ᠶᠣᠪ ᠳᠣᠯᠣᠭᠠ
1 ᠭᠠᠵᠠᠷ ᠳᠡᠭᠡᠷᠡᠬᠢ ᠬᠥᠮᠦᠨ ᠳᠦ ᠲᠡᠮᠡᠴᠡᠯ ᠪᠠᠢᠬᠤ ᠦᠭᠡᠢ ᠭᠡᠵᠢ ᠤᠤ︖ ᠲᠡᠭᠦᠨ ᠦ ᠡᠳᠦᠷ ᠤᠳ ᠨᠢ ᠬᠠᠷᠠ ᠠᠵᠢᠯᠴᠢᠨ ᠤ ᠡᠳᠦᠷ ᠤᠳ ᠰᠢᠭ
2 ᠰᠡᠭᠦᠳᠡᠷ ᠢ ᠬᠦᠰᠡᠮᠵᠢᠯᠡᠬᠦ ᠪᠣᠭᠣᠯ ᠤᠨ ᠬᠢ ᠰᠢᠭ᠋ ᠬᠥᠯᠥᠰᠥ ᠬᠦᠰᠡᠬᠦ ᠬᠠᠷᠠ ᠠᠵᠢᠯᠴᠢᠨ ᠤ ᠬᠢ ᠰᠢᠭ᠋᠂
3 ᠡᠢᠮᠦ ᠤᠳᠬᠠ ᠦᠭᠡᠢ ᠰᠠᠷᠠ ᠨᠤᠭᠤᠳ ᠨᠠᠳᠠ ᠳᠤ ᠤᠨᠤᠭᠳᠠᠵᠠᠢ ᠡᠢᠮᠦ ᠤᠢᠳᠬᠠᠷ ᠲᠠᠢ ᠰᠥᠨᠢ ᠨᠦᠭᠦᠳ ᠨᠠᠳᠠ ᠳᠤ ᠬᠤᠪᠢᠶᠠᠷᠢᠯᠠᠭᠳᠠᠵᠠᠢ᠂
4 ᠬᠡᠪᠲᠡᠬᠦ ᠪᠣᠯᠭᠠᠨ ᠳᠠᠭᠠᠨ ᠪᠢ᠄ 〈ᠬᠡᠵᠢᠶᠡ ᠪᠣᠰᠬᠤ ᠪᠣᠯ︖ ᠰᠥᠨᠢ ᠬᠡᠵᠢᠶᠡ ᠳᠠᠭᠤᠰᠬᠤ ᠪᠣᠯ〉 ᠭᠡᠳ ᠡᠷᠭᠢᠵᠦ ᠬᠥᠷᠪᠡᠭᠰᠡᠭᠡᠷ ᠦᠷ ᠴᠠᠢᠯᠭᠠᠨᠠ᠂
5 ᠪᠡᠶᠡ ᠮᠢᠨᠢ ᠥᠲᠥ ᠪᠣᠯᠣᠨ ᠭᠬᠢᠷ ᠲᠤ ᠬᠤᠴᠢᠭᠳᠠᠭᠰᠠᠨ ᠠᠷᠠᠰᠤ ᠮᠢᠨᠢ ᠡᠪᠡᠷᠰᠢᠨ ᠬᠠᠭᠠᠷᠠᠭᠰᠠᠨ᠂
6 ᠨᠠᠰᠤ ᠮᠢᠨᠢ ᠨᠡᠬᠡᠮᠡᠯᠴᠢᠨ ᠤ ᠵᠡᠭᠦᠦ ᠡᠴᠡ ᠴᠤ ᠬᠤᠷᠳᠤᠨ ᠥᠩᠭᠡᠷᠡᠵᠦ ᠨᠠᠢᠳᠠᠪᠤᠷᠢ ᠦᠭᠡᠢ ᠪᠠᠷ ᠲᠡᠭᠦᠰᠬᠦ ᠪᠣᠯᠵᠤ ᠪᠠᠢᠨᠠ᠃
7 ᠠᠮᠢ ᠮᠢᠨᠢ ᠠᠮᠢᠰᠬᠤᠯ ᠲᠡᠳᠦᠢ ᠭᠡᠳᠡᠭ ᠢ ᠰᠠᠨᠠᠭᠠᠴᠢ᠂ ᠪᠤᠷᠬᠠᠨ ᠮᠢᠨᠢ ᠨᠢᠳᠦ ᠮᠢᠨᠢ ᠳᠠᠬᠢᠭᠠᠳ ᠰᠠᠢᠨ ᠢ ᠦᠵᠡᠬᠦ ᠦᠭᠡᠢ᠂
8 ᠨᠠᠮᠠᠶᠢ ᠬᠠᠷᠠᠭᠴᠢ ᠨᠢᠳᠦᠨ ᠳᠦ ᠪᠢ ᠳᠠᠬᠢᠭᠠᠳ ᠥᠷᠲᠥᠬᠦ ᠦᠭᠡᠢ ᠲᠠᠨ ᠤ ᠮᠡᠯᠮᠡᠢ ᠮᠢᠨᠦ ᠳᠡᠭᠡᠷᠡ ᠲᠤᠰᠴᠤ ᠪᠠᠢᠬᠤ ᠳᠤ᠂ ᠪᠢ ᠪᠠᠢᠬᠤ ᠦᠭᠡᠢ ᠪᠣᠯᠣᠨᠠ᠂
9 ᠡᠭᠦᠯᠡ ᠵᠠᠮᠬᠠᠷᠠᠨ ᠣᠳᠬᠤ ᠶᠢᠨ ᠠᠳᠠᠯᠢ ᠦᠬᠦᠭᠰᠡᠳ ᠦᠨ ᠣᠷᠣᠨ ᠤᠷᠤᠭᠤ ᠪᠠᠭᠤᠭᠴᠢᠳ ᠲᠡᠨᠳᠡ ᠡᠴᠡ ᠪᠡᠨ ᠭᠠᠷᠳᠠᠭ ᠦᠭᠡᠢ᠂
10 ᠣᠷᠣᠨ ᠭᠡᠷ ᠲᠡᠭᠡᠨ ᠪᠤᠴᠠᠵᠤ ᠢᠷᠡᠬᠦ ᠦᠭᠡᠢ ᠪᠥᠭᠡᠳ ᠨᠤᠲᠤᠭ ᠨᠢ ᠲᠡᠭᠦᠨ ᠢ ᠲᠠᠨᠢᠬᠤ ᠪᠠᠨ ᠪᠣᠯᠢᠨᠠ᠃
11 ᠡᠢᠮᠦ ᠡᠴᠡ ᠪᠢ ᠠᠮᠠ ᠪᠠᠨ ᠬᠠᠮᠬᠢᠬᠤ ᠦᠭᠡᠢ ᠰᠢᠨᠠᠯᠤᠭᠰᠠᠨ ᠰᠦᠨᠡᠰᠦ ᠪᠡᠷ ᠶᠠᠷᠢᠨᠠ ᠰᠢᠨᠲᠠᠷᠠᠭᠰᠠᠨ ᠰᠡᠳᠬᠢᠯ ᠢᠶᠠᠷ ᠭᠣᠮᠣᠳᠠᠯᠯᠠᠨᠠ᠂
12 ᠬᠠᠷᠢᠨ ᠪᠢ ᠨᠥᠭᠥᠭᠡ ᠲᠠᠩᠭᠢᠰ ᠤᠨ᠂ ᠲᠠᠩᠭᠢᠰ ᠤᠨ ᠮᠠᠩ᠋ᠭᠤᠰ ᠪᠣᠯᠵᠤ ᠪᠠᠢᠭᠠ ᠤᠤ︖ ᠶᠠᠭᠠᠬᠢᠭᠠᠳ ᠲᠠ ᠨᠠᠮᠠᠶᠢ ᠡᠢᠨ ᠬᠦ ᠬᠠᠷᠠᠭᠤᠯᠳᠠᠵᠤ ᠪᠠᠢᠨᠠ︖
13 ᠬᠡᠷᠪᠡ ᠪᠢ᠄ 〈ᠣᠷᠣ ᠮᠢᠨᠢ ᠨᠠᠮᠠᠶᠢ ᠲᠠᠢᠪᠤᠰᠢᠷᠠᠭᠤᠯᠵᠤ ᠬᠡᠪᠲᠡᠷᠢ ᠮᠢᠨᠢ ᠮᠢᠨᠦ ᠭᠣᠮᠣᠳᠠᠯ ᠢ ᠲᠠᠢᠯᠤᠨᠠ〉 ᠭᠡᠪᠡᠯ᠂
14 ᠲᠠ ᠨᠠᠮᠠᠶᠢ ᠵᠡᠭᠦᠳᠦ ᠪᠡᠷ ᠠᠶᠤᠯᠭᠠᠵᠤ ᠦᠵᠡᠭᠳᠡᠯ ᠢᠶᠡᠷ ᠰᠦᠷᠳᠡᠭᠦᠯᠳᠡᠭ᠂
15 ᠡᠢᠨ ᠬᠦ ᠶᠠᠰᠤ ᠠᠷᠠᠰᠤ ᠪᠣᠯᠬᠤ ᠠᠴᠠ ᠪᠣᠭᠣᠮᠢᠯᠠᠵᠤ ᠦᠬᠦᠬᠦ ᠨᠢ ᠳᠡᠭᠡᠷᠡ ᠰᠠᠨ᠃
16 ᠪᠢ ᠵᠠᠯᠬᠠᠯᠠ ᠪᠢ ᠮᠥᠩᠬᠡ ᠠᠮᠢᠳᠤᠷᠠᠬᠤ ᠦᠭᠡᠢ ᠡᠳᠦᠷ ᠤᠳ ᠮᠢᠨᠢ ᠬᠣᠭᠣᠰᠣᠨ ᠭᠠᠭᠴᠠᠭᠠᠷ ᠢ ᠮᠢᠨᠢ ᠣᠷᠬᠢᠭᠠᠴᠢ᠂
17 ᠬᠥᠮᠦᠨ ᠭᠡᠭᠴᠢ ᠶᠠᠭᠤ ᠪᠣᠯᠣᠭᠠᠳ ᠲᠠ ᠬᠦᠨᠳᠦ ᠪᠡᠷ ᠦᠵᠡᠨ ᠲᠡᠭᠦᠨ ᠳᠦ ᠡᠢᠮᠦ ᠶᠡᠬᠡ ᠰᠠᠨᠠᠭᠠ ᠲᠠᠯᠪᠢᠨ
18 ᠥᠷᠯᠥᠭᠡ ᠪᠦᠷᠢ ᠢᠷᠡᠵᠦ ᠭᠱᠠᠨ ᠪᠦᠷᠢ ᠳᠤ ᠰᠣᠷᠢᠨᠠ ᠪᠤᠢ︖
19 ᠬᠡᠳᠦᠢ ᠪᠣᠯᠲᠠᠯᠠ ᠲᠠ ᠨᠠᠳᠠ ᠠᠴᠠ ᠬᠠᠷᠠᠴᠠ ᠪᠠᠨ ᠪᠤᠷᠤᠭᠤᠯᠠᠬᠤ ᠦᠭᠡᠢ ᠪᠠᠢᠭᠰᠠᠭᠠᠷ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠬᠤ ᠲᠡᠳᠦᠢᠬᠡᠨ ᠳᠦ ᠴᠤ ᠭᠠᠭᠴᠠᠭᠠᠷ ᠢ ᠮᠢᠨᠢ ᠣᠷᠬᠢᠬᠤ ᠦᠭᠡᠢ ᠶᠤᠮ ᠪᠤᠢ︖
20 ᠪᠢ ᠨᠢᠭᠦᠯ ᠦᠢᠯᠡᠳᠪᠡ ᠤᠤ︖ ᠬᠥᠮᠦᠨ ᠦ ᠬᠠᠷᠠᠭᠤᠯᠳᠠᠭᠴᠢ ᠲᠠᠨ ᠳᠤ ᠪᠢ ᠶᠠᠭᠤ ᠬᠢᠭᠰᠡᠨ ᠶᠤᠮ ᠪᠤᠢ︖ ᠶᠠᠭᠤᠨ ᠳᠤ ᠲᠠ ᠨᠠᠮᠠᠶᠢ ᠥᠪᠡᠷ ᠦᠨ ᠢᠶᠠᠨ ᠰᠣᠷ ᠪᠣᠯᠭᠠᠪᠠ︖ ᠪᠢ ᠥᠪᠡᠷ ᠲᠦ ᠲᠠᠨᠢ ᠳᠠᠷᠤᠭᠠᠰᠤ ᠪᠣᠯᠣᠭᠰᠠᠨ ᠭᠡᠵᠢ ᠤᠤ︖
21 ᠶᠠᠭᠠᠬᠢᠭᠠᠳ ᠲᠠ ᠭᠡᠮ ᠢ ᠮᠢᠨᠢ ᠥᠷᠥᠰᠢᠶᠡᠬᠦ ᠦᠭᠡᠢ᠂ ᠬᠢᠯᠢᠨᠴᠡ ᠶᠢ ᠮᠢᠨᠢ ᠠᠭᠤᠴᠢᠯᠠᠬᠤ ᠦᠭᠡᠢ ᠪᠠᠢᠭᠠ ᠶᠤᠮ ᠪᠤᠢ︖ ᠪᠢ ᠤᠳᠠᠯ ᠦᠭᠡᠢ ᠰᠢᠷᠣᠢ ᠳᠤ ᠬᠡᠪᠲᠡᠬᠦ ᠪᠣᠯᠣᠨᠠ ᠲᠠ ᠨᠠᠮᠠᠶᠢ ᠬᠠᠢᠭᠰᠠᠨ ᠴᠤ ᠪᠢ ᠪᠠᠢᠬᠤ ᠦᠭᠡᠢ》 ᠭᠡᠪᠡ᠃