ᠢᠰᠠᠢᠶᠠ ᠬᠣᠷᠢᠨ ᠬᠣᠶᠠᠷ
ᠶᠧᠷᠦ᠋ᠰᠠᠯᠧᠮ ᠤᠨ ᠲᠠᠯᠠ ᠪᠠᠷ ᠬᠢ ᠡᠰᠢ ᠦᠵᠡᠭᠦᠯᠦᠯᠭᠡ
1 ᠦᠵᠡᠭᠳᠡᠯ ᠦᠨ ᠬᠥᠨᠳᠡᠢ ᠶᠢᠨ ᠲᠤᠬᠠᠢ ᠰᠡᠷᠡᠮᠵᠢᠯᠡᠭᠦᠯᠦᠯᠭᠡ᠄ ᠲᠠ ᠨᠠᠷ ᠲᠤ ᠶᠠᠭᠤ ᠲᠣᠬᠢᠶᠠᠯᠳᠤᠭᠠᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠳᠡᠭᠡᠪᠦᠷ ᠳᠡᠭᠡᠷᠡ ᠭᠠᠷᠪᠠ︖
2 ᠱᠤᠤᠭᠢᠶᠠᠨ᠂ ᠳᠡᠪᠵᠢᠶᠡᠨ ᠶᠡᠬᠡᠲᠡᠢ ᠬᠣᠲᠠ᠂ ᠨᠠᠢᠷ ᠴᠡᠩᠭᠡᠯ ᠲᠡᠢ ᠲᠣᠰᠬᠣᠨ ᠡ ᠠᠯᠠᠭᠳᠠᠭᠰᠠᠳ ᠴᠢᠨᠢ ᠰᠡᠯᠡᠮᠡ ᠳᠦ ᠠᠯᠠᠭᠳᠠᠭᠰᠠᠨ ᠪᠢᠰᠢ᠂ ᠳᠠᠢᠨ ᠳᠤ ᠦᠷᠡᠭᠳᠡᠭᠰᠡᠨ ᠴᠤ ᠪᠢᠰᠢ
3 ᠬᠠᠮᠤᠭ ᠤᠳᠤᠷᠢᠳᠤᠭᠴᠢᠳ ᠴᠢᠨᠢ ᠬᠠᠮᠲᠤ ᠳᠠᠭᠠᠨ ᠵᠢᠭᠤᠲᠠᠵᠤ ᠬᠠᠷᠪᠤᠬᠤ ᠴᠤ ᠦᠭᠡᠢ ᠪᠠᠷ ᠣᠯᠵᠠᠯᠠᠭᠳᠠᠪᠠ ᠬᠣᠯᠠ ᠵᠢᠭᠤᠲᠠᠭᠰᠠᠨ ᠴᠤ ᠪᠠᠷᠢᠭᠳᠠᠨ᠂ ᠪᠦᠭᠦᠳᠡ ᠣᠯᠵᠠᠯᠠᠭᠳᠠᠭᠴᠢ ᠪᠣᠯᠪᠠ᠃
4 ᠲᠡᠢᠮᠦ ᠡᠴᠡ ᠪᠢ᠄ 《ᠬᠠᠷᠠᠴᠠ ᠪᠠᠨ ᠨᠠᠳᠠ ᠠᠴᠠ ᠰᠢᠯᠵᠢᠭᠦᠯ᠂ ᠪᠢ ᠭᠠᠰᠢᠭᠤᠳᠠᠨ ᠤᠬᠢᠯᠠᠶᠠ ᠥᠬᠢᠨ ᠠᠷᠠᠳ ᠲᠦᠮᠡᠨ ᠦ ᠮᠢᠨᠢ ᠰᠦᠢᠷᠡᠯ ᠦᠨ ᠲᠠᠯᠠ ᠪᠠᠷ ᠨᠠᠮᠠᠶᠢ ᠲᠠᠢᠪᠤᠰᠢᠷᠠᠭᠤᠯᠬᠤ ᠭᠡᠵᠦ ᠪᠦᠦ ᠣᠷᠣᠯᠳᠤ》 ᠭᠡᠪᠡ᠃
5 ᠤᠴᠢᠷ ᠨᠢ ᠦᠵᠡᠭᠳᠡᠯ ᠦᠨ ᠬᠥᠨᠳᠡᠢ ᠳᠦ ᠪᠣᠯᠬᠤ ᠪᠠᠯᠠᠮᠠᠭᠳᠠᠯ᠂ ᠭᠢᠰᠬᠢᠯᠡᠯ᠂ ᠦᠢᠮᠡᠭᠡᠨ ᠦ ᠡᠳᠦᠷ ᠪᠤᠶᠤ ᠬᠡᠷᠡᠮ ᠨᠤᠷᠠᠵᠤ᠂ ᠠᠭᠤᠯᠠᠰ ᠲᠤ ᠬᠠᠰᠬᠢᠷᠤᠭᠠᠨ ᠨᠦᠷᠬᠢᠯᠡᠬᠦ ᠡᠳᠦᠷ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠬᠢ᠃
6 ᠡᠯᠠᠮᠴᠤᠳ ᠲᠡᠷᠭᠡᠴᠢᠳ ᠪᠠ ᠮᠣᠷᠢᠲᠠᠳ ᠤᠨ ᠬᠠᠮᠲᠤ ᠰᠠᠭᠠᠳᠠᠭ ᠢᠶᠠᠨ ᠠᠭᠰᠠᠪᠠ ᠺᠢᠷᠴᠦᠳ ᠪᠠᠮᠪᠠᠢ ᠪᠠᠨ ᠢᠯᠡ ᠭᠠᠷᠭᠠᠪᠠ᠃
7 ᠦᠵᠡᠰᠬᠦᠯᠡᠩᠲᠦ ᠬᠥᠨᠳᠡᠢ ᠳᠦ ᠴᠢᠨᠢ ᠲᠡᠷᠭᠡ ᠨᠦᠭᠦᠳ ᠳᠦᠭᠦᠷᠴᠦ ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠨᠤᠭᠤᠳ ᠳᠡᠭᠡᠷᠡ ᠮᠣᠷᠢᠲᠠᠳ ᠵᠢᠭᠰᠠᠨᠠ᠃
8 ᠲᠡᠷᠡ ᠪᠡᠷ ᠶᠦᠳᠠ ᠶᠢᠨ ᠬᠠᠯᠬᠠᠪᠴᠢ ᠶᠢ ᠵᠠᠢᠯᠠᠭᠤᠯᠪᠠ ᠲᠡᠷᠡ ᠡᠳᠦᠷ ᠲᠠ ᠨᠠᠷ ᠣᠢ ᠶᠢᠨ ᠣᠷᠳᠣᠨ 12 ᠳᠠᠬᠢ ᠵᠡᠪᠰᠡᠭ ᠢᠶᠡᠨ ᠬᠠᠢᠵᠤ
9 ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠶᠢᠨ ᠴᠥᠮᠥᠷᠬᠡᠢ ᠣᠯᠠᠨ ᠪᠠᠢᠭᠠ ᠶᠢ ᠬᠠᠷᠠᠵᠤ ᠳᠣᠣᠷᠠᠳᠤ ᠴᠥᠭᠥᠷᠥᠮ ᠦᠨ ᠤᠰᠤ ᠶᠢ ᠬᠤᠷᠢᠶᠠᠨ
10 ᠶᠧᠷᠦ᠋ᠰᠠᠯᠧᠮ ᠤᠨ ᠭᠡᠷ ᠤᠳ ᠢ ᠲᠣᠭᠠᠯᠠᠵᠤ ᠪᠠᠢᠰᠢᠩ ᠤᠳ ᠢ ᠨᠤᠷᠠᠭᠠᠵᠤ ᠬᠡᠷᠡᠮ ᠢ ᠪᠡᠬᠢᠯᠡᠨ
11 ᠬᠠᠭᠤᠴᠢᠨ ᠴᠥᠭᠥᠷᠥᠮ ᠦᠨ ᠤᠰᠤ ᠶᠢ ᠨᠥᠭᠡᠴᠡᠯᠡᠬᠦ ᠭᠡᠵᠦ ᠬᠣᠶᠠᠷ ᠬᠡᠷᠡᠮ ᠦᠨ ᠬᠣᠭᠣᠷᠣᠨᠳᠣ ᠤᠰᠤᠨ ᠰᠠᠩ ᠪᠠᠷᠢᠵᠠᠢ᠂ ᠬᠠᠷᠢᠨ ᠲᠠ ᠨᠠᠷ ᠲᠡᠢᠨ ᠬᠦ ᠦᠢᠯᠡᠳᠦᠭᠰᠡᠨ ᠨᠢᠭᠡᠨ ᠢ ᠬᠠᠢᠭᠰᠠᠨ ᠦᠭᠡᠢ ᠲᠡᠢᠨ ᠬᠦ ᠥᠨᠢ ᠡᠷᠲᠡ ᠲᠥᠯᠥᠪᠯᠡᠭᠰᠡᠨ ᠨᠢᠭᠡᠨ ᠢ ᠬᠠᠷᠠᠭᠰᠠᠨ ᠦᠭᠡᠢ᠃
12 ᠲᠡᠷᠡ ᠡᠳᠦᠷ ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠶᠣᠬᠣᠸᠠ᠄ 《ᠲᠠ ᠨᠠᠷ ᠭᠠᠰᠢᠭᠤᠳᠠᠨ ᠤᠬᠢᠯᠠᠵᠤ᠂ ᠦᠰᠦ ᠪᠡᠨ ᠬᠤᠰᠤᠨ ᠲᠠᠭᠠᠷ ᠨᠥᠮᠥᠷ》 ᠭᠡᠵᠦ ᠵᠠᠬᠢᠭᠰᠠᠨ᠂
13 ᠬᠠᠷᠠ᠂ ᠬᠠᠷᠢᠨ ᠲᠠ ᠨᠠᠷ ᠪᠠᠶᠠᠷᠯᠠᠨ ᠴᠡᠩᠭᠡᠵᠦ᠂ ᠦᠬᠡᠷ ᠨᠢᠲᠤᠯᠵᠤ᠂ ᠬᠣᠨᠢ ᠭᠠᠷᠭᠠᠨ᠂ ᠮᠢᠬᠠ ᠢᠳᠡᠵᠦ᠂ ᠳᠠᠷᠠᠰᠤ ᠤᠤᠭᠤᠨ 《ᠮᠠᠷᠭᠠᠰᠢ ᠦᠬᠦᠨᠡ᠂ ᠢᠳᠡᠵᠦ ᠤᠤᠭᠤᠵᠠᠭᠠᠶᠠ︕》 ᠭᠡᠨᠡ᠃
14 ᠲᠡᠢᠮᠦ ᠡᠴᠡ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠴᠢᠬᠢᠨ ᠳᠤ ᠮᠢᠨᠢ ᠢᠯᠡᠷᠬᠡᠶᠢᠯᠡᠵᠦ᠄ 《ᠴᠢᠮᠠᠶᠢ ᠦᠬᠦᠲᠡᠯᠡ ᠡᠨᠡ ᠨᠢᠭᠦᠯ ᠶᠡᠷᠦ ᠬᠡᠯᠲᠦᠷᠢᠭᠦᠯᠦᠭᠳᠡᠬᠦ ᠦᠭᠡᠢ》 ᠭᠡᠪᠡ᠂ ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠤᠯᠠ᠃
15 ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠪᠠ᠄ 《ᠴᠢ ᠣᠷᠳᠣᠨ ᠤ ᠳᠠᠭᠠᠭᠠᠮᠠᠯ ᠱᠧᠪᠨᠠ ᠳᠤ ᠣᠴᠢᠵᠤ ᠶᠠᠷᠢ᠄
16 〈ᠴᠢ ᠡ᠊ᠨᠳᠡ ᠶᠠᠭᠤ ᠬᠢᠵᠦ ᠪᠠᠢᠭᠠ ᠪᠤᠢ︖ ᠴᠢ ᠡ᠊ᠨᠳᠡ ᠬᠡᠨ ᠦ ᠵᠥᠪᠰᠢᠶᠡᠷᠡᠯ ᠢᠶᠡᠷ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠪᠤᠯᠠᠰᠢ ᠪᠠᠷᠢᠪᠠ︖ ᠴᠢ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠪᠤᠯᠠᠰᠢ ᠪᠠᠨ ᠪᠠᠷᠢᠵᠤ ᠬᠠᠳᠠᠨ ᠳᠣᠲᠣᠷᠠ ᠠᠮᠠᠷᠠᠬᠤ ᠭᠠᠵᠠᠷ ᠢᠶᠠᠨ ᠮᠠᠯᠲᠠᠵᠤ ᠪᠠᠢᠨᠠ᠂
17 ᠠᠩ᠋ᠬᠠᠷᠤᠭᠲᠤᠨ᠂ ᠠᠨᠳᠠ ᠮᠢᠨᠢ︕ ᠶᠣᠬᠣᠸᠠ ᠴᠢᠮᠠᠶᠢ ᠴᠢᠩᠭ᠍ᠠ ᠪᠠᠵᠠᠵᠤ ᠴᠢᠮᠠᠶᠢ ᠴᠢᠯᠠᠭᠤᠳᠠᠨ ᠬᠠᠶᠠᠬᠤ ᠭᠡᠵᠦ ᠪᠠᠢᠨᠠ᠃
18 ᠴᠢᠮᠠᠶᠢ ᠪᠥᠮᠪᠥᠭᠡ ᠰᠢᠭ ᠬᠤᠷᠳᠤᠨ ᠪᠥᠮᠪᠥᠷᠢᠭᠦᠯᠵᠦ ᠠᠭᠤᠳᠠᠮ ᠨᠤᠲᠤᠭ ᠤᠷᠤᠭᠤ ᠥᠩᠬᠥᠷᠢᠭᠦᠯᠦᠨᠡ ᠡᠵᠡᠨ ᠦ ᠪᠠᠨ ᠭᠡᠷ ᠦᠨ ᠢᠴᠢᠭᠦᠷᠢ ᠴᠢ ᠲᠡᠨᠳᠡ ᠦᠬᠦᠵᠦ ᠲᠠᠩᠰᠤᠭ ᠲᠡᠷᠭᠡ ᠴᠢᠨᠢ ᠲᠡᠨᠳᠡ ᠦᠯᠡᠳᠡᠨᠡ᠃〉
19 ᠪᠢ ᠴᠢᠮᠠᠶᠢ ᠠᠯᠪᠠᠨ ᠠᠴᠠ ᠴᠢᠨᠢ ᠬᠥᠭᠡᠭᠡᠨᠡ ᠪᠢ ᠴᠢᠮᠠᠶᠢ ᠪᠠᠢᠷᠢ ᠡᠴᠡ ᠴᠢᠨᠢ ᠬᠠᠯᠠᠨᠠ᠃
20 ᠲᠡᠷᠡ ᠡᠳᠦᠷ ᠪᠢ ᠾᠢᠯᠺᠢᠶᠠ ᠶᠢᠨ ᠬᠦᠦ᠂ ᠵᠠᠷᠤᠴᠠ ᠡᠯᠢᠶᠠᠺᠢᠮ ᠢᠶᠠᠨ ᠳᠠᠭᠤᠳᠠᠨᠠ᠃
21 ᠪᠢ ᠬᠤᠪᠴᠠᠰᠤ ᠶᠢ ᠴᠢᠨᠢ ᠲᠡᠭᠦᠨ ᠳᠦ ᠡᠮᠦᠰᠬᠡᠵᠦ ᠪᠦᠰᠡ ᠶᠢ ᠴᠢᠨᠢ ᠲᠡᠭᠦᠨ ᠳᠦ ᠪᠦᠰᠡᠯᠡᠭᠦᠯᠦᠨ ᠡᠷᠬᠡ ᠶᠢ ᠴᠢᠨᠢ ᠲᠡᠭᠦᠨ ᠳᠦ ᠭᠠᠷᠳᠠᠭᠤᠯᠤᠨᠠ ᠲᠡᠷᠡ ᠪᠡᠷ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠶᠦᠳᠠ ᠶᠢᠨ ᠭᠡᠷ ᠦᠨ ᠬᠢᠨ ᠤ ᠡᠴᠢᠭᠡ ᠪᠣᠯᠣᠨᠠ᠃
22 ᠲᠡᠭᠦᠨ ᠦ ᠮᠥᠷᠥᠨ ᠳᠡᠭᠡᠷᠡ ᠪᠢ ᠳ᠋ᠠᠸᠢᠳ᠋ ᠤᠨ ᠭᠡᠷ ᠦᠨ ᠲᠦᠯᠬᠢᠭᠦᠷ ᠢ ᠲᠠᠯᠪᠢᠨᠠ ᠨᠡᠭᠡᠭᠡᠬᠦ ᠳᠦᠨᠢ ᠬᠠᠭᠠᠰᠢ ᠦᠭᠡᠢ ᠬᠠᠭᠠᠬᠤ ᠳᠤᠨᠢ ᠨᠡᠭᠡᠭᠡᠰᠢ ᠦᠭᠡᠢ ᠪᠣᠯᠣᠨᠠ᠃
23 ᠬᠠᠲᠠᠭᠤ ᠭᠠᠵᠠᠷ ᠲᠤ ᠬᠠᠳᠠᠭᠠᠰᠤ ᠰᠢᠭᠠᠬᠤ ᠰᠢᠭ᠋ ᠪᠢ ᠲᠡᠭᠦᠨ ᠢ ᠪᠠᠲᠤᠵᠢᠭᠤᠯᠤᠨᠠ᠂ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠦᠨ ᠲᠥᠯᠥᠭᠡ ᠲᠡᠷᠡ ᠠᠯᠳᠠᠷ ᠬᠦᠨᠳᠦ ᠶᠢᠨ ᠰᠡᠨᠲᠢ ᠪᠣᠯᠬᠤ ᠶᠤᠮ᠃
24 ᠡᠴᠢᠭᠡ ᠶᠢᠨ ᠬᠢᠨᠢ ᠪᠦᠬᠦ ᠠᠯᠳᠠᠷ ᠬᠦᠨᠳᠦ ᠲᠡᠭᠦᠨ ᠳᠡᠭᠡᠷᠡ ᠡᠯᠭᠦᠭᠳᠡᠨᠡ᠂ ᠦᠷᠡ ᠬᠣᠢᠴᠢ ᠪᠤᠶᠤ ᠠᠶᠠᠭᠠᠨ ᠠᠴᠠ ᠸᠠᠭᠠᠷ ᠰᠠᠪᠠ ᠬᠦᠷᠲᠡᠯᠡᠬᠢ ᠵᠢᠵᠢᠭ ᠰᠠᠵᠢᠭ ᠰᠠᠪᠠ ᠨᠢ ᠴᠤ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠦ ᠳᠡᠭᠡᠷᠡ ᠡᠯᠭᠦᠭᠳᠡᠨᠡ᠃ 25 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠲᠡᠷᠡ ᠡᠳᠦᠷ ᠬᠠᠲᠠᠭᠤ ᠭᠠᠵᠠᠷ ᠲᠤ ᠰᠢᠭᠠᠭᠰᠠᠨ ᠬᠠᠳᠠᠭᠠᠰᠤ ᠮᠠᠭᠤᠳᠠᠨᠠ᠂ ᠬᠤᠭᠤᠷᠠᠵᠤ ᠤᠨᠠᠬᠤ ᠳᠤᠨᠢ ᠡᠯᠭᠦᠭᠰᠡᠨ ᠪᠦᠭᠦᠳᠡ ᠨᠢ ᠬᠠᠭᠠᠷᠠᠵᠤ ᠪᠤᠲᠠᠷᠠᠨᠠ᠂〉 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠪᠠ᠃》