ᠶᠣᠪ ᠬᠣᠷᠢᠨ ᠳᠥᠷᠪᠡ
1 ᠶᠠᠭᠠᠬᠢᠭᠠᠳ ᠲᠡᠭᠦᠰ ᠬᠦᠴᠦᠲᠡᠨ ᠰᠢᠭᠦᠬᠦ ᠴᠠᠭ ᠢᠶᠠᠨ ᠲᠣᠭᠲᠠᠭᠠᠳᠠᠭ ᠦᠭᠡᠢ ᠪᠤᠢ︖ ᠶᠠᠭᠠᠬᠢᠭᠠᠳ ᠲᠡᠭᠦᠨ ᠢ ᠲᠠᠨᠢᠳᠠᠭ ᠬᠥᠮᠦᠰ ᠴᠤ ᠲᠡᠭᠦᠨ ᠦ ᠡᠳᠦᠷ ᠤᠳ ᠢ ᠨᠡᠪᠲᠡ ᠬᠠᠷᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠤᠢ︖
2 ᠵᠠᠷᠢᠮ ᠨᠢ ᠬᠢᠯᠢ ᠶᠢᠨ ᠲᠡᠮᠳᠡᠭ ᠢ ᠰᠢᠯᠵᠢᠭᠦᠯᠵᠦ ᠬᠤᠯᠠᠭᠠᠢᠯᠠᠭᠰᠠᠨ ᠮᠠᠯ ᠢᠶᠠᠨ ᠬᠠᠷᠢᠭᠤᠯᠳᠠᠭ
3 ᠥᠨᠥᠴᠢᠨ ᠤ ᠡᠯᠵᠢᠭᠡ ᠶᠢ ᠠᠪᠠᠴᠢᠵᠤ ᠪᠡᠯᠪᠡᠰᠦᠨ ᠦ ᠦᠬᠡᠷ ᠢ ᠪᠠᠷᠢᠴᠠᠭᠠᠨ ᠳᠤ ᠠᠪᠳᠠᠭ
4 ᠳᠣᠷᠣᠢ ᠬᠥᠮᠦᠰ ᠢ ᠵᠠᠮ ᠠᠴᠠ ᠬᠥᠭᠡᠭᠡᠳᠡᠭ ᠡᠢᠮᠦ ᠡᠴᠡ ᠨᠤᠲᠤᠭ ᠤᠨ ᠶᠠᠳᠠᠭᠤᠰ ᠪᠦᠭᠦᠳᠡ ᠨᠢᠭᠤᠭᠳᠠᠳᠠᠭ᠂
5 ᠬᠠᠷᠠ᠂ ᠶᠠᠳᠠᠭᠤᠰ ᠨᠢ ᠴᠥᠯ ᠳᠠᠬᠢ ᠬᠤᠯᠠᠨ ᠮᠡᠲᠦ ᠬᠣᠭᠣᠯᠠ ᠬᠦᠨᠡᠰᠦ ᠬᠠᠢᠳᠠᠭ ᠵᠡᠯᠢᠭᠦᠳ ᠭᠠᠵᠠᠷ ᠠᠴᠠ ᠦᠷᠡ ᠬᠡᠦᠬᠡᠳ ᠲᠡᠭᠡᠨ ᠢᠳᠡᠭᠡᠨ ᠣᠯᠬᠤ ᠭᠡᠵᠦ ᠵᠦᠳᠡᠷᠡᠳᠡᠭ᠂
6 ᠪᠤᠰᠤᠳ ᠤᠨ ᠲᠠᠯᠠᠪᠠᠢ ᠳᠤ ᠲᠠᠷᠢᠶᠠ ᠬᠠᠳᠤᠵᠤ ᠪᠤᠷᠤᠭᠤᠲᠠᠨ ᠤ ᠦᠵᠦᠮ ᠦᠨ ᠲᠠᠯᠠᠪᠠᠢ ᠠᠴᠠ ᠬᠠᠶᠠᠭᠳᠠᠯ ᠲᠡᠭᠦᠨᠡ᠂
7 ᠬᠤᠪᠴᠠᠰᠤ ᠬᠤᠨᠠᠷ ᠦᠭᠡᠢ ᠬᠦᠢᠲᠡᠨ ᠳᠦ ᠨᠥᠮᠥᠷᠬᠦ ᠶᠠᠭᠤᠮᠠ ᠦᠭᠡᠢ ᠰᠥᠨᠢ ᠶᠢ ᠨᠢᠴᠦᠭᠦᠨ ᠥᠩᠭᠡᠷᠡᠭᠦᠯᠦᠨᠡ᠂
8 ᠬᠣᠷᠭᠣᠳᠠᠬᠤ ᠭᠠᠵᠠᠷ ᠦᠭᠡᠢ ᠲᠤᠯᠠ ᠠᠭᠤᠯᠠ ᠶᠢᠨ ᠪᠣᠷᠣᠭᠠᠨ ᠳᠤ ᠨᠣᠷᠴᠤ ᠬᠠᠳᠠ ᠴᠢᠯᠠᠭᠤ ᠲᠡᠪᠡᠷᠢᠨᠡ᠂
9 ᠵᠠᠷᠢᠮ ᠨᠢ ᠡᠴᠢᠭᠡ ᠦᠭᠡᠢ ᠬᠡᠦᠬᠡᠳ ᠢ ᠬᠥᠬᠥᠨ ᠡᠴᠡ ᠨᠢ ᠰᠠᠯᠭᠠᠵᠤ ᠶᠠᠳᠠᠭᠤᠰ ᠠᠴᠠ ᠪᠠᠷᠢᠴᠠᠭᠠ ᠠᠪᠬᠤ ᠭᠡᠨᠡ᠂
10 ᠦᠭᠡᠭᠦᠴᠦᠳ ᠨᠢ ᠬᠤᠪᠴᠠᠰᠤ ᠦᠭᠡᠢ ᠨᠢᠴᠦᠭᠦᠨ ᠶᠠᠪᠤᠳᠠᠭ ᠥᠯᠥᠰᠴᠦ ᠪᠠᠢᠬᠤ ᠳᠠᠭᠠᠨ ᠴᠤ ᠶᠡᠦᠵᠢᠯᠡᠭᠰᠡᠨ ᠲᠠᠷᠢᠶᠠ ᠡᠭᠦᠷᠴᠦ ᠪᠠᠢᠨᠠ᠂
11 ᠲᠡᠳᠡᠨ ᠦ ᠬᠠᠰᠢᠶᠠᠨ ᠳᠤ ᠲᠣᠰᠣ ᠰᠢᠬᠠᠵᠤ ᠴᠠᠩ᠋ᠭᠠᠵᠤ ᠪᠠᠢᠬᠤ ᠳᠠᠭᠠᠨ ᠴᠤ ᠦᠵᠦᠮ ᠦᠨ ᠰᠢᠬᠠᠭᠤᠷᠭᠠ ᠶᠢ ᠭᠢᠰᠬᠢᠵᠦ ᠪᠠᠢᠨᠠ᠂
12 ᠬᠣᠲᠠ ᠠᠴᠠ ᠦᠬᠦᠯᠡᠭᠦᠲᠡ ᠬᠥᠮᠦᠰ ᠦᠨ ᠶᠣᠣᠯᠠᠭᠠᠨ ᠰᠢᠷᠬᠠᠲᠤᠭᠰᠠᠨ ᠬᠥᠮᠦᠰ ᠦᠨ ᠬᠠᠰᠬᠢᠷᠤᠭᠠᠨ ᠭᠠᠷᠴᠤ ᠪᠠᠢᠨᠠ᠃ ᠬᠠᠷᠢᠨ ᠪᠤᠷᠬᠠᠨ ᠡᠨᠡ ᠪᠤᠷᠤᠭᠤ ᠶᠢ ᠣᠢᠰᠢᠶᠠᠬᠤ ᠦᠭᠡᠢ ᠪᠠᠢᠨᠠ᠃
13 ᠭᠡᠷᠡᠯ ᠲᠡᠢ ᠳᠠᠢᠰᠤᠩᠨᠠᠭᠴᠢᠳ ᠴᠤ ᠪᠤᠢ᠂ ᠲᠡᠳᠡ ᠲᠡᠭᠦᠨ ᠦ ᠵᠠᠮ ᠢ ᠮᠡᠳᠡᠳᠡᠭ ᠦᠭᠡᠢ ᠲᠡᠭᠦᠨ ᠦ ᠬᠠᠷᠭᠤᠢ ᠳᠤ ᠪᠠᠢᠵᠤ ᠴᠢᠳᠠᠳᠠᠭ ᠦᠭᠡᠢ᠂
14 ᠠᠯᠠᠭᠤᠷᠴᠢᠨ ᠭᠡᠭᠡ ᠲᠠᠰᠤᠷᠠᠬᠤ ᠳᠤ ᠪᠣᠰᠴᠤ ᠦᠭᠡᠭᠦᠦ ᠶᠠᠳᠠᠭᠤᠰ ᠢ ᠬᠥᠨᠥᠭᠡᠵᠦ ᠰᠥᠨᠢ ᠨᠢ ᠲᠡᠷᠡ ᠬᠤᠯᠠᠭᠠᠢᠴᠢ ᠰᠢᠭ᠋ ᠪᠠᠢᠳᠠᠭ᠂
15 ᠵᠠᠪᠬᠠᠢᠷᠠᠭᠴᠢ ᠶᠢᠨ ᠨᠢᠳᠦ ᠦᠳᠡᠰᠢ ᠶᠢᠨ ᠪᠦᠷᠦᠢ ᠶᠢ ᠬᠦᠯᠢᠶᠡᠨ 〈ᠨᠠᠮᠠᠶᠢ ᠬᠠᠷᠠᠬᠤ ᠨᠢᠳᠦ ᠪᠠᠢᠬᠤ ᠦᠭᠡᠢ〉 ᠬᠡᠮᠡᠨ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠵᠦ
16 ᠬᠠᠷᠠᠩ᠋ᠭᠤᠢ ᠳᠤ ᠪᠠᠢᠰᠢᠩ ᠤᠷᠤᠭᠤ ᠤᠬᠤᠰᠬᠢᠨ ᠣᠷᠣᠳᠠᠭ᠂ ᠡᠳᠦᠷ ᠨᠢ ᠬᠥᠯ ᠬᠤᠷᠢᠶᠠᠳᠠᠭ ᠤᠴᠢᠷ ᠲᠡᠳᠡ ᠭᠡᠷᠡᠯ ᠢ ᠮᠡᠳᠡᠳᠡᠭ ᠦᠭᠡᠢ᠂
17 ᠥᠷᠯᠥᠭᠡ ᠨᠢ ᠲᠡᠳᠡᠨ ᠳᠦ ᠦᠬᠦᠯ ᠦᠨ ᠰᠡᠭᠦᠳᠡᠷ ᠮᠡᠲᠦ᠂ ᠲᠡᠳᠡ ᠦᠬᠦᠯ ᠦᠨ ᠰᠡᠭᠦᠳᠡᠷ ᠦᠨ ᠠᠶᠤᠮᠰᠢᠭ ᠢ ᠰᠠᠢᠨ ᠮᠡᠳᠡᠨᠡ᠃
18 ᠬᠠᠷᠢᠨ ᠲᠡᠳᠡ ᠤᠰᠤᠨ ᠤ ᠳᠡᠭᠡᠷᠡᠬᠢ ᠬᠥᠭᠡᠰᠦ ᠮᠡᠲᠦ᠂ ᠥᠮᠴᠢ ᠨᠢ ᠭᠠᠵᠠᠷ ᠳᠡᠭᠡᠷᠡ ᠬᠠᠷᠢᠶᠠᠭᠳᠠᠵᠤ ᠦᠵᠦᠮ ᠦᠨ ᠲᠠᠯᠠᠪᠠᠢ ᠪᠠᠷ ᠨᠢ ᠥᠩᠭᠡᠷᠡᠬᠦ ᠬᠥᠮᠦᠨ ᠦᠭᠡᠢ ᠪᠣᠯᠣᠨᠠ᠂
19 ᠭᠠᠩ ᠤᠨ ᠬᠠᠯᠠᠭᠤᠨ ᠨᠢ ᠤᠰᠤ ᠴᠠᠰᠤ ᠶᠢ ᠰᠢᠷᠭᠢᠭᠡᠬᠦ ᠮᠡᠲᠦ ᠦᠬᠦᠭᠰᠡᠳ ᠦᠨ ᠣᠷᠣᠨ ᠨᠢᠭᠦᠯᠲᠡᠨ ᠢ ᠰᠢᠷᠭᠢᠭᠡᠨᠡ᠂
20 ᠲᠥᠷᠥᠭᠦᠯᠦᠭᠰᠡᠨ ᠬᠡᠪᠡᠯᠢ ᠨᠢ ᠲᠡᠭᠦᠨ ᠢ ᠮᠠᠷᠲᠠᠨᠠ ᠬᠣᠷᠣᠬᠠᠢ ᠲᠡᠭᠦᠨ ᠢ ᠬᠣᠪᠳᠣᠭᠯᠠᠨ ᠢᠳᠡᠨᠡ᠂ ᠬᠣᠷᠣᠨ ᠮᠠᠭᠤ ᠨᠢ ᠳᠠᠬᠢᠨ ᠳᠤᠷᠠᠰᠤᠭᠳᠠᠬᠤ ᠦᠭᠡᠢ ᠪᠠᠷ ᠮᠣᠳᠣ ᠮᠡᠲᠦ ᠬᠤᠭᠤᠯᠤᠭᠳᠠᠨᠠ᠂
21 ᠲᠡᠳᠡ ᠬᠡᠭᠦᠰᠡᠷ ᠡᠮᠡᠭᠲᠡᠢ ᠳᠦ ᠮᠠᠭᠤ ᠬᠠᠨᠳᠤᠳᠠᠭ ᠪᠡᠯᠪᠡᠰᠦᠨ ᠡᠮᠡ ᠳᠦ ᠰᠠᠢᠨ ᠢ ᠦᠢᠯᠡᠳᠳᠡᠭ ᠦᠭᠡᠢ᠃
22 ᠬᠠᠷᠢᠨ ᠪᠤᠷᠬᠠᠨ ᠬᠦᠴᠦᠲᠡᠨ ᠢ ᠥᠪᠡᠷ ᠦᠨ ᠢᠶᠠᠨ ᠬᠦᠴᠦ ᠪᠡᠷ ᠴᠢᠷᠴᠦ ᠭᠠᠷᠭᠠᠨᠠ ᠲᠡᠷᠡ ᠪᠣᠰᠬᠤ ᠳᠤ ᠲᠡᠳᠡ ᠠᠮᠢᠳᠤ ᠦᠯᠡᠳᠡᠬᠦ ᠨᠠᠢᠳᠠᠪᠤᠷᠢ ᠦᠭᠡᠢ ᠪᠣᠯᠣᠨᠠ᠂
23 ᠪᠤᠷᠬᠠᠨ ᠲᠡᠳᠡᠨ ᠢ ᠠᠶᠤᠯ ᠦᠭᠡᠢ ᠪᠠᠢᠯᠭᠠᠵᠤ ᠲᠡᠳᠡᠨ ᠳᠦ ᠲᠦᠰᠢᠭ ᠪᠣᠯᠵᠤ ᠲᠡᠭᠦᠨ ᠦ ᠮᠡᠯᠮᠡᠢ ᠲᠡᠳᠡᠨ ᠦ ᠵᠠᠮ ᠳᠡᠭᠡᠷᠡ ᠪᠠᠢᠳᠠᠭ᠂
24 ᠲᠡᠳᠡ ᠲᠦᠷ ᠵᠠᠭᠤᠷᠠ ᠡᠷᠭᠦᠮᠵᠢᠯᠡᠭᠳᠡᠭᠡᠳ ᠳᠠᠷᠠᠭᠠ ᠨᠢ ᠠᠯᠠᠭᠠ ᠪᠣᠯᠣᠨᠠ ᠵᠠᠮᠪᠠ ᠴᠡᠴᠡᠭ ᠮᠡᠲᠦ ᠭᠠᠩᠳᠠᠵᠤ ᠬᠣᠷᠪᠣᠢᠬᠤ ᠪᠥᠭᠡᠳ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠮᠡᠲᠦ ᠬᠠᠳᠤᠭᠳᠠᠨᠠ᠂
25 ᠬᠡᠨ ᠡᠳᠡᠭᠡᠷ ᠢ ᠲᠡᠢᠮᠦ ᠪᠢᠰᠢ ᠭᠡᠳ ᠨᠠᠮᠠᠶᠢ ᠬᠤᠳᠠᠯᠴᠢ ᠭᠡᠵᠦ ᠨᠣᠲᠠᠯᠠᠨ ᠦᠭᠡᠰ ᠢ ᠮᠢᠨᠢ ᠬᠣᠭᠣᠰᠣᠨ ᠭᠡᠬᠦ ᠪᠤᠢ︖》 ᠭᠡᠪᠡ᠃