ᠡᠰᠲ᠋ᠧᠷ ᠲᠠᠪᠤ
ᠡᠰᠲ᠋ᠧᠷ ᠤᠨ ᠤᠷᠢᠯᠭᠠ
1 ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠡᠰᠲ᠋ᠧᠷ ᠬᠠᠲᠤᠨ ᠤ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠨ᠂ ᠬᠠᠭᠠᠨ ᠤ ᠥᠷᠭᠥᠭᠡᠨ ᠦ ᠳᠣᠲᠣᠷᠠ ᠬᠦᠷᠢᠶᠡᠨ ᠳᠦ ᠬᠠᠭᠠᠨ ᠤ ᠲᠠᠩᠬᠢᠮ ᠤᠷᠤᠭᠤ ᠬᠠᠷᠠᠨ ᠵᠣᠭᠰᠣᠪᠠ᠃ ᠬᠠᠭᠠᠨ ᠴᠤ ᠲᠡᠷᠡ ᠦᠶᠡ ᠳᠦ ᠲᠠᠩᠬᠢᠮ ᠳᠣᠲᠣᠷᠠᠬᠢ ᠬᠠᠭᠠᠨ ᠤ ᠰᠡᠨᠲᠢ ᠳᠡᠭᠡᠨ ᠲᠠᠩᠬᠢᠮ ᠤᠨ ᠡᠭᠦᠳᠡ ᠤᠷᠤᠭᠤ ᠬᠠᠷᠠᠨ ᠰᠠᠭᠤᠵᠤ ᠪᠠᠢᠪᠠ᠃ 2 ᠬᠠᠭᠠᠨ ᠡᠰᠲ᠋ᠧᠷ ᠬᠠᠲᠤᠨ ᠤ ᠬᠦᠷᠢᠶᠡᠨ ᠳᠣᠲᠣᠷᠠ ᠵᠣᠭᠰᠣᠵᠤ ᠪᠠᠢᠭᠠ ᠶᠢ ᠬᠠᠷᠠᠯᠠ᠃ ᠡᠰᠲ᠋ᠧᠷ ᠬᠠᠭᠠᠨ ᠤ ᠲᠠᠭᠠᠯᠠᠯ ᠢ ᠣᠯᠵᠤ᠂ ᠬᠠᠭᠠᠨ ᠭᠠᠷ ᠲᠠᠭᠠᠨ ᠪᠠᠷᠢᠭᠰᠠᠨ ᠠᠯᠲᠠᠨ ᠲᠠᠶᠠᠭ ᠢᠶᠠᠨ ᠡᠰᠲ᠋ᠧᠷ ᠤᠷᠤᠭᠤ ᠰᠤᠩ᠋ᠭᠠᠬᠤ ᠳᠤ᠂ ᠡᠰᠲ᠋ᠧᠷ ᠣᠢᠷᠠᠲᠤᠨ ᠣᠴᠢᠵᠤ ᠲᠠᠶᠠᠭ ᠤᠨ ᠦᠵᠦᠭᠦᠷ ᠲᠦ ᠬᠦᠷᠪᠡ᠃
3 ᠬᠠᠭᠠᠨ ᠲᠡᠭᠦᠨ ᠳᠦ᠄ 《ᠬᠠᠲᠤᠨ ᠡᠰᠲ᠋ᠧᠷ᠂ ᠴᠢᠮᠠ ᠳᠤ ᠶᠠᠭᠤ ᠬᠡᠷᠡᠭ ᠲᠡᠢ ᠪᠣᠯᠪᠠ︖ ᠴᠢ ᠶᠠᠭᠤ ᠬᠦᠰᠡᠪᠡ︖ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠲᠠᠯᠠ ᠶᠢ ᠴᠤ ᠴᠢᠮᠠ ᠳᠤ ᠥᠭᠴᠦ ᠪᠣᠯᠣᠨᠠ》 ᠭᠡᠪᠡ᠃
4 ᠡᠰᠲ᠋ᠧᠷ᠄ 《ᠬᠠᠭᠠᠨ ᠲᠠᠭᠠᠯᠠᠪᠠᠯ ᠥᠨᠥᠳᠥᠷ ᠲᠠᠨ ᠳᠤ ᠪᠡᠯᠡᠳᠬᠡᠭᠰᠡᠨ ᠨᠠᠢᠷ ᠲᠤ ᠮᠢᠨᠢ ᠬᠠᠮᠠᠨ ᠲᠠᠢ ᠬᠠᠮᠲᠤ ᠣᠴᠢᠨᠠ ᠤᠤ︖》 ᠭᠡᠪᠡ᠃
5 ᠬᠠᠭᠠᠨ᠄ 《ᠡᠰᠲ᠋ᠧᠷ ᠤᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠢᠶᠡ᠂ ᠬᠠᠮᠠᠨ ᠢ ᠲᠦᠷᠭᠡᠨ ᠳᠠᠭᠤᠳᠠ》 ᠭᠡᠪᠡ᠃ ᠢᠩᠭᠢᠭᠡᠳ ᠬᠠᠭᠠᠨ ᠪᠣᠯᠣᠨ ᠬᠠᠮᠠᠨ ᠡᠰᠲ᠋ᠧᠷ ᠤᠨ ᠪᠡᠯᠡᠳᠦᠭᠰᠡᠨ ᠨᠠᠢᠷ ᠲᠤ ᠣᠴᠢᠪᠠ᠃ 6 ᠬᠠᠭᠠᠨ ᠳᠠᠷᠠᠰᠤ ᠤᠤᠭᠤᠵᠤ ᠪᠠᠢᠬᠤ ᠳᠠᠭᠠᠨ ᠡᠰᠲ᠋ᠧᠷ ᠲᠤ᠄ 《ᠴᠢᠨᠦ ᠭᠤᠶᠤᠯᠲᠠ ᠶᠠᠭᠤ ᠪᠤᠢ︖ ᠴᠢᠮᠠ ᠳᠤ ᠥᠭᠭᠥᠶᠡ᠃ ᠴᠢᠨᠦ ᠬᠦᠰᠡᠯᠲᠡ ᠶᠠᠭᠤ ᠪᠤᠢ︖ ᠬᠠᠭᠠᠨᠴᠢᠯᠠᠯ ᠤᠨ ᠲᠠᠯᠠ ᠨᠢ ᠴᠤ ᠪᠣᠯᠣᠨᠠ》 ᠭᠡᠵᠡᠢ᠃ 7 ᠡᠰᠲ᠋ᠧᠷ ᠬᠠᠷᠢᠭᠤ ᠳᠤᠨᠢ᠄ 《ᠮᠢᠨᠦ ᠭᠤᠶᠤᠯᠲᠠ ᠪᠠ ᠬᠦᠰᠡᠯᠲᠡ ᠭᠡᠨᠡ ᠤᠤ︖ 8 ᠬᠡᠷᠪᠡ ᠪᠢ ᠬᠠᠭᠠᠨ ᠤ ᠲᠠᠭᠠᠯᠠᠯ ᠢ ᠣᠯᠵᠤ᠂ ᠬᠡᠷᠪᠡ ᠬᠠᠭᠠᠨ ᠭᠤᠶᠤᠯᠲᠠ ᠶᠢ ᠮᠢᠨᠢ ᠵᠥᠪᠰᠢᠶᠡᠷᠡᠵᠦ᠂ ᠬᠦᠰᠡᠭᠰᠡᠨ ᠢ ᠮᠢᠨᠢ ᠪᠡᠶᠡᠯᠡᠭᠦᠯᠬᠦ ᠶᠢ ᠲᠠᠭᠠᠯᠠᠪᠠᠯ᠂ ᠮᠠᠷᠭᠠᠰᠢ ᠴᠤ ᠮᠢᠨᠦ ᠪᠡᠯᠡᠳᠬᠦ ᠨᠠᠢᠷ ᠲᠤ ᠬᠠᠮᠠᠨ ᠲᠠᠢ ᠬᠠᠮᠲᠤ ᠢᠷᠡᠨᠡ ᠤᠤ︖ ᠲᠡᠭᠡᠪᠡᠯ ᠪᠢ ᠬᠠᠭᠠᠨ ᠤ ᠠᠰᠠᠭᠤᠭᠰᠠᠨ ᠢ ᠬᠠᠷᠢᠭᠤᠯᠤᠶᠠ》 ᠭᠡᠪᠡ᠃
9 ᠲᠡᠷᠡ ᠡᠳᠦᠷ ᠬᠠᠮᠠᠨ ᠪᠠᠶᠠᠷ ᠬᠥᠷ ᠲᠡᠢ ᠪᠠᠷ ᠭᠠᠷᠴᠤ ᠶᠠᠪᠤᠯᠠ᠃ ᠭᠡᠲᠡᠯᠡ ᠮᠣᠷᠳᠧᠺᠠᠢ ᠬᠠᠭᠠᠨ ᠤ ᠬᠠᠭᠠᠯᠭᠠᠨ ᠳᠡᠷᠭᠡᠳᠡ ᠥᠪᠡᠷ ᠦᠨ ᠬᠢᠨᠢ ᠡᠮᠦᠨᠡ ᠪᠣᠰᠬᠤ ᠴᠤ ᠦᠭᠡᠢ᠂ ᠰᠦᠷᠳᠡᠬᠦ ᠴᠤ ᠦᠭᠡᠢ ᠪᠠᠢᠭᠠ ᠶᠢ ᠬᠠᠷᠠᠭᠠᠳ ᠲᠡᠭᠦᠨ ᠦ ᠤᠯᠠᠮ ᠢᠶᠠᠷ ᠶᠡᠬᠡᠳᠡ ᠬᠢᠯᠢᠩᠨᠡᠪᠡ᠃ 10 ᠭᠡᠪᠡᠴᠦ ᠬᠠᠮᠠᠨ ᠪᠡᠶᠡ ᠪᠡᠨ ᠪᠠᠷᠢᠵᠤ᠂ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠠᠨᠳᠠ ᠨᠥᠬᠥᠳ ᠪᠣᠯᠣᠨ ᠡᠬᠡᠨᠡᠷ ᠽᠧᠷᠧᠱ ᠢᠶᠠᠨ ᠳᠠᠭᠤᠳᠠᠨ ᠢᠷᠡᠭᠦᠯᠪᠡ᠃ 11 ᠬᠠᠮᠠᠨ ᠲᠡᠳᠡᠨ ᠳᠦ ᠡᠳ᠋ ᠪᠠᠶᠠᠯᠢᠭ ᠤᠨ ᠢᠶᠠᠨ ᠰᠦᠷ ᠵᠢᠪᠬᠤᠯᠠᠩ ᠪᠠ ᠬᠥᠪᠡᠭᠦᠳ ᠦᠨ ᠢᠶᠠᠨ ᠥᠨᠢᠷ ᠣᠯᠠᠨ᠂ ᠮᠥᠨ ᠬᠠᠭᠠᠨ ᠤ ᠥᠪᠡᠷ ᠢ ᠨᠢ ᠡᠷᠭᠦᠮᠵᠢᠯᠡᠭᠰᠡᠨ ᠬᠢᠭᠡᠳ ᠪᠤᠰᠤᠳ ᠨᠣᠶᠠᠳ ᠲᠦᠰᠢᠮᠡᠳ ᠡᠴᠡ ᠳᠡᠭᠡᠭᠦᠷ ᠳᠡᠪᠰᠢᠭᠦᠯᠦᠭᠰᠡᠨ ᠲᠠᠯᠠ ᠪᠠᠷ ᠪᠦᠬᠦᠨ ᠢ ᠶᠠᠷᠢᠪᠠ᠃ 12 ᠬᠠᠮᠠᠨ᠄ 《ᠡᠭᠦᠨ ᠢᠶᠡᠷ ᠪᠠᠷᠠᠬᠤ ᠦᠭᠡᠢ᠂ ᠡᠰᠲ᠋ᠧᠷ ᠬᠠᠲᠤᠨ ᠪᠡᠯᠡᠳᠦᠭᠰᠡᠨ ᠨᠠᠢᠷ ᠲᠠᠭᠠᠨ ᠬᠠᠭᠠᠨ ᠲᠠᠢ ᠬᠠᠮᠲᠤ ᠭᠠᠭᠴᠠ ᠨᠠᠮᠠᠶᠢ ᠤᠷᠢᠭᠰᠠᠨ᠂ ᠲᠡᠷᠡ ᠮᠠᠷᠭᠠᠰᠢ ᠴᠤ ᠨᠠᠮᠠᠶᠢ ᠬᠠᠭᠠᠨ ᠲᠠᠢ ᠬᠠᠮᠲᠤ ᠤᠷᠢᠭᠰᠠᠨ ᠰᠢᠦ᠃ 13 ᠬᠠᠷᠢᠨ ᠪᠢ ᠶᠦᠳᠠᠢ ᠬᠥᠮᠦᠨ ᠮᠣᠷᠳᠧᠺᠠᠢ ᠶᠢᠨ ᠬᠠᠭᠠᠨ ᠤ ᠬᠠᠭᠠᠯᠭᠠᠨ ᠳᠡᠷᠭᠡᠳᠡ ᠰᠠᠭᠤᠭᠠ ᠶᠢ ᠬᠠᠷᠠᠬᠤ ᠪᠦᠷᠢ ᠡᠨᠡ ᠪᠦᠬᠦᠨ ᠨᠠᠳᠠ ᠳᠤ ᠳᠡᠮᠡᠢ ᠰᠠᠨᠠᠭᠳᠠᠭᠠᠳ ᠪᠠᠢᠨᠠ》 ᠭᠡᠪᠡ᠃ 14 ᠲᠡᠭᠡᠲᠡᠯᠡ ᠡᠬᠡᠨᠡᠷ ᠽᠧᠷᠧᠱ ᠪᠣᠯᠣᠨ ᠠᠨᠳᠠ ᠨᠥᠬᠥᠳ ᠨᠢ ᠪᠦᠭᠦᠳᠡ ᠪᠡᠷ᠄ 《ᠲᠠᠪᠢᠨ ᠲᠣᠬᠣᠢ ᠥᠨᠳᠥᠷ ᠳᠡᠭᠦᠵᠢᠯᠡᠭᠦᠷ ᠬᠢᠯᠭᠡᠭᠡᠳ ᠮᠣᠷᠳᠧᠺᠠᠢ ᠶᠢ ᠲᠡᠭᠦᠨ ᠳᠡᠭᠡᠷᠡ ᠳᠡᠭᠦᠵᠢᠯᠡᠬᠦ ᠶᠢ ᠮᠠᠷᠭᠠᠰᠢ ᠥᠷᠯᠥᠭᠡ ᠬᠠᠭᠠᠨ ᠠᠴᠠ ᠭᠤᠶᠤ᠃ ᠲᠡᠭᠡᠭᠡᠳ ᠬᠠᠭᠠᠨ ᠲᠠᠢ ᠬᠠᠮᠲᠤ ᠨᠠᠢᠷ ᠲᠤ ᠰᠠᠨᠠᠭᠠ ᠠᠮᠤᠷ ᠣᠴᠢᠭᠠᠷᠠᠢ︕》 ᠭᠡᠬᠦ ᠳᠦ᠂ ᠡᠨᠡ ᠵᠥᠪᠯᠡᠯᠭᠡ ᠬᠠᠮᠠᠨ ᠳᠤ ᠲᠠᠭᠠᠯᠠᠭᠳᠠᠵᠤ᠂ ᠲᠡᠷᠡ ᠪᠡᠷ ᠳᠡᠭᠦᠵᠢᠯᠡᠭᠦᠷ ᠬᠢᠯᠭᠡᠪᠡ᠃