ᠶᠧᠷᠧᠮᠢᠶᠠ ᠬᠣᠷᠢᠨ ᠳᠥᠷᠪᠡ
ᠬᠣᠶᠠᠷ ᠰᠠᠭᠰᠤ ᠢᠨᠵᠢᠷ
1 ᠪᠠᠪᠢᠯᠣᠨ ᠤ ᠬᠠᠭᠠᠨ ᠨᠧᠪᠦ᠋ᠺᠠᠨᠧᠽᠠᠷ ᠶᠦᠳᠠ ᠶᠢᠨ ᠬᠠᠭᠠᠨ᠂ ᠶᠧᠬᠣᠢᠶᠠᠺᠢᠮ ᠤᠨ ᠬᠦᠦ ᠶᠧᠺᠣᠨᠢᠶᠠ ᠶᠢ ᠶᠦᠳᠠ ᠶᠢᠨ ᠲᠦᠰᠢᠮᠡᠳ᠂ ᠤᠷᠠᠴᠤᠳ ᠪᠣᠯᠣᠨ ᠳᠠᠷᠬᠠᠴᠤᠳ ᠲᠠᠢ ᠬᠠᠮᠲᠤ ᠣᠯᠵᠠᠯᠠᠨ ᠠᠪᠴᠤ᠂ ᠶᠧᠷᠦ᠋ᠰᠠᠯᠧᠮ ᠡᠴᠡ ᠪᠠᠪᠢᠯᠣᠨ ᠤᠷᠤᠭᠤ ᠴᠥᠯᠡᠪᠡ᠃ ᠡᠭᠦᠨ ᠦ ᠳᠠᠷᠠᠭᠠ᠂ ᠶᠣᠬᠣᠸᠠ ᠨᠠᠳᠠ ᠳᠤ ᠶᠣᠬᠣᠸᠠ ᠶᠢᠨ ᠣᠷᠳᠣᠨ ᠤ ᠡᠮᠦᠨᠡ ᠪᠤᠢ ᠬᠣᠶᠠᠷ ᠰᠠᠭᠰᠤ ᠢᠨᠵᠢᠷ ᠢ ᠦᠵᠡᠭᠦᠯᠪᠡ᠃ 2 ᠨᠢᠭᠡ ᠰᠠᠭᠰᠤᠨ ᠳᠤ ᠠᠩᠬᠠ ᠪᠣᠯᠪᠠᠰᠤᠷᠠᠭᠰᠠᠨ ᠮᠡᠲᠦ ᠮᠠᠰᠢ ᠰᠠᠢᠨ ᠢᠨᠵᠢᠷ᠂ ᠨᠥᠭᠥᠭᠡ ᠰᠠᠭᠰᠤᠨ ᠳᠤ ᠮᠠᠭᠤᠳᠠᠭᠠᠳ ᠢᠳᠡᠬᠦ ᠶᠢᠨ ᠠᠷᠭᠠ ᠦᠭᠡᠢ ᠪᠣᠯᠣᠭᠰᠠᠨ ᠮᠠᠰᠢ ᠮᠠᠭᠤ ᠢᠨᠵᠢᠷ ᠪᠠᠢᠪᠠ᠃ 3 ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠶᠧᠷᠧᠮᠢᠶᠠ᠂ ᠴᠢ ᠶᠠᠭᠤ ᠬᠠᠷᠠᠵᠤ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠳᠦ᠂ ᠪᠢ᠄ 《ᠢᠨᠵᠢᠷ᠂ ᠰᠠᠢᠨ ᠢᠨᠵᠢᠷ ᠨᠢ ᠮᠠᠰᠢ ᠰᠠᠢᠨ ᠪᠠᠢᠬᠤ ᠳᠤ᠂ ᠮᠠᠭᠤ ᠢᠨᠵᠢᠷ ᠨᠢ ᠢᠳᠡᠬᠦ ᠶᠢᠨ ᠠᠷᠭᠠ ᠦᠭᠡᠢ ᠮᠠᠰᠢ ᠮᠠᠭᠤ ᠪᠠᠢᠨᠠ》 ᠭᠡᠪᠡ᠃
4 ᠲᠡᠭᠡᠲᠡᠯᠡ ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠂ ᠠᠢᠯᠠᠳᠤᠨ᠄ 5 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠬᠡᠯᠡᠵᠦ ᠪᠠᠢᠨᠠ᠄ 〈ᠪᠢ ᠡᠨᠡ ᠭᠠᠵᠠᠷ ᠠᠴᠠ ᠪᠠᠪᠢᠯᠣᠨᠴᠤᠳ ᠤᠨ ᠨᠤᠲᠤᠭ ᠲᠤ ᠶᠠᠪᠤᠭᠤᠯᠤᠭᠰᠠᠨ ᠶᠦᠳᠠ ᠶᠢᠨ ᠣᠯᠵᠠᠯᠠᠭᠳᠠᠭᠰᠠᠳ ᠢ ᠲᠡᠳᠡᠭᠡᠷ ᠰᠠᠢᠨ ᠢᠨᠵᠢᠷ ᠲᠠᠢ ᠠᠳᠠᠯᠢ ᠰᠠᠢᠨ ᠭᠡᠵᠦ ᠬᠠᠷᠠᠭᠤᠯᠤᠨ᠂ 6 ᠰᠠᠢᠨ ᠤ ᠬᠢᠨᠢ ᠲᠥᠯᠥᠭᠡ ᠥᠪᠡᠷ ᠦᠨ ᠢᠶᠠᠨ ᠬᠠᠷᠠᠴᠠ ᠶᠢ ᠲᠡᠳᠡᠨ ᠦ ᠳᠡᠭᠡᠷᠡ ᠲᠣᠭᠲᠠᠭᠠᠨᠠ᠃ ᠪᠢ ᠲᠡᠳᠡᠨ ᠢ ᠡᠨᠡ ᠨᠤᠲᠤᠭ ᠤᠷᠤᠭᠤ ᠳᠠᠬᠢᠨ ᠠᠪᠴᠢᠷᠠᠨᠠ᠂ ᠪᠢ ᠲᠡᠳᠡᠨ ᠢ ᠪᠣᠰᠬᠠᠬᠤ ᠪᠥᠭᠡᠳ ᠨᠤᠷᠠᠭᠠᠬᠤ ᠦᠭᠡᠢ᠂ ᠲᠠᠷᠢᠬᠤ ᠪᠥᠭᠡᠳ ᠲᠠᠰᠤᠳᠠᠬᠤ ᠦᠭᠡᠢ᠃ 7 ᠨᠠᠮᠠᠶᠢ ᠶᠣᠬᠣᠸᠠ ᠭᠡᠵᠦ ᠮᠡᠳᠡᠬᠦ ᠵᠢᠷᠦᠬᠡ ᠶᠢ ᠪᠢ ᠲᠡᠳᠡᠨ ᠳᠦ ᠥᠭᠭᠥᠨᠡ᠃ ᠲᠡᠳᠡ ᠨᠠᠳᠠ ᠤᠷᠤᠭᠤ ᠪᠦᠬᠦ ᠵᠢᠷᠦᠬᠡ ᠪᠡᠷ ᠢᠶᠠᠨ ᠡᠷᠭᠢᠵᠦ ᠢᠷᠡᠬᠦ ᠲᠤᠯᠠ ᠲᠡᠳᠡ ᠮᠢᠨᠦ ᠠᠷᠠᠳ ᠲᠦᠮᠡᠨ᠂ ᠪᠢ ᠲᠡᠳᠡᠨ ᠦ ᠪᠤᠷᠬᠠᠨ ᠪᠣᠯᠣᠨᠠ᠃
8 ᠬᠠᠷᠢᠨ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠃ ᠶᠦᠳᠠ ᠶᠢᠨ ᠬᠠᠭᠠᠨ ᠽᠧᠳᠧᠺᠢᠶᠠ᠂ ᠲᠡᠭᠦᠨ ᠦ ᠲᠦᠰᠢᠮᠡᠳ ᠪᠣᠯᠣᠨ ᠦᠯᠡᠳᠡᠭᠰᠡᠨ ᠶᠧᠷᠦ᠋ᠰᠠᠯᠧᠮ ᠤᠨ ᠬᠢᠨ ᠤ ᠬᠤᠪᠢ ᠳᠤ᠂ ᠲᠡᠳᠡ ᠡᠨᠡ ᠨᠤᠲᠤᠭ ᠲᠤ ᠦᠯᠡᠳᠡᠭᠰᠡᠨ ᠴᠤ᠂ ᠶᠧᠵᠢᠫᠲ ᠲᠤ ᠰᠠᠭᠤᠷᠢᠰᠢᠭᠰᠠᠨ ᠴᠤ ᠪᠢ ᠲᠡᠳᠡᠨ ᠢ ᠮᠠᠭᠤᠳᠠᠭᠠᠳ ᠢᠳᠡᠬᠦ ᠶᠢᠨ ᠠᠷᠭᠠ ᠦᠭᠡᠢ ᠪᠣᠯᠣᠭᠰᠠᠨ ᠮᠠᠭᠤ ᠢᠨᠵᠢᠷ ᠭᠡᠵᠦ ᠦᠵᠡᠨ᠂ 9 ᠳᠡᠯᠡᠬᠡᠢ ᠶᠢᠨ ᠪᠦᠬᠦ ᠬᠠᠭᠠᠨᠴᠢᠯᠠᠯ ᠤᠨ ᠵᠢᠭᠰᠢᠭᠦᠷᠢ ᠪᠣᠯᠭᠠᠬᠤ ᠲᠤᠯᠠ ᠲᠡᠳᠡ ᠮᠢᠨᠦ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠬᠤ ᠭᠠᠵᠠᠷ ᠪᠦᠷᠢ ᠳᠤ ᠭᠤᠲᠤᠮᠰᠢᠭ ᠪᠣᠯᠣᠨ ᠠᠮᠠᠨ ᠤ ᠵᠤᠭᠠ ᠪᠣᠯᠵᠤ᠂ ᠳᠣᠷᠣᠮᠵᠢᠯᠠᠯ ᠪᠣᠯᠣᠨ ᠬᠠᠷᠢᠶᠠᠯ ᠪᠣᠯᠣᠨᠠ᠃ 10 ᠪᠢ ᠲᠡᠳᠡᠨ ᠦ ᠳᠤᠮᠳᠠ ᠢᠯᠳᠦ᠂ ᠥᠯᠥᠰᠬᠥᠯᠡᠩ ᠪᠣᠯᠣᠨ ᠲᠠᠬᠤᠯ ᠢ ᠢᠯᠡᠭᠡᠵᠦ᠂ ᠲᠡᠳᠡᠨ ᠳᠦ ᠪᠣᠯᠣᠨ ᠲᠡᠳᠡᠨ ᠦ ᠡᠴᠢᠭᠡ ᠡᠪᠦᠭᠡᠳ ᠲᠦ ᠥᠭᠭᠥᠭᠰᠡᠨ ᠨᠤᠲᠤᠭ ᠠᠴᠠ ᠪᠠᠨ ᠲᠡᠳᠡᠨ ᠢ ᠤᠰᠠᠳᠬᠠᠨᠠ〉》 ᠭᠡᠪᠡ᠃