ᠢᠰᠠᠢᠶᠠ ᠲᠠᠪᠢᠨ ᠭᠤᠷᠪᠠ
1 ᠬᠠᠷᠢᠨ ᠪᠢᠳᠡᠨ ᠦ ᠰᠣᠨᠣᠰᠬᠠᠭᠰᠠᠨ ᠢ ᠬᠡᠨ ᠢᠲᠡᠭᠡᠪᠡ︖ ᠶᠣᠬᠣᠸᠠ ᠶᠢᠨ ᠮᠤᠲᠤᠷ ᠬᠡᠨ ᠳᠦ ᠢᠯᠡᠷᠡᠭᠰᠡᠨ ᠪᠤᠢ︖
2 ᠲᠡᠷᠡ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠨᠢᠯᠬᠠ ᠨᠠᠬᠢᠶᠠ ᠮᠡᠲᠦ ᠬᠠᠭᠤᠷᠠᠢ ᠭᠠᠵᠠᠷ ᠠᠴᠠ ᠭᠠᠷᠤᠭᠰᠠᠨ ᠡᠰᠢ ᠮᠡᠲᠦ ᠤᠷᠭᠤᠭᠰᠠᠨ ᠪᠢᠳᠡᠨ ᠦ ᠠᠩ᠋ᠬᠠᠷᠤᠮᠠᠷ ᠳᠦᠷᠢ ᠲᠥᠷᠬᠥ᠂ ᠰᠦᠷ ᠵᠢᠪᠬᠤᠯᠠᠩ ᠲᠡᠭᠦᠨ ᠳᠦ ᠦᠭᠡᠢ ᠪᠢᠳᠡᠨ ᠦ ᠬᠦᠰᠡᠮᠡᠷ ᠦᠵᠡᠰᠬᠦᠯᠡᠩ ᠲᠡᠭᠦᠨ ᠳᠦ ᠠᠯᠠᠭᠠ᠂
3 ᠲᠡᠷᠡ ᠬᠥᠮᠦᠰ ᠲᠦ ᠵᠢᠭ᠍ᠰᠢᠭᠳᠡᠵᠦ ᠣᠭᠣᠷᠣᠭᠳᠠᠪᠠ᠂ ᠲᠡᠷᠡ ᠪᠣᠯ ᠤᠢ ᠭᠠᠰᠢᠭᠤ ᠲᠠᠢ ᠬᠥᠮᠦᠨ᠂ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠢ ᠮᠡᠳᠡᠭᠴᠢ ᠬᠥᠮᠦᠨ ᠨᠢᠭᠤᠷ ᠢᠶᠠᠨ ᠪᠤᠷᠤᠭᠤᠯᠠᠨ ᠲᠡᠭᠦᠨ ᠢ ᠵᠢᠭ᠍ᠰᠢᠵᠦ ᠪᠠᠢᠪᠠ ᠪᠢᠳᠡ ᠲᠡᠭᠦᠨ ᠢ ᠲᠣᠭᠣᠭᠰᠠᠨ ᠦᠭᠡᠢ᠃
4 ᠦᠨᠡᠬᠡᠷ ᠲᠡᠷᠡ ᠪᠢᠳᠡᠨ ᠦ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠢ ᠡᠭᠦᠷᠴᠦ ᠪᠢᠳᠡᠨ ᠦ ᠤᠢ ᠭᠠᠰᠢᠭᠤ ᠶᠢ ᠲᠡᠭᠡᠭᠡᠪᠡ︕ ᠬᠠᠷᠢᠨ ᠪᠢᠳᠡ ᠲᠡᠭᠦᠨ ᠢ ᠪᠤᠷᠬᠠᠨ ᠳᠤ ᠵᠣᠳᠣᠭᠳᠠᠵᠤ᠂ ᠴᠣᠬᠢᠭᠳᠠᠵᠤ᠂ ᠵᠣᠪᠠᠵᠤ ᠪᠠᠢᠭᠠ ᠳᠤ ᠲᠣᠭᠠᠴᠠᠪᠠ᠃
5 ᠬᠠᠷᠢᠨ ᠲᠡᠷᠡ ᠪᠢᠳᠡᠨ ᠦ ᠬᠢᠯᠢᠨᠴᠡ ᠶᠢᠨ ᠤᠯᠠᠮ ᠢᠶᠠᠷ ᠬᠠᠳᠬᠤᠭᠳᠠᠵᠤ ᠪᠢᠳᠡᠨ ᠦ ᠭᠡᠮ ᠦᠨ ᠤᠯᠠᠮ ᠢᠶᠠᠷ ᠪᠢᠴᠠᠯᠤᠭᠳᠠᠵᠤ ᠪᠠᠢᠪᠠ᠂ ᠲᠡᠷᠡ ᠰᠢᠳᠬᠡᠭᠳᠡᠭᠰᠡᠨ ᠢᠶᠡᠷ ᠪᠢᠳᠡ ᠠᠮᠤᠷ ᠠᠮᠤᠭᠤᠯᠠᠩ ᠢ ᠣᠯᠵᠤ ᠲᠡᠷᠡ ᠰᠢᠷᠬᠠᠲᠤᠭᠰᠠᠨ ᠢᠶᠠᠷ ᠪᠢᠳᠡ ᠡᠳᠡᠭᠡᠷᠡᠵᠡᠢ᠃
6 ᠪᠢᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠬᠣᠨᠢ ᠮᠡᠲᠦ ᠲᠥᠭᠡᠷᠢᠵᠦ ᠬᠥᠮᠦᠨ ᠪᠦᠷᠢ ᠥᠪᠡᠷ ᠥᠪᠡᠷ ᠦᠨ ᠢᠶᠠᠨ ᠵᠠᠮ ᠢᠶᠠᠷ ᠶᠠᠪᠤᠪᠠ ᠬᠠᠷᠢᠨ ᠶᠣᠬᠣᠸᠠ ᠪᠢᠳᠡ ᠪᠦᠬᠦᠨ ᠦ ᠭᠡᠮ ᠢ ᠲᠡᠭᠦᠨ ᠳᠦ ᠲᠣᠬᠣᠵᠠᠢ᠂
7 ᠲᠡᠷᠡ ᠲᠠᠮᠤᠯᠠᠭᠳᠠᠪᠠ᠂ ᠬᠠᠷᠢᠨ ᠲᠡᠷᠡ ᠵᠣᠪᠠᠵᠤ ᠪᠠᠢᠬᠤ ᠳᠠᠭᠠᠨ ᠠᠮᠠ ᠪᠠᠨ ᠨᠡᠭᠡᠭᠡᠭᠰᠡᠨ ᠦᠭᠡᠢ ᠠᠯᠠᠯᠭᠠᠨ ᠳᠤ ᠠᠪᠠᠴᠢᠭᠳᠠᠬᠤ ᠬᠤᠷᠠᠭᠠ ᠰᠢᠭ᠋ ᠬᠢᠷᠭᠠᠭᠴᠢ ᠶᠢᠨ ᠡᠮᠦᠨᠡ ᠳᠤᠤᠭᠠᠷᠬᠤ ᠦᠭᠡᠢ ᠬᠣᠨᠢ ᠰᠢᠭ᠋ ᠲᠡᠷᠡ ᠠᠮᠠ ᠪᠠᠨ ᠨᠡᠭᠡᠭᠡᠭᠰᠡᠨ ᠦᠭᠡᠢ᠂
8 ᠠᠯᠪᠠᠳᠠᠯᠭᠠ ᠶᠢᠨ ᠰᠢᠭᠦᠯᠲᠡ ᠶᠢᠨ ᠳᠠᠷᠠᠭᠠ ᠲᠡᠷᠡ ᠠᠪᠠᠴᠢᠭᠳᠠᠪᠠ᠂ ᠦᠶᠡ ᠶᠢᠨ ᠬᠢᠨ ᠤ ᠬᠢᠨᠢ ᠳᠤᠮᠳᠠ ᠠᠴᠠ ᠬᠡᠨ ᠨᠢ ᠲᠡᠭᠦᠨ ᠢ ᠠᠷᠠᠳ ᠲᠦᠮᠡᠨ ᠦ ᠮᠢᠨᠢ ᠬᠢᠯᠢᠨᠴᠡ ᠶᠢᠨ ᠲᠥᠯᠥᠭᠡ ᠴᠣᠬᠢᠭᠳᠠᠵᠤ ᠠᠮᠢᠳᠤᠷᠠᠭᠰᠠᠳ ᠤᠨ ᠣᠷᠣᠨ ᠠᠴᠠ ᠲᠠᠰᠤᠯᠤᠭᠳᠠᠭᠰᠠᠨ ᠭᠡᠵᠦ ᠪᠣᠳᠣᠬᠤ ᠪᠣᠯ ᠡ︖
9 ᠲᠡᠷᠡ ᠬᠦᠴᠦᠷᠬᠡᠭᠯᠡᠯ ᠢ ᠦᠢᠯᠡᠳᠦᠭᠡ ᠦᠭᠡᠢ ᠲᠡᠭᠦᠨ ᠦ ᠠᠮᠠᠨ ᠳᠤ ᠵᠠᠯᠢ ᠪᠠᠢᠭᠠ ᠦᠭᠡᠢ ᠪᠣᠯᠪᠠᠴᠤ ᠲᠡᠷᠡ ᠪᠡᠷ ᠪᠤᠷᠤᠭᠤᠲᠠᠳ ᠤᠨ ᠬᠠᠮᠲᠤ ᠪᠤᠯᠠᠰᠢᠯᠠᠭᠳᠠᠪᠠ ᠪᠤᠯᠠᠰᠢ ᠨᠢ ᠪᠠᠶᠠᠨ ᠬᠥᠮᠦᠨ ᠲᠡᠢ ᠬᠠᠮᠲᠤ ᠪᠠᠢᠪᠠ᠂
10 ᠭᠡᠪᠡᠴᠦ ᠲᠡᠭᠦᠨ ᠢ ᠪᠢᠴᠠᠯᠵᠤ ᠵᠣᠪᠠᠭᠠᠬᠤ ᠨᠢ ᠶᠣᠬᠣᠸᠠ ᠶᠢᠨ ᠲᠠᠭᠠᠯᠠᠯ ᠪᠠᠢᠪᠠ ᠲᠡᠷᠡ ᠠᠮᠢ ᠪᠠᠨ ᠨᠢᠭᠦᠯ ᠦᠨ ᠲᠥᠯᠥᠭᠡᠬᠢ ᠲᠠᠬᠢᠯ ᠪᠣᠯᠭᠠᠪᠠᠯ ᠦᠷᠡ ᠬᠣᠢᠴᠢ ᠪᠠᠨ ᠦᠵᠡᠨᠡ ᠡᠳᠦᠷ ᠬᠣᠨᠣᠭ ᠨᠢ ᠤᠷᠲᠤᠰᠤᠨ ᠶᠣᠬᠣᠸᠠ ᠶᠢᠨ ᠲᠠᠭᠠᠯᠠᠯ ᠲᠡᠭᠦᠨ ᠦ ᠭᠠᠷ ᠲᠤ ᠪᠠᠳᠠᠷᠠᠨᠠ᠃
11 ᠲᠡᠷᠡ ᠠᠮᠰᠠᠭᠰᠠᠨ ᠵᠣᠪᠠᠭᠤᠷᠢ ᠪᠠᠨ ᠡᠷᠭᠢᠨ ᠬᠠᠷᠠᠵᠤ ᠰᠡᠳᠬᠢᠯ ᠬᠠᠩ᠋ᠭᠠᠯᠤᠭᠤᠨ ᠪᠣᠯᠣᠨᠠ᠂ ᠵᠥᠪᠲᠦ ᠵᠠᠷᠤᠴᠠ ᠮᠢᠨᠢ ᠮᠡᠳᠡᠯᠭᠡ ᠪᠡᠷ ᠢᠶᠠᠨ ᠣᠯᠠᠨ ᠢ ᠵᠥᠪᠲᠥᠭᠡᠵᠦ ᠲᠡᠳᠡᠨ ᠦ ᠭᠡᠮ ᠢ ᠲᠡᠭᠡᠭᠡᠬᠦ ᠪᠣᠯᠣᠨᠠ᠃
12 ᠡᠢᠮᠦ ᠡᠴᠡ ᠪᠢ ᠲᠡᠭᠦᠨ ᠳᠦ ᠶᠡᠬᠡᠰ ᠲᠡᠢ ᠬᠠᠮᠲᠤ ᠬᠤᠪᠢ ᠶᠢ ᠣᠯᠭᠣᠨᠠ ᠲᠡᠷᠡ ᠬᠦᠴᠦᠲᠡᠳ ᠲᠡᠢ ᠣᠯᠵᠠ ᠬᠤᠪᠢᠶᠠᠬᠤ ᠪᠣᠯᠣᠨᠠ ᠤᠴᠢᠷ ᠨᠢ ᠲᠡᠷᠡ ᠠᠮᠢ ᠪᠠᠨ ᠦᠬᠦᠯ ᠤᠷᠤᠭᠤ ᠠᠰᠬᠠᠭᠰᠠᠨ ᠪᠤᠷᠤᠭᠤᠲᠠᠨ ᠳᠤ ᠲᠣᠭᠠᠴᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠣᠯᠠᠨ ᠤ ᠨᠢᠭᠦᠯ ᠢ ᠥᠪᠡᠷ ᠲᠡᠭᠡᠨ ᠡᠭᠦᠷᠴᠦ ᠪᠤᠷᠤᠭᠤᠲᠠᠳ ᠤᠨ ᠲᠥᠯᠥᠭᠡ ᠵᠠᠭᠤᠴᠢᠯᠠᠭᠰᠠᠨ ᠶᠤᠮ᠃