ᠶᠣᠪ ᠠᠷᠪᠠᠨ ᠳᠥᠷᠪᠡ
1 ᠡᠮᠡᠭᠲᠡᠢ ᠡᠴᠡ ᠲᠥᠷᠥᠳᠡᠭ ᠬᠥᠮᠦᠨ ᠦ ᠡᠳᠦᠷ ᠤᠳ ᠨᠢ ᠴᠥᠭᠡᠨ᠂ ᠦᠢᠮᠡᠭᠡᠨ ᠨᠢ ᠣᠯᠠᠨ᠂
2 ᠴᠡᠴᠡᠭ ᠮᠡᠲᠦ ᠳᠡᠯᠭᠡᠷᠡᠭᠡᠳ᠂ ᠵᠤᠯᠭᠠᠷᠠᠵᠤ ᠰᠡᠭᠦᠳᠡᠷ ᠮᠡᠲᠦ ᠦᠯᠡᠳᠡᠬᠦ ᠦᠭᠡᠢ ᠥᠩᠭᠡᠷᠡᠨᠡ᠂
3 ᠡᠢᠮᠦ ᠨᠢᠭᠡᠨ ᠦ ᠳᠡᠭᠡᠷᠡ ᠲᠠ ᠬᠠᠷᠠᠭᠠ ᠪᠠᠨ ᠲᠣᠭᠲᠠᠭᠠᠭᠰᠠᠨ ᠭᠡᠵᠢ ᠤᠤ︖ ᠨᠠᠮᠠᠶᠢ ᠥᠪᠡᠷ ᠤᠷᠤᠭᠤ ᠪᠠᠨ ᠠᠪᠠᠴᠢᠵᠤ ᠰᠢᠳᠬᠡᠬᠦ ᠪᠡᠷ ᠪᠠᠢᠨᠠ ᠤᠤ︖
4 ᠬᠡᠨ ᠪᠤᠵᠠᠷ ᠠᠴᠠ ᠪᠠᠨ ᠴᠡᠪᠡᠷ ᠢ ᠭᠠᠷᠭᠠᠵᠤ ᠴᠢᠳᠠᠬᠤ ᠪᠤᠢ︖ ᠬᠡᠨ ᠴᠤ ᠦᠭᠡᠢ᠂
5 ᠬᠥᠮᠦᠨ ᠦ ᠡᠳᠦᠷ ᠤᠳ ᠲᠣᠭᠲᠠᠭᠰᠠᠨ ᠲᠠ ᠰᠠᠷᠠ ᠨᠤᠭᠤᠳ ᠢ ᠨᠢ ᠬᠡᠳᠦᠢᠨᠡᠢ ᠲᠣᠭᠠᠯᠠᠭᠰᠠᠨ ᠳᠠᠪᠠᠰᠢ ᠦᠭᠡᠢ ᠬᠢᠵᠠᠭᠠᠷ ᠤᠳ ᠢ ᠲᠣᠭᠲᠠᠭᠠᠭᠰᠠᠨ᠂
6 ᠬᠠᠷᠠᠴᠠ ᠪᠠᠨ ᠲᠡᠭᠦᠨ ᠡᠴᠡ ᠡᠷᠭᠢᠭᠦᠯᠵᠦ ᠲᠡᠭᠦᠨ ᠢ ᠠᠮᠠᠷᠠᠭᠠᠴᠢ ᠬᠥᠯᠥᠰᠥᠨ ᠦ ᠬᠥᠮᠦᠨ ᠭᠡᠵᠦ ᠦᠯᠡᠳᠡᠭᠰᠡᠨ ᠡᠳᠦᠷ ᠲᠤᠨᠢ ᠵᠢᠷᠭᠠᠭᠠᠴᠢ᠂
7 ᠮᠣᠳᠣ ᠪᠣᠯ ᠨᠠᠢᠳᠠᠪᠤᠷᠢ ᠲᠠᠢ᠂ ᠴᠠᠪᠴᠢᠭᠤᠯᠤᠭᠰᠠᠨ ᠴᠤ ᠳᠠᠬᠢᠨ ᠰᠣᠶᠣᠭᠠᠯᠠᠨᠠ᠂ ᠰᠣᠶᠣᠭᠠ ᠨᠢ ᠵᠣᠭᠰᠣᠯᠲᠠ ᠦᠭᠡᠢ ᠭᠠᠷᠤᠨᠠ᠂
8 ᠦᠨᠳᠦᠰᠦ ᠨᠢ ᠭᠠᠵᠠᠷ ᠳᠣᠣᠷᠠ ᠥᠲᠡᠯᠵᠦ ᠬᠣᠵᠤᠤᠯᠠ ᠨᠢ ᠬᠥᠷᠥᠰᠥᠨ ᠳᠤ ᠦᠬᠦᠳᠡᠭ ᠴᠤ
9 ᠤᠰᠤᠨ ᠤ ᠦᠨᠦᠷ ᠢᠶᠡᠷ ᠨᠠᠬᠢᠶᠠᠯᠠᠵᠤ ᠰᠢᠨᠡ ᠪᠡᠷ ᠲᠠᠷᠢᠭᠰᠠᠨ ᠤᠷᠭᠤᠮᠠᠯ ᠮᠡᠲᠦ ᠮᠥᠴᠢᠷ ᠢᠶᠠᠨ ᠤᠷᠭᠤᠭᠤᠯᠳᠠᠭ᠂
10 ᠬᠠᠷᠢᠨ ᠬᠥᠮᠦᠨ ᠦᠬᠦᠪᠡᠯ ᠳᠣᠣᠷᠠ ᠲᠠᠯᠪᠢᠭᠳᠠᠨᠠ ᠠᠮᠢᠰᠬᠤᠯ ᠬᠤᠷᠢᠶᠠᠪᠠᠯ ᠲᠡᠷᠡ ᠠᠯᠠᠭᠠ ᠪᠣᠯᠣᠨᠠ᠂
11 ᠤᠰᠤ ᠨᠠᠭᠤᠷ ᠠᠴᠠ ᠠᠭᠤᠷᠰᠢᠬᠤ ᠮᠡᠲᠦ ᠤᠷᠤᠰᠬᠠᠯ ᠰᠢᠷᠭᠢᠵᠦ ᠬᠠᠲᠠᠬᠤ ᠮᠡᠲᠦ᠂
12 ᠬᠥᠮᠦᠨ ᠬᠡᠪᠲᠡᠭᠡᠳ ᠪᠣᠰᠬᠤ ᠪᠠᠨ ᠪᠣᠯᠢᠨᠠ᠂ ᠲᠩᠷᠢ ᠠᠯᠠᠭᠠ ᠪᠣᠯᠬᠤ ᠬᠦᠷᠲᠡᠯᠡ ᠰᠡᠷᠢᠬᠦ ᠦᠭᠡᠢ ᠨᠣᠢᠷ ᠠᠴᠠ ᠪᠠᠨ ᠴᠤ ᠥᠨᠳᠡᠢᠬᠦ ᠦᠭᠡᠢ᠃
13 ᠦᠬᠦᠭᠰᠡᠳ ᠦᠨ ᠣᠷᠣᠨ ᠳᠤ ᠲᠠ ᠨᠠᠮᠠᠶᠢ ᠨᠢᠭᠤᠬᠤ ᠴᠤ ᠪᠣᠯᠣᠭᠠᠰᠠᠢ ᠠᠭᠤᠷ ᠬᠢᠯᠢᠩ ᠢᠶᠠᠨ ᠥᠩᠭᠡᠷᠡᠲᠡᠯᠡ ᠲᠡᠨᠳᠡ ᠨᠠᠮᠠᠶᠢ ᠳᠠᠯᠳᠠᠯᠠᠭᠠᠳ ᠮᠢᠨᠦ ᠲᠥᠯᠥᠭᠡ ᠴᠠᠭ ᠲᠣᠪᠯᠠᠵᠤ ᠨᠠᠮᠠᠶᠢ ᠰᠠᠨᠠᠬᠤ ᠴᠤ ᠪᠣᠯᠣᠭᠠᠰᠠᠢ︕
14 ᠦᠬᠦᠭᠰᠡᠨ ᠬᠥᠮᠦᠨ ᠠᠮᠢᠯᠠᠬᠤ ᠤᠤ︖ ᠥᠭᠡᠷᠡᠴᠢᠯᠡᠯᠲᠡ ᠢᠷᠡᠬᠦ ᠶᠢ ᠪᠢ ᠲᠡᠮᠡᠴᠡᠯ ᠦᠨ ᠢᠶᠠᠨ ᠪᠦᠬᠦ ᠡᠳᠦᠷ ᠢᠶᠡᠷ ᠬᠦᠯᠢᠶᠡᠶᠡ᠂
15 ᠲᠠ ᠳᠠᠭᠤᠳᠠᠬᠤ ᠳᠤ ᠪᠢ ᠬᠠᠷᠢᠭᠤᠯᠤᠨᠠ ᠲᠠ ᠮᠤᠲᠤᠷ ᠤᠨ ᠢᠶᠠᠨ ᠪᠦᠲᠦᠭᠡᠯ ᠨᠠᠮᠠᠶᠢ ᠰᠠᠨᠠᠭᠠᠯᠵᠠᠬᠤ ᠪᠣᠯᠣᠨᠠ᠂
16 ᠲᠡᠷᠡ ᠦᠶᠡ ᠳᠦ ᠲᠠ ᠠᠯᠬᠤᠮ ᠪᠦᠷᠢ ᠶᠢ ᠮᠢᠨᠢ ᠲᠣᠭᠠᠯᠠᠬᠤ ᠪᠣᠯᠪᠠᠴᠤ ᠠᠯᠳᠠᠭᠠ ᠶᠢ ᠮᠢᠨᠢ ᠨᠡᠬᠡᠮᠵᠢᠯᠡᠬᠦ ᠦᠭᠡᠢ᠂
17 ᠪᠤᠷᠤᠭᠤ ᠶᠢ ᠮᠢᠨᠢ ᠤᠭᠤᠲᠠᠨ ᠳᠤ ᠬᠢᠵᠦ ᠪᠢᠲᠡᠭᠦᠮᠵᠢᠯᠡᠭᠡᠳ ᠭᠡᠮ ᠢ ᠮᠢᠨᠢ ᠪᠦᠲᠡᠭᠡᠬᠦ ᠪᠣᠯᠣᠨᠠ᠃
18 ᠬᠠᠷᠢᠨ ᠠᠭᠤᠯᠠ ᠨᠤᠷᠠᠵᠤ ᠬᠠᠭᠠᠷᠠᠨ ᠬᠠᠳᠠ ᠴᠢᠯᠠᠭᠤ ᠴᠤ ᠪᠠᠢᠷᠢ ᠡᠴᠡ ᠪᠡᠨ ᠰᠢᠯᠵᠢᠳᠡᠭ᠂
19 ᠤᠰᠤ ᠴᠢᠯᠠᠭᠤ ᠶᠢ ᠡᠯᠡᠭᠡᠵᠦ ᠦᠶᠡᠷ ᠭᠠᠵᠠᠷ ᠤᠨ ᠰᠢᠷᠣᠢ ᠶᠢ ᠱᠦᠭᠦᠷᠳᠡᠳᠡᠭ᠂ ᠡᠢᠨ ᠬᠦ ᠲᠠ ᠬᠥᠮᠦᠨ ᠦ ᠨᠠᠢᠳᠠᠪᠤᠷᠢ ᠶᠢ ᠮᠥᠬᠥᠭᠡᠳᠡᠭ ᠪᠢᠯᠡ᠂
20 ᠲᠠ ᠬᠥᠮᠦᠨ ᠢ ᠪᠦᠷᠢᠮᠦᠰᠦᠨ ᠳᠠᠷᠤᠬᠤ ᠳᠤ ᠲᠡᠷᠡ ᠥᠩᠭᠡᠷᠡᠨ ᠣᠳᠣᠨᠠ᠂ ᠲᠠ ᠲᠥᠷᠬᠥ ᠶᠢ ᠨᠢ ᠬᠤᠪᠢᠷᠠᠭᠤᠯᠵᠤ ᠲᠡᠭᠦᠨ ᠢ ᠵᠠᠢᠯᠠᠭᠤᠯᠤᠨᠠ᠂
21 ᠦᠷᠡ ᠬᠡᠦᠬᠡᠳ ᠤᠳ ᠨᠢ ᠨᠡᠷᠡ ᠬᠦᠨᠳᠦ ᠶᠢ ᠣᠯᠣᠭᠰᠠᠨ ᠴᠤ ᠲᠡᠷᠡ ᠦᠯᠦ ᠮᠡᠳᠡᠨᠡ ᠥᠴᠦᠬᠡᠨ ᠳᠣᠣᠷᠠᠳᠤ ᠪᠣᠯᠣᠭᠰᠠᠨ ᠴᠤ ᠡᠰᠡ ᠣᠢᠯᠠᠭᠠᠨᠠ᠂
22 ᠥᠪᠡᠷ ᠦᠨ ᠢᠶᠠᠨ ᠪᠡᠶᠡ ᠶᠢᠨ ᠡᠪᠡᠳᠦᠯᠲᠡ ᠶᠢ ᠯᠠ ᠮᠡᠳᠡᠷᠡᠵᠦ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠯᠠ ᠭᠠᠰᠢᠭᠤᠳᠠᠨᠠ》 ᠭᠡᠪᠡ᠃