ᠶᠣᠪ ᠠᠷᠪᠠ ᠶᠢᠰᠦ
ᠶᠣᠪ ᠤᠨ ᠬᠠᠷᠢᠭᠤ
1 ᠶᠣᠪ ᠬᠠᠷᠢᠭᠤᠯᠤᠨ᠄
2 《ᠲᠠ ᠨᠠᠷ ᠬᠡᠳᠦᠢ ᠪᠣᠯᠲᠠᠯᠠ ᠰᠡᠳᠬᠢᠯ ᠢ ᠮᠢᠨᠢ ᠰᠢᠨᠠᠯᠭᠠᠨ ᠨᠠᠮᠠᠶᠢ ᠦᠭᠡ ᠪᠡᠷ ᠢᠶᠠᠨ ᠰᠢᠷᠬᠠᠲᠤᠭᠤᠯᠬᠤ ᠪᠤᠢ︖
3 ᠲᠠ ᠨᠠᠷ ᠨᠠᠮᠠᠶᠢ ᠠᠷᠪᠠᠨᠲᠠ ᠭᠤᠲᠤᠭᠠᠵᠤ ᠵᠣᠪᠠᠭᠠᠭᠰᠠᠨ ᠠᠲᠠᠯᠠ ᠪᠠᠨ ᠢᠴᠢᠬᠦ ᠦᠭᠡᠢ ᠪᠠᠢᠨᠠ᠂
4 ᠬᠡᠳᠦᠢᠪᠡᠷ ᠪᠢ ᠠᠯᠳᠠᠭᠰᠠᠨ ᠪᠠᠢᠯᠠ ᠴᠤ ᠠᠯᠳᠠᠭᠠ ᠮᠢᠨᠢ ᠨᠠᠳᠠ ᠳᠤ ᠯᠠ ᠦᠯᠡᠳᠡᠨᠡ᠂
5 ᠲᠠ ᠨᠠᠷ ᠥᠪᠡᠷᠰᠡᠳ ᠢ ᠪᠠᠨ ᠮᠢᠨᠦ ᠳᠡᠭᠡᠭᠦᠷ ᠡᠷᠭᠦᠮᠵᠢᠯᠡᠵᠦ ᠰᠢᠪᠰᠢᠭᠲᠦ ᠪᠠᠢᠳᠠᠯ ᠳᠤ ᠮᠢᠨᠢ ᠨᠠᠮᠠᠶᠢ ᠰᠢᠭᠦᠮᠵᠢᠯᠡᠬᠦ ᠭᠡᠰᠡᠨ ᠴᠤ
6 ᠨᠠᠮᠠᠶᠢ ᠬᠢᠯᠢᠰᠳᠡᠭᠦᠯᠵᠦ᠂ ᠲᠣᠣᠷ ᠲᠠᠭᠠᠨ ᠨᠠᠮᠠᠶᠢ ᠤᠷᠢᠶᠠᠴᠠᠯᠳᠤᠭᠤᠯᠤᠭᠰᠠᠨ ᠨᠢ ᠪᠤᠷᠬᠠᠨ ᠭᠡᠳᠡᠭ ᠢ ᠮᠡᠳᠡᠲᠦᠭᠡᠢ᠃
7 ᠬᠠᠷᠠ᠂ ᠪᠢ᠄ 〈ᠬᠢᠯᠢᠰ ᠡ︕〉 ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠴᠤ ᠬᠠᠷᠢᠭᠤ ᠠᠯᠠᠭᠠ ᠣᠷᠢᠯᠠᠭᠰᠠᠨ ᠴᠤ ᠭᠣᠣᠯᠴᠢ ᠲᠠᠰᠤᠯᠤᠯᠲᠠ ᠠᠯᠠᠭᠠ᠂
8 ᠵᠠᠮ ᠢ ᠮᠢᠨᠢ ᠲᠡᠷᠡ ᠪᠡᠷ ᠬᠠᠭᠠᠭᠰᠠᠨ ᠪᠢ ᠨᠡᠪᠲᠡᠷᠡᠵᠦ ᠴᠢᠳᠠᠬᠤ ᠦᠭᠡᠢ ᠨᠢ᠂ ᠵᠢᠮ ᠳᠡᠭᠡᠷᠡ ᠮᠢᠨᠢ ᠲᠡᠷᠡ ᠬᠠᠷᠠᠩ᠋ᠭᠤᠢ ᠶᠢ ᠲᠠᠯᠪᠢᠵᠤ
9 ᠠᠯᠳᠠᠷ ᠬᠦᠨᠳᠦ ᠶᠢ ᠮᠢᠨᠢ ᠨᠠᠳᠠ ᠠᠴᠠ ᠲᠠᠢᠯᠵᠤ ᠲᠡᠷᠢᠭᠦᠨ ᠡᠴᠡ ᠮᠢᠨᠢ ᠲᠢᠲᠢᠮ ᠢ ᠵᠠᠢᠯᠠᠭᠤᠯᠤᠭᠰᠠᠨ ᠶᠤᠮ᠂
10 ᠲᠡᠷᠡ ᠨᠠᠮᠠᠶᠢ ᠲᠠᠯᠠ ᠪᠦᠷᠢ ᠡᠴᠡ ᠨᠤᠷᠠᠭᠠᠵᠤ ᠪᠢ ᠳᠠᠭᠤᠰᠬᠤ ᠪᠣᠯᠣᠯᠠ︕ ᠲᠡᠷᠡ ᠮᠢᠨᠦ ᠨᠠᠢᠳᠠᠪᠤᠷᠢ ᠶᠢ ᠮᠣᠳᠣ ᠰᠢᠭ᠋ ᠰᠤᠭᠤᠯᠤᠭᠰᠠᠨ᠂
11 ᠨᠠᠳᠠ ᠤᠷᠤᠭᠤ ᠬᠢᠯᠢᠩ ᠢᠶᠠᠨ ᠳᠦᠷᠡᠯᠵᠡᠭᠦᠯᠵᠦ ᠨᠠᠮᠠᠶᠢ ᠳᠠᠢᠰᠤᠨ ᠢᠶᠠᠨ ᠭᠡᠵᠦ ᠦᠵᠡᠭᠰᠡᠨ᠂
12 ᠲᠡᠭᠦᠨ ᠦ ᠴᠡᠷᠢᠭ ᠤᠳ ᠵᠡᠷᠭᠡ ᠪᠡᠷ ᠢᠷᠡᠵᠦ ᠪᠠᠢᠨᠠ ᠨᠠᠮᠠᠶᠢ ᠴᠣᠬᠢᠬᠤ ᠪᠠᠷ ᠵᠠᠮ ᠭᠠᠷᠭᠠᠵᠤ ᠮᠠᠢᠬᠠᠨ ᠢ ᠮᠢᠨᠢ ᠪᠦᠰᠡᠯᠡᠨ ᠪᠠᠭᠤᠳᠠᠯᠯᠠᠵᠠᠢ᠃
13 ᠲᠡᠷᠡ ᠠᠬᠠ ᠳᠡᠭᠦᠦᠰ ᠢ ᠮᠢᠨᠢ ᠨᠠᠳᠠ ᠠᠴᠠ ᠬᠣᠯᠠᠳᠠᠭᠤᠯᠤᠭᠰᠠᠨ ᠠᠨᠳᠠ ᠲᠠᠨᠢᠯ ᠤᠳ ᠮᠢᠨᠢ ᠨᠠᠳᠠ ᠠᠴᠠ ᠪᠦᠷᠢᠮᠦᠰᠦᠨ ᠬᠥᠨᠳᠡᠢᠷᠡᠵᠡᠢ᠂
14 ᠲᠥᠷᠥᠯ ᠲᠥᠷᠥᠭᠰᠡᠳ ᠮᠢᠨᠢ ᠵᠠᠢᠳᠠᠪᠠ ᠳᠣᠲᠣᠨᠣ ᠶᠢᠨ ᠨᠥᠬᠥᠳ ᠮᠢᠨᠢ ᠨᠠᠮᠠᠶᠢ ᠮᠠᠷᠲᠠᠪᠠ᠂
15 ᠮᠢᠨᠦ ᠭᠡᠷ ᠲᠦ ᠰᠠᠭᠤᠭᠴᠢᠳ ᠬᠢᠭᠡᠳ ᠮᠢᠨᠦ ᠰᠢᠪᠡᠭᠴᠢᠳ ᠨᠠᠮᠠᠶᠢ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠳᠦ ᠲᠣᠭᠠᠴᠠᠵᠤ ᠪᠠᠢᠨᠠ ᠲᠡᠳᠡᠨ ᠦ ᠨᠢᠳᠦᠨ ᠳᠦ ᠪᠢ ᠲᠠᠨᠢᠯ ᠪᠤᠰᠤ ᠪᠣᠯᠵᠠᠢ᠂
16 ᠵᠠᠷᠤᠴᠠ ᠪᠠᠨ ᠳᠠᠭᠤᠳᠠᠪᠠᠴᠤ ᠲᠡᠷᠡ ᠬᠠᠷᠢᠭᠤᠯᠬᠤ ᠦᠭᠡᠢ ᠪᠠᠢᠨᠠ᠂ ᠲᠡᠭᠦᠨ ᠡᠴᠡ ᠪᠢ ᠠᠮᠠ ᠪᠠᠷ ᠢᠶᠠᠨ ᠭᠤᠶᠤᠬᠤ ᠪᠣᠯᠵᠠᠢ᠂
17 ᠮᠢᠨᠦ ᠠᠮᠢᠰᠬᠤᠯ ᠡᠬᠡᠨᠡᠷ ᠲᠦ ᠮᠢᠨᠢ ᠵᠢᠭᠰᠢᠭᠦᠷᠢ ᠪᠣᠯᠵᠤ ᠪᠢ ᠠᠬᠠ ᠳᠡᠭᠦᠦᠰ 6 ᠲᠡᠭᠡᠨ ᠵᠢᠪᠡᠭᠦᠦ ᠪᠣᠯᠪᠠ᠂
18 ᠪᠠᠭᠠᠴᠤᠳ ᠬᠦᠷᠲᠡᠯᠡ ᠨᠠᠮᠠᠶᠢ ᠪᠠᠰᠤᠮᠵᠢᠯᠠᠳᠠᠭ᠂ ᠪᠣᠰᠬᠤ ᠳᠤ ᠮᠢᠨᠢ ᠲᠡᠳᠡ ᠨᠠᠮᠠᠶᠢ ᠳᠣᠷᠣᠮᠵᠢᠯᠠᠳᠠᠭ᠂
19 ᠬᠠᠨᠢ ᠨᠥᠬᠥᠳ ᠮᠢᠨᠢ ᠪᠦᠭᠦᠳᠡᠭᠡᠷ ᠨᠠᠮᠠᠶᠢ ᠵᠢᠭ᠍ᠰᠢᠵᠦ ᠬᠠᠢᠷᠠᠯᠠᠳᠠᠭ ᠬᠥᠮᠦᠰ ᠮᠢᠨᠢ ᠴᠤ ᠨᠠᠳᠠ ᠠᠴᠠ ᠡᠷᠭᠢᠵᠡᠢ᠂
20 ᠪᠢ ᠠᠷᠠᠰᠤ ᠶᠠᠰᠤ ᠪᠣᠯᠵᠤ ᠰᠢᠳᠦᠨ ᠦ ᠪᠠᠨ ᠪᠤᠢᠯᠠ ᠪᠠᠷ ᠯᠠ ᠠᠮᠢ ᠵᠢᠭᠤᠵᠤ ᠪᠠᠢᠨᠠ᠂
21 ᠪᠤᠷᠬᠠᠨ ᠤ ᠮᠤᠲᠤᠷ ᠨᠠᠮᠠᠶᠢ ᠴᠣᠬᠢᠭᠰᠠᠨ᠂ ᠠᠨᠳᠠ ᠨᠠᠷ ᠮᠢᠨᠢ᠂ ᠲᠠ ᠨᠠᠷ ᠥᠷᠥ ᠡᠪᠡᠳᠦᠭᠡᠴᠢ᠂ ᠨᠠᠮᠠᠶᠢ ᠥᠷᠥ ᠡᠪᠡᠳᠦᠭᠡᠴᠢ᠂
22 ᠶᠠᠭᠤᠨ ᠳᠤ ᠲᠠ ᠨᠠᠷ ᠪᠤᠷᠬᠠᠨ ᠲᠠᠢ ᠨᠠᠮᠠᠶᠢ ᠬᠠᠪᠴᠢᠵᠤ ᠪᠠᠢᠨᠠ︖ ᠮᠢᠨᠦ ᠮᠢᠬᠠᠨ ᠳᠤ ᠴᠠᠳᠬᠤ ᠦᠭᠡᠢ ᠪᠠᠢᠨᠠ ᠤᠤ︖
23 ᠦᠭᠡᠰ ᠮᠢᠨᠢ ᠪᠢᠴᠢᠭᠳᠡᠭᠰᠡᠨ ᠴᠤ ᠪᠣᠯᠣᠭᠠᠰᠠᠢ ᠨᠣᠮ ᠳᠤ ᠪᠠᠭᠤᠯᠭᠠᠭᠳᠠᠭᠰᠠᠨ ᠴᠤ ᠪᠣᠯᠣᠭᠠᠰᠠᠢ︕
24 ᠲᠡᠮᠦᠷ ᠪᠢᠷ ᠪᠣᠯᠣᠨ ᠲᠤᠭᠤᠯᠭᠠ ᠪᠠᠷ ᠰᠡᠢᠯᠦᠭᠳᠡᠭᠡᠳ ᠬᠠᠳᠠᠨ ᠳᠡᠭᠡᠷᠡ ᠡᠭᠦᠷᠢᠳᠡ ᠮᠥᠩᠬᠡ ᠪᠠᠢᠬᠤ ᠴᠤ ᠪᠣᠯᠣᠭᠠᠰᠠᠢ︕
25 ᠬᠠᠷᠢᠨ ᠪᠢ ᠮᠡᠳᠡᠨᠡ᠂ ᠨᠠᠮᠠᠶᠢ ᠵᠣᠯᠢᠨ ᠠᠪᠤᠭᠴᠢ ᠠᠮᠢᠳᠤ ᠪᠠᠢᠳᠠᠭ︕ ᠡᠴᠦᠰ ᠲᠤᠨᠢ ᠲᠡᠷᠡ ᠪᠡᠷ ᠭᠠᠵᠠᠷ ᠳᠡᠭᠡᠷᠡ ᠵᠣᠭᠰᠣᠬᠤ ᠪᠣᠯᠣᠨᠠ᠂
26 ᠠᠷᠠᠰᠤ ᠮᠢᠨᠢ ᠤᠰᠠᠳᠬᠠᠭᠳᠠᠭᠰᠠᠨ ᠬᠣᠢᠨᠠ ᠪᠢ ᠪᠡᠶᠡ ᠶᠢᠨ ᠢᠶᠠᠨ ᠭᠠᠳᠠᠨᠠ ᠠᠴᠠ 7 ᠪᠤᠷᠬᠠᠨ ᠢ ᠦᠵᠡᠬᠦ ᠪᠣᠯᠣᠨᠠ᠂
27 ᠪᠢ ᠥᠪᠡᠷ ᠢᠶᠡᠨ ᠲᠡᠭᠦᠨ ᠢ ᠦᠵᠡᠨᠡ᠂ ᠪᠤᠰᠤᠳ ᠤᠨ ᠪᠢᠰᠢ᠂ ᠥᠪᠡᠷ ᠦᠨ ᠢᠶᠠᠨ ᠨᠢᠳᠦ ᠪᠡᠷ ᠲᠡᠭᠦᠨ ᠢ ᠬᠠᠷᠠᠨᠠ᠂ ᠡᠯᠢᠭᠡ ᠵᠢᠷᠦᠬᠡ ᠮᠢᠨᠢ ᠲᠡᠰᠦᠨ ᠶᠠᠳᠠᠵᠤ ᠪᠠᠢᠨᠠ︕
28 ᠬᠡᠷᠪᠡ ᠲᠠ ᠨᠠᠷ᠄ 〈ᠡᠨᠡ ᠬᠡᠷᠡᠭ ᠦᠨ ᠦᠨᠳᠦᠰᠦ ᠰᠢᠯᠲᠠᠭᠠᠨ ᠥᠪᠡᠷ ᠲᠤᠨᠢ ᠪᠤᠢ〉 ᠭᠡᠳ ᠨᠠᠮᠠᠶᠢ ᠬᠠᠪᠴᠢᠶᠠ ᠭᠡᠪᠡᠯ
29 ᠢᠯᠳᠦᠨ ᠡᠴᠡ ᠠᠶᠤᠵᠠᠭᠠ᠂ ᠬᠢᠯᠢᠩ ᠢᠯᠳᠦᠨ ᠦ ᠰᠢᠳᠬᠡᠯ ᠢ ᠠᠪᠴᠢᠷᠠᠨᠠ᠂ ᠰᠢᠭᠦᠯᠲᠡ ᠪᠤᠢ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠲᠦᠭᠡᠢ》 ᠭᠡᠪᠡ᠃