ᠶᠣᠪ ᠠᠷᠪᠠᠨ ᠨᠠᠢ᠌ᠮᠠ
ᠪᠢᠯᠳᠠᠳ᠋ ᠤᠨ ᠶᠠᠷᠢᠶᠠ
1 ᠱᠦᠾ ᠬᠥᠮᠦᠨ ᠪᠢᠯᠳᠠᠳ᠋ ᠬᠠᠷᠢᠭᠤᠯᠵᠤ᠄
2 《ᠲᠠ ᠨᠠᠷ ᠬᠡᠳᠦᠢ ᠪᠣᠯᠲᠠᠯᠠ ᠦᠭᠡ ᠬᠥᠭᠡᠭᠡᠴᠡᠯᠳᠦᠬᠦ ᠶᠤᠮ ᠪᠤᠢ︖ ᠪᠣᠳᠣᠭᠠᠳ ᠦᠵᠡ᠂ ᠳᠠᠷᠠᠭᠠ ᠨᠢ ᠪᠢᠳᠡ ᠶᠠᠷᠢᠯᠴᠠᠶᠠ᠂
3 ᠶᠠᠭᠠᠬᠢᠭᠠᠳ ᠴᠢ ᠪᠢᠳᠡᠨ ᠢ ᠠᠷᠢᠶᠠᠲᠠᠨ ᠮᠡᠲᠦ ᠲᠣᠭᠠᠴᠠᠨ ᠡᠷᠭᠢᠭᠦᠦ ᠬᠥᠮᠦᠨ ᠮᠡᠲᠦ ᠦᠵᠡᠳᠡᠭ ᠪᠤᠢ︖
4 ᠠᠭᠤᠷ ᠲᠠᠭᠠᠨ ᠥᠪᠡᠷ ᠢ ᠪᠠᠨ ᠲᠠᠰᠤᠳᠠᠳᠠᠭ ᠴᠢ ᠴᠢᠨᠦ ᠲᠥᠯᠥᠭᠡ ᠳᠡᠯᠡᠬᠡᠢ ᠣᠷᠬᠢᠭᠳᠠᠵᠤ ᠬᠠᠳᠠ ᠪᠠᠢᠷᠢ ᠡᠴᠡ ᠪᠡᠨ ᠰᠢᠯᠵᠢᠬᠦ ᠪᠣᠯᠵᠤ ᠪᠠᠢᠨᠠ ᠤᠤ︖
5 ᠪᠤᠷᠤᠭᠤᠲᠠᠳ ᠤᠨ ᠭᠡᠷᠡᠯ ᠵᠠᠪᠠᠯ ᠪᠥᠬᠥᠵᠦ ᠭᠠᠯ ᠤᠨ ᠳᠥᠯᠥ ᠨᠢ ᠭᠡᠷᠡᠯᠲᠦᠬᠦ ᠦᠭᠡᠢ᠂
6 ᠭᠡᠷ ᠦᠨ ᠬᠢᠨᠢ ᠭᠡᠷᠡᠯ ᠬᠠᠷᠠᠩ᠋ᠭᠤᠢᠯᠠᠵᠤ ᠳᠡᠭᠡᠷᠡᠬᠢ ᠳ᠋ᠧᠩ ᠨᠢ ᠪᠥᠬᠥᠨᠡ᠂
7 ᠵᠣᠯᠪᠣᠭᠠᠲᠤ ᠠᠯᠬᠤᠭᠠ ᠨᠢ ᠰᠠᠭᠠᠷᠠᠵᠤ ᠵᠠᠯᠢ ᠮᠡᠬᠡᠨ ᠳᠡᠭᠡᠨ ᠰᠦᠢᠷᠡᠨᠡ᠂
8 ᠲᠡᠷᠡ ᠪᠡᠷ ᠬᠠᠪᠬᠠᠨ ᠳᠡᠭᠡᠷᠡ ᠠᠯᠬᠤᠵᠤ ᠬᠥᠯ ᠢᠶᠡᠨ ᠲᠣᠣᠷ ᠲᠤ ᠣᠷᠣᠭᠤᠯᠤᠨᠠ᠂
9 ᠵᠠᠩ᠋ᠭᠤᠤ ᠥᠰᠥᠭᠡᠢ ᠡᠴᠡ ᠨᠢ ᠵᠢᠭᠤᠷᠠᠵᠤ ᠤᠷᠠᠬᠠ ᠲᠡᠭᠦᠨ ᠢ ᠪᠠᠷᠢᠨᠠ᠂
10 ᠲᠡᠭᠦᠨ ᠢ ᠪᠠᠷᠢᠬᠤ ᠪᠠᠷ ᠴᠠᠯᠮᠠ ᠭᠠᠵᠠᠷ ᠲᠤ ᠨᠢᠭᠤᠭᠳᠠᠵᠤ ᠲᠡᠭᠦᠨ ᠦ ᠵᠠᠮ ᠳᠠᠬᠢ ᠪᠤᠭᠤᠢᠯᠢ ᠪᠣᠯᠣᠨᠠ᠃
11 ᠠᠶᠤᠮᠰᠢᠭᠲᠤ ᠵᠦᠢᠯᠡᠰ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠠᠶᠤᠯᠭᠠᠵᠤ ᠠᠯᠬᠤᠮ ᠪᠦᠷᠢ ᠶᠢ ᠨᠢ ᠮᠥᠷᠳᠡᠨᠡ᠂
12 ᠭᠠᠢ ᠲᠡᠭᠦᠨ ᠢ ᠬᠦᠰᠡᠵᠦ ᠭᠠᠮᠰᠢᠭ ᠬᠠᠵᠠᠭᠤ ᠳᠤᠨᠢ ᠬᠦᠯᠢᠶᠡᠭᠰᠡᠭᠡᠷ
13 ᠠᠷᠠᠰᠤ ᠨᠢ ᠡᠪᠡᠳᠴᠢᠨ ᠳᠤ ᠢᠳᠡᠭᠳᠡᠨᠡ᠂ ᠦᠶᠡ ᠮᠥᠴᠢ ᠨᠢ ᠦᠬᠦᠯ ᠦᠨ ᠲᠦᠷᠦᠭᠦᠦ ᠳᠦ ᠢᠳᠡᠭᠳᠡᠨᠡ᠂
14 ᠠᠶᠤᠯ ᠦᠭᠡᠢ ᠮᠠᠢᠬᠠᠨ ᠠᠴᠠ ᠪᠠᠨ ᠲᠡᠷᠡ ᠲᠠᠰᠤᠯᠤᠭᠳᠠᠨ ᠠᠶᠤᠮᠰᠢᠭ ᠤᠨ ᠬᠠᠭᠠᠨ ᠤ ᠡᠮᠦᠨᠡ ᠠᠪᠠᠴᠢᠭᠳᠠᠨᠠ᠂
15 ᠣᠷᠣᠨ ᠭᠡᠷ ᠲᠤᠨᠢ ᠲᠡᠭᠦᠨ ᠦ ᠭᠡᠬᠦ ᠶᠠᠭᠤᠮᠠ ᠦᠯᠡᠳᠡᠬᠦ ᠦᠭᠡᠢ ᠰᠠᠭᠤᠭᠰᠠᠨ ᠨᠤᠲᠤᠭ ᠲᠤᠨᠢ ᠬᠦᠬᠦᠷ ᠰᠠᠴᠤᠭᠳᠠᠨᠠ᠂
16 ᠳᠣᠣᠷᠠ ᠠᠴᠠ ᠨᠢ ᠲᠡᠭᠦᠨ ᠦ ᠦᠨᠳᠦᠰᠦ ᠬᠠᠲᠠᠵᠤ ᠳᠡᠭᠡᠷᠡ ᠡᠴᠡ ᠨᠢ ᠲᠡᠭᠦᠨ ᠦ ᠮᠥᠴᠢᠷ ᠭᠠᠩᠳᠠᠨᠠ᠂
17 ᠲᠡᠭᠦᠨ ᠦ ᠳᠤᠷᠠᠰᠤᠮᠵᠢ ᠭᠠᠵᠠᠷ ᠠᠴᠠ ᠠᠷᠢᠯᠵᠤ ᠲᠡᠭᠦᠨ ᠦ ᠨᠡᠷᠡ ᠭᠤᠳᠤᠮᠵᠢᠨ ᠳᠤ ᠦᠯᠡᠳᠡᠬᠦ ᠦᠭᠡᠢ᠂
18 ᠲᠡᠷᠡ ᠪᠡᠷ ᠭᠡᠷᠡᠯ ᠡᠴᠡ ᠬᠠᠷᠠᠩ᠋ᠭᠤᠢ ᠤᠷᠤᠭᠤ ᠬᠥᠭᠡᠭᠡᠭᠳᠡᠵᠦ ᠳᠡᠯᠡᠬᠡᠢ ᠡᠴᠡ ᠴᠥᠯᠡᠭᠳᠡᠨᠡ᠂
19 ᠥᠪᠡᠷ ᠦᠨ ᠢᠶᠠᠨ ᠠᠷᠠᠳ ᠲᠦᠮᠡᠨ ᠦ ᠳᠤᠮᠳᠠ ᠦᠷᠡ ᠴᠤ ᠦᠭᠡᠢ᠂ ᠤᠳᠤᠮ ᠴᠤ ᠦᠭᠡᠢ᠂ ᠰᠠᠭᠤᠵᠤ ᠪᠠᠢᠭᠰᠠᠨ ᠨᠤᠲᠤᠭ ᠲᠤᠨᠢ ᠶᠠᠭᠤ ᠴᠤ ᠦᠯᠡᠳᠡᠬᠦ ᠦᠭᠡᠢ᠂
20 ᠰᠦᠢᠷᠡᠭᠰᠡᠨ ᠡᠳᠦᠷ ᠲᠤᠨᠢ ᠥᠷᠥᠨᠡ ᠶᠢᠨ ᠬᠢᠨ ᠰᠣᠴᠢᠪᠠ ᠳᠣᠷᠣᠨᠠ ᠶᠢᠨ ᠬᠢᠨ ᠲᠦᠭᠰᠢᠪᠡ᠂
21 ᠪᠤᠷᠤᠭᠤᠲᠠᠨ ᠤ ᠰᠠᠭᠤᠳᠠᠭ ᠭᠠᠵᠠᠷ ᠨᠢ ᠡᠢᠮᠦ ᠪᠤᠷᠬᠠᠨ ᠢ ᠮᠡᠳᠡᠳᠡᠭ ᠦᠭᠡᠢ ᠬᠥᠮᠦᠨ ᠦ ᠣᠷᠣᠨ ᠨᠢ ᠡᠨᠡ ᠪᠤᠶᠤ》 ᠭᠡᠪᠡ᠃