ᠢᠰᠠᠢᠶᠠ ᠲᠠᠪᠢᠨ ᠨᠠᠢ᠌ᠮᠠ
ᠵᠥᠪ ᠪᠠᠴᠠᠭ ᠪᠠᠷᠢᠯᠲᠠ
1 ᠴᠢᠩᠭ᠍ᠠ ᠪᠠᠷ ᠬᠠᠰᠬᠢᠷ︕ ᠪᠦᠦ ᠬᠣᠷᠢᠭᠯᠠ᠂ ᠳᠠᠭᠤ ᠪᠠᠨ ᠪᠦᠷᠢᠶᠡ ᠮᠡᠲᠦ ᠥᠨᠳᠥᠷᠰᠡᠭᠡᠨ ᠠᠷᠠᠳ ᠲᠦᠮᠡᠨ ᠳᠦ ᠮᠢᠨᠢ ᠬᠢᠯᠢᠨᠴᠡ ᠶᠢ ᠨᠢ ᠶᠠᠺᠣᠪ ᠤᠨ ᠭᠡᠷ ᠲᠦ ᠨᠢᠭᠦᠯ ᠢ ᠨᠢ ᠮᠡᠳᠡᠭᠦᠯᠦᠭᠲᠦᠨ᠃
2 ᠲᠡᠳᠡ ᠪᠤᠷᠬᠠᠨ ᠤ ᠪᠠᠨ ᠵᠢᠷᠤᠮ ᠢ ᠣᠷᠬᠢᠳᠠᠭ ᠦᠭᠡᠢ ᠵᠥᠪ ᠢ ᠦᠢᠯᠡᠳᠳᠡᠭ ᠦᠨᠳᠦᠰᠦᠲᠡᠨ ᠰᠢᠭ ᠨᠠᠮᠠᠶᠢ ᠡᠳᠦᠷ ᠡᠳᠦᠷ ᠡᠷᠢᠵᠦ ᠵᠠᠮ ᠢ ᠮᠢᠨᠢ ᠮᠡᠳᠡᠬᠦ ᠶᠢ ᠬᠦᠰᠡᠵᠦ ᠵᠥᠪ ᠰᠢᠢᠳᠪᠦᠷᠢ ᠶᠢᠨ ᠲᠥᠯᠥᠭᠡ ᠨᠠᠳᠠ ᠠᠴᠠ ᠠᠰᠠᠭᠤᠨ ᠪᠤᠷᠬᠠᠨ ᠤᠷᠤᠭᠤ ᠣᠢᠷᠠᠲᠤᠬᠤ ᠶᠢ ᠬᠦᠰᠡᠳᠡᠭ ᠴᠤ
3 〈ᠪᠢᠳᠡ ᠪᠠᠴᠠᠭ ᠪᠠᠷᠢᠳᠠᠭ ᠠᠲᠠᠯᠠ ᠲᠠ ᠶᠠᠭᠠᠬᠢᠭᠠᠳ ᠠᠩ᠋ᠬᠠᠷᠬᠤ ᠦᠭᠡᠢ ᠥᠪᠡᠷ ᠢ ᠪᠠᠨ ᠳᠠᠷᠤᠤ ᠪᠣᠯᠭᠠᠳᠠᠭ ᠠᠲᠠᠯᠠ ᠲᠠ ᠶᠠᠭᠠᠬᠢᠭᠠᠳ ᠠᠩᠵᠠᠭᠠᠷᠠᠳᠠᠭ ᠦᠭᠡᠢ ᠪᠤᠢ︖〉 ᠭᠡᠨᠡ ᠬᠠᠷᠠ᠂ ᠪᠠᠴᠠᠭ ᠪᠠᠷᠢᠬᠤ ᠡᠳᠦᠷ ᠲᠡᠭᠡᠨ ᠲᠠ ᠨᠠᠷ ᠳᠤᠷᠠᠲᠠᠢ ᠪᠠᠨ ᠦᠢᠯᠡᠳᠦᠨ ᠬᠠᠮᠤᠭ ᠠᠵᠢᠯᠴᠢᠨ ᠢᠶᠠᠨ ᠳᠠᠷᠤᠯᠠᠳᠠᠭ᠃
4 ᠬᠠᠷᠠ᠂ ᠲᠠ ᠨᠠᠷ ᠪᠠᠴᠠᠭ ᠪᠠᠷᠢᠪᠠᠴᠤ ᠮᠠᠷᠭᠤᠯᠳᠤᠨ ᠭᠡᠷᠡᠯᠲᠦᠳᠡᠭ ᠬᠣᠷᠣᠨ ᠮᠠᠭᠤ ᠨᠢᠳᠤᠷᠭᠠ ᠪᠠᠷ ᠢᠶᠠᠨ ᠵᠣᠳᠣᠯᠳᠤᠳᠠᠭ᠂ ᠳᠠᠭᠤ ᠪᠠᠨ ᠥᠨᠳᠥᠷ ᠥᠭᠡᠳᠡ ᠰᠣᠨᠣᠰᠬᠠᠶᠠ ᠭᠡᠪᠡᠯ ᠲᠠ ᠨᠠᠷ ᠪᠠᠴᠠᠭ ᠢ ᠥᠨᠥᠳᠥᠷ ᠦᠨ ᠬᠢ ᠮᠡᠲᠦ ᠪᠠᠷᠢᠵᠤ ᠪᠣᠯᠬᠤ ᠦᠭᠡᠢ᠃
5 ᠲᠡᠳᠡᠭᠡᠷ ᠨᠢ ᠮᠢᠨᠦ ᠲᠣᠭᠲᠠᠭᠠᠭᠰᠠᠨ ᠪᠠᠴᠠᠭ ᠪᠠᠷᠢᠯᠲᠠ ᠪᠤᠶᠤ ᠬᠥᠮᠦᠨ ᠦ ᠥᠪᠡᠷ ᠢ ᠪᠠᠨ ᠳᠠᠷᠤᠤ ᠪᠣᠯᠭᠠᠬᠤ ᠡᠳᠦᠷ ᠭᠡᠵᠢ ᠤᠤ︖ ᠲᠠ ᠨᠠᠷ ᠲᠣᠯᠣᠭᠠᠢ ᠪᠠᠨ ᠵᠡᠭᠡᠰᠦ ᠮᠡᠲᠦ ᠪᠥᠬᠥᠢᠯᠭᠡᠨ ᠲᠠᠭᠠᠷ ᠨᠥᠮᠥᠷᠥᠨ ᠦᠨᠡᠰᠦᠨ ᠳᠡᠭᠡᠷᠡ ᠬᠡᠪᠲᠡᠬᠦ ᠶᠢ ᠯᠠ ᠪᠠᠴᠠᠭ ᠪᠠᠷᠢᠯᠲᠠ᠂ ᠶᠣᠬᠣᠸᠠ ᠳᠤ ᠲᠠᠭᠠᠯᠠᠮᠵᠢᠲᠤ ᠡᠳᠦᠷ ᠭᠡᠵᠦ ᠬᠡᠯᠡᠨᠡ ᠤᠤ︖
6 ᠮᠢᠨᠦ ᠲᠣᠭᠲᠠᠭᠠᠭᠰᠠᠨ ᠪᠠᠴᠠᠭ ᠪᠠᠷᠢᠯᠲᠠ ᠪᠣᠯ ᠬᠣᠷᠣᠨ ᠮᠠᠭᠤ ᠶᠢᠨ ᠭᠢᠨᠵᠢ ᠶᠢ ᠮᠤᠯᠲᠤᠯᠤᠨ ᠪᠤᠭᠤᠯᠠᠭᠠᠨ ᠤ ᠣᠭᠣᠰᠣᠷ ᠢ ᠲᠠᠢᠯᠵᠤ ᠳᠠᠷᠤᠯᠠᠭᠳᠠᠭᠰᠠᠳ ᠢ ᠴᠢᠯᠥᠭᠡᠯᠡᠵᠦ ᠠᠯᠢᠪᠠ ᠪᠤᠭᠤᠯᠠᠭᠠ ᠶᠢ ᠡᠪᠳᠡᠬᠦ ᠪᠢᠰᠢ ᠤᠤ︖
7 ᠪᠠᠰᠠ ᠥᠯᠥᠰᠬᠥᠯᠡᠩ ᠬᠥᠮᠦᠨ ᠲᠡᠢ ᠪᠣᠣᠪᠣ ᠪᠠᠨ ᠬᠤᠪᠢᠶᠠᠨ ᠣᠷᠣᠨ ᠭᠡᠷ ᠦᠭᠡᠢ ᠶᠠᠳᠠᠭᠤᠰ ᠢ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠬᠤ ᠨᠢᠴᠦᠭᠦᠨ ᠢ ᠬᠠᠷᠠᠪᠠᠯ ᠨᠥᠮᠥᠷᠭᠡᠬᠦ ᠲᠥᠷᠥᠯ ᠰᠠᠳᠤᠨ ᠠᠴᠠ ᠪᠠᠨ ᠦᠯᠦ ᠳᠠᠯᠳᠠᠯᠠᠬᠤ ᠬᠡᠷᠡᠭ ᠪᠢᠰᠢ ᠤᠤ︖
8 ᠲᠡᠭᠡᠪᠡᠯ ᠭᠡᠷᠡᠯ ᠴᠢᠨᠢ ᠦᠷ ᠦᠨ ᠭᠡᠭᠡ ᠰᠢᠭ ᠰᠠᠴᠤᠷᠠᠵᠤ ᠡᠳᠡᠭᠡᠷᠡᠯ ᠴᠢᠨᠢ ᠲᠦᠷᠭᠡᠨ ᠢᠷᠡᠨᠡ᠂ ᠴᠢᠨᠦ ᠵᠥᠪ ᠴᠢᠨᠦ ᠡᠮᠦᠨᠡ ᠶᠠᠪᠤᠵᠤ ᠶᠣᠬᠣᠸᠠ ᠶᠢᠨ ᠠᠯᠳᠠᠷ ᠴᠢᠨᠦ ᠠᠷᠤ ᠬᠠᠮᠠᠭᠠᠯᠠᠯᠲᠠ ᠪᠣᠯᠣᠨᠠ᠃
9 ᠲᠡᠭᠡᠪᠡᠯ ᠳᠠᠭᠤᠳᠠᠬᠤ ᠳᠤ ᠴᠢᠨᠢ ᠶᠣᠬᠣᠸᠠ ᠬᠠᠷᠢᠭᠤᠯᠤᠨᠠ ᠴᠢ ᠬᠠᠰᠬᠢᠷᠬᠤ ᠳᠤ᠂ ᠲᠡᠷᠡ᠄ 〈ᠪᠢ ᠡ᠊ᠨᠳᠡ ᠪᠠᠢᠨᠠ〉 ᠭᠡᠵᠦ ᠠᠢᠯᠠᠳᠤᠨᠠ ᠬᠡᠷᠪᠡ ᠲᠠᠨ ᠤ ᠬᠢᠨ ᠳᠤᠮᠳᠠ ᠠᠴᠠ ᠪᠠᠨ ᠪᠤᠭᠤᠯᠠᠭᠠ ᠶᠢ᠂ ᠥᠪᠡᠷ ᠡᠴᠡ ᠪᠡᠨ ᠬᠤᠷᠤᠭᠤ ᠪᠠᠷ ᠴᠢᠴᠢᠯᠡᠬᠦ ᠬᠢᠭᠡᠳ ᠬᠣᠣᠷᠲᠤ ᠶᠠᠷᠢᠶᠠ ᠶᠢ ᠵᠠᠢᠯᠠᠭᠤᠯᠪᠠᠯ
10 ᠥᠯᠥᠰᠥᠭᠴᠢᠳ ᠲᠤ ᠰᠡᠳᠬᠢᠯ ᠲᠠᠯᠪᠢᠵᠤ ᠵᠣᠪᠠᠭᠰᠠᠳ ᠤᠨ ᠬᠡᠷᠡᠭᠴᠡᠭᠡ ᠶᠢ ᠬᠠᠩ᠋ᠭᠠᠪᠠᠯ ᠭᠡᠷᠡᠯ ᠴᠢᠨᠢ ᠬᠠᠷᠠᠩ᠋ᠭᠤᠢ ᠳᠤ ᠮᠠᠨᠳᠤᠵᠤ ᠰᠥᠨᠢ ᠴᠢᠨᠢ ᠭᠣᠣᠯ ᠦᠳᠡ ᠮᠡᠲᠦ ᠪᠣᠯᠣᠨᠠ᠂
11 ᠶᠣᠬᠣᠸᠠ ᠴᠢᠮᠠᠶᠢ ᠢᠮᠠᠭᠲᠠ ᠤᠳᠤᠷᠢᠳᠤᠨ ᠭᠠᠩᠳᠠᠭᠰᠠᠨ ᠭᠠᠵᠠᠷ ᠲᠤ ᠬᠡᠷᠡᠭᠴᠡᠭᠡ ᠶᠢ ᠴᠢᠨᠢ ᠬᠠᠩ᠋ᠭᠠᠵᠤ ᠶᠠᠰᠤ ᠶᠢ ᠴᠢᠨᠢ ᠪᠡᠬᠢᠵᠢᠭᠦᠯᠦᠨᠡ ᠴᠢ ᠤᠰᠤᠯᠠᠭᠳᠠᠭᠰᠠᠨ ᠴᠡᠴᠡᠷᠯᠢᠭ ᠮᠡᠲᠦ ᠤᠰᠤ ᠨᠢ ᠰᠢᠷᠭᠢᠬᠦ ᠦᠭᠡᠢ ᠤᠨᠳᠤᠷᠤᠭᠠ ᠮᠡᠲᠦ ᠪᠣᠯᠣᠨᠠ᠃
12 ᠲᠠᠨ ᠤ ᠬᠢᠨ ᠡᠷᠲᠡ ᠴᠠᠭ ᠤᠨ ᠪᠠᠯᠭᠠᠰᠤ ᠨᠤᠭᠤᠳ ᠢ ᠰᠡᠷᠭᠦᠭᠡᠵᠦ ᠦᠶᠡ ᠶᠢᠨ ᠦᠶᠡ ᠳᠦ ᠣᠷᠬᠢᠭᠳᠠᠭᠰᠠᠨ ᠪᠠᠭᠤᠷᠢ ᠨᠤᠭᠤᠳ ᠢ ᠪᠣᠰᠬᠠᠨᠠ ᠴᠢ᠄ 〈ᠰᠡᠲᠡᠷᠬᠡᠢ ᠶᠢ ᠵᠠᠰᠠᠪᠤᠷᠢᠯᠠᠭᠴᠢ ᠭᠤᠳᠤᠮᠵᠢ ᠶᠢ ᠰᠠᠭᠤᠭᠠᠯᠢᠴᠢᠳ ᠲᠠᠢ ᠪᠣᠯᠭᠠᠨ ᠰᠡᠷᠭᠦᠭᠡᠭᠴᠢ〉 ᠭᠡᠵᠦ ᠨᠡᠷᠡᠯᠡᠭᠳᠡᠨᠡ᠃
13 ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠵᠥᠷᠢᠴᠡᠬᠦ᠂ ᠠᠷᠢᠭᠤᠨ ᠡᠳᠦᠷ ᠳᠤᠷᠠᠲᠠᠢ ᠪᠠᠨ ᠦᠢᠯᠡᠳᠬᠦ ᠡᠴᠡ ᠬᠥᠯ ᠢᠶᠡᠨ ᠬᠣᠷᠢᠪᠠᠯ ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠵᠢᠷᠭᠠᠯ᠂ ᠶᠣᠬᠣᠸᠠ ᠶᠢᠨ ᠠᠷᠢᠭᠤᠨ ᠡᠳᠦᠷ ᠢ ᠡᠷᠬᠢᠮ ᠬᠡᠮᠡᠨ ᠡᠷᠬᠢᠮᠯᠡᠵᠦ ᠥᠪᠡᠷ ᠦᠨ ᠢᠶᠠᠨ ᠵᠠᠮ ᠢᠶᠠᠷ ᠶᠠᠪᠤᠬᠤ᠂ ᠥᠪᠡᠷ ᠦᠨ ᠢᠶᠠᠨ ᠳᠤᠷᠠᠲᠠᠢ ᠶᠢ ᠬᠠᠢᠬᠤ᠂ ᠳᠡᠮᠡᠢ ᠦᠭᠡ ᠶᠠᠷᠢᠬᠤ ᠪᠠᠨ ᠪᠣᠯᠢᠪᠠᠯ
14 ᠴᠢ ᠶᠣᠬᠣᠸᠠ ᠶᠢᠨ ᠤᠯᠠᠮ ᠢᠶᠠᠷ ᠵᠢᠷᠭᠠᠬᠤ ᠪᠣᠯᠣᠨᠠ᠂ ᠪᠢ ᠴᠢᠮᠠᠶᠢ ᠳᠡᠯᠡᠬᠡᠢ ᠶᠢᠨ ᠥᠨᠳᠥᠷᠯᠢᠭ ᠤᠳ ᠳᠡᠭᠡᠷᠡ ᠬᠥᠯᠥᠭᠯᠡᠭᠦᠯᠦᠨ ᠡᠴᠢᠭᠡ ᠶᠠᠺᠣᠪ ᠤᠨ ᠴᠢᠨᠢ ᠥᠮᠴᠢ ᠪᠠᠷ ᠴᠢᠮᠠᠶᠢ ᠲᠡᠵᠢᠭᠡᠨᠡ ᠶᠣᠬᠣᠸᠠ ᠶᠢᠨ ᠠᠮᠠ ᠠᠢᠯᠠᠳᠤᠯᠠ᠃