ᠶᠣᠪ ᠳᠥᠴᠢᠨ ᠨᠢᠭᠡ
1 ᠴᠢ ᠯᠧᠸᠢᠶᠠᠲ᠋ᠠᠨ 17 ᠢ ᠳᠡᠭᠡᠭᠡ ᠪᠡᠷ ᠪᠠᠷᠢᠵᠤ ᠴᠢᠳᠠᠬᠤ ᠤᠤ︖ ᠬᠡᠯᠡ ᠶᠢ ᠨᠢ ᠳᠡᠭᠡᠰᠦ ᠪᠡᠷ ᠪᠣᠭᠣᠵᠤ ᠴᠢᠳᠠᠬᠤ ᠤᠤ︖
2 ᠬᠠᠮᠠᠷ ᠢ ᠨᠢ ᠴᠢ ᠣᠯᠣᠰᠣ ᠪᠠᠷ ᠳᠥᠷᠥᠯᠡᠵᠦ ᠴᠢᠳᠠᠬᠤ ᠤᠤ︖ ᠡᠷᠡᠦ ᠶᠢ ᠨᠢ ᠳᠡᠭᠡᠭᠡ ᠪᠡᠷ ᠴᠣᠭᠣᠯᠵᠤ ᠴᠢᠳᠠᠬᠤ ᠤᠤ︖
3 ᠠᠬᠢᠨ ᠳᠠᠬᠢᠨ ᠲᠡᠷᠡ ᠴᠢᠮᠠ ᠠᠴᠠ ᠥᠷᠥᠰᠢᠶᠡᠯ ᠭᠤᠶᠤᠬᠤ ᠤᠤ︖ ᠵᠥᠭᠡᠯᠡᠨ ᠦᠭᠡ ᠪᠡᠷ ᠴᠢᠮᠠ ᠳᠤ ᠶᠠᠷᠢᠬᠤ ᠤᠤ︖
4 ᠲᠡᠷᠡ 《ᠡᠭᠦᠷᠢᠳᠡ ᠪᠢ ᠲᠠᠨ ᠤ ᠪᠣᠭᠣᠯ ᠪᠣᠯᠣᠶᠠ》 ᠭᠡᠳ ᠥᠪᠡᠷ ᠲᠡᠢ ᠴᠢᠨᠢ ᠭᠡᠷᠡ ᠪᠠᠢᠭᠤᠯᠬᠤ ᠤᠤ︖
5 ᠴᠢ ᠰᠢᠪᠠᠭᠤ ᠪᠠᠷ ᠨᠠᠭᠠᠳᠬᠤ ᠰᠢᠭ᠋ ᠲᠡᠭᠦᠨ ᠢᠶᠡᠷ ᠨᠠᠭᠠᠳᠬᠤ ᠤᠤ︖ ᠰᠢᠪᠡᠭᠴᠢᠳ ᠢᠶᠠᠷ ᠢᠶᠠᠨ ᠨᠠᠭᠠᠳᠤᠭᠤᠯᠬᠤ ᠪᠠᠷ ᠲᠡᠭᠦᠨ ᠢ ᠬᠦᠯᠢᠬᠦ ᠤᠤ︖
6 ᠲᠡᠭᠦᠨ ᠢ ᠪᠣᠷᠣᠯᠠᠭᠤᠯᠬᠤ ᠤᠤ︖ ᠬᠤᠳᠠᠯᠳᠤᠭᠠᠴᠢᠳ ᠲᠤ ᠬᠤᠪᠢᠶᠠᠵᠤ ᠥᠭᠬᠦ ᠤᠤ︖
7 ᠴᠢ ᠠᠷᠠᠰᠤ ᠶᠢ ᠨᠢ ᠵᠢᠳᠠ ᠪᠠᠷ ᠲᠣᠯᠣᠭᠠᠢ ᠶᠢ ᠨᠢ ᠰᠡᠷᠡᠭᠡ ᠪᠡᠷ ᠴᠣᠭᠣᠯᠵᠤ ᠴᠢᠳᠠᠬᠤ ᠤᠤ︖
8 ᠭᠠᠷ ᠢᠶᠠᠨ ᠲᠡᠭᠦᠨ ᠳᠡᠭᠡᠷᠡ ᠬᠦᠷᠭᠡᠵᠦ ᠦᠵᠡ ᠲᠡᠷᠡ ᠴᠢᠮᠠ ᠶᠢ ᠳᠠᠭᠠᠷᠢᠬᠤ ᠪᠥᠭᠡᠳ ᠴᠢ ᠳᠠᠬᠢᠨ ᠲᠡᠭᠡᠬᠦ ᠦᠭᠡᠢ ᠪᠣᠯᠣᠨᠠ︕
9 ᠬᠠᠷᠠ᠂ ᠲᠡᠭᠦᠨ ᠢ ᠪᠠᠷᠢᠬᠤ ᠪᠠᠷ ᠣᠷᠣᠯᠳᠤᠬᠤ ᠨᠢ ᠬᠣᠭᠣᠰᠣᠨ ᠬᠥᠮᠦᠨ ᠲᠡᠭᠦᠨ ᠢ ᠬᠠᠷᠠᠮᠠᠭᠴᠠ ᠭᠠᠵᠠᠷ ᠲᠤ ᠤᠨᠠᠬᠤ ᠪᠤᠢ᠂
10 ᠲᠡᠭᠦᠨ ᠢ ᠥᠳᠥᠭᠡᠬᠦ ᠪᠠᠯᠠᠮᠠᠳ ᠨᠢᠭᠡᠨ ᠴᠤ ᠠᠯᠠᠭᠠ ᠪᠠᠢᠬᠤ ᠳᠤ ᠬᠡᠨ ᠮᠢᠨᠦ ᠡᠰᠡᠷᠭᠦ ᠵᠣᠭᠰᠣᠵᠤ ᠴᠢᠳᠠᠬᠤ ᠪᠢᠯᠡ︖
11 ᠲᠩᠷᠢ ᠶᠢᠨ ᠳᠣᠣᠷᠠᠬᠢ ᠪᠦᠭᠦᠳᠡ ᠮᠢᠨᠦᠬᠢ ᠪᠠᠢᠬᠤ ᠳᠤ ᠨᠠᠳᠠ ᠳᠤ ᠥᠭᠴᠢᠬᠡᠭᠡᠳ ᠪᠤᠴᠠᠭᠠᠵᠤ ᠠᠪᠤᠭᠴᠢ ᠨᠢ ᠬᠡᠨ ᠪᠢᠯᠡ︖
12 ᠯᠧᠸᠢᠶᠠᠲ᠋ᠠᠨ ᠤ ᠮᠥᠴᠢ ᠨᠦᠭᠦᠳ ᠬᠢᠭᠡᠳ ᠬᠦᠴᠦ ᠴᠢᠳᠠᠯ᠂ ᠰᠠᠢᠬᠠᠨ ᠭᠠᠯᠪᠢᠷ ᠤᠨ ᠬᠢᠨᠢ ᠲᠤᠬᠠᠢ ᠪᠢ ᠳᠠᠭᠤ ᠦᠭᠡᠢ ᠪᠠᠢᠬᠤ ᠦᠭᠡᠢ᠂
13 ᠲᠡᠭᠦᠨ ᠦ ᠭᠠᠳᠠᠷ ᠡᠮᠦᠰᠬᠡᠯ ᠢ ᠬᠡᠨ ᠬᠠᠭᠤᠯᠵᠤ ᠴᠢᠳᠠᠬᠤ ᠪᠤᠢ︖ ᠳᠠᠪᠬᠤᠷ ᠬᠤᠶᠠᠭ ᠢ ᠨᠢ ᠬᠡᠨ ᠨᠡᠪᠲᠡᠯᠵᠦ ᠴᠢᠳᠠᠬᠤ ᠪᠤᠢ︖
14 ᠨᠢᠭᠤᠷ ᠳᠡᠭᠡᠷᠡᠬᠢ ᠡᠭᠦᠳᠡ ᠶᠢ ᠨᠢ ᠬᠡᠨ ᠨᠡᠭᠡᠭᠡᠵᠦ ᠴᠢᠳᠠᠬᠤ ᠪᠤᠢ︖ ᠲᠣᠭᠣᠷᠢᠨ ᠪᠠᠢᠬᠤ ᠰᠢᠳᠦ ᠨᠢ ᠠᠶᠤᠮᠰᠢᠭᠲᠠᠢ ᠪᠢᠵᠡ᠂
15 ᠨᠢᠷᠤᠭᠤ ᠨᠢ ᠳᠠᠪᠬᠤᠷ ᠪᠠᠮᠪᠠᠢ ᠲᠠᠢ ᠨᠢᠭᠲᠠ ᠪᠢᠲᠡᠭᠦᠮᠵᠢ ᠲᠠᠢ ᠪᠠᠢᠳᠠᠭ
16 ᠨᠢᠭᠡ ᠨᠢ ᠨᠥᠭᠥᠭᠡ ᠡᠴᠡ ᠪᠡᠨ ᠣᠢᠷᠠᠬᠠᠨ ᠲᠤᠯᠠ ᠬᠣᠭᠣᠷᠣᠨᠳᠣ ᠨᠢ ᠠᠭᠠᠷ ᠴᠤ ᠣᠷᠣᠬᠤ ᠪᠣᠯᠣᠮᠵᠢ ᠦᠭᠡᠢ
17 ᠨᠢᠭᠡ ᠨᠢ ᠨᠥᠭᠥᠭᠡ ᠳᠡᠭᠡᠨ ᠨᠠᠭᠠᠯᠳᠤᠭᠰᠠᠨ ᠨᠢᠭᠡᠨᠲᠡ ᠵᠢᠭᠤᠷᠠᠯᠳᠤᠭᠰᠠᠨ ᠲᠤᠯᠠ ᠰᠠᠯᠭᠠᠬᠤ ᠪᠣᠯᠣᠮᠵᠢ ᠦᠭᠡᠢ᠂
18 ᠨᠠᠢᠲᠠᠭᠠᠬᠤ ᠳᠤᠨᠢ ᠭᠡᠷᠡᠯ ᠰᠠᠴᠤᠷᠠᠳᠠᠭ ᠨᠢᠳᠦ ᠨᠢ ᠦᠷ ᠦᠨ ᠲᠤᠶᠠᠭᠠ ᠠᠳᠠᠯᠢ
19 ᠠᠮᠠᠨ ᠠᠴᠠ ᠨᠢ ᠭᠠᠯ ᠪᠠᠮᠪᠠᠷ ᠭᠠᠷᠴᠤ ᠭᠠᠯ ᠤᠨ ᠣᠴᠢ ᠨᠤᠭᠤᠳ ᠦᠰᠦᠴᠢᠵᠦ ᠪᠠᠢᠨᠠ
20 ᠬᠠᠮᠠᠷ ᠤᠨ ᠬᠢᠨᠢ ᠨᠦᠬᠡᠨ ᠡᠴᠡ ᠭᠠᠷᠬᠤ ᠤᠲᠤᠭᠠ ᠪᠤᠴᠠᠯᠵᠤ ᠪᠤᠢ ᠲᠣᠭᠣᠭᠠ ᠪᠤᠶᠤ ᠰᠢᠲᠠᠵᠤ ᠪᠤᠢ ᠵᠡᠭᠡᠰᠦᠨ ᠦ ᠬᠢ ᠮᠡᠲᠦ᠃
21 ᠠᠮᠢᠰᠬᠤᠯ ᠨᠢ ᠨᠡᠭᠦᠷᠡᠰᠦ ᠶᠢ ᠴᠤ ᠠᠰᠠᠭᠠᠨᠠ ᠠᠮᠠᠨ ᠠᠴᠠ ᠨᠢ ᠭᠠᠯ ᠤᠨ ᠳᠥᠯᠥ ᠭᠠᠷᠴᠤ ᠪᠠᠢᠨᠠ
22 ᠬᠦᠵᠦᠭᠦᠨ ᠳᠦᠨᠢ ᠬᠦᠴᠦ ᠴᠢᠳᠠᠯ ᠪᠤᠢ ᠠᠢᠳᠠᠰ ᠬᠦᠢᠳᠡᠰ ᠲᠡᠭᠦᠨ ᠦ ᠡᠮᠦᠨᠡ ᠪᠥᠮᠪᠥᠭᠡᠨᠡᠵᠦ ᠪᠠᠢᠨᠠ
23 ᠮᠢᠬᠠ ᠨᠢ ᠳᠠᠪᠬᠤᠷ ᠳᠠᠪᠬᠤᠷ ᠢᠶᠠᠷ ᠨᠢᠭᠲᠠ ᠬᠣᠯᠪᠣᠭᠳᠠᠭᠰᠠᠨ ᠪᠠᠢᠳᠠᠭ ᠬᠥᠳᠡᠯᠦᠰᠢ ᠦᠭᠡᠢ ᠪᠠᠲᠤ ᠲᠣᠭᠲᠠᠭᠰᠠᠨ ᠪᠠᠢᠳᠠᠭ
24 ᠴᠡᠭᠡᠵᠢ ᠨᠢ ᠴᠢᠯᠠᠭᠤ ᠮᠡᠲᠦ ᠬᠠᠲᠠᠭᠤ ᠲᠡᠭᠡᠷᠮᠡ ᠶᠢᠨ ᠳᠣᠣᠷᠠ ᠲᠠᠯᠠ ᠶᠢᠨ ᠴᠢᠯᠠᠭᠤ ᠮᠡᠲᠦ ᠬᠠᠲᠠᠭᠤ
25 ᠲᠡᠷᠡ ᠪᠣᠰᠬᠤ ᠳᠤ᠂ ᠪᠠᠭᠠᠲᠤᠷ ᠤᠳ ᠴᠤ ᠪᠠᠯᠠᠮᠠᠭᠳᠠᠨᠠ ᠪᠤᠲᠠᠯᠤᠭᠳᠠᠬᠤ ᠠᠴᠠ ᠪᠠᠨ ᠠᠶᠤᠭᠠᠳ ᠪᠤᠯᠲᠠᠨᠠ
26 ᠢᠯᠳᠦ ᠲᠡᠭᠦᠨ ᠳᠦ ᠬᠦᠷᠦᠭᠰᠡᠨ ᠴᠤ ᠨᠡᠮᠡᠷᠢ ᠦᠭᠡᠢ ᠵᠢᠳᠠ ᠵᠠᠯᠮᠠ᠂ ᠨᠤᠮᠤ ᠰᠤᠮᠤ ᠴᠤ ᠲᠤᠰᠠ ᠦᠭᠡᠢ
27 ᠲᠡᠷᠡ ᠲᠡᠮᠦᠷ ᠢ ᠰᠦᠷᠡᠯ ᠮᠡᠲᠦ ᠬᠦᠷᠡᠯ ᠢ ᠢᠯᠵᠢᠷᠠᠭᠰᠠᠨ ᠮᠣᠳᠣ ᠮᠡᠲᠦ ᠲᠣᠭᠠᠴᠠᠨᠠ
28 ᠨᠤᠮᠤ ᠰᠤᠮᠤ ᠲᠡᠭᠦᠨ ᠢ ᠳᠤᠲᠠᠭᠠᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠳᠦᠦᠭᠡᠦᠷ ᠦᠨ ᠴᠢᠯᠠᠭᠤᠳ ᠲᠡᠭᠦᠨ ᠳᠦ ᠬᠡᠪᠡᠭ ᠠᠳᠠᠯᠢ
29 ᠰᠢᠳᠠᠮ ᠤᠳ ᠴᠤ ᠰᠦᠷᠡᠯ ᠮᠡᠲᠦ ᠲᠣᠭᠠᠴᠠᠭᠳᠠᠨᠠ ᠱᠠᠵᠢᠭᠢᠨᠠᠬᠤ ᠵᠢᠳᠠ ᠶᠢ ᠴᠤ ᠲᠡᠷᠡ ᠲᠣᠬᠣᠭᠤᠷᠬᠠᠨᠠ
30 ᠳᠣᠣᠷᠠᠳᠤ ᠬᠡᠰᠡᠭ ᠲᠤᠨᠢ ᠸᠠᠭᠠᠷ ᠤᠨ ᠬᠤᠷᠴᠠ ᠬᠡᠯᠲᠡᠷᠬᠡᠢ ᠨᠦᠭᠦᠳ ᠪᠠᠢᠵᠤ ᠰᠢᠪᠠᠷ ᠳᠡᠭᠡᠭᠦᠷ ᠱᠠᠩ ᠲᠠᠲᠠᠭᠰᠠᠨ ᠰᠢᠭ᠋ ᠮᠥᠷ ᠦᠯᠡᠳᠡᠭᠡᠨᠡ
31 ᠲᠡᠷᠡ ᠭᠦᠨ ᠤᠰᠤ ᠶᠢ ᠲᠣᠭᠣᠭᠠ ᠮᠡᠲᠦ ᠣᠷᠭᠢᠯᠤᠭᠤᠯᠤᠨ ᠳᠠᠯᠠᠢ ᠶᠢ ᠲᠣᠰᠣ ᠲᠠᠢ ᠲᠣᠭᠣᠭᠠ ᠮᠡᠲᠦ ᠪᠣᠯᠭᠠᠨᠠ
32 ᠠᠷᠤ ᠳᠠᠭᠠᠨ ᠲᠡᠷᠡ ᠭᠢᠯᠠᠯᠵᠠᠬᠤ ᠮᠥᠷ ᠦᠯᠡᠳᠡᠭᠡᠨᠡ ᠤᠰᠤᠨ ᠤ ᠭᠦᠨ ᠴᠤ ᠪᠤᠭᠤᠷᠤᠯᠲᠤᠭᠰᠠᠨ ᠮᠡᠲᠦ ᠪᠣᠳᠣᠭᠳᠠᠨᠠ
33 ᠲᠡᠷᠡ ᠪᠣᠯ ᠠᠢᠳᠠᠰ ᠦᠭᠡᠢ ᠪᠦᠲᠦᠭᠡᠯ ᠲᠡᠭᠦᠨ ᠲᠡᠢ ᠢᠵᠢᠯ ᠨᠢᠭᠡᠨ ᠨᠢ ᠭᠠᠵᠠᠷ ᠳᠡᠭᠡᠷᠡ ᠦᠭᠡᠢ
34 ᠥᠨᠳᠥᠷ ᠪᠦᠬᠦᠨ ᠢ ᠲᠡᠷᠡ ᠳᠣᠣᠷᠠᠳᠤ ᠭᠡᠵᠦ ᠦᠵᠡᠨᠡ ᠣᠮᠣᠷᠬᠠᠭ ᠪᠠᠷᠳᠠᠮ ᠪᠦᠭᠦᠳᠡ ᠶᠢᠨ ᠬᠠᠭᠠᠨ ᠪᠣᠯ ᠲᠡᠷᠡ》 ᠭᠡᠪᠡ᠃