ᠶᠧᠷᠧᠮᠢᠶᠠ ᠠᠷᠪᠠᠨ ᠳᠥᠷᠪᠡ
ᠭᠠᠩ ᠭᠠᠴᠢᠭ ᠪᠠ ᠢᠯᠳᠦ
1 ᠭᠠᠩ ᠭᠠᠴᠢᠭ ᠤᠨ ᠲᠠᠯᠠ ᠪᠠᠷ ᠶᠣᠬᠣᠸᠠ ᠶᠢᠨ ᠦᠭᠡ ᠶᠧᠷᠧᠮᠢᠶᠠ ᠳᠤ ᠢᠷᠡᠪᠡ᠄
2 《ᠶᠦᠳᠠ ᠭᠠᠰᠢᠭᠤᠳᠠᠵᠤ᠂ ᠲᠡᠭᠦᠨ ᠦ ᠬᠠᠭᠠᠯᠭᠠ ᠨᠤᠭᠤᠳ ᠰᠤᠯᠠᠷᠠᠪᠠ ᠭᠠᠵᠠᠷ ᠨᠤᠲᠤᠭ ᠤᠨ ᠢᠶᠠᠨ ᠲᠥᠯᠥᠭᠡ ᠲᠡᠳᠡ ᠭᠠᠰᠢᠭᠤᠳᠠᠬᠤ ᠳᠤ ᠬᠠᠰᠬᠢᠷᠬᠤ ᠳᠠᠭᠤ ᠶᠧᠷᠦ᠋ᠰᠠᠯᠧᠮ ᠡᠴᠡ ᠳᠡᠭᠡᠭᠰᠢ ᠭᠠᠷᠪᠠ᠃
3 ᠨᠣᠶᠠᠳ ᠨᠢ ᠵᠠᠷᠤᠴᠠ ᠨᠠᠷ ᠢᠶᠠᠨ ᠤᠰᠤᠨ ᠳᠤ ᠶᠠᠪᠤᠭᠤᠯᠪᠠ ᠨᠥᠭᠡᠴᠡᠯᠡᠭᠦᠷ ᠤᠷᠤᠭᠤ ᠶᠠᠪᠤᠭᠤᠯᠤᠭᠰᠠᠨ ᠴᠤ ᠤᠰᠤ ᠣᠯᠣᠭᠰᠠᠨ ᠦᠭᠡᠢ ᠰᠠᠪᠠ ᠬᠣᠭᠣᠰᠣᠨ ᠪᠤᠴᠠᠵᠤ ᠢᠷᠡᠬᠦ ᠳᠡᠭᠡᠨ ᠲᠡᠳᠡ ᠰᠠᠨᠠᠭᠠ ᠵᠣᠪᠠᠨ ᠴᠥᠬᠥᠷᠡᠵᠦ ᠲᠣᠯᠣᠭᠠᠢ ᠪᠠᠨ ᠪᠦᠲᠡᠭᠡᠪᠡ
4 ᠭᠠᠵᠠᠷ ᠨᠤᠲᠤᠭ ᠲᠤ ᠪᠣᠷᠣᠭᠠᠨ ᠦᠭᠡᠢ ᠡᠴᠡ ᠭᠠᠵᠠᠷ ᠬᠠᠭᠠᠷᠠᠳᠠᠭ ᠲᠤᠯᠠ ᠲᠠᠷᠢᠶᠠᠴᠢᠳ ᠰᠠᠨᠠᠭᠠ ᠵᠣᠪᠠᠨ ᠲᠣᠯᠣᠭᠠᠢ ᠪᠠᠨ ᠪᠦᠲᠡᠭᠡᠪᠡ᠃
5 ᠲᠠᠯᠠ ᠶᠢᠨ ᠰᠣᠭᠣ ᠬᠦᠷᠲᠡᠯᠡ ᠡᠪᠡᠰᠦ ᠦᠭᠡᠢ ᠪᠣᠯᠬᠣᠷ ᠲᠥᠷᠥᠭᠦᠯᠦᠭᠰᠡᠨ ᠢᠶᠡᠨ ᠣᠷᠬᠢᠪᠠ
6 ᠬᠤᠯᠠᠨ ᠨᠤᠭᠤᠳ ᠨᠢᠴᠦᠭᠦᠨ ᠳᠣᠪᠣ ᠳᠡᠭᠡᠷᠡ ᠵᠣᠭᠰᠣᠭᠠᠳ ᠴᠥᠭᠡᠪᠦᠷᠢ ᠴᠢᠨᠣᠠ ᠮᠡᠲᠦ ᠠᠭᠠᠬᠢᠯᠠᠪᠠ ᠨᠢᠳᠦ ᠪᠡᠨ ᠴᠢᠯᠡᠲᠡᠯᠡ ᠡᠷᠢᠭᠰᠡᠨ ᠴᠤ ᠨᠣᠭᠣᠭᠠᠨ ᠤᠷᠭᠤᠮᠠᠯ ᠣᠯᠣᠭᠰᠠᠨ ᠦᠭᠡᠢ
7 ᠪᠢᠳᠡᠨ ᠦ ᠭᠡᠮ ᠪᠤᠷᠤᠭᠤ ᠪᠢᠳᠡᠨ ᠢ ᠵᠠᠭᠠᠯᠳᠤᠳᠠᠭ ᠪᠣᠯᠪᠠᠴᠤ ᠶᠣᠬᠣᠸᠠ᠂ ᠥᠪᠡᠷ ᠦᠨ ᠢᠶᠠᠨ ᠨᠡᠷᠡ ᠠᠯᠳᠠᠷ ᠤᠨ ᠲᠥᠯᠥᠭᠡ ᠦᠢᠯᠡᠳᠦᠭᠡᠴᠢ︕ ᠪᠢᠳᠡ ᠣᠯᠠᠨᠲᠠ ᠲᠡᠷᠰᠯᠡᠵᠦ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠨᠢ ᠦᠨᠡᠨ
8 ᠬᠠᠷᠢᠨ ᠢᠰᠷᠧᠯ ᠤᠨ ᠨᠠᠢᠳᠠᠪᠤᠷᠢ ᠡ ᠭᠠᠮᠰᠢᠭᠲᠤ ᠦᠶᠡ ᠶᠢᠨ ᠬᠢᠨᠢ ᠠᠪᠤᠷᠠᠭᠴᠢ ᠡ ᠲᠠ ᠶᠠᠭᠠᠬᠢᠭᠠᠳ ᠡᠨᠡ ᠨᠤᠲᠤᠭ ᠲᠤ ᠬᠠᠷᠢ ᠶᠢᠨ ᠬᠥᠮᠦᠨ ᠮᠡᠲᠦ ᠬᠣᠨᠣᠭ ᠤᠨ ᠠᠶᠠᠨᠴᠢᠨ ᠮᠡᠲᠦ ᠪᠠᠢᠨᠠ ᠪᠤᠢ︖
9 ᠲᠠ ᠶᠠᠭᠠᠬᠢᠭᠠᠳ ᠰᠣᠴᠢᠭᠰᠠᠨ ᠬᠥᠮᠦᠨ ᠮᠡᠲᠦ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠬᠦᠴᠦᠲᠡᠨ ᠠᠳᠠᠯᠢ ᠪᠠᠢᠨᠠ ᠪᠤᠢ︖ ᠬᠠᠷᠢᠨ ᠶᠣᠬᠣᠸᠠ ᠡ᠂ ᠲᠠ ᠪᠢᠳᠡᠨ ᠦ ᠳᠤᠮᠳᠠ ᠪᠠᠢᠭᠠ ᠪᠥᠭᠡᠳ ᠪᠢᠳᠡ ᠲᠠᠨ ᠤ ᠨᠡᠷᠡ ᠪᠡᠷ ᠳᠠᠭᠤᠳᠠᠭᠳᠠᠳᠠᠭ ᠲᠤᠯᠠ ᠪᠢᠳᠡᠨ ᠢ ᠪᠦᠦ ᠣᠷᠬᠢᠭᠠᠴᠢ︕》
10 ᠶᠣᠬᠣᠸᠠ ᠡᠨᠡ ᠠᠷᠠᠳ ᠲᠦᠮᠡᠨ ᠲᠤ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠡᠳᠡ ᠬᠥᠯ ᠢᠶᠡᠨ ᠬᠤᠷᠢᠶᠠᠯ ᠦᠭᠡᠢ ᠲᠡᠨᠦᠭᠦᠴᠢᠯᠡᠬᠦ ᠳᠤᠷᠠᠲᠠᠢ᠂ ᠡᠢᠮᠦ ᠡᠴᠡ ᠶᠣᠬᠣᠸᠠ ᠪᠢ ᠲᠡᠳᠡᠨ ᠢ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ᠃ ᠣᠳᠣ ᠭᠡᠮ ᠪᠤᠷᠤᠭᠤ ᠶᠢ ᠨᠢ ᠰᠠᠨᠠᠵᠤ᠂ ᠨᠢᠭᠦᠯ ᠢ ᠨᠢ ᠰᠢᠳᠬᠡᠨᠡ᠂ 11 ᠶᠣᠬᠣᠸᠠ ᠨᠠᠳᠠ ᠳᠤ ᠠᠢᠯᠠᠳᠤᠨ᠄ 〈ᠡᠨᠡ ᠠᠷᠠᠳ ᠲᠦᠮᠡᠨ ᠦ ᠰᠠᠢᠨ ᠰᠠᠢᠬᠠᠨ ᠤ ᠲᠥᠯᠥᠭᠡ ᠴᠢ ᠪᠦᠦ ᠳᠠᠭᠠᠳᠬᠠ᠂ 12 ᠲᠡᠳᠡ ᠪᠠᠴᠠᠭ ᠪᠠᠷᠢᠭᠰᠠᠨ ᠴᠤ ᠪᠢ ᠣᠷᠢᠯᠠᠬᠤ ᠶᠢ ᠨᠢ ᠰᠣᠨᠣᠰᠬᠤ ᠦᠭᠡᠢ᠃ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠤᠶᠤ ᠢᠳᠡᠭᠡᠨ ᠲᠠᠬᠢᠯ ᠡᠷᠭᠦᠭᠰᠡᠨ ᠴᠤ ᠲᠡᠳᠡᠨ ᠦ ᠬᠢ ᠶᠢ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ᠃ ᠬᠠᠷᠢᠨ ᠢᠯᠳᠦ᠂ ᠥᠯᠥᠰᠬᠥᠯᠡᠩ ᠪᠣᠯᠣᠨ ᠲᠠᠬᠤᠯ ᠢᠶᠠᠷ ᠲᠡᠳᠡᠨ ᠢ ᠤᠰᠠᠳᠬᠠᠨᠠ〉 ᠭᠡᠪᠡ᠃》 13 ᠪᠢ᠄ 《ᠥ ᠡᠵᠡᠨ ᠶᠣᠬᠣᠸᠠ︕ ᠬᠠᠷᠢᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ᠄ 〈ᠲᠠ ᠨᠠᠷ ᠢᠯᠳᠦ ᠶᠢ ᠦᠵᠡᠬᠦ ᠦᠭᠡᠢ᠂ ᠥᠯᠥᠰᠬᠥᠯᠡᠩ ᠴᠤ ᠪᠣᠯᠬᠤ ᠦᠭᠡᠢ᠂ ᠶᠣᠬᠣᠸᠠ ᠲᠠᠨ ᠤ ᠡᠨᠡ ᠭᠠᠵᠠᠷ ᠲᠤ ᠦᠷᠭᠦᠯᠵᠢ ᠶᠢᠨ ᠠᠮᠤᠭᠤᠯᠠᠩ ᠢ ᠥᠭᠭᠥᠨᠡ〉 ᠭᠡᠵᠦ ᠯᠠ ᠪᠠᠢᠳᠠᠭ》 ᠭᠡᠬᠦ ᠳᠦ᠂ 14 ᠶᠣᠬᠣᠸᠠ ᠨᠠᠳᠠ ᠳᠤ ᠠᠢᠯᠠᠳᠤᠨ᠄ 《ᠲᠡᠳᠡᠭᠡᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠮᠢᠨᠦ ᠨᠡᠷᠡ ᠪᠡᠷ ᠬᠠᠭᠤᠷᠮᠠᠭ ᠢᠶᠠᠷ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠨᠠ᠃ ᠪᠢ ᠲᠡᠳᠡᠨ ᠢ ᠶᠠᠪᠤᠭᠤᠯᠤᠭᠠ ᠦᠭᠡᠢ᠂ ᠲᠡᠳᠡᠨ ᠳᠦ ᠲᠤᠰᠢᠶᠠᠭᠠ ᠴᠤ ᠦᠭᠡᠢ᠂ ᠶᠠᠷᠢᠭᠠ ᠴᠤ ᠦᠭᠡᠢ᠃ ᠲᠡᠳᠡ ᠬᠤᠳᠠᠯ ᠦᠵᠡᠭᠳᠡᠯ᠂ ᠬᠣᠭᠣᠰᠣᠨ ᠲᠥᠯᠭᠡ ᠪᠤᠶᠤ ᠬᠠᠭᠤᠷᠮᠠᠴᠢ ᠰᠡᠳᠬᠢᠯ ᠢᠶᠠᠷ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠨᠠ᠃ 15 ᠲᠡᠢᠮᠦ ᠡᠴᠡ ᠨᠥᠭᠥᠭᠡ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠲᠤᠬᠠᠢ ᠶᠣᠬᠣᠸᠠ ᠪᠢ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠃ ᠪᠢ ᠲᠡᠳᠡᠨ ᠢ ᠶᠠᠪᠤᠭᠤᠯᠵᠤ ᠪᠠᠢᠭᠠ ᠦᠭᠡᠢ ᠪᠣᠯᠪᠠᠴᠤ ᠲᠡᠳᠡ ᠮᠢᠨᠦ ᠨᠡᠷᠡ ᠪᠡᠷ ᠡᠰᠢ ᠦᠵᠡᠭᠦᠯᠦᠨ᠄ 〈ᠢᠯᠳᠦ ᠴᠤ᠂ ᠥᠯᠥᠰᠬᠥᠯᠡᠩ ᠴᠤ ᠡᠨᠡ ᠨᠤᠲᠤᠭ ᠲᠤ ᠢᠷᠡᠬᠦ ᠦᠭᠡᠢ〉 ᠭᠡᠯᠴᠡᠵᠦ ᠪᠠᠢᠨᠠ᠃ ᠡᠳᠡᠭᠡᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠠᠭ ᠲᠡᠷᠡ ᠢᠯᠳᠦ ᠪᠣᠯᠣᠨ ᠥᠯᠥᠰᠬᠥᠯᠡᠩ ᠢᠶᠡᠷ ᠡᠴᠦᠰᠯᠡᠬᠦ ᠪᠣᠯᠣᠨᠠ︕ 16 ᠲᠡᠳᠡᠨ ᠦ ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢ ᠰᠣᠨᠣᠰᠣᠭᠰᠠᠨ ᠠᠷᠠᠳ ᠲᠦᠮᠡᠨ ᠴᠤ ᠥᠯᠥᠰᠬᠥᠯᠡᠩ ᠪᠠ ᠢᠯᠳᠦᠨ ᠦ ᠤᠯᠠᠮ ᠢᠶᠠᠷ ᠶᠧᠷᠦ᠋ᠰᠠᠯᠧᠮ ᠤᠨ ᠭᠤᠳᠤᠮᠵᠢ ᠨᠤᠭᠤᠳ ᠲᠤ ᠬᠠᠶᠠᠭᠳᠠᠬᠤ ᠪᠣᠯᠣᠨᠠ᠃ ᠲᠡᠳᠡᠨ ᠢ᠂ ᠡᠬᠡᠨᠡᠷ ᠤᠳ ᠢ ᠨᠢ ᠴᠤ᠂ ᠬᠥᠪᠡᠭᠦᠳ ᠢ ᠨᠢ ᠴᠤ᠂ ᠥᠬᠢᠳ ᠢ ᠨᠢ ᠴᠤ ᠣᠷᠣᠰᠢᠭᠤᠯᠬᠤ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠪᠣᠯᠣᠨᠠ᠃ ᠲᠡᠢᠨ ᠬᠦ ᠪᠢ ᠬᠣᠷᠣᠨ ᠮᠠᠭᠤ ᠶᠢ ᠨᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠳᠡᠭᠡᠷᠡ ᠠᠰᠬᠠᠬᠤ ᠪᠣᠯᠣᠨᠠ᠃
17 ᠴᠢ ᠲᠡᠳᠡᠨ ᠳᠦ ᠡᠨᠡ ᠦᠭᠡ ᠶᠢ ᠶᠠᠷᠢ᠄ 〈ᠨᠢᠳᠦ ᠮᠢᠨᠢ ᠡᠳᠦᠷᠵᠢᠨ ᠰᠥᠨᠢᠵᠢᠨ ᠲᠠᠰᠤᠷᠠᠯᠲᠠ ᠦᠭᠡᠢ ᠨᠢᠯᠪᠤᠰᠤ ᠤᠷᠤᠰᠬᠠᠨᠠ ᠮᠢᠨᠦ ᠣᠩ᠋ᠭᠣᠨ ᠥᠬᠢᠨ᠂ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠤᠲᠠ ᠴᠣᠬᠢᠯᠲᠠᠨ ᠳᠤ ᠬᠦᠨᠳᠦ ᠰᠢᠷᠬᠠᠲᠤᠭᠰᠠᠨ ᠪᠠᠢᠨᠠ᠃
18 ᠬᠡᠭᠡᠷᠡ ᠲᠠᠯᠠ ᠤᠷᠤᠭᠤ ᠭᠠᠷᠪᠠᠯ ᠢᠯᠳᠦᠨ ᠳᠦ ᠰᠥᠨᠥᠭᠰᠡᠳ︕ ᠬᠣᠲᠠ ᠳᠤ ᠣᠷᠣᠪᠠᠯ ᠥᠯᠥᠰᠬᠥᠯᠡᠩ ᠦᠨ ᠰᠦᠢᠷᠡᠯ︕ ᠡᠰᠢ ᠦᠵᠡᠭᠦᠯᠦᠭᠴᠢ ᠴᠤ᠂ ᠲᠠᠬᠢᠯᠴᠢ ᠴᠤ ᠡᠷᠳᠡᠮ ᠮᠡᠳᠡᠯᠭᠡ ᠦᠭᠡᠢ ᠪᠠᠷ ᠣᠷᠣᠨ ᠨᠤᠲᠤᠭ ᠲᠤ ᠬᠡᠰᠦᠭᠦᠴᠢᠯᠡᠳᠡᠭ᠌ ᠪᠠᠢᠵᠠᠢ〉 ᠭᠡᠰᠡᠨ》 ᠭᠡᠪᠡ᠃
19 ᠶᠦᠳᠠ ᠶᠢ ᠲᠠ ᠪᠦᠷᠢᠮᠦᠰᠦᠨ ᠣᠭᠣᠷᠣᠭᠰᠠᠨ ᠤᠤ︖ ᠽᠢᠶᠣᠨ ᠢ ᠲᠠ ᠦᠵᠡᠨ ᠶᠠᠳᠠᠬᠤ ᠪᠣᠯᠣᠭᠰᠠᠨ ᠤᠤ︖ ᠶᠠᠭᠤᠨ ᠳᠤ ᠲᠠ ᠪᠢᠳᠡᠨ ᠢ ᠡᠳᠡᠭᠡᠷᠡᠰᠢ ᠦᠭᠡᠢ ᠪᠠᠷ ᠴᠣᠬᠢᠪᠠ︖ ᠠᠮᠤᠭᠤᠯᠠᠩ ᠢ ᠪᠢᠳᠡ ᠬᠦᠰᠡᠭᠰᠡᠨ ᠴᠤ ᠰᠠᠢᠨ ᠨᠢ ᠦᠭᠡᠢ ᠡᠳᠡᠭᠡᠷᠡᠯ ᠦᠨ ᠴᠠᠭ ᠢ ᠬᠦᠰᠡᠭᠰᠡᠨ ᠴᠤ ᠠᠶᠤᠮᠰᠢᠭ ᠯᠠ ᠪᠤᠢ᠂
20 ᠶᠣᠬᠣᠸᠠ᠂ ᠪᠢᠳᠡ ᠥᠪᠡᠷᠰᠡᠳ ᠦᠨ ᠢᠶᠠᠨ ᠬᠣᠷᠣᠨ ᠮᠠᠭᠤ ᠶᠢ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠭᠡᠮ ᠪᠤᠷᠤᠭᠤ ᠶᠢ ᠵᠥᠪᠰᠢᠶᠡᠷᠡᠵᠦ ᠪᠠᠢᠨᠠ᠃ ᠪᠢᠳᠡ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠶᠤᠮ᠃
21 ᠥᠪᠡᠷ ᠦᠨ ᠢᠶᠠᠨ ᠨᠡᠷᠡ ᠶᠢᠨ ᠲᠥᠯᠥᠭᠡ ᠪᠢᠳᠡᠨ ᠢ ᠪᠦᠦ ᠭᠣᠯᠣᠭᠠᠴᠢ︕ ᠥᠪᠡᠷ ᠦᠨ ᠢᠶᠠᠨ ᠰᠤᠤᠲᠤ ᠰᠡᠨᠲᠢ ᠶᠢ ᠪᠦᠦ ᠭᠤᠲᠤᠭᠠᠭᠠᠴᠢ︕ ᠪᠢᠳᠡᠨ ᠲᠡᠢ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠪᠡᠨ ᠰᠠᠨᠠᠵᠤ᠂ ᠪᠦᠦ ᠴᠤᠴᠠᠯᠤᠭᠠᠴᠢ︕
22 ᠬᠠᠷᠢᠴᠤᠳ ᠤᠨ ᠰᠢᠲᠦᠭᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠪᠣᠷᠣᠭᠠᠨ ᠣᠷᠣᠭᠤᠯᠳᠠᠭ ᠨᠢ ᠪᠤᠢ ᠤᠤ︖ ᠠᠭᠠᠳᠠᠷ ᠪᠣᠷᠣᠭᠠ ᠶᠢ ᠲᠩᠷᠢ ᠥᠪᠡᠷ ᠢᠶᠡᠨ ᠰᠣᠶᠣᠷᠬᠠᠵᠤ ᠴᠢᠳᠠᠬᠤ ᠤᠤ︖ ᠲᠡᠳᠡᠭᠡᠷ ᠢ ᠰᠣᠶᠣᠷᠬᠠᠭᠴᠢ ᠨᠢ ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠲᠠ ᠪᠢᠰᠢ ᠤᠤ︖ ᠲᠡᠳᠡᠭᠡᠷ ᠪᠦᠬᠦᠨ ᠢ ᠪᠦᠲᠦᠭᠡᠭᠴᠢ ᠨᠢ ᠲᠠ ᠲᠡᠢᠮᠦ ᠡᠴᠡ ᠪᠢᠳᠡ ᠲᠠᠨ ᠢ ᠯᠠ ᠬᠦᠰᠡᠵᠦ ᠪᠠᠢᠨᠠ᠃