ᠢᠰᠠᠢᠶᠠ ᠳᠥᠴᠢᠨ ᠬᠣᠶᠠᠷ
ᠡᠵᠡᠨ ᠦ ᠵᠠᠷᠤᠴᠠ ᠮᠧᠰᠢᠶᠠ
1 ᠮᠢᠨᠦ ᠳᠡᠮᠵᠢᠳᠡᠭ ᠵᠠᠷᠤᠴᠠ᠂ ᠮᠢᠨᠦ ᠰᠣᠩ᠋ᠭᠣᠭᠰᠠᠨ᠂ ᠮᠢᠨᠦ ᠲᠠᠭᠠᠯᠠᠳᠠᠭ ᠨᠢᠭᠡᠨ ᠢ ᠬᠠᠷᠠ ᠪᠢ ᠲᠡᠭᠦᠨ ᠳᠦ ᠰᠦᠨᠡᠰᠦ ᠪᠡᠨ ᠬᠦᠷᠲᠡᠭᠡᠨᠡ ᠲᠡᠷᠡ ᠪᠡᠷ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠲᠦ ᠰᠢᠳᠤᠷᠭᠤ ᠶᠢ ᠠᠪᠴᠢᠷᠠᠨᠠ᠃
2 ᠲᠡᠷᠡ ᠬᠠᠰᠬᠢᠷᠬᠤ ᠦᠭᠡᠢ ᠳᠠᠭᠤ ᠪᠠᠨ ᠥᠨᠳᠥᠷᠰᠡᠭᠡᠬᠦ ᠦᠭᠡᠢ ᠲᠡᠭᠦᠨ ᠦ ᠳᠠᠭᠤ ᠭᠤᠳᠤᠮᠵᠢᠨ ᠳᠤ ᠰᠣᠨᠣᠰᠳᠠᠬᠤ ᠦᠭᠡᠢ᠂
3 ᠲᠡᠷᠡ ᠪᠡᠷ ᠪᠢᠴᠠᠯᠤᠭᠳᠠᠭᠰᠠᠨ ᠵᠡᠭᠡᠰᠦ ᠶᠢ ᠬᠤᠭᠤᠯᠬᠤ ᠦᠭᠡᠢ ᠪᠦᠳᠡᠭᠢᠷᠡᠵᠦ ᠪᠤᠢ ᠵᠤᠯᠠ ᠶᠢ ᠪᠥᠬᠥᠭᠡᠬᠦ ᠦᠭᠡᠢ ᠭᠣᠣᠯᠴᠢ ᠶᠣᠰᠣ ᠶᠢ ᠠᠪᠴᠢᠷᠠᠨ ᠪᠠᠲᠤᠵᠢᠭᠤᠯᠤᠨᠠ᠂
4 ᠲᠡᠷᠡ ᠬᠤᠭᠤᠷᠠᠬᠤ ᠦᠭᠡᠢ᠂ ᠨᠤᠭᠤᠷᠠᠬᠤ ᠦᠭᠡᠢ᠂ ᠭᠠᠵᠠᠷ ᠳᠡᠭᠡᠷᠡ ᠭᠣᠣᠯᠴᠢ ᠶᠣᠰᠣ ᠶᠢ ᠲᠣᠭᠲᠠᠭᠠᠬᠤ ᠪᠣᠯᠣᠨᠠ ᠠᠷᠠᠯ ᠤᠨ ᠬᠢᠨ ᠴᠤ ᠲᠡᠭᠦᠨ ᠦ ᠰᠤᠷᠭᠠᠯ ᠤᠷᠤᠭᠤ ᠲᠡᠮᠡᠦᠯᠦᠨᠡ᠃
5 ᠲᠩᠷᠢ ᠶᠢ ᠪᠦᠲᠦᠭᠡᠵᠦ᠂ ᠲᠡᠭᠦᠨ ᠢ ᠳᠡᠯᠡᠭᠰᠡᠨ ᠳᠡᠯᠡᠬᠡᠢ ᠪᠣᠯᠣᠨ ᠲᠡᠭᠦᠨ ᠡᠴᠡ ᠭᠠᠷᠬᠤ ᠪᠦᠬᠦᠨ ᠢ ᠳᠡᠯᠭᠡᠭᠰᠡᠨ ᠲᠡᠭᠦᠨ ᠦ ᠳᠡᠭᠡᠷᠡᠬᠢ ᠠᠷᠠᠳ ᠲᠦᠮᠡᠨ ᠳᠦ ᠠᠮᠢᠰᠬᠤᠯ ᠢ ᠲᠡᠭᠦᠨ ᠦ ᠳᠣᠲᠣᠷᠠ ᠶᠠᠪᠤᠭᠴᠢᠳ ᠲᠤ ᠰᠦᠨᠡᠰᠦ ᠶᠢ ᠰᠣᠶᠣᠷᠬᠠᠭᠴᠢ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄
6 《ᠶᠣᠬᠣᠸᠠ ᠪᠢ ᠵᠥᠪ ᠢᠶᠡᠨ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠴᠢᠮᠠᠶᠢ ᠳᠠᠭᠤᠳᠠᠭᠰᠠᠨ ᠪᠢ ᠭᠠᠷ ᠠᠴᠠ ᠴᠢᠨᠢ ᠠᠳᠬᠤᠨ ᠴᠢᠮᠠᠶᠢ ᠬᠠᠮᠠᠭᠠᠯᠠᠵᠤ ᠴᠢᠮᠠᠶᠢ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠭᠡᠷᠡ ᠬᠠᠷᠢᠴᠤᠳ ᠤᠨ ᠭᠡᠷᠡᠯ ᠪᠣᠯᠭᠠᠨᠠ᠂
7 ᠡᠢᠮᠦ ᠡᠴᠡ ᠴᠢ ᠰᠣᠬᠣᠷ ᠤᠨ ᠨᠢᠳᠦ ᠶᠢ ᠨᠡᠭᠡᠭᠡᠵᠦ ᠬᠣᠷᠢᠭᠳᠠᠯ ᠤᠳ ᠢ ᠭᠢᠨᠳᠠᠨ ᠠᠴᠠ ᠭᠠᠷᠭᠠᠨ ᠬᠠᠷᠠᠩ᠋ᠭᠤᠢ ᠳᠤ ᠰᠠᠭᠤᠭᠴᠢᠳ ᠢ ᠴᠤ ᠭᠠᠷᠭᠠᠨᠠ᠃
8 ᠪᠢ ᠪᠣᠯ ᠶᠣᠬᠣᠸᠠ ᠨᠡᠷᠡ ᠮᠢᠨᠢ ᠡᠨᠡ ᠪᠢ ᠠᠯᠳᠠᠷ ᠢᠶᠠᠨ ᠪᠤᠰᠤᠳ ᠲᠤ ᠮᠠᠭᠲᠠᠭᠠᠯ ᠢᠶᠠᠨ ᠰᠢᠲᠦᠭᠡᠨ ᠨᠦᠭᠦᠳ ᠲᠦ ᠥᠭᠬᠦ ᠦᠭᠡᠢ᠃
9 ᠬᠠᠷᠠ᠂ ᠤᠷᠢᠳᠤ ᠶᠢᠨ ᠵᠦᠢᠯᠡᠰ ᠪᠡᠶᠡᠯᠡᠭᠳᠡᠭᠰᠡᠨ ᠪᠢ ᠰᠢᠨᠡ ᠵᠦᠢᠯᠡᠰ ᠢ ᠢᠯᠡᠷᠬᠡᠶᠢᠯᠡᠶᠡ᠂ ᠰᠣᠶᠣᠭᠠᠯᠠᠨ ᠭᠠᠷᠬᠤ ᠠᠴᠠ ᠨᠢ ᠡᠮᠦᠨᠡ ᠪᠢ ᠲᠠ ᠨᠠᠷ ᠲᠤ ᠰᠣᠨᠣᠷᠳᠠᠭᠤᠯᠤᠶᠠ᠃》
10 ᠳᠠᠯᠠᠢ ᠤᠷᠤᠭᠤ ᠶᠠᠪᠤᠭᠰᠠᠳ ᠳᠠᠯᠠᠢ ᠶᠢᠨ ᠳᠣᠲᠣᠷᠠᠬᠢ ᠪᠦᠭᠦᠳᠡ ᠳᠠᠯᠠᠢ ᠶᠢᠨ ᠬᠥᠪᠡᠭᠡ᠂ ᠲᠡᠨᠳᠡᠬᠢ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠡ᠂ ᠶᠣᠬᠣᠸᠠ ᠳᠤ ᠰᠢᠨᠡ ᠳᠠᠭᠤᠤ ᠶᠢ ᠳᠠᠭᠤᠯᠠ ᠲᠡᠭᠦᠨ ᠢ ᠳᠡᠯᠡᠬᠡᠢ ᠶᠢᠨ ᠬᠢᠵᠠᠭᠠᠷ ᠠᠴᠠ ᠮᠠᠭᠲᠠ
11 ᠴᠥᠯ ᠬᠢᠭᠡᠳ ᠲᠣᠰᠬᠣᠳ ᠨᠢ ᠺᠧᠳᠠᠷ ᠤᠨ ᠰᠠᠭᠤᠷᠢᠨ ᠨᠤᠭᠤᠳ ᠨᠢ ᠳᠠᠭᠤ ᠪᠠᠨ ᠥᠨᠳᠥᠷᠰᠡᠭᠡᠭ ᠰᠧᠯᠠ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠪᠠᠶᠠᠷ ᠲᠠᠢ ᠪᠠᠷ ᠳᠠᠭᠤᠯᠠᠭ᠂ ᠲᠡᠳᠡ ᠠᠭᠤᠯᠠ ᠶᠢᠨ ᠣᠷᠣᠢ ᠠᠴᠠ ᠤᠤᠬᠠᠢᠯᠠᠵᠤ
12 ᠶᠣᠬᠣᠸᠠ ᠳᠤ ᠠᠯᠳᠠᠷ ᠢ ᠡᠷᠭᠦᠨ ᠮᠠᠭᠲᠠᠭᠠᠯ ᠢ ᠨᠢ ᠳᠠᠯᠠᠢ ᠶᠢᠨ ᠬᠥᠪᠡᠭᠡᠨ ᠳᠦ ᠲᠤᠩ᠋ᠬᠠᠭᠯᠠᠬᠤ ᠪᠣᠯᠣᠨᠠ᠂
13 ᠶᠣᠬᠣᠸᠠ ᠪᠠᠭᠠᠲᠤᠷ ᠮᠡᠲᠦ ᠤᠷᠤᠭᠰᠢᠯᠠᠵᠤ ᠪᠠᠢᠯᠳᠤᠭᠴᠢ ᠮᠡᠲᠦ ᠬᠠᠯᠠᠭᠤᠨ ᠰᠡᠳᠬᠢᠯ ᠨᠢ ᠣᠷᠭᠢᠯᠵᠤ ᠤᠤᠬᠠᠢᠯᠠᠨ ᠬᠠᠰᠬᠢᠷᠴᠤ ᠳᠠᠢᠰᠤᠨ ᠢᠶᠠᠨ ᠳᠠᠷᠤᠨᠠ᠃
14 《ᠪᠢ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠳᠠᠭᠤ ᠪᠠᠨ ᠬᠤᠷᠢᠶᠠᠵᠤ᠂ ᠪᠡᠶᠡ ᠪᠡᠨ ᠪᠠᠷᠢᠯᠠ ᠣᠳᠣ ᠪᠢ ᠨᠢᠷᠠᠢᠯᠠᠵᠤ ᠪᠠᠢᠭᠠ ᠡᠮᠡᠭᠲᠡᠢ ᠮᠡᠲᠦ ᠬᠠᠰᠬᠢᠷᠤᠨᠠ ᠠᠮᠢᠰᠬᠤᠭᠠ ᠳᠠᠪᠬᠤᠴᠠᠨ ᠪᠠᠬᠠᠷᠳᠠᠬᠤ ᠪᠣᠯᠣᠨᠠ᠃
15 ᠠᠭᠤᠯᠠ ᠲᠣᠯᠣᠭᠠᠳ ᠢ ᠬᠤᠪᠠᠬᠠᠢᠷᠠᠭᠤᠯᠤᠨ ᠡᠪᠡᠰᠦ ᠨᠣᠭᠣᠭᠠ ᠶᠢ ᠬᠠᠲᠠᠭᠠᠵᠤ ᠭᠣᠣᠯ ᠮᠥᠷᠡᠨ ᠢ ᠡᠷᠭᠢ ᠪᠣᠯᠭᠠᠵᠤ ᠴᠥᠭᠥᠷᠥᠮ ᠤᠳ ᠢ ᠰᠢᠷᠭᠢᠭᠡᠨᠡ᠃
16 ᠪᠢ ᠰᠣᠬᠣᠷ ᠤᠳ ᠢ ᠲᠡᠳᠡᠨ ᠦ ᠮᠡᠳᠡᠳᠡᠭ ᠦᠭᠡᠢ ᠵᠠᠮ ᠢᠶᠠᠷ ᠠᠯᠬᠤᠭᠤᠯᠵᠤ ᠲᠡᠳᠡᠨ ᠦ ᠮᠡᠳᠡᠬᠦ ᠦᠭᠡᠢ ᠬᠠᠷᠭᠤᠢ ᠪᠠᠷ ᠬᠥᠲᠥᠯᠥᠨᠡ ᠲᠡᠳᠡᠨ ᠦ ᠡᠮᠦᠨᠡ ᠬᠠᠷᠠᠩ᠋ᠭᠤᠢ ᠶᠢ ᠭᠡᠷᠡᠯ ᠪᠣᠯᠭᠠᠨ ᠪᠠᠷᠲᠠᠭᠠ ᠲᠠᠢ ᠶᠢ ᠨᠢ ᠲᠡᠭᠰᠢᠯᠡᠨᠡ ᠲᠡᠳᠡᠨ ᠦ ᠲᠥᠯᠥᠭᠡ ᠪᠢ ᠡᠳᠡᠭᠡᠷ ᠢ ᠦᠢᠯᠡᠳᠬᠦ ᠪᠥᠭᠡᠳ ᠲᠡᠳᠡᠨ ᠢ ᠣᠷᠬᠢᠬᠤ ᠦᠭᠡᠢ᠃
17 ᠬᠠᠷᠢᠨ ᠰᠢᠲᠦᠭᠡᠨ ᠳᠦ ᠢᠲᠡᠭᠡᠭᠴᠢᠳ ᠬᠥᠷᠥᠭ ᠤᠳ ᠲᠤ᠄ 〈ᠪᠢᠳᠡᠨ ᠦ ᠪᠤᠷᠬᠠᠳ〉 ᠭᠡᠭᠴᠢᠳ ᠭᠣᠯᠣᠭᠳᠠᠵᠤ᠂ ᠶᠡᠬᠡᠳᠡ ᠭᠤᠲᠤᠮᠰᠢᠭ ᠲᠠᠢ ᠪᠣᠯᠣᠨᠠ᠃
ᠤᠬᠠᠭᠠᠨ ᠦᠭᠡᠢ ᠠᠷᠠᠳ ᠲᠦᠮᠡᠨ
18 ᠳᠦᠯᠡᠢ ᠬᠥᠮᠦᠰ ᠡ᠂ ᠰᠣᠨᠣᠰ︕ ᠰᠣᠬᠣᠷ ᠬᠥᠮᠦᠰ ᠡ᠂ ᠠᠩ᠋ᠬᠠᠷᠤᠨ ᠬᠠᠷᠠ︕
19 ᠮᠢᠨᠦ ᠵᠠᠷᠤᠴᠠ ᠰᠢᠭ᠋ ᠰᠣᠬᠣᠷ᠂ ᠮᠢᠨᠦ ᠢᠯᠡᠭᠡᠭᠰᠡᠨ ᠡᠯᠴᠢ ᠰᠢᠭ ᠳᠦᠯᠡᠢ ᠨᠢ ᠬᠡᠨ ᠪᠤᠢ︖ ᠭᠡᠷᠡ ᠶᠢᠨ ᠮᠢᠨᠢ ᠬᠠᠮᠲᠤᠷᠠᠭᠴᠢ ᠰᠢᠭ᠋ ᠰᠣᠬᠣᠷ᠂ ᠶᠣᠬᠣᠸᠠ ᠶᠢᠨ ᠵᠠᠷᠤᠴᠠ ᠰᠢᠭ᠋ ᠰᠣᠬᠣᠷ ᠨᠢ ᠬᠡᠨ ᠪᠤᠢ︖
20 ᠴᠢ ᠠᠯᠢᠪᠠ ᠶᠢ ᠬᠠᠷᠠᠳᠠᠭ ᠪᠣᠯᠪᠠᠴᠤ ᠠᠩᠵᠠᠭᠠᠷᠠᠳᠠᠭ ᠦᠭᠡᠢ ᠴᠢᠬᠢ ᠴᠢᠨᠢ ᠨᠡᠭᠡᠭᠡᠯᠲᠡ ᠲᠠᠢ ᠪᠠᠢᠪᠠᠴᠤ ᠰᠣᠨᠣᠰᠳᠠᠭ ᠦᠭᠡᠢ᠃
21 ᠥᠪᠡᠷ ᠦᠨ ᠢᠶᠠᠨ ᠵᠥᠪ ᠦᠨ ᠲᠤᠯᠠᠳᠠ ᠬᠠᠤᠯᠢ ᠪᠠᠨ ᠠᠭᠤᠤ ᠪᠥᠭᠡᠳ ᠠᠯᠳᠠᠷ ᠲᠠᠢ ᠪᠣᠯᠭᠠᠬᠤ ᠨᠢ ᠶᠣᠬᠣᠸᠠ ᠳᠤ ᠲᠠᠭᠠᠯᠠᠮᠵᠢᠲᠠᠢ᠂
22 ᠬᠠᠷᠢᠨ ᠡᠨᠡ ᠠᠷᠠᠳ ᠲᠦᠮᠡᠨ ᠲᠣᠨᠣᠭᠤᠯᠵᠤ᠂ ᠳᠡᠭᠡᠷᠡᠮᠳᠡᠭᠦᠯᠵᠦ ᠪᠠᠢᠨᠠ ᠲᠡᠳᠡ ᠪᠦᠭᠦᠳᠡ ᠨᠦᠬᠡᠨ ᠳᠦ ᠬᠣᠷᠢᠭᠳᠠᠵᠤ᠂ ᠭᠢᠨᠳᠠᠨ ᠳᠤ ᠳᠠᠯᠳᠠᠯᠠᠭᠤᠯᠵᠠᠢ ᠲᠡᠳᠡ ᠲᠣᠨᠣᠭᠤᠯᠤᠭᠰᠠᠨ᠂ ᠴᠢᠯᠥᠭᠡᠯᠡᠭᠴᠢ ᠠᠯᠠᠭᠠ ᠲᠡᠳᠡ ᠳᠡᠭᠡᠷᠡᠮᠳᠡᠭᠦᠯᠦᠭᠰᠡᠨ᠂ 〈ᠪᠤᠴᠠᠭᠠᠵᠤ ᠥᠭ〉 ᠭᠡᠭᠴᠢ ᠨᠢ ᠠᠯᠠᠭᠠ᠃》
23 ᠲᠠ ᠨᠠᠷ ᠤᠨ ᠬᠡᠨ ᠨᠢ ᠡᠭᠦᠨ ᠳᠦ ᠴᠢᠬᠢ ᠲᠠᠯᠪᠢᠬᠤ ᠪᠤᠢ︖ ᠬᠡᠨ ᠢᠷᠡᠭᠡᠳᠦᠢ ᠶᠢᠨ ᠲᠤᠬᠠᠢ ᠠᠩ᠋ᠬᠠᠷᠤᠯ ᠲᠠᠯᠪᠢᠵᠤ᠂ ᠰᠣᠨᠣᠰᠬᠤ ᠶᠤᠮ ᠪᠤᠢ︖
24 ᠶᠠᠺᠣᠪ ᠢ ᠳᠡᠭᠡᠷᠡᠮᠳᠡᠭᠴᠢᠳ᠂ ᠢᠰᠷᠧᠯ ᠢ ᠲᠣᠨᠣᠭᠴᠢᠳ ᠲᠤ ᠬᠡᠨ ᠲᠤᠰᠢᠶᠠᠭᠰᠠᠨ ᠪᠤᠢ︖ ᠶᠣᠬᠣᠸᠠ ᠪᠢᠰᠢ ᠤᠤ︖ ᠪᠢᠳᠡ ᠲᠡᠭᠦᠨ ᠳᠦ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠠᠷᠠᠳ ᠲᠦᠮᠡᠨ ᠲᠡᠭᠦᠨ ᠦ ᠵᠠᠮ ᠢᠶᠠᠷ ᠶᠠᠪᠤᠬᠤ ᠶᠢ ᠬᠦᠰᠡᠭᠰᠡᠨ ᠦᠭᠡᠢ ᠲᠡᠭᠦᠨ ᠦ ᠬᠠᠤᠯᠢ ᠶᠢ ᠴᠤ ᠳᠠᠭᠠᠭᠰᠠᠨ ᠦᠭᠡᠢ᠃
25 ᠲᠡᠢᠮᠦ ᠡᠴᠡ ᠶᠣᠬᠣᠸᠠ ᠲᠡᠳᠡᠨ ᠦ ᠳᠡᠭᠡᠷᠡ ᠥᠪᠡᠷ ᠦᠨ ᠢᠶᠠᠨ ᠰᠢᠷᠦᠭᠦᠨ ᠬᠢᠯᠢᠩ ᠪᠠ ᠠᠶᠤᠮᠰᠢᠭᠲᠤ ᠳᠠᠢᠨ ᠢ ᠠᠰᠬᠠᠪᠠ ᠳᠠᠢᠨ ᠡᠷᠭᠢᠨ ᠲᠣᠭᠣᠷᠢᠨ ᠢ ᠨᠢ ᠭᠠᠯᠳᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠮᠡᠳᠡᠭᠰᠡᠨ ᠦᠭᠡᠢ ᠲᠡᠳᠡᠨ ᠢ ᠰᠢᠲᠠᠭᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠰᠠᠨᠠᠭᠠᠨ ᠳᠠᠭᠠᠨ ᠠᠪᠤᠭᠰᠠᠨ ᠦᠭᠡᠢ᠃