ᠢᠰᠠᠢᠶᠠ ᠬᠣᠷᠢᠨ ᠳᠥᠷᠪᠡ
ᠪᠦᠬᠦ ᠳᠡᠯᠡᠬᠡᠢ ᠶᠢᠨ ᠬᠦᠯᠢᠶᠡᠬᠦ ᠰᠢᠳᠬᠡᠯ
1 ᠬᠠᠷᠠ᠂ ᠶᠣᠬᠣᠸᠠ ᠭᠠᠵᠠᠷ ᠢ ᠬᠣᠭᠣᠰᠣᠷᠠᠭᠤᠯᠤᠨ᠂ ᠲᠡᠭᠦᠨ ᠢ ᠡᠵᠡᠭᠦᠢᠷᠡᠭᠦᠯᠬᠦ ᠪᠡᠷ ᠪᠠᠢᠨᠠ᠃ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠶᠢ ᠤᠷᠪᠠᠭᠤᠯᠵᠤ᠂ ᠰᠠᠭᠤᠭᠠᠯᠢᠴᠢᠳ ᠢ ᠨᠢ ᠰᠠᠷᠨᠢᠭᠤᠯᠤᠨᠠ᠂ 2 ᠠᠷᠠᠳ ᠲᠦᠮᠡᠨ ᠲᠠᠬᠢᠯᠴᠢ ᠢᠯᠭᠠᠭᠠ ᠦᠭᠡᠢ᠂ ᠪᠣᠭᠣᠯ ᠡᠵᠡᠨ ᠢᠯᠭᠠᠭᠠ ᠦᠭᠡᠢ᠂ ᠰᠢᠪᠡᠭᠴᠢᠨ ᠬᠠᠲᠤᠭᠲᠠᠢ ᠢᠯᠭᠠᠭᠠ ᠦᠭᠡᠢ᠂ ᠬᠤᠳᠠᠯᠳᠤᠭᠴᠢ ᠬᠤᠳᠠᠯᠳᠤᠨ ᠠᠪᠤᠭᠴᠢ ᠢᠯᠭᠠᠭᠠ ᠦᠭᠡᠢ᠂ ᠵᠢᠭᠡᠯᠡᠭᠦᠯᠦᠭᠴᠢ ᠵᠢᠭᠡᠯᠡᠭᠴᠢ ᠢᠯᠭᠠᠭᠠ ᠦᠭᠡᠢ᠂ ᠥᠷᠢᠲᠡᠨ ᠠᠪᠴᠠᠭᠠᠲᠠᠨ ᠢᠯᠭᠠᠭᠠ ᠦᠭᠡᠢ ᠪᠠᠢᠬᠤ ᠪᠣᠯᠣᠨᠠ᠃ 3 ᠭᠠᠵᠠᠷ ᠪᠦᠷᠢᠮᠦᠰᠦᠨ ᠬᠣᠭᠣᠰᠣᠷᠠᠵᠤ᠂ ᠪᠦᠷᠢᠮᠦᠰᠦᠨ ᠲᠣᠨᠣᠭᠳᠠᠨᠠ᠂ ᠡᠨᠡ ᠦᠭᠡ ᠶᠢ ᠶᠣᠬᠣᠸᠠ ᠠᠢᠯᠠᠳᠤᠭᠰᠠᠨ ᠶᠤᠮ᠃ 4 ᠭᠠᠵᠠᠷ ᠬᠠᠲᠠᠵᠤ ᠭᠠᠩᠳᠠᠨᠠ᠂ ᠶᠢᠷᠲᠢᠨᠴᠦ ᠬᠣᠷᠪᠣᠢᠨ ᠭᠠᠩᠳᠠᠨᠠ᠂ ᠭᠠᠵᠠᠷ ᠤᠨ ᠠᠯᠳᠠᠷᠲᠠᠳ ᠳᠣᠷᠣᠢᠲᠠᠨᠠ᠃ 5 ᠭᠠᠵᠠᠷ ᠰᠠᠭᠤᠭᠠᠯᠢᠴᠢᠳ ᠤᠨ ᠢᠶᠠᠨ ᠳᠣᠣᠷᠠ ᠪᠤᠵᠠᠷᠲᠤᠭᠰᠠᠨ ᠨᠢ ᠲᠡᠳᠡ ᠬᠠᠤᠯᠢ ᠡᠴᠡ ᠳᠠᠪᠠᠵᠤ᠂ ᠲᠣᠭᠲᠠᠭᠠᠯ ᠢ ᠵᠥᠷᠢᠴᠡᠵᠦ᠂ ᠮᠥᠩᠬᠡ ᠶᠢᠨ ᠭᠡᠷᠡ ᠶᠢ ᠴᠤᠴᠠᠯᠤᠭᠰᠠᠨ ᠤ ᠤᠴᠢᠷ ᠶᠤᠮ᠃ 6 ᠡᠢᠮᠦ ᠡᠴᠡ ᠭᠠᠵᠠᠷ ᠬᠠᠷᠢᠶᠠᠯ ᠳᠤ ᠢᠳᠡᠭᠳᠡᠵᠦ᠂ ᠰᠠᠭᠤᠭᠠᠯᠢᠴᠢᠳ ᠨᠢ ᠶᠠᠯᠠ ᠬᠦᠯᠢᠶᠡᠪᠡ᠃ ᠭᠠᠵᠠᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠰᠢᠲᠠᠭᠠᠭᠳᠠᠵᠤ᠂ ᠴᠥᠭᠡᠨ ᠯᠠ ᠦᠯᠡᠳᠡᠪᠡ᠃
7 ᠳᠠᠷᠠᠰᠤ ᠬᠠᠲᠠᠵᠤ ᠦᠵᠦᠮ ᠦᠨ ᠮᠣᠳᠣ ᠨᠢ ᠭᠠᠩᠳᠠᠨᠠ ᠨᠠᠷᠭᠢᠭᠴᠢ ᠪᠦᠬᠦᠨ ᠭᠠᠰᠠᠯᠤᠨᠠ᠂
8 ᠪᠥᠮᠪᠥᠷ ᠦᠨ ᠬᠥᠭᠵᠢᠶᠡᠨ ᠳᠠᠭᠤᠰᠴᠤ ᠴᠡᠩᠭᠡᠯᠳᠦᠭᠴᠢᠳ ᠤᠨ ᠱᠤᠤᠭᠢᠶᠠᠨ ᠵᠣᠭᠰᠣᠵᠤ ᠶᠠᠲᠤᠭᠠ ᠶᠢᠨ ᠬᠥᠭᠵᠢᠶᠡᠨᠲᠦ ᠠᠶᠠᠯᠭᠤ ᠳᠠᠭᠤᠰᠪᠠ᠃
9 ᠲᠡᠳᠡ ᠳᠠᠭᠤᠤ ᠳᠠᠭᠤᠯᠠᠨ ᠳᠠᠷᠠᠰᠤ ᠤᠤᠭᠤᠳᠠᠭ ᠢᠶᠠᠨ ᠪᠣᠯᠢᠨᠠ ᠠᠷᠢᠬᠢ ᠤᠤᠭᠤᠬᠤ ᠳᠤ ᠠᠮᠲᠠ ᠨᠢ ᠭᠠᠰᠢᠭᠤᠨ ᠪᠣᠯᠣᠨᠠ᠃
10 ᠰᠠᠮᠠᠭᠤᠷᠠᠭᠰᠠᠨ ᠬᠣᠲᠠ ᠰᠦᠢᠷᠡᠪᠡ ᠭᠡᠷ ᠪᠣᠯᠭᠠᠨ ᠬᠠᠭᠠᠭᠳᠠᠵᠤ᠂ ᠣᠷᠣᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠣᠨᠠ᠃
11 ᠭᠤᠳᠤᠮᠵᠢᠨ ᠳᠤ ᠦᠵᠦᠮ ᠬᠠᠢᠬᠤ ᠬᠠᠰᠬᠢᠷᠤᠭᠠᠨ ᠭᠠᠷᠴᠤ ᠪᠦᠬᠦ ᠪᠠᠶᠠᠰᠬᠤᠯᠠᠩ ᠪᠥᠬᠥᠵᠦ ᠭᠠᠵᠠᠷ ᠤᠨ ᠪᠠᠶᠠᠷ ᠬᠥᠷ ᠠᠷᠢᠯᠪᠠ᠃
12 ᠬᠣᠲᠠ ᠨᠢ ᠬᠣᠭᠣᠰᠣᠷᠠᠵᠤ ᠬᠠᠶᠠᠭᠳᠠᠨ ᠬᠠᠭᠠᠯᠭᠠ ᠨᠢ ᠴᠣᠬᠢᠭᠳᠠᠨ ᠡᠪᠳᠡᠷᠡᠵᠡᠢ᠃
13 ᠭᠠᠵᠠᠷ ᠤᠨ ᠳᠤᠮᠳᠠ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠣᠲᠣᠷᠠ ᠡᠢᠮᠦ ᠪᠣᠯᠣᠨᠠ᠂ ᠴᠢᠳᠦᠨ ᠮᠣᠳᠣ ᠶᠢ ᠰᠡᠭᠰᠦᠷᠬᠦ ᠰᠢᠭ᠂ ᠦᠵᠦᠮ ᠬᠤᠷᠢᠶᠠᠯᠲᠠ ᠶᠢᠨ ᠳᠠᠷᠠᠭᠠ ᠦᠵᠦᠮ ᠲᠡᠭᠦᠬᠦ ᠰᠢᠭ ᠪᠣᠯᠣᠨᠠ᠃
14 ᠲᠡᠳᠡ ᠳᠠᠭᠤ ᠪᠠᠨ ᠡᠷᠭᠦᠵᠦ᠂ ᠶᠣᠬᠣᠸᠠ ᠶᠢᠨ ᠰᠦᠷ ᠵᠢᠪᠬᠤᠯᠠᠩ ᠢ ᠪᠠᠬᠠᠳᠤᠨ ᠳᠠᠭᠤᠯᠠᠨᠠ᠃ ᠲᠡᠳᠡ ᠥᠷᠥᠨᠡ ᠵᠦᠭ ᠡᠴᠡ ᠤᠤᠬᠠᠢᠯᠠᠨᠠ᠃
15 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠳᠣᠷᠣᠨᠠ ᠵᠦᠭ ᠲᠦ ᠴᠤ ᠶᠣᠬᠣᠸᠠ ᠶᠢ ᠳᠡᠭᠡᠳᠦᠯᠡ ᠲᠠᠩᠭᠢᠰ ᠤᠨ ᠬᠥᠪᠡᠭᠡᠨ ᠳᠦ ᠴᠤ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢ ᠬᠦᠨᠳᠦᠳᠬᠡ᠃
16 ᠳᠡᠯᠡᠬᠡᠢ ᠶᠢᠨ ᠬᠢᠵᠠᠭᠠᠷ ᠠᠴᠠ ᠴᠤ 《ᠵᠥᠪᠲᠦ ᠨᠢᠭᠡᠨ ᠳᠦ ᠠᠯᠳᠠᠷ ᠢ ᠡᠷᠭᠦᠶᠡ》 ᠭᠡᠬᠦ ᠳᠠᠭᠤᠤ ᠨᠤᠭᠤᠳ ᠪᠢᠳᠡᠨ ᠳᠦ ᠰᠣᠨᠣᠰᠳᠠᠲᠠᠯᠠ ᠪᠢ᠄ 《ᠬᠠᠷᠠᠮᠰᠠᠯ᠂ ᠬᠠᠷᠠᠮᠰᠠᠯ᠂ ᠭᠠᠰᠠᠯᠠᠩᠲᠠᠶᠠ ᠤᠷᠪᠠᠭᠴᠢᠳ ᠤᠷᠪᠠᠯᠠ᠂ ᠤᠷᠪᠠᠮᠠᠲᠠᠭᠠᠢ ᠨᠢ ᠤᠷᠪᠠᠭᠰᠠᠨ ᠪᠠᠢᠨᠠ》 ᠭᠡᠪᠡ᠃
17 ᠭᠠᠵᠠᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠡ ᠠᠶᠤᠮᠰᠢᠭ᠂ ᠨᠦᠬᠡ᠂ ᠬᠠᠪᠬᠠ ᠴᠢᠨᠦ ᠡᠮᠦᠨᠡ ᠪᠠᠢᠨᠠ᠃
18 ᠠᠶᠤᠮᠰᠢᠭᠲᠤ ᠳᠠᠭᠤᠨ ᠠᠴᠠ ᠵᠢᠭᠤᠲᠠᠭᠴᠢ ᠨᠢ ᠨᠦᠬᠡᠨ ᠳᠦ ᠤᠨᠠᠨᠠ ᠨᠦᠬᠡᠨ ᠡᠴᠡ ᠭᠠᠷᠤᠭᠴᠢ ᠨᠢ ᠬᠠᠪᠬᠠᠨ ᠳᠤ ᠣᠷᠣᠨᠠ ᠲᠩᠷᠢ ᠶᠢᠨ ᠴᠣᠩ᠋ᠬᠣ ᠨᠤᠭᠤᠳ ᠨᠡᠭᠡᠭᠡᠭᠳᠡᠵᠦ ᠭᠠᠵᠠᠷ ᠤᠨ ᠰᠠᠭᠤᠷᠢ ᠨᠤᠭᠤᠳ ᠳᠠᠢᠪᠢᠯᠵᠠᠨᠠ᠃
19 ᠭᠠᠵᠠᠷ ᠪᠤᠲᠠᠷᠠᠨ ᠪᠤᠲᠠᠷᠠᠨᠠ ᠭᠠᠵᠠᠷ ᠬᠠᠭᠠᠷᠠᠵᠤ᠂ ᠭᠠᠵᠠᠷ ᠳᠣᠩᠰᠣᠯᠣᠨ ᠳᠣᠩᠰᠣᠯᠣᠨᠠ᠃
20 ᠭᠠᠵᠠᠷ ᠠᠷᠢᠬᠢᠴᠢᠨ ᠰᠢᠭ᠋ ᠭᠤᠢᠪᠢᠵᠤ ᠰᠢᠭᠤᠷᠭᠠᠨ ᠳᠤᠮᠳᠠᠬᠢ ᠣᠪᠣᠬᠠᠢ ᠰᠢᠭ᠋ ᠭᠠᠩ᠋ᠬᠤᠨᠠ ᠥᠪᠡᠷ ᠦᠨ ᠬᠢᠨᠢ ᠳᠡᠭᠡᠷᠡᠬᠢ ᠭᠡᠮ ᠨᠢᠭᠦᠯ ᠬᠦᠨᠳᠦ ᠪᠣᠯᠬᠣᠷ ᠤᠨᠠᠵᠤ᠂ ᠳᠠᠬᠢᠨ ᠪᠣᠰᠬᠤ ᠦᠭᠡᠢ᠃
21 ᠲᠡᠷᠡ ᠡᠳᠦᠷ ᠶᠣᠬᠣᠸᠠ ᠳᠡᠭᠡᠳᠦ ᠲᠩᠷᠢ ᠶᠢᠨ ᠬᠦᠴᠦᠲᠡᠳ ᠢ ᠮᠥᠨ ᠳᠣᠣᠷᠠ ᠭᠠᠵᠠᠷ ᠤᠨ ᠬᠠᠭᠠᠳ ᠢ ᠰᠢᠳᠬᠡᠨᠡ᠃
22 ᠨᠦᠬᠡᠨ ᠳᠠᠬᠢ ᠬᠣᠷᠢᠭᠳᠠᠯ ᠤᠳ ᠮᠡᠲᠦ ᠲᠡᠳᠡ ᠴᠤᠭ ᠲᠠᠭᠠᠨ ᠪᠥᠭᠡᠮᠨᠡᠷᠡᠵᠦ ᠭᠢᠨᠳᠠᠨ ᠳᠤ ᠬᠣᠷᠢᠭᠳᠠᠭᠠᠳ ᠣᠯᠠᠨ ᠬᠣᠨᠣᠭ ᠤᠨ ᠳᠠᠷᠠᠭᠠ ᠰᠢᠳᠬᠡᠭᠳᠡᠨᠡ᠃
23 ᠲᠡᠭᠡᠬᠦ ᠳᠦ ᠰᠠᠷᠠ ᠰᠢᠷᠪᠡᠭᠡᠲᠦᠵᠦ᠂ ᠨᠠᠷᠠ ᠢᠴᠢᠬᠦ ᠪᠣᠯᠣᠨᠠ᠂ ᠤᠴᠢᠷ ᠨᠢ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠧᠷᠦ᠋ᠰᠠᠯᠧᠮ ᠳᠤ᠂ ᠽᠢᠶᠣᠨ ᠠᠭᠤᠯᠠᠨ ᠳᠡᠭᠡᠷᠡ ᠠᠬᠠᠮᠠᠳ ᠤᠳ ᠤᠨ ᠬᠢᠨᠢ ᠡᠮᠦᠨᠡ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠪᠠᠷ ᠬᠠᠭᠠᠨᠴᠢᠯᠠᠨᠠ᠃