ᠶᠧᠷᠧᠮᠢᠶᠠ ᠠᠷᠪᠠ ᠶᠢᠰᠦ
ᠡᠪᠳᠡᠷᠡᠭᠰᠡᠨ ᠸᠠᠭᠠᠷ ᠰᠠᠪᠠ ᠡᠪᠳᠡᠷᠡᠬᠦ ᠶᠧᠷᠦ᠋ᠰᠠᠯᠧᠮ
1 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠪᠠ᠄ 《ᠴᠢ ᠸᠠᠭᠠᠷᠴᠢᠨ ᠤ ᠳᠤ ᠣᠴᠢᠵᠤ᠂ ᠰᠢᠪᠠᠷ ᠸᠠᠭᠠᠷ ᠬᠤᠳᠠᠯᠳᠤᠨ ᠠᠪ᠃ ᠠᠷᠠᠳ ᠲᠦᠮᠡᠨ ᠦ ᠠᠬᠠᠮᠠᠳ ᠤᠳ᠂ ᠮᠥᠨ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠤᠨ ᠵᠠᠷᠢᠮ ᠢ ᠨᠢ ᠳᠠᠭᠠᠭᠤᠯᠤᠨ 2 ᠱᠠᠵᠠᠩ ᠤᠨ ᠬᠡᠯᠲᠡᠷᠬᠡᠢ ᠭᠡᠳᠡᠭ ᠬᠠᠭᠠᠯᠭᠠᠨ ᠤ ᠣᠷᠣᠬᠤ ᠡᠭᠦᠳᠡᠨ ᠦ ᠣᠢᠷᠠ ᠪᠤᠢ ᠪᠧᠨ ᠾᠢᠨᠣᠮ ᠤᠨ ᠬᠥᠨᠳᠡᠢ ᠳᠦ ᠣᠴᠢᠵᠤ᠂ ᠮᠢᠨᠦ ᠴᠢᠮᠠ ᠳᠤ ᠬᠡᠯᠡᠬᠦ ᠦᠭᠡᠰ ᠢ ᠲᠡᠨᠳᠡ ᠲᠤᠩ᠋ᠬᠠᠭᠯᠠ᠄ 3 ᠶᠦᠳᠠ ᠶᠢᠨ ᠬᠠᠭᠠᠳ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠡ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠴᠠᠭᠠ᠃ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠭᠠᠢ ᠭᠠᠮᠰᠢᠭ ᠢ ᠪᠠᠭᠤᠯᠭᠠᠬᠤ ᠭᠡᠵᠦ ᠪᠠᠢᠨᠠ᠂ ᠡᠭᠦᠨ ᠢ ᠰᠣᠨᠣᠰᠣᠭᠰᠠᠨ ᠬᠥᠮᠦᠨ ᠪᠦᠷᠢ ᠶᠢᠨ ᠴᠢᠬᠢ ᠬᠠᠩᠭᠢᠨᠠᠬᠤ ᠪᠣᠯᠣᠨᠠ᠃ 4 ᠤᠴᠢᠷ ᠨᠢ ᠲᠡᠳᠡ ᠨᠠᠮᠠᠶᠢ ᠣᠷᠬᠢᠵᠤ᠂ ᠡᠨᠡ ᠭᠠᠵᠠᠷ ᠢ ᠬᠠᠷᠢ ᠦᠨᠳᠦᠰᠦᠲᠡᠨ ᠦ ᠬᠢ ᠮᠡᠲᠦ ᠪᠣᠯᠭᠠᠨ᠂ ᠡ᠊ᠨᠳᠡ ᠥᠪᠡᠷᠰᠡᠳ ᠦᠨ ᠢᠶᠠᠨ ᠴᠤ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠴᠤ᠂ ᠶᠦᠳᠠ ᠶᠢᠨ ᠬᠠᠭᠠᠳ ᠤᠨ ᠴᠤ ᠮᠡᠳᠡᠳᠡᠭ ᠦᠭᠡᠢ ᠥᠭᠡᠷᠡ ᠪᠤᠷᠬᠠᠳ ᠲᠤ ᠤᠲᠤᠯᠭᠠ ᠤᠭᠤᠭᠢᠭᠤᠯᠵᠤ᠂ ᠭᠡᠮ ᠦᠭᠡᠢ ᠬᠥᠮᠦᠰ ᠦᠨ ᠴᠢᠰᠤ ᠪᠠᠷ ᠡᠨᠡ ᠭᠠᠵᠠᠷ ᠢ ᠳᠦᠭᠦᠷᠭᠡᠨ 5 ᠪᠠᠯ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠤᠳ ᠢ ᠪᠣᠰᠬᠠᠨ᠂ ᠥᠪᠡᠷᠰᠡᠳ ᠦᠨ ᠢᠶᠠᠨ ᠬᠥᠪᠡᠭᠦᠳ ᠢ ᠭᠠᠯᠳᠠᠨ ᠰᠢᠲᠠᠭᠠᠵᠤ᠂ ᠪᠠᠯ ᠳᠤ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠭᠠᠨ ᠡᠷᠭᠦᠭᠰᠡᠨ ᠶᠤᠮ᠃ ᠪᠢ ᠡᠭᠦᠨ ᠢ ᠲᠤᠰᠢᠶᠠᠭᠠ ᠦᠭᠡᠢ᠂ ᠶᠠᠷᠢᠭᠠ ᠴᠤ ᠦᠭᠡᠢ ᠪᠥᠭᠡᠳ ᠡᠨᠡ ᠨᠢ ᠰᠠᠨᠠᠭᠠᠨ ᠳᠤ ᠮᠢᠨᠢ ᠴᠤ ᠣᠷᠣᠭᠠ ᠦᠭᠡᠢ ᠶᠤᠮ᠃ 6 ᠡᠢᠮᠦ ᠡᠴᠡ ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠂ ᠠᠩ᠋ᠬᠠᠷᠤᠭᠲᠤᠨ᠂ ᠡᠨᠡ ᠭᠠᠵᠠᠷ ᠢ ᠲᠣᠹᠧᠲ ᠪᠤᠶᠤ ᠪᠧᠨ ᠾᠢᠨᠣᠮ ᠤᠨ ᠬᠥᠨᠳᠡᠢ ᠭᠡᠵᠦ ᠨᠡᠷᠡᠯᠡᠬᠦ ᠪᠡᠨ ᠪᠣᠯᠢᠵᠤ᠂ ᠠᠯᠠᠯᠭᠠᠨ ᠤ ᠬᠥᠨᠳᠡᠢ ᠭᠡᠵᠦ ᠨᠡᠷᠡᠯᠡᠬᠦ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨᠠ︕ 7 ᠪᠢ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠲᠥᠯᠥᠪᠯᠡᠭᠡ ᠶᠢ ᠡᠨᠡ ᠭᠠᠵᠠᠷ ᠲᠤ ᠨᠤᠷᠠᠭᠠᠨᠠ᠂ ᠪᠢ ᠲᠡᠳᠡᠨ ᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠠᠮᠢ ᠶᠢ ᠡᠷᠢᠭ᠍ᠴᠢᠳ ᠤᠨ ᠭᠠᠷ ᠲᠤ᠂ ᠳᠠᠢᠰᠤᠨ ᠨᠤᠭᠤᠳ ᠤᠨ ᠬᠢᠨᠢ ᠰᠡᠯᠡᠮᠡᠨ ᠳᠦ ᠤᠨᠠᠭᠠᠵᠤ᠂ ᠲᠡᠳᠡᠨ ᠦ ᠬᠡᠭᠦᠷ ᠢ ᠲᠩᠷᠢ ᠶᠢᠨ ᠰᠢᠪᠠᠭᠤᠳ ᠪᠣᠯᠣᠨ ᠭᠠᠵᠠᠷ ᠤᠨ ᠠᠷᠢᠶᠠᠲᠠᠳ ᠲᠤ ᠢᠳᠡᠭᠦᠯᠬᠦ ᠪᠠ 8 ᠡᠨᠡ ᠬᠣᠲᠠ ᠶᠢ ᠡᠵᠡᠭᠦᠢᠷᠡᠭᠦᠯᠵᠦ᠂ ᠲᠠᠪᠠᠯᠠᠭᠳᠠᠬᠤ ᠰᠢᠯᠲᠠᠭᠠᠨ ᠪᠣᠯᠭᠠᠨᠠ᠃ ᠡᠨᠡᠭᠦᠷ ᠥᠩᠭᠡᠷᠡᠭᠴᠢ ᠬᠥᠮᠦᠨ ᠪᠦᠷᠢ ᠰᠣᠴᠢᠵᠤ᠂ ᠡᠳᠡᠭᠡᠷ ᠪᠦᠬᠦ ᠭᠠᠮᠰᠢᠭ ᠤᠨ ᠤᠯᠠᠮ ᠢᠶᠠᠷ ᠲᠠᠪᠠᠯᠠᠬᠤ ᠪᠣᠯᠣᠨᠠ᠃ 9 ᠪᠢ ᠲᠡᠳᠡᠨ ᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠠᠮᠢ ᠶᠢ ᠬᠠᠢᠳᠠᠭ ᠳᠠᠢᠰᠤᠨ ᠨᠤᠭᠤᠳ ᠤᠨ ᠢᠶᠠᠨ ᠪᠦᠰᠡᠯᠡᠯᠲᠡ ᠳᠦ ᠣᠷᠣᠬᠤ ᠵᠣᠪᠠᠯᠠᠩ ᠤᠨ ᠦᠶᠡ ᠳᠦᠨᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠬᠥᠪᠡᠭᠦᠳ ᠥᠬᠢᠳ ᠤᠨ ᠮᠢᠬᠠ ᠶᠢ ᠢᠳᠡᠵᠦ᠂ ᠪᠡᠶᠡ ᠪᠡᠶᠡᠨ ᠦ ᠪᠠᠨ ᠮᠢᠬᠠ ᠶᠢ ᠢᠳᠡᠬᠦ ᠳᠦ ᠬᠦᠷᠭᠡᠨᠡ〉 ᠭᠡᠵᠦ ᠶᠠᠷᠢ᠃》
10 《ᠲᠡᠭᠡᠭᠡᠳ ᠴᠢ ᠬᠠᠮᠲᠤ ᠶᠠᠪᠤᠬᠤ ᠬᠥᠮᠦᠰ ᠦᠨ ᠢᠶᠠᠨ ᠨᠢᠳᠦᠨ ᠳᠡᠭᠡᠷᠡ ᠸᠠᠭᠠᠷ ᠢ ᠬᠠᠭᠠᠯᠵᠤ᠂ 11 ᠲᠡᠳᠡᠨ ᠳᠦ᠄ 〈ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠢᠩᠭᠢᠵᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠸᠠᠭᠠᠷᠴᠢᠨ ᠸᠠᠭᠠᠷ ᠰᠠᠪᠠ ᠶᠢ ᠳᠠᠬᠢᠵᠤ ᠪᠦᠲᠦᠨ ᠪᠣᠯᠬᠤ ᠪᠠᠷ ᠦᠭᠡᠢ ᠪᠦᠷᠢᠮᠦᠰᠦᠨ ᠬᠠᠭᠠᠯᠬᠤ ᠲᠠᠢ ᠠᠳᠠᠯᠢ ᠪᠢ ᠡᠨᠡ ᠠᠷᠠᠳ ᠲᠦᠮᠡᠨ ᠪᠣᠯᠣᠨ ᠡᠨᠡ ᠬᠣᠲᠠ ᠶᠢ ᠬᠠᠭᠠᠯᠤᠨᠠ᠃ ᠲᠡᠳᠡ ᠬᠡᠭᠦᠷ ᠢ ᠲᠣᠹᠧᠲ ᠲᠤ ᠣᠷᠣᠰᠢᠭᠤᠯᠤᠭᠰᠠᠭᠠᠷ ᠪᠠᠢᠵᠤ᠂ ᠲᠡᠨᠳᠡ ᠣᠷᠣᠰᠢᠭᠤᠯᠬᠤ ᠵᠠᠢ ᠦᠭᠡᠢ ᠪᠣᠯᠣᠨᠠ᠃ 12 ᠶᠣᠬᠣᠸᠠ ᠪᠢ ᠠᠢᠯᠠᠳᠴᠤ ᠪᠠᠢᠨᠠ᠂ ᠪᠢ ᠡᠨᠡ ᠭᠠᠵᠠᠷ ᠪᠣᠯᠣᠨ ᠲᠡᠭᠦᠨ ᠦ ᠰᠠᠭᠤᠭᠠᠯᠢᠴᠢᠳ ᠲᠤ ᠲᠡᠢᠨ ᠬᠦ ᠦᠢᠯᠡᠳᠴᠦ᠂ ᠡᠨᠡ ᠬᠣᠲᠠ ᠶᠢ ᠲᠣᠹᠧᠲ ᠰᠢᠭ᠋ ᠪᠣᠯᠭᠠᠨᠠ᠃ 13 ᠲᠡᠢᠮᠦ ᠡᠴᠡ ᠶᠧᠷᠦ᠋ᠰᠠᠯᠧᠮ ᠤᠨ ᠭᠡᠷ ᠤᠳ ᠪᠣᠯᠣᠨ ᠶᠦᠳᠠ ᠶᠢᠨ ᠬᠠᠭᠠᠳ ᠤᠨ ᠭᠡᠷ ᠤᠳ ᠲᠣᠹᠧᠲ ᠭᠠᠵᠠᠷ ᠰᠢᠭ᠋ ᠪᠤᠵᠠᠷᠯᠠᠭᠳᠠᠨᠠ᠃ ᠤᠴᠢᠷ ᠨᠢ ᠲᠡᠳᠡᠭᠡᠷ ᠪᠦᠬᠦ ᠪᠠᠢᠰᠢᠩ ᠤᠨ ᠳᠡᠭᠡᠪᠦᠷ ᠳᠡᠭᠡᠷᠡ ᠲᠡᠳᠡ ᠲᠩᠷᠢ ᠶᠢᠨ ᠪᠦᠬᠦ ᠡᠷᠬᠡᠰ ᠲᠦ ᠲᠠᠬᠢᠯ ᠡᠷᠭᠦᠵᠦ᠂ ᠥᠭᠡᠷᠡ ᠪᠤᠷᠬᠠᠳ ᠲᠤ ᠤᠮᠳᠠᠭᠠᠨ ᠡᠷᠭᠦᠯ ᠢ ᠴᠢᠳᠬᠤᠭᠰᠠᠨ ᠶᠤᠮ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃
ᠶᠧᠷᠧᠮᠢᠶᠠ ᠬᠣᠷᠢᠭᠳᠠᠪᠠ
14 ᠶᠧᠷᠧᠮᠢᠶᠠ ᠶᠣᠬᠣᠸᠠ ᠳᠤ ᠢᠯᠡᠭᠡᠭᠳᠡᠨ ᠲᠣᠹᠧᠲ ᠲᠤ ᠡᠰᠢ ᠦᠵᠡᠭᠦᠯᠦᠭᠰᠡᠨ ᠦ ᠳᠠᠷᠠᠭᠠ ᠪᠤᠴᠠᠵᠤ ᠢᠷᠡᠭᠡᠳ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠬᠦᠷᠢᠶᠡᠨ ᠳᠣᠲᠣᠷᠠ ᠵᠣᠭᠰᠣᠵᠤ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ ᠳᠦ ᠶᠠᠷᠢᠨ᠄ 15 《ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠠᠢᠯᠠᠳᠴᠤ᠄ 〈ᠬᠠᠷᠠ᠂ ᠲᠡᠳᠡ ᠮᠢᠨᠦ ᠦᠭᠡ ᠶᠢ ᠰᠣᠨᠣᠰᠣᠯ ᠦᠭᠡᠢ ᠰᠢᠯᠢ ᠪᠠᠨ ᠲᠠᠲᠠᠵᠠᠢ᠃ ᠡᠢᠮᠦ ᠡᠴᠡ ᠪᠢ ᠲᠡᠳᠡᠨ ᠳᠦ ᠲᠤᠩ᠋ᠬᠠᠭᠯᠠᠭᠰᠠᠨ ᠪᠦᠬᠦᠢᠯᠡ ᠭᠠᠮᠰᠢᠭ ᠢ ᠡᠨᠡ ᠬᠣᠲᠠ ᠪᠣᠯᠣᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠲᠣᠰᠬᠣᠳ ᠲᠤ ᠪᠠᠭᠤᠯᠭᠠᠬᠤ ᠭᠡᠵᠦ ᠪᠠᠢᠨᠠ〉 ᠭᠡᠰᠡᠨ ᠶᠤᠮ》 ᠭᠡᠪᠡ᠃