ᠡᠰᠲ᠋ᠧᠷ ᠵᠢᠷᠭᠤᠭᠠ
ᠮᠣᠷᠳᠧᠺᠠᠢ ᠡᠷᠭᠦᠭᠳᠡᠪᠡ
1 ᠬᠠᠭᠠᠨ ᠲᠡᠷᠡ ᠰᠥᠨᠢ ᠨᠣᠢᠷ ᠬᠤᠯᠵᠢᠭᠰᠠᠨ ᠪᠣᠯᠬᠣᠷ ᠣᠨ ᠳᠠᠷᠠᠭᠠᠯᠠᠯ ᠤᠨ ᠲᠡᠮᠳᠡᠭᠯᠡᠯ ᠢ ᠠᠪᠴᠢᠷᠠᠭᠤᠯᠤᠨ ᠤᠩ᠋ᠰᠢᠭᠤᠯᠵᠠᠢ᠃ 2 ᠲᠡᠭᠡᠭᠡᠳ ᠲᠡᠨᠳᠡ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠥᠪᠡᠷ ᠲᠤᠨᠢ ᠭᠠᠷ ᠬᠥᠳᠡᠯᠬᠦ ᠭᠡᠰᠡᠨ ᠬᠠᠭᠠᠯᠭᠠᠴᠢ ᠲᠠᠢᠭᠠᠨ ᠪᠢᠭᠲ᠋ᠠᠨᠠ᠂ ᠲᠧᠷᠧᠱ ᠬᠣᠶᠠᠷ ᠤᠨ ᠬᠤᠤᠪᠢᠯᠳᠤᠭᠠᠨ ᠢ ᠮᠣᠷᠳᠧᠺᠠᠢ ᠮᠡᠳᠡᠭᠦᠯᠦᠭᠰᠡᠨ ᠲᠤᠬᠠᠢ ᠪᠢᠴᠢᠭᠳᠡᠭᠰᠡᠨ ᠪᠠᠢᠬᠤ ᠶᠢ ᠣᠯᠵᠤ ᠮᠡᠳᠡᠪᠡ᠃ 3 ᠬᠠᠭᠠᠨ᠄ 《ᠡᠭᠦᠨ ᠦ ᠲᠥᠯᠥᠭᠡ ᠮᠣᠷᠳᠧᠺᠠᠢ ᠳᠤ ᠶᠠᠮᠠᠷ ᠠᠯᠳᠠᠷ ᠬᠦᠨᠳᠦ ᠣᠯᠭᠣᠭᠰᠠᠨ ᠪᠤᠢ︖》 ᠭᠡᠬᠦ ᠳᠦ᠂ ᠪᠠᠷᠠ ᠪᠣᠯᠣᠭᠴᠢᠳ ᠨᠢ᠄ 《ᠶᠠᠭᠤ ᠴᠤ ᠬᠢᠭᠡ ᠦᠭᠡᠢ ᠪᠠᠢᠨᠠ》 ᠭᠡᠯᠡ᠃ 4 ᠬᠠᠭᠠᠨ᠄ 《ᠬᠦᠷᠢᠶᠡᠨ ᠳᠦ ᠬᠡᠨ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠦᠶᠡ ᠳᠦ᠂ ᠶᠠᠭ ᠬᠠᠮᠠᠨ ᠲᠡᠨᠳᠡ ᠮᠣᠷᠳᠧᠺᠠᠢ ᠳᠤ ᠪᠡᠯᠡᠳᠦᠭᠰᠡᠨ ᠳᠡᠭᠦᠵᠢᠯᠡᠭᠦᠷ ᠲᠡᠭᠡᠨ ᠲᠡᠭᠦᠨ ᠢ ᠳᠡᠭᠦᠵᠢᠯᠡᠭᠦᠯᠬᠦ ᠲᠤᠬᠠᠢ ᠬᠠᠭᠠᠨ ᠲᠠᠢ ᠶᠠᠷᠢᠬᠤ ᠪᠠᠷ ᠬᠠᠭᠠᠨ ᠤ ᠣᠷᠳᠣᠨ ᠤ ᠭᠠᠳᠠᠷ ᠬᠦᠷᠢᠶᠡᠨ ᠳᠦ ᠣᠷᠣᠵᠤ ᠢᠷᠡᠴᠢᠬᠡᠭᠡᠳ ᠪᠠᠢᠯᠠ᠃ 5 ᠬᠠᠭᠠᠨ ᠤ ᠪᠠᠷᠠ ᠪᠣᠯᠣᠭᠴᠢᠳ᠄ 《ᠬᠠᠷᠠ︕ ᠬᠠᠮᠠᠨ ᠬᠦᠷᠢᠶᠡᠨ ᠳᠣᠲᠣᠷᠠ ᠵᠣᠭᠰᠣᠵᠤ ᠪᠠᠢᠨᠠ︕》 ᠭᠡᠬᠦ ᠳᠦ᠂ ᠬᠠᠭᠠᠨ᠄ 《ᠲᠡᠭᠦᠨ ᠢ ᠣᠷᠣᠭᠤᠯ︕》 ᠭᠡᠪᠡ᠃ 6 ᠬᠠᠮᠠᠨ ᠣᠷᠣᠵᠤ ᠢᠷᠡᠬᠦ ᠳᠦ᠂ ᠬᠠᠭᠠᠨ ᠲᠡᠭᠦᠨ ᠳᠦ᠄ 《ᠬᠠᠭᠠᠨ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠬᠦ ᠶᠢ ᠬᠦᠰᠡᠵᠦ ᠪᠠᠢᠭᠠ ᠬᠥᠮᠦᠨ ᠳᠡᠭᠡᠨ ᠶᠠᠭᠤ ᠬᠢᠪᠡᠯ ᠲᠠᠭᠠᠷᠠᠬᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠪᠠ᠃ ᠬᠠᠮᠠᠨ ᠳᠣᠲᠣᠷᠠ ᠪᠠᠨ᠄ 《ᠬᠠᠭᠠᠨ ᠬᠡᠨ ᠳᠦ ᠨᠠᠳᠠ ᠠᠴᠠ ᠢᠯᠡᠭᠦᠦ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠬᠦ ᠭᠡᠵᠦ ᠪᠠᠢᠭᠠ ᠪᠣᠯ︖》 ᠭᠡᠵᠦ ᠪᠣᠳᠣᠭᠠᠳ 7 ᠬᠠᠭᠠᠨ ᠳᠤ᠄ 《ᠬᠠᠭᠠᠨ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠬᠦ ᠶᠢ ᠬᠦᠰᠡᠵᠦ ᠪᠠᠢᠭᠠ ᠬᠥᠮᠦᠨ ᠳᠦ 8 ᠬᠠᠭᠠᠨ ᠤ ᠡᠮᠦᠰᠳᠡᠭ ᠳᠡᠪᠡᠯ᠂ ᠬᠠᠭᠠᠨ ᠤ ᠤᠨᠤᠳᠠᠭ ᠮᠣᠷᠢ ᠶᠢ ᠠᠪᠴᠢᠷᠠᠭᠤᠯᠵᠤ᠂ ᠲᠣᠯᠣᠭᠠᠢ ᠳᠤᠨᠢ ᠬᠠᠭᠠᠨ ᠤ ᠲᠢᠲᠢᠮ ᠢ ᠵᠡᠭᠦᠯᠭᠡᠭᠡᠷᠡᠢ᠃ 9 ᠲᠡᠷᠡ ᠳᠡᠪᠡᠯ ᠪᠠ ᠮᠣᠷᠢ ᠶᠢ ᠬᠠᠭᠠᠨ ᠤ ᠬᠠᠮᠤᠭ ᠤᠨ ᠲᠡᠷᠢᠭᠦᠨ ᠨᠣᠶᠠᠳ ᠤᠨ ᠨᠢᠭᠡᠨ ᠳᠦ ᠥᠭᠬᠦ ᠪᠠ ᠲᠡᠷᠡ ᠪᠡᠷ ᠬᠠᠭᠠᠨ ᠤ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠬᠦ ᠶᠢ ᠬᠦᠰᠡᠵᠦ ᠪᠠᠢᠭᠠ ᠬᠥᠮᠦᠨ ᠢ ᠬᠤᠪᠴᠠᠰᠤᠯᠠᠵᠤ᠂ ᠲᠡᠭᠦᠨ ᠢ ᠮᠣᠷᠢᠨ ᠳᠤ ᠮᠣᠷᠳᠠᠭᠤᠯᠤᠨ ᠬᠣᠲᠠ ᠶᠢᠨ ᠭᠤᠳᠤᠮᠵᠢ ᠪᠠᠷ ᠬᠥᠲᠥᠯᠥᠭᠡᠳ᠄ 〈ᠬᠠᠭᠠᠨ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠬᠦ ᠶᠢ ᠬᠦᠰᠡᠭᠰᠡᠨ ᠬᠥᠮᠦᠨ ᠳᠦ ᠡᠢᠨ ᠬᠦ ᠬᠠᠨᠳᠤᠨᠠ〉 ᠭᠡᠵᠦ ᠲᠡᠭᠦᠨ ᠦ ᠡᠮᠦᠨᠡ ᠲᠤᠩ᠋ᠬᠠᠭᠯᠠᠭᠤᠯ︕》 ᠭᠡᠬᠦ ᠳᠦ᠂ 10 ᠬᠠᠭᠠᠨ ᠬᠠᠮᠠᠨ ᠳᠤ᠄ 《ᠲᠦᠷᠭᠡᠯᠡ᠂ ᠴᠢ ᠥᠪᠡᠷ ᠦᠨ ᠢᠶᠠᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠳᠡᠪᠡᠯ ᠪᠣᠯᠣᠨ ᠮᠣᠷᠢ ᠶᠢ ᠠᠪᠴᠢᠷᠠᠵᠤ᠂ ᠬᠠᠭᠠᠨ ᠤ ᠬᠠᠭᠠᠯᠭᠠᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠭᠠ ᠶᠦᠳᠠᠢ ᠬᠥᠮᠦᠨ ᠮᠣᠷᠳᠧᠺᠠᠢ ᠳᠤ ᠲᠡᠢᠨ ᠬᠦ ᠬᠢᠭᠲᠦᠨ︕ ᠴᠢ ᠬᠡᠯᠡᠭᠰᠡᠨ ᠪᠦᠬᠦᠨ ᠡᠴᠡ ᠪᠡᠨ ᠠᠯᠢ ᠶᠢ ᠨᠢ ᠴᠤ ᠪᠦᠦ ᠣᠷᠬᠢᠭᠳᠠᠭᠤᠯ︕》 ᠭᠡᠯᠡ᠃ 11 ᠬᠠᠮᠠᠨ ᠳᠡᠪᠡᠯ ᠪᠣᠯᠣᠨ ᠮᠣᠷᠢ ᠠᠪᠴᠢᠷᠠᠵᠤ᠂ ᠮᠣᠷᠳᠧᠺᠠᠢ ᠶᠢ ᠬᠤᠪᠴᠠᠰᠤᠯᠠᠭᠠᠳ ᠲᠡᠭᠦᠨ ᠢ ᠮᠣᠷᠢᠨ ᠳᠤ ᠮᠣᠷᠳᠠᠭᠤᠯᠤᠨ ᠬᠣᠲᠠ ᠶᠢᠨ ᠭᠤᠳᠤᠮᠵᠢ ᠪᠠᠷ ᠬᠥᠲᠥᠯᠵᠦ᠄ 《ᠬᠠᠭᠠᠨ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠬᠦ ᠶᠢ ᠬᠦᠰᠡᠵᠦ ᠪᠠᠢᠭᠠ ᠬᠥᠮᠦᠨ ᠳᠦ ᠡᠢᠨ ᠬᠦ ᠬᠠᠨᠳᠤᠨᠠ》 ᠭᠡᠵᠦ ᠲᠡᠭᠦᠨ ᠦ ᠡᠮᠦᠨᠡ ᠲᠤᠩ᠋ᠬᠠᠭᠯᠠᠪᠠ᠃
12 ᠳᠠᠷᠠᠭᠠ ᠨᠢ ᠮᠣᠷᠳᠧᠺᠠᠢ ᠬᠠᠭᠠᠨ ᠤ ᠬᠠᠭᠠᠯᠭᠠ ᠤᠷᠤᠭᠤ ᠪᠤᠴᠠᠬᠤ ᠳᠤ᠂ ᠬᠠᠮᠠᠨ ᠲᠣᠯᠣᠭᠠᠢ ᠪᠠᠨ ᠲᠡᠪᠡᠷᠢᠨ ᠭᠠᠰᠠᠯᠵᠤ᠂ ᠭᠡᠷ ᠤᠷᠤᠭᠤ ᠪᠠᠨ ᠱᠣᠭᠰᠢᠪᠠ᠃ 13 ᠬᠠᠮᠠᠨ ᠥᠪᠡᠷ ᠲᠤᠨᠢ ᠲᠣᠬᠢᠶᠠᠯᠳᠤᠭᠰᠠᠨ ᠪᠦᠭᠦᠳᠡ ᠶᠢ ᠡᠬᠡᠨᠡᠷ ᠽᠧᠷᠧᠱ ᠪᠣᠯᠣᠨ ᠪᠦᠬᠦ ᠠᠨᠳᠠ ᠨᠥᠬᠥᠳ ᠲᠡᠭᠡᠨ ᠶᠠᠷᠢᠪᠠ᠃ ᠲᠡᠭᠡᠬᠦ ᠳᠦ ᠲᠡᠭᠦᠨ ᠦ ᠵᠥᠪᠯᠡᠭᠴᠢᠳ ᠪᠣᠯᠣᠨ ᠡᠬᠡᠨᠡᠷ ᠽᠧᠷᠧᠱ ᠨᠢ᠄ 《ᠴᠢ ᠲᠡᠭᠦᠨ ᠦ ᠡᠮᠦᠨᠡ ᠳᠣᠷᠣᠢᠲᠠᠵᠤ ᠡᠬᠢᠯᠡᠭᠰᠡᠨ ᠪᠠᠢᠨᠠ᠃ ᠮᠣᠷᠳᠧᠺᠠᠢ ᠶᠦᠳᠠᠢ ᠭᠠᠷᠤᠯ ᠲᠠᠢ ᠪᠣᠯ ᠴᠢ ᠲᠡᠭᠦᠨ ᠢ ᠳᠡᠢᠯᠵᠦ ᠴᠢᠳᠠᠬᠤ ᠦᠭᠡᠢ᠂ ᠲᠡᠭᠦᠨ ᠦ ᠡᠮᠦᠨᠡ ᠯᠠᠪᠲᠠᠢ ᠤᠨᠠᠬᠤ ᠪᠣᠯᠣᠨᠠ》 ᠭᠡᠪᠡ᠃
14 ᠲᠡᠳᠡ ᠲᠡᠭᠦᠨ ᠲᠡᠢ ᠶᠠᠷᠢᠵᠤ ᠳᠠᠭᠤᠰᠤᠭᠠ ᠦᠭᠡᠢ ᠪᠠᠢᠲᠠᠯᠠ ᠬᠠᠭᠠᠨ ᠤ ᠲᠠᠢᠭᠠᠨ ᠨᠠᠷ ᠬᠦᠷᠴᠦ ᠢᠷᠡᠭᠡᠳ ᠬᠠᠮᠠᠨ ᠢ ᠡᠰᠲ᠋ᠧᠷ ᠤᠨ ᠪᠡᠯᠡᠳᠦᠭᠰᠡᠨ ᠨᠠᠢᠷ ᠲᠤ ᠶᠠᠭᠠᠷᠠᠨ ᠠᠪᠴᠤ ᠣᠳᠪᠠ᠃