ᠡᠰᠲ᠋ᠧᠷ ᠬᠣᠶᠠᠷ
ᠡᠰᠲ᠋ᠧᠷ ᠬᠠᠲᠤᠨ ᠪᠣᠯᠪᠠ
1 ᠡᠳᠡᠭᠡᠷ ᠦᠨ ᠳᠠᠷᠠᠭᠠ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠶᠢᠨ ᠠᠭᠤᠷ ᠨᠠᠮᠳᠠᠬᠤ ᠳᠤ᠂ ᠲᠡᠷᠡ ᠸᠠᠱᠲ᠋ᠢ ᠬᠢᠭᠡᠳ ᠲᠡᠭᠦᠨ ᠦ ᠬᠢᠭᠰᠡᠨ ᠶᠠᠪᠤᠳᠠᠯ᠂ ᠮᠥᠨ ᠲᠡᠭᠦᠨ ᠦ ᠲᠠᠯᠠ ᠪᠠᠷ ᠭᠠᠷᠭᠠᠭᠰᠠᠨ ᠵᠠᠷᠯᠢᠭ ᠢᠶᠠᠨ ᠡᠷᠭᠢᠨ ᠰᠠᠨᠠᠪᠠ᠃ 2 ᠬᠠᠭᠠᠨ ᠤ ᠪᠠᠷᠠ ᠪᠣᠯᠣᠭᠴᠢᠳ ᠲᠡᠭᠦᠨ ᠳᠦ᠄ 《ᠬᠠᠭᠠᠨ ᠲᠠᠨ ᠳᠤ ᠦᠵᠡᠰᠬᠦᠯᠡᠩ ᠭᠤᠸᠠ ᠣᠩ᠋ᠭᠣᠨ ᠥᠬᠢᠳ ᠢ ᠡᠷᠢᠵᠦ ᠠᠪᠴᠢᠷᠠᠶᠠ᠃ 3 ᠬᠠᠭᠠᠨ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠪᠦᠬᠦ ᠮᠤᠵᠢ ᠳᠤ ᠲᠥᠯᠥᠭᠡᠯᠡᠭᠴᠢᠳ ᠢᠶᠠᠨ ᠲᠣᠮᠢᠯᠠᠵᠤ᠂ ᠦᠵᠡᠰᠬᠦᠯᠡᠩ ᠭᠤᠸᠠ ᠣᠩ᠋ᠭᠣᠨ ᠥᠬᠢᠳ ᠢ ᠰᠦᠰᠠ ᠰᠢᠯᠲᠦᠭᠡᠨ ᠳᠠᠬᠢ ᠡᠮᠡᠭᠲᠡᠢᠴᠦᠳ ᠦᠨ ᠥᠷᠭᠥᠭᠡ ᠤᠷᠤᠭᠤ ᠠᠪᠴᠢᠷᠠᠭᠤᠯᠤᠭᠠᠳ ᠥᠷᠭᠥᠭᠡᠨ ᠦ ᠡᠮᠡᠭᠲᠡᠢᠴᠦᠳ ᠢ ᠬᠠᠷᠢᠭᠤᠴᠠᠳᠠᠭ ᠬᠠᠭᠠᠨ ᠤ ᠲᠠᠢᠭᠠᠨ ᠾᠧᠭᠠᠢ ᠶᠢᠨ ᠮᠡᠳᠡᠯ ᠳᠦ ᠣᠷᠣᠭᠤᠯᠵᠤ᠂ ᠲᠡᠳᠡᠨ ᠳᠦ ᠣ ᠡᠩᠭᠡᠰᠬᠡ ᠬᠠᠩ᠋ᠭᠠᠨᠠ ᠤᠤ︖ 4 ᠲᠡᠭᠡᠭᠡᠳ ᠬᠠᠭᠠᠨ ᠤ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠭᠳᠠᠬᠤ ᠵᠠᠯᠠᠭᠤ ᠡᠮᠡᠭᠲᠡᠢ ᠶᠢ ᠸᠠᠱᠲ᠋ᠢ ᠶᠢᠨ ᠣᠷᠣᠨ ᠳᠤ ᠬᠠᠲᠤᠨ ᠪᠣᠯᠭᠠᠶᠠ》 ᠭᠡᠵᠦ ᠬᠡᠯᠡᠪᠡ᠃ ᠡᠨᠡ ᠦᠭᠡ ᠬᠠᠭᠠᠨ ᠤ ᠲᠠᠭᠠᠯᠠᠯ ᠳᠤ ᠨᠡᠢᠴᠡᠭᠰᠡᠨ ᠪᠥᠭᠡᠳ ᠲᠡᠷᠡ ᠲᠡᠢᠨ ᠬᠦ ᠦᠢᠯᠡᠳᠪᠡ᠃
5 ᠲᠡᠷᠡ ᠦᠶᠡ ᠳᠦ ᠰᠦᠰᠠ ᠰᠢᠯᠲᠦᠭᠡᠨ ᠳᠦ ᠮᠣᠷᠳᠧᠺᠠᠢ ᠭᠡᠭᠴᠢ ᠶᠦᠳᠠᠢ ᠬᠥᠮᠦᠨ ᠪᠠᠢᠪᠠ᠃ ᠲᠡᠷᠡ ᠪᠣᠯ ᠪᠢᠨᠶᠠᠮᠢᠨ ᠬᠥᠮᠦᠨ ᠺᠢᠱ ᠤᠨ ᠵᠢᠴᠢ᠂ ᠱᠢᠮᠧᠶᠢ ᠶᠢᠨ ᠠᠴᠢ᠂ ᠶᠠᠢᠷ ᠤᠨ ᠬᠦᠦ ᠪᠢᠯᠡ᠃ 6 ᠺᠢᠱ ᠪᠣᠯ ᠪᠠᠪᠢᠯᠣᠨ ᠤ ᠬᠠᠭᠠᠨ ᠨᠧᠪᠦ᠋ᠺᠠᠨᠧᠽᠠᠷ ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠺᠣᠨᠢᠶᠠ ᠶᠢ ᠠᠷᠠᠳ ᠣᠯᠠᠨ ᠲᠠᠢ ᠨᠢ ᠬᠠᠮᠲᠤ ᠣᠯᠵᠠᠯᠠᠵᠤ᠂ ᠶᠧᠷᠦ᠋ᠰᠠᠯᠧᠮ ᠡᠴᠡ ᠴᠥᠯᠡᠬᠦ ᠳᠦ ᠢᠷᠡᠭᠰᠡᠨ ᠬᠥᠮᠦᠨ ᠶᠤᠮ᠃ 7 ᠮᠣᠷᠳᠧᠺᠠᠢ ᠳᠤ ᠬᠠᠳᠠᠰᠠ ᠪᠤᠶᠤ ᠡᠰᠲ᠋ᠧᠷ ᠭᠡᠳᠡᠭ ᠭᠤᠸᠠᠯᠢᠭ ᠰᠠᠢᠬᠠᠨ ᠥᠬᠢᠨ ᠲᠠᠢ ᠪᠠᠢᠪᠠ᠃ ᠲᠡᠷᠡ ᠪᠣᠯ ᠠᠪᠠᠭᠠ ᠶᠢᠨ ᠬᠢᠨᠢ ᠥᠬᠢᠨ ᠪᠥᠭᠡᠳ ᠡᠴᠢᠭᠡ ᠡᠬᠡ ᠨᠢ ᠦᠭᠡᠢ ᠪᠣᠯᠬᠣᠷ ᠮᠣᠷᠳᠧᠺᠠᠢ ᠲᠡᠭᠦᠨ ᠢ ᠥᠰᠭᠡᠨ ᠬᠥᠮᠦᠵᠢᠭᠦᠯᠵᠦ ᠪᠠᠢᠪᠠ᠃ ᠡᠴᠢᠭᠡ ᠡᠬᠡ ᠨᠢ ᠥᠭᠡᠳᠡ ᠪᠣᠯᠬᠤ ᠳᠤ᠂ ᠮᠣᠷᠳᠧᠺᠠᠢ ᠲᠡᠭᠦᠨ ᠢ ᠥᠬᠢᠨ ᠢᠶᠠᠨ ᠪᠣᠯᠭᠠᠵᠤ ᠠᠪᠤᠭᠰᠠᠨ ᠶᠤᠮ᠃
8 ᠬᠠᠭᠠᠨ ᠤ ᠲᠤᠰᠢᠶᠠᠯ ᠵᠠᠷᠯᠢᠭ ᠲᠤᠩ᠋ᠬᠠᠭᠯᠠᠭᠳᠠᠬᠤ ᠳᠤ᠂ ᠣᠯᠠᠨ ᠥᠬᠢᠳ ᠰᠦᠰᠠ ᠰᠢᠯᠲᠦᠭᠡᠨ ᠳᠦ ᠴᠤᠭᠯᠠᠷᠠᠵᠤ᠂ ᠾᠧᠭᠠᠢ ᠶᠢᠨ ᠮᠡᠳᠡᠯ ᠳᠦ ᠣᠷᠣᠵᠠᠢ᠃ ᠡᠰᠲ᠋ᠧᠷ ᠴᠤ ᠬᠠᠭᠠᠨ ᠤ ᠣᠷᠳᠣᠨ ᠤᠷᠤᠭᠤ ᠠᠪᠠᠴᠢᠭᠳᠠᠨ ᠣᠷᠳᠣᠨ ᠤ ᠡᠮᠡᠭᠲᠡᠢᠴᠦᠳ ᠢ ᠬᠠᠷᠢᠭᠤᠴᠠᠳᠠᠭ ᠾᠧᠭᠠᠢ ᠶᠢᠨ ᠮᠡᠳᠡᠯ ᠳᠦ ᠣᠷᠣᠵᠠᠢ᠃ 9 ᠡᠨᠡ ᠵᠠᠯᠠᠭᠤ ᠥᠬᠢᠨ ᠲᠡᠭᠦᠨ ᠦ ᠰᠡᠳᠬᠢᠯ ᠳᠤ ᠨᠡᠢᠴᠡᠵᠦ᠂ ᠲᠠᠭᠠᠯᠠᠯ ᠢ ᠨᠢ ᠣᠯᠪᠠ᠃ ᠾᠧᠭᠠᠢ ᠲᠡᠭᠦᠨ ᠦ ᠣ ᠡᠩᠭᠡᠰᠬᠡ ᠪᠣᠯᠣᠨ ᠬᠣᠭᠣᠯᠠ ᠬᠦᠨᠡᠰᠦ ᠶᠢ ᠶᠠᠭᠠᠷᠠᠯᠲᠠᠢ ᠬᠠᠩ᠋ᠭᠠᠵᠤ᠂ ᠬᠠᠭᠠᠨ ᠤ ᠣᠷᠳᠣᠨ ᠠᠴᠠ ᠳᠣᠯᠣᠭᠠᠨ ᠰᠢᠪᠡᠭᠴᠢᠨ ᠰᠢᠯᠢᠵᠦ ᠥᠭᠭᠥᠭᠡᠳ᠂ ᠲᠡᠭᠦᠨ ᠢ ᠪᠣᠯᠣᠨ ᠰᠢᠪᠡᠭᠴᠢᠳ ᠢ ᠨᠢ ᠡᠮᠡᠭᠲᠡᠢᠴᠦᠳ ᠦᠨ ᠥᠷᠭᠥᠭᠡᠨ ᠦ ᠬᠠᠮᠤᠭ ᠤᠨ ᠰᠠᠢᠨ ᠭᠠᠵᠠᠷ ᠲᠤ ᠰᠢᠯᠵᠢᠭᠦᠯᠪᠡ᠃
10 ᠡᠰᠲ᠋ᠧᠷ ᠦᠨᠳᠦᠰᠦᠲᠡᠨ᠂ ᠤᠭᠰᠠᠭᠠ ᠪᠠᠨ ᠮᠡᠳᠡᠭᠦᠯᠦᠭᠰᠡᠨ ᠦᠭᠡᠢ᠃ ᠡᠳᠡᠭᠡᠷ ᠢ ᠶᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠮᠣᠷᠳᠧᠺᠠᠢ ᠵᠠᠬᠢᠭᠰᠠᠨ ᠪᠠᠢᠯᠠ᠃ 11 ᠮᠣᠷᠳᠧᠺᠠᠢ ᠡᠰᠲ᠋ᠧᠷ ᠤᠨ ᠠᠮᠤᠷ ᠮᠡᠨᠳᠦ ᠡᠰᠡᠬᠦ ᠪᠣᠯᠣᠨ ᠶᠠᠭᠤ ᠲᠣᠬᠢᠶᠠᠯᠳᠤᠵᠤ ᠪᠠᠢᠭᠠ ᠶᠢ ᠨᠢ ᠮᠡᠳᠡᠬᠦ ᠭᠡᠵᠦ ᠡᠮᠡᠭᠲᠡᠢᠴᠦᠳ ᠦᠨ ᠥᠷᠭᠥᠭᠡᠨ ᠦ ᠬᠠᠰᠢᠶᠠᠨ ᠤ ᠡᠮᠦᠨᠡᠭᠦᠷ ᠡᠳᠦᠷ ᠪᠦᠷᠢ ᠬᠣᠯᠬᠢᠳᠠᠭ ᠪᠠᠢᠪᠠ᠃
12 ᠥᠬᠢᠨ ᠪᠦᠷᠢ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠤᠷᠤᠭᠤ ᠣᠴᠢᠬᠤ ᠡᠭᠡᠯᠵᠢ ᠪᠣᠯᠬᠤ ᠶᠢᠨ ᠡᠮᠦᠨᠡ᠂ ᠲᠣᠭᠲᠠᠭᠠᠯ ᠤᠨ ᠳᠠᠭᠠᠤ ᠵᠢᠷᠭᠤᠭᠠᠨ ᠰᠠᠷᠠ ᠮᠢᠷᠷᠠ ᠶᠢᠨ ᠲᠣᠰᠣ ᠪᠠᠷ᠂ ᠳᠠᠬᠢᠨ ᠵᠢᠷᠭᠤᠭᠠᠨ ᠰᠠᠷᠠ ᠦᠨᠦᠷᠲᠡᠨ ᠪᠠ ᠣ ᠡᠩᠭᠡᠰᠬᠡ ᠪᠡᠷ ᠨᠡᠢᠲᠡ ᠠᠷᠪᠠᠨ ᠬᠣᠶᠠᠷ ᠰᠠᠷᠠ ᠶᠢᠨ ᠭᠤᠸᠠ ᠰᠠᠢᠬᠠᠨ ᠤ ᠪᠡᠯᠡᠳᠬᠡᠯ ᠭᠦᠢᠴᠡᠭᠡᠬᠦ ᠶᠣᠰᠣᠲᠠᠢ ᠪᠠᠢᠪᠠ᠃ 13 ᠥᠬᠢᠨ ᠪᠦᠷᠢ ᠬᠠᠭᠠᠨ ᠤ ᠳᠡᠷᠭᠡᠳᠡ ᠣᠴᠢᠬᠤ ᠳᠠᠭᠠᠨ ᠬᠠᠭᠠᠨ ᠤ ᠥᠷᠭᠥᠭᠡ ᠤᠷᠤᠭᠤ ᠠᠪᠴᠤ ᠶᠠᠪᠤᠬᠤ ᠶᠢ ᠬᠦᠰᠡᠭᠰᠡᠨ ᠪᠣᠯᠭᠠᠨ ᠢᠶᠠᠨ ᠡᠮᠡᠭᠲᠡᠢᠴᠦᠳ ᠦᠨ ᠥᠷᠭᠥᠭᠡ ᠡᠴᠡ ᠠᠪᠴᠤ ᠪᠣᠯᠬᠤ ᠪᠠᠢᠪᠠ᠃ 14 ᠥᠬᠢᠳ ᠣᠷᠣᠢ ᠨᠢ ᠣᠴᠢᠪᠠᠯ᠂ ᠥᠷᠯᠥᠭᠡ ᠨᠢ ᠡᠮᠡᠭᠲᠡᠢᠴᠦᠳ ᠦᠨ ᠬᠣᠶᠠᠳᠠᠬᠢ ᠥᠷᠭᠥᠭᠡ ᠤᠷᠤᠭᠤ ᠪᠤᠴᠠᠵᠤ᠂ ᠲᠠᠲᠠᠪᠤᠷᠢ ᠨᠤᠭᠤᠳ ᠢ ᠬᠠᠷᠢᠭᠤᠴᠠᠳᠠᠭ ᠬᠠᠭᠠᠨ ᠤ ᠲᠠᠢᠭᠠᠨ ᠱᠠᠰᠢᠭᠠᠽ ᠤᠨ ᠮᠡᠳᠡᠯ ᠳᠦ ᠣᠷᠣᠳᠠᠭ ᠪᠠᠢᠯᠠ᠃ ᠬᠠᠭᠠᠨ ᠲᠡᠷᠡ ᠡᠮᠡᠭᠲᠡᠢ ᠶᠢ ᠬᠦᠰᠡᠨ ᠲᠠᠭᠠᠯᠠᠵᠤ᠂ ᠨᠡᠷᠡ ᠶᠢ ᠨᠢ ᠳᠠᠭᠤᠳᠠᠬᠤ ᠠᠴᠠ ᠨᠠᠰᠢ ᠲᠡᠷᠡ ᠳᠠᠬᠢᠨ ᠬᠠᠭᠠᠨ ᠳᠤ ᠪᠠᠷᠠᠭᠠᠯᠬᠠᠳᠠᠭ ᠦᠭᠡᠢ ᠠᠵᠢ᠃
15 ᠮᠣᠷᠳᠧᠺᠠᠢ ᠶᠢᠨ ᠥᠬᠢᠨ ᠢᠶᠠᠨ ᠪᠣᠯᠭᠠᠵᠤ ᠠᠪᠤᠭᠰᠠᠨ᠂ ᠲᠡᠭᠦᠨ ᠦ ᠠᠪᠠᠭᠠ ᠠᠪᠢᠬᠠᠢᠯ ᠤᠨ ᠥᠬᠢᠨ ᠡᠰᠲ᠋ᠧᠷ ᠤᠨ ᠬᠠᠭᠠᠨ ᠤ ᠳᠡᠷᠭᠡᠳᠡ ᠣᠴᠢᠬᠤ ᠡᠭᠡᠯᠵᠢ ᠪᠣᠯᠬᠤ ᠳᠤ᠂ ᠡᠮᠡᠭᠲᠡᠢᠴᠦᠳ ᠢ ᠬᠠᠷᠢᠭᠤᠴᠠᠳᠠᠭ ᠬᠠᠭᠠᠨ ᠤ ᠲᠠᠢᠭᠠᠨ ᠾᠧᠭᠠᠢ ᠶᠢᠨ ᠵᠥᠪᠯᠡᠨ ᠬᠡᠯᠡᠭᠰᠡᠨ ᠡᠴᠡ ᠥᠭᠡᠷᠡ ᠵᠦᠢᠯ ᠢ ᠲᠡᠷᠡ ᠬᠦᠰᠡᠭᠰᠡᠨ ᠦᠭᠡᠢ᠃ ᠡᠰᠲ᠋ᠧᠷ ᠥᠪᠡᠷ ᠢ ᠨᠢ ᠬᠠᠷᠠᠭᠰᠠᠨ ᠪᠦᠬᠦᠨ ᠦ ᠨᠢᠳᠦᠨ ᠳᠦ ᠲᠠᠭᠠᠯᠠᠯ ᠢ ᠣᠯᠵᠤ ᠪᠠᠢᠯᠠ᠃ 16 ᠠᠬᠠᠰᠦ᠋ᠶᠧᠷᠦ᠋ ᠬᠠᠭᠠᠨ ᠤ ᠳᠣᠯᠣᠳᠤᠭᠠᠷ ᠣᠨ ᠤ ᠲᠧᠪᠧᠲ ᠪᠤᠶᠤ ᠠᠷᠪᠠᠳᠤᠭᠠᠷ ᠰᠠᠷᠠ ᠳᠤ᠂ ᠡᠰᠲ᠋ᠧᠷ ᠬᠠᠭᠠᠨ ᠤ ᠥᠷᠭᠥᠭᠡᠨ ᠳᠦ ᠠᠬᠠᠰᠦ᠋ᠶᠧᠷᠦ᠋ ᠬᠠᠭᠠᠨ ᠳᠤ ᠳᠠᠭᠤᠳᠠᠭᠳᠠᠪᠠ᠃
17 ᠬᠠᠭᠠᠨ ᠡᠰᠲ᠋ᠧᠷ ᠢ ᠪᠤᠰᠤᠳ ᠡᠮᠡᠭᠲᠡᠢ ᠡᠴᠡ ᠢᠯᠡᠭᠦᠦ ᠬᠠᠢᠷᠠᠯᠠᠵᠤ᠂ ᠡᠰᠲ᠋ᠧᠷ ᠲᠡᠭᠦᠨ ᠦ ᠨᠢᠳᠦᠨ ᠳᠦ ᠪᠤᠰᠤᠳ ᠪᠦᠬᠦ ᠣᠩ᠋ᠭᠣᠨ ᠥᠬᠢᠨ ᠡᠴᠡ ᠢᠯᠡᠭᠦᠦ ᠲᠠᠭᠠᠯᠠᠯ ᠪᠠ ᠡᠨᠡᠷᠢᠯ ᠢ ᠨᠢ ᠣᠯᠣᠭᠰᠠᠨ ᠲᠤᠯᠠ ᠬᠠᠭᠠᠨ ᠡᠰᠲ᠋ᠧᠷ ᠤᠨ ᠲᠣᠯᠣᠭᠠᠢ ᠳᠤ ᠬᠠᠲᠤᠨ ᠤ ᠲᠢᠲᠢᠮ ᠵᠡᠭᠦᠯᠭᠡᠵᠦ᠂ ᠸᠠᠱᠲ᠋ᠢ ᠶᠢᠨ ᠣᠷᠣᠨ ᠳᠤ ᠬᠠᠲᠤᠨ ᠪᠣᠯᠭᠠᠪᠠ᠃ 18 ᠳᠠᠷᠠᠭᠠ ᠨᠢ ᠬᠠᠭᠠᠨ ᠪᠦᠬᠦ ᠨᠣᠶᠠᠨ ᠲᠦᠰᠢᠮᠡᠯ ᠳᠡᠭᠡᠨ ᠵᠣᠷᠢᠭᠤᠯᠤᠨ 《ᠡᠰᠲ᠋ᠧᠷ ᠤᠨ ᠶᠡᠬᠡ ᠨᠠᠢᠷ》 ᠬᠢᠵᠦ᠂ ᠮᠥᠨ ᠮᠤᠵᠢ ᠨᠤᠭᠤᠳ ᠲᠤ ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠲᠤᠩ᠋ᠬᠠᠭᠯᠠᠨ᠂ ᠬᠠᠭᠠᠨ ᠤ ᠬᠡᠰᠢᠭ ᠪᠦᠬᠦᠢ ᠪᠡᠯᠡᠭ ᠰᠡᠯᠲᠡ ᠲᠠᠷᠬᠠᠭᠠᠪᠠ᠃
ᠮᠣᠷᠳᠧᠺᠠᠢ ᠶᠢᠨ ᠭᠠᠪᠢᠶᠠ
19 ᠣᠩ᠋ᠭᠣᠨ ᠥᠬᠢᠳ ᠢ ᠬᠣᠶᠠᠳᠠᠬᠢ ᠤᠳᠠᠭᠠ ᠴᠤᠭᠯᠠᠭᠤᠯᠬᠤ ᠳᠤ᠂ ᠮᠣᠷᠳᠧᠺᠠᠢ ᠬᠠᠭᠠᠨ ᠤ ᠬᠠᠭᠠᠯᠭᠠᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠯᠠ᠃ 20 ᠮᠣᠷᠳᠧᠺᠠᠢ ᠶᠢᠨ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠡᠰᠲ᠋ᠧᠷ ᠤᠭᠰᠠᠭᠠ᠂ ᠦᠨᠳᠦᠰᠦᠲᠡᠨ ᠢᠶᠡᠨ ᠮᠡᠳᠡᠭᠦᠯᠦᠭᠰᠡᠨ ᠦᠭᠡᠢ᠃ ᠡᠰᠲ᠋ᠧᠷ ᠮᠣᠷᠳᠧᠺᠠᠢ ᠶᠢᠨ ᠦᠭᠡ ᠶᠢ ᠲᠡᠭᠦᠨ ᠦ ᠬᠠᠯᠠᠮᠵᠢᠨ ᠳᠤ ᠪᠠᠢᠬᠤ ᠦᠶᠡ ᠶᠢᠨ ᠬᠢ ᠰᠢᠭ ᠢᠶᠠᠨ ᠳᠠᠭᠠᠵᠤ ᠪᠠᠢᠪᠠ᠃
21 ᠲᠡᠷᠡ ᠡᠳᠦᠷ ᠤᠳ ᠲᠤ ᠮᠣᠷᠳᠧᠺᠠᠢ ᠬᠠᠭᠠᠨ ᠤ ᠬᠠᠭᠠᠯᠭᠠᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠬᠤ ᠳᠤ᠂ ᠬᠠᠭᠠᠨ ᠤ ᠬᠠᠭᠠᠯᠭᠠᠴᠢ ᠲᠠᠢᠭᠠᠨ ᠪᠢᠭᠲ᠋ᠠᠨᠠ᠂ ᠲᠧᠷᠧᠱ ᠬᠣᠶᠠᠷ ᠬᠠᠭᠠᠨ ᠠᠬᠠᠰᠦ᠋ᠶᠧᠷᠦ᠋ ᠳᠤ ᠥᠰᠢᠶᠡᠷᠬᠡᠨ ᠲᠡᠭᠦᠨ ᠦ ᠠᠮᠢ ᠶᠢ ᠬᠥᠨᠥᠭᠡᠬᠦ ᠪᠡᠷ ᠬᠤᠤᠪᠢᠯᠳᠤᠪᠠ᠃ 22 ᠮᠣᠷᠳᠧᠺᠠᠢ ᠡᠨᠡ ᠶᠠᠪᠤᠳᠠᠯ ᠢ ᠮᠡᠳᠡᠭᠡᠳ ᠡᠰᠲ᠋ᠧᠷ ᠬᠠᠲᠤᠨ ᠳᠤ ᠮᠡᠳᠡᠭᠳᠡᠬᠦ ᠳᠦ᠂ ᠡᠰᠲ᠋ᠧᠷ ᠡᠭᠦᠨ ᠢ ᠮᠣᠷᠳᠧᠺᠠᠢ ᠶᠢᠨ ᠨᠡᠷᠡ ᠪᠡᠷ ᠬᠠᠭᠠᠨ ᠳᠤ ᠬᠡᠯᠡᠪᠡ᠃ 23 ᠬᠠᠭᠠᠨ ᠲᠡᠷᠡ ᠬᠡᠷᠡᠭ ᠢ ᠰᠢᠯᠭᠠᠭᠤᠯᠵᠤ᠂ ᠦᠨᠡᠨ ᠪᠣᠯᠬᠤ ᠶᠢ ᠮᠡᠳᠡᠭᠡᠳ ᠲᠡᠳᠡ ᠬᠣᠶᠠᠷ ᠢ ᠳᠡᠭᠦᠵᠢᠯᠡᠭᠦᠷ ᠲᠦ ᠳᠡᠭᠦᠵᠢᠯᠡᠪᠡ᠃ ᠡᠨᠡ ᠶᠠᠪᠤᠳᠠᠯ ᠬᠠᠭᠠᠨ ᠤ ᠡᠮᠦᠨᠡ ᠬᠠᠭᠠᠨ ᠤ ᠨᠠᠮᠲᠠᠷ ᠲᠤ ᠪᠢᠴᠢᠭᠳᠡᠭᠰᠡᠨ ᠪᠠᠢᠯᠠ᠃