠴᠤᠷᠠᠯᠲᠠ ᠶᠢ ᠰᠠᠷᠠᠨ ᠤ ᠵᠢᠪᠬᠤᠭᠠ ᠲᠠᠢ ᠪᠠᠷ ᠨᠡᠭᠦᠬᠦ ᠶᠢ ᠬᠠᠷᠠᠭᠠᠳ
27 ᠵᠢᠷᠦᠬᠡ ᠮᠢᠨᠢ ᠰᠡᠮᠬᠡᠨ ᠢᠶᠡᠷ ᠤᠷᠤᠭᠤ ᠲᠠᠲᠠᠭᠳᠠᠨ ᠭᠠᠷ ᠢᠶᠠᠨ ᠣᠷᠣᠭᠤᠯ ᠢᠶᠠᠷ ᠢᠶᠠᠨ ᠦᠨᠦᠰᠴᠦ ᠪᠠᠢᠭᠰᠠᠨ ᠪᠣᠯ᠂
28 ᠪᠢ ᠡᠳᠡᠭᠡᠷ ᠢᠶᠡᠷ ᠰᠢᠳᠬᠡᠭᠳᠡᠪᠡᠰᠦ ᠵᠣᠬᠢᠬᠤ ᠭᠡᠮ ᠲᠡᠢ ᠪᠠᠢᠬᠤ ᠰᠠᠨ ᠡᠨᠡ ᠪᠣᠯ ᠳᠡᠭᠡᠷᠡ ᠪᠤᠢ ᠪᠤᠷᠬᠠᠨ ᠠᠴᠠ ᠲᠡᠷᠰᠯᠡᠬᠦ ᠬᠡᠷᠡᠭ ᠶᠤᠮ᠃
29 ᠪᠢ ᠳᠠᠢᠰᠤᠨ ᠤ ᠪᠠᠨ ᠰᠦᠢᠷᠡᠯ ᠳᠦ ᠪᠠᠶᠠᠷᠯᠠᠵᠤ ᠭᠠᠢ ᠲᠣᠬᠢᠶᠠᠯᠳᠤᠬᠤ ᠳᠤᠨᠢ ᠣᠩᠭᠢᠷᠠᠵᠤ ᠪᠠᠢᠭᠰᠠᠨ ᠪᠣᠯ᠂
30 (ᠠᠮᠢ ᠶᠢ ᠨᠢ ᠠᠪᠬᠤ ᠬᠠᠷᠢᠶᠠᠯ ᠢᠶᠠᠷ ᠠᠮᠠ ᠮᠢᠨᠢ ᠨᠢᠭᠦᠯ ᠦᠢᠯᠡᠳᠦᠭᠡ ᠦᠭᠡᠢ ᠪᠠᠢᠭᠰᠠᠨ᠂)
31 ᠮᠢᠨᠦ ᠮᠠᠢᠬᠠᠨ ᠤ ᠬᠢᠨ 〈ᠶᠣᠪ ᠤᠨ ᠮᠢᠬᠠ ᠪᠠᠷ ᠴᠠᠳᠤᠭᠠ ᠦᠭᠡᠢ ᠬᠡᠨ ᠪᠠᠢᠨᠠ︖〉 ᠭᠡᠵᠦ ᠬᠡᠯᠡᠭᠡ ᠦᠭᠡᠢ ᠪᠣᠯ᠂
32 (ᠠᠶᠠᠨ ᠤ ᠬᠥᠮᠦᠨ ᠳᠦ ᠪᠢ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠳᠡᠭ ᠤᠴᠢᠷ ᠬᠠᠷᠢ ᠬᠥᠮᠦᠨ ᠭᠠᠳᠠᠭᠠ ᠬᠣᠨᠣᠵᠤ ᠪᠠᠢᠭᠰᠠᠨ ᠦᠭᠡᠢ᠂)
33 ᠪᠢ ᠭᠡᠮ ᠢᠶᠡᠨ ᠡᠪᠦᠷ ᠲᠡᠭᠡᠨ ᠨᠢᠭᠤᠨ ᠪᠤᠰᠤᠳ ᠬᠥᠮᠦᠨ 11 ᠲᠠᠢ ᠠᠳᠠᠯᠢ ᠪᠤᠷᠤᠭᠤ ᠪᠠᠨ ᠳᠠᠯᠳᠠᠯᠠᠳᠠᠭ ᠪᠠᠢᠭᠰᠠᠨ ᠪᠣᠯ᠂
34 ᠪᠢ ᠣᠯᠠᠨ ᠲᠦᠮᠡᠨ ᠡᠴᠡ ᠠᠶᠤᠨ ᠪᠦᠯᠢ ᠶᠢᠨ ᠬᠢᠨ ᠤ ᠪᠠᠨ ᠵᠢᠭ᠍ᠰᠢᠯ ᠡᠴᠡ ᠵᠢᠷᠦᠬᠡᠰᠢᠶᠡᠭᠰᠡᠨ ᠳᠡᠭᠡᠨ ᠡᠭᠦᠳᠡ ᠪᠡᠷ ᠭᠠᠷᠤᠯ ᠦᠭᠡᠢ ᠳᠠᠭᠤ ᠪᠠᠨ ᠬᠤᠷᠢᠶᠠᠵᠤ ᠪᠠᠢᠭᠰᠠᠨ ᠪᠣᠯ᠂
35 (ᠬᠡᠨ ᠨᠢᠭᠡ ᠨᠢ ᠮᠢᠨᠦᠬᠢ ᠶᠢ ᠰᠣᠨᠣᠰᠳᠠᠭ ᠴᠤ ᠪᠣᠯᠣᠭᠠᠰᠠᠢ᠂ ᠬᠠᠷᠠ᠂ ᠭᠠᠷ ᠤᠨ ᠦᠰᠦᠭ ᠮᠢᠨᠢ ᠡ᠊ᠨᠳᠡ ᠪᠠᠢᠨᠠ᠂ ᠲᠡᠭᠦᠰ ᠬᠦᠴᠦᠲᠡᠨ ᠨᠠᠳᠠ ᠳᠤ ᠬᠠᠷᠢᠭᠤᠯᠬᠤ ᠴᠤ ᠪᠣᠯᠣᠭᠠᠰᠠᠢ ᠨᠠᠮᠠᠶᠢ ᠵᠠᠭᠠᠯᠳᠤᠭᠴᠢ ᠶᠢᠨ ᠪᠢᠴᠢᠭᠰᠡᠨ ᠵᠠᠭᠠᠯᠳᠤᠯᠭᠠ ᠪᠠᠢᠭᠰᠠᠨ ᠴᠤ ᠪᠣᠯᠣᠭᠠᠰᠠᠢ︕
36 ᠲᠡᠭᠡᠪᠡᠯ ᠪᠢ ᠯᠠᠪ ᠲᠡᠳᠡᠭᠡᠷ ᠢ ᠮᠥᠷᠥᠨ ᠳᠡᠭᠡᠨ ᠡᠭᠦᠷᠬᠦ ᠰᠠᠨ ᠥᠪᠡᠷ ᠲᠡᠭᠡᠨ ᠲᠢᠲᠢᠮ ᠮᠡᠲᠦ ᠵᠡᠭᠦᠬᠦ ᠰᠠᠨ᠂
37 ᠲᠡᠭᠦᠨ ᠳᠦ ᠪᠦᠬᠦ ᠦᠢᠯᠡ ᠮᠥᠷ ᠢᠶᠡᠨ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠮᠡᠳᠡᠭᠦᠯᠵᠦ ᠬᠠᠨ ᠬᠦᠦ ᠮᠡᠲᠦ ᠲᠡᠭᠦᠨ ᠤᠷᠤᠭᠤ ᠳᠥᠭᠥᠨ ᠣᠴᠢᠬᠤ ᠰᠠᠨ᠃)
38 ᠭᠠᠵᠠᠷ ᠮᠢᠨᠢ ᠨᠠᠳᠠ ᠤᠷᠤᠭᠤ ᠬᠠᠰᠬᠢᠷᠤᠨ ᠬᠠᠭᠠᠯᠤᠭᠰᠠᠨ ᠱᠠᠩ ᠤᠳ ᠨᠢ ᠬᠠᠮᠲᠤ ᠳᠠᠭᠠᠨ ᠤᠬᠢᠯᠠᠵᠤ ᠪᠠᠢᠭᠠ ᠪᠣᠯ᠂
39 ᠪᠢ ᠭᠠᠷᠤᠯᠲᠠ ᠶᠢ ᠨᠢ ᠦᠨᠡ ᠲᠥᠯᠥᠯ ᠦᠭᠡᠢ ᠢᠳᠡᠵᠦ ᠬᠥᠯᠥᠰᠥᠨ ᠦ ᠬᠥᠮᠦᠰ ᠦᠨ ᠬᠢᠨᠢ ᠤᠷᠮᠠ ᠶᠢ ᠬᠤᠭᠤᠯᠤᠭᠰᠠᠨ ᠪᠣᠯ᠂
40 ᠪᠤᠭᠤᠳᠠᠢ ᠶᠢᠨ ᠣᠷᠣᠨ ᠳᠤ ᠥᠷᠭᠡᠰᠦᠲᠦ ᠪᠤᠲᠠ ᠠᠷᠪᠠᠢ ᠶᠢᠨ ᠣᠷᠣᠨ ᠳᠤ ᠰᠢᠷᠠᠯᠵᠢ ᠤᠷᠭᠤᠭ》 ᠭᠡᠪᠡ᠃ ᠡᠢᠨ ᠬᠦ ᠶᠣᠪ ᠤᠨ ᠦᠭᠡ ᠳᠠᠭᠤᠰᠴᠠᠢ᠃