ᠶᠣᠪ ᠭᠤᠴᠢ ᠶᠢᠰᠦ
1 ᠶᠠᠩᠭᠢᠷ ᠤᠨ ᠲᠥᠷᠥᠬᠦ ᠴᠠᠭ ᠢ ᠴᠢ ᠮᠡᠳᠡᠳᠡᠭ ᠤᠤ︖ ᠮᠠᠷᠠᠯ ᠲᠤᠭᠤᠯᠯᠠᠬᠤ ᠶᠢ ᠴᠢ ᠦᠵᠡᠵᠦ ᠪᠠᠢᠭᠰᠠᠨ ᠤᠤ︖
2 ᠬᠡᠭᠡᠯ ᠢᠶᠡᠨ ᠲᠡᠭᠡᠭᠡᠬᠦ ᠰᠠᠷᠠ ᠨᠤᠭᠤᠳ ᠢ ᠨᠢ ᠴᠢ ᠲᠣᠭᠠᠯᠠᠵᠤ ᠴᠢᠳᠠᠬᠤ ᠤᠤ︖ ᠲᠥᠷᠥᠬᠦ ᠴᠠᠭ ᠢ ᠨᠢ ᠴᠢ ᠮᠡᠳᠡᠳᠡᠭ ᠤᠤ︖
3 ᠲᠡᠳᠡ ᠣᠴᠣᠢᠨ ᠪᠠᠢᠵᠤ ᠦᠷᠡ ᠲᠥᠯ ᠢᠶᠡᠨ ᠭᠠᠷᠭᠠᠭᠠᠳ ᠲᠥᠷᠥᠯᠲᠡ ᠶᠢᠨ ᠢᠶᠠᠨ ᠡᠪᠡᠳᠦᠯᠲᠡ ᠡᠴᠡ ᠪᠡᠨ ᠰᠠᠯᠳᠠᠭ ᠶᠤᠮ᠃
4 ᠦᠷᠡ ᠲᠥᠯ ᠨᠢ ᠬᠡᠭᠡᠷᠡ ᠲᠠᠯᠠ ᠳᠤ ᠡᠷᠡᠭᠦᠯ ᠢᠶᠡᠷ ᠲᠣᠷᠨᠢᠭᠠᠳ ᠣᠳᠳᠠᠭ ᠲᠡᠭᠡᠭᠡᠳ ᠪᠤᠴᠠᠵᠤ ᠢᠷᠡᠳᠡᠭ ᠦᠭᠡᠢ᠃
5 ᠬᠡᠨ ᠬᠤᠯᠠᠨ ᠢ ᠰᠤᠯᠠᠯᠠᠨ ᠲᠠᠯᠪᠢᠵᠤ ᠴᠢᠳᠥᠷ ᠢ ᠨᠢ ᠲᠠᠢᠯᠳᠠᠭ ᠪᠤᠢ︖
6 ᠪᠢ ᠬᠡᠭᠡᠷᠡ ᠲᠠᠯᠠ ᠶᠢ ᠣᠷᠣᠨ ᠭᠡᠷ ᠨᠢ ᠪᠣᠯᠭᠠᠵᠤ ᠬᠤᠵᠢᠷ ᠲᠠᠢ ᠭᠠᠵᠠᠷ ᠢ ᠣᠷᠣᠰᠢᠬᠤ ᠨᠤᠲᠤᠭ ᠨᠢ ᠪᠣᠯᠭᠠᠭᠰᠠᠨ᠂
7 ᠲᠡᠷᠡ ᠬᠣᠲᠠ ᠶᠢᠨ ᠱᠤᠤᠭᠢᠶᠠᠨ ᠢ ᠪᠠᠰᠤᠮᠵᠢᠯᠠᠨ ᠬᠠᠷᠢᠭᠤᠯᠤᠭᠴᠢ ᠶᠢᠨ ᠣᠷᠢᠯᠠᠭᠠᠨ ᠢ ᠰᠣᠨᠣᠰᠳᠠᠭ ᠦᠭᠡᠢ᠂
8 ᠲᠡᠷᠡ ᠲᠥᠷᠥᠯ ᠪᠦᠷᠢ ᠶᠢᠨ ᠡᠪᠡᠰᠦ ᠨᠣᠭᠣᠭᠠ ᠶᠢ ᠡᠷᠢᠵᠦ ᠥᠪᠡᠷ ᠦᠨ ᠢᠶᠠᠨ ᠪᠡᠯᠴᠢᠭᠡᠷ ᠢ ᠬᠠᠢᠨ ᠠᠭᠤᠯᠠᠰ ᠢᠶᠠᠷ ᠲᠡᠨᠦᠭᠦᠴᠢᠯᠡᠳᠡᠭ᠌᠂
9 ᠵᠡᠷᠯᠢᠭ ᠦᠬᠡᠷ ᠴᠢᠮᠠ ᠳᠤ ᠳᠤᠷᠠᠲᠠᠢ ᠦᠢᠯᠡᠴᠢᠯᠡᠬᠦ ᠤᠤ︖ ᠬᠠᠰᠢᠶᠠᠨ ᠳᠤ ᠴᠢᠨᠢ ᠬᠣᠨᠣᠭᠯᠠᠬᠤ ᠤᠤ︖
10 ᠴᠢ ᠵᠡᠷᠯᠢᠭ ᠦᠬᠡᠷ ᠢ ᠬᠥᠯᠯᠡᠵᠦ ᠱᠠᠩ ᠲᠠᠲᠠᠭᠤᠯᠬᠤ ᠤᠤ︖ ᠠᠷᠤ ᠠᠴᠠ ᠴᠢᠨᠢ ᠲᠡᠷᠡ ᠳᠠᠭᠠᠵᠤ ᠬᠥᠨᠳᠡᠢ ᠭᠠᠵᠠᠷ ᠢ ᠬᠠᠭᠠᠯᠬᠤ ᠤᠤ︖
11 ᠬᠦᠴᠦ ᠶᠡᠬᠡᠲᠡᠢ ᠭᠡᠳ ᠴᠢ ᠲᠡᠭᠦᠨ ᠳᠦ ᠨᠠᠢᠳᠠᠵᠤ ᠬᠥᠳᠡᠯᠮᠦᠷᠢ ᠠᠵᠢᠯ ᠢᠶᠠᠨ ᠲᠡᠭᠦᠨ ᠳᠦ ᠳᠠᠭᠠᠭᠠᠯᠭᠠᠬᠤ ᠤᠤ︖
12 ᠲᠡᠷᠡ ᠦᠷᠡ ᠲᠠᠷᠢᠶᠠ ᠶᠢ ᠴᠢᠨᠢ ᠠᠪᠴᠢᠷᠠᠵᠤ ᠦᠲᠦᠷᠮᠡ ᠳᠦ ᠴᠢᠨᠢ ᠬᠤᠷᠢᠶᠠᠨᠠ ᠭᠡᠵᠦ ᠴᠢ ᠢᠲᠡᠭᠡᠬᠦ ᠤᠤ︖
13 ᠲᠡᠮᠡᠭᠡᠨ ᠬᠢᠷᠭᠤᠤᠯ ᠬᠥᠭᠡᠷᠴᠡᠭᠯᠡᠨ ᠲᠡᠪᠢᠳᠡᠭ ᠪᠣᠯᠪᠠᠴᠤ ᠲᠡᠳᠡᠨ ᠦ ᠥᠳᠥ ᠰᠣᠳᠣ ᠨᠢ ᠥᠷᠪᠢ ᠲᠠᠰ ᠤᠨ ᠬᠢ ᠲᠠᠢ ᠠᠳᠠᠯᠢ ᠦᠭᠡᠢ᠂
14 ᠲᠡᠷᠡ ᠥᠨᠳᠡᠭᠡ ᠪᠡᠨ ᠭᠠᠵᠠᠷ ᠲᠤ ᠭᠠᠷᠭᠠᠵᠤ ᠰᠢᠷᠣᠢ ᠪᠠᠷ ᠲᠡᠳᠡᠨ ᠢ ᠳᠤᠯᠠᠭᠠᠴᠠᠭᠤᠯᠳᠠᠭ ᠪᠣᠯᠪᠠᠴᠤ
15 ᠬᠡᠨ ᠨᠢᠭᠡᠨ ᠦ ᠬᠥᠯ ᠲᠡᠭᠦᠨ ᠢ ᠨᠢᠴᠠᠯᠵᠤ ᠬᠡᠭᠡᠷᠡ ᠶᠢᠨ ᠠᠷᠢᠶᠠᠲᠠᠨ ᠲᠡᠭᠦᠨ ᠢ ᠪᠢᠴᠠᠯᠵᠤ ᠮᠡᠳᠡᠬᠦ ᠶᠢ ᠮᠠᠷᠲᠠᠨ
16 ᠦᠷᠡ ᠵᠤᠯᠵᠠᠭᠠ ᠳᠠᠭᠠᠨ ᠥᠪᠡᠷ ᠦᠨ ᠬᠢᠨᠢ ᠪᠢᠰᠢ ᠰᠢᠭ ᠬᠠᠲᠠᠭᠤᠷᠬᠠᠳᠠᠭ ᠥᠪᠡᠷ ᠦᠨ ᠬᠢᠨᠢ ᠵᠦᠳᠡᠷᠡᠯ ᠬᠣᠭᠣᠰᠣᠨ ᠪᠣᠯᠬᠤ ᠶᠢ ᠦᠯᠦ ᠣᠢᠰᠢᠶᠠᠳᠠᠭ᠂
17 ᠤᠴᠢᠷ ᠨᠢ ᠪᠤᠷᠬᠠᠨ ᠲᠡᠭᠦᠨ ᠳᠦ ᠣᠶᠤᠨ ᠪᠣᠳᠣᠯ ᠢ ᠵᠠᠶᠠᠭᠠᠭᠠ ᠦᠭᠡᠢ ᠲᠡᠭᠦᠨ ᠢ ᠮᠡᠷᠭᠡᠨ ᠤᠬᠠᠭᠠᠨ ᠢᠶᠠᠷ ᠳᠤᠲᠠᠭᠳᠠᠭᠤᠯᠤᠭᠰᠠᠨ ᠪᠢᠯᠡ᠃
18 ᠭᠡᠪᠡᠴᠦ ᠲᠡᠷᠡ ᠥᠳᠥ ᠪᠡᠨ ᠪᠣᠰᠬᠠᠨ ᠭᠦᠶᠦᠬᠦ ᠳᠡᠭᠡᠨ ᠬᠦᠯᠦᠭ ᠪᠤᠶᠤ ᠮᠣᠷᠢᠲᠠᠨ ᠢ ᠲᠣᠬᠣᠭᠤᠷᠬᠠᠳᠠᠭ᠃
19 ᠬᠦᠯᠦᠭ ᠮᠣᠷᠢᠨ ᠳᠤ ᠴᠢ ᠬᠦᠴᠦ ᠴᠢᠳᠠᠯ ᠢ ᠥᠭᠳᠡᠭ ᠤᠤ︖ ᠬᠦᠵᠦᠭᠦᠦ ᠶᠢ ᠨᠢ ᠴᠢ ᠳᠡᠯ ᠢᠶᠡᠷ ᠴᠢᠮᠡᠳᠡᠭ ᠤᠤ︖
20 ᠲᠡᠭᠦᠨ ᠢ ᠴᠢ ᠴᠠᠷᠴᠠᠬᠠᠢ ᠠᠳᠠᠯᠢ ᠬᠠᠷᠠᠢᠯᠭᠠᠳᠠᠭ ᠤᠤ︖ ᠲᠡᠭᠦᠨ ᠦ ᠰᠦᠷᠲᠦ ᠳᠣᠷᠭᠢᠶᠠᠨ ᠨᠢ ᠠᠶᠤᠮᠰᠢᠭᠲᠠᠢ ᠪᠢᠯᠡ᠃
21 ᠲᠡᠷᠡ ᠬᠥᠨᠳᠡᠢ ᠳᠦ ᠳᠡᠪᠰᠡᠯᠡᠳᠡᠭ ᠬᠦᠴᠦ ᠴᠢᠳᠠᠯ ᠢᠶᠠᠷ ᠢᠶᠠᠨ ᠪᠠᠬᠠᠷᠬᠠᠳᠠᠭ ᠬᠤᠶᠠᠭ ᠵᠡᠪᠰᠡᠭ ᠲᠡᠢ ᠲᠤᠯᠬᠤ ᠪᠠᠷ ᠶᠠᠪᠤᠳᠠᠭ᠂
22 ᠲᠡᠷᠡ ᠠᠶᠤᠯ ᠢ ᠲᠣᠬᠣᠭᠤᠷᠬᠠᠳᠠᠭ ᠶᠠᠭᠤᠨ ᠠᠴᠠ ᠴᠤ ᠦᠯᠦ ᠠᠶᠤᠳᠠᠭ ᠢᠯᠳᠦᠨ ᠡᠴᠡ ᠴᠤ ᠦᠯᠦ ᠡᠷᠭᠢᠳᠡᠭ᠂
23 ᠰᠤᠮᠤ ᠰᠠᠭᠠᠳᠠᠭ ᠲᠡᠭᠦᠨ ᠦ ᠳᠡᠭᠡᠷᠡ ᠱᠠᠵᠢᠭᠢᠨᠠᠵᠤ ᠰᠡᠯᠡᠮᠡ ᠵᠢᠳᠠ ᠭᠢᠯᠠᠯᠵᠠᠵᠤ ᠪᠠᠢᠬᠤ ᠳᠤ
24 ᠲᠡᠷᠡ ᠰᠢᠷᠦᠭᠦᠨ ᠠᠭᠤᠷ ᠲᠠᠢ ᠪᠠᠷ ᠭᠠᠵᠠᠷ ᠳᠡᠭᠡᠭᠦᠷ ᠳᠠᠪᠬᠢᠨᠠ ᠲᠡᠷᠡ ᠪᠦᠷᠢᠶᠡᠨ ᠳᠠᠭᠤ ᠶᠢ ᠰᠣᠨᠣᠰᠪᠠᠯ ᠵᠣᠭᠰᠣᠵᠤ ᠶᠠᠳᠠᠨᠠ᠂
25 ᠪᠦᠷᠢᠶᠡᠨ ᠳᠠᠭᠤ ᠳᠤᠤᠭᠠᠷᠪᠠᠯ ᠲᠡᠷᠡ ᠪᠡᠷ 〈ᠢ ᠬᠤᠤ ᠬᠤᠤ〉 ᠭᠡᠵᠦ ᠪᠠᠢᠯᠳᠤᠭᠠᠨ ᠢ ᠠᠯᠤᠰ ᠠᠴᠠ ᠦᠨᠦᠷᠯᠡᠨ ᠵᠠᠩᠵᠤᠨ ᠤ ᠤᠷᠠᠢ ᠳᠠᠭᠤ ᠪᠣᠯᠣᠨ ᠴᠡᠷᠢᠭ ᠤᠨ ᠤᠤᠬᠠᠢ ᠶᠢ ᠰᠣᠨᠣᠰᠳᠠᠭ᠃
26 ᠱᠣᠩ᠋ᠬᠣᠷ ᠵᠢᠭᠦᠷ ᠢᠶᠡᠨ ᠳᠡᠯᠭᠡᠨ ᠡᠮᠦᠨᠡ ᠵᠦᠭ ᠬᠠᠯᠢᠨ ᠨᠢᠰᠳᠡᠭ ᠨᠢ ᠴᠢᠨᠦ ᠮᠡᠷᠭᠡᠨ ᠤᠬᠠᠭᠠᠨ ᠢᠶᠠᠷ ᠪᠣᠯᠳᠠᠭ ᠤᠤ︖
27 ᠪᠦᠷᠭᠦᠳ ᠬᠥᠭᠡᠷᠦᠨ ᠨᠢᠰᠴᠦ ᠡᠭᠦᠷ ᠢᠶᠡᠨ ᠥᠨᠳᠥᠷ ᠲᠦ ᠵᠠᠰᠠᠳᠠᠭ ᠨᠢ ᠴᠢᠨᠦ ᠦᠭᠡ ᠪᠡᠷ ᠪᠣᠯᠳᠠᠭ ᠤᠤ︖
28 ᠲᠡᠷᠡ ᠬᠠᠪᠴᠢᠯ ᠳᠤ ᠰᠠᠭᠤᠵᠤ ᠲᠡᠨᠳᠡ ᠠᠮᠢᠳᠤᠷᠠᠳᠠᠭ ᠴᠠᠪᠴᠢᠮᠠ ᠬᠠᠳᠠ ᠨᠢ ᠲᠡᠭᠦᠨ ᠦ ᠴᠠᠢᠵᠠ ᠪᠢᠯᠡ᠂
29 ᠲᠡᠨᠳᠡ ᠡᠴᠡ ᠪᠡᠨ ᠲᠡᠷᠡ ᠣᠯᠵᠠ ᠪᠠᠨ ᠬᠠᠢᠳᠠᠭ ᠲᠡᠭᠦᠨ ᠦ ᠨᠢᠳᠦ ᠠᠯᠤᠰ ᠬᠣᠯᠠ ᠠᠴᠠ ᠬᠠᠷᠠᠳᠠᠭ᠂
30 ᠦᠷᠡ ᠵᠤᠯᠵᠠᠭᠠ ᠨᠤᠭᠤᠳ ᠨᠢ ᠴᠢᠰᠤ ᠬᠥᠬᠥᠳᠡᠭ ᠦᠬᠦᠳᠡᠯ ᠤᠳ ᠬᠠᠮᠢᠭᠠ ᠪᠠᠢᠪᠠᠯ᠂ ᠲᠡᠷᠡ ᠲᠡᠨᠳᠡ ᠪᠠᠢᠳᠠᠭ》 ᠭᠡᠵᠦ ᠠᠢᠯᠠᠳᠪᠠ᠃