ᠢᠰᠠᠢᠶᠠ ᠬᠣᠷᠢᠨ ᠭᠤᠷᠪᠠ
ᠲᠢᠷ ᠤᠨ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
1 ᠲᠢᠷ ᠤᠨ ᠲᠤᠬᠠᠢ ᠰᠡᠷᠡᠮᠵᠢᠯᠡᠭᠦᠯᠦᠯᠭᠡ᠃ ᠲᠠᠷᠱᠢᠱ ᠤᠨ ᠬᠥᠯᠭᠡ ᠣᠩ᠋ᠭᠣᠴᠠ ᠨᠤᠭᠤᠳ ᠡ᠂ ᠤᠬᠢᠯᠠᠭᠲᠤᠨ︕ ᠲᠢᠷ ᠤᠰᠠᠳᠴᠤ᠂ ᠣᠷᠣᠨ ᠪᠠᠢᠷᠢ ᠦᠭᠡᠢ᠂ ᠣᠷᠣᠩᠨᠠᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠪᠠ ᠲᠡᠳᠡ ᠪᠤᠴᠠᠬᠤ ᠳᠤ᠂ ᠰᠠᠢᠫᠷᠦ᠋ᠰ ᠭᠠᠵᠠᠷ ᠠᠴᠠ ᠡᠨᠡ ᠮᠡᠳᠡᠭᠡ ᠢᠷᠡᠵᠡᠢ᠃
2 ᠲᠠᠩᠭᠢᠰ ᠤᠨ ᠬᠥᠪᠡᠭᠡᠨ ᠦ ᠰᠠᠭᠤᠭᠠᠯᠢᠴᠢᠳ᠂ ᠰᠢᠢᠳᠣᠨ ᠤ ᠬᠤᠳᠠᠯᠳᠤᠭᠠᠴᠢᠳ ᠡ᠂ ᠳᠠᠭᠤ ᠦᠭᠡᠢ ᠪᠠᠢᠵᠠᠭᠠ ᠲᠠᠨ ᠤ ᠡᠯᠴᠢᠳ ᠲᠠᠩᠭᠢᠰ ᠢ ᠭᠠᠲᠤᠯᠵᠤ
3 ᠶᠡᠬᠡ ᠤᠰᠤᠨ ᠳᠡᠭᠡᠷᠡ ᠴᠤ ᠪᠠᠢᠭᠰᠠᠨ᠂ ᠲᠠ ᠨᠠᠷ ᠤᠨ ᠣᠷᠣᠯᠭᠠ ᠰᠢᠬᠣᠷ ᠤᠨ ᠦᠷᠡ ᠲᠠᠷᠢᠶᠠ᠂ ᠨᠢᠯ ᠤᠨ ᠤᠷᠭᠤᠴᠠ ᠪᠠᠢᠭᠰᠠᠨ ᠲᠠᠨ ᠤ ᠬᠢᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠠᠷᠠᠯᠵᠢᠶᠠᠴᠢᠳ ᠪᠠᠢᠭᠰᠠᠨ᠂
4 ᠢᠴᠢᠭᠲᠦᠨ᠂ ᠰᠢᠢᠳᠣᠨ ᠡ᠂ ᠳᠠᠯᠠᠢ᠂ ᠴᠢᠨᠦ ᠴᠠᠢᠵᠠ ᠪᠣᠯᠬᠤ ᠳᠠᠯᠠᠢ ᠶᠠᠷᠢᠵᠤ ᠪᠠᠢᠨᠠ᠄ 《ᠪᠢ ᠬᠡᠦᠬᠡᠳ ᠲᠥᠷᠥᠭᠦᠯᠬᠦ ᠦᠭᠡᠢ᠂ ᠵᠣᠪᠠᠬᠤ ᠦᠭᠡᠢ ᠪᠣᠯᠣᠯᠠ ᠪᠢ ᠬᠥᠪᠡᠭᠦᠳ ᠢ ᠥᠰᠭᠡᠬᠦ ᠦᠭᠡᠢ᠂ ᠥᠬᠢᠳ ᠢ ᠬᠥᠮᠦᠵᠢᠭᠦᠯᠬᠦ ᠦᠭᠡᠢ ᠪᠣᠯᠣᠯᠠ᠃》
5 ᠡᠨᠡ ᠮᠡᠳᠡᠭᠡ ᠶᠧᠵᠢᠫᠲ ᠲᠤ ᠬᠦᠷᠪᠡᠯ ᠲᠡᠳᠡ ᠴᠤ ᠲᠢᠷ ᠤᠨ ᠲᠤᠬᠠᠢ ᠮᠡᠳᠡᠭᠡ ᠡᠴᠡ ᠪᠣᠯᠵᠤ ᠵᠣᠪᠠᠨᠠ᠃
6 ᠲᠠᠷᠱᠢᠱ ᠤᠷᠤᠭᠤ ᠭᠠᠲᠤᠯᠤᠨ ᠶᠠᠪᠤ ᠲᠠᠩᠭᠢᠰ ᠤᠨ ᠬᠥᠪᠡᠭᠡᠨ ᠦ ᠰᠠᠭᠤᠭᠠᠯᠢᠴᠢᠳ ᠡ᠂ ᠭᠠᠰᠢᠭᠤᠳᠠ᠃
7 ᠥᠨᠢ ᠡᠷᠲᠡᠨ ᠡᠴᠡ ᠪᠠᠢᠭᠰᠠᠨ ᠴᠡᠩᠭᠡᠯ ᠲᠡᠢ ᠬᠣᠲᠠ ᠠᠷᠠᠳ ᠲᠦᠮᠡᠨ ᠢᠶᠡᠨ ᠠᠯᠤᠰ ᠬᠣᠯᠠ ᠠᠪᠠᠴᠢᠨ ᠰᠠᠭᠤᠷᠢᠰᠢᠭᠤᠯᠤᠭᠰᠠᠨ ᠬᠣᠲᠠ ᠴᠢᠨᠢ ᠡᠨᠡ ᠭᠡᠵᠢ ᠤᠤ︖
8 ᠲᠢᠷ ᠨᠢ ᠲᠢᠲᠢᠮ ᠵᠡᠭᠦᠭᠴᠢ ᠮᠠᠢᠮᠠᠢᠴᠢᠳ ᠨᠢ ᠨᠣᠶᠠᠳ᠂ ᠬᠤᠳᠠᠯᠳᠤᠭᠠᠴᠢᠳ ᠨᠢ ᠳᠡᠯᠡᠬᠡᠢ ᠳᠦ ᠬᠦᠨᠳᠦᠲᠡᠢ ᠬᠠᠷᠢᠨ ᠲᠡᠭᠦᠨ ᠦ ᠡᠰᠡᠷᠭᠦ ᠬᠡᠨ ᠲᠡᠢᠨ ᠬᠦ ᠲᠥᠯᠥᠪᠯᠡᠭᠰᠡᠨ ᠪᠣᠯ︖
9 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠲᠥᠯᠥᠪᠯᠡᠭᠰᠡᠨ ᠶᠤᠮ ᠲᠡᠢᠨ ᠬᠦ ᠲᠡᠷᠡ ᠪᠦᠬᠦ ᠠᠯᠳᠠᠷᠲᠠᠨ ᠤ ᠠᠯᠳᠠᠷ ᠢ ᠪᠠᠭᠤᠷᠠᠭᠤᠯᠵᠤ ᠳᠡᠯᠡᠬᠡᠢ ᠳᠦ ᠬᠦᠨᠳᠦᠲᠡᠢ ᠪᠦᠭᠦᠳᠡ ᠶᠢ ᠪᠠᠰᠤᠮᠵᠢᠯᠠᠬᠤ ᠭᠡᠵᠦ ᠪᠠᠢᠨᠠ᠃
10 ᠥᠬᠢᠨ ᠲᠠᠷᠱᠢᠱ ᠡ᠂ ᠨᠢᠯ ᠮᠥᠷᠡᠨ ᠮᠡᠲᠦ ᠥᠪᠡᠷ ᠦᠨ ᠢᠶᠠᠨ ᠨᠤᠲᠤᠭ ᠢᠶᠠᠷ ᠦᠶᠡᠷᠯᠡ ᠣᠳᠣ ᠴᠢᠮᠠᠶᠢ ᠬᠠᠰᠢᠭᠴᠢ ᠠᠯᠠᠭᠠ᠃
11 ᠬᠠᠭᠠᠨᠴᠢᠯᠠᠯ ᠤᠳ ᠢ ᠴᠡᠴᠡᠷᠡᠭᠦᠯᠬᠦ ᠪᠡᠷ ᠶᠣᠬᠣᠸᠠ ᠮᠤᠲᠤᠷ ᠢᠶᠠᠨ ᠳᠠᠯᠠᠢ ᠶᠢᠨ ᠳᠡᠭᠡᠭᠦᠷ ᠰᠤᠩ᠋ᠭᠠᠵᠤ᠄ 《ᠺᠠᠨᠠᠨ ᠤ ᠴᠠᠢᠵᠠ ᠨᠤᠭᠤᠳ ᠢ ᠡᠪᠳᠡ》 ᠭᠡᠵᠦ ᠲᠤᠰᠢᠶᠠᠪᠠ᠃
12 ᠲᠡᠷᠡ᠄ 《ᠳᠠᠷᠤᠯᠠᠭᠳᠠᠭᠰᠠᠨ ᠥᠬᠢᠨ ᠰᠢᠢᠳᠣᠨ ᠳᠠᠬᠢᠨ ᠴᠢ ᠪᠠᠶᠠᠰᠬᠤ ᠦᠭᠡᠢ ᠪᠣᠰ᠂ ᠰᠠᠢᠫᠷᠦ᠋ᠰ ᠤᠷᠤᠭᠤ ᠭᠠᠲᠤᠯᠵᠤ ᠶᠠᠪᠤ ᠲᠡᠨᠳᠡ ᠴᠤ ᠴᠢ ᠠᠮᠠᠷᠠᠯ ᠢ ᠣᠯᠬᠤ ᠦᠭᠡᠢ》 ᠭᠡᠵᠦ ᠠᠢᠯᠠᠳᠤᠭᠰᠠᠨ ᠶᠤᠮ᠃
13 ᠪᠠᠪᠢᠯᠣᠨᠴᠤᠳ ᠤᠨ ᠨᠤᠲᠤᠭ ᠢ ᠬᠠᠷᠠ᠃ ᠡᠨᠡ ᠠᠷᠠᠳ ᠲᠦᠮᠡᠨ ᠤᠤᠯ ᠨᠢ ᠲᠡᠨᠳᠡ ᠪᠠᠢᠭᠰᠠᠨ ᠦᠭᠡᠢ᠂ ᠠᠰᠢᠷᠢᠶᠠ ᠲᠡᠭᠦᠨ ᠢ ᠴᠥᠯ ᠳᠤ ᠪᠠᠢᠭᠰᠠᠳ ᠤᠨ ᠲᠥᠯᠥᠭᠡ ᠪᠠᠢᠭᠤᠯᠵᠤ ᠥᠭᠭᠥᠭᠰᠡᠨ ᠳᠦ᠂ ᠲᠡᠳᠡ ᠪᠦᠰᠡᠯᠡᠯᠲᠡ ᠶᠢᠨ ᠴᠠᠮᠬᠠᠭ ᠤᠳ ᠪᠣᠰᠬᠠᠵᠤ᠂ ᠲᠢᠷ ᠤᠨ ᠣᠷᠳᠣᠨ ᠨᠤᠭᠤᠳ ᠢ ᠪᠠᠭᠤᠯᠭᠠᠵᠤ ᠪᠠᠯᠭᠠᠰᠤ ᠪᠣᠯᠭᠠᠭᠰᠠᠨ᠃
14 ᠲᠠᠷᠱᠢᠱ ᠤᠨ ᠬᠥᠯᠭᠡ ᠣᠩ᠋ᠭᠣᠴᠠ ᠨᠤᠭᠤᠳ ᠡ᠂ ᠤᠬᠢᠯᠠᠭᠲᠤᠨ ᠲᠠᠨ ᠤ ᠪᠡᠬᠢᠯᠡᠯᠲᠡ ᠤᠰᠠᠳᠤᠭᠰᠠᠨ᠃
15 ᠲᠡᠷᠡ ᠦᠶᠡ ᠳᠦ᠂ ᠲᠢᠷ ᠨᠢᠭᠡ ᠬᠠᠭᠠᠨ ᠤ ᠡᠳᠦᠷ ᠤᠳ ᠮᠡᠲᠦ ᠳᠠᠯᠠᠨ ᠵᠢᠯ ᠤᠨ ᠲᠤᠷᠰᠢ ᠮᠠᠷᠲᠠᠭᠳᠠᠭᠠᠳ᠂ ᠳᠠᠯᠠᠨ ᠵᠢᠯ ᠤᠨ ᠡᠴᠦᠰ ᠲᠦ ᠡᠨᠡ ᠬᠦ ᠳᠠᠭᠤᠤ ᠳᠤ ᠭᠠᠷᠬᠤ ᠶᠠᠩ᠋ᠬᠠᠨ ᠮᠡᠲᠦ ᠪᠣᠯᠣᠨᠠ᠄
16 《ᠮᠠᠷᠲᠠᠭᠳᠠᠭᠰᠠᠨ ᠶᠠᠩ᠋ᠬᠠᠨ ᠴᠢ ᠶᠠᠲᠤᠭᠠ ᠪᠠᠷᠢᠵᠤ ᠬᠣᠲᠠ ᠪᠠᠷ ᠶᠠᠪᠤ ᠶᠠᠲᠤᠭᠠ ᠪᠠᠨ ᠰᠠᠢᠬᠠᠨ ᠴᠢᠪᠬᠠᠳᠠᠵᠤ ᠣᠯᠠᠨ ᠳᠠᠭᠤᠤ ᠳᠠᠭᠤᠯᠠᠨ ᠡᠷᠡ ᠬᠥᠮᠦᠨ ᠢᠶᠡᠷ ᠳᠤᠷᠠᠰᠤᠭᠤᠯ᠃》
17 ᠳᠠᠯᠠᠨ ᠵᠢᠯ ᠤᠨ ᠡᠴᠦᠰ ᠲᠦ ᠶᠣᠬᠣᠸᠠ ᠲᠢᠷ ᠤᠷᠤᠭᠤ ᠡᠷᠭᠢᠨᠡ᠃ ᠲᠢᠷ ᠳᠠᠬᠢᠨ ᠬᠥᠯᠥᠰᠥ ᠠᠪᠴᠤ᠂ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠳᠡᠭᠡᠷᠡᠬᠢ ᠳᠡᠯᠡᠬᠡᠢ ᠶᠢᠨ ᠪᠦᠬᠦ ᠬᠠᠭᠠᠨᠴᠢᠯᠠᠯ ᠲᠠᠢ ᠰᠠᠳᠤᠷᠯᠠᠬᠤ ᠪᠣᠯᠣᠨᠠ᠃ 18 ᠲᠡᠭᠦᠨ ᠦ ᠬᠥᠯᠥᠰᠥ ᠪᠠ ᠣᠷᠣᠯᠭᠠ ᠨᠥᠭᠡᠴᠡᠯᠡᠭᠳᠡᠬᠦ ᠦᠭᠡᠢ᠂ ᠬᠠᠳᠠᠭᠠᠯᠠᠭᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠲᠤᠰᠠᠭᠠᠷᠯᠠᠭᠳᠠᠵᠤ ᠶᠣᠬᠣᠸᠠ ᠶᠢᠨ ᠬᠢ ᠪᠣᠯᠣᠨᠠ᠃ ᠣᠷᠣᠯᠭᠠ ᠨᠢ ᠬᠠᠷᠢᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠮᠢᠳᠤᠷᠠᠬᠤ ᠬᠥᠮᠦᠨ ᠦ ᠬᠠᠩ᠋ᠭᠠᠯᠤᠭᠤᠨ ᠬᠦᠨᠡᠰᠦ᠂ ᠭᠣᠶᠣ ᠬᠤᠪᠴᠠᠰᠤᠨ ᠳᠤ ᠵᠣᠷᠢᠭᠤᠯᠤᠭᠳᠠᠨᠠ᠃