ᠢᠰᠠᠢᠶᠠ ᠳᠥᠴᠢᠨ ᠨᠢᠭᠡ
ᠠᠪᠤᠷᠠᠭᠴᠢ ᠢᠷᠡᠨᠡ
1 《ᠠᠷᠠᠯ ᠤᠳ ᠡ᠂ ᠮᠢᠨᠦ ᠡᠮᠦᠨᠡ ᠴᠢᠮᠡᠭᠡ ᠦᠭᠡᠢ ᠪᠠᠢ᠂ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡ᠂ ᠬᠦᠴᠦ ᠪᠡᠨ ᠰᠢᠨᠡᠴᠢᠯᠡᠭᠡᠳ ᠢᠷᠡᠵᠦ ᠶᠠᠷᠢ ᠪᠢᠳᠡ ᠴᠥᠮ ᠢᠶᠡᠷ ᠢᠶᠠᠨ ᠬᠠᠮᠲᠤ ᠰᠢᠭᠦᠯᠲᠡ ᠤᠷᠤᠭᠤ ᠣᠢᠷᠠᠲᠤᠶᠠ᠃
2 ᠬᠡᠨ ᠳᠣᠷᠣᠨᠠ ᠵᠦᠭ ᠡᠴᠡ ᠵᠥᠪᠲᠦ ᠨᠢᠭᠡᠨ ᠢ ᠪᠣᠰᠬᠠᠵᠤ ᠬᠥᠯ ᠳᠣᠣᠷᠠ ᠪᠠᠨ ᠳᠠᠭᠤᠳᠠᠭᠰᠠᠨ ᠪᠤᠢ︖ ᠬᠡᠨ ᠲᠡᠭᠦᠨ ᠳᠦ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠲᠤᠰᠢᠶᠠᠨ᠂ ᠬᠠᠭᠠᠳ ᠢ ᠵᠠᠬᠢᠷᠤᠭᠤᠯᠤᠭᠰᠠᠨ ᠪᠤᠢ︖ ᠬᠡᠨ ᠢᠯᠳᠦ ᠪᠡᠷ ᠢᠶᠠᠨ ᠲᠡᠳᠡᠨ ᠢ ᠲᠣᠭᠣᠰᠣ ᠮᠡᠲᠦ᠂ ᠨᠤᠮᠤ ᠪᠠᠷ ᠢᠶᠠᠨ ᠲᠡᠳᠡᠨ ᠢ ᠰᠦᠷᠡᠯ ᠮᠡᠲᠦ ᠬᠡᠶᠢᠰᠭᠡᠪᠡ︖
3 ᠲᠡᠳᠡᠨ ᠢ ᠮᠥᠰᠬᠢᠬᠦ ᠳᠡᠭᠡᠨ ᠲᠡᠷᠡ ᠬᠥᠯ ᠲᠠᠯᠪᠢᠵᠤ ᠪᠠᠢᠭᠠ ᠦᠭᠡᠢ ᠵᠠᠮ ᠢᠶᠠᠷ ᠠᠮᠤᠷ ᠲᠠᠢᠪᠤᠩ ᠥᠩᠭᠡᠷᠡᠨᠡ᠃
4 ᠬᠡᠨ ᠡᠭᠦᠨ ᠢ ᠪᠡᠶᠡᠯᠡᠭᠦᠯᠦᠨ ᠭᠦᠢᠴᠡᠳᠬᠡᠪᠡ︖ ᠡᠬᠢᠨ ᠡᠴᠡ ᠠᠪᠤᠭᠠᠳ ᠬᠡᠨ ᠴᠠᠭ ᠡᠷᠡᠨ ᠢ ᠳᠠᠭᠤᠳᠠᠨ ᠭᠠᠷᠭᠠᠭᠰᠠᠭᠠᠷ ᠪᠠᠢᠨᠠ︖ ᠶᠣᠬᠣᠸᠠ ᠪᠢ ᠯᠠ ᠡᠬᠢᠯᠡᠯ ᠲᠡᠢ᠂ ᠲᠡᠭᠦᠰᠬᠡᠯ ᠤᠳ ᠲᠠᠢ ᠬᠠᠮᠲᠤ ᠪᠠᠢᠳᠠᠭ ᠲᠡᠷᠡ ᠮᠥᠨ᠃》
5 ᠠᠷᠠᠯ ᠤᠳ ᠦᠵᠡᠭᠡᠳ ᠠᠶᠤᠵᠤ ᠳᠡᠯᠡᠬᠡᠢ ᠶᠢᠨ ᠬᠢᠵᠠᠭᠠᠷ ᠤᠳ ᠲᠦᠭᠰᠢᠪᠡ ᠲᠡᠳᠡ ᠣᠢᠷᠠᠲᠤᠨ ᠢᠷᠡᠨᠡ᠂
6 ᠲᠡᠳᠡ ᠪᠦᠭᠦᠳᠡ ᠪᠡᠶᠡ ᠪᠡᠶᠡ ᠪᠡᠨ ᠲᠤᠰᠠᠯᠠᠨ ᠨᠢᠭᠡ ᠨᠢ ᠨᠥᠭᠥᠭᠡ ᠪᠡᠨ 《ᠵᠣᠷᠢᠭᠲᠠᠢ ᠪᠠᠢ》 ᠭᠡᠨᠡ᠃
7 ᠳᠠᠷᠬᠠᠨ ᠨᠢ ᠠᠯᠲᠠ ᠳᠠᠪᠲᠠᠭᠴᠢ ᠶᠢ ᠵᠣᠷᠢᠭᠵᠢᠭᠤᠯᠵᠤ ᠠᠯᠤᠬᠠᠴᠢᠨ ᠨᠢ ᠳᠥᠰᠢᠴᠢᠨ ᠢᠶᠠᠨ ᠵᠣᠷᠢᠭᠵᠢᠭᠤᠯᠤᠨ ᠭᠠᠩᠨᠠᠭᠠᠰᠤ ᠶᠢ ᠦᠵᠡᠭᠡᠳ 《ᠰᠠᠢᠨ ᠪᠠᠢᠨᠠ》 ᠭᠡᠵᠦ ᠰᠢᠲᠦᠭᠡᠨ ᠢ ᠭᠠᠩ᠋ᠬᠤᠭᠤᠯᠬᠤ ᠦᠭᠡᠢ ᠭᠡᠵᠦ ᠬᠠᠳᠠᠭᠠᠰᠤ ᠪᠠᠷ ᠲᠣᠭᠲᠠᠭᠠᠨᠠ᠂
8 《ᠬᠠᠷᠢᠨ ᠴᠢ ᠮᠢᠨᠦ ᠪᠣᠭᠣᠯ ᠢᠰᠷᠧᠯ ᠡ︕ ᠮᠢᠨᠦ ᠰᠣᠩ᠋ᠭᠣᠭᠰᠠᠨ ᠶᠠᠺᠣᠪ ᠡ︕ ᠮᠢᠨᠦ ᠨᠠᠢᠵᠠ ᠠᠪᠷᠠᠬᠠᠮ ᠤᠨ ᠦᠷᠡ ᠤᠳᠤᠮ ᠡ︕
9 ᠴᠢᠮᠠᠶᠢ ᠪᠢ ᠭᠠᠵᠠᠷ ᠤᠨ ᠬᠢᠵᠠᠭᠠᠷ ᠠᠴᠠ ᠠᠪᠴᠢᠷᠠᠪᠠ ᠴᠢᠮᠠᠶᠢ ᠪᠢ ᠥᠨᠴᠥᠭ ᠪᠤᠯᠤᠩ ᠠᠴᠠ ᠳᠠᠭᠤᠳᠠᠵᠤ 〈ᠴᠢ ᠮᠢᠨᠦ ᠵᠠᠷᠤᠴᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠪᠢ ᠴᠢᠮᠠᠶᠢ ᠰᠣᠩ᠋ᠭᠣᠭᠰᠠᠨ ᠴᠢᠮᠠᠶᠢ ᠭᠣᠯᠣᠭᠠ ᠦᠭᠡᠢ᠃
10 ᠪᠦᠦ ᠠᠶᠤ︕ ᠪᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠨᠠ ᠪᠦᠦ ᠰᠠᠨᠳᠤᠷ᠂ ᠪᠢ ᠴᠢᠨᠦ ᠪᠤᠷᠬᠠᠨ ᠪᠠᠢᠨᠠ ᠪᠢ ᠴᠢᠮᠠᠶᠢ ᠲᠡᠩᠬᠡᠷᠡᠭᠦᠯᠦᠨᠡ ᠦᠨᠡᠬᠡᠷ ᠪᠢ ᠴᠢᠮᠠ ᠳᠤ ᠲᠤᠰᠠᠯᠠᠨᠠ ᠦᠨᠡᠬᠡᠷ ᠪᠢ ᠴᠢᠮᠠᠶᠢ ᠢᠯᠠᠭᠤᠭᠰᠠᠨ 17 ᠪᠠᠷᠠᠭᠤᠨ ᠮᠤᠲᠤᠷ ᠢᠶᠠᠷ ᠢᠶᠠᠨ ᠳᠡᠮᠵᠢᠨᠡ᠃
11 ᠬᠠᠷᠠ᠂ ᠴᠢᠮᠠ ᠳᠤ ᠬᠢᠯᠢᠩᠨᠡᠭᠰᠡᠨ ᠪᠦᠬᠦᠨ ᠢᠴᠢᠵᠦ᠂ ᠭᠤᠲᠤᠮᠰᠢᠭ ᠪᠣᠯᠣᠨᠠ ᠴᠢᠮᠠ ᠲᠠᠢ ᠮᠠᠷᠭᠤᠯᠳᠤᠭᠴᠢᠳ ᠶᠠᠭᠤ ᠴᠤ ᠪᠢᠰᠢ ᠪᠣᠯᠵᠤ᠂ ᠮᠥᠬᠥᠨᠡ᠃
12 ᠴᠢᠮᠠᠶᠢ ᠳᠠᠢᠰᠦᠩᠨᠠᠭᠴᠢ ᠶᠢ ᠴᠢ ᠡᠷᠢᠭᠰᠡᠨ ᠴᠤ ᠦᠯᠦ ᠣᠯᠣᠨᠠ ᠴᠢᠮᠠ ᠲᠠᠢ ᠳᠠᠢᠲᠤᠭᠴᠢᠳ ᠶᠠᠭᠤ ᠴᠤ ᠪᠢᠰᠢ᠂ ᠳᠡᠮᠡᠢ ᠪᠣᠯᠣᠨᠠ᠃
13 ᠤᠴᠢᠷ ᠨᠢ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠪᠢ ᠪᠠᠷᠠᠭᠤᠨ ᠭᠠᠷ ᠠᠴᠠ ᠴᠢᠨᠢ ᠠᠳᠬᠤᠨ ᠴᠢᠮᠠ ᠳᠤ ᠬᠡᠯᠡᠵᠦ ᠪᠠᠢᠨᠠ᠄ 〈ᠪᠦᠦ ᠠᠶᠤ᠂ ᠪᠢ ᠴᠢᠮᠠ ᠳᠤ ᠲᠤᠰᠠᠯᠠᠨᠠ᠃〉
14 ᠪᠦᠦ ᠠᠶᠤ᠂ ᠥᠲᠥ ᠶᠠᠺᠣᠪ᠂ ᠥᠴᠦᠬᠡᠨ ᠢᠰᠷᠧᠯ ᠡ᠂ ᠪᠢ ᠴᠢᠮᠠ ᠳᠤ ᠲᠤᠰᠠᠯᠠᠨᠠ᠂ ᠴᠢᠨᠦ ᠵᠣᠯᠢᠭᠴᠢ᠂ ᠢᠰᠷᠧᠯ ᠤᠨ ᠠᠷᠢᠭᠤᠨ ᠨᠢᠭᠡᠨ᠂ ᠶᠣᠬᠣᠸᠠ ᠲᠤᠩ᠋ᠬᠠᠭᠯᠠᠵᠤ ᠪᠠᠢᠨᠠ᠃
15 ᠬᠠᠷᠠ᠂ ᠪᠢ ᠴᠢᠮᠠᠶᠢ ᠠᠷᠠᠭᠠ ᠲᠠᠢ᠂ ᠰᠢᠨᠡ᠂ ᠬᠤᠷᠴᠠ ᠪᠤᠲᠠᠯᠤᠭᠴᠢ ᠵᠡᠪᠰᠡᠭ ᠪᠣᠯᠭᠠᠨᠠ᠂ ᠴᠢ ᠠᠭᠤᠯᠠᠰ ᠢ ᠪᠤᠲᠠᠯᠤᠨ᠂ ᠨᠤᠨᠲᠠᠭᠯᠠᠵᠤ ᠲᠣᠯᠣᠭᠠᠳ ᠢ ᠬᠡᠪᠡᠭ ᠮᠡᠲᠦ ᠪᠣᠯᠭᠠᠨᠠ᠃
16 ᠴᠢ ᠲᠡᠳᠡᠭᠡᠷ ᠢ ᠰᠠᠴᠤᠬᠤ ᠳᠤ ᠰᠠᠯᠬᠢ ᠬᠡᠶᠢᠰᠭᠡᠨ᠂ ᠰᠢᠭᠤᠷᠭᠠ ᠪᠤᠲᠠᠷᠠᠭᠠᠨᠠ᠂ ᠬᠠᠷᠢᠨ ᠴᠢ ᠶᠣᠬᠣᠸᠠ ᠪᠠᠷ ᠪᠠᠶᠠᠷᠯᠠᠵᠤ ᠢᠰᠷᠧᠯ ᠤᠨ ᠠᠷᠢᠭᠤᠨ ᠨᠢᠭᠡᠨ ᠢᠶᠡᠷ ᠪᠠᠬᠠᠷᠬᠠᠬᠤ ᠪᠣᠯᠣᠨᠠ᠃
17 ᠦᠭᠡᠭᠦᠦ᠂ ᠶᠠᠳᠠᠭᠤᠴᠤᠳ ᠤᠰᠤ ᠡᠷᠢᠬᠦ ᠪᠣᠯᠪᠠᠴᠤ ᠣᠯᠬᠤ ᠦᠭᠡᠢ ᠴᠠᠩ᠋ᠭᠠᠭᠰᠠᠨ ᠠᠴᠠ ᠪᠣᠯᠵᠤ ᠬᠡᠯᠡ ᠨᠢ ᠬᠠᠲᠠᠵᠤ ᠪᠠᠢᠬᠤ ᠳᠤ ᠶᠣᠬᠣᠸᠠ ᠪᠢ ᠬᠠᠷᠢᠭᠤᠯᠤᠨᠠ ᠢᠰᠷᠧᠯ ᠤᠨ ᠪᠤᠷᠬᠠᠨ ᠪᠢ ᠲᠡᠳᠡᠨ ᠢ ᠣᠷᠬᠢᠬᠤ ᠦᠭᠡᠢ᠃
18 ᠪᠢ ᠨᠢᠴᠦᠭᠦᠨ ᠠᠭᠤᠯᠠᠨ ᠳᠡᠭᠡᠷᠡ ᠭᠣᠣᠯ ᠢ ᠬᠥᠨᠳᠡᠢ ᠶᠢᠨ ᠳᠤᠮᠳᠠ ᠪᠤᠯᠠᠭ ᠢ ᠭᠠᠷᠭᠠᠨᠠ ᠪᠢ ᠴᠥᠯ ᠢ ᠤᠰᠤᠨ ᠤ ᠴᠥᠭᠥᠷᠥᠮ ᠵᠡᠯᠢᠭᠦᠳ ᠭᠠᠵᠠᠷ ᠢ ᠤᠰᠤᠨ ᠤ ᠤᠨᠳᠤᠷᠤᠭᠠ ᠪᠣᠯᠭᠠᠨᠠ᠃
19 ᠪᠢ ᠴᠥᠯ ᠳᠤ ᠬᠤᠱᠢ᠂ ᠬᠤᠸᠠᠢᠰᠠ ᠮᠣᠳᠣ᠂ ᠰᠢᠷᠠᠰᠤᠨ ᠮᠣᠳᠣ ᠬᠢᠭᠡᠳ ᠴᠢᠳᠦᠨ ᠮᠣᠳᠣ ᠶᠢ ᠲᠠᠷᠢᠵᠤ ᠵᠡᠯᠢᠭᠦᠳ ᠲᠠᠯᠠ ᠳᠤ ᠠᠷᠴᠠ᠂ ᠴᠦᠭᠦᠷᠰᠦ᠂ ᠨᠠᠷᠠᠰᠤᠨ ᠮᠣᠳᠣ ᠶᠢ ᠬᠠᠮᠲᠤ ᠰᠠᠭᠤᠯᠭᠠᠨᠠ᠂
20 ᠬᠥᠮᠦᠰ ᠡᠳᠡᠭᠡᠷ ᠢ ᠦᠵᠡᠭᠡᠳ ᠣᠢᠯᠠᠭᠠᠨᠠ ᠶᠣᠬᠣᠸᠠ ᠶᠢᠨ ᠮᠤᠲᠤᠷ ᠡᠳᠡᠭᠡᠷ ᠢ ᠵᠣᠬᠢᠶᠠᠭᠰᠠᠨ ᠢ ᠢᠰᠷᠧᠯ ᠤᠨ ᠠᠷᠢᠭᠤᠨ ᠨᠢᠭᠡᠨ ᠪᠦᠲᠦᠭᠡᠭᠰᠡᠨ ᠢ ᠲᠤᠩ᠋ᠭᠠᠨ ᠤᠬᠠᠭᠠᠷᠠᠬᠤ ᠪᠣᠯᠣᠨᠠ᠃
ᠬᠣᠭᠣᠰᠣᠨ ᠰᠢᠲᠦᠭᠡᠨ ᠨᠦᠭᠦᠳ
21 ᠶᠣᠬᠣᠸᠠ 《ᠵᠠᠷᠭᠤ ᠪᠠᠨ ᠮᠡᠳᠡᠭᠦᠯ》 ᠭᠡᠵᠦ ᠶᠠᠺᠣᠪ ᠤᠨ ᠬᠠᠭᠠᠨ 《ᠪᠠᠷᠢᠮᠲᠠ ᠪᠠᠨ ᠠᠪᠴᠢᠷᠠ》 ᠭᠡᠵᠦ ᠠᠢᠯᠠᠳᠴᠤ ᠪᠠᠢᠨᠠ᠃
22 ᠰᠢᠲᠦᠭᠡᠨ ᠨᠦᠭᠦᠳ ᠣᠢᠷᠠᠲᠤᠨ ᠢᠷᠡᠭ ᠶᠠᠭᠤ ᠲᠣᠬᠢᠶᠠᠯᠳᠤᠬᠤ ᠶᠢ ᠪᠢᠳᠡᠨ ᠳᠦ ᠢᠯᠡᠷᠬᠡᠶᠢᠯᠡᠵᠦ ᠤᠷᠢᠳᠤ ᠶᠢᠨ ᠵᠥᠩ ᠢ ᠨᠢ ᠴᠤ ᠪᠢᠳᠡᠨ ᠳᠦ ᠢᠯᠡᠷᠬᠡᠶᠢᠯᠡᠭ ᠪᠢᠳᠡ ᠲᠡᠭᠦᠨ ᠢ ᠨᠢ ᠰᠢᠯᠭᠠᠵᠤ᠂ ᠦᠷᠡ ᠳ᠋ᠦᠩ ᠢ ᠨᠢ ᠮᠡᠳᠡᠶᠡ ᠵᠠ᠂ ᠪᠣᠯᠬᠤ ᠵᠦᠢᠯᠡᠰ ᠢ ᠪᠢᠳᠡᠨ ᠳᠦ ᠰᠣᠨᠣᠰᠬᠠ᠂
23 ᠢᠷᠡᠭᠡᠳᠦᠢ ᠳᠦ ᠪᠣᠯᠬᠤ ᠶᠠᠪᠤᠳᠠᠯ ᠤᠳ ᠢ ᠢᠯᠡᠷᠬᠡᠶᠢᠯᠡ ᠲᠡᠭᠡᠪᠡᠯ ᠪᠢᠳᠡ ᠲᠠ ᠨᠠᠷ ᠢ ᠪᠤᠷᠬᠠᠳ ᠭᠡᠵᠦ ᠮᠡᠳᠡᠬᠦ ᠪᠣᠯᠣᠨᠠ ᠰᠠᠢᠨ ᠪᠤᠶᠤ ᠮᠠᠭᠤ ᠶᠢ ᠦᠢᠯᠡᠳᠦᠭᠡᠳ ᠦᠵᠡ ᠲᠡᠭᠡᠪᠡᠯ ᠪᠢᠳᠡ ᠰᠠᠨᠳᠤᠷᠴᠤ᠂ ᠬᠠᠮᠲᠤ ᠳᠠᠭᠠᠨ ᠰᠦᠷᠳᠡᠬᠦ ᠪᠣᠯᠣᠨᠠ᠃
24 ᠬᠠᠷᠢᠨ ᠲᠠ ᠨᠠᠷ ᠶᠠᠭᠤ ᠴᠤ ᠪᠢᠰᠢ᠂ ᠦᠢᠯᠡ ᠬᠡᠷᠡᠭ ᠴᠢᠨᠢ ᠬᠣᠭᠣᠰᠣᠨ︕ ᠲᠠ ᠨᠠᠷ ᠢ ᠰᠣᠩ᠋ᠭᠣᠭᠴᠢ ᠨᠢ ᠵᠢᠭᠰᠢᠭᠦᠷᠢ ᠲᠠᠢ᠃
25 ᠪᠢ ᠤᠮᠠᠷᠠᠲᠤ ᠵᠦᠭ ᠡᠴᠡ ᠨᠢᠭᠡᠨ ᠬᠥᠮᠦᠨ ᠢ ᠪᠣᠰᠬᠠᠭᠰᠠᠨ ᠲᠡᠷᠡ ᠨᠠᠷᠠᠨ ᠮᠠᠨᠳᠤᠬᠤ ᠵᠦᠭ ᠡᠴᠡ ᠠᠢᠰᠤᠢ ᠲᠡᠷᠡ ᠮᠢᠨᠦ ᠨᠡᠷᠡ ᠪᠡᠷ ᠲᠤᠩ᠋ᠬᠠᠭᠯᠠᠨᠠ ᠰᠢᠪᠠᠷ ᠢ ᠭᠢᠰᠬᠢᠳᠡᠭ ᠸᠠᠭᠠᠷᠴᠢᠨ ᠠᠳᠠᠯᠢ ᠲᠡᠷᠡ ᠵᠢᠭᠤᠷᠠᠮᠠᠭ ᠢ ᠭᠢᠰᠬᠢᠬᠦ ᠮᠡᠲᠦ ᠪᠡᠷ ᠵᠠᠬᠢᠷᠤᠭᠴᠢᠳ ᠢ ᠭᠢᠰᠬᠢᠬᠦ ᠪᠡᠷ ᠢᠷᠡᠨᠡ᠃
26 ᠬᠡᠨ ᠡᠬᠢᠨ ᠡᠴᠡ ᠪᠡᠨ ᠡᠭᠦᠨ ᠢ ᠢᠯᠡᠷᠬᠡᠶᠢᠯᠡᠵᠦ ᠪᠢᠳᠡᠨ ᠳᠦ ᠮᠡᠳᠡᠭᠦᠯᠪᠡ︖ ᠬᠡᠨ ᠡᠷᠲᠡᠨ ᠡᠴᠡ ᠢᠯᠡᠷᠬᠡᠶᠢᠯᠡᠵᠦ ᠪᠢᠳᠡᠨ ᠢᠶᠡᠷ 《ᠵᠥᠪ ᠪᠠᠢᠵᠠᠢ》 ᠭᠡᠵᠦ ᠬᠡᠯᠡᠭᠦᠯᠪᠡ︖ ᠲᠤᠩ᠋ᠬᠠᠭᠯᠠᠭᠴᠢ ᠠᠯᠠᠭᠠ᠂ ᠰᠣᠨᠣᠰᠬᠠᠭᠴᠢ ᠠᠯᠠᠭᠠ᠂ ᠦᠭᠡ ᠶᠢ ᠴᠢᠨᠢ ᠰᠣᠨᠣᠰᠣᠭᠴᠢ ᠴᠤ ᠠᠯᠠᠭᠠ︕
27 ᠪᠢ ᠠᠩᠬᠠ ᠤᠳᠠᠭᠠ ᠪᠠᠨ ᠽᠢᠶᠣᠨ ᠳᠤ 《ᠠᠩ᠋ᠬᠠᠷ᠂ ᠲᠡᠳᠡᠭᠡᠷ ᠢ ᠠᠩ᠋ᠬᠠᠷ》 ᠭᠡᠰᠡᠨ ᠶᠤᠮ᠂ ᠪᠢ ᠶᠧᠷᠦ᠋ᠰᠠᠯᠧᠮ ᠳᠤ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠦ ᠡᠯᠴᠢ ᠶᠢ ᠥᠭᠭᠥᠨᠡ᠃
28 ᠪᠢ ᠬᠠᠷᠠᠬᠤ ᠳᠤ ᠬᠡᠨ ᠴᠤ ᠠᠯᠠᠭᠠ ᠪᠢ ᠠᠰᠠᠭᠤᠬᠤ ᠳᠤ ᠬᠠᠷᠢᠭᠤᠯᠬᠤ ᠵᠥᠪᠯᠡᠭᠴᠢ ᠲᠡᠳᠡᠨ ᠦ ᠳᠤᠮᠳᠠ ᠠᠯᠠᠭᠠ᠃
29 ᠬᠠᠷᠠ᠂ ᠲᠡᠳᠡ ᠪᠦᠭᠦᠳᠡ ᠳᠡᠮᠡᠢ᠂ ᠦᠢᠯᠡᠰ ᠨᠢ ᠤᠳᠬᠠ ᠦᠭᠡᠢ ᠬᠥᠷᠥᠭ ᠤᠳ ᠨᠢ ᠬᠡᠢ ᠬᠣᠭᠣᠰᠣᠨ ᠪᠢᠯᠡ᠃