ᠢᠰᠠᠢᠶᠠ ᠭᠤᠴᠢᠨ ᠵᠢᠷᠭᠤᠭᠠ
ᠢᠲᠡᠭᠡᠯ ᠠᠯᠳᠠᠭᠤᠯᠬᠤ ᠭᠡᠰᠡᠨ ᠥᠲᠥᠭᠡᠯᠭᠡ
1 ᠾᠧᠽᠧᠺᠢᠶᠠ ᠬᠠᠭᠠᠨ ᠤ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠣᠨ ᠳᠤ᠂ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠰᠧᠨᠠᠾᠧᠷᠢᠪ ᠶᠦᠳᠠ ᠶᠢᠨ ᠪᠦᠬᠦ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠥᠭᠡᠳᠡ ᠬᠦᠷᠴᠦ᠂ ᠡᠵᠡᠯᠡᠨ ᠠᠪᠤᠪᠠ᠃ 2 ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠪᠡᠷ ᠷᠠᠪᠱᠠᠺᠧ ᠶᠢ ᠶᠡᠬᠡ ᠴᠡᠷᠢᠭ ᠲᠠᠢ ᠬᠠᠮᠲᠤ ᠯᠠᠺᠢᠱ ᠡᠴᠡ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ ᠾᠧᠽᠧᠺᠢᠶᠠ ᠬᠠᠭᠠᠨ ᠤᠷᠤᠭᠤ ᠢᠯᠡᠭᠡᠭᠰᠡᠨ ᠳᠦ᠂ ᠲᠡᠷᠡ ᠤᠬᠢᠶᠠᠭᠴᠢ ᠶᠢᠨ ᠲᠠᠯᠠᠪᠠᠢ ᠶᠢᠨ ᠵᠠᠮ ᠳᠡᠭᠡᠷᠡ᠂ ᠳᠡᠭᠡᠳᠦ ᠴᠥᠭᠥᠷᠥᠮ ᠦᠨ ᠤᠰᠤᠨ ᠲᠦᠭᠡᠭᠡᠭᠦᠷ ᠦᠨ ᠬᠣᠭᠣᠯᠠᠢ ᠶᠢᠨ ᠬᠠᠵᠠᠭᠤ ᠳᠤ ᠵᠣᠭᠰᠣᠪᠠ᠃ 3 ᠾᠢᠯᠺᠢᠶᠠ ᠶᠢᠨ ᠬᠦᠦ᠂ ᠣᠷᠳᠣᠨ ᠤ ᠳᠠᠭᠠᠭᠠᠮᠠᠯ ᠡᠯᠢᠶᠠᠺᠢᠮ᠂ ᠪᠢᠴᠢᠭᠡᠴᠢ ᠱᠧᠪᠨᠠ᠂ ᠠᠰᠠᠹ ᠤᠨ ᠬᠥᠪᠡᠭᠦᠨ ᠰᠤᠳᠤᠷᠴᠢ ᠶᠣᠶᠠ ᠨᠠᠷ ᠲᠡᠭᠦᠨ ᠤᠷᠤᠭᠤ ᠣᠴᠢᠪᠠ᠃
4 ᠷᠠᠪᠱᠠᠺᠧ ᠲᠡᠳᠡᠨ ᠳᠦ᠄ 《ᠾᠧᠽᠧᠺᠢᠶᠠ ᠳᠤ ᠬᠡᠯᠡᠭᠲᠦᠨ᠂ ᠠᠰᠢᠷᠢᠶᠠ ᠶᠢᠨ ᠶᠡᠬᠡ ᠬᠠᠭᠠᠨ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠴᠢᠨᠦ ᠢᠲᠡᠭᠡᠭᠰᠡᠨ ᠲᠡᠷᠡ ᠢᠲᠡᠭᠡᠯ ᠭᠡᠵᠦ ᠶᠠᠭᠤ ᠪᠤᠢ︖ 5 ᠪᠢ ᠬᠡᠯᠡᠶᠡ᠂ ᠳᠠᠢᠲᠤᠬᠤ ᠪᠣᠳᠣᠯᠭᠠ ᠪᠠ ᠬᠦᠴᠦ ᠴᠢᠳᠠᠯ ᠭᠡᠳᠡᠭ ᠴᠢᠨᠢ ᠬᠣᠭᠣᠰᠣᠨ ᠦᠭᠡ ᠯᠠ ᠪᠠᠢᠨᠠ᠃ ᠴᠢ ᠬᠡᠨ ᠳᠦ ᠢᠲᠡᠭᠡᠵᠦ ᠨᠠᠳᠠ ᠠᠴᠠ ᠲᠡᠷᠰᠯᠡᠨᠡ ᠪᠤᠢ︖ 6 ᠬᠠᠷᠠ᠂ ᠴᠢ ᠬᠤᠭᠤᠷᠠᠭᠰᠠᠨ ᠬᠤᠯᠤᠰᠤᠨ ᠲᠠᠶᠠᠭ ᠶᠧᠵᠢᠫᠲ ᠲᠤ ᠢᠲᠡᠭᠡᠵᠦ ᠪᠠᠢᠨᠠ᠃ ᠬᠡᠷᠪᠡ ᠬᠥᠮᠦᠨ ᠲᠡᠷᠡ ᠲᠠᠶᠠᠭ ᠢ ᠲᠤᠯᠪᠠᠯ ᠲᠡᠷᠡ ᠨᠢ ᠠᠯᠠᠭᠠᠨ ᠳᠤᠨᠢ ᠰᠢᠭᠠᠵᠤ᠂ ᠴᠣᠭᠣ ᠬᠠᠳᠬᠤᠨᠠ᠂ ᠶᠧᠵᠢᠫᠲ ᠤᠨ ᠬᠠᠭᠠᠨ ᠹᠠᠷᠠᠣ᠋ ᠥᠪᠡᠷ ᠲᠤᠨᠢ ᠢᠲᠡᠭᠡᠭᠴᠢ ᠪᠦᠭᠦᠳᠡ ᠳᠦ ᠢᠩᠭᠢᠬᠦ ᠪᠣᠯᠣᠨᠠ᠃ 7 ᠴᠢ ᠨᠠᠳᠠ ᠳᠤ᠄ 〈ᠪᠢᠳᠡ ᠪᠤᠷᠬᠠᠨ ᠶᠣᠬᠣᠸᠠ ᠳᠠᠭᠠᠨ ᠢᠲᠡᠭᠡᠳᠡᠭ〉 ᠭᠡᠨᠡ ᠤᠤ︖ ᠬᠠᠷᠢᠨ ᠾᠧᠽᠧᠺᠢᠶᠠ ᠥᠪᠡᠷ ᠢᠶᠡᠨ ᠲᠡᠭᠦᠨ ᠦ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠤᠳ ᠪᠠ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠢ ᠨᠤᠷᠠᠭᠠᠵᠤ ᠶᠦᠳᠠ᠂ ᠶᠧᠷᠦ᠋ᠰᠠᠯᠧᠮ ᠳᠤ᠄ 〈ᠲᠠ ᠨᠠᠷ ᠡᠨᠡ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠡᠮᠦᠨᠡ ᠯᠠ ᠮᠥᠷᠭᠥᠬᠦ ᠶᠣᠰᠣᠲᠠᠢ〉 ᠭᠡᠰᠡᠨ ᠪᠢᠰᠢ ᠤᠤ︖ 8 ᠵᠠ᠂ ᠣᠳᠣ ᠴᠢ ᠮᠢᠨᠦ ᠡᠵᠡᠨ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠲᠠᠢ ᠮᠥᠷᠥᠢ ᠲᠠᠯᠪᠢᠵᠤ ᠪᠣᠯᠣᠨᠠ᠃ ᠬᠡᠷᠪᠡ ᠴᠢ ᠬᠣᠶᠠᠷ ᠮᠢᠩ᠋ᠭᠠᠨ ᠮᠣᠷᠢᠲᠠᠨ ᠭᠠᠷᠭᠠᠵᠤ ᠴᠢᠳᠠᠪᠠᠯ᠂ ᠪᠢ ᠴᠢᠮᠠ ᠳᠤ ᠲᠡᠳᠡᠨ ᠦ ᠤᠨᠤᠭᠠ ᠶᠢ ᠥᠭᠭᠥᠶᠡ᠃ 9 ᠴᠢ ᠶᠧᠵᠢᠫᠲ ᠤᠨ ᠴᠡᠷᠢᠭ᠂ ᠮᠣᠷᠢᠲᠠᠳ ᠲᠤ ᠨᠠᠢᠳᠠᠳᠠᠭ ᠪᠠᠢᠯᠠ ᠴᠤ ᠮᠢᠨᠦ ᠡᠵᠡᠨ ᠦ ᠵᠠᠷᠤᠴᠠ ᠨᠠᠷ ᠤᠨ ᠳᠣᠲᠣᠷᠠᠬᠢ ᠬᠠᠮᠤᠭ ᠤᠨ ᠪᠠᠭᠠ ᠳᠠᠷᠤᠭᠠ ᠶᠢ ᠨᠢ ᠴᠤ ᠤᠬᠤᠷᠢᠭᠤᠯᠵᠤ ᠴᠢᠳᠠᠨᠠ ᠭᠡᠵᠢ ᠤᠤ︖ 10 ᠡᠳᠦᠭᠡ ᠪᠢ ᠶᠣᠬᠣᠸᠠ ᠶᠢᠨ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠡᠨᠡ ᠭᠠᠵᠠᠷ ᠢ ᠤᠰᠠᠳᠬᠠᠬᠤ ᠪᠠᠷ ᠢᠷᠡᠭᠰᠡᠨ ᠭᠡᠵᠢ ᠤᠤ︖ ᠶᠣᠬᠣᠸᠠ ᠥᠪᠡᠷ ᠢᠶᠡᠨ ᠨᠠᠳᠠ ᠳᠤ ᠡᠨᠡ ᠨᠤᠲᠤᠭ ᠥᠭᠡᠳᠡ ᠢᠷᠡᠵᠦ ᠤᠰᠠᠳᠬᠠᠬᠤ ᠶᠢ ᠲᠤᠰᠢᠶᠠᠭᠰᠠᠨ ᠶᠤᠮ》 ᠭᠡᠯᠡ᠃
11 ᠡᠯᠢᠶᠠᠺᠢᠮ᠂ ᠱᠧᠪᠨᠠ᠂ ᠶᠣᠶᠠ ᠨᠠᠷ ᠷᠠᠪᠱᠠᠺᠧ ᠳᠤ᠄ 《ᠲᠠ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠠᠷᠠᠮ ᠬᠡᠯᠡ ᠪᠡᠷ ᠶᠠᠷᠢᠨᠠ ᠤᠤ︖ ᠪᠢᠳᠡ ᠣᠢᠯᠠᠭᠠᠨᠠ᠂ ᠢᠪᠷᠠᠢ ᠬᠡᠯᠡ ᠪᠡᠷ ᠪᠦᠦ ᠶᠠᠷᠢ᠃ ᠬᠡᠷᠡᠮ ᠳᠡᠭᠡᠷᠡᠬᠢ ᠠᠷᠠᠳ ᠣᠯᠠᠨ ᠰᠣᠨᠣᠰᠴᠤ ᠪᠠᠢᠨᠠ》 ᠭᠡᠪᠡ᠃ 12 ᠷᠠᠪᠱᠠᠺᠧ᠄ 《ᠮᠢᠨᠦ ᠡᠵᠡᠨ ᠡᠳᠡᠭᠡᠷ ᠦᠭᠡ ᠶᠢ ᠵᠥᠪᠬᠡᠨ ᠲᠠᠨ ᠤ ᠡᠵᠡᠨ ᠬᠢᠭᠡᠳ ᠲᠠ ᠨᠠᠷ ᠲᠤ ᠬᠡᠯᠡᠭᠦᠯᠬᠦ ᠪᠡᠷ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠭᠡᠵᠢ ᠤᠤ︖ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠭᠠᠰᠤ ᠪᠠᠨ ᠢᠳᠡᠵᠦ᠂ ᠰᠢᠭᠡᠰᠦ ᠪᠡᠨ ᠤᠤᠭᠤᠬᠤ ᠪᠣᠯᠴᠢᠬᠠᠭᠠᠳ ᠬᠡᠷᠡᠮ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠭᠠ ᠲᠡᠷᠡ ᠬᠥᠮᠦᠰ ᠲᠦ ᠴᠤ ᠬᠡᠯᠡᠭᠦᠯᠦᠭᠰᠡᠨ ᠪᠢᠰᠢ ᠤᠤ︖》 ᠭᠡᠪᠡ᠃
13 ᠲᠡᠭᠡᠭᠡᠳ ᠷᠠᠪᠱᠠᠺᠧ ᠪᠣᠰᠴᠤ ᠵᠣᠭᠰᠣᠨ ᠢᠪᠷᠠᠢ ᠬᠡᠯᠡ ᠪᠡᠷ ᠬᠠᠰᠬᠢᠷᠤᠨ᠄ 《ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ᠂ ᠶᠡᠬᠡ ᠬᠠᠭᠠᠨ ᠤ ᠦᠭᠡᠰ ᠢ ᠲᠠ ᠨᠠᠷ ᠰᠣᠨᠣᠰᠴᠠᠭᠠ᠃ 14 ᠬᠠᠭᠠᠨ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠾᠧᠽᠧᠺᠢᠶᠠ ᠳᠤ ᠪᠦᠦ ᠮᠡᠬᠡᠯᠡᠭᠳᠡ᠂ ᠲᠡᠷᠡ ᠲᠠ ᠨᠠᠷ ᠢ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠃ 15 ᠾᠧᠽᠧᠺᠢᠶᠠ 〈ᠶᠣᠬᠣᠸᠠ ᠡᠨᠡ ᠬᠣᠲᠠ ᠶᠢ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠤ ᠭᠠᠷ ᠲᠤ ᠲᠤᠰᠢᠶᠠᠬᠤ ᠦᠭᠡᠢ᠂ ᠪᠢᠳᠡᠨ ᠢ ᠯᠠᠪᠲᠠᠢ ᠠᠪᠤᠷᠠᠨᠠ〉 ᠭᠡᠵᠦ ᠲᠠ ᠨᠠᠷ ᠢ ᠶᠣᠬᠣᠸᠠ ᠳᠤ ᠢᠲᠡᠭᠡᠭᠦᠯᠬᠦ ᠭᠡᠰᠡᠨ ᠴᠤ ᠲᠠ ᠨᠠᠷ ᠶᠣᠬᠣᠸᠠ ᠳᠤ ᠪᠦᠦ ᠢᠲᠡᠭᠡ᠃ 16 ᠾᠧᠽᠧᠺᠢᠶᠠ ᠶᠢᠨ ᠬᠢ ᠶᠢ ᠪᠦᠦ ᠰᠣᠨᠣᠰ᠂ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠨᠠᠳᠠ ᠲᠠᠢ ᠨᠠᠢᠷᠠᠮᠳᠠᠨ᠂ ᠨᠠᠳᠠ ᠤᠷᠤᠭᠤ ᠭᠠᠷᠴᠤ ᠢᠷᠠ᠂ ᠲᠡᠭᠡᠪᠡᠯ ᠲᠠ ᠨᠠᠷ ᠤᠨ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦᠨ ᠢᠶᠠᠨ ᠦᠵᠦᠮ ᠢᠨᠵᠢᠷ ᠤᠨ ᠮᠣᠳᠣᠨ ᠠᠴᠠ ᠵᠢᠮᠢᠰ ᠢ ᠨᠢ ᠢᠳᠡᠵᠦ᠂ ᠥᠪᠡᠷ ᠦᠨ ᠢᠶᠠᠨ ᠨᠥᠭᠡᠴᠡᠯᠡᠭᠦᠷ ᠦᠨ ᠤᠰᠤᠨ ᠠᠴᠠ ᠤᠤᠭᠤᠬᠤ ᠪᠣᠯᠣᠨᠠ᠃〉 17 ᠳᠠᠷᠠᠭᠠ ᠨᠢ ᠪᠢ ᠢᠷᠡᠵᠦ᠂ ᠲᠠ ᠨᠠᠷ ᠢ ᠥᠪᠡᠷ ᠦᠨ ᠴᠢᠨᠢ ᠨᠤᠲᠤᠭ ᠰᠢᠭ᠋᠂ ᠦᠷᠡ ᠲᠠᠷᠢᠶᠠ ᠪᠠ ᠳᠠᠷᠠᠰᠤ ᠲᠠᠢ ᠨᠤᠲᠤᠭ᠂ ᠪᠣᠣᠪᠣ ᠪᠠ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠲᠡᠢ ᠨᠤᠲᠤᠭ ᠤᠷᠤᠭᠤ ᠠᠪᠠᠴᠢᠨᠠ᠃ 18 ᠾᠧᠽᠧᠺᠢᠶᠠ᠄ 〈ᠶᠣᠬᠣᠸᠠ ᠠᠪᠤᠷᠠᠨᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠴᠤ ᠲᠠ ᠨᠠᠷ ᠢᠳᠬᠠᠯ ᠢ ᠨᠢ ᠪᠦᠦ ᠠᠪ᠂ ᠠᠯᠢ ᠦᠨᠳᠦᠰᠦᠲᠡᠨ ᠦ ᠪᠤᠷᠬᠠᠳ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠤ ᠭᠠᠷ ᠠᠴᠠ ᠨᠤᠲᠤᠭ ᠢᠶᠠᠨ ᠠᠪᠤᠷᠠᠵᠤ ᠪᠠᠢᠭᠰᠠᠨ ᠪᠤᠢ︖ 19 ᠣᠳᠣ ᠬᠠᠮᠠᠲ᠂ ᠠᠷᠫᠠᠳ᠋ ᠤᠨ ᠪᠤᠷᠬᠠᠳ ᠬᠠᠮᠢᠭᠠ ᠪᠠᠢᠨᠠ︖ ᠰᠧᠹᠠᠷ ᠸᠠᠢᠮ ᠤᠨ ᠪᠤᠷᠬᠠᠳ ᠬᠠᠮᠢᠭᠠ ᠪᠠᠢᠨᠠ︖ ᠲᠡᠳᠡ ᠰᠠᠮᠠᠷᠢᠶᠠ ᠶᠢ ᠮᠢᠨᠦ ᠭᠠᠷ ᠠᠴᠠ ᠠᠪᠤᠷᠠᠭᠰᠠᠨ ᠭᠡᠵᠢ ᠤᠤ︖ 20 ᠡᠳᠡᠭᠡᠷ ᠭᠦᠷᠦᠨ ᠦ ᠬᠠᠮᠤᠭ ᠪᠤᠷᠬᠠᠳ ᠤᠨ ᠳᠣᠲᠣᠷᠠ ᠠᠴᠠ ᠠᠯᠢ ᠨᠢ ᠭᠠᠵᠠᠷ ᠨᠤᠲᠤᠭ ᠢᠶᠠᠨ ᠮᠢᠨᠦ ᠭᠠᠷ ᠠᠴᠠ ᠠᠪᠤᠷᠠᠴᠢᠬᠠᠭᠠᠳ ᠶᠣᠬᠣᠸᠠ ᠮᠢᠨᠦ ᠭᠠᠷ ᠠᠴᠠ ᠶᠧᠷᠦ᠋ᠰᠠᠯᠧᠮ ᠢ ᠠᠪᠤᠷᠠᠨᠠ ᠭᠡᠵᠦ ᠪᠠᠢᠨᠠ ᠪᠤᠢ︖》 ᠭᠡᠪᠡ᠃
21 ᠬᠥᠮᠦᠰ ᠴᠢᠮᠡᠭᠡ ᠦᠭᠡᠢ ᠪᠠᠢᠵᠤ᠂ ᠲᠡᠭᠦᠨ ᠳᠦ ᠨᠢᠭᠡ ᠴᠤ ᠦᠭᠡ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ᠂ ᠬᠠᠭᠠᠨ᠄ 《ᠲᠡᠭᠦᠨ ᠳᠦ ᠪᠦᠦ ᠬᠠᠷᠢᠭᠤᠯ》 ᠭᠡᠵᠦ ᠲᠤᠰᠢᠶᠠᠭᠰᠠᠨ ᠪᠠᠢᠯᠠ᠃ 22 ᠲᠡᠭᠡᠭᠡᠳ ᠣᠷᠳᠣᠨ ᠤ ᠳᠠᠭᠠᠭᠠᠮᠠᠯ ᠾᠢᠯᠺᠢᠶᠠ ᠶᠢᠨ ᠬᠦᠦ ᠡᠯᠢᠶᠠᠺᠢᠮ᠂ ᠪᠢᠴᠢᠭᠡᠴᠢ ᠱᠧᠪᠨᠠ᠂ ᠰᠤᠳᠤᠷᠴᠢ ᠠᠰᠠᠹ ᠤᠨ ᠬᠦᠦ ᠶᠣᠶᠠ ᠨᠠᠷ ᠤᠷᠠᠩ᠋ᠬᠠᠢ ᠬᠤᠪᠴᠠᠰᠤ ᠲᠠᠢ ᠪᠠᠨ ᠾᠧᠽᠧᠺᠢᠶᠠ ᠤᠷᠤᠭᠤ ᠢᠷᠡᠵᠦ᠂ ᠷᠠᠪᠱᠠᠺᠧ ᠶᠢᠨ ᠦᠭᠡ ᠶᠢ ᠲᠡᠭᠦᠨ ᠳᠦ ᠠᠢᠯᠠᠳᠬᠠᠪᠠ᠃