ᠢᠰᠠᠢᠶᠠ ᠠᠷᠪᠠ ᠶᠢᠰᠦ
ᠶᠧᠵᠢᠫᠲ ᠤᠨ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
1 ᠶᠧᠵᠢᠫᠲ ᠤᠨ ᠲᠤᠬᠠᠢ ᠰᠡᠷᠡᠮᠵᠢᠯᠡᠭᠦᠯᠦᠯᠭᠡ᠃ ᠬᠠᠷᠠ᠂ ᠶᠣᠬᠣᠸᠠ ᠬᠤᠷᠳᠤᠨ ᠡᠭᠦᠯᠡ ᠬᠥᠯᠭᠡᠯᠡᠨ᠂ ᠶᠧᠵᠢᠫᠲ ᠤᠷᠤᠭᠤ ᠠᠢᠰᠤᠢ ᠶᠧᠵᠢᠫᠲ ᠤᠨ ᠰᠢᠲᠦᠭᠡᠨ ᠨᠦᠭᠦᠳ ᠲᠡᠭᠦᠨ ᠦ ᠡᠮᠦᠨᠡ ᠴᠡᠴᠡᠷᠡᠵᠦ ᠶᠧᠵᠢᠫᠲ᠋ᠴᠦᠳ ᠦᠨ ᠵᠢᠷᠦᠬᠡ ᠳᠣᠲᠣᠷᠠ ᠪᠠᠨ ᠬᠠᠢᠯᠤᠨᠠ᠃
2 《ᠪᠢ ᠶᠧᠵᠢᠫᠲ᠋ᠴᠦᠳ ᠢ ᠶᠧᠵᠢᠫᠲ᠋ᠴᠦᠳ ᠦᠨ ᠡᠰᠡᠷᠭᠦ ᠥᠳᠥᠭᠡᠨᠡ ᠲᠡᠳᠡ ᠠᠬᠠ ᠳᠡᠭᠦᠦ ᠨᠢ ᠠᠬᠠ ᠳᠡᠭᠦᠦ ᠲᠠᠢ ᠪᠠᠨ ᠠᠨᠳᠠ ᠨᠢ ᠠᠨᠳᠠ ᠲᠠᠢ ᠪᠠᠨ ᠬᠣᠲᠠ ᠨᠢ ᠬᠣᠲᠠ ᠲᠠᠢ ᠪᠠᠨ ᠬᠠᠭᠠᠨᠴᠢᠯᠠᠯ ᠨᠢ ᠬᠠᠭᠠᠨᠴᠢᠯᠠᠯ ᠲᠠᠢ ᠪᠠᠨ ᠲᠡᠮᠡᠴᠡᠯᠳᠦᠬᠦ ᠪᠣᠯᠣᠨᠠ᠃
3 ᠶᠧᠵᠢᠫᠲ᠋ᠴᠦᠳ ᠦᠨ ᠵᠣᠷᠢᠭ ᠮᠣᠬᠣᠨᠠ ᠪᠢ ᠠᠷᠭᠠ ᠪᠣᠳᠣᠯᠭᠠ ᠶᠢ ᠨᠢ ᠰᠠᠮᠠᠭᠤᠷᠠᠭᠤᠯᠤᠨᠠ ᠲᠡᠳᠡ ᠰᠢᠲᠦᠭᠡᠨ᠂ ᠦᠬᠦᠭᠰᠡᠳ ᠦᠨ ᠰᠦᠨᠡᠰᠦ᠂ ᠰᠦᠨᠡᠰᠦ ᠳᠠᠭᠤᠳᠠᠭᠴᠢ ᠪᠣᠯᠣᠨ ᠪᠥᠭᠡ ᠡᠴᠡ ᠠᠰᠠᠭᠤᠬᠤ ᠪᠣᠯᠣᠨᠠ᠃
4 ᠪᠢ ᠶᠧᠵᠢᠫᠲ᠋ᠴᠦᠳ ᠢ ᠬᠠᠷᠭᠢᠰ ᠡᠵᠡᠨ ᠦ ᠭᠠᠷ ᠲᠤ ᠣᠷᠣᠭᠤᠯᠵᠤ ᠪᠠᠯᠠᠮᠠᠳ ᠬᠠᠭᠠᠨ ᠲᠡᠳᠡᠨ ᠢ ᠵᠠᠬᠢᠷᠤᠨᠠ᠃》 ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
5 ᠭᠣᠣᠯ ᠤᠨ ᠤᠰᠤ ᠰᠢᠷᠭᠢᠵᠦ᠂ ᠭᠣᠣᠯ ᠬᠠᠲᠠᠵᠤ ᠭᠠᠩᠳᠠᠨᠠ᠃
6 ᠤᠰᠤᠨ ᠤ ᠵᠠᠮ ᠤᠳ ᠥᠮᠡᠬᠡᠶᠢᠷᠡᠨ᠂ ᠶᠧᠵᠢᠫᠲ ᠤᠨ ᠤᠷᠤᠰᠬᠠᠯ ᠤᠳ ᠲᠠᠲᠠᠷᠠᠵᠤ ᠬᠠᠲᠠᠨᠠ ᠵᠡᠭᠡᠰᠦ ᠬᠤᠯᠤᠰᠤ ᠨᠢ ᠬᠤᠪᠠᠬᠠᠢᠷᠠᠨᠠ᠃
7 ᠨᠢᠯ ᠤᠨ ᠬᠠᠵᠠᠭᠤ ᠳᠠᠬᠢ᠂ ᠨᠢᠯ ᠤᠨ ᠬᠥᠪᠡᠭᠡᠨ ᠳᠠᠬᠢ ᠡᠪᠡᠰᠦ ᠤᠷᠭᠤᠮᠠᠯ᠂ ᠨᠢᠯ ᠤᠨ ᠬᠠᠵᠠᠭᠤ ᠳᠤ ᠲᠠᠷᠢᠭᠰᠠᠨ ᠪᠦᠭᠦᠳᠡ ᠬᠠᠲᠠᠵᠤ᠂ ᠬᠡᠶᠢᠰᠦᠨ ᠠᠯᠠᠭᠠ ᠪᠣᠯᠣᠨᠠ᠃
8 ᠵᠢᠭᠠᠰᠤᠴᠢᠳ ᠭᠠᠰᠠᠯᠵᠤ᠂ ᠨᠢᠯ ᠮᠥᠷᠡᠨ ᠳᠦ ᠭᠥᠬᠢ ᠬᠠᠶᠠᠭᠰᠠᠳ ᠪᠦᠭᠦᠳᠡ ᠭᠠᠰᠢᠭᠤᠳᠠᠨᠠ ᠤᠰᠤᠨ ᠳᠤ ᠲᠣᠣᠷ ᠲᠠᠯᠪᠢᠭᠰᠠᠳ ᠭᠤᠲᠤᠷᠠᠨᠠ
9 ᠮᠠᠭᠠᠯᠢᠩ᠋ᠭᠤ ᠪᠣᠯᠪᠠᠰᠤᠷᠠᠭᠤᠯᠤᠭᠴᠢᠳ ᠪᠣᠯᠣᠨ ᠨᠠᠷᠢᠨ ᠪᠥᠰ ᠨᠡᠬᠡᠭᠴᠢᠳ ᠭᠤᠨᠢᠭᠯᠠᠨᠠ
10 ᠪᠠᠭᠠᠨᠠ ᠨᠤᠭᠤᠳ ᠨᠢ ᠪᠢᠴᠠᠷᠠᠵᠤ ᠬᠥᠯᠥᠰᠥᠨ ᠦ ᠠᠵᠢᠯᠴᠢᠳ ᠪᠦᠭᠦᠳᠡ ᠭᠠᠰᠠᠯᠤᠨᠠ᠃
11 ᠽᠣᠶᠠᠨ ᠤ ᠲᠦᠰᠢᠮᠡᠳ ᠦᠨᠡᠬᠡᠷ ᠮᠤᠩ᠋ᠬᠠᠭ ᠹᠠᠷᠠᠣ᠋ ᠶᠢᠨ ᠬᠠᠮᠤᠭ ᠤᠨ ᠮᠡᠷᠭᠡᠨ ᠵᠥᠪᠯᠡᠭᠴᠢᠳ ᠤᠨ ᠵᠥᠪᠯᠡᠯᠭᠡ ᠴᠤ ᠪᠢᠳᠠᠭᠤᠯᠢᠭ ᠪᠠᠢᠵᠠᠢ 《ᠪᠢ ᠮᠡᠷᠭᠡᠳ ᠦᠨ ᠨᠢᠭᠡ᠂ ᠡᠷᠲᠡᠨ ᠦ ᠬᠠᠭᠠᠳ ᠤᠨ ᠱᠠᠪᠢ》 ᠭᠡᠵᠦ ᠹᠠᠷᠠᠣ᠋ ᠳᠤ ᠲᠠ ᠨᠠᠷ ᠶᠠᠭᠠᠬᠢᠨ ᠬᠡᠯᠡᠵᠦ ᠴᠢᠳᠠᠬᠤ ᠶᠤᠮ ᠪᠤᠢ︖
12 ᠡᠳᠦᠭᠡ ᠮᠡᠷᠭᠡᠳ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ︖ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠧᠵᠢᠫᠲ ᠤᠨ ᠲᠠᠯᠠ ᠪᠠᠷ ᠶᠠᠭᠤ ᠲᠥᠯᠥᠪᠯᠡᠭᠰᠡᠨ ᠢ ᠲᠡᠳᠡ ᠣᠢᠯᠠᠭᠠᠵᠤ ᠴᠢᠮᠠ ᠳᠤ ᠬᠡᠯᠡᠭ᠃
13 ᠽᠣᠶᠠᠨ ᠤ ᠲᠦᠰᠢᠮᠡᠳ ᠮᠤᠩ᠋ᠬᠠᠭᠯᠠᠨ᠂ ᠮᠧᠮᠹᠢᠰ ᠤᠨ ᠲᠦᠰᠢᠮᠡᠳ ᠮᠡᠬᠡᠯᠡᠭᠳᠡᠵᠦ ᠶᠧᠵᠢᠫᠲ ᠢ ᠣᠪᠣᠭ ᠤᠳ ᠤᠨ ᠬᠢᠨᠢ ᠲᠡᠷᠢᠭᠦᠳ ᠲᠥᠭᠡᠷᠢᠭᠦᠯᠵᠡᠢ᠃
14 ᠶᠣᠬᠣᠸᠠ ᠲᠡᠳᠡᠨ ᠦ ᠳᠤᠮᠳᠠ ᠮᠢᠨᠴᠦᠭᠦᠷᠡᠯ ᠦᠨ ᠰᠦᠨᠡᠰᠦ ᠶᠢ ᠴᠢᠳᠬᠤᠭᠰᠠᠨ ᠳᠤ ᠰᠣᠭᠲᠣᠭᠤ ᠬᠥᠮᠦᠨ ᠪᠥᠭᠡᠯᠵᠢᠬᠦ ᠳᠡᠭᠡᠨ ᠭᠤᠢᠪᠢᠳᠠᠭ ᠲᠠᠢ ᠠᠳᠠᠯᠢ ᠪᠠᠷ ᠲᠡᠳᠡ ᠶᠧᠵᠢᠫᠲ ᠢ ᠪᠦᠬᠦ ᠶᠠᠪᠤᠳᠠᠯ ᠳᠡᠭᠡᠷᠡ ᠨᠢ ᠭᠤᠢᠪᠢᠳᠠᠭ ᠪᠣᠯᠭᠠᠵᠠᠢ᠃
15 ᠲᠣᠯᠣᠭᠠᠢ ᠪᠤᠶᠤ ᠰᠡᠭᠦᠯ ᠳᠠᠯᠳᠠᠤ ᠮᠣᠳᠣᠨ ᠤ ᠮᠥᠴᠢᠷ ᠪᠤᠶᠤ ᠵᠡᠭᠡᠰᠦ ᠨᠢ ᠴᠤ ᠶᠧᠵᠢᠫᠲ ᠲᠤ ᠨᠡᠮᠡᠷᠢ ᠪᠣᠯᠬᠤ ᠦᠭᠡᠢ᠃
16 ᠲᠡᠷᠡ ᠡᠳᠦᠷ ᠶᠧᠵᠢᠫᠲ᠋ᠴᠦᠳ ᠡᠮᠡ ᠬᠥᠮᠦᠨ ᠰᠢᠭ ᠪᠣᠯᠣᠨᠠ᠃ ᠳᠡᠭᠡᠭᠦᠷ ᠨᠢ ᠳᠠᠯᠠᠢᠵᠤ ᠪᠠᠢᠭᠠ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠨᠢᠳᠤᠷᠭᠠ ᠠᠴᠠ ᠲᠡᠳᠡ ᠠᠶᠤᠵᠤ᠂ ᠴᠡᠴᠡᠷᠡᠨᠡ᠃ 17 ᠶᠧᠵᠢᠫᠲ ᠤᠨ ᠲᠠᠯᠠ ᠪᠠᠷ ᠲᠥᠯᠥᠪᠯᠡᠵᠦ ᠪᠠᠢᠭᠠ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠲᠥᠯᠥᠪᠯᠡᠭᠡᠨ ᠡᠴᠡ ᠪᠣᠯᠵᠤ ᠶᠦᠳᠠ ᠶᠢᠨ ᠨᠤᠲᠤᠭ ᠶᠧᠵᠢᠫᠲ ᠲᠤ ᠠᠶᠤᠮᠰᠢᠭ ᠪᠣᠯᠵᠤ᠂ ᠲᠡᠭᠦᠨ ᠢ ᠳᠤᠷᠠᠳᠬᠤ ᠳᠤ ᠬᠥᠮᠦᠨ ᠪᠦᠷᠢ ᠨᠢ ᠠᠢᠳᠠᠰ ᠲᠤ ᠠᠪᠲᠠᠬᠤ ᠪᠣᠯᠣᠨᠠ᠃
18 ᠲᠡᠷᠡ ᠡᠳᠦᠷ ᠶᠧᠵᠢᠫᠲ ᠤᠨ ᠲᠠᠪᠤᠨ ᠬᠣᠲᠠ ᠺᠠᠨᠠᠨ ᠤ ᠬᠡᠯᠡ ᠪᠡᠷ ᠶᠠᠷᠢᠵᠤ᠂ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠳᠤ ᠲᠠᠩ᠋ᠭᠠᠷᠢᠭ ᠡᠷᠭᠦᠬᠦ ᠪᠥᠭᠡᠳ ᠨᠢᠭᠡ ᠨᠢ ᠰᠦᠢᠷᠡᠯ ᠦᠨ ᠬᠣᠲᠠ ᠭᠡᠭᠳᠡᠨᠡ᠃
19 ᠲᠡᠷᠡ ᠡᠳᠦᠷ ᠶᠧᠵᠢᠫᠲ ᠤᠨ ᠲᠥᠪ ᠲᠤ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠲᠠᠬᠢᠯ ᠤᠨ ᠰᠢᠷᠡᠭᠡ᠂ ᠬᠢᠯᠢ ᠳᠡᠭᠡᠷᠡ ᠨᠢ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠪᠠᠭᠠᠨᠠ ᠲᠠᠢ ᠪᠣᠯᠵᠤ᠂ 20 ᠲᠡᠷᠡ ᠨᠢ ᠶᠧᠵᠢᠫᠲ ᠤᠨ ᠨᠤᠲᠤᠭ ᠲᠤ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠲᠡᠮᠳᠡᠭ ᠪᠠ ᠭᠡᠷᠡᠴᠢ ᠪᠣᠯᠣᠨᠠ᠃ ᠳᠠᠷᠤᠩ᠋ᠭᠤᠢᠯᠠᠭᠴᠢᠳ ᠠᠴᠠ ᠪᠣᠯᠵᠤ ᠲᠡᠳᠡ ᠶᠣᠬᠣᠸᠠ ᠤᠷᠤᠭᠤ ᠬᠠᠰᠬᠢᠷᠬᠤ ᠳᠤ᠂ ᠶᠣᠬᠣᠸᠠ ᠠᠪᠤᠷᠠᠭᠴᠢ ᠪᠠ ᠥᠮᠥᠭᠯᠡᠭᠴᠢ ᠶᠢ ᠶᠠᠪᠤᠭᠤᠯᠵᠤ᠂ ᠲᠡᠳᠡᠨ ᠢ ᠴᠢᠯᠥᠭᠡᠯᠡᠨᠡ᠃ 21 ᠲᠡᠢᠨ ᠬᠦ ᠶᠣᠬᠣᠸᠠ ᠥᠪᠡᠷ ᠢ ᠪᠠᠨ ᠶᠧᠵᠢᠫᠲ ᠲᠤ ᠮᠡᠳᠡᠭᠦᠯᠦᠨᠡ᠂ ᠲᠡᠷᠡ ᠡᠳᠦᠷ ᠶᠧᠵᠢᠫᠲ᠋ᠴᠦᠳ ᠶᠣᠬᠣᠸᠠ ᠶᠢ ᠮᠡᠳᠡᠭᠡᠳ ᠲᠠᠬᠢᠯ ᠪᠣᠯᠣᠨ ᠡᠷᠭᠦᠯ ᠡᠷᠭᠦᠨ ᠮᠥᠷᠭᠥᠵᠦ᠂ ᠶᠣᠬᠣᠸᠠ ᠳᠤ ᠲᠠᠩ᠋ᠭᠠᠷᠢᠭ ᠲᠠᠯᠪᠢᠵᠤ᠂ ᠲᠡᠭᠦᠨ ᠢ ᠪᠠᠨ ᠪᠡᠶᠡᠯᠡᠭᠦᠯᠦᠨᠡ᠃ 22 ᠶᠣᠬᠣᠸᠠ ᠶᠧᠵᠢᠫᠲ ᠢ ᠴᠣᠬᠢᠨᠠ᠂ ᠴᠣᠬᠢᠬᠤ ᠪᠣᠯᠪᠠᠴᠤ ᠡᠳᠡᠭᠡᠭᠡᠨᠡ᠃ ᠲᠡᠳᠡ ᠡᠷᠭᠢᠪᠡᠯ᠂ ᠶᠣᠬᠣᠸᠠ ᠭᠤᠶᠤᠯᠲᠠ ᠶᠢ ᠨᠢ ᠰᠣᠨᠣᠰᠴᠤ ᠡᠳᠡᠭᠡᠭᠡᠨᠡ᠃
23 ᠲᠡᠷᠡ ᠡᠳᠦᠷ ᠶᠧᠵᠢᠫᠲ ᠡᠴᠡ ᠠᠰᠢᠷᠢᠶᠠ ᠬᠦᠷᠬᠦ ᠶᠡᠬᠡ ᠵᠠᠮ ᠭᠠᠷᠤᠨᠠ᠂ ᠠᠰᠢᠷᠢᠶᠠᠴᠤᠳ ᠶᠧᠵᠢᠫᠲ ᠤᠷᠤᠭᠤ᠂ ᠶᠧᠵᠢᠫᠲ᠋ᠴᠦᠳ ᠠᠰᠢᠷᠢᠶᠠ ᠤᠷᠤᠭᠤ ᠶᠠᠪᠤᠵᠤ᠂ ᠶᠧᠵᠢᠫᠲ᠋ᠴᠦᠳ ᠠᠰᠢᠷᠢᠶᠠᠴᠤᠳ ᠲᠠᠢ ᠬᠠᠮᠲᠤ ᠮᠥᠷᠭᠥᠬᠦ ᠪᠣᠯᠣᠨᠠ᠃
24 ᠲᠡᠷᠡ ᠡᠳᠦᠷ ᠢᠰᠷᠧᠯ ᠨᠢ ᠶᠧᠵᠢᠫᠲ᠂ ᠠᠰᠢᠷᠢᠶᠠ ᠲᠠᠢ ᠬᠠᠮᠲᠤ ᠭᠤᠷᠪᠠᠭᠤᠯᠠ ᠪᠠᠨ ᠳᠡᠯᠡᠬᠡᠢ ᠶᠢᠨ ᠳᠤᠮᠳᠠᠬᠢ ᠢᠷᠥᠭᠡᠯ ᠪᠣᠯᠣᠨᠠ᠃ 25 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠲᠡᠳᠡᠨ ᠢ ᠢᠷᠥᠭᠡᠵᠦ᠄ 《ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠣᠯᠬᠤ ᠶᠧᠵᠢᠫᠲ᠂ ᠮᠢᠨᠦ ᠭᠠᠷ ᠤᠨ ᠪᠦᠲᠦᠭᠡᠯ ᠪᠣᠯᠬᠤ ᠠᠰᠢᠷᠢᠶᠠ᠂ ᠮᠢᠨᠦ ᠥᠮᠴᠢ ᠪᠣᠯᠬᠤ ᠢᠰᠷᠧᠯ ᠪᠤᠶᠠᠨ ᠲᠠᠢ》 ᠭᠡᠵᠦ ᠠᠢᠯᠠᠳᠪᠠ᠃